ʻUluaki Tuʻi
9 ʻI he ʻosi pē hono langa ʻe Solomone ʻa e fale ʻo Sihová, mo e fale* ʻo e tuʻí,+ pea mo e meʻa kotoa pē naʻe loto ʻa Solomone ke ngaohí,+ 2 naʻe hā ʻa Sihova kia Solomone ko hono tuʻo uá ia, ʻo hangē pē ko ʻene hā kiate ia ʻi Kipioné.+ 3 Naʻe folofola ʻa Sihova kiate ia: “Kuó u fanongo ki hoʻo lotu pea mo e kole kuó ke fai ki ha hōifua ʻi hoku ʻaó. Kuó u fakatoputapuʻi ʻa e fale ko eni kuó ke langá ʻaki hono fokotuʻu maʻu ai ʻa hoku hingoá,+ pea ko hoku matá mo hoku lotó ʻe ʻi ai maʻu ai pē.+ 4 Pea ko koe, kapau te ke ʻaʻeva+ ʻi hoku ʻaó ʻo hangē ko e ʻaʻeva ʻa hoʻo tamai ko Tēvitá, ʻi he loto haohaoa+ pea mo e faitotonu,+ ʻi hoʻo fai ʻa e meʻa kotoa pē kuó u fekau kiate koé,+ peá ke talangofua ki heʻeku ngaahi tuʻutuʻuní mo ʻeku ngaahi fakamāú,+ 5 te u toki fokotuʻu maʻu ʻa e taloni ʻo ho puleʻangá ki ʻIsileli ʻo taʻengata, ʻo hangē tofu pē ko ʻeku talaʻofa ki hoʻo tamai ko Tēvitá, ʻo pehē, ‘ʻE ʻikai ʻaupito ke taʻehoko hake ha tangata ʻi ho hakó ki he taloni ʻo ʻIsilelí.’+ 6 Ka ʻo kapau te mou tafoki mo homou ngaahi fohá mei he muimui kiate aú pea ʻikai te mou tauhi ʻeku ngaahi fekaú mo ʻeku ngaahi tuʻutuʻuni kuó u tuku ʻi homou ʻaó, pea mou ʻalu ʻo tauhi ʻa e ngaahi ʻotua kehé pea punou kiate kinautolu,+ 7 te u tuʻusi ʻa ʻIsileli mei he funga ʻo e fonua ʻa ia kuó u foaki kiate kinautolú,+ pea ko e fale kuó u fakatoputapuʻi maʻa hoku hingoá te u siʻaki mei hoku ʻaó,+ pea ʻe hoko ʻa ʻIsileli ko ha lumaʻanga* pea mo ha manukiaʻanga ʻi he lotolotonga ʻo e ngaahi kakaí kotoa.+ 8 Pea ko e falé ni ʻe hoko ko e fokotuʻunga maumau.+ Ko e tokotaha kotoa pē ʻe ʻalu atu aí te ne sio mo fakaofoʻia pea te ne mapumapu ʻi he fakatumutumu mo pehē, ‘Ko e hā naʻe fai ai ʻe Sihova ʻa e meʻa ko iá ki he fonuá ni pea mo e falé ni?’+ 9 Pea te nau pehē, ‘Koeʻuhí he naʻa nau liʻaki ʻa Sihova ko honau ʻOtuá, ʻa ia naʻá ne ʻomi ʻenau fanga kuí mei he fonua ko ʻIsipité, pea naʻa nau tali ʻa e ngaahi ʻotua kehe pea punou kiate kinautolu mo tauhi kiate kinautolu. Ko e ʻuhinga ia kuo ʻomi ai ʻe Sihova ʻa e kotoa ʻo e fakatamakí ni kiate kinautolú.’”+
10 ʻI he ʻosi ʻa e taʻu ʻe 20, ʻa ia naʻe langa ai ʻe Solomone ʻa e ongo falé, ʻa e fale ʻo Sihová mo e fale* ʻo e tuʻí,+ 11 naʻe ʻomi ai ʻe Hailame+ ko e tuʻi ʻo Tāiá kia Solomone ʻa e papa sita mo e siunipa pea mo e koula ʻo fakatatau ki heʻene fiemaʻú,+ pea naʻe foaki ʻe Tuʻi Solomone kia Hailame ʻa e kolo ʻe 20 ʻi he fonua ko Kālelí. 12 Ko ia naʻe ʻalu atu ʻa Hailame mei Tāia ke vakaiʻi ʻa e ngaahi kolo naʻe foaki ange ʻe Solomone kiate iá, ka naʻe ʻikai te ne fiemālie ai.* 13 Naʻá ne pehē: “Ko e hā ʻa e faʻahinga kolo ko eni kuó ke foaki mai kiate aú, ʻe hoku tokoua?” Ko ia naʻe hoko ai ia ʻo ui ko e Fonua ko Kapulí* ʻo aʻu mai ki he ʻahó ni. 14 Lolotonga ení, naʻe ʻave ʻe Hailame ki he tuʻí ʻa e talēniti* koula+ ʻe 120.
