ʻUluaki Kalonikali
11 ʻI he hili atu ha taimi naʻe fakatahataha mai ai ʻa e kau ʻIsilelí kotoa kia Tēvita ki Hepeloni+ pea nau pehē: “Vakai! Ko kimautolú ko ho hui mo ho kakano tonu.*+ 2 ʻI he kuohilí lolotonga ʻa e tuʻi ʻa Saulá, ko koe ʻa e tokotaha naʻá ke taki ʻa ʻIsileli ʻi heʻene ngaahi feingataú.*+ Pea naʻe folofola ʻa Sihova ko ho ʻOtuá kiate koe: ‘Te ke tauhi ʻa ʻIsileli ko hoku kakaí, pea te ke hoko ko e taki ki ʻIsileli ko hoku kakaí.’”+ 3 Ko ia naʻe haʻu ʻa e kau mātuʻa kotoa ʻo ʻIsilelí ki he tuʻí ki Hepeloni, pea naʻe fai ʻe Tēvita ha fuakava mo kinautolu ʻi Hepeloni ʻi he ʻao ʻo Sihová. Pea naʻa nau pani ʻa Tēvita ke hoko ko e tuʻi ki ʻIsileli,+ ʻo fakatatau ki he folofola ʻa Sihova fakafou ʻia Sāmiuelá.+
4 Ki mui ai, naʻe ʻalu atu ʻa Tēvita mo ʻIsileli kotoa ki Selusalema, ʻa ia, ko Siepusi+ ia, ʻa ia ko e kau Siepusí+ naʻa nau nofoʻi ʻa e fonuá. 5 Ko e kakai ʻo Siepusí naʻa nau manuki kia Tēvita: “Heʻikai ʻaupito te ke haʻu ki heni!”+ Kae kehe, naʻe hamu ʻe Tēvita ʻa e kolo malu ko Saioné,+ ʻa ia ʻoku hoko ʻi he taimí ni ko e Kolo-ʻo-Tēvitá.+ 6 Ko ia naʻe pehē ai ʻe Tēvita: “ʻIlonga ʻa ia te ne ʻuluaki taaʻi ʻa e kau Siepusí te ne hoko ko e ʻeiki* mo e taki.” Pea ko Sioape+ ko e tama ʻa Seluvaiá naʻá ne ʻuluaki ʻalu haké, pea naʻá ne hoko ko e ʻeikí. 7 Naʻe nofo leva ʻa Tēvita ʻi he kolo malú. Ko e ʻuhinga ia naʻa nau ui ai ia ko e Kolo-ʻo-Tēvitá. 8 Naʻe kamata ke ne langa ʻa e koló takatakai, mei he foʻi māʻolungá* ki he ngaahi feituʻu takatakai aí, pea naʻe toe langa ʻe Sioape ʻa e toenga ʻo e koló. 9 Ko ia naʻe fakautuutu ai pē ʻa e lahi ʻo Tēvitá,+ pea naʻe kau mo ia ʻa Sihova ʻo e ngaahi kau taú.
