Ua Kalonikali
25 Naʻe taʻu 25 ʻa ʻAmasaia ʻi heʻene hoko ko e tuʻí, pea naʻá ne pule ʻi he taʻu ʻe 29 ʻi Selusalema. Ko e hingoa ʻo ʻene faʻeé ko Sihoatani ʻo Selusalemá.+ 2 Naʻe hokohoko atu ʻene fai ʻa e meʻa naʻe totonu ʻi he vakai mai ʻa Sihová, kae ʻikai ʻaki ha loto kakato. 3 ʻI he taimi pē naʻá ne fokotuʻu maʻu ai ʻa e puleʻangá ʻi hono mafaí, naʻá ne tāmateʻi ʻa ʻene kau sevāniti ʻa ia naʻa nau tāmateʻi ʻa ʻene tamai ko e tuʻí.+ 4 Ka naʻe ʻikai te ne tāmateʻi ʻa honau ngaahi fohá, he naʻá ne ngāue ʻo fehoanaki mo e meʻa ʻoku hiki ʻi he Laó, ʻi he tohi ʻa Mōsesé, ʻa ia naʻe fekauʻi ai ʻe Sihova: “ʻE ʻikai ke mate ʻa e ngaahi tamaí koeʻuhí ko honau ngaahi fohá, pea ʻe ʻikai ke mate ʻa e ngaahi fohá koeʻuhí ko ʻenau ngaahi tamaí; ka ʻe mate ʻa e tokotaha taki taha ʻi heʻene angahala pē ʻaʻana.”+
5 Pea naʻe fakatahatahaʻi ʻe ʻAmasaia ʻa Siuta pea fokotuʻutuʻu kinautolu ʻo fakatatau ki he ngaahi fale ʻo ʻenau ngaahi tamaí, ʻo fakatatau ki he ngaahi ʻeiki ʻo e ngaahi toko afé pea fakatatau ki he ngaahi ʻeiki ʻo e ngaahi toko teaú, ʻa Siuta mo Penisimani+ kotoa. Naʻá ne lēsisita kinautolu mei he taʻu 20 ʻo faai ki ʻolunga,+ pea naʻá ne ʻilo ai naʻe toko 300,000 ʻa e kau tangata tau kuo akoʻi* ke nau kau ʻi he kau taú, ʻo malava ke nau ngāueʻaki ʻa e taó mo e ngaahi fuʻu paá. 6 ʻIkai ko ia pē, naʻá ne totongiʻi mai mei ʻIsileli ha toko 100,000 ko e kau tangata toʻa ʻi he taú ki he talēniti* siliva ʻe 100. 7 Ka naʻe haʻu kiate ia ha tangata ʻa e ʻOtua moʻoní, ʻo ne pehē: “ʻE hoʻo ʻAfio, ʻoua ʻe tuku ʻa e kau tau ʻa ʻIsilelí ke nau ō mo koé, he ʻoku ʻikai kau ʻa Sihova mo ʻIsileli,+ naʻa mo ha taha pē ʻo e kau ʻIfalemí. 8 Ka ke ʻalu pē koe, fai ha meʻa peá ke loto-toʻa ʻi he taú. He ka ʻikai, ʻe ʻai koe ʻe he ʻOtua moʻoní ke ke tō tau ʻi he ʻao ʻo e filí, he ʻoku maʻu ʻe he ʻOtuá ʻa e mālohi ke tokoni+ pea ke fakatupunga ha tō tau.” 9 ʻI he meʻá ni naʻe pehē ange ai ʻe ʻAmasaia ki he tangata ʻa e ʻOtua moʻoní: “Kae fēfē ʻa e talēniti ʻe 100 naʻá ku ʻoange ki he kau tau ʻa ʻIsilelí?” Naʻe tali ange ʻe he tangata ʻa e ʻOtua moʻoní: “ʻOku maʻu ʻe Sihova ʻa e mafai ke ʻoatu kiate koe ha meʻa lahi ange ia ai.”+ 10 Ko ia naʻe tuku ange ai ʻe ʻAmasaia ʻa e kau tau naʻe haʻu kiate ia mei ʻIfalemí, ʻo fekauʻi ke nau foki ki honau feituʻú. Kae kehe, naʻa nau ʻita ʻaupito ʻi Siuta, ko ia naʻa nau foki ai ki honau feituʻú kuo nau tōtōlili.