15 Ko e fakamatala eni fekauʻaki mo e faʻahinga naʻe kounaʻi ʻe Tuʻi Solomone ke nau ngāue+ maʻana ke langa ʻa e fale ʻo Sihová,+ ko hono fale* ʻoʻoná, ko e foʻi māʻolungá,*+ ko e ʻā ʻo Selusalemá, Hāsoa,+ Mekito,+ pea mo Kēselí.+ 16 (Naʻe haʻu ʻa Felo ko e tuʻi ʻo ʻIsipité ʻo ne hamu ʻa Kēseli pea tutu ia, peá ne tāmateʻi foki mo e kau Kēnani+ naʻe nofo ʻi he koló. Ko ia naʻá ne foaki ia ko ha meʻaʻofa fakamāvae* ki hono ʻofefiné,+ ʻa e uaifi ʻo Solomoné.) 17 Naʻe langa* ʻe Solomone ʻa Kēseli, ko e tafaʻaki ki lalo ʻo Pete-holoní,+ 18 ko Pealati,+ mo Tema ʻi he toafá, ʻi loto ʻi he fonuá, 19 pea pehē ki he ngaahi kolo tukuʻanga koloa kotoa ʻa Solomoné, ko e ngaahi kolo tukuʻanga salioté,+ ko e ngaahi kolo ki he kau tangata heka hōsí, pea mo ha meʻa pē naʻe loto ʻa Solomone ke langa ʻi Selusalema, ʻi Lepanoni, pea ʻi he fonua kotoa naʻá ne pule ki aí. 20 Pea ko e meʻa ki he kakai kotoa naʻe toe ʻi he kau ʻĀmolí, ko e kau Hetí, ko e kau Pēlisí, ko e kau Heví, pea mo e kau Siepusí,+ ʻa ia naʻe ʻikai te nau kau ki he kakai ʻo ʻIsilelí,+ 21 ko honau hako naʻe toe ʻi he fonuá—ʻa e faʻahinga naʻe ʻikai lava ʻe he kau ʻIsilelí ke tuku atu ki he fakaʻauhá—naʻe kounaʻi kinautolu ʻe Solomone ke nau ngāue ko e kau pōpula ʻo aʻu mai ki he ʻahó ni.+ 22 Ka naʻe ʻikai ke ʻai ʻe Solomone ha taha ʻo e kau ʻIsilelí ko ha kau pōpula,+ he ko kinautolú ko ʻene kau tau, kau sevāniti, ngaahi ʻeiki, kau ʻōfisa fakakautau, pea mo e kau pule ʻo ʻene kau heka salioté mo ʻene kau tangata heka hōsí. 23 Ko e kau pule ʻo e kau kōvana fakavahefonua naʻa nau tokangaʻi ʻa e ngāue ʻa Solomoné naʻe toko 550, ko e kau taki ngāue ia ki he kakai naʻa nau fai ʻa e ngāué.+
24 Ka naʻe ʻalu hake ʻa e ʻofefine ʻo Feló+ mei he Kolo-ʻo-Tēvitá+ ki hono fale ʻoʻona naʻe langa ʻe Solomone moʻoná; hili iá naʻá ne langa ʻa e foʻi māʻolungá.*+
25 Naʻe ʻoatu ʻe Solomone tuʻo tolu ʻi he taʻu+ ʻa e ngaahi feilaulau tutu mo e ngaahi feilaulau feʻinasiʻaki ʻi he ʻōlita naʻá ne fokotuʻu maʻa Sihová,+ pehē ki heʻene fai ʻa e feilaulau fakakohu ʻi he ʻōlitá, ʻa ia naʻe ʻi he ʻao ʻo Sihová, ko ia naʻá ne fakaʻosi ai ʻa e falé.+
26 Naʻe faʻu foki ʻe Tuʻi Solomone ha ngaahi vaka ʻi ʻEsioni-kepa,+ ʻa ia ʻoku ofi ki ʻĒlotí, ʻi he matātahi ʻo e Tahi Kulokulá ʻi he fonua ko ʻĪtomí.+ 27 Naʻe tuku atu ʻe Hailame ʻa ʻene kau sevāniti ʻaʻaná fakataha mo e ngaahi vaká,+ ko e kau tangata ʻalu tahi taukei, ke nau ngāue fakataha mo e kau sevāniti ʻa Solomoné. 28 Naʻa nau ʻalu ki ʻŌfeli+ ʻo ʻomi mei ai ʻa e talēniti koula ʻe 420 pea ʻave ia kia Tuʻi Solomone.