Siona
2 Naʻe lotu leva ʻa Siona kia Sihova ko hono ʻOtuá mei he loto kete ʻo e iká,+ 2 pea naʻá ne pehē:
“ʻI heʻeku faingataʻaʻiá naʻá ku ui kia Sihova, pea naʻá ne fai mai ha tali kiate au.+
Mei he takele* ʻo Faʻitoká* naʻá ku tangi ai ki ha tokoni.+
Naʻá ke fanongo ki hoku leʻó.
3 ʻI he taimi naʻá ke lī ai au ki he lolotó, ki he loto vaha-noá,
Naʻe lōmekina leva au+ ʻe he ʻaú.
Ko e kotoa ʻo hoʻo ngaahi peau mālohí naʻe fasi ʻi ʻolunga ʻiate au.+
4 Pea naʻá ku pehē, ‘Kuo ʻave au ʻo mamaʻo mei ho ʻaó!
ʻE anga-fēfē haʻaku toe sio ki ho temipale tapú?’
5 Kuo lōmekina au ʻe he vaí mo fakamanamanaʻi ʻeku moʻuí;+
Kuo tāpuni au ʻi loto ʻi he moana lolotó.
Naʻe takatakai ʻa e limú ʻi hoku ʻulú.
6 Naʻá ku puli hifo ki he ngaahi tefito ʻo e moʻungá.
Ko e ngaahi matapā ʻo e māmaní naʻe tāpuni hifo kiate au ʻo taʻengata.
Ka naʻá ke toʻo hake ʻeku moʻuí mei he luó, ʻe Sihova ko hoku ʻOtua.+
7 ʻI he fakaʻaʻau ke mole atu ʻeku moʻuí, ko Sihova ʻa e Tokotaha naʻá ku manatuʻí.+
Pea naʻe aʻu atu kiate koe ʻa ʻeku lotú, ki ho temipale tapú.+
8 Ko e faʻahinga ʻoku nau līʻoa ki he ngaahi ʻaitoli taʻeʻaongá ʻoku nau liʻaki ʻa e tokotaha ʻokú ne fakahāhā ʻa e ʻofa mateaki kiate kinautolú.*
9 Ka ko e meʻa kiate aú, te u ʻoatu ʻa e fakamālō kiate koe, pea te u faifeilaulau atu kiate koe.
Ko e meʻa kuó u fuakava ki aí, te u fakahoko ia.+
Ko e fakamoʻuí ʻoku meia Sihova.”+
10 Naʻe faifai atu pē pea fai ʻe Sihova ha tuʻutuʻuni ki he iká, pea naʻá ne puʻaki ʻa Siona ki he fonua mōmoá.