11 Pea naʻe loto-toʻa ʻa ʻAmasaia ʻo ne taki ʻa ʻene kau tau ʻaʻaná ki he Teleʻa Māsimá,+ peá ne taaʻi ʻa e toko 10,000 ʻo e kau tangata ʻo Seiá.+ 12 Pea naʻe puke moʻui ʻe he kau tangata ʻo Siutá ʻa e toko 10,000. Ko ia naʻa nau ʻomi kinautolu ki he funga maká pea lī hifo kinautolu mei ai, ʻo nau lailai hono kotoa. 13 Ka ko e faʻahinga ʻi he kau tau naʻe fakafoki ʻe ʻAmasaia ke ʻoua te nau ō mo ia ki he taú+ naʻa nau ʻohofi ʻa e ngaahi kolo ʻo Siutá, mei Samēlia+ ʻo aʻu ki Pete-holoni;+ naʻa nau taaʻi ha toko 3,000 ʻo kinautolu pea nau ʻave ha koloa vete lahi.
14 Ka ʻi he hili ʻa e foki mai ʻa ʻAmasaia mei hono taaʻi ʻa e kau ʻĪtomí, naʻá ne ʻomi ʻa e ngaahi ʻotua ʻo e kau tangata ʻo Seiá ʻo ne fokotuʻu ia ko hano ngaahi ʻotua,+ pea naʻe kamata ke ne punou hifo ʻi honau ʻaó pea mo fai ʻa e feilaulau fakakohu kiate kinautolu. 15 Ko ia naʻe hoko ai ʻo houhau lahi ʻaupito ʻa Sihova kia ʻAmasaia, peá ne fekauʻi atu ha palōfita ʻa ia naʻá ne pehē kiate ia: “Ko e hā ʻokú ke muimui ai ki he ngaahi ʻotua ʻo e kakai ʻa ia naʻe ʻikai te nau fakahaofi ʻa honau kakaí tonu mei ho nimá?”+ 16 ʻI he lolotonga ʻene lea kiate iá, naʻe pehē ange ʻe he tuʻí: “Naʻa mau fakanofo koā koe ko ha tokotaha faleʻi ki he tuʻí?+ Longo!+ Ko e hā ʻokú ke fakatupunga ai ke taaʻi koé?” Pea naʻe longo leva ʻa e palōfitá, ka naʻá ne hoko atu: “ʻOku ou ʻilo kuo fakapapauʻi ʻe he ʻOtuá ke ʻomi ha kovi kiate koe, koeʻuhí ko hoʻo fai ʻa e meʻá ni pea kuo ʻikai te ke fanongo ki heʻeku faleʻí.”+
17 ʻI he hili ʻene talatalanoa mo ʻene kau faleʻí, naʻe ʻoatu ʻe Tuʻi ʻAmasaia ʻo Siutá ha pōpoaki kia Sihoasi ko e foha ʻo Sihoaasi ko e foha ʻo Sehu ko e tuʻi ʻo ʻIsilelí, ʻo pehē: “Haʻu, ke ta fehangahangai* ʻi he taú.”+ 18 Naʻe ʻoatu ʻe Tuʻi Sihoasi ʻo ʻIsilelí ʻa e pōpoaki ko ení kia Tuʻi ʻAmasaia ʻo Siutá: “Ko e ʻakau talatala ʻi Lepanoní naʻá ne ʻoatu ha pōpoaki ki he sita ʻi Lepanoní, ‘ʻOmai ho ʻofefiné ki hoku fohá ke ne hoko ko hono uaifi.’ Kae kehe, naʻe ʻalu atu ha manu fekai ʻo Lepanoni peá ne tāmalaki ʻa e ʻakau talatalá. 19 Kuó ke pehē, ‘Vakai mai! Kuó u* taaʻi ʻa ʻĪtomi.’+ Ko ia kuo hoko ʻo mahiki ai ho lotó, ʻo ke loto ke fakalāngilangiʻi koe. Ka ko eni ke ke nofo pē ʻi ho falé.* Ko e hā ke ke fakatupunga ai ha fakatamaki mo ha hinga, pea tuku hifo ai ʻa Siuta fakataha mo koé?”
