ʻAisea
38 ʻI he ngaahi ʻaho ko iá naʻe puke ai ʻa Hesekaia ʻo ne meimei mate.+ Naʻe haʻu ʻa e palōfita ko ʻAiseá,+ ʻa e foha ʻo ʻĀmosí ʻo pehē ange kiate ia, “Ko e meʻa eni ʻoku folofolaʻaki ʻe Sihová: ‘Fai ha fakahinohino ki ho falé, he ko koé te ke mate; ʻe ʻikai te ke toe sai.’”+ 2 Ko ia naʻe hanga ai ʻa Hesekaia ki he holisí pea kamata ke ne lotu kia Sihova: 3 “ʻOku ou kōlenga atu kiate koe, ʻe Sihova, ke ke manatuʻi+ muʻa ʻa ʻeku ʻaʻeva ʻi he anga-tonu ʻi ho ʻaó ʻi he loto kakató,+ pea kuó u fai ʻa e meʻa naʻe lelei ʻi hoʻo vakaí.” Pea naʻe kamata ke tangi lahi ʻa Hesekaia.
4 Pea naʻe hoko mai ʻa e folofola ʻa Sihová kia ʻAisea, ʻo pehē: 5 “Foki ʻo lea kia Hesekaia,+ ‘Ko e meʻa eni ʻoku folofolaʻaki ʻe Sihova ko e ʻOtua ʻo Tēvita ko hoʻo kuí: “Kuó u fanongo ki hoʻo lotú.+ Kuó u mamata ki ho loʻimatá.+ Ko eni ʻoku ou tānaki atu ʻa e taʻu ʻe 15 ki hoʻo moʻuí,*+ 6 pea te u fakahaofi koe pea mo e koló ni mei he nima ʻo e tuʻi ʻo ʻAsīliá, pea te u maluʻi ʻa e koló ni.+ 7 Ko e fakaʻilonga eni meia Sihova ke fakahaaʻi atu ai kiate koe ʻe fakahoko ʻe Sihova ʻa e folofola kuó ne folofolaʻakí:+ 8 Ko eni te u ʻai ʻa e ʻata ʻoku fakaʻau ke siʻi hifo ʻo e laʻaá ʻa ia ʻoku ʻi he sitepu* ʻa ʻĀhasí ke foki ʻaki ʻa e manga ʻe hongofulu.”’”+ Ko ia naʻe foki ʻa e ʻata ʻo e laʻaá ʻaki ʻa e manga ʻe hongofulu ʻi he sitepú ʻa ia naʻe ʻosi ʻalu hifo aí.
9 Ko ha tohi ʻa Tuʻi Hesekaia ʻo Siutá ʻi heʻene hoko ʻo puke pea toe sai ʻa hono puké.
10 Naʻá ku pehē: “ʻI he vaeuaʻanga ʻo ʻeku moʻuí
Kuo pau ke u hū ʻi he ngaahi matapā ʻo Faʻitoká*
ʻE toʻo meiate au ʻa hoku ngaahi taʻu ʻoku toé.”
11 Naʻá ku pehē: “ʻE ʻikai te u sio kia Iā,* kia Iā ʻi he fonua ʻo e kau moʻuí.+
ʻE ʻikai te u toe mamata ki he faʻahinga ʻo e tangatá
ʻI he taimi te u fakataha ai mo e faʻahinga ʻi he feituʻu ʻa ia ʻoku ngata ai ʻa e meʻa kotoa pē.
12 Kuo taʻaki ʻa hoku nofoʻangá ʻo toʻo meiate au+
ʻO hangē ko e tēniti ʻo ha tauhi-sipí.
Kuó u takatakai ʻa ʻeku moʻuí hangē ko ia ʻoku fai ʻe ha tokotaha ʻoku ngāue ʻi he meʻa lalangá;
ʻOkú ne tuʻusi au hangē ko hono tuʻusi ʻo e filo lalanga fakalōloá.
Mei he hopo ʻa e laʻaá ʻo aʻu ki he poʻulí ʻokú ke hanganaki tuku atu au ki haku ngataʻanga.+
13 ʻOku ou ʻai au ke u nonga ʻo aʻu ki he pongipongí.
ʻI he hangē ko ha laioné, ʻokú Ne hanganaki maumauʻi ʻa e kotoa ʻo hoku ngaahi huí;
Mei he hopo ʻa e laʻaá ʻo aʻu ki he poʻulí ʻokú ke hanganaki tuku atu au ki haku ngataʻanga.+
14 Hangē ko ha kiʻi foʻi manupuná, ʻoku pehē ʻa ʻeku hanganaki tangi mamahí;+
ʻOku ou hanganaki tangi hangē ko e lupé.+
ʻOku mafasia ʻa hoku matá ʻi heʻeku sio ki he feituʻu māʻolungá:+
15 Ko e hā ʻe lava ke u leaʻakí?
Kuó ne folofola mai kiate au pea kuó ne fakaai.
Te u ʻaʻeva anga-fakatōkilalo* ʻi he kotoa ʻo hoku ngaahi taʻú
Koeʻuhí ko e lahi ʻo ʻeku mamahí.
16 ‘ʻE Sihova, ʻi he ngaahi meʻá ni,* ʻoku moʻui ai ʻa e tangata kotoa pē,
Pea ʻoku tuʻunga ai ʻa e moʻui ʻa hoku laumālié.
Te ke fakafoki au ke u moʻui lelei pea fakatolonga ʻa ʻeku moʻuí.+
17 Vakai! Naʻá ku maʻu ha mamahi lahi, kae ʻikai ko e fiemālie;
Ka ʻi hoʻo ʻofeina aú,
Naʻá ke fakahaofi au mei he luo ʻo e fakaʻauhá.+
Kuó ke lī ʻa ʻeku ngaahi angahalá kotoa ki mui ki ho tuʻá.*+
18 He ʻoku ʻikai lava ʻe Faʻitoka* ke ne fakalāngilangiʻi koe,+
ʻOku ʻikai lava ʻe mate ke ne fakahīkihikiʻi koe.+
Ko kinautolu ʻoku ʻalu hifo ki he luó ʻoku ʻikai lava ke nau ʻamanaki ki hoʻo faitōnungá.+
19 Ko e tokotaha moʻuí, ʻa e tokotaha ʻoku moʻuí ʻe lava ke ne fakahīkihikiʻi koe,
ʻO hangē tofu pē ko ia ʻoku lava ke u fai ʻi he ʻaho ní.
ʻOku lava ʻe ha tamai ke ne ʻoange ki hono ngaahi fohá ʻa e ʻilo ʻo fekauʻaki mo hoʻo faitōnungá.+
20 ʻE Sihova, ke ke fakahaofi au,
Pea te mau tā atu ʻa ʻeku ngaahi hivá ʻi he ngaahi meʻalea filó+
ʻI he ngaahi ʻaho kotoa ʻo ʻemau moʻuí ʻi he fale ʻo Sihová.’”+
21 Naʻe pehē ange leva ʻe ʻAisea: “ʻOmi ha takaonga fiki mōmoa ʻo ʻai ki he hangatāmakí, koeʻuhí ke ne sai.”+ 22 Naʻe ʻeke ange ʻe Hesekaia: “Ko e hā ʻa e fakaʻilonga te u ʻalu hake ki he fale ʻo Sihová?”+