ʻUluaki Tuʻi
15 ʻI he taʻu hono 18 ʻo e pule ʻa Tuʻi Selopoame+ ko e foha ʻo Nīpatí, naʻe hoko ai ʻa ʻApisami ko e tuʻi ki Siuta.+ 2 Naʻá ne pule ʻi he taʻu ʻe tolu ʻi Selusalema. Ko e hingoa ʻo ʻene faʻeé ko Maaka+ ko e mokopuna ʻo ʻApisalomi.* 3 Naʻá ne hoko atu ʻo ʻaʻeva ʻi he ngaahi angahala kotoa naʻe fai ʻe heʻene tamaí ki muʻa ʻiate iá, pea naʻe ʻikai ke kakato* hono lotó kia Sihova ko hono ʻOtuá ʻo hangē ko e loto ʻo ʻene kui ko Tēvitá. 4 Kae kehe, koeʻuhi ko Tēvita,+ naʻe ʻoange ai ʻe Sihova ko hono ʻOtuá kiate ia ha maama* ʻi Selusalema+ ʻaki hono fakanofo hono fohá ke tuʻi ʻi he hili iá pea mo tauhi maʻu ʻa Selusalema ke kei tuʻu pē. 5 He naʻe fai ʻe Tēvita ʻa e meʻa naʻe totonu ʻi he vakai ʻa Sihová, pea naʻe ʻikai te ne tafoki mei ha meʻa pē naʻá Ne tuʻutuʻuni kiate ia ʻi he ngaahi ʻaho kotoa ʻo ʻene moʻuí, tuku kehe ʻa e meʻa fekauʻaki mo ʻŪlaia ko e tangata Hetí.+ 6 Pea naʻe ʻi ai ha faitau ʻi he vahaʻa ʻo Lehopoame mo Selopoamé ʻi he ngaahi ʻaho kotoa ʻo e moʻui+ ʻa Lehopoamé.
7 Ko e meʻa ki he toenga ʻo e hisitōlia ʻo ʻApisamí, mo e meʻa kotoa naʻá ne faí, ʻikai kuo hiki ia ʻi he tohi ʻo e hisitōlia ʻo e taimi ʻo e ngaahi tuʻi ʻo Siutá?+ Naʻe toe ʻi ai foki ha tau ʻi he vahaʻa ʻo ʻApisami mo Selopoamé.+ 8 Pea naʻe toka ʻa ʻApisami ʻo mālōlō fakataha mo ʻene fanga kuí, pea naʻa nau tanu ia ʻi he Kolo-ʻo-Tēvitá; pea naʻe hoko ʻa hono foha ko ʻAsá+ ko e tuʻi ʻo fetongi ia.+
9 ʻI he taʻu hono 20 ʻo e pule ʻa Tuʻi Selopoame ʻo ʻIsilelí, naʻe kamata pule ʻa ʻAsa ki Siuta. 10 Naʻá ne pule ʻi Selusalema ʻi he taʻu ʻe 41. Ko e hingoa ʻo ʻene kui fefiné ko Maaka+ ko e mokopuna ʻo ʻApisalomi. 11 Naʻe fai ʻe ʻAsa ʻa e meʻa naʻe totonu ʻi he vakai ʻa Sihová,+ ʻo hangē ko ʻene kui ko Tēvitá. 12 Naʻá ne kapusi ʻa e kau tangata feʻauaki ʻi he temipalé mei he fonuá+ pea toʻo atu mo e ngaahi ʻaitoli fakalielia* kotoa naʻe ngaohi ʻe heʻene fanga kuí.+ 13 Naʻe aʻu ʻo ne toʻo ʻa Maaka+ ko ʻene kui fefiné mei hono tuʻunga ko e kuini fehuhú; koeʻuhí naʻá ne ngaohi ha ʻaitoli fakalielia ke faiʻaki ʻa e lotu ki he pou ʻakau toputapú.* Naʻe tā hifo ʻe ʻAsa ʻa ʻene ʻaitoli fakalieliá+ pea tutu ia ʻi he Teleʻa Kitiloné.+ 14 Ka naʻe ʻikai ke ne toʻo ʻa e ngaahi potu māʻolungá.+ Ka neongo ia, naʻe kakato* ʻa e loto ʻo ʻAsá kia Sihova ʻi he kotoa ʻo ʻene moʻuí.* 15 Pea naʻá ne fakahū ki he fale ʻo Sihová ʻa e ngaahi meʻa naʻá ne hanga mo ʻene tamaí ʻo fakatoputapuʻí—ʻa e silivá, koulá, mo e ngaahi naunau kehekehe.+
