ʻULUAKI SĀMIUELA

1 Pea naʻe ʻi ai ha tangata mei Lamataimi-sofimi*+ ʻo e feituʻu moʻungaʻia ʻo ʻIfalemí+ ʻa ia ko hono hingoá ko ʻElikena,+ ko e foha ʻo Seloami, ko e foha ʻo ʻIlaiū, ko e foha ʻo Tohu, ko e foha ʻo Sufi, ko ha ʻIfalemi. 2 Naʻe ʻi ai hono uaifi ʻe toko ua; ko e taha ko hono hingoá ko ʻAna, pea ko e taha ko hono hingoá ko Pēnina. Ko Pēniná naʻe ʻi ai ʻene fānau, ka ko ʻAná naʻe ʻikai haʻane fānau. 3 Ko e tangata ko iá naʻá ne ʻalu hake mei hono koló ʻi he taʻu ki he taʻu ke lotu* pea ke feilaulau kia Sihova ʻo e ngaahi kau taú ʻi Sailo.+ Ko e feituʻu ia naʻe ngāue ai ʻa e ongo foha ʻo ʻĪlaí, ʻa Hofinai mo Fineasi,+ ko e ongo taulaʻeiki kia Sihova.+

4 ʻI he ʻaho ʻe taha ʻi he taimi naʻe fai ai ʻe ʻElikena ha feilaulaú, naʻá ne ʻoange ai ha ngaahi ʻinasi ki hono uaifi ko Pēniná pea pehē ki heʻene fānau tangatá mo ʻene fānau fefiné+ kotoa, 5 ka naʻá ne ʻoange kia ʻAna ha ʻinasi makehe, koeʻuhí ko ʻAna ʻa e tokotaha naʻá ne ʻofa aí; ka naʻe ʻikai ʻoange ha fānau kiate ia* ʻe Sihova. 6 ʻIkai ngata aí, ko e uaifi ʻe tahá naʻá ne lumaʻi taʻetuku ia ke ʻai ke ne loto-mamahi koeʻuhí naʻe ʻikai ke ʻoange ʻe Sihova kiate ia ha fānau. 7 Ko e meʻa ia naʻá ne toutou fai ʻi he taʻu ki he taʻu; ʻi he taimi pē naʻe ʻalu hake ai ʻa ʻAna ki he fale ʻo Sihová,+ naʻe manukiʻi lahi ia ʻe he uaifi ʻe tahá ʻo aʻu ki heʻene tangi pea ʻikai te ne kai. 8 Ka naʻe pehē ange ʻe ʻElikena ko hono husepānití kiate ia: “ʻAna, ko e hā ʻokú ke tangi aí, pea ko e hā ʻoku ʻikai ai te ke kaí, pea ko e hā ʻokú ke fuʻu loto-mamahi aí?* ʻIkai ʻoku ou lelei ange kiate koe ʻi ha ngaahi foha ʻe toko hongofulu?”

9 Naʻe tuʻu hake leva ʻa ʻAna ʻi he ʻosi ʻenau kai mo inu ʻi Sailó. ʻI he taimi ko iá, naʻe tangutu ai ʻa ʻĪlai ko e taulaʻeikí ʻi he nofoʻanga naʻe ofi ki he pou matapā ʻo e temipale*+ ʻo Sihová. 10 Naʻe mātuʻaki loto-mamahi ʻa ʻAna, pea naʻe kamata ke ne lotu kia Sihova+ pea tangi ʻo ʻikai ke toe mataʻofi. 11 Pea naʻá ne fai ʻa e fuakava ko ení: “ʻE Sihova ʻo e ngaahi kau tau, kapau te ke vakai mai ki he faingataʻaʻia ʻa hoʻo sevānití pea manatuʻi au ʻo ʻikai ngalo ʻiate koe ʻa hoʻo sevānití pea foaki ki hoʻo sevānití ha tama tangata,+ te u foaki ia kia Sihova ʻi he ngaahi ʻaho kotoa ʻo ʻene moʻuí, pea ʻe ʻikai ke pā ha tele ki hono ʻulú.”+

12 Lolotonga ʻene lotu lōloa ʻi he ʻao ʻo Sihová, naʻe siofi ʻe ʻĪlai ʻa hono ngutú. 13 Naʻe lea loto pē ʻa ʻAna, ko hono loungutú pē naʻe ngaué, ka naʻe ʻikai ongona ʻa hono leʻó. Ko ia naʻe pehē ai ʻe ʻĪlai ʻokú ne konā. 14 Naʻe pehē ange ʻe ʻĪlai kiate ia: “ʻE ʻosi koā ʻafē hoʻo konaá? Tuku ā hoʻo inu uainé.” 15 ʻI he meʻá ni naʻe tali ange ai ʻe ʻAna: “ʻIkai, ʻe hoku ʻeiki! Ko ha fefine loto-mafasia lahi au; kuo ʻikai ke u inu uaine pe ko ha inu ʻolokaholo pē, ka ʻoku ou lilingi atu ʻa hoku lotó ʻi he ʻao ʻo Sihová.+ 16 ʻOua naʻá ke pehē ko ha fefine taʻeʻaonga ʻa hoʻo sevānití, he ʻoku aʻu mai ki he taimí ni mo ʻeku lea ʻi he mamahi mo e faingataʻaʻia lahi.” 17 Naʻe tali ange leva ʻe ʻĪlai: “ʻAlu ʻi he fiemālie, pea ʻofa ke tali ʻe he ʻOtua ʻo ʻIsilelí ʻa e fakatangi kuó ke fai kiate iá.”+ 18 ʻI he meʻá ni naʻá ne pehē ange ai: “ʻOfa ke ke leleiʻia ʻi hoʻo sevānití.” Pea naʻe ʻalu ʻa e fefiné ʻo ne kai, pea naʻe ʻikai te ne kei mata mamahi.

19 Pea naʻa nau tuʻu pongipongia hake ʻo punou ʻi he ʻao ʻo Sihová, ʻi he hili iá, naʻa nau foki ki honau falé ʻi Lama.+ Naʻe mohe* ʻa ʻElikena mo hono uaifi ko ʻAná, pea naʻe fai ha tokanga kiate* ia+ ʻe Sihova. 20 ʻI loto ʻi ha taʻu ʻe taha* naʻe hoko ai ʻa ʻAna ʻo feitama peá ne fanauʻi ha tama pea fakahingoa+ ia ko Sāmiuela,* koeʻuhí, fakatatau ki heʻene leá, “ko Sihova ia naʻá ku kole ia ki aí.”

21 Faifai atu pē naʻe ʻalu hake ʻa ʻElikena mo hono fāmilí kotoa ke ʻohake ʻa e feilaulau fakataʻú kia Sihova+ pea ke foaki ʻa ʻene feilaulau fuakavá. 22 Ka naʻe ʻikai ke ʻalu+ ʻa ʻAna, he naʻá ne pehē ki hono husepānití: “ʻI hono mavae pē ʻa e tamasiʻí, te u ʻoatu ia; pea te ne hā ʻi he ʻao ʻo Sihová peá ne nofo ai pē ʻi he taimi ko iá ʻo faai atu.”+ 23 Naʻe pehē ange leva ʻe ʻElikena ko hono husepānití kiate ia: “Fai ʻa e meʻa ʻokú ke pehē ʻoku lelei tahá.* Nofo pē ʻi ʻapi kae ʻoua kuó ke mavae ia. ʻOfa ke fakahoko ʻe Sihova ʻa e meʻa kuó ke leaʻakí.” Ko ia naʻe nofo ʻa e fefiné ʻi ʻapi ʻo tauhi ʻa ʻene tamá ʻo aʻu ki heʻene mavaeʻi ia.

24 ʻI heʻene mavaeʻi pē iá, naʻá ne ʻave ia ki Sailo, fakataha mo ha pulu taʻu tolu, ko e efa* mahoaʻa ʻe taha, pea mo ha fuʻu siā uaine,+ pea naʻá ne ʻalu ki he fale ʻo Sihová ʻi Sailo+ peá ne ʻalu mo e kiʻi tamasiʻí. 25 Naʻa nau tāmateʻi leva ʻa e pulú pea ʻomi ʻa e tamasiʻí kia ʻĪlai. 26 Ko ia naʻá ne pehē ange: “Kātaki pē, ʻe hoku ʻeiki! ʻOku ou fakapapauʻi atu kiate koe, ʻe hoku ʻeiki, ko au ʻa e fefine naʻe tuʻu mo koe ʻi he feituʻú ni ke fai ha lotu kia Sihová.+ 27 Ko e tamasiʻi ko ení naʻe fai ai ʻeku lotú, pea naʻe tali ʻe Sihova ʻa e fakatangi naʻá ku fai kiate iá.+ 28 Ko ia, ko au eni ʻoku ou foaki atu ia kia Sihova. ʻI hono ngaahi ʻahó kotoa, ʻoku foaki atu ai ia kia Sihova.”

Pea naʻá ne* punou hifo ai kia Sihova.

2 Pea naʻe lotu ʻa ʻAna ʻo pehē:

11 Pea naʻe hū ʻa ʻElikena ki hono falé ʻi Lama, ka ko e tamasiʻí naʻe hoko ko ha sevāniti* ʻa Sihova+ ʻi he ʻao ʻo ʻĪlai ko e taulaʻeikí.

12 Pea ko e ongo foha ʻo ʻĪlaí ko e ongo tangata fulikivanu;+ naʻe ʻikai haʻana tokaʻi ʻa Sihova. 13 Ko e meʻa eni naʻe fai ki he ngaahi ʻinasi naʻe totonu ke maʻu ʻe he kau taulaʻeikí mei he kakaí:+ ʻI ha taimi pē naʻe fai ai ʻe ha tangata ha feilaulau, naʻe haʻu ha tangata ngāue ʻa e taulaʻeikí mo ha huhu mata-tolu ʻi hono nimá ʻi he taimi naʻe haka ai ʻa e kakanoʻi-manú, 14 pea naʻá ne mono ki loto ki he hakaʻanga meʻá, ki he kulo feimeʻakai kau-uá, kulo ukamea fuopotopotó, pe ko e kulo feimeʻakai kau-tahá. ʻIlonga ha meʻa naʻe ʻohake ʻe he huhú, naʻe toʻo ia ʻe he taulaʻeikí maʻana. Ko e meʻa ia naʻa nau fai ʻi Sailo ki he kau ʻIsileli kotoa naʻe omi ki aí. 15 Pehē foki, naʻa mo e ki muʻa ke tutu ʻe he tangata faifeilaulaú ke kohu ʻa e ngakó,+ naʻe haʻu ha tangata ngāue ʻa e taulaʻeikí ʻo ne pehē kiate ia: “ʻOmi ki he taulaʻeikí ha kakanoʻi-manu ke ne tunu. ʻE ʻikai te ne toʻo meiate koe ha kakanoʻi-manu kuo haka, ko e kakanoʻi-manu mata pē.” 16 ʻI he pehē ange ʻe he tangatá kiate ia: “Tuku ke ʻuluaki tutu ke kohu ʻa e ngakó,+ peá ke toki toʻo leva maʻau ha meʻa pē ʻokú ke loto ki aí,”* naʻá ne pehē ange: “ʻIkai, ʻomi ia he taimí ni kiate au; ka ʻikai, te u toʻo fakamālohi ia!” 17 Ko ia ko e angahala ʻa e kau tangata ngāué naʻe hoko ʻo lahi ʻaupito ʻi he ʻao ʻo Sihová,+ he naʻe taʻetokaʻi ʻe he kau tangatá ni ʻa e feilaulau kia Sihová.

18 Pea ko Sāmiuela leva naʻá ne fakahoko fatongia+ ʻi he ʻao ʻo Sihová, pea naʻá ne tui* ha ʻēfoti līneni,+ neongo naʻá ne kei tamasiʻi pē. 19 Pehē foki, naʻe ngaohi ʻe heʻene faʻeé moʻona ha kiʻi kofu taʻenima, pea naʻá ne ʻomi ia kiate ia ʻi he taʻu ki he taʻu ʻi he taimi naʻá ne ʻalu atu ai mo hono husepānití ke foaki ʻa e feilaulau fakataʻú.+ 20 Pea naʻe tāpuakiʻi ʻe ʻĪlai ʻa ʻElikena mo hono uaifí peá ne pehē: “ʻOfa ke foaki atu ʻe Sihova kiate koe ha tama ʻi he uaifi ko ení ke fetongiʻaki ʻa e taha naʻe foaki kia Sihová.”+ Pea naʻá na foki ki ʻapi. 21 Naʻe fakahanga ʻe Sihova ʻene tokangá kia ʻAna, ʻo malava ai ke ne feitama;+ pea naʻá ne fāʻeleʻi ha toe tama ʻe toko tolu mo ha ongo tamaiki fefine. Pea ko e tamasiʻi ko Sāmiuelá naʻe hokohoko atu ʻene tupu ʻi he ʻao ʻo Sihová.+

