Siona

1 Naʻe hoko mai ʻa e folofola ʻa Sihová kia Siona*+ ko e foha ʻo ʻAmitaí, ʻo pehē: 2 “Tuʻu hake, ʻo ʻalu ki Ninive+ ko e kolo lahí, pea fanongonongo ʻa e fakamaau ki ai, he ko ʻenau anga-fulikivanú kuo aʻu hake kiate au.”

3 Ka naʻe tuʻu hake ʻa Siona ke hola meia Sihova ki Tāsisi; naʻá ne ʻalu hifo ki Siopa ʻo ne ʻilo ha vaka ai ʻoku ʻalu ki Tāsisi. Ko ia naʻá ne ʻoange ʻene totongí peá ne heka ke ʻalu mo kinautolu ki Tāsisi, ʻo mamaʻo meia Sihova.

4 Naʻe ʻohifo leva ʻe Sihova ha fuʻu matangi mālohi ki he tahí, pea naʻe hoko ha fuʻu afā mālohi ʻi he tahí ʻo meimei haveki ai ʻa e vaká. 5 Naʻe mātuʻaki manavahē ʻa e kau kauvaká ʻo kamata ke ui ai ʻa e tokotaha taki taha ʻo kinautolu ki hono ʻotuá ki ha tokoni. Pea naʻe kamata ke nau laku ʻa e ʻū meʻa ʻi he vaká ki tahi, ke ʻai ia ke maʻamaʻa.+ Ka naʻe ʻosi ʻalu hifo ʻa Siona ia ki he ʻana ʻo e vaká, ʻa ia naʻá ne tokoto ʻo ne māʻumohe ai. 6 Naʻe fakaofiofi atu ʻa e ʻeikivaká ʻo ne pehē kiate ia: “Ko e hā ʻokú ke mohe aí? Tuʻu hake ʻo ui ki ho ʻotuá! Heiʻilo naʻa tokanga mai ʻa e ʻOtua moʻoní kiate kitautolu, pea heʻikai ai ke tau ʻauha.”+

7 Pea naʻa nau fepehēʻaki: “Mou haʻu ke tau fai ha lulu+ ke ʻilo pe ko hai ʻe tukuakiʻi ki ai ʻa e fakatamakí ni.” Ko ia naʻa nau fai ha lulu, pea naʻe tō ʻa e lulú kia Siona.+ 8 Naʻa nau pehē ange kiate ia: “Kātaki ʻo tala mai kiate kimautolu, ko hai ʻe tukuakiʻi ki ai ʻa e fakatamaki ko eni kuo hoko mai kiate kitautolú? Ko e hā hoʻo ngāué, pea ko hoʻo haʻú mei fē? Ko fē ho fonuá, pea ko e kakai fē ʻokú ke haʻu mei aí?”

9 Naʻá ne tali ange: “Ko ha Hepelū au, pea ʻoku ou manavahē* kia Sihova ko e ʻOtua ʻo e langí, ʻa e Tokotaha naʻá ne ngaohi ʻa e tahí mo e fonua mōmoá.”

10 ʻI he meʻá ni naʻe toe hoko ai ʻa e kau tangatá ʻo manavahē lahi ange, pea naʻa nau ʻeke ange kiate ia: “Ko e hā ʻa e meʻa kuó ke faí?” (Naʻe ʻilo ʻe he kau tangatá naʻá ne hola meia Sihova, koeʻuhí he naʻá ne ʻosi tala ange kiate kinautolu.) 11 Ko ia naʻa nau pehē ange kiate ia: “Ko e hā ʻoku totonu ke mau fai kiate koe ke ʻai ai ʻa e tahí ke nonga kiate kimautolú?” He naʻe fakautuutu ʻa e hou ange ʻa e tahí. 12 Naʻá ne tali ange: “Hiki au ʻo lī ki tahi, pea ʻe nonga ʻa e tahí kiate kimoutolu; he ʻoku ou ʻilo kuo hoko kiate kimoutolu ʻa e matangi mālohí ni koeʻuhí ko au.” 13 Kae kehe, naʻe ʻaʻalo mālohi* ʻa e kau tangatá ke fakafoki ʻa e vaká ki ʻuta, ka naʻe ʻikai te nau lava, koeʻuhi naʻe fakautuutu ʻa e hou ʻa e tahí ʻo takatakai kiate kinautolu.

14 Naʻa nau ui leva kia Sihova ʻo pehē: “Ko eni, ʻe Sihova, ʻoua muʻa naʻa ʻai ke mau ʻauha koeʻuhi ko e tangatá ni! ʻOua naʻa lau kiate kimautolu ʻa e toto taʻehalaiá, he kuó ke fai pē hoʻo faʻitelihá, ʻe Sihova.” 15 Ko ia naʻa nau hiki leva ʻa Siona ʻo lī ki tahi; pea naʻe tuʻu leva ʻa e hou ʻa e tahí. 16 Pea naʻe hoko ha manavahē lahi ʻi he kau tangatá ni kia Sihova,+ pea naʻa nau fai ha feilaulau kia Sihova mo fai ha ngaahi fuakava.

17 Naʻe tuku mai ʻe Sihova ʻi he taimi ko ení ha fuʻu ika ke ne folo ʻa Siona, ko ia naʻe hoko ai ʻa Siona ʻo ʻi he kete ʻo e iká ʻi he ʻaho ʻe tolu mo e pō ʻe tolu.+