Nōmipa
9 Naʻe folofola ʻa Sihova kia Mōsese ʻi he toafa Sainaí ʻi he ʻuluaki māhina+ ʻo e taʻu hono ua hili ʻenau haʻu mei he fonua ko ʻIsipité, ʻo pehē: 2 “ʻOku totonu ke tauhi ʻe he kau ʻIsilelí ʻa e feilaulau Pāsová*+ ʻi hono taimi kotofá.+ 3 ʻI he ʻaho hono 14 ʻo e māhina ko ení ʻi he mamalu ʻa e poʻulí,* ʻoku totonu ke mou tauhi ai ia ʻi hono taimi kotofá. ʻOku totonu ke mou tauhi ia ʻo fakatatau ki hono ngaahi tuʻutuʻuní kotoa mo hono ngaahi founga kuo fokotuʻú kotoa.”+
4 Ko ia naʻe tala ai ʻe Mōsese ki he kau ʻIsilelí ke nau tauhi ʻa e feilaulau Pāsová. 5 Naʻa nau tauhi leva ʻa e feilaulau Pāsová ʻi he ʻuluaki māhiná, ʻi he ʻaho hono 14 ʻo e māhiná ʻi he mamalu ʻa e poʻulí,* ʻi he toafa Sainaí. Fakatatau ki he meʻa kotoa naʻe tuʻutuʻuni ʻe Sihova kia Mōsesé, naʻe fai pehē ʻa e kau ʻIsilelí.
6 Pea naʻe ʻi ai ʻa e kau tangata naʻa nau hoko ʻo taʻemaʻa ʻi he pā ki ha sino kuo mate,+ ʻo ʻikai ai te nau malava ke tauhi ʻa e feilaulau Pāsová ʻi he ʻaho ko iá. Ko ia naʻe hā ʻa e kau tangata ko iá ʻi he ʻao ʻo Mōsese mo ʻĒloné ʻi he ʻaho ko iá+ 7 ʻo nau pehē kiate ia: “ʻOku mau taʻemaʻa koeʻuhi ko ʻemau pā ki ha sino kuo mate. Ko e hā ke taʻofi ai kimautolu mei hono foaki ʻa e feilaulau kia Sihová ʻi hono taimi kotofá ʻi he lotolotonga ʻo e kau ʻIsilelí?”+ 8 ʻI he meʻá ni naʻe pehē ange ʻe Mōsese kiate kinautolu: “Tatali hena, pea tuku ke u fanongo ki he meʻa ʻe tuʻutuʻuni ʻe Sihova fekauʻaki mo kimoutolú.”+
9 Naʻe folofola leva ʻa Sihova kia Mōsese: 10 “Tala ki he kau ʻIsilelí, ‘Neongo ʻe hoko ha tangata ʻi homou lotolotongá pe ʻi homou ngaahi toʻutangata he kahaʻú ʻo taʻemaʻa ʻi he pā ki ha sino kuo mate+ pe mavahe ʻi ha fononga mamaʻo, kuo pau ke ne kei tauhi pē ʻa e feilaulau Pāsová kia Sihova. 11 ʻOku totonu ke nau tauhi ia ʻi he māhina hono uá,+ ʻi he ʻaho hono 14 ʻi he mamalu ʻa e poʻulí.* ʻOku totonu ke nau kai fakataha ia mo e mā taʻelēvani mo e lauʻiʻakau ifo kona.+ 12 Kuo pau ke ʻoua naʻa nau tuku ha konga ʻo ia ke toe ʻo aʻu ki he pongipongí,+ pea ʻoku ʻikai totonu ke nau fesiʻi ha hui ʻi ai.+ ʻOku totonu ke nau tauhi ia ʻo fakatatau ki he tuʻutuʻuni kotoa ʻo fekauʻaki mo e Pāsová. 13 Ka ʻo kapau naʻe maʻa ha tangata pe naʻe ʻikai te ne mavahe ʻi ha fononga peá ne taʻetokanga ke tauhi ʻa e feilaulau Pāsová, ko e tokotaha ko iá kuo pau leva ke tuʻusi ia mei hono kakaí,*+ koeʻuhí naʻe ʻikai te ne ʻoatu ʻa e feilaulau kia Sihová ʻi hono taimi kotofá. Ko e tangata ko iá te ne fua ʻa e nunuʻa ʻo ʻene angahalá.