10 Pea ko kinautolu eni ʻa e ngaahi ʻulu ʻo e kau tangata toʻa ʻi he taú ʻa Tēvitá, ʻa ia naʻa nau poupou mālohi kiate ia ʻi hono tuʻunga-tuʻí fakataha mo ʻIsileli kotoa ke fakanofo ia ko e tuʻi ʻo fakatatau ki he folofola ʻa Sihova ʻo fekauʻaki mo ʻIsilelí.+ 11 Ko e fakahokohoko eni ʻo e kau tangata ʻa Tēvita naʻe toʻa ʻi he taú: Ko Sasopiami+ ko e foha ʻo ha tangata mei he haʻa Hakamoní, ko e taki ia ʻi he toko tolú.+ Naʻá ne veloʻi atu ʻene taó ʻo ne tāmateʻi ha toko 300 ʻi ha taimi ʻe taha.+ 12 Naʻe hoko atu ʻiate ia ʻa ʻEliesa+ ko e foha ʻo Toto ko e hako ʻo ʻĀhoí.+ Naʻá ne kau ʻi he kau toʻa ʻi he taú ʻe toko tolú. 13 Naʻá ne ʻia Tēvita ʻi Pasi-tamemi,+ ʻa ia naʻe fakatahataha ai ʻa e kau Filisitiá ki he taú. Pea naʻe ʻi ai ha konga kelekele naʻe lahi ai ʻa e paʻalé, pea naʻe hola ʻa e kakaí koeʻuhí ko e kau Filisitiá. 14 Ka naʻá ne tuʻu hake ʻi he loto ngoué ʻo ne maluʻi ia peá ne hanganaki taaʻi ʻa e kau Filisitiá, ko ia naʻe ʻomi ai ʻe Sihova ha fuʻu ikuna.*+
15 Ko e toko tolu ʻi he kau tangata taki ʻe toko 30, naʻa nau ʻalu hifo ki he fuʻu maká, kia Tēvita ki he ʻana ʻi ʻAtulamí,+ lolotonga ia naʻe ʻapitanga ha kau tau Filisitia ʻi he Teleʻa* ʻo Lifaimí.+ 16 Naʻe ʻi he toitoiʻangá ʻa Tēvita ʻi he taimi ko iá, pea naʻe ʻi ai ha nofoʻanga fakakautau ʻo e kau Filisitiá ʻi Pētelihema. 17 Pea naʻe fakahaaʻi ʻe Tēvita ʻa ʻene fakaʻamu: “Pehē ange mai ke u inu ha vai mei he lepa ʻoku ʻi he veʻe matapā ʻo e kolo ko Pētelihemá!”+ 18 Ko ia naʻe hū fakamālohi atu ai ʻa e toko tolú ki he ʻapitanga ʻo e kau Filisitiá pea nau ohu mai ha vai mei he lepa ʻi he veʻe matapā ʻo e kolo ko Pētelihemá pea nau ʻomi ia kia Tēvita; ka naʻe fakafisi ʻa Tēvita ke inu ia peá ne lilingi atu ia kia Sihova. 19 Naʻá ne pehē: “Mole ke mamaʻo haʻaku fakakaukau ke u fai ʻa e meʻá ni ʻi he vakai ʻa hoku ʻOtuá! Te u inu koā ʻa e toto ʻo e kau tangatá ni ʻa ia naʻa nau tuku atu ki he tuʻunga fakatuʻutāmaki ʻa ʻenau moʻuí?+ He naʻe ʻi he tuʻunga fakatuʻutāmaki ʻenau moʻuí ʻi heʻenau ʻomi iá.” Ko ia naʻá ne fakafisi ke inu ia. Ko e ngaahi meʻa eni naʻe fai ʻe heʻene kau toʻa ʻi he taú ʻe toko tolú.
20 Ko ʻApisai+ ko e tokoua ʻo Sioapé+ naʻá ne hoko ko e taki ʻo ha toe toko tolu kehe; naʻá ne veloʻi atu ʻene taó ʻo ne tāmateʻi ʻa e toko 300, pea naʻá ne ongoongoa ʻo hangē ko e toko tolú.+ 21 ʻI he toko tolu kehe ko ení, naʻá ne tuʻu-ki-muʻa ange ʻi he toko ua ʻo kinautolú, pea ko ia ʻa honau ʻeikí; ka naʻe ʻikai ke aʻu hono tuʻungá ki he ʻuluaki toko tolú.