22 Pea kuo motuʻa ʻaupito ʻa ʻĪlai, ka naʻá ne fanongo ʻo fekauʻaki mo e meʻa kotoa pē naʻe fai ʻe hono ongo fohá+ ki he kotoa ʻo ʻIsilelí pea mo ʻena mohe* mo e kakai fefine naʻe ngāue ʻi he hūʻanga ʻo e tēniti feʻiloakiʻangá.+ 23 Naʻá ne faʻa pehē ange kiate kinaua: “Ko e hā ʻokú mo hanganaki fai ai ʻa e ngaahi meʻa pehení? He ko e ngaahi meʻa ʻoku ou fanongo ai fekauʻaki mo kimoua mei he kotoa ʻo e kakaí ʻoku kovi. 24 Tuku ia ʻe hoku ongo foha, koeʻuhí ko e fakamatala ʻoku ou fanongo ʻoku ʻalu holo ʻi he lotolotonga ʻo e kakai ʻa Sihová ʻoku ʻikai lelei. 25 Kapau ʻe faiangahala ha tangata ki ha tangata ʻe taha, ʻe lava ke fai ʻe ha taha ha hū kia Sihova maʻana;* ka ʻo kapau ʻe faiangahala ha tangata kia Sihova,+ ko hai ia ʻe lava ke ne fai ha lotu maʻana?” Ka naʻá na fakafisi ke fanongo ki heʻena tamaí, he naʻe fakapapauʻi ʻe Sihova ke tāmateʻi kinaua.+ 26 Lolotonga ia, ko e tamasiʻi ko Sāmiuelá naʻe tupu ai pē ʻa hono lahí pea naʻe ʻofeina fakatouʻosi ʻe Sihova mo e kakaí.+

27 Naʻe haʻu ha tangata ʻa e ʻOtuá kia ʻĪlai ʻo ne pehē kiate ia: “Ko e folofola eni ʻa Sihová: ‘ʻIkai naʻá ku fakahā mahino au ki he fale ʻa hoʻo tamaí lolotonga ʻenau ʻi ʻIsipite ko e kau pōpula ki he fale ʻo Feló?+ 28 Pea naʻe fili ia mei he ngaahi matakali kotoa pē ʻo ʻIsilelí+ ke hoko ko ʻeku taulaʻeiki pea ke ne ʻalu hake ki hoku ʻōlitá+ ke fai ha ngaahi feilaulau, ke tutu ʻinisēnisi,* pea ke ne tui ha ʻēfoti ʻi hoku ʻaó; pea naʻá ku foaki ki he fale ʻo hoʻo kuí ʻa e ngaahi feilaulau kotoa pē ʻa e kau ʻIsilelí*+ ʻoku fai ʻaki ʻa e afí. 29 Ko e hā ʻoku mou taʻetokaʻi* ai, kau tangata, ʻa ʻeku feilaulaú mo ʻeku foaki naʻá ku tuʻutuʻuni ʻi hoku nofoʻangá?+ Ko e hā ʻokú ke hanganaki fakalāngilangiʻi ai ho ongo fohá ʻo lahi ange ia ʻiate au ʻaki hoʻomou kai ke mou sisino mei he ngaahi ʻinasi lelei taha ʻo e foaki kotoa pē ʻa ʻIsileli ko hoku kakaí?+

30 “‘Ko e ʻuhinga ia ʻoku pehē ai ʻe he folofola ʻa Sihova ko e ʻOtua ʻo ʻIsilelí: “Naʻá ku mātuʻaki pehē ko ho falé mo e fale ʻo hoʻo kuí ʻe ʻaʻeva maʻu ai pē ʻi hoku ʻaó.”+ Ka ko eni ʻoku talaki ʻe Sihova: “Mole ke mamaʻo haʻaku toe fakakaukau pehē, koeʻuhí ko e faʻahinga ʻoku nau fakalāngilangiʻi aú te u fakalāngilangiʻi,+ ka ko e faʻahinga ʻoku nau taʻetokaʻi aú ʻe ʻikai fai hano fakaʻapaʻapaʻi.” 31 Vakai! ʻOku hoko mai ʻa e ngaahi ʻaho ʻa ia te u tuʻusi ai ho mālohí* pea mo e mālohi ko ia ʻo e fale ʻo hoʻo tamaí, ke ʻoua naʻa ʻi ai ha tangata ʻi ho falé ʻe aʻu ʻo taʻumotuʻa.+ 32 Pea te ke sio ki ha fili ʻi hoku nofoʻangá neongo ʻa e ngaahi lelei kotoa ʻoku fai ʻi ʻIsilelí,+ pea ʻe ʻikai ʻaupito ke toe ʻi ai ha tangata taʻumotuʻa ʻi ho falé. 33 Ko hoʻo tangata ʻa ia ʻoku ʻikai te u toʻo mei heʻene ngāue ʻi hoku ʻōlitá te ne ʻai ke kovi hoʻo sió pea te ne ʻomi ʻa e mamahi kiate koe, ka ko e fuʻu tokolahi ange ʻo ho falé te nau mate ʻi he heletā ʻa e kau tangatá.+ 34 Pea ko e meʻa ʻe hoko ki ho ongo fohá, ʻa Hofinai mo Fineasi, ʻe hoko ia ko ha fakaʻilonga kiate koe: Te na fakatou mate+ ʻi he ʻaho pē ʻe taha. 35 Te u fokotuʻu leva maʻaku ha taulaʻeiki faitōnunga.+ Te ne ngāue ʻo fehoanaki mo e meʻa ʻoku holi ki ai ʻa hoku lotó; pea te u langa moʻona ha fale taʻengata, pea te ne ʻaʻeva maʻu ai pē ʻi he ʻao ʻo ʻeku tokotaha paní. 36 Ko ha taha pē ʻe toe ʻi ho falé te ne haʻu ʻo punou kiate ia ki ha totongi ko e paʻanga mo ha foʻi mā, pea te ne pehē: “Vaheʻi muʻa au ki he taha ʻo e ngaahi lakanga fakataulaʻeikí ke u kai ai ha konga mā.”’”+

3 Lolotonga ia, ko e tamasiʻi ko Sāmiuelá naʻe fakahoko fatongia+ kia Sihova ʻi he ʻao ʻo ʻĪlaí, ka naʻe hoko ʻo tātātaha ke ʻi ai ha folofola meia Sihova ʻi he ngaahi ʻaho ko iá; naʻe ʻikai loko ʻi ai ha ngaahi vīsone.+

2 ʻI he ʻaho ʻe taha naʻe mohe ai ʻa ʻĪlai ʻi hono lokí, pea naʻe nenefu ʻa hono matá; naʻe ʻikai lava ke ne sio.+ 3 Ko e maama ʻa e ʻOtuá+ naʻe teʻeki ai ke tāmateʻi, pea ko Sāmiuelá naʻá ne tokoto ʻi he temipale*+ ʻo Sihová, ʻi he feituʻu naʻe ʻi ai ʻa e ʻAʻake ʻa e ʻOtuá. 4 Pea naʻe ui ʻe Sihova ʻa Sāmiuela. Naʻá ne tali ange: “Ko au eni.” 5 Naʻá ne lele kia ʻĪlai ʻo ne pehē: “Ko au eni, he naʻá ke ui au.” Ka naʻá ne pehē ange: “Naʻe ʻikai te u ui atu. Toe tokoto hifo.” Ko ia naʻá ne ʻalu ʻo ne tokoto. 6 Naʻe toe ui ʻa Sihova: “Sāmiuela!” ʻI he meʻá ni naʻe tuʻu hake ʻa Sāmiuela ʻo ne ʻalu kia ʻĪlai peá ne pehē: “Ko au eni, he naʻá ke ui au.” Ka naʻá ne pehē: “Naʻe ʻikai te u ui atu, ʻe hoku foha. Toe tokoto hifo.” 7 (Ka ko Sāmiuelá naʻe teʻeki ai ke ne hoko ʻo ʻiloʻi kakato ʻa Sihova, pea ko e folofola ʻa Sihová naʻe teʻeki ai ke fakahā ia kiate ia.)+ 8 Ko ia naʻe toe ui ʻa Sihova, ko hono tuʻo tolú ia: “Sāmiuela!” Ko ia naʻá ne tuʻu hake ʻo ne ʻalu kia ʻĪlai peá ne pehē: “Ko au eni, he naʻá ke ui au.”

Naʻe ʻiloʻi leva ʻe ʻĪlai ko Sihova ia naʻá ne ui ʻa e tamasiʻí. 9 Ko ia naʻe pehē ʻe ʻĪlai kia Sāmiuela: “ʻAlu ʻo tokoto, pea kapau te ne ui koe, te ke pehē ange, ‘Ke ke folofola mai Sihova, he ʻoku fakafanongo atu ʻa hoʻo sevānití.’” Pea naʻe ʻalu ʻa Sāmiuela ʻo ne tokoto ʻi hono feituʻú.

10 Naʻe hāʻele mai ʻa Sihova ʻo ne tuʻu ai, peá ne ui ʻo hangē ko ia ko e ngaahi taimi ki muʻá: “Sāmiuela, Sāmiuela!” ʻI he meʻá ni naʻe pehē ange ʻe Sāmiuela: “Ke ke folofola mai, he ʻoku fakafanongo atu ʻa hoʻo sevānití.” 11 Naʻe folofola ʻa Sihova kia Sāmiuela: “Vakai! Te u fai ha meʻa ʻi ʻIsileli ʻa ia te ne ʻai fakatouʻosi ai ʻa e ongo telinga ʻo ha taha pē ʻe fanongo ki ai ke makini.+ 12 ʻI he ʻaho ko iá te u fai ai kia ʻĪlai ʻa e meʻa kotoa pē naʻá ku folofolaʻaki fekauʻaki mo hono falé, mei heʻene kamata ki heʻene ʻosi.+ 13 Kuo pau ke ke tala kiate ia te u ʻomi ha fakamaau taʻengata ki hono falé koeʻuhi ko e faihala kuó ne ʻilo fekauʻaki mo iá,+ he ko hono ongo fohá ʻokú na lauʻikoviʻi ʻa e ʻOtuá,+ ka kuo ʻikai te ne valokiʻi kinaua.+ 14 Ko e ʻuhinga ia kuó u fai ai ha fuakava fekauʻaki mo e fale ʻo ʻĪlaí ʻe ʻikai ʻaupito ke fakamolemoleʻi ʻa e faihala ʻa e fale ʻo ʻĪlaí ʻi ha ngaahi feilaulau pe ha ngaahi foaki.”+

15 Naʻe tokoto ʻa Sāmiuela ʻo aʻu ki he pongipongí; pea naʻá ne fakaava leva ʻa e ngaahi matapā ʻo e fale ʻo Sihová. Naʻe ilifia ʻa Sāmiuela ke tala kia ʻĪlai ʻa e vīsoné. 16 Ka naʻe ui ʻe ʻĪlai ʻa Sāmiuela: “Sāmiuela, ʻe hoku foha!” ʻI he meʻá ni naʻá ne pehē ange: “Ko au eni.” 17 Naʻá ne ʻeke ange: “Ko e hā ʻa e fekau naʻá ne folofolaʻaki kiate koé? ʻOua muʻa te ke fufū ia meiate aú. ʻOfa ke fai atu ia ʻe he ʻOtuá kiate koe pea hulu atu ai kapau te ke fufū meiate au ha momoʻi meʻa ʻe taha ʻi he ngaahi lea kotoa naʻá ne folofolaʻaki kiate koé.” 18 Ko ia naʻe tala ʻe Sāmiuela kiate ia ʻa e meʻa kotoa pē, pea naʻe ʻikai te ne fufū ha meʻa ʻe taha meiate ia. Naʻe pehē ange ʻe ʻĪlai: “Ko Sihova ia. Tuku ke ne fai ʻa e meʻa ʻoku lelei ʻi heʻene vakaí.”

19 Naʻe hokohoko atu ʻa e tupu ʻa Sāmiuelá pea naʻe kau mo ia+ ʻa Sihova pea naʻe ʻikai te ne tuku ke taʻefakahoko* ha taha ʻi heʻene ngaahi leá kotoa. 20 Ko ʻIsileli kotoa mei Tani ki Pea-sipa naʻa nau hoko ʻo ʻiloʻi ko Sāmiuelá kuo fakapapauʻi ia ko ha palōfita ʻa Sihova. 21 Pea naʻe hokohoko atu ʻa e hā ʻa Sihova ʻi Sailó, he naʻe fakahā ʻe Sihova ʻa ia tonu kia Sāmiuela ʻi Sailo fakafou ʻi he folofola ʻa Sihová.+

4 Pea naʻe ʻalu atu ʻa e lea ʻa Sāmiuelá ki ʻIsileli kotoa.

Naʻe ʻalu atu leva ʻa ʻIsileli ke fetaulaki mo e kau Filisitiá ʻi he tau; naʻa nau ʻapitanga ʻi he tafaʻaki ʻo ʻEpenisá, pea ko e kau Filisitiá naʻa nau ʻapitanga kinautolu ʻi ʻĒfeki. 2 Ko e kau Filisitiá naʻa nau fakatē tau ke fetaulaki mo ʻIsileli, ka naʻe iku kovi ʻa e taú pea naʻe ikunaʻi ʻa ʻIsileli ʻe he kau Filisitiá, ʻa ia naʻa nau taaʻi ʻa e kau tangata nai ʻe toko 4,000 ʻi he malaʻe taú. 3 ʻI he foki atu ʻa e kakaí ki he ʻapitangá, naʻe pehē ʻe he kau mātuʻa ʻo ʻIsilelí: “Ko e hā naʻe fakaʻatā ai ʻe Sihova ke ikunaʻi kitautolu* he ʻahó ni ʻe he kau Filisitiá?+ Tuku ke tau ʻave mei Sailo+ ʻa e ʻaʻake ʻo e fuakava ʻa Sihová ke tau ō mo ia, koeʻuhí ke ʻiate kitautolu ia ʻo ne fakahaofi kitautolu mei he nima ʻo hotau ngaahi filí.” 4 Ko ia naʻe fekau atu ʻe he kakaí ha kau tangata ki Sailo, pea naʻa nau fua mei ai ʻa e ʻaʻake ʻo e fuakava ʻa Sihova ʻo e ngaahi kau taú, ʻa ia ʻokú ne ʻafio ʻi he taloni ʻi ʻolunga ʻi he* ongo selupimí.+ Ko e ongo foha ʻo ʻĪlaí, ʻa Hofinai mo Fineasi,+ naʻá na ʻi ai foki fakataha mo e ʻaʻake ʻo e fuakava ʻa e ʻOtua moʻoní.