14 “‘Pea kapau ʻoku nofo ha muli mo kimoutolu, ʻoku totonu ke ne tauhi foki ʻa e feilaulau Pāsová kia Sihova.+ ʻOku totonu ke ne fai ia ʻo fakatatau ki he tuʻutuʻuni ʻo e Pāsová mo hono founga kuo fokotuʻú.+ ʻOku totonu ke taha pē ʻa e tuʻutuʻuní kiate kimoutolu, fakatouʻosi ki he mulí pea ki he tupuʻi fonuá.’”+
15 ʻI he ʻaho leva ko ia naʻe fokotuʻu ai ʻa e tāpanekalé,+ naʻe ʻufiʻufi ʻe he ʻaó ʻa e tāpanekalé, ʻa e tēniti ʻo e Fakamoʻoní, ka ʻi he efiafí ko ʻene hā mai ko e afí naʻe nofo ia ʻi he funga tāpanekalé ʻo aʻu ki he pongipongí.+ 16 Naʻe hokohoko pehē atu ai pē ia: Naʻe ʻufiʻufi ia ʻe he ʻaó ʻi he ʻahó, pea hā mai ko e afi ʻi he poʻulí.+ 17 ʻI he taimi pē naʻe mahiki hake ai ʻa e ʻaó mei he tēnití, naʻe mavahe leva ʻa e kau ʻIsilelí,+ pea ko e feituʻu ko ia naʻe nofo ai ʻa e ʻaó, ko e feituʻu ia naʻe ʻapitanga+ ai ʻa e kau ʻIsilelí. 18 ʻI he tuʻutuʻuni ʻa Sihová naʻe mavahe ʻa e kau ʻIsilelí, pea ʻi he tuʻutuʻuni ʻa Sihová naʻa nau ʻapitanga ai.+ Lolotonga ʻa e nofo ʻa e ʻaó ʻi he funga tāpanekalé, naʻa nau nofo ʻapitanga ai pē. 19 ʻI he nofo ʻa e ʻaó ʻi he funga tāpanekalé ʻi ha ngaahi ʻaho lahi, naʻe talangofua ʻa e kau ʻIsilelí kia Sihova pea ʻikai te nau mavahe.+ 20 ʻI he taimi ʻe niʻihi, naʻe nofo ai ʻa e ʻaó ʻi ha ngaahi ʻaho siʻi ʻi he funga tāpanekalé. ʻI he tuʻutuʻuni ʻa Sihová naʻa nau ʻapitanga ai pē, pea ʻi he tuʻutuʻuni ʻa Sihová naʻa nau mavahe. 21 ʻI he taimi ʻe niʻihi, naʻe nofo ʻa e ʻaó mei he efiafí pē ʻo aʻu ki he pongipongí, pea ʻi he taimi naʻe mahiki hake ai ʻa e ʻaó ʻi he pongipongí, naʻa nau mavahe. Pe ko e ʻaho pe poʻuli naʻe mahiki hake ai ʻa e ʻaó, naʻa nau mavahe.+ 22 Pe naʻe ʻaho ʻe ua, māhina ʻe taha, pe lōloa ange ai, ko e hā pē hono fuoloa ʻa e nofo ʻa e ʻaó ʻi he funga tāpanekalé, naʻe nofo ʻapitanga ai pē ʻa e kau ʻIsilelí ʻo ʻikai te nau mavahe. Ka ʻi he taimi naʻe mahiki hake aí, naʻa nau mavahe. 23 ʻI he tuʻutuʻuni ʻa Sihová naʻa nau ʻapitanga, pea ʻi he tuʻutuʻuni ʻa Sihová naʻa nau mavahe. Naʻa nau tauhi honau fatongia kia Sihová ʻi he tuʻutuʻuni ʻa Sihova fakafou ʻia Mōsesé.