Fakamaau
13 Naʻe toe fai ʻe he kau ʻIsilelí ʻa e meʻa naʻe kovi ʻi he vakai mai ʻa Sihová,+ pea naʻe tuku kinautolu ʻe Sihova ki he nima ʻo e kau Filisitiá+ ʻi he taʻu ʻe 40.
2 Lolotonga ení, naʻe ʻi ai ha tangata mei Sola+ mei he fāmili ʻo e haʻa Taní,+ ʻa ia ko hono hingoá ko Mānoa.+ Ko hono uaifí naʻe paʻa pea ʻikai te ne fanau.+ 3 ʻI he faai mai ʻa e taimí, naʻe hā ʻa e ʻāngelo ʻa Sihová ki he fefiné ʻo ne pehē kiate ia: “Vakai, ʻokú ke paʻa pea ʻikai te ke fanau. Ka te ke feitama pea fāʻeleʻi ha tama tangata.+ 4 Peá ke tokanga ke ʻoua naʻá ke inu ha uaine pe ko ha inu pē ʻoku ʻi ai ha ʻolokaholo,+ pea ʻoua naʻá ke kai ha faʻahinga meʻa pē ʻoku taʻemaʻa.+ 5 Vakai! Te ke feitama peá ke fāʻeleʻi ha tama tangata, pea ʻe ʻikai pā ha tele ki hono ʻulú,+ koeʻuhí ko e tamá te ne hoko ko ha Nāsili ʻa e ʻOtuá mei hono fanauʻí,* pea te ne taki ʻi hono fakahaofi ʻa ʻIsileli mei he nima ʻo e kau Filisitiá.”+
6 Naʻe ʻalu leva ʻa e fefiné ʻo ne tala ki hono husepānití: “Naʻe haʻu kiate au ha tangata ʻa e ʻOtua moʻoní, pea naʻe hangē hono fōtungá ko ha ʻāngelo ʻa e ʻOtua moʻoní, ʻo fakaleleloto ʻaupito. Naʻe ʻikai te u ʻeke pe ko ʻene haʻú mei fē, pea naʻe ʻikai te ne tala mai kiate au ʻa hono hingoá.+ 7 Ka naʻá ne pehē mai, ‘Vakai! Te ke feitama peá ke fāʻeleʻi ha tama tangata. Pea ʻoua naʻá ke inu uaine pe ko ha inu pē ʻoku ʻi ai ha ʻolokaholo, pea ʻoua naʻá ke kai ha faʻahinga meʻa pē ʻoku taʻemaʻa, koeʻuhí ʻe hoko ʻa e tamá ko ha Nāsili ʻa e ʻOtuá mei hono fanauʻí* ʻo aʻu ki he ʻaho ʻo ʻene maté.’”
8 Naʻe kōlenga ʻa Mānoa kia Sihova ʻo ne pehē: “Kātaki muʻa Sihova. Tuku muʻa ʻa e tangata ʻa e ʻOtua moʻoní ʻa ia naʻá ke toki fekauʻi maí ke toe haʻu ʻo ne fakahinohino kimaua fekauʻaki mo e meʻa te ma fai ki he tama ʻe fanauʻí.” 9 Ko ia naʻe fanongo ʻa e ʻOtua moʻoní kia Mānoa, pea naʻe toe haʻu ʻa e ʻāngelo ʻa e ʻOtua moʻoní ki he fefiné lolotonga ia naʻá ne nofo ʻi tuʻa; naʻe ʻikai ʻiate ia ʻa Mānoa ko hono husepānití. 10 Naʻe lele fakavave ʻa e fefiné ʻo tala ki hono husepānití: “Vakai! Kuo hā kiate au+ ʻa e tangata ko ia naʻe haʻu ʻi he ʻaho ko eé.”