5 ʻI he hū pē ʻa e ʻaʻake ʻo e fuakava ʻa Sihová ki he ʻapitangá, naʻe kaikaila leʻo-lahi ʻa e kau ʻIsilelí kotoa, ko ia naʻe ngalulu ai ʻa e kelekelé. 6 ʻI he fanongo ʻa e kau Filisitiá ki he ongo atu ʻa e kaikailá, naʻa nau pehē: “Ko e hā ʻoku kaikaila leʻo-lahi pehē ai ʻa e ʻapitanga ʻo e kau Hepeluú?” Naʻe faifai pē ʻo nau ʻiloʻi kuo fakahū ʻa e ʻAʻake ʻa Sihová ki he ʻapitangá. 7 Naʻe hoko ʻo ilifia ʻa e kau Filisitiá, he naʻa nau pehē: “Kuo haʻu ʻa e ʻOtuá ki he ʻapitangá!”+ Ko ia naʻa nau pehē: “ʻOiauē ka ko kitautolu, he kuo halaʻatā ke teitei hoko ha meʻa peheni ki muʻa! 8 ʻOiauē ka ko kitautolu! Ko hai ia te ne fakahaofi kitautolu mei he nima ʻo e ʻOtua ngeia ko ení? Ko e ʻOtua eni naʻá ne taaʻi ʻa ʻIsipite ʻaki ʻa e faʻahinga tāmate kehekehe kotoa pē ʻi he toafá.+ 9 Mou loto-toʻa pea ʻai ke ngali tangata, ʻa kimoutolu kau Filisitia, koeʻuhí ke ʻoua naʻa mou ngāue ki he kau Hepeluú ʻo hangē tofu pē ko ʻenau ngāue kiate kimoutolú.+ ʻAi ke ngali tangata pea mou faitau!” 10 Ko ia naʻe tau ʻa e kau Filisitiá pea naʻe foʻi+ ʻa ʻIsileli, pea naʻe hola ʻa e tokotaha taki taha ki hono tēniti. Ko e tāmaté naʻe lahi ʻaupito; ʻi he faʻahi ʻa ʻIsilelí, naʻe tō ai ʻa e kau sōtia ʻalu lalo ʻe toko 30,000. 11 ʻIkai ko ia pē, naʻe puke ʻo ʻave ʻa e ʻAʻake ʻa e ʻOtuá, pea naʻe mate+ ʻa e ongo foha ʻo ʻĪlaí, ʻa Hofinai pea mo Fineasi.

12 Naʻe lele ha tangata Penisimani mei he malaʻe taú ʻo ne aʻu ki Sailo ʻi he ʻaho ko iá kuo haehae hono ngaahi kofú pea fakaefuefu hono ʻulú.+ 13 ʻI he aʻu atu ʻa e tangatá, naʻe tangutu mai ʻa ʻĪlai ʻi he tangutuʻanga he veʻehalá ʻo vakai atu, he naʻe tete hono lotó ʻi he fekauʻaki mo e ʻAʻake ʻa e ʻOtua moʻoní.+ Naʻe hū ʻa e tangatá ki he koló ke fakahā ʻa e ongoongó, pea naʻe kamata ke kalanga ʻa e koló kotoa. 14 ʻI he fanongo ʻa ʻĪlai ki he ongo atu ʻa e kalangá, naʻá ne ʻeke: “ʻOku ʻuhinga ki he hā ʻa e ongo mai ʻa e māveuveu ko ení?” Naʻe fakavave atu ʻa e tangata tatau pē ʻo ne fakahā ʻa e ongoongó kia ʻĪlai. 15 (Naʻe taʻu 98 ʻa ʻĪlai ʻi he taimi ko ení, pea naʻe sio hangatonu tuʻumaʻu pē hono matá, pea naʻe ʻikai lava ke ne mamata.)+ 16 Naʻe pehē ange leva ʻe he tangatá kia ʻĪlai: “Ko au ʻa e tokotaha naʻe haʻu mei he malaʻe taú! Naʻá ku toki holá ni mai pē he ʻahó ni mei he malaʻe taú.” ʻI he meʻá ni naʻá ne ʻeke ange: “Ko e hā ʻa e meʻa naʻe hokó, ʻe hoku foha?” 17 Ko ia naʻe fakamatala ʻa e tokotaha naʻe haʻu mo e ongoongó: “Kuo hola ʻa ʻIsileli mei he kau Filisitiá, pea naʻe ʻi ai ha fuʻu ʻulungia ʻi he lotolotonga ʻo e kakaí;+ pehē foki ko ho ongo fohá, ʻa Hofinai mo Fineasi, kuó na mate,+ pea kuo puke+ ʻo ʻave ʻa e ʻAʻake ʻa e ʻOtua moʻoní.”

18 ʻI he mōmeniti pē naʻá ne lave ai ʻo kau ki he ʻAʻake ʻa e ʻOtua moʻoní, naʻe tō ʻa ʻĪlai ki mui mei hono tangutuʻangá ʻi he veʻe matapaá, pea naʻe fasi hono kiá peá ne mate, he naʻá ne motuʻa pea mamafa. Naʻá ne fakamaau ʻi ʻIsileli ʻi he taʻu ʻe 40. 19 Ko hono ʻofefine-ʻi-he-fonó, ʻa e uaifi ʻo Fineasí, naʻe feitama pea naʻe ofi ʻa hono taimi fāʻelé. ʻI heʻene fanongo ki he fakamatala kuo puke ʻo ʻave ʻa e ʻAʻake ʻa e ʻOtua moʻoní pea kuo mate ʻa ʻene tamai-ʻi-he-fonó mo hono husepānití, naʻá ne mapelu hifo ʻo ne langā fakafokifā peá ne fāʻele. 20 ʻI heʻene mei maté, ko e kau fefine naʻa nau tuʻu ʻi hono tafaʻakí naʻa nau pehē: “ʻOua ʻe ilifia, he kuó ke fāʻeleʻi ha tama tangata.” Naʻe ʻikai haʻane tali pea naʻe ʻikai haʻane tokanga ki ai.* 21 Ka naʻá ne fakahingoa ʻa e tamasiʻí ko Ikapote,*+ peá ne pehē: “Kuo mole ʻa e lāngilangí mei ʻIsileli,”+ ʻo ʻuhingá ki hono puke ʻo ʻave ʻa e ʻAʻake ʻa e ʻOtua moʻoní pea mo e meʻa naʻe hoko ki heʻene tamai-ʻi-he-fonó mo hono husepānití.+ 22 Naʻá ne pehē: “Kuo mole ʻa e lāngilangí mei ʻIsileli, koeʻuhí he naʻe puke+ ʻo ʻave ʻa e ʻAʻake ʻa e ʻOtua moʻoní.”

5 ʻI hono puke ʻe he kau Filisitiá ʻa e ʻAʻake+ ʻa e ʻOtua moʻoní, naʻa nau ʻomi ia mei ʻEpenisa ki ʻAsitoti. 2 Naʻe toʻo ʻe he kau Filisitiá ʻa e ʻAʻake ʻa e ʻOtua moʻoní pea ʻomi ia ki he fale* ʻo Tākoní ʻo fokotuʻu ia ʻi he tafaʻaki ʻo Tākoní.+ 3 ʻI he tuʻu pongipongia hake ʻa e kau ʻAsitotí ʻi he ʻaho hono hokó, tā ko Tākoni ena kuo tō foʻohifo mai ʻi he kelekelé ʻi muʻa ʻi he ʻAʻake ʻa Sihová.+ Ko ia naʻa nau toʻo ʻa Tākoni ʻo fakafoki ki hono tuʻuʻangá.+ 4 ʻI heʻenau tuʻu pongipongia hake ʻi he ʻaho hoko maí, tā ko Tākoni ena kuo tō foʻohifo mai ʻi he kelekelé ʻi muʻa ʻi he ʻAʻake ʻa Sihová. Ko e ʻulu ʻo Tākoní mo hono ongo ʻaofinimá fakatouʻosi naʻe motuhi pea naʻe lī mai he hūʻangá. Ko hono konga pē hangē ha iká* naʻe toe kakato maí. 5 Ko e ʻuhinga ia ʻoku aʻu mai ai pē ki he ʻahó ni, ko e kau taulaʻeiki ʻa Tākoní mo e faʻahinga kotoa ko ia ʻoku nau hū ki he fale ʻo Tākoní ʻoku ʻikai te nau ʻalu ʻi he hūʻanga kia Tākoni ʻi ʻAsitotí.

6 Naʻe mamafa ʻa e nima ʻo Sihová ki he kau ʻAsitotí, pea naʻá ne fakaʻauha kinautolu ʻaki hono taaʻi ʻa ʻAsitoti mo hono ngaahi feituʻú ʻaki ʻa e kahi.+ 7 ʻI he sio ʻa e kau tangata ʻo ʻAsitotí ki he meʻa naʻe hokó, naʻa nau pehē: “ʻOua ʻe tuku heni ʻiate kitautolu ʻa e ʻAʻake ʻa e ʻOtua ʻo ʻIsilelí, he kuo ala mālohi mai hono nimá kiate kitautolu mo hotau ʻotua ko Tākoní.” 8 Ko ia naʻa nau fai ha fekau pea fakatahatahaʻi mai ʻa e ngaahi ʻeiki kotoa ʻo e kau Filisitiá pea ʻeke kiate kinautolu: “Ko e hā te mau fai ki he ʻAʻake ʻa e ʻOtua ʻo ʻIsilelí?” Naʻa nau tali ange: “Tuku ke hiki ʻa e ʻAʻake ʻa e ʻOtua ʻo ʻIsilelí ki Kati.”+ Ko ia naʻa nau hiki ʻa e ʻAʻake ʻa e ʻOtua ʻo ʻIsilelí ki ai.

9 Hili ʻenau hiki ia ki aí, naʻe ala mai ʻa e nima ʻo Sihová ki he koló, ʻo tupu ai ha ilifia lahi. Naʻá ne taaʻi ʻa e kau tangata ʻo e koló, mei he iiki ki he lalahi, pea naʻe tupu ʻa e kahí ʻiate kinautolu.+ 10 Ko ia naʻa nau ʻave ʻa e ʻAʻake ʻa e ʻOtua moʻoní ki ʻEkiloni,+ ka ʻi he aʻu pē ʻa e ʻAʻake ʻa e ʻOtua moʻoní ki ʻEkiloní, naʻe kamata ke kalanga ʻa e kau ʻEkiloní: “Kuo nau ʻomi ʻa e ʻAʻake ʻa e ʻOtua ʻo ʻIsilelí kiate kitautolu ke ʻai kitautolu mo hotau kakaí ke tau mate!”+ 11 Naʻa nau fai leva ha fekau pea fakatahatahaʻi mai ʻa e ngaahi ʻeiki kotoa ʻo e kau Filisitiá pea nau pehē: “ʻAve ʻa e ʻAʻake ʻa e ʻOtua ʻo ʻIsilelí; tuku ke fakafoki ia ki hono feituʻú koeʻuhi ke ʻoua naʻa ʻai kitautolu pea mo hotau kakaí ke tau mate.” He kuo mafola ʻi he koló kotoa ʻa e ilifia ki he maté; ko e nima ʻo e ʻOtua moʻoní naʻe tō mamafa ʻaupito ʻi ai,+ 12 pea ko e kau tangata naʻe ʻikai te nau maté naʻe taaʻi ʻaki kinautolu ʻa e kahí. Pea ko e tangi ʻa e koló ki ha tokoní naʻe ʻalu hake ia ki he langí.

6 Ko e ʻAʻake+ ʻa Sihová naʻe ʻi he feituʻu Filisitiá ia ʻi he māhina ʻe fitu. 2 Naʻe ui mai ʻe he kau Filisitiá ʻa e kau taulaʻeikí mo e kau vavaló+ ʻo ʻeke ange: “Ko e hā te mau fai ki he ʻAʻake ʻa Sihová? Tala mai ke mau ʻilo pe ʻe anga-fēfē haʻamau fakafoki ia ki hono feituʻú.” 3 Naʻa nau tali mai: “Kapau te mou ʻave ʻa e ʻaʻake ʻo e fuakava ʻa Sihova ko e ʻOtua ʻo ʻIsilelí, ʻoua ʻe fakafoki ia ʻo taʻeʻiai ha foaki. ʻOku totonu ke mou mātuʻaki fakafoki ia kiate ia fakataha mo ha feilaulau halaia.+ Ko e toki taimi pē ia te mou moʻui aí, pea ʻe fakahaaʻi atu ai ke mou ʻilo ʻa e ʻuhinga naʻe ʻikai mavahe ai ʻa hono nimá meiate kimoutolú.” 4 Ko ia naʻa nau ʻeke ange: “Ko e hā ʻa e feilaulau halaia te mau ʻave kiate iá?” Naʻa nau pehē: “Fakatatau ki he tokolahi ʻo e ngaahi ʻeiki ʻo e kau Filisitiá,+ ʻave ha kahi koula ʻe nima mo e kumā koula ʻe nima, he ko e mala tatau kuo taaʻi ʻaki ʻa kimoutolu kotoa pea mo homou ngaahi ʻeikí. 5 ʻOku totonu ke mou ngaohi ha ngaahi ʻīmisi ʻo homou kahí mo e ngaahi ʻīmisi ʻo hoʻomou fanga kumā+ ʻa ia ʻoku nau ʻomi ʻa e maumau ki he fonuá, pea ʻoku totonu ke mou fakalāngilangiʻi ʻa e ʻOtua ʻo ʻIsilelí. Mahalo pē te ne fakamaʻamaʻa ai ʻa e mamafa ʻo hono nimá ʻa ia kuo tō kiate kimoutolu mo homou ʻotuá pea mo homou fonuá.+ 6 Ko e hā ke mou fakafefeka ai homou lotó ʻo hangē ko e fakafefeka ʻe he kau ʻIsipité mo Felo honau lotó?+ ʻI Heʻene ala mālohi kiate kinautolú,+ naʻe pau ai ke nau fekauʻi atu ʻa ʻIsileli ke nau ʻalu, pea naʻa nau mavahe.+ 7 Teuteu leva ha saliote foʻou mo ha ongo pulu ʻoku ʻi ai hona ʻuhiki pea kuo ʻikai ʻaupito ke ʻai kiate kinaua ha ʻioke. Pea haʻi ʻa e ongo pulú ki he salioté, kae fakafoki ʻa hona ʻuhikí ki ʻapi, ke mavahe meiate kinaua. 8 Toʻo ʻa e ʻAʻake ʻa Sihová ʻo hili ia ʻi he salioté, pea faʻo ʻa e ngaahi ʻīmisi koula ʻoku mou ʻoatu kiate ia ko ha feilaulau halaiá ʻi ha puha ʻi hono tafaʻakí.+ Hili iá, fakafononga atu leva ia 9 pea mou siofi: Kapau ʻe ʻalu hake ia ʻi he hala ki Pete-semesí,+ ki hono feituʻú tonu, tā ko e tokotaha leva ia kuó ne fai ʻa e fuʻu koví ni kiate kitautolú. Ka ʻo kapau ʻe ʻikai, te tau ʻiloʻi ai naʻe ʻikai ko hono nimá naʻá ne taaʻi kitautolú; naʻe hoko fāinoa mai pē ia kiate kitautolu.”

