Fakamaau

15 ʻI he hili mei ai ha taimi, ʻi he ngaahi ʻaho ʻo e utu-taʻu uité, naʻe ʻalu atu ai ʻa Samisoni ke ʻaʻahi ki hono uaifí, ʻo ne ʻave ha kiʻi kosi. Naʻá ne pehē: “ʻOku ou fie hū ki hoku uaifí ʻi he loki mohé.”* Ka naʻe ʻikai fakaʻatā ia ʻe he tamai ʻa e fefiné ke ne hū ki loto. 2 Naʻe pehē ange ʻe heʻene tamaí: “Naʻá ku fakakaukau au, ‘Kuo pau pē ʻokú ke fehiʻa moʻoni ʻiate ia.’+ Ko ia naʻá ku foaki ai ia ki he tangata fononga ʻi hoʻo malí.+ ʻIkai ʻoku hoihoifua ange ʻa hono tehiná ʻiate ia? ʻAve ange muʻa ia ko hano fetongi.” 3 Kae kehe, naʻe pehē ange ʻe Samisoni: “Heʻikai lava leva ke tukuakiʻi au he taimí ni ʻe he kau Filisitiá ki haʻaku fai ha kovi kiate kinautolu.”

4 Ko ia naʻe ʻalu ʻa Samisoni ʻo puke ha fanga fōkisi ʻe 300. Naʻá ne toʻo leva ha ngaahi tūhulu, peá ne haʻi tautau toko ua ʻa e fanga fōkisí ʻi honau hikú, pea fokotuʻu ʻa e tūhulu ʻe taha ʻi he vahaʻa ʻo e hiku ʻe ua taki taha. 5 Naʻá ne tutu leva ʻa e ngaahi tūhulú pea tuku atu ʻa e fanga fōkisí ki he ngaahi ngoue uite ʻa e kau Filisitiá naʻe teʻeki tuʻusí. Naʻá ne tutu ʻa e meʻa kotoa pē mei he haʻingá ki he uite naʻe teʻeki tuʻusí, pea pehē ki he ngaahi ngoue kālepí mo e ngaahi ngoue ʻōlivé.

6 Naʻe ʻeke ʻe he kau Filisitiá: “Ko hai naʻá ne fai ení?” Naʻe tala kiate kinautolu: “Ko Samisoni, ko e mali ʻo e ʻofefine ʻo e tangata Timinaá, koeʻuhí he naʻá ne ʻave ʻa e uaifi ʻo Samisoní ʻo ne foaki ia ki he tangata fononga ʻi heʻene malí.”+ Ko ia naʻe ʻalu hake ai ʻa e kau Filisitiá ʻo tutu ʻa e fefiné mo ʻene tamaí ʻaki ʻa e afi.+ 7 Naʻe pehē ange leva ʻe Samisoni kiate kinautolu: “Kapau ko e anga eni hoʻomou tōʻongá, heʻikai te u foʻi kae ʻoua kuó u fai ha sāuni kiate kimoutolu.”+ 8 Naʻá ne taaʻi taha taha kinautolu ʻi ha tāmate lahi, ʻi he hili iá, naʻá ne ʻalu hifo ʻo nofo ʻi ha ʻana* ʻo e fuʻu maka ko ʻEitamí.

9 Ki mui ai, naʻe ʻalu hake ʻa e kau Filisitiá ʻo ʻapitanga ʻi Siuta pea naʻa nau ʻalu fano holo ʻi Lehi.+ 10 Pea naʻe pehē ʻe he kau tangata ʻo Siutá: “Ko e hā kuo mou haʻu ai kiate kimautolú?” Ko ia naʻa nau tali ange: “Kuo mau haʻú ke puke* ʻa Samisoni, ke fai kiate ia ʻa e meʻa tofu pē naʻá ne fai kiate kimautolú.” 11 Ko ia naʻe ʻalu hifo ʻa e kau tangata ʻe toko 3,000 ʻo Siuta ki he ʻana* ʻo e fuʻu maka ko ʻEitamí pea nau pehē kia Samisoni: “ʻOku ʻikai koā te ke ʻilo ʻoku puleʻi kitautolu ʻe he kau Filisitiá?+ Ko ia ko e hā kuó ke fai ai eni kiate kimautolú?” Naʻá ne pehē ange kiate kinautolu: “Hangē pē ko e meʻa naʻa nau fai kiate aú, naʻe pehē ʻa e meʻa naʻá ku fai kiate kinautolú.” 12 Ka naʻa nau pehē kiate ia: “Kuo mau haʻú ke puke* koe pea ke tuku atu koe ki he kau Filisitiá.” Naʻe pehē ange leva ʻe Samisoni: “Mou fai mai ha fakapapau heʻikai te mou ʻohofi au.” 13 Naʻa nau pehē ange kiate ia: “ʻIkai, te mau haʻi pē koe pea tuku atu koe kiate kinautolu, ka heʻikai te mau tāmateʻi koe.”

Ko ia naʻa nau haʻi ia ʻaki ha ongo maea foʻou pea ʻohake ia mei he fuʻu maká. 14 ʻI heʻene aʻu ki Lehí, naʻe kaikaila fiefia ʻi he ikuna ʻa e kau Filisitiá ʻi heʻenau fetaulaki mo iá. Naʻe fakaivia leva ia+ ʻe he laumālie ʻo Sihová, pea naʻe hoko ʻa e ongo maea ʻi hono nimá ʻo hangē ko ha filo līneni naʻe māngia ʻi he afí, pea naʻe ngangana ʻa e haʻí mei hono nimá.+ 15 Pea naʻá ne ʻilo ha hui kaungao foʻou ʻo ha ʻasi tangata; naʻá ne ala atu ʻo puke ia ʻo ne taaʻi ʻaki ia+ ha kau tangata ʻe toko 1,000. 16 Naʻe pehē leva ʻe Samisoni:

“ʻAki ʻa e hui kaungao ʻo ha ʻasi—ko e fokotuʻunga ʻe taha, ko e fokotuʻunga ʻe ua!

ʻAki ʻa e hui kaungao ʻo ha ʻasi naʻá ku taaʻi ʻaki ha kau tangata ʻe toko 1,000.”+

17 ʻI he hili ʻene leá, naʻá ne lī ʻa e hui kaungaó pea ui ʻa e feituʻu ko iá ko Lama-lehi.*+ 18 Pea naʻá ne hoko ʻo fieinua ʻaupito, peá ne tautapa kia Sihova ʻo ne pehē: “Ko koe ia naʻá ke ʻomai ʻa e fuʻu fakamoʻui ko ení ki he nima ʻo hoʻo sevānití. Ka ko eni, te u mate koā he fieinuá pea tō ki he nima ʻo e kau taʻekamú?” 19 Ko ia naʻe avangi ʻe he ʻOtuá ha luo naʻe ʻi Lehi, pea naʻe tafe mei ai+ ha vai. ʻI heʻene inú, naʻe toe foki mai hono laumālié* peá ne toe ake. Ko e ʻuhinga ia naʻá ne ui ai ʻa e feituʻú ko ʻEni-hakole,* ʻa ia ʻoku ʻi Lehi ia ʻo aʻu mai ki he ʻahó ni.

20 Pea naʻá ne fakamaau ʻi ʻIsileli ʻi he ngaahi ʻaho ʻo e kau Filisitiá ʻi he taʻu ʻe 20.+