Ua Sione

1 Ko au ko e tangataʻeikí,* ko ʻeku tohi atu ki he fefine kuo filí* pea ki heʻene fānaú, ʻa ia ʻoku ou ʻofa moʻoni aí, pea ʻoku ʻikai ko au pē ka ʻoku toe pehē foki mo e faʻahinga kotoa kuo nau hoko ʻo ʻiloʻi ʻa e moʻoní, 2 koeʻuhí ko e moʻoni ʻoku nofo ʻiate kitautolú pea ʻe ʻiate kitautolu ai pē ʻo taʻengatá. 3 ʻE ʻiate kitautolu ʻa e ʻofa maʻataʻatā, meesi mo e melino mei he ʻOtuá ko e Tamaí pea meia Sīsū Kalaisi, ko e ʻAlo ʻo e Tamaí, fakataha mo e moʻoni mo e ʻofa.

4 ʻOku ou fiefia lahi ʻaupito koeʻuhi kuó u ʻiloʻi ʻoku ʻaʻeva ʻa e niʻihi ʻo hoʻo fānaú ʻi he moʻoní,+ ʻo hangē tofu pē ko e fekau ko ia naʻa tau maʻu mei he Tamaí. 5 Ko ia ʻoku ou kole atu eni kiate koe, ʻe fefine, ke tau feʻofaʻaki. (ʻOku ou tohi atu kiate koe, ʻo ʻikai ko ha fekau foʻou, ka ko ha fekau ʻa ia naʻa tau maʻu mei he kamataʻangá.)+ 6 Pea ko e meʻa ʻeni ʻoku ʻuhinga ki ai ʻa e ʻofá, ko ʻetau ʻaʻeva ai pē ʻo fakatatau ki heʻene ngaahi fekaú.+ Ko ʻeni ia ʻa e fekaú, hangē tofu pē ko ia naʻa mou fanongo ai mei he kamataʻangá, ke mou ʻaʻeva ai pē ʻi he ʻofá. 7 He ʻoku tokolahi ʻa e kau kākā kuo nau ʻalu atu ki he māmaní,+ ko e faʻahinga ʻoku ʻikai te nau fakahaaʻi totonu ʻa Sīsū Kalaisi, ʻa ʻene haʻu ko ia naʻe fai ʻi he kakanó.+ Ko ʻeni ia ʻa e tokotaha kākaá pea mo e fili ʻo Kalaisí.+

8 Mou tokanga kiate kimoutolu, ke ʻoua naʻa mole meiate kimoutolu ʻa e ngaahi meʻa naʻa mau ngāue ke lavaʻí, ka ke mou maʻu ha totongi kakato.+ 9 Ko e tokotaha kotoa pē ʻoku ʻalu kehe ʻo ʻikai te ne nofo maʻu ʻi he akonaki ʻa e Kalaisí, ʻoku ʻikai te ne tali ʻa e ʻOtuá.+ Ko e tokotaha ʻoku nofo maʻu ʻi he akonaki ko ení ko e tokotaha ia ʻokú ne tali fakatouʻosi ʻa e Tamaí pea mo e ʻAló.+ 10 Kapau ʻoku ʻalu atu ha taha kiate kimoutolu pea ʻikai te ne ʻoatu ʻa e akonaki ko ení, ʻoua ʻe tali ia ki homou ʻapí+ pe lea fakafeʻiloaki kiate ia. 11 He ko e tokotaha ʻokú ne lea fakafeʻiloaki kiate iá ʻokú ne poupou ki heʻene ngaahi ngāue fulikivanú.

12 Neongo ʻoku lahi ʻa e ngaahi meʻa ke u tohi atu ai kiate kimoutolú, ʻoku ʻikai te u loto ke fai ia ʻaki ha pepa mo ha vaitohi, ka ʻoku ou ʻamanaki pē te u ʻalu atu kiate kimoutolu pea ke u talanoa mata ki he mata mo kimoutolu, koeʻuhí ke hoko hoʻomou fiefiá ʻo kakato.

13 Ko e fānau ho tokoua lahí, ʻa e tokotaha ko ia kuo filí, ʻoku ʻoatu honau ʻofa kiate koe.