10 Naʻe fai pehē ʻa e kau tangatá. Naʻa nau toʻo ha pulu ʻe ua naʻe ʻi ai hona ʻuhiki pea haʻi kinaua ki he salioté, pea ko hona ʻuhikí naʻa nau tuku ʻā ia ʻi ʻapi. 11 Naʻa nau hili leva ʻa e ʻAʻake ʻa Sihová ʻi he salioté, pea pehē ki he puha naʻe ʻi ai ʻa e fanga kumā koulá mo e ngaahi ʻīmisi ʻo honau kahí. 12 Pea naʻe ʻalu hangatonu ʻa e ongo pulú ʻi he hala ki Pete-semesí.+ Naʻá na ʻalu pē ʻi he hala lahi ʻe taha, ʻo tangi pē mo na ʻalu; naʻe ʻikai te na afe ki he toʻomataʻú pe ki he toʻohemá. Lolotonga ení naʻe muimui atu ai ʻa e ngaahi ʻeiki ʻo e kau Filisitiá ʻo aʻu ki he kauʻāfonua ʻo Pete-semesí. 13 Ko e kakai ʻo Pete-semesí naʻa nau tutuʻu ʻa e utu-taʻu uité ʻi he teleʻa lautoká.* ʻI he hanga hake honau matá ʻo sio ki he ʻAʻaké, naʻa nau fiefia lahi ʻi he sio ki aí. 14 Naʻe aʻu ʻa e salioté ki he konga kelekele ʻa Siosiua ko e Pete-semesí pea tuʻu ai ʻo ofi ki ha fuʻu maka. Ko ia naʻa nau fahi ʻa e papa ʻo e salioté, ʻo fefie ʻaki pea nau ʻohake ai ʻa e ongo pulú+ ko ha feilaulau tutu kia Sihova.

15 Naʻe ʻohifo ʻe he kau Līvaí+ ʻa e ʻAʻake ʻa Sihová mo e puha naʻe tuku fakataha mo iá, ʻa ia naʻe ʻi ai ʻa e ngaahi ʻīmisi koulá, pea nau tuku kinaua ʻi he fuʻu maká. Ko e kau tangata leva ʻo Pete-semesí+ naʻa nau ʻohake ʻa e ngaahi feilaulau tutu pea fai ha ngaahi feilaulau ʻi he ʻaho ko iá kia Sihova.

16 ʻI he sio ki ai ʻa e ngaahi ʻeiki ʻe toko nima ʻo e kau Filisitiá, naʻa nau foki ki ʻEkiloni ʻi he ʻaho ko iá. 17 Pea ko e ngaahi kahi koula eni naʻe ʻave ʻe he kau Filisitiá ko ha feilaulau halaia kia Sihová:+ Ko e taha maʻa ʻAsitoti,+ taha maʻa Kesa, taha maʻa ʻAsikeloni, taha maʻa Kati,+ pea mo e taha maʻa ʻEkiloni.+ 18 Pea ko e lahi ʻo e fanga kumā koulá naʻe fehoanaki ia mo e lahi ʻo e ngaahi kolo kotoa ʻo e ngaahi ʻeiki ʻe toko nima ʻo e kau Filisitiá—fakatouʻosi ʻa e ngaahi kolo fakakolotaú mo e fanga kiʻi kolo ʻi he feituʻu ʻutá.

Pea ko e fuʻu maka ʻa ia naʻa nau tuku ai ʻa e ʻAʻake ʻa Sihová ʻoku hoko ia ko ha fakamoʻoni ʻo aʻu mai ki he ʻahó ni ʻi he konga kelekele ʻa Siosiua ko e Pete-semesí. 19 Ka naʻe taaʻi ʻe he ʻOtuá ʻa e kau tangata ʻo Pete-semesí, koeʻuhí naʻa nau sio fakamamaʻu ki he ʻAʻake ʻa Sihová. Naʻá ne taaʻi ʻa e toko 50,070* ʻi he lotolotonga ʻo e kakaí, pea naʻe kamata ke tangi ʻa e kakaí koeʻuhí naʻe taaʻi kinautolu ʻe Sihova ʻi ha tāmate lahi.+ 20 Ko ia naʻe ʻeke ʻe he kau tangata ʻo Pete-semesí: “Ko hai ia ʻe lava ke tuʻu ʻi he ʻao ʻo Sihová, ʻa e ʻOtua māʻoniʻoni ko ení,+ pea te ne hāʻele meiate kitautolú+ kia hai?” 21 Ko ia naʻa nau fekauʻi atu ai ha kau talafekau ki he kakai ʻo Kiliate-sialimí,+ ʻo pehē: “Kuo fakafoki mai ʻe he kau Filisitiá ʻa e ʻAʻake ʻa Sihová. Mou omi ʻo ʻalu hake mo ia.”+

7 Ko ia naʻe omi ʻa e kau tangata ʻo Kiliate-sialimí ʻo ʻohake ʻa e ʻAʻake ʻa Sihová ki he fale ʻo ʻApinatapí+ ʻi he funga moʻungá, pea naʻa nau fakatapui ʻa hono foha ko ʻEliesá ke ne leʻohi ʻa e ʻAʻake ʻa Sihová.

2 Naʻe hili atu ha vahaʻa taimi fuoloa mei he ʻaho naʻe ʻomi ai ʻa e ʻAʻaké ki Kiliate-sialimí, ko e taʻu fakakātoa ʻe 20, pea naʻe kamata ke kumi* ʻa e kotoa ʻo e fale ʻo ʻIsilelí kia Sihova.+ 3 Naʻe pehē leva ʻe Sāmiuela ki he kotoa ʻo e fale ʻo ʻIsilelí: “Kapau ʻoku mou foki kia Sihova ʻaki ʻa e kotoa ʻo homou lotó,+ mou toʻo ʻa e ngaahi ʻotua mulí+ mo e ngaahi ʻīmisi ʻAsitelotí+ mei homou lotolotongá, pea fakahanga taʻetoeleʻeia homou lotó kia Sihova ʻo tauhi kiate ia pē,+ pea te ne fakahaofi kimoutolu mei he nima ʻo e kau Filisitiá.”+ 4 Ko ia naʻe liʻaki ʻe he kau ʻIsilelí ʻa e ngaahi Pēalí pea mo e ngaahi ʻīmisi ʻAsitelotí pea nau tauhi kia Sihova pē.+

5 Naʻe pehē leva ʻe Sāmiuela: “Fakatahatahaʻi kotoa ʻa ʻIsileli ki Misipā,+ pea te u fai ha lotu kia Sihova maʻamoutolu.”+ 6 Ko ia naʻa nau fakatahataha ʻi Misipā, pea naʻa nau ʻutu ha vai ʻo lilingi ia ʻi he ʻao ʻo Sihová pea fai ha ʻaukai ʻi he ʻaho ko iá.+ Naʻa nau pehē ʻi he feituʻu ko iá: “Kuo mau faiangahala kia Sihova.”+ Pea naʻe kamata ke ngāue ʻa Sāmiuela ko ha fakamaau+ ki he kau ʻIsilelí ʻi Misipā.

7 ʻI he fanongo ʻa e kau Filisitiá kuo fakatahataha ʻa e kau ʻIsilelí ʻi Misipaá, naʻe ʻalu hake ʻa e ngaahi ʻeiki ʻo e kau Filisitiá+ ke faitau mo ʻIsileli. ʻI he fanongo ʻa e kau ʻIsilelí ʻo fekauʻaki mo iá, naʻa nau ilifia koeʻuhi ko e kau Filisitiá. 8 Ko ia naʻe pehē ʻe he kau ʻIsilelí kia Sāmiuela: “ʻOua ʻe tuku hoʻo ui kia Sihova ko hotau ʻOtuá ke ne tokoniʻi kitautolu+ mo fakahaofi kitautolu mei he nima ʻo e kau Filisitiá.” 9 Naʻe toʻo leva ʻe Sāmiuela ha lami kei huhu ʻo ne ʻohake ia ko ha feilaulau tutu kakato+ kia Sihova; pea naʻe ui ʻa Sāmiuela kia Sihova ke tokoni mai ki ʻIsileli, pea naʻe fai ʻe Sihova ha tali kiate ia.+ 10 ʻI hono ʻohake ʻe Sāmiuela ʻa e feilaulau tutú, naʻe ʻalu atu ʻa e kau Filisitiá ke nau faitau mo ʻIsileli. Pea naʻe ʻai ʻe Sihova ke mana leʻo-lahi+ ʻi he ʻaho ko iá ki he kau Filisitiá, pea naʻá Ne ʻai kinautolu ke nau puputuʻu,+ pea naʻe ikunaʻi kinautolu ʻi he ʻao ʻo ʻIsilelí.+ 11 Ko ia naʻe ʻalu atu ʻa e kau tangata ʻIsilelí mei Misipā ʻo nau tuli atu ki he kau Filisitiá, ʻo taaʻi kinautolu ʻo aʻu ki he fakatonga ʻo Pete-kaá. 12 Naʻe toʻo leva ʻe Sāmiuela ha maka+ ʻo ne fokotuʻu ia ʻi he vahaʻa ʻo Misipā mo Sesaná pea fakahingoa ia ko ʻEpenisa,* he naʻá ne pehē: “Kuo tokoniʻi kitautolu+ ʻe Sihova ʻo aʻu mai ki he taimí ni.” 13 Ko ia naʻe fakavaivaiʻi ai ʻa e kau Filisitiá, pea naʻe ʻikai te nau toe haʻu ki he feituʻu ʻo ʻIsilelí;+ pea naʻe hokohoko atu hono fakafepakiʻi ʻe Sihova ʻa e kau Filisitiá ʻi he ngaahi ʻaho kotoa ʻo Sāmiuelá.+ 14 Pehē foki, ko e ngaahi kolo naʻe ʻave ʻe he kau Filisitiá mei ʻIsilelí naʻe fakafoki ia ki ʻIsileli, mei ʻEkiloni ki Kati, pea naʻe toe maʻu mai ʻe ʻIsileli ʻa honau feituʻú mei he nima ʻo e kau Filisitiá.

Naʻe ʻi ai foki ha melino ʻi he vahaʻa ʻo ʻIsileli pea mo e kau ʻĀmolí.+

15 Naʻe fakamaau ai pē ʻa Sāmiuela ʻi ʻIsileli ʻi he kotoa ʻo ʻene moʻuí.+ 16 ʻI he taʻu taki taha naʻá ne fefonongaʻaki ai ʻi Pēteli,+ Kilikali,+ mo Misipā,+ pea naʻá ne fakamāuʻi ʻa ʻIsileli ʻi he ngaahi feituʻu kotoa ko ení. 17 Ka naʻá ne foki pē ki Lama,+ he naʻe ʻi ai hono falé, pea naʻá ne fakamāuʻi foki mei ai ʻa ʻIsileli. Naʻá ne fokotuʻu ai ha ʻōlita kia Sihova.+

8 ʻI he tupu ʻa Sāmiuela ʻo motuʻá, naʻá ne fakanofo hono ongo fohá ke na hoko ko e ongo fakamaau ki ʻIsileli. 2 Ko e hingoa hono ʻuluaki fohá ko Sioeli, pea ko e hingoa ʻa hono foha hono uá ko ʻĀpaia;+ naʻá na hoko ko e ongo fakamaau ʻi Pea-sipa. 3 Ka naʻe ʻikai ke fou hono ongo fohá ʻi hono ngaahi ʻalungá; naʻá na hehema ke tuli ke maʻu ha ngaahi tupu taʻetotonu,+ naʻá na tali ha ngaahi totongi fufū,+ pea naʻá na pikoʻi ʻa e fakamaau totonú.+

4 ʻI he faai atu ʻa e taimí naʻe fakatahataha kotoa ai ʻa e kau mātuʻa ʻo ʻIsilelí pea nau haʻu kia Sāmiuela ki Lama. 5 Naʻa nau pehē kiate ia: “Vakai! Kuó ke motuʻa, ka ko ho ongo fohá ʻoku ʻikai ke na fou ʻi ho ngaahi ʻalungá. Ko ia fakanofo maʻamautolu ha tuʻi ke ne fakamaau kiate kimautolu ʻo hangē ko e kotoa ʻo e ngaahi puleʻanga kehé.”+ 6 Ka naʻe ʻikai ke leleiʻia ʻa Sāmiuela ʻi heʻenau* pehē: “ʻOmai hamau tuʻi ke fakamaau kiate kimautolu.” Pea naʻe lotu leva ʻa Sāmiuela kia Sihova, 7 pea folofola ʻa Sihova kia Sāmiuela: “Fanongo ki he meʻa kotoa pē ʻoku leaʻaki ʻe he kakaí kiate koé; he ʻoku ʻikai ko koe ia kuo nau talitekeʻí, ka ko au ia kuo nau talitekeʻi mei heʻeku hoko ko honau tuʻí.+ 8 ʻOku nau fai ʻa e meʻa tofu pē naʻa nau fai mei he ʻaho naʻá ku ʻomi ai kinautolu mei ʻIsipité ʻo aʻu mai ki he ʻahó ni; ʻoku nau hanganaki liʻaki au+ pea tauhi ki he ngaahi ʻotua kehé,+ pea ko e meʻa ia ʻoku nau fai kiate koé. 9 Ko ia fanongo kiate kinautolu. Kae kehe, te ke mātuʻaki fakatokanga kiate kinautolu; tala kiate kinautolu ʻa e meʻa ʻa ia ko e totonu ia ʻa e tuʻi ʻe pule kiate kinautolú ke ne kounaʻí.”

