ʻUluaki Kalonikali

26 Naʻe peheni ʻa e vahevahe ʻo e kau leʻo matapaá:+ Mei he haʻa Kolá, ko Meselemaia+ ko e foha ʻo Kole mei he ngaahi foha ʻo ʻĒsafé. 2 Pea naʻe maʻu ʻe Meselemaia ha ngaahi foha: Ko Sākalaia ʻa e ʻuluaki fohá, ko Sitieli ʻa e fika uá, ko Sepataia ʻa e fika tolú, ko Satinieli ʻa e fika faá, 3 ko ʻĪlami ʻa e fika nimá, ko Siohanani ʻa e fika onó, ko ʻElihoi-nai ʻa e fika fitú. 4 Pea naʻe maʻu ʻe ʻŌpeti-ʻītomi ha ngaahi foha: Ko Semaia ʻa e ʻuluaki fohá, ko Sihosapati ʻa e fika uá, ko Sioa ʻa e fika tolú, ko Sakali ʻa e fika faá, ko Netanili ʻa e fika nimá, 5 ko ʻAmieli ʻa e fika onó, ko ʻĪsaka ʻa e fika fitú, pea ko Puletai ʻa e fika valú; he naʻe faitāpuekina ia ʻe he ʻOtuá.

6 Pea ko hono foha ko Semaiá, naʻe fanauʻi kiate ia ha ngaahi foha ʻa ia naʻa nau hoko ko e kau pule ʻo e fale ʻo ʻenau ngaahi tamaí, he ko e kau tangata toʻa mo lavameʻa kinautolu. 7 Ko e ngaahi foha ʻo Semaiá: Ko ʻŌteni, Lafaeli, ʻŌpeti, mo ʻElisapati; pea ko hono ongo tokoua ko ʻIlaiū mo Semakaiá ko ha ongo tangata lavameʻa foki mo kinaua. 8 Ko e faʻahingá ni kotoa ko e hako ia ʻo ʻŌpeti-ʻītomí; ko kinautolu mo honau ngaahi fohá pea mo honau fanga tokouá ko ha kau tangata lavameʻa mo taau ki he ngāué, ko e toko 62 meia ʻŌpeti-ʻītomí. 9 Pea naʻe maʻu ʻe Meselemaia+ ha ngaahi foha mo ha fanga tokoua, ko e kau tangata lavameʻa ʻe toko 18. 10 Pea ko Hosa mei he ngaahi foha ʻo Mēlalí naʻá ne maʻu ha ngaahi foha. Ko Simeli naʻe ʻulú, he neongo naʻe ʻikai ko ia ʻa e ʻuluaki fohá, naʻe fakanofo ia ʻe heʻene tamaí ke ne hoko ko e ʻulu, 11 ko Hilikaia ʻa e fika uá, ko Tepalaia ʻa e fika tolú, ko Sākalaia ʻa e fika faá. Ko e kotoa ʻo e ngaahi foha mo e fanga tokoua ʻo Hosá naʻe toko 13.

12 ʻI he vahevahe ko eni ʻo e kau leʻo matapaá, naʻe maʻu ʻe he kau tangata naʻe ʻulú ʻa e ngaahi fatongia ʻo hangē tofu pē ko ia naʻe maʻu ʻe honau fanga tokouá, ke fakahoko fatongia ʻi he fale ʻo Sihová. 13 Ko ia naʻa nau fai ha lulu,+ ʻo tatau pē ʻa e siʻi mo e lahi ʻo fakatatau ki he ngaahi fale ʻo ʻenau ngaahi tamaí, ki he ngaahi matapā kehekehe. 14 Pea naʻe tō ʻa e lulu ki he hahaké kia Selemia. Naʻa nau fai ʻa e lulu kia Sākalaia ko hono fohá, ko ha tokotaha faleʻi fakapotopoto, pea naʻe tō ʻa e lulu naʻe fai maʻaná ki he tokelaú. 15 Ko ʻŌpeti-ʻītomi ki he tongá, pea naʻe vaheʻi ki hono ngaahi fohá+ ʻa e ngaahi fale tukuʻanga koloá. 16 Ko Sūpimi mo Hosa+ naʻe ʻakinaua ʻa e hihifó, ʻo ofi ki he Matapā Saleketí ʻi he hala lahi ʻoku hake ki ʻolungá, ʻo tuʻu fehāngaaki ʻa e kulupu leʻo mo e kulupu leʻo; 17 ko e kau Līvai ʻe toko ono naʻe ʻi he hahaké; ki he tokelaú, ko e toko fā ʻi he ʻaho taki taha pea ki he tongá, ko e toko fā ʻi he ʻaho taki taha; pea ki he ngaahi fale tukuʻanga koloá,+ naʻe toko ua mei hē pea toko ua mei hē; 18 ki he fale ʻotu pou ki he hihifó, naʻe ʻi ai ʻa e toko fā ʻi he hala lahí+ pea ko e toko ua ʻi he fale ʻotu poú. 19 Ko e ngaahi vahevahe eni ʻo e kau leʻo matapā mei he ngaahi foha ʻo e haʻa Kolá pea mo e haʻa Mēlalí.

