Ua Kalonikali
31 ʻI he ʻosi pē ʻenau fai ʻa e meʻa kotoa ko ení, naʻe ʻalu atu ʻa e kau ʻIsileli kotoa naʻe ʻi aí ki he ngaahi kolo ʻo Siutá, pea naʻa nau haveki ʻa e ngaahi pou maka toputapú,+ tā hifo ʻa e ngaahi pou ʻakau toputapú*+ pea holoki ʻa e ngaahi potu māʻolungá+ mo e ngaahi ʻōlitá+ ʻi Siuta mo Penisimani kotoa, pea pehē ki ʻIfalemi mo Manase,+ kae ʻoua kuo nau fakaʻauha fakaʻaufuli ia, ʻi he hili iá, naʻe foki ʻa e kau ʻIsilelí kotoa ki honau ngaahi koló, ʻa e tokotaha taki taha ki hono tofiʻa.
2 Pea naʻe fakanofo ʻe Hesekaia ʻa e kau taulaʻeikí ki honau ngaahi vāhengá+ mo e kau Līvaí ki honau ngaahi vāhengá,+ ʻa e kau taulaʻeikí mo e kau Līvaí taki taha ki heʻenau ngāué,+ ke nau fai ʻa e ngaahi feilaulau tutú mo e ngaahi feilaulau feʻinasiʻakí, ke nau fakahoko fatongia pea ke ʻoatu ʻa e fakamālō mo e fakahīkihiki ʻi he ngaahi matapā ʻo e ongo lotoʻā* ʻo Sihová.+ 3 Naʻe foaki ha ʻinasi ʻi he ngaahi koloa ʻa e tuʻí ki he ngaahi feilaulau tutú,+ ʻo kau ai ʻa e ngaahi feilaulau ʻi he pongipongí mo e efiafí,+ pea pehē ki he ngaahi feilaulau tutu ki he ngaahi Sāpaté,+ mo e ngaahi māhina foʻoú,+ pea mo e ngaahi kātoangá,+ ʻo fakatatau ki he meʻa kuo hiki ʻi he Lao ʻa Sihová.
4 ʻIkai ko ia pē, naʻá ne fekauʻi ʻa e kakai naʻe nofo ʻi Selusalemá ke nau ʻoange ʻa e ʻinasi naʻe totonu ke ʻoange ki he kau taulaʻeikí pea mo e kau Līvaí,+ koeʻuhí ke lava ai ʻo nau fai pau* ki he lao ʻa Sihová. 5 ʻI hono ʻoatu pē ʻa e tuʻutuʻuní, naʻe foaki ʻe he kau ʻIsilelí ʻo lahi ʻaupito ʻa e ʻuluaki fua ʻo e uité, mo e uaine foʻou, lolo,+ mo e hone, pea mo e ʻuluaki fua ʻo e meʻa kotoa ʻi he ngoué;+ naʻa nau ʻomi ʻo lahi ʻa e vahe hongofulu ʻo e meʻa kotoa pē.+ 6 Pea ko e kakai ʻo ʻIsileli pea mo Siuta naʻa nau nofo ʻi he ngaahi kolo ʻo Siutá naʻa nau ʻomi foki ʻa e vahe hongofulu ʻo e fanga pulu mo e fanga sipi pea mo e vahe hongofulu ʻo e ngaahi meʻa toputapu+ ʻa ia naʻe fakatoputapuʻi kia Sihova ko honau ʻOtuá. Naʻa nau ʻomi ia ʻo fokotuʻutuʻu ʻi he ngaahi fokotuʻunga lahi. 7 ʻI he māhina hono tolú+ naʻa nau kamata fokotuʻu ai ʻenau ngaahi meʻaʻofá ʻi he ngaahi fokotuʻunga; pea naʻe ʻosi ʻenau fai iá ʻi he māhina hono fitú.+ 8 ʻI he haʻu ʻa Hesekaia mo e houʻeikí ʻo sio ki he ngaahi fokotuʻunga meʻaʻofá, naʻa nau fakahīkihikiʻi ʻa Sihova pea tāpuakiʻi ʻa hono kakai ko ʻIsilelí.
