Ua Kalonikali
22 Pea naʻe fakanofo ʻe he kakai ʻo Selusalemá ʻa hono foha siʻisiʻi taha ko ʻAhasaiá ko e tuʻi ʻo fetongi ia, he ko e kau kaihaʻa fakamālohi naʻe haʻu mo e kau ʻAlepeá ki he ʻapitangá naʻa nau tāmateʻi ʻa hono fanga taʻoketé kotoa.+ Ko ia ko ʻAhasaia ko e foha ʻo Siholamé naʻe kamata ke ne pule ko e tuʻi ʻo Siutá.+ 2 Naʻe taʻu 22 ʻa ʻAhasaia ʻi he taimi naʻá ne hoko ai ko e tuʻí, pea naʻá ne pule ʻi he taʻu ʻe taha ʻi Selusalema. Ko e hingoa ʻo ʻene faʻeé ko ʻAtalaia+ ko e mokopuna* ʻo ʻOmilai.+
3 Naʻá ne ʻaʻeva foki ʻi he ngaahi ʻalunga ʻo e fale ʻo ʻĒhapí,+ he naʻe hoko ʻa ʻene faʻeé ko ʻene tokotaha faleʻi ki hono fai ʻa e tōʻonga fulikivanú. 4 Pea naʻá ne hanganaki fai ʻa e meʻa naʻe kovi ʻi he vakai mai ʻa Sihová, ʻo hangē ko e fale ʻo ʻĒhapí, he naʻa nau hoko ko hono kau faleʻi ʻi he hili ʻa e mate ʻa ʻene tamaí, ke ne hoko ʻo ʻauha ai. 5 Naʻá ne muimui ʻi heʻenau faleʻí ʻo ne ʻalu mo Siholame ko e foha ʻo Tuʻi ʻĒhapi ʻo ʻIsilelí ke tauʻi ʻa Tuʻi Hesaeli+ ʻo Sīliá ʻi Lēmoti-kiliati,+ ʻa ia naʻe fakalaveaʻi ai ʻe he kau fana ngahaú ʻa Siholame. 6 Naʻá ne foki ki Sisilili+ ke ne fakaakeake mei he ngaahi fakalavea naʻa nau fai kiate ia ʻi Lama ʻi heʻene tauʻi ʻa Tuʻi Hesaeli ʻo Sīliá.+
Naʻe ʻalu hifo ʻa ʻAhasaia* ko e foha ʻo Siholame+ ko e tuʻi ʻo Siutá ki Sisilili ke sio kia Siholame+ ko e foha ʻo ʻĒhapí, koeʻuhí he naʻá ne lavea.*+ 7 Ka naʻe ʻai ʻe he ʻOtuá ke hoko ha kovi kia ʻAhasaia ʻi heʻene ʻalu kia Siholamé; pea ʻi heʻene aʻu atú, naʻá ne ʻalu mo Siholame ke fakafetaulaki kia Sehu+ ko e mokopuna* ʻo Nimisí, ʻa ia naʻe pani ʻe Sihova ke ne fakaʻauha* ʻa e fale ʻo ʻĒhapí.+ 8 ʻI he kamata ke fakahoko ʻe Sehu ʻa e fakamaau ki he fale ʻo ʻĒhapí, naʻá ne ʻilo ʻa e houʻeiki ʻo Siutá mo e ngaahi foha ʻo e fanga tokoua ʻo ʻAhasaiá, ʻa e kau sevāniti ʻa ʻAhasaiá, peá ne tāmateʻi kinautolu.+ 9 Pea naʻá ne kumi ʻa ʻAhasaia; naʻa nau puke ia ʻi he feituʻu naʻá ne toitoi ai ʻi Samēliá, pea naʻa nau ʻomi ia kia Sehu. Naʻa nau tāmateʻi leva ia pea tanu ia,+ he naʻa nau pehē: “Ko e mokopuna ia ʻo Sihosafate, ʻa ia naʻá ne kumi kia Sihova ʻaki ʻa e kotoa ʻo hono lotó.”+ Naʻe ʻikai ha taha ʻi he fale ʻo ʻAhasaiá naʻá ne maʻu ʻa e mafai ke pule ʻi he puleʻangá.
10 ʻI he taimi naʻe sio ai ʻa ʻAtalaia+ ko e faʻē ʻa ʻAhasaiá kuo mate ʻa ʻene tamá, naʻá ne tuʻu hake ʻo fakaʻauha kātoa ʻa e laine fakatuʻi* ʻo e fale ʻo Siutá.+ 11 Kae kehe, ko Siosapasi ko e ʻofefine ʻo e tuʻí naʻá ne ʻave ʻa Sihoasi+ ko e foha ʻo ʻAhasaiá ʻo ne holatakiʻi ia mei he lotolotonga ʻo e ngaahi foha ʻo e tuʻí ʻa ia naʻe teu ke tāmateʻí, ʻo ne tuku ia mo hono tauhí ʻi ha loki mohe ʻi loto. Ko Siosapasi ko e ʻofefine ʻo Tuʻi Siholamé+ (ko e uaifi ia ʻo e taulaʻeiki ko Sihoiatá,+ pea ko e tuofefine ia ʻo ʻAhasaia) naʻe lava ke ne tauhi ia ʻo fufū meia ʻAtalaia, ko ia naʻe ʻikai ai ke ne tāmateʻi ia.+ 12 Naʻe hokohoko atu ai pē ʻa ʻene ʻiate kinautolú ʻi he taʻu ʻe ono, ʻo ne toi ʻi he fale ʻo e ʻOtua moʻoní, lolotonga ia ʻa e pule ʻa ʻAtalaia ʻi he fonuá.