20 Ka naʻe ʻikai ke fanongo ʻa ʻAmasaia,+ he naʻe hoko ʻa e meʻá ni ia mei he ʻOtua moʻoní ke tuku atu kinautolu ki he nima ʻo e filí,+ koeʻuhí naʻa nau muimui ʻi he ngaahi ʻotua ʻo ʻĪtomí.+ 21 Ko ia naʻe ʻalu hake ai ʻa Tuʻi Sihoasi ʻo ʻIsilelí, pea ko ia mo Tuʻi ʻAmasaia ʻo Siutá naʻá na fehangahangai ʻi he taú ʻi Pete-semesi,+ ʻa ia ʻoku ʻo Siutá. 22 Naʻe ikunaʻi ʻe ʻIsileli ʻa Siuta, ko ia naʻe hola ai ʻa e tokotaha taki taha ki hono ʻapi.* 23 Naʻe puke ʻe Tuʻi Sihoasi ʻo ʻIsilelí ʻa Tuʻi ʻAmasaia ʻo Siutá, ko e foha ʻo Sihoasi ko e foha ʻo Sihoaasí,* ʻi Pete-semesi. Naʻá ne ʻomi leva ia ki Selusalema pea naʻá ne avangi ʻa e ʻā ʻo Selusalemá ko e kiupite ʻe 400* mei he Matapā ʻo ʻIfalemí+ ki he Matapā Tulikí.+ 24 Naʻá ne ʻave ʻa e koula mo e siliva kotoa pea mo e koloa kotoa naʻe maʻu ʻi he fale ʻo e ʻOtua moʻoní ʻa ia naʻe tokangaʻi ʻe ʻŌpeti-ʻītomí pea mo e koloa naʻe ʻi he ngaahi tukuʻanga koloa ʻo e fale*+ ʻo e tuʻí, pea pehē ki he faʻahinga naʻe taki pōpulá. Pea naʻá ne foki ki Samēlia.
25 Naʻe moʻui atu ʻa ʻAmasaia+ ko e foha ʻo Sihoasi ko e tuʻi ʻo Siutá ʻi he taʻu ʻe 15 hili ʻa e mate ʻa Sihoasi+ ko e foha ʻo Sihoaasi ko e tuʻi ʻo ʻIsilelí.+ 26 Ko e meʻa ki he toenga ʻo e hisitōlia ʻo ʻAmasaiá, mei he kamataʻangá ki he ngataʻangá, vakai, ʻikai kuo hiki ia ʻi he Tohi ʻo e Ngaahi Tuʻi ʻo Siuta mo ʻIsilelí? 27 Mei he taimi naʻe tafoki ai ʻa ʻAmasaia mei he muimui kia Sihová, naʻa nau fai ha faʻufaʻufono+ kiate ia ʻi Selusalema, pea naʻá ne hola ki Lākisi, ka naʻa nau fekauʻi atu ha kau tangata ke nau tulimui ʻiate ia ki Lākisi pea tāmateʻi ia ʻi ai. 28 Ko ia naʻa nau fakafoki ia ʻi ha fanga hoosi pea nau tanu ia fakataha mo ʻene fanga kuí ʻi he kolo ʻo Siutá.