20 ʻI he fekauʻaki mo e kau Līvaí, naʻe tokangaʻi ʻe ʻĀhisa ʻa e ngaahi koloa ʻo e fale ʻo e ʻOtua moʻoní pea mo e ngaahi tukuʻanga koloa ʻo e ngaahi meʻa kuo fakatoputapuʻí.*+ 21 Mei he ngaahi foha ʻo Lataná, ʻa ia ko e ngaahi foha ʻo e hako ʻo Kēsoni ʻoku kau kia Lataná, ʻa ia ko e ngaahi ʻulumotuʻa ʻo e ngaahi fale ʻo e ngaahi tamai ʻoku kau ki ai ʻa Latana ko e Kēsoní, naʻe ʻi ai ʻa Sehieli+ 22 mo e ongo foha ʻo Sehielí, ʻa Setami mo hono tokoua ko Sioelí. Naʻa nau tokangaʻi ʻa e ngaahi tukuʻanga koloa ʻo e fale ʻo Sihová.+ 23 Mei he kau ʻAmilamí, kau ʻIsaʻaá, kau Hepeloní, pea mo e kau ʻOsielí,+ 24 ko Sepueli ko e foha ʻo Kēsomi ko e foha ʻo Mōsesé naʻe taki ʻi hono tokangaʻi ʻa e ngaahi fale tukuʻanga koloá. 25 Ko hono fanga tokouá, ʻa ia ko e hako ʻo ʻEliesé,+ ko Lehapaia,+ Sisaia, Siolame, Sikeli, pea mo Selomoti. 26 Ko Selomoti ko ení mo hono fanga tokouá naʻa nau tokangaʻi ʻa e kotoa ʻo e ngaahi tukuʻanga koloa ʻo e ngaahi meʻa naʻe fakatoputapuʻí,+ ʻa ia naʻe hanga ʻe Tuʻi Tēvita,+ mo e ngaahi ʻulumotuʻa ʻo e ngaahi fale ʻo ʻenau ngaahi tamaí,+ mo e ngaahi ʻeiki ʻo e ngaahi toko afé mo e ngaahi toko teaú, pea mo e ngaahi ʻeikitaú ʻo fakatoputapuʻí. 27 Mei he ngaahi taú+ pea mei he ngaahi koloa veté,+ naʻa nau fakatoputapuʻi ai ʻa e ngaahi meʻa ke tokangaʻiʻaki ʻa e fale ʻo Sihová; 28 pehē foki ki he meʻa kotoa naʻe hanga ʻe Sāmiuela ko e matalōloá,+ mo Saula ko e foha ʻo Kisí, mo ʻĀpina+ ko e foha ʻo Naá, pea mo Sioape+ ko e tama ʻa Seluvaiá+ ʻo fakatoputapuʻí. Ko e hā pē ha meʻa naʻe fakatoputapuʻi ʻe ha taha naʻe tuku atu ia ke tokangaʻi ʻe Selomiti* mo hono fanga tokouá.

29 Mei he kau ʻIsaʻaá,+ ko Kenanaia mo hono ngaahi fohá naʻe vaheʻi kiate kinautolu ʻa e ngaahi ngafa fakaepule ki tuʻá ke nau hoko ko e kau ʻōfisa mo e kau fakamaau+ ki ʻIsileli.

30 Mei he kau Hepeloní,+ ko Hasapaia mo hono fanga tokouá, ko e kau tangata lavameʻa ʻe toko 1,700, naʻa nau pule ki hono tokangaʻi ʻo ʻIsileli ʻi he vahefonua hihifo ʻo Sioataní ʻi he kotoa ʻo e ngāue ʻa Sihová pea mo e ngāue ʻa e tuʻí. 31 Mei he kau Hepeloní, ko Sēlisa+ ʻa e ʻulumotuʻa ʻo e kau Hepeloní ʻi he laine hohoko ʻo e fale ʻo ʻenau ngaahi tamaí. ʻI he taʻu hono 40 ʻo e tuʻi ʻa Tēvitá,+ naʻe kumi ai ʻiate kinautolu, pea naʻe maʻu ʻi honau lotolotongá ha kau tangata toʻa mo lavameʻa ʻi Siasea,+ ʻi Kiliati. 32 Pea ko e tokolahi ʻo hono fanga tokouá ko e kau tangata lavameʻa ʻe toko 2,700, ko e ngaahi ʻulumotuʻa ʻo e ngaahi fale ʻo ʻenau ngaahi tamaí. Ko ia naʻe vaheʻi kinautolu ʻe Tuʻi Tēvita ke nau pule ki he haʻa Lūpení, mo e haʻa Katá, pea mo e vaeua ʻo e matakali ʻo e haʻa Manasé, ʻi he meʻa kotoa pē ʻa e ʻOtua moʻoní pea mo e meʻa ʻa e tuʻí.