10 Ko ia naʻe tala ange ʻe Sāmiuela ki he kakai ʻa ia naʻa nau kole kiate ia hanau tuʻí ʻa e folofola kotoa ʻa Sihová. 11 Naʻá ne pehē: “Ko e meʻa eni ʻa ia ko e totonu ia ʻa e tuʻi ʻe pule kiate kimoutolú ke ne kounaʻí:+ Te ne ʻave homou ngaahi fohá+ ʻo fakaheka kinautolu ʻi heʻene ngaahi salioté+ pea ʻai kinautolu ko ʻene kau heka hoosi,+ pea ko e niʻihi te nau lele ʻi muʻa ʻi heʻene ngaahi salioté. 12 Pea te ne fakanofo maʻana ha ngaahi ʻeiki ki he ngaahi toko afe+ pea mo e ngaahi ʻeiki ki he ngaahi toko nimangofulu,+ pea ko e niʻihi te nau fai ʻa ʻene palaú,+ fai ʻa e tuʻusi ʻi heʻene utu-taʻú,+ pea ngaohi ʻene ngaahi meʻataú mo e naunau ki heʻene ngaahi salioté.+ 13 Te ne ʻave homou ngaahi ʻofefiné ke nau hoko ko e kau ngaohi meʻa namu-kakala, kau feimeʻatokoni mo e kau taʻo-mā.+ 14 Te ne ʻave ʻa e lelei taha ʻo hoʻomou ngaahi konga kelekelé, ʻo hoʻomou ngaahi ngoue kālepí, pea mo hoʻomou ngaahi ngoue ʻōlivé,+ pea te ne foaki ia ki heʻene kau sevānití. 15 Te ne ʻave ʻa e vahe hongofulu mei he fua ʻo hoʻomou ngaahi ngoué mo hoʻomou ngaahi ngoue kālepí, pea te ne foaki ia ki heʻene kau ʻōfisa ʻi he lotoʻaá pea ki heʻene kau sevānití. 16 Pea te ne ʻave ʻa hoʻomou kau tamaioʻeikí mo hoʻomou kau kaunangá, mo hoʻomou fanga pulu lelei tahá, pea mo hoʻomou fanga ʻasí, pea te ne ngāueʻaki kinautolu ke fai ʻene ngāué.+ 17 Te ne ʻave ʻa e vahe hongofulu ʻo hoʻomou fanga sipí,+ pea te mou hoko ko ʻene kau sevāniti. 18 ʻE hoko mai ʻa e ʻaho te mou tangi ai koeʻuhi ko e tuʻi naʻa mou fili maʻamoutolú,+ ka ʻe ʻikai fai atu ʻe Sihova ha tali kiate kimoutolu ʻi he ʻaho ko iá.”

19 Ka neongo ia, naʻe fakafisi ʻa e kakaí ke fanongo ki he meʻa naʻe tala ange ʻe Sāmiuela kiate kinautolú, pea nau pehē: “ʻIkai, kuo mau fakapapauʻi ke fokotuʻu ha tuʻi ke pule mai kiate kimautolu. 20 Te mau hangē leva ai ko e kotoa ʻo e ngaahi puleʻanga kehé, pea ko homau tuʻí te ne fakamaau kiate kimautolu mo tataki kimautolu mo faitau ʻi heʻemau ngaahi taú.” 21 ʻI he hili ʻa e fanongo ʻa Sāmiuela ki he kotoa ʻo e ngaahi lea ʻa e kakaí, naʻá ne toe leaʻaki ia ke fanongo ki ai ʻa Sihova. 22 Naʻe folofola ʻa Sihova kia Sāmiuela: “Fanongo kiate kinautolu, pea fakanofo ha tuʻi ke pule kiate kinautolu.”+ Naʻe pehē ange leva ʻe Sāmiuela ki he kau tangata ʻo ʻIsilelí: “Mou taki taha foki ki hono kolo.”

9 Naʻe ʻi ai ha tangata Penisimani ko hono hingoá ko Kisi,+ ko e foha ʻo ʻApieli, ko e foha ʻo Siloa foha ʻo Pekolate foha ʻo ʻAfaia, ko ha hako ʻo Penisimani+ pea ko ha tangata koloaʻia ʻaupito. 2 Naʻe ʻi ai hano foha ko hono hingoá ko Saula,+ ʻa ia ko ha kiʻi talavou pea naʻe matātangata—naʻe ʻikai ha tangata ʻi he lotolotonga ʻo e kau ʻIsilelí naʻe matātangata ange ʻiate ia—pea mei hono umá ki ʻolunga naʻá ne tuʻu ai ʻo maeʻeeʻa, ʻi heʻene lōloa ange ʻi he kakai kotoa pē.

3 ʻI he mole ʻa e fanga ʻasi* ʻa Kisi ko e tamai ʻa Saulá, naʻe pehē ange ʻe Kisi ki hono foha ko Saulá: “Kātaki muʻa ʻo ʻalu mo ha taha ʻo e kau tamaioʻeikí ʻo fakasio ʻa e fanga ʻasí.” 4 Naʻá na ʻalu atu ʻi he feituʻu moʻungaʻia ʻo ʻIfalemí pea fou atu ʻi he vahefonua ʻo Salisá, pea naʻe ʻikai te na ʻilo kinautolu. Naʻá na fāifononga ʻo fou atu ʻi he vahefonua ʻo Salimá, ka naʻe ʻikai ke ʻi ai ʻa e fanga ʻasí. Naʻá na fou atu ʻi he vahefonua kotoa ʻo e haʻa Penisimaní, pea naʻe ʻikai te na ʻilo kinautolu.

5 Naʻá na aʻu ki he vahefonua ʻo Sufí, pea naʻe pehē ange ʻe Saula ki heʻene tamaioʻeiki naʻá na oó: “Haʻu, ta foki ā, koeʻuhi ke ʻoua naʻa kamata ke hohaʻa ʻa ʻeku tamaí ʻo fekauʻaki mo kitaua kae ʻikai ko e fanga ʻasí.”+ 6 Ka naʻe tali ange ʻe he tamaioʻeikí: “Vakai, ʻoku ʻi ai ha tangata ʻa e ʻOtuá ʻi he koló ni, ko ha tangata ʻa ia ʻoku fakaʻapaʻapaʻi. Ko e meʻa kotoa ʻokú ne leaʻakí ʻoku pau moʻoni ke hoko.+ Ta ō ki ai he taimí ni. Mahalo pē ʻe lava ke ne tala mai kiate kitaua ʻa e hala ke ta ō aí.” 7 ʻI he meʻá ni naʻe pehē ange ai ʻe Saula ki heʻene tamaioʻeikí: “Kapau te ta ō, ko e hā ʻe lava ke ta ʻave ki he tangatá? ʻOku ʻikai ha mā ʻi heʻeta kató; ʻoku halaʻatā ha meʻa ke ʻave ko ha meʻaʻofa ki he tangata ʻa e ʻOtua moʻoní. Ko e hā ʻa e meʻa ʻokú ta maʻú?” 8 Ko ia naʻe toe tali ange ai ʻe he tamaioʻeikí kia Saula: “Vakai! ʻOku ʻi hoku nimá ha vahe fā ʻe taha ʻo ha sikeli* siliva. Te u foaki ia ki he tangata ʻa e ʻOtua moʻoní, pea te ne tala mai kiate kitaua ʻa e hala ke ta ʻalu aí.” 9 (ʻI he kuonga muʻá ʻi ʻIsileli, ko e meʻa eni naʻe faʻa leaʻaki ʻe ha tangata ʻi heʻene ʻalu ke kumi ki he ʻOtuá: “Haʻu, pea ke tau ʻalu ki he matalōloá.”+ He ko e palōfita ʻi he ʻaho ní naʻe faʻa ui ia ko ha matalōloa ʻi he kuonga muʻá.) 10 Naʻe pehē ange leva ʻe Saula ki heʻene tamaioʻeikí: “ʻOku lelei ʻa e meʻa ʻokú ke leaʻakí. Ta ō.” Ko ia naʻá na ō ai ki he kolo naʻe ʻi ai ʻa e tangata ʻa e ʻOtua moʻoní.

11 Lolotonga ʻena ʻalu hake ʻi he tahake ki he koló, naʻá na fetaulaki ai mo ha tamaiki fefine ʻoku nau haʻu ke fai ʻenau ʻutu vai. Ko ia naʻá na pehē ange kiate kinautolu: “ʻOku ʻi he feituʻú ni ʻa e matalōloá?”+ 12 Naʻa nau tali mai: “Ko ia. Vakai, ʻokú ne ʻi muʻa ʻiate koe. Fakavave atu he taimí ni, he kuó ne haʻu he ʻahó ni ki he koló, koeʻuhí ʻoku fai ʻe he kakaí he ʻahó ni ha feilaulau+ ʻi he potu māʻolungá.+ 13 ʻI hoʻomo aʻu pē ki he koló, te mo maʻu atu ia ki muʻa ke ne ʻalu hake ke kai ʻi he potu māʻolungá. ʻE ʻikai ke kai ʻa e kakaí kae ʻoua kuó ne aʻu atu, he ko ia ʻa e tokotaha ʻokú ne tāpuakiʻi ʻa e feilaulaú. ʻI he ʻosi pē iá, ʻe lava leva ke kai ʻa e faʻahinga ʻoku fakaafeʻí. Ko ia mo ō hake leva he taimí ni, pea te mo maʻu atu ia.” 14 Ko ia naʻá na ʻalu hake ki he koló. ʻI heʻena hū atu ki he loto koló, ko Sāmiuela ena ʻokú ne haʻu ke fakafetaulaki kiate kinaua ke nau ʻalu hake ki he potu māʻolungá.

15 ʻI he ʻaho ki muʻa ke haʻu ʻa Saulá, naʻe ʻosi tala kia Sāmiuela* ʻe Sihova: 16 “Ko ʻapongipongi ʻi he taimi nai ko ení, te u fekauʻi atu ai kiate koe ha tangata mei he fonua ʻo Penisimaní.+ Kuo pau ke ke pani ia ke hoko ko e taki ki hoku kakai ko ʻIsilelí,+ pea te ne fakahaofi hoku kakaí mei he nima ʻo e kau Filisitiá. He kuó u mamata ki he mamahi ʻa hoku kakaí, pea kuo aʻu hake kiate au+ ʻa ʻenau tangí.” 17 ʻI he sio ʻa Sāmiuela kia Saulá, naʻe folofola ange ʻa Sihova kiate ia: “Ko eni ʻa e tangata naʻá ku tala atu kiate koé, ‘Ko e tokotaha eni ʻa ia te ne puleʻi ʻa hoku kakaí.’”*+

18 Naʻe fakaofiofi atu leva ʻa Saula kia Sāmiuela ʻi he matapaá peá ne pehē: “Kātaki muʻa ʻo tala mai, ko fē ʻa e fale ʻo e matalōloá?” 19 Naʻe tali ange ʻe Sāmiuela kia Saula: “Ko au ʻa e matalōloá. ʻAlu muʻomuʻa hake ʻiate au ki he potu māʻolungá, pea te mo kai mo au he ʻahó ni.+ Te u tuku atu koe ke ke ʻalu ʻi he pongipongí, pea te u tala atu kiate koe ʻa e meʻa kotoa ʻokú ke loto ke ʻiló.* 20 Ko e meʻa ki he fanga ʻasi naʻe mole ʻi he ʻaho ʻe tolu kuo maliu atú,+ ʻoua ʻe hohaʻa fekauʻaki mo kinautolu, he kuo ʻosi maʻu kinautolu ia. Pea ko hai ʻoku ʻaʻana ʻa e meʻa fakamānako kotoa ʻo ʻIsilelí? ʻIkai ʻoku ʻaʻau ia pea mo e fale kotoa ʻo hoʻo tamaí?”+ 21 ʻI he meʻá ni naʻe tali ange ʻe Saula: “ʻIkai ko ha hako au ʻo Penisimani ko e siʻi taha ʻi he ngaahi matakali ʻo ʻIsilelí,+ pea ko hoku fāmilí ʻa e taʻeʻiloa taha ʻi he ngaahi fāmili kotoa ʻo e matakali ʻo Penisimaní? Ko ia ko e hā ʻokú ke lea pehē mai ai kiate aú?”