16 Naʻe ʻi ai ha tau hokohoko ʻi he vahaʻa ʻo ʻAsa mo Paasa+ ko e tuʻi ʻo ʻIsilelí. 17 Ko ia naʻe ʻalu hake ʻa Tuʻi Paasa ʻo ʻIsilelí ke tauʻi ʻa Siuta pea kamata ke ne langa* ʻa Lama+ ke taʻofi ha taha pē ʻe hū ki tuʻa pe hū ki loto kia* Tuʻi ʻAsa ʻo Siutá.+ 18 Ko ia naʻe toʻo ʻe ʻAsa ʻa e kotoa ʻo e siliva mo e koula naʻe toe ʻi he ngaahi tukuʻanga koloa ʻo e fale ʻo Sihová pea mo e tukuʻanga koloa ʻo e fale* ʻo e tuʻí ʻo ʻoange ia ki heʻene kau sevānití. Naʻe fekauʻi atu leva ʻe Tuʻi ʻAsa kinautolu kia Peni-hētati ko e foha ʻo Tapilimoni ko e foha ʻo Hesioni, ko e tuʻi ʻo Sīliá,+ ʻa ia naʻe nofo ʻi Tāmasikusí, ʻo ne pehē: 19 “ʻOku ʻi ai ha talite* ʻi he vahaʻa ʻoʻoku mo koé pea ʻi he vahaʻa ʻo ʻeku tamaí mo hoʻo tamaí. ʻOku ou ʻoatu ha meʻaʻofa kiate koe ko e siliva mo e koula. Haʻu muʻa, pea maumauʻi hoʻo talite* mo Tuʻi Paasa ʻo ʻIsilelí, koeʻuhi ka ne mavahe meiate au.” 20 Naʻe fanongo ʻa Peni-hētati kia Tuʻi ʻAsa peá ne fekauʻi atu ʻa e ngaahi ʻeiki ʻo ʻene kau taú ke nau tauʻi ʻa e ngaahi kolo ʻo ʻIsilelí, pea naʻa nau taaʻi ʻa ʻĪsoni,+ Tani,+ ʻĒpeli-pete-maaka, mo Kineleti kotoa, pea mo e kotoa ʻo e fonua ʻo Nafitalaí. 21 ʻI he fanongo ai ʻa Pāsá, naʻe tuku leva ʻene langa* ʻa Lamá pea hokohoko atu ʻene nofó ʻi Tilisa.+ 22 Naʻe ui mai leva ʻe Tuʻi ʻAsa ʻa Siuta kotoa—ʻo ʻikai ʻatā mei ai ha taha—pea naʻa nau fetuku mai ʻa e maka mo e papa ʻi Lama ʻa ia naʻe langaʻaki ʻe Pāsá, pea naʻe langaʻaki ia* ʻe Tuʻi ʻAsa ʻa Kepā+ ʻi Penisimaní, pea mo Misipā.+
23 Ko e meʻa ki he kotoa ʻo e toenga ʻo e hisitōlia ʻo ʻAsá, mo e kotoa ʻo hono fuʻu mālohí pea mo e meʻa kotoa naʻá ne faí pea mo e ngaahi kolo naʻá ne langá,* ʻikai kuo hiki ia ʻi he tohi ʻo e hisitōlia ʻo e taimi ʻo e ngaahi tuʻi ʻo Siutá? Ka ʻi heʻene taʻumotuʻá naʻá ne faingataʻaʻia tupu mei ha mahaki ʻi hono ongo vaʻé.+ 24 Pea naʻe toka ʻa ʻAsa ʻo mālōlō fakataha mo ʻene fanga kuí pea naʻe tanu ia fakataha mo kinautolu ʻi he Kolo-ʻo-Tēvita ko ʻene kuí; pea naʻe hoko ʻa hono foha ko Sihosafaté+ ko e tuʻi ʻo fetongi ia.