11 Naʻe tuʻu hake leva ʻa Mānoa ʻo ne ʻalu mo hono uaifí. Naʻá ne ʻalu atu ki he tangatá ʻo ne pehē kiate ia: “Ko koe ʻa e tangata naʻe lea ki hoku uaifí?” Naʻá ne pehē ange: “Ko ia.” 12 Pea naʻe pehē ange ʻe Mānoa: “ʻOfa ke hoko ʻa hoʻo leá! ʻE fēfē hono ʻohake ʻa e tamá, pea ko e hā ʻene ngāué?”+ 13 Ko ia naʻe pehē ʻe he ʻāngelo ʻa Sihová kia Mānoa: “ʻOku totonu ke fakaʻehiʻehi ho uaifí mei he meʻa kotoa pē naʻá ku fakahā kiate iá.+ 14 ʻE ʻikai te ne kai ha faʻahinga meʻakai pē ʻoku ngaohi mei he kālepí, ʻe ʻikai te ne inu uaine pe ko ha faʻahinga inu pē ʻoku ʻi ai ha ʻolokaholo,+ pea ʻe ʻikai te ne kai ha faʻahinga meʻa pē ʻoku taʻemaʻa.+ Ko e meʻa kotoa pē naʻá ku fekau kiate iá, tuku ke ne fai ki ai.”
15 Naʻe pehē ange leva ʻe Mānoa ki he ʻāngelo ʻa Sihová: “Ke ke nofo mai muʻa, pea tuku ke ma ngaohi maʻau ha kiʻi kosi.”+ 16 Ka naʻe pehē ange ʻe he ʻāngelo ʻa Sihová kia Mānoa: “Kapau te u nofo, ʻe ʻikai te u kai hoʻo meʻakaí; ka ʻo kapau ʻokú ke fie ʻoatu ha feilaulau tutu kia Sihova, ʻe lava ke ke ʻoatu ia.” Naʻe ʻikai ke ʻilo ʻe Mānoa ko e ʻāngelo ia ʻa Sihova. 17 Pea naʻe pehē ange ʻe Mānoa ki he ʻāngelo ʻa Sihová: “Ko hai ho hingoá,+ koeʻuhí ke ma fakalāngilangiʻi koe ʻi he hoko hoʻo leá?” 18 Kae kehe, naʻe pehē ange ʻe he ʻāngelo ʻa Sihová kiate ia: “Ko e hā ʻokú ke ʻeke ai fekauʻaki mo hoku hingoá, he ko ha hingoa fakaofo ia?”
19 Naʻe toʻo leva ʻe Mānoa ʻa e kiʻi kosí mo e feilaulau meʻakaí* ʻo ne ʻoatu kinaua ʻi he funga maká kia Sihova. Pea naʻá Ne fai ha meʻa fakaofo lolotonga ʻa e sio ʻa Mānoa mo hono uaifí. 20 ʻI he ʻalu hake ʻa e uloʻi afí mei he ʻōlitá ki he langí, naʻe ʻalu hake ʻa e ʻāngelo ʻa Sihová ʻi he uloʻi afí mei he ʻōlitá lolotonga ia ʻa e sio pē ʻa Mānoa mo hono uaifí. Naʻá na tō foʻohifo leva ki he kelekelé. 21 Naʻe ʻikai ke toe hā ʻa e ʻāngelo ʻa Sihová kia Mānoa mo hono uaifí. Naʻe ʻiloʻi leva ai ʻe Mānoa tā ko e ʻāngelo ia ʻa Sihova.+ 22 Naʻe pehē ange leva ʻe Mānoa ki hono uaifí: “Kuo pau moʻoni ke ta mate, koeʻuhí ko e ʻOtuá ia kuó ta sio ki aí.”+ 23 Ka naʻe pehē ange ʻe hono uaifí kiate ia: “Kapau naʻe loto ʻa Sihova ke tāmateʻi kitaua, naʻe ʻikai te ne mei tali ha feilaulau tutu+ mo ha feilaulau meʻakai mei hota nimá, naʻe ʻikai te ne mei fakahā mai kiate kitaua ʻa e ngaahi meʻa kotoa ko ení, pea naʻe ʻikai te ne mei tala mai kiate kitaua ha taha ʻo e ngaahi meʻá ni.”
24 Ki mui ai, naʻe fāʻeleʻi ʻe he fefiné ha tama tangata pea naʻe fakahingoa ia ko Samisoni;+ pea ʻi he tupu hake ʻa e tamasiʻí, naʻe hokohoko atu hono faitāpuekina ia ʻe Sihová. 25 ʻI he faai mai ʻa e taimí, naʻe kamata ke ueʻi ia+ ʻe he laumālie ʻo Sihová ʻi Mahaneha-tani,+ ʻi he vahaʻa ʻo Sola mo ʻEsitaolí.+