22 Naʻe ʻave leva ʻe Sāmiuela ʻa Saula mo ʻene tamaioʻeikí peá ne ʻomi kinaua ki he loki kaí pea tuku kiate kinaua ha tangutuʻanga ʻi muʻa ʻi he faʻahinga ko ia naʻe fakaafeʻí; ko e kau tangata ʻe toko 30 nai. 23 Naʻe pehē ange ʻe Sāmiuela ki he tokotaha feimeʻatokoní: “ʻOmi ʻa e ʻinasi naʻá ku ʻoatu kiate koe pea naʻá ku tala atu, ‘Tuku mavahe ia.’” 24 Ko ia naʻe hiki hake ʻe he tokotaha feimeʻatokoní ʻa e alangá mo e meʻa naʻe ʻi aí, pea tuku atu ia ʻi muʻa ʻia Saula. Pea naʻe pehē ʻe Sāmiuela: “Ko e meʻa ko ia kuo tuku mavahé kuo tuku atu ia ʻi muʻa ʻiate koe. Kai, koeʻuhí kuo nau tuku mavahe ia maʻau ki he kātoanga ko ení. He naʻá ku tala ange kiate kinautolu, ‘Naʻá ku fakaafeʻi ha kau ʻaʻahi.’” Ko ia naʻe kai ai ʻa Saula mo Sāmiuela ʻi he ʻaho ko iá. 25 Naʻa nau ʻalu hifo leva mei he potu māʻolungá+ ki he koló, pea naʻe hokohoko atu ʻene talanoa mo Saulá ʻi he funga falé. 26 Naʻá na tuʻu pongipongia hake, pea ʻi he maʻa ʻa e ʻahó naʻe ui atu ʻa Sāmiuela kia Saula ki he funga falé, ʻo ne pehē: “Teuteu, koeʻuhí te u tuku atu koe ke ke ʻalu.” Ko ia naʻe teuteu ʻa Saula pea naʻá ne hū atu mo Sāmiuela ki tuʻa. 27 Lolotonga ʻenau ʻalu hifo ki he tuʻa koló, naʻe pehē ange ʻe Sāmiuela kia Saula: “Tala ange ki he tamaioʻeikí+ ke ne muʻomuʻa atu ʻiate kitaua,” ko ia naʻá ne ʻalu muʻomuʻa atu. “Ka ko koe, kiʻi tuʻu hifo he taimí ni, koeʻuhí ke u tuku koe ke ke fanongo ki he folofola ʻa e ʻOtuá.”

10 Naʻe toʻo leva ʻe Sāmiuela ʻa e hina loló ʻo ne lilingi ia ʻi he ʻulu ʻo Saulá.+ Naʻá ne ʻuma kiate ia peá ne pehē: “ʻIkai kuo pani koe ʻe Sihova ke ke hoko ko ha taki+ ki hono kakaí?+ 2 ʻI hoʻo mavahe meiate au he ʻaho ní, te ke ʻilo ha ongo tangata ʻo ofi ki he fonualoto ʻo Lesielí+ ʻi he feituʻu ʻo Penisimaní ʻi Selisā, pea te na pehē atu kiate koe, ‘Ko e fanga ʻasi naʻá ke ʻalu ke fakasió kuo maʻu, ka ʻi he taimi ní kuo ngalo ʻi hoʻo tamaí ʻa e fanga ʻasí+ pea ʻokú ne hohaʻa fekauʻaki mo kimoua. ʻOkú ne pehē: “Ko e hā te u fai ʻo fekauʻaki mo hoku fohá?”’ 3 ʻAlu atu mei ai kae ʻoua kuó ke aʻu ki he fuʻu ʻakau ʻi Tēpoá, ʻa ia te ke fetaulaki ai mo e kau tangata ʻe toko tolu ʻoku nau ʻalu hake ki he ʻOtua moʻoní ʻi Pēteli,+ ko e tokotaha ʻokú ne toʻo ʻa e fanga kiʻi kosi ʻe tolu, ko e taha ʻokú ne toʻo ʻa e foʻi mā ʻe tolu, pea ko e taha ʻokú ne toʻo ha fuʻu siā uaine. 4 Te nau ʻeke atu pe ʻokú ke fēfē pea te nau ʻoatu kiate koe ʻa e foʻi mā ʻe ua, pea kuo pau ke ke tali meiate kinautolu ʻa e ongo foʻi maá. 5 Hili iá, te ke ʻalu ki he foʻi māʻolunga ʻo e ʻOtua moʻoní, ʻa ia ʻoku ʻi ai ha nofoʻanga fakakautau ʻo e kau Filisitiá. ʻI hoʻo aʻu ki he koló, te ke fetaulaki ai mo ha kulupu ʻo e kau palōfita ʻoku nau ʻalu hifo mei he potu māʻolungá, pea ʻe tā ʻo muʻomuʻa ʻiate kinautolu ha meʻalea filo mo e nafa mo e fuluta mo e haʻape lolotonga ʻenau kikité. 6 Ko e laumālie ʻo Sihová te ne fakaivia koe,+ pea te ke kikite fakataha mo kinautolu pea ʻe liliu koe ʻo hoko ko ha tokotaha kehe.+ 7 ʻI he hoko ʻa e ngaahi fakaʻilonga ko ení, fai ha meʻa pē ʻe malava ke fai ʻe ho nimá, koeʻuhí ko e ʻOtua moʻoní ʻoku ʻiate koe. 8 Peá ke ʻalu hifo leva ʻo muʻomuʻa ʻiate au ki Kilikali,+ pea te u ʻalu hifo ki ai kiate koe ke ʻohake ha ngaahi feilaulau tutu mo e ngaahi feilaulau feʻinasiʻaki. Te ke tatali ʻi he ʻaho ʻe fitu kae ʻoua kuó u aʻu atu kiate koe. Pea te u ʻai leva ke ke ʻiloʻi ʻa e meʻa te ke faí.”

9 ʻI he tafoki hake pē ʻa Saula ke mavahe meia Sāmiuelá, naʻe kamata ke liliu ʻe he ʻOtuá ʻa hono lotó ke hangē ko e loto ʻo ha tokotaha kehe, pea naʻe hoko ʻa e ngaahi fakaʻilonga kotoa ko ení ʻi he ʻaho ko iá. 10 Ko ia naʻá na ʻalu atu mei ai ki he foʻi māʻolungá, pea naʻe fetaulaki mo ia ha kulupu ʻo e kau palōfitá. ʻI he taimi pē ko iá naʻe fakaivia ia+ ʻe he laumālie ʻo e ʻOtuá, pea naʻe kamata ke ne kikite+ ʻi honau lotolotongá. 11 ʻI he mamata kiate ia ʻa e faʻahinga kotoa naʻa nau ʻiloʻi ia ki muʻá ʻokú ne kikite fakataha mo e kau palōfitá, naʻa nau fepehēʻaki: “Ko e hā ʻa e meʻa kuo hoko ki he foha ʻo Kisí? ʻOku toe kau koā mo Saula ʻi he kau palōfitá?” 12 Naʻe pehē leva ʻe ha tangata mei ai: “Ka ko hai koā ʻenau tamaí?” Ko ia naʻe hoko ai ko ha lea ʻoku taka:* “ʻOku toe kau koā mo Saula ʻi he kau palōfitá?”+

13 ʻI he ʻosi ʻene kikité, naʻá ne aʻu atu ai ki he potu māʻolungá. 14 Ko e tokoua ʻo e tamai ʻa Saulá naʻá ne pehē ki mui ai kiate ia mo ʻene tamaioʻeikí: “Naʻá mo ō ki fē?” Ko ia naʻá ne pehē ange: “Ke fakasio ʻa e fanga ʻasí,+ ka naʻá ma vakai naʻe ʻikai te nau ʻiloa, ko ia naʻá ma ō ai kimaua kia Sāmiuela.” 15 Naʻe ʻeke ange ʻe he tokoua ʻo e tamai ʻa Saulá: “Mo kātaki muʻa ʻo tala mai kiate au, ko e hā ʻa e meʻa naʻe leaʻaki ʻe Sāmiuela kiate kimouá?” 16 Naʻe tali ange ʻe Saula ki he tokoua ʻo ʻene tamaí: “Naʻá ne tala mai kiate kimaua kuo ʻosi maʻu ʻa e fanga ʻasí.” Ka naʻe ʻikai ke tala ʻe Saula kiate ia ʻa e meʻa naʻe leaʻaki ʻe Sāmiuela ʻo fekauʻaki mo e tuʻunga-tuʻí.

17 Naʻe ui mai leva ʻe Sāmiuela ʻa e kakaí ke nau fakataha mai kia Sihova ki Misipā+ 18 peá ne pehē ki he kau ʻIsilelí: “Ko e meʻa eni ʻoku folofolaʻaki ʻe Sihova ko e ʻOtua ʻo ʻIsilelí: ‘Ko au ia naʻá ku ʻomi ʻa ʻIsileli mei ʻIsipité pea naʻá ku fakahaofi kimoutolu mei he nima ʻo ʻIsipité+ pea mei he nima ʻo e ngaahi puleʻanga kotoa naʻa nau lōmekina kimoutolú. 19 Ka ʻi he ʻaho ní kuo mou talitekeʻi ai ʻa homou ʻOtua+ ʻa ia naʻe hoko ko homou Fakamoʻui mei he kotoa ʻo hoʻomou ngaahi koví mo e mamahí, pea naʻa mou pehē: “ʻIkai, te ke fakanofo ha tuʻi ke pule mai kiate kimautolu.” Ko ia mou tuʻu leva ʻi he ʻao ʻo Sihová ʻo fakatatau ki homou ngaahi matakalí pea fakatatau ki homou ngaahi toko afé.’”*

20 Ko ia naʻe ʻai ʻe Sāmiuela ke ʻunuʻunu ofi mai+ ʻa e ngaahi matakali kotoa ʻo ʻIsilelí, pea ko e matakali ʻo Penisimaní naʻe filí.+ 21 Naʻá ne ʻai leva ke ʻunuʻunu ofi mai ʻa e matakali ʻo Penisimaní ʻo fakatatau ki honau ngaahi fāmilí, pea ko e fāmili ʻo e haʻa Matelí naʻe filí. Naʻe faifai pē pea fili+ ʻa Saula ko e foha ʻo Kisí. Ka ʻi heʻenau ʻalu ke kumi iá, naʻe ʻikai ke maʻu ia ʻi ha feituʻu. 22 Ko ia naʻa nau fai ai ha fehuʻi kia Sihova:+ “Kuo haʻu koā ki heni ʻa e tangatá?” Naʻe tali mai ʻe Sihova: “Ko ia ena ʻokú ne toi ʻi he ngaahi ngaʻotoʻotá.” 23 Ko ia naʻa nau lele ʻo ʻomi ia mei ai. ʻI heʻene tuʻu ʻi he haʻohaʻonga ʻo e kakaí, naʻá ne lōloa ange mei hono umá ki ʻolunga ʻi he kakai kehé kotoa.+ 24 Naʻe pehē ʻe Sāmiuela ki he kakaí kotoa: “ʻOku mou sio ki he tokotaha ʻa ia kuo fili ʻe Sihová,+ ʻa e ʻikai ha taha ʻe hangē ko iá ʻi he lotolotonga ʻo e kakaí kotoa?” Pea ko e kakaí kotoa naʻe kamata ke nau kaila: “Ke lākoifie ʻa e tuʻí!”

25 Naʻe lea ʻa Sāmiuela ki he kakaí ʻo fekauʻaki mo e totonu ʻoku ʻoange ki he ngaahi tuʻí+ peá ne hiki ia ʻi ha tohi pea tuku ia ʻi he ʻao ʻo Sihová. Naʻe tuku atu leva ʻe Sāmiuela ʻa e kakaí ke nau ʻalu, ʻa e tokotaha kotoa ki hono fale. 26 Naʻe ʻalu foki ʻa Saula ki hono ʻapí ʻi Kīpea, pea naʻe fakafeʻao ia ʻe he kau tangata tau ʻa ia naʻe ueʻi ʻe Sihova ʻa honau lotó. 27 Ka naʻe pehē ʻe he kau tangata koto taʻeʻaonga ʻe niʻihi: “ʻE anga-fēfē hano fakahaofi kitautolu ʻe he tokotahá ni?”+ Ko ia naʻa nau taʻetokaʻi ia, pea naʻe ʻikai te nau ʻomi ha meʻaʻofa ʻe taha kiate ia.+ Ka naʻe ʻikai te ne leaʻaki ha meʻa ʻo fekauʻaki mo ia.*

11 Pea ko Naasi ko e tangata ʻĀmoní+ naʻá ne ʻalu hake ke tauʻi ʻa Siepesi+ ʻi Kiliatí. Naʻe pehē ange ʻe he kau tangata kotoa ʻo Siepesí kia Naasi: “Fai ha fuakava* mo kimautolu, pea te mau tauhi kiate koe.” 2 Naʻe pehē ange ʻe Naasi ko e tangata ʻĀmoní kiate kinautolu: “Te u fai ia mo kimoutolu ka ʻi he tuʻunga pē ko ení: ʻE kapeʻi homou ngaahi foʻi mata toʻomataʻú kotoa. Te u fai eni ke fakamaaʻi ʻaki ʻa ʻIsileli kotoa.” 3 Naʻe tali ange ʻe he kau mātuʻa ʻo Siepesí kiate ia: “Tuku mai ha ʻaho ʻe fitu kiate kimautolu koeʻuhi ke lava ai ʻo mau fekau atu ha kau talafekau ki he feituʻu kotoa ʻo ʻIsilelí. Pea kapau leva ʻe ʻikai ha taha ke ne fakahaofi kimautolu, te mau tukulolo atu kiate koe.” 4 Naʻe faifai pē pea aʻu atu ʻa e kau talafekaú ki Kīpea,+ ko e kolo ʻo Saulá* pea nau leaʻaki ʻa e ngaahi leá ni ʻo fanongo ki ai ʻa e kakaí, pea ko e kakaí kotoa naʻa nau tangi leʻo-lahi ʻaupito.

