Ua Kalonikali
5 Ko ia naʻe kakato ai ʻa e ngāue kotoa naʻe pau ke fai ʻe Solomone ki he fale ʻo Sihová.+ Naʻe fakahū mai leva ʻe Solomone ʻa e ngaahi meʻa naʻe fakatoputapuʻi+ ʻe heʻene tamai ko Tēvitá, peá ne tuku ʻa e silivá, ko e koulá, pea mo e ngaahi koloá kotoa ki he ngaahi tukuʻanga koloa ʻi he fale ʻo e ʻOtua moʻoní.+ 2 ʻI he taimi ko iá naʻe fakatahatahaʻi ʻe Solomone ʻa e kau mātuʻa ʻo ʻIsilelí, ʻa e ngaahi ʻulumotuʻa kotoa ʻo e ngaahi matakalí, mo e ngaahi ʻeiki ʻo e ngaahi fale ʻo e ngaahi tamai ʻo ʻIsilelí. Naʻa nau haʻu ki Selusalema ke ʻohake ʻa e ʻaʻake ʻo e fuakava ʻa Sihová mei he Kolo-ʻo-Tēvitá,+ ʻa ia ko Saione.+ 3 Naʻe fakatahataha ʻa e kau tangata kotoa ʻo ʻIsilelí ʻi he ʻao ʻo e tuʻí ki he kātoanga* ʻa ia ʻoku fai ʻi he māhina hono fitú.+
4 Ko ia naʻe haʻu ʻa e kau mātuʻa kotoa ʻo ʻIsilelí, pea naʻe hiki hake ʻe he kau Līvaí ʻa e ʻAʻaké.+ 5 Naʻa nau ʻohake ʻa e ʻAʻaké, mo e tēniti feʻiloakiʻangá,+ mo e ngaahi naunau toputapu kotoa naʻe ʻi he tēnití. Naʻe ʻohake ia ʻe he kau taulaʻeikí mo e kau Līvaí.* 6 Ko Tuʻi Solomone mo e fuʻu fakataha fakakātoa ʻo ʻIsilelí ʻa ia naʻe fekau atu ke nau fakataha mai kiate iá, naʻa nau ʻi he ʻao ʻo e ʻAʻaké. Naʻe lahi ʻaupito ʻa e fanga sipi mo e fanga pulu naʻe feilaulauʻí+ pea naʻe ʻikai ke lava ʻo lau pe ʻilo honau tokolahí. 7 Naʻe fakahū leva ʻe he kau taulaʻeikí ʻa e ʻaʻake ʻo e fuakava ʻa Sihová ki hono feituʻú, ki he loki taupotu taha ki loto ʻo e falé, ʻa e Potu Fungani Toputapú, ki he lalo kapakau ʻo e ongo selupimí.+ 8 Ko ia naʻe mafola atu ʻa e kapakau ʻo e ongo selupimí ʻi ʻolunga ʻi he feituʻu naʻe ʻi ai ʻa e ʻAʻaké, ʻo ʻufiʻufi ai mei ʻolunga ʻe he ongo selupimí ʻa e ʻAʻaké mo hono ongo vaʻakau haʻamó.+ 9 Ko e ongo vaʻakau haʻamó naʻe lōloa ʻaupito ia ʻo malava ai ke fai ha sio ki he ongo muiʻi vaʻakaú mei he Potu Toputapú ʻa ia ʻoku ʻi muʻa ʻi he loki taupotu taha ki lotó, ka naʻe ʻikai lava ke fai ha sio ki ai mei tuʻa. Pea ʻoku ʻi ai ia ʻo aʻu mai ki he ʻahó ni. 10 Naʻe ʻikai ha toe meʻa kehe ʻi he ʻAʻaké ka ko e ongo lauʻimaka pē naʻe tuku ai ʻe Mōsese ʻi Hōlepí,+ ʻi he taimi naʻe fai ai ʻe Sihova ha fuakava+ mo e kakai ʻo ʻIsilelí ʻi heʻenau omi mei ʻIsipité.+
11 ʻI he hū mai ʻa e kau taulaʻeikí ki tuʻa mei he feituʻu toputapú (he ko e kau taulaʻeiki kotoa naʻe ʻi aí naʻa nau fakamāʻoniʻoniʻi kinautolu,+ tatau ai pē pe ko e hā ʻa e ngaahi vāhenga naʻa nau kau ki aí),+ 12 ko e kotoa ʻo e kau hiva Līvai+ naʻe kau kia ʻĒsafe,+ Hēmani,+ Situtuni,+ pea ki honau ngaahi fohá mo honau fanga tokouá naʻa nau tui ʻa e teunga tupenu lelei, ʻo nau toʻo ʻa e ngaahi simipale, ngaahi meʻalea filo, mo e ngaahi haʻape; naʻa nau tuʻu ʻi he tafaʻaki fakahahake ʻo e ʻōlitá, pea naʻe kau fakataha mo kinautolu ʻa e kau taulaʻeiki ʻe toko 120 ʻa ia naʻa nau ifiʻi ʻa e ngaahi talupité.+ 13 ʻI he mōmeniti pē ko ia naʻe hanga ai ʻe he kau ifi talupité mo e kau hivá ʻo fakahīkihikiʻi mo fakamālōʻiaʻi fakataha ʻa Sihová, pea ʻi he ʻalu hake ʻa e ongo ʻo e ngaahi talupité, ko e ngaahi simipalé, mo e ngaahi meʻalea kehé ʻi heʻenau fakahīkihikiʻi ʻa Sihová, “he ʻokú ne lelei; ko ʻene ʻofa mateakí ʻoku tolonga ʻo taʻengata,”+ naʻe fakafonu leva ai ʻa e falé, ʻa e fale ʻo Sihová, ʻe ha ʻao.+ 14 Naʻe ʻikai lava ke tuʻu ʻa e kau taulaʻeikí ʻo fakahoko honau fatongiá koeʻuhí ko e ʻaó, he naʻe fakafonu ʻe he lāngilangi ʻo Sihová ʻa e fale ʻo e ʻOtua moʻoní.+