22 Ko Penaia+ ko e foha ʻo Sihoiatá ko ha tangata loto-lahi* ʻa ia naʻá ne fakahoko ha ngaahi ngāue loto-toʻa lahi ʻi Kapesili.+ Naʻá ne taaʻi ʻa e ongo foha ʻo ʻAlieli ʻo Mōapé, pea naʻá ne ʻalu hifo ki ha lepa ʻi ha ʻaho sinou ʻo ne tāmateʻi ha laione.+ 23 Naʻá ne taaʻi foki ha tangata ʻIsipite naʻe lahi anga-kehe—ko e kiupite ʻe nima* ʻa hono māʻolungá.+ Neongo naʻe ʻi ai ha tao ʻa e tangata ʻIsipité ʻi hono nimá ʻo hangē ko e vaʻakau ʻa e kau lalangá,+ naʻá ne ʻalu atu kiate ia mo ha tokotoko ʻo ne hamusi ʻa e taó mei he nima ʻo e tangata ʻIsipité peá ne tāmateʻi ia ʻaki pē ʻene taó.+ 24 Ko e ngaahi meʻa eni naʻe fai ʻe Penaia ko e foha ʻo Sihoiatá, pea naʻá ne ongoongoa ʻo hangē ko e toko tolu naʻe toʻa ʻi he taú. 25 Neongo naʻe toe hulu atu ʻene tuʻu-ki-muʻá ʻi he toko tolungofulú, naʻe ʻikai ke ne aʻu ki he tuʻunga ʻo e toko tolú.+ Kae kehe, naʻe fakanofo ia ʻe Tēvita ke ne pule ki heʻene kau kaʻate ʻaʻaná.
26 Ko e kau tangata toʻa ʻi he taú ʻo e ngaahi kongakaú ko ʻAsaeli+ ko e tokoua ʻo Sioapé, ko ʻElanani ko e foha ʻo Toto ʻo Pētelihemá,+ 27 ko Samoti ko e tangata Hēlotí, ko Helesi ko e tangata Pēloní, 28 ko ʻIla+ ko e foha ʻo ʻĪkesi ko e tangata Tēkoá, ko ʻApiesa+ ko e tangata ʻAnatotí, 29 ko Sipekai+ ko e tangata Husá, ko ʻĒlai ko e hako ʻo ʻĀhoí, 30 ko Mahalai+ ko e tangata Netofá, ko Hēleti+ ko e foha ʻo Peana ko e tangata Netofá, 31 ko ʻĪtei ko e foha ʻo Lipai ʻo Kīpea ʻo e haʻa Penisimaní,+ ko Penaia ko e tangata Pilatoní, 32 ko Hulai mei he ngaahi teleʻa* ʻo Kāsí,+ ko ʻApieli ko e tangata ʻAlapá, 33 ko ʻAsimaveti ko e tangata Pahulimí, ko ʻEliapa ko e tangata Salapimí, 34 ko e ngaahi foha ʻo Hasemi ko e tangata Kīsoné, ko Sionatane ko e foha ʻo Saki mei Hālalí, 35 ko ʻAhiami ko e foha ʻo Sakali mei Hālalí, ko ʻElifala ko e foha ʻo ʻUá, 36 ko Hēfeli ko e tangata Mekelá, ko ʻĀhisa ko e tangata Pēloní, 37 ko Heselō ko e tangata Kāmelí, ko Nealai ko e foha ʻo ʻEsipaí, 38 ko Sioeli ko e tokoua ʻo Nētané, ko Mipehali ko e foha ʻo Hakelí, 39 ko Seleki ko e tangata ʻĀmoní, ko Nahalai ko e tangata Pielotí, ʻa e tangata toʻo meʻatau ʻa Sioape ko e tama ʻa Seluvaiá; 40 ko ʻIla ʻo e haʻa ʻItilití, ko Kālepi ʻo e haʻa ʻItilití, 41 ko ʻŪlaia+ ko e Hetí, ko Sapati ko e foha ʻo ʻAlaí, 42 ko ʻĀtina ko e foha ʻo Seisa ʻo e haʻa Lūpení, ko ha taki ʻo e haʻa Lūpení, pea naʻe ʻiate ia ʻa e toko 30; 43 ko Hānani ko e foha ʻo Māká, ko Siosafate ko e tangata Metení, 44 ko ʻŪsea ko e tangata ʻAsitelotí, ko Sāmā mo Sieli, ko e ongo foha ʻo Hōtame ko e tangata ʻAloelí; 45 ko Sitieli ko e foha ʻo Simelí, mo Soha ko hono tokoua ko e tangata Tisí; 46 ko ʻEliela ko e Mahaví, ko Selipei mo Siosavaia ko e ongo foha ʻo ʻElinaʻamí, pea mo ʻĪtema ko e tangata Mōapé; 47 ko ʻEliela, ʻŌpeti, pea mo Sesieli ko e tangata Mesopá.