5 Ka naʻe haʻu ʻa Saula mei he kaikaiʻangá ʻo muimui mai ʻi he fanga pulu, pea naʻe pehē ʻe Saula: “Ko e hā ʻa e meʻa ʻoku hoko ki he kakaí? Ko e hā ʻoku nau tangi aí?” Ko ia naʻa nau fakamatala ange kiate ia ʻa e ngaahi lea ʻa e kau tangata ʻo Siepesí. 6 Naʻe fakaivia ʻe he laumālie ʻo e ʻOtuá ʻa Saula+ ʻi heʻene fanongo ki he ngaahi lea ko ení, pea naʻá ne ʻita teketekelili. 7 Ko ia naʻá ne ʻave ha ongo pulu pea tuʻutuʻu kongokonga kinaua, peá ne tuku atu eni ki he feituʻu kotoa ʻo ʻIsilelí ʻi he nima ʻo e kau talafekaú, ʻa ia naʻa nau pehē: “ʻIlonga ʻa ia ʻe ʻikai ke muimui ʻia Saula mo Sāmiuelá ke ne ʻamanekina ʻe fai ʻa e meʻá ni ki heʻene fanga pulú!” Pea naʻe tō ki he kakaí ʻa e manavahē naʻe fakatupunga ʻe Sihova, ko ia naʻa nau haʻu ai kuo nau loto-taha.* 8 Naʻá ne lau leva kinautolu ʻi Piseki, pea ko e kau ʻIsilelí naʻe toko 300,000 pea ko e kau tangata Siutá naʻe toko 30,000. 9 Naʻa nau pehē ange leva ki he kau talafekau naʻe haʻú: “Ko e meʻa eni te mou leaʻaki ki he kau tangata ʻo Siepesi ʻi Kiliatí, ‘ʻI he tuʻu tonu ʻa e laʻaá ʻapongipongí, ʻe fakahaofi ai kimoutolu.’” Ko ia naʻe ʻalu ai ʻa e kau talafekaú ʻo tala ki he kau tangata ʻo Siepesí, pea naʻa nau fiefia lahi. 10 Ko ia naʻe pehē ai ʻe he kau tangata ʻo Siepesí: “Te mau tukulolo atu kiate kimoutolu ʻapongipongi, pea ke mou fai kiate kimautolu ha meʻa pē ʻe hā lelei kiate kimoutolú.”+

11 ʻI he ʻaho hono hokó, naʻe vahevahe ai ʻe Saula ʻa e kakaí ki he kongakau ʻe tolu, pea naʻa nau ʻalu atu ki he loto ʻapitangá lolotonga ʻa e uasi pongipongí* pea nau taaʻi ʻa e kau ʻĀmoní+ ʻo aʻu ki he tuʻu tonu ʻa e laʻaá. Ko e faʻahinga ko ia naʻe haó naʻa nau movetevete, ʻo nau taki taha hola. 12 Naʻe pehē ange leva ʻe he kakaí kia Sāmiuela: “Ko hai ia naʻá ne pehē, ‘Ko Saula koā ʻe tuʻi kiate kimautolú?’+ ʻOmi ʻa e kau tangatá ki heni, pea te mau tāmateʻi kinautolu.” 13 Kae kehe, naʻe pehē ange ʻe Saula: “ʻE ʻikai ke tāmateʻi ha tangata ʻi he ʻahó ni,+ he ko Sihova ia kuó ne fakahaofi ʻa ʻIsileli ʻi he ʻaho ní.”

14 Ki mui ai naʻe pehē ʻe Sāmiuela ki he kakaí: “Mou haʻu pea ke tau ō ki Kilikali+ ke toe fakapapauʻi ʻa e tuʻunga-tuʻí.”+ 15 Ko ia naʻe ʻalu ai ʻa e kakaí kotoa ki Kilikali, pea ʻi Kilikali naʻa nau ʻai ai ʻa Saula ko e tuʻi ʻi he ʻao ʻo Sihová. Pea naʻa nau ʻohake ʻi ai ʻa e ngaahi feilaulau feʻinasiʻaki ʻi he ʻao ʻo Sihová,+ pea ko Saula mo e kau tangata kotoa ʻo ʻIsilelí naʻa nau kātoanga fakataha mo e fiefia lahi.+

12 Faifai atu pē naʻe pehē ʻe Sāmiuela ki he kotoa ʻo ʻIsilelí: “Ko eni kuó u fai ʻa e* meʻa kotoa kuo mou kole mai kiate aú, pea kuó u fakanofo ha tuʻi ke pule kiate kimoutolu.+ 2 Pea ko ena ʻa e tuʻi ʻe taki* ʻiate kimoutolú!+ Ka ko au, kuó u motuʻa mo ʻulu-hinā, pea ko hoku ongo fohá ena ʻoku ʻiate kimoutolu,+ pea kuó u taki kimoutolu talu mei heʻeku kei talavoú ʻo aʻu mai ki he ʻahó ni.+ 3 Ko au eni. Fai ha fakamoʻoni kiate au ʻi he ʻao ʻo Sihová pea mo e ʻao ʻo ʻene tokotaha paní:+ Ko e pulu pe ʻasi ʻa hai kuó u ʻave?+ Pe ko hai ia kuó u kākaaʻi pe lōmekina? Ko e nima ʻo hai kuó u tali mei ai ha totongi fufū* ke ʻai ai au ke u fakasiosio kehe?+ Kapau kuó u fai pehē, te u fakafoki atu ia kiate kimoutolu.”+ 4 ʻI he meʻá ni naʻa nau pehē: “Kuo ʻikai te ke kākaaʻi kimautolu pe lōmekina kimautolu pe tali ha meʻa ʻe taha mei he nima ʻo ha taha pē.” 5 Ko ia naʻá ne pehē ange kiate kinautolu: “Ko Sihová ko ha fakamoʻoni ia kiate kimoutolu, pea ko ʻene tokotaha paní ko ha fakamoʻoni ia ʻi he ʻahó ni kuo ʻikai te mou maʻu ha meʻa ke tukuakiʻi ai au.”* ʻI he meʻá ni naʻa nau pehē: “Ko ha fakamoʻoni ia.”

6 Ko ia naʻe pehē ange ʻe Sāmiuela ki he kakaí: “Ko Sihova, ʻa ia naʻá ne ngāueʻaki ʻa Mōsese mo ʻĒloné pea naʻá ne ʻomi hoʻomou fanga kuí mei he fonua ko ʻIsipité,+ ko ha fakamoʻoni ia. 7 Pea ko eni mou tuʻu maʻu, pea te u fakamāuʻi kimoutolu ʻi he ʻao ʻo Sihová ʻi he fekauʻaki mo e ngaahi ngāue māʻoniʻoni kotoa kuo fai ʻe Sihova maʻamoutolu mo hoʻomou fanga kuí.

8 “ʻI he haʻu pē ʻa Sēkope ki ʻIsipité+ pea kamata ke ui tokoni+ hoʻomou fanga kuí kia Sihová, naʻe fekauʻi atu ʻe Sihova ʻa Mōsese+ mo ʻĒlone ke na taki mai hoʻomou fanga kuí mei ʻIsipite peá na ʻai kinautolu ke nau nofo ʻi he feituʻú ni.+ 9 Ka naʻe ngalo ʻiate kinautolu ʻa Sihova ko honau ʻOtuá, pea naʻá ne fakatau atu kinautolu+ ki he nima ʻo Sīsela+ ko e ʻeikitau ʻo Hāsoá, pea ki he nima ʻo e kau Filisitiá+ pea ki he nima ʻo e tuʻi ʻo Mōapé,+ pea ko e kotoa ʻo e faʻahingá ni naʻa nau tauʻi kinautolu. 10 Pea naʻa nau ui tokoni+ kia Sihova ʻo pehē, ‘Kuo mau faiangahala,+ he kuo mau liʻaki ʻa Sihova kae tauhi ʻa e ngaahi Pēalí+ mo e ngaahi ʻīmisi ʻAsitelotí;+ ko eni ke ke fakahaofi kimautolu mei he nima ʻo homau ngaahi filí koeʻuhí ke lava ai ʻo mau tauhi kiate koe.’ 11 Naʻe fekauʻi mai leva ʻe Sihova ʻa Selupēali+ mo Pitani mo Sēfita+ pea mo Sāmiuela+ pea naʻa nau fakahaofi kimoutolu mei he nima ʻo e ngaahi fili kotoa naʻe takatakai ʻiate kimoutolú, koeʻuhí ke mou lava ai ʻo nofo malu.+ 12 ʻI hoʻomou sio naʻe haʻu ʻa Naasi,+ ko e tuʻi ʻo e kau ʻĀmoní, ke tauʻi kimoutolú, naʻa mou toutou pehē mai kiate au, ‘ʻIkai, kuo mau fakapapauʻi ke fokotuʻu ha tuʻi ke pule mai kiate kimautolu,’+ lolotonga ia ko Sihova ko homou ʻOtuá ʻa homou Tuʻí.+ 13 Pea ko ena ʻa e tuʻi kuo mou filí, ʻa e tokotaha naʻa mou kolé. Vakai, kuo fakanofo ʻe Sihova ha tuʻi kiate kimoutolu.+ 14 Kapau te mou manavahē kia Sihova+ pea tauhi kiate ia+ mo fakaongo ki hono leʻó+ pea ʻikai te mou angatuʻu ki he tuʻutuʻuni ʻa Sihová, pea mou muimui mo e tuʻi ʻoku pule kiate kimoutolú kia Sihova ko homou ʻOtuá, ʻoku lelei ia. 15 Ka ʻo kapau ʻe ʻikai te mou fakaongo ki he leʻo ʻo Sihová pea mou angatuʻu ki he tuʻutuʻuni ʻa Sihová, ʻe tauteaʻi ʻe Sihova kimoutolu pea mo hoʻomou ngaahi tamaí.+ 16 Ko eni mou tuʻu maʻu pea vakai ki he fuʻu meʻa ko eni ʻe fai ʻe Sihova ʻi homou ʻaó. 17 ʻIkai ko e ʻaho eni ʻo e utu-taʻu uité? Te u ui kia Sihova ke ne ʻai ke mana mo ʻuha; pea te mou ʻilo mo mahinoʻi leva ai ʻa e kovi kuo mou fai ʻi he vakai mai ʻa Sihová ʻi hoʻomou kole ha tuʻi maʻamoutolú.”+

18 Naʻe ui ai ʻa Sāmiuela kia Sihova, pea naʻe ʻai ʻe Sihova ke mana mo ʻuha ʻi he ʻaho ko iá, ko ia naʻe manavahē lahi ai ʻa e kakaí kotoa kia Sihova pea mo Sāmiuela. 19 Pea naʻe pehē ʻe he kakaí kotoa kia Sāmiuela: “Lotu kia Sihova ko ho ʻOtuá maʻa hoʻo kau sevānití,+ he ʻoku ʻikai te mau fie mate, he kuo mau tānaki atu ki heʻemau ngaahi angahalá kotoa ha toe kovi ʻe taha ʻi hono kole ha tuʻí.”

20 Ko ia naʻe pehē ʻe Sāmiuela ki he kakaí: “ʻOua ʻe ilifia. Ko e moʻoni kuo mou fai ʻa e kovi kotoa ko ení. Ko e meʻá pē ke ʻoua naʻa mou tafoki mei he muimui kia Sihová,+ pea tauhi kia Sihova ʻaki homou lotó kotoa.+ 21 ʻOua naʻa mou tafoki ʻo muimui ʻi he ngaahi meʻa ko e koto ngeʻesi,*+ ʻa ia ʻoku ʻikai hano ʻaonga+ pea ʻikai lava ke nau fai ha fakahaofí, he ko e koto ngeʻesi* kinautolu. 22 Koeʻuhi ko hono huafa lahí,+ ʻe ʻikai liʻaki ai ʻe Sihova ʻa hono kakaí,+ he kuo tali ʻe Sihova tonu ke ne ʻai kimoutolu ko hono kakai.+ 23 Ko e meʻa kiate aú, ʻoku mole ke mamaʻo haʻaku fakakaukau ke faiangahala kia Sihova ʻaki hono tuku ʻa ʻeku lotu maʻamoutolú, pea ʻe hokohoko atu ʻa ʻeku fakahinohinoʻi kimoutolu ʻi he hala ʻoku lelei mo totonú. 24 Ko e meʻá pē ke mou manavahē kia Sihova,+ pea tauhi faitōnunga* kiate ia ʻaki homou lotó kotoa, ʻi hoʻomou sio ki he ngaahi meʻa lalahi kuó ne fai maʻamoutolú.+ 25 Ka ʻo kapau ʻoku mou fai taʻemīngao ʻa e meʻa ʻoku koví, ʻe tafiʻi atu kimoutolu,+ ʻa kimoutolu mo homou tuʻí.”+

