Fakamaau

19 ʻI he ngaahi ʻaho ko iá, ʻi he taimi naʻe ʻikai ai ke ʻi ai ha tuʻi ʻi ʻIsilelí,+ ko ha Līvai ʻa ia naʻe nofo ʻi he taimi ko iá ʻi ha feituʻu mamaʻo ʻi he feituʻu moʻungaʻia ʻo ʻIfalemí+ naʻá ne ʻave ha sinifu mei Pētelihema+ ʻi Siutá ke hoko ko hono uaifi. 2 Ka naʻe taʻefaitōnunga kiate ia ʻa ʻene sinifú, pea naʻe liʻaki ia ʻe heʻene sinifú ka ne ʻalu ki he fale ʻo ʻene tamaí ʻi Pētelihema ʻi Siutá. Naʻá ne nofo ai ʻi he māhina ʻe fā. 3 Naʻe muimui atu leva ʻiate ia ʻa hono husepānití ke fakakolekole ia ke ne foki mai; pea naʻá ne ʻalu mo ʻene tangata tauhí pea mo ha ongo ʻasi. Ko ia naʻe ʻomi ia ʻe he fefiné ki he fale ʻo ʻene tamaí. ʻI he sio kiate ia ʻa ʻene tamaí, naʻá ne fiefia ke feʻiloaki mo ia. 4 Ko ia ko ʻene tamai-ʻi-he-fonó, ʻa e tamai ʻa e kiʻi fefiné, naʻá ne fakaʻaiʻai ia ke na nofo ʻi ha ʻaho ʻe tolu; pea naʻá na kai mo inu, pea naʻá ne mohe ai.

5 ʻI he ʻaho hono faá, ʻi heʻenau tuʻu pongipongia hake ke nau ʻalú, naʻe pehē ange ʻe he tamai ʻa e kiʻi fefiné ki hono foha-ʻi-he-fonó: “Kai ha meʻa ke ke maʻu ai ha ivi,* pea mou toki ō leva.” 6 Ko ia naʻá na tangutu hifo ai, pea naʻá na kai mo inu fakataha; ʻi he hili iá naʻe pehē ange ʻe he tamai ʻa e kiʻi fefiné ki he tangatá: “Nofo mai muʻa he poó ni pea ʻai ke fiefia ho lotó.” 7 ʻI he mālanga hake ʻa e tangatá ke ʻalú, naʻe toutou kōlenga ange ʻa e tamai ʻa hono uaifí, ko ia naʻá ne toe mohe ai ʻi he pō ko iá.

8 ʻI heʻene tuʻu pongipongia hake ke ʻalu ʻi he ʻaho hono nimá, naʻe pehē ange ʻe he tamai ʻa e kiʻi fefiné: “Kai muʻa ha meʻa ke ke maʻu ai ha ivi.”* Pea naʻá na toe nofo ai pē ʻo aʻu ki heʻene māʻuloloa ʻa e ʻahó mo na kei kai ai pē. 9 ʻI he mālanga hake ʻa e tangatá ke ʻalu mo ʻene sinifú pea mo hono tauhí, naʻe pehē kiate ia ʻe heʻene tamai-ʻi-he-fonó, ʻa e tamai ʻa e kiʻi fefiné: “Vakai, ko eni! Kuo mei efiafi. Mou nofo mai muʻa he poó ni. Ko ē kuo mei ʻosi ʻa e ʻahó. Nofo heni he poó ni pea ʻai ke fiefia ho lotó. ʻE lava ke mou toki tuʻu pongipongia hake ʻapongipongi ki hoʻomou fonongá pea ʻalu ki ho ʻapí.”* 10 Kae kehe, naʻe ʻikai ke loto ʻa e tangatá ke nofo ʻi ha toe pō ʻe taha, ko ia naʻá ne tuʻu hake peá ne fononga ʻo aʻu ki Siepusi, ʻa ia ko Selusalema ia.+ Naʻe ʻiate ia ʻa e ongo ʻasi kuo ʻosi teuteú, mo ʻene sinifú, mo hono tauhí.

11 ʻI heʻenau ofi atu ki Siepusí, naʻe meimei poʻuli. Ko ia naʻe pehē ange ai ʻe he tauhí ki hono ʻeikí: “Te tau afe ʻi he kolo ko eni ʻo e kau Siepusí pea nofo ai he poó ni?” 12 Ka naʻe pehē ange kiate ia ʻe hono ʻeikí: “ʻE ʻikai te tau afe ʻi ha kolo ʻo ha kau muli ʻa ia ʻoku ʻikai ko ha kau ʻIsileli. ʻE hoko atu pē ʻetau fonongá ke aʻu ki Kīpea.”+ 13 Naʻá ne pehē ange leva ki hono tauhí: “Haʻu pea te tau feinga ke aʻu ki he taha ʻo e ngaahi kolo ko eé; te tau nofo ʻi he poó ni ʻi Kīpea pe ʻi Lama.”+ 14 Ko ia naʻe hoko atu ʻenau fonongá, pea naʻe kamata ke tō ʻa e laʻaá ʻi heʻenau ofi atu ki Kīpeá, ʻa ia ʻoku ʻo Penisimani ia.