25 Naʻe hoko ʻa Nātapi+ ko e foha ʻo Selopoamé ko e tuʻi ki ʻIsileli ʻi he taʻu hono ua ʻo e pule ʻa Tuʻi ʻAsa ʻo Siutá, pea naʻá ne pule ki ʻIsileli ʻi he taʻu ʻe ua. 26 Naʻá ne hanganaki fai ʻa e meʻa naʻe kovi ʻi he vakai ʻa Sihová mo ʻaʻeva ʻi he ʻalunga pea mo e angahala ʻa ʻene tamaí+ ʻa ia naʻá ne fakatupunga ke fai ʻe ʻIsilelí.+ 27 Ko Paasa ko e foha ʻo ʻĀhisa ʻo e fale ʻo ʻĪsaká, naʻá ne faʻufaʻu ha kovi kiate ia, pea naʻe taaʻi ia ʻe Paasa ʻi Kipetoni,+ ʻa ia naʻe maʻu ʻe he kau Filisitiá, lolotonga ia hono ʻākoloʻi ʻe Nātapi mo ʻIsileli kotoa ʻa Kipetoni. 28 Ko ia naʻe tāmateʻi ia ʻe Paasa ʻi he taʻu hono tolu ʻo e pule ʻa Tuʻi ʻAsa ʻo Siutá peá ne hoko ko e tuʻi ʻo fetongi ia. 29 Pea ʻi heʻene hoko pē ko e tuʻí, naʻá ne taaʻi ʻa e kotoa ʻo e fale ʻo Selopoamé. Naʻe ʻikai te ne tuku ha taha pē naʻe mānava ke toe, ʻa ia naʻe kau kia Selopoame; naʻá ne fakaʻauha ʻosi kinautolu ʻo fakatatau ki he folofola ʻa Sihova naʻá ne folofolaʻaki fakafou ʻi heʻene sevāniti ko ʻĀhisa ko e tangata Sailó.+ 30 Naʻe hoko ení koeʻuhi ko e ngaahi angahala naʻe fai ʻe Selopoame peá ne fakatupunga ke fai ʻe ʻIsilelí pea koeʻuhí naʻá ne fakalotomamahiʻi lahi ʻa Sihova ko e ʻOtua ʻo ʻIsilelí. 31 Ko e meʻa ki he toenga ʻo e hisitōlia ʻo Nātapí, mo e meʻa kotoa naʻá ne faí, ʻikai kuo hiki ia ʻi he tohi ʻo e hisitōlia ʻo e taimi ʻo e ngaahi tuʻi ʻo ʻIsilelí? 32 Pea naʻe ʻi ai ha tau hokohoko ʻi he vahaʻa ʻo ʻAsa mo Tuʻi Paasa ʻo ʻIsilelí.+
33 ʻI he taʻu hono tolu ʻo e pule ʻa Tuʻi ʻAsa ʻo Siutá, naʻe hoko ʻa Paasa ko e foha ʻo ʻĀhisá ko e tuʻi ʻi Tilisa ki ʻIsileli kotoa pea naʻá ne pule ʻi he taʻu ʻe 24.+ 34 Ka naʻá ne hanganaki fai ʻa e meʻa naʻe kovi ʻi he vakai ʻa Sihová,+ pea naʻá ne ʻaʻeva ʻi he ʻalunga ʻo Selopoamé pea ʻi heʻene angahala naʻá ne fakatupunga ke fai ʻe ʻIsilelí.+