9 Naʻe fehuʻi ʻa Hesekaia ki he kau taulaʻeikí mo e kau Līvaí ʻo fekauʻaki mo e ngaahi fokotuʻunga meʻaʻofá, 10 pea ko ʻAsalaia ko e taulaʻeiki lahi ʻo e fale ʻo Sātokí naʻá ne pehē kiate ia: “Mei he taimi naʻa nau kamata ʻomi ai ʻa e ngaahi meʻaʻofá ki he fale ʻo Sihová,+ kuo kai ai ʻa e kakaí ʻo mākona pea kei hulu pē ʻa e meʻa ʻoku toé, he kuo tāpuakiʻi ʻe Sihova ʻa hono kakaí, pea ʻoku toe mei ai ʻa e fuʻu koloá ni.”+
11 ʻI he meʻá ni naʻe tala ange ai ʻe Hesekaia ke nau teuteu ʻa e ngaahi loki tukuʻanga koloa*+ ʻi he fale ʻo Sihová, ko ia naʻa nau teuteu ia. 12 Naʻe hokohoko faitōnunga ai pē ʻenau ʻomi ʻa e ngaahi meʻaʻofá, ko e ngaahi vahe hongofulú,+ pea mo e ngaahi meʻa toputapú; ko Konanaia ko e Līvaí naʻe tuku ke ne tokangaʻi ʻa e meʻa kotoa ko ení, pea ko hono tokoua ko Simí naʻe fika ua hake ki aí. 13 Ko Siheli, ʻAsasia, Nahati, ʻAsaeli, Selimoti, Siosapati, ʻEliela, ʻIsimakaia, Mahati, pea mo Penaia ʻa e kau fakafofonga naʻa nau tokoni kia Konanaia mo hono tokoua ko Simí, ʻi he tuʻutuʻuni ʻa Tuʻi Hesekaiá, pea ko ʻAsalaia naʻá ne tokangaʻi ʻa e fale ʻo e ʻOtua moʻoní. 14 Pea ko Kole ko e foha ʻo ʻIminaá, ʻa e leʻo matapā Līvai ʻi he tafaʻaki hahaké,+ naʻá ne tokangaʻi ʻa e ngaahi foaki loto-tauʻatāina+ naʻe fai ki he ʻOtua moʻoní, pea naʻá ne tufa ʻa e meʻaʻofa naʻe foaki kia Sihová+ pea mo e ngaahi meʻa mātuʻaki toputapú.+ 15 Pea naʻe ʻi he malumalu ʻo ʻene tatakí ʻa ʻĪteni, Miniamini, Sīsua, Semaia, ʻAmalaia, pea mo Sikania, ʻi he ngaahi kolo ʻo e kau taulaʻeikí,+ ʻi honau lakanga falalaʻangá, ke tufa tatau ki honau fanga tokoua ʻi he ngaahi vāhengá,+ ʻo tatau pē ki he lalahi mo e iiki. 16 Naʻe tānaki atu eni ki he tufa naʻe fai ki he kakai tangata mei he taʻu tolú ʻo faai ki ʻolunga naʻe hiki ʻi he tohi hohokó, ʻa ia naʻa nau haʻu fakaʻaho ke ngāue ʻi he fale ʻo Sihová pea ke fakahoko ʻa e ngaahi fatongia ʻa honau ngaahi vāhengá.
17 Ko e tohi hohoko ʻo e kau taulaʻeikí naʻe fakatatau ki he fale ʻo ʻenau ngaahi tamaí,+ ʻo hangē pē ko e kau Līvai ʻa ia naʻe taʻu 20 ʻo faai ki ʻolungá,+ ʻo fakatatau ki he ngaahi fatongia ʻo honau ngaahi vāhengá.+ 18 Ko e tohi hohokó naʻe kau ki ai ʻa e kotoa ʻo ʻenau fānaú, ko honau ngaahi uaifí, ko honau ngaahi fohá, mo honau ngaahi ʻofefiné, ʻa ʻenau fakatahaʻangá kotoa—he naʻa nau hanganaki fakamāʻoniʻoniʻi kinautolu ki heʻenau ngāue toputapú koeʻuhí ko honau lakanga falalaʻangá— 19 pea pehē ki he hako ʻo ʻĒloné, ʻa e kau taulaʻeiki naʻe nofo ʻi he ngaahi feituʻu kaikaiʻanga takatakai ʻi honau ngaahi koló.+ ʻI he ngaahi koló kotoa, naʻe fakahaaʻi ai ʻa e hingoa ʻo e kau tangata te nau foaki ʻa e ngaahi ʻinasi ki he tangata kotoa pē ʻi he lotolotonga ʻo e kau taulaʻeikí pea ki he tokotaha kotoa pē naʻe kau ʻi he tohi hohoko ʻo e kau Līvaí.
20 Naʻe fai eni ʻe Hesekaia ʻi Siuta kotoa, pea naʻe hokohoko atu ʻene fai ʻa e meʻa naʻe lelei mo totonú peá ne faitōnunga ʻi he ʻao ʻo Sihova ko hono ʻOtuá. 21 Pea ko e ngāue kotoa naʻá ne fakahoko ʻi he kumi ki hono ʻOtuá, pe naʻe fekauʻaki mo e ngāue ki he fale ʻo e ʻOtua moʻoní+ pe ko e Laó mo e fekaú, naʻá ne fai ʻaufuatō ia, pea naʻá ne lavameʻa.