15 Ko ia naʻa nau afe ki ai pea nau hū atu ke mohe ʻi Kīpea. ʻI heʻenau hū pē ki lotó, naʻa nau tangutu ʻi he malaʻe fakakoló,* ka naʻe ʻikai ke ʻave kinautolu ʻe ha taha ki hono falé ke nau mohe ai.+ 16 Faifai atu pē ʻi he efiafi ko iá, naʻe hū mai ha tangataʻeiki hili ʻene ngāue ʻi he vaó. Ko ʻene haʻú mei he feituʻu moʻungaʻia ʻo ʻIfalemí,+ pea naʻá ne nofo ʻi ha vahaʻa taimi ʻi Kīpea; ka ko e kau nofo ʻi he koló ko e faʻahinga mei he haʻa Penisimaní.+ 17 ʻI he hanga hake ʻa e tangataʻeikí ʻo mamata ki he tangata fonongá ʻi he malaʻe fakakoló, naʻá ne pehē ange: “Ko hoʻo ʻalú ki fē, pea ko hoʻo haʻú mei fē?” 18 Naʻá ne tali ange: “Ko ʻemau fononga mai mei Pētelihema ʻi Siutá ke mau ō ki ha feituʻu mamaʻo ʻi he feituʻu moʻungaʻia ʻo ʻIfalemí, ʻa ia ko ʻeku haʻú mei ai. Naʻá ku ʻalu ki Pētelihema ʻi Siutá,+ pea ko ʻeku ʻalú ki he fale ʻo Sihová,* ka ʻoku ʻikai ke ʻave au ʻe ha taha ki hono falé. 19 ʻOku mau maʻu ʻa e mohuku mo e meʻakai feʻunga ki heʻemau ongo ʻasí,+ mo e mā+ pea mo e uaine kiate au, mo e fefiné, pea mo homa tauhí. ʻOku ʻikai te mau masiva ʻi ha meʻa.” 20 Kae kehe, naʻe pehē ange ʻe he tangataʻeikí: “Fakatauange ke ke maʻu ʻa e melinó! Tuku ke u ʻoatu ha faʻahinga meʻa pē te ke fiemaʻu. Kae ʻoua pē naʻá ke nofo he poó ni ʻi he malaʻe fakakoló.” 21 Ko ia naʻá ne ʻomi ia ki hono falé pea ʻoange ʻa e meʻakai ki he ongo ʻasí. Pea naʻa nau fufulu honau vaʻé pea nau kai mo inu.

22 Lolotonga ʻenau fiefiá, naʻe takatakaiʻi ʻa e falé ʻe ha kau tangata ʻo e koló ʻa ia ko e kau koto taʻeʻaonga ʻo nau tuki ʻi he matapaá, pea nau hanganaki pehē ki he tangataʻeiki naʻe ʻoʻona ʻa e falé: “ʻOmai ki tuʻa ʻa e tangata ʻa ia naʻe hū ki ho falé, koeʻuhí ke mau mohe* mo ia.”+ 23 Ko ia naʻe hū atu ai ki tuʻa ʻa e tokotaha naʻe ʻoʻona ʻa e falé ʻo pehē ange kiate kinautolu: “ʻIkai, ʻe hoku fanga tokoua, ʻoua te mou fai ha tōʻonga fulikivanu. Kātaki muʻa, ko e tangatá ni ko ha fakaafe ia ʻi hoku falé. ʻOua te mou fai ʻa e tōʻonga fakamā ko ení. 24 Ko eni ʻa hoku ʻofefine kei nofo anga-maʻá pea mo e sinifu ʻa e tangatá ni. Tuku ke u ʻomi kinaua ki tuʻa, pea ʻe lava ke mou fakamaaʻi kinaua kapau kuo pau ke mou fai pehē.*+ Ka kuo pau ke ʻoua naʻa mou fai ʻa e tōʻonga fakamā ko ení ki he tangatá ni.”

25 Ka naʻe fakafisi ʻa e kau tangatá ke fanongo kiate ia, ko ia naʻe puke ʻe he tangatá ʻa ʻene sinifú+ ʻo ne ʻomi ia ki tuʻa kiate kinautolu. Naʻa nau tohotohoʻi ia pea pāʻusiʻi ia ʻi he poó kotoa ʻo aʻu ki he pongipongí. Pea naʻa nau fekau ia ke ne ʻalu ʻi he mafoa ʻa e atá. 26 Naʻe haʻu pongipongia ʻa e fefiné ʻo ne tō ʻi he hūʻanga ʻo e fale ʻo e tangata ʻa ia naʻe ʻi ai ʻa hono ʻeikí peá ne tokoto ai ʻo aʻu ki heʻene ʻaho. 27 ʻI he tuʻu hake ʻa hono ʻeikí ʻi he pongipongí ʻo fakaava ʻa e ngaahi matapā ʻo e falé ke ne hū ki tuʻa ke hoko atu ʻene fonongá, naʻá ne sio ki he fefiné, ʻa ʻene sinifú, ʻokú ne tokoto ʻi he hūʻanga ʻo e falé pea ko hono nimá ʻoku ʻi he hūʻangá. 28 Ko ia naʻá ne pehē ange kiate ia: “Tuʻu hake; tau ō.” Ka naʻe ʻikai ke ne fai mai ha tali. Naʻe fakaheka leva ia ʻe he tangatá ʻi he ʻasí pea kamata fononga ki hono ʻapí.

29 ʻI heʻene aʻu ki hono falé, naʻá ne toʻo ʻa e hele faifeilaulaú peá ne puke ʻa ʻene sinifú ʻo ne tuʻutuʻu kongokonga ia ki he konga ʻe 12 pea ʻoatu ha konga ʻe taha ki he feituʻu taki taha ʻo ʻIsilelí. 30 Ko kinautolu kotoa naʻe sio aí naʻa nau pehē: “Kuo teʻeki ai ʻaupito ke hoko pe mātā ha meʻa pehē mei he ʻaho naʻe ʻalu hake ai ʻa e kau ʻIsilelí mei he fonua ko ʻIsipité ʻo aʻu mai ki he ʻahó ni. Fakakaukau ki ai,* fai hano aleaʻi,+ pea tala mai kiate kimautolu ʻa e meʻa ke faí.”