13 Ko Saulá naʻá ne taʻu . . .* ʻi he taimi naʻá ne hoko ai ko e tuʻí,+ pea naʻá ne pule ʻi he taʻu ʻe ua ki ʻIsileli. 2 Naʻe fili ʻe Saula ʻa e kau tangata ʻe toko 3,000 mei ʻIsileli; ko e toko 2,000 ʻo e faʻahingá ni naʻa nau ʻia Saula ʻi Mikimasi pea ʻi he feituʻu moʻungaʻia ʻo Pētelí pea ko e toko 1,000 naʻa nau ʻia Sionatane+ ʻi Kīpea+ ʻo Penisimaní. Naʻá ne fekauʻi ʻa e toenga ʻo e kakaí ke nau ʻalu, ʻa e tokotaha taki taha ki hono tēniti. 3 Pea naʻe taaʻi ʻe Sionatane ʻa e kongakau ʻa e kau Filisitiá+ ʻa ia naʻe ʻi Kepaá,+ pea naʻe fanongo ʻa e kau Filisitiá ʻo fekauʻaki mo ia. Pea naʻe ʻai ʻe Saula ke ifi ʻa e meʻaifí+ ʻi he fonuá kotoa, ʻo ne pehē: “Tuku ke fanongo ki ai ʻa e kau Hepeluú!” 4 Naʻe fanongo ʻa ʻIsileli kotoa ʻi he ongoongó: “Kuo taaʻi ʻe Saula ha kongakau ʻo e kau Filisitiá, pea ko eni kuo hoko ʻo fehiʻanekinaʻi ai ʻa ʻIsileli ʻi he lotolotonga ʻo e kau Filisitiá.” Ko ia naʻe fekauʻi ai ʻa e kakaí ke nau muimui kia Saula ʻi Kilikali.+

5 Naʻe fakatahataha foki mo e kau Filisitiá ke tauʻi ʻa ʻIsileli, fakataha mo e ngaahi saliote tau ʻe 30,000 mo e kau tangata heka hoosi ʻe toko 6,000 mo e kau tau naʻe hangē honau tokolahí ko e ʻoneʻone ʻi he matātahí;+ pea naʻa nau ʻalu hake ʻo ʻapitanga ʻi Mikimasi ki he hahake ʻo Pete-ʻavení.+ 6 Pea naʻe vakai ʻa e kau tangata ʻo ʻIsilelí naʻa nau ʻi he tuʻunga fakatuʻutāmaki, koeʻuhí naʻa nau mātuʻaki ongoʻi faingataʻaʻia; ko ia naʻe toi ai ʻa e kakaí ʻi he ngaahi ʻana,+ ko e ngaahi avaʻi maka, ko e ngaahi makatuʻu, ko e ngaahi luo ʻi lolofonua, pea mo e ngaahi lepa. 7 Ko e niʻihi ʻo e kau Hepeluú naʻe aʻu ʻo nau kolosi ʻi Sioatani ki he fonua ko Kata mo Kiliatí.+ Ka naʻe kei ʻi Kilikali pē ʻa Saula, pea ko e kakai kotoa naʻa nau muimui ʻiate iá naʻa nau tetetete. 8 Naʻá ne hokohoko tatali ʻi he ʻaho ʻe fitu kae ʻoua kuo aʻu ki he taimi kuo vaheʻi* ʻa ia ne fokotuʻu ʻe Sāmiuelá, ka naʻe ʻikai ke haʻu ʻa Sāmiuela ia ki Kilikali, pea naʻe movete atu ʻa e kakaí meiate ia. 9 Naʻe faifai pē pea pehē ʻe Saula: “ʻOmai kiate au ʻa e feilaulau tutú pea mo e ngaahi feilaulau feʻinasiʻakí.” Pea naʻá ne ʻohake ʻa e feilaulau tutú.+

10 Ka ʻi he ʻosi pē ʻene ʻohake ʻa e feilaulau tutú, naʻe aʻu mai ʻa Sāmiuela. Ko ia naʻe hū atu ʻa Saula ke fakafetaulaki kiate ia mo talitali lelei ia. 11 Naʻe pehē leva ʻe Sāmiuela: “Ko e hā ʻa e meʻa kuó ke faí?” Naʻe tali ange ʻe Saula: “Naʻá ku vakai kuo liʻaki au+ ʻe he kakaí, pea naʻe ʻikai te ke haʻu ʻi he taimi kuo vaheʻí, pea ko e kau Filisitiá kuo nau fakatahataha ʻi Mikimasi.+ 12 Ko ia naʻá ku pehē loto pē, ‘Ko eni ʻe haʻu ʻa e kau Filisitiá ʻo tauʻi au ʻi Kilikali, pea kuo teʻeki ai ke u kumi ki he hōifua ʻa* Sihová.’ Ko ia naʻá ku ongoʻi ai kuo pau ke u ʻohake ʻa e feilaulau tutú.”

13 ʻI he meʻá ni naʻe pehē ai ʻe Sāmiuela kia Saula: “Kuó ke fai vale. Kuo ʻikai te ke talangofua ki he fekau naʻe ʻoatu kiate koe+ ʻe Sihova ko ho ʻOtuá. Kapau naʻá ke talangofua, naʻe mei ʻai ʻe Sihova ke tuʻu maʻu ho puleʻangá ʻi ʻIsileli ʻo taʻengata. 14 Ka ko eni ko ho puleʻangá ʻe ʻikai ke tuʻuloa.+ ʻE kumi ʻe Sihova ha tangata ʻoku fehoanakimālie mo hono finangaló,*+ pea ʻe fakanofo ia ʻe Sihova ke hoko ko ha taki ki hono kakaí,+ koeʻuhí naʻe ʻikai te ke talangofua ki he meʻa naʻe fekauʻi atu ʻe Sihova kiate koé.”+

15 Naʻe tuʻu leva ʻa Sāmiuela ʻo ne ʻalu hake mei Kilikali ki Kīpea ʻo Penisimaní, pea naʻe lau ʻe Saula ʻa e kakaí; ko e faʻahinga naʻe kei ʻiate iá ko e kau tangata nai ʻe toko 600.+ 16 Ko Saula, ko hono foha ko Sionatané, pea mo e kakai naʻe kei ʻiate kinauá naʻa nau nofo ʻi Kepā+ ʻo Penisimaní, pea ko e kau Filisitiá naʻa nau ʻapitanga ʻi Mikimasi.+ 17 Pea naʻe ʻalu atu mei he ʻapitanga ʻo e kau Filisitiá ʻi he kongakau ʻe tolu ʻa e ngaahi faʻahi te nau fai ʻa e ʻohofí. Ko e kongakau ʻe taha naʻa nau afe ki he hala ki ʻŌfilá, ki he fonua ko Sualí; 18 ko e kongakau ʻe taha naʻe afe ia ki he hala ʻo Pete-holoní;+ pea ko e kongakau hono tolú naʻe afe ia ki he hala naʻe ʻalu atu ki he kauʻāfonua naʻe hanga ki he teleʻa ko Sepoimí, ki he toafá.

19 Pea naʻe ʻikai ke maʻu ha tokotaha tuki ukamea ʻi he fonua kotoa ʻo ʻIsilelí, koeʻuhí naʻe pehē ʻe he kau Filisitiá: “Ke ʻoua naʻa ngaohi ʻe he kau Hepeluú ha heletā pe ko ha tao.” 20 Pea ko e kau ʻIsilelí kotoa naʻe pau ke nau ʻalu hifo ki he kau Filisitiá ke fakamata ʻenau ngaahi mataʻi palaú, ngaahi pikí, ngaahi tokí, pe ko e ngaahi hele tuʻusí. 21 Ko e totongi ki hono fai ʻo e fakamatá ko ha pimi* ki he ngaahi mataʻi palaú, ki he ngaahi pikí, ki he ngaahi meʻangāue mata-tolú, ki he ngaahi tokí, pea ki hono fakamaʻu ʻo e tao fakateka pulú. 22 Pea ʻi he ʻaho ʻo e taú, naʻe ʻikai ke ʻi ai ha heletā pe ko ha tao ʻi he nima ʻo ha taha pē ʻo e kakai naʻe ʻia Saula mo Sionatané;+ ko Saula pē mo hono foha ko Sionatané naʻe ʻi ai ʻena ngaahi meʻataú.

23 Pea naʻe ʻalu atu ha kongakau ʻo e kau Filisitiá ki he kolosiʻanga ʻi he teleʻa fāsiʻi ʻo Mikimasí.+

14 ʻI he ʻaho ʻe taha naʻe pehē ange ai ʻe Sionatane+ ko e foha ʻo Saulá ki he tamaioʻeiki naʻá ne toʻo ʻa ʻene meʻataú: “Haʻu pea tuku ke ta kolosi atu ki he nofoʻanga fakakautau ʻo e kau Filisitiá ʻi he tafaʻaki ʻe tahá.” Ka naʻe ʻikai te ne tala ia ki heʻene tamaí. 2 Naʻe nofo ʻa Saula ʻi he tuʻa kolo ʻo Kīpeá+ ʻi he lalo pomikānite ʻi Mikiloní, pea naʻe ʻiate ia ʻa e kau tangata ʻe toko 600 nai.+ 3 (Pea ko ʻĀhisa ko e foha ʻo ʻAhitupi,+ ko e tokoua ʻo Ikapote,+ ko e foha ʻo Fineasi,+ ko e foha ʻo ʻĪlai,+ ko e taulaʻeiki ʻa Sihova ʻi Sailó,+ naʻá ne tui ʻa e ʻēfotí.)+ Pea naʻe ʻikai ke ʻiloʻi ʻe he kakaí kuo ʻalu ʻa Sionatane. 4 Pea ʻi he vahaʻa ʻo e hūʻanga naʻe feinga ʻa Sionatane ke kolosi ai ke aʻu ki he nofoʻanga fakakautau ʻo e kau Filisitiá, naʻe ʻi ai ha fuʻu maka hangē ha nifó ʻi he tafaʻaki ʻe taha mo ha fuʻu maka hangē ha nifó ʻi he tafaʻaki ʻe tahá; ko e hingoa ʻo e taha ko Pōsesi, pea ko e hingoa ʻo e taha ko Sene. 5 Ko e fuʻu maka ʻe taha ko ha fuʻu pou ia ʻi he tokelaú naʻe hanga ki Mikimasi, pea ko e fuʻu maka ʻe tahá naʻe ʻi he tongá ia ʻo hanga ki Kepā.+

6 Ko ia naʻe pehē ange ai ʻe Sionatane ki heʻene tangata toʻo meʻataú: “Haʻu pea tuku ke ta kolosi atu ki he nofoʻanga fakakautau ʻo e kau tangata taʻekamu+ ko ení. Mahalo pē ʻe fai ʻe Sihova ha meʻa maʻataua, he ʻoku halaʻatā ha meʻa ʻe lava ke ne taʻofi ʻa Sihova mei he faifakahaofi ʻaki ha tokolahi pe ko ha tokosiʻi.”+ 7 ʻI he meʻá ni naʻe pehē ange ai ʻe heʻene tangata toʻo meʻataú kiate ia: “Fai ha meʻa pē ʻoku ueʻi koe ʻe ho lotó ke ke faí. Afe ki ha feituʻu pē ʻokú ke fie afe ki aí, pea te u muimui ʻiate koe ki ha feituʻu pē ʻoku ueʻi koe ʻe ho lotó ke ke ʻalu ki aí.” 8 Naʻe pehē ange leva ʻe Sionatane: “Te ta kolosi ki he kau tangata ko eé pea fakahaaʻi atu kitaua kiate kinautolu. 9 Kapau te nau pehē mai kiate kitaua, ‘Tuʻu maʻu kae ʻoua ke mau ʻalu atu kiate kimoua,’ te ta tuʻu ʻi he feituʻu ʻokú ta ʻi aí pea heʻikai te ta ʻalu hake kiate kinautolu. 10 Ka ʻo kapau te nau pehē mai, ‘ʻAlu hake kiate kimautolu,’ te ta ʻalu hake, koeʻuhí ʻe tuku kinautolu ʻe Sihova ki hota nimá. ʻE hoko eni ko e fakaʻilonga kiate kitaua.”+

11 Ko ia naʻá na fakahaaʻi atu leva kinaua fakatouʻosi ki he nofoʻanga fakakautau ʻo e kau Filisitiá. Naʻe pehē ʻe he kau Filisitiá: “Vakai! ʻOku hū mai ʻa e kau Hepeluú mei he ngaahi luo ʻa ia kuo nau toi aí.”+ 12 Ko ia naʻe pehē ʻe he kau tangata ʻo e nofoʻanga fakakautaú kia Sionatane mo ʻene tangata toʻo meʻataú: “ʻAlu hake kiate kimautolu, pea te mau akoʻi atu kiate kimoua ha lēsoni!”+ Naʻe pehē ange ʻe Sionatane ʻi he taimi pē ko iá ki heʻene tangata toʻo meʻataú: “Muimui mai ʻiate au, he ʻe tuku ʻe Sihova kinautolu ki he nima ʻo ʻIsilelí.”+ 13 Pea naʻe kaka hake ʻa Sionatane ʻaki hono nimá mo hono vaʻé, pea naʻe ʻi mui ʻiate ia ʻa ʻene tangata toʻo meʻataú; pea naʻe kamata ke tō ʻa e kau Filisitiá ʻi he ʻao ʻo Sionatané, pea naʻe tāmateʻi kinautolu ʻe heʻene tangata toʻo meʻataú mei hono tuʻá. 14 ʻI he ʻuluaki ʻoho naʻe fai ʻe Sionatane mo ʻene tangata toʻo meʻataú, naʻá na taaʻi ai ʻa e kau tangata nai ʻe toko 20 ʻi loto kotoa ʻi he lōloa ʻo ha vaeuaʻi ʻeka ʻo ha kelekele* kuo palau.

15 Naʻe mafola ʻa e manavahē ʻi he ʻapitangá pea ʻi he lotolotonga ʻo e kakai kotoa ʻo e nofoʻanga fakakautaú, pea naʻa mo e ngaahi faʻahi naʻa nau fai ʻa e ʻohofí+ naʻa nau manavahē. Naʻe kamata ke ngalulu ʻa e kelekelé, pea naʻe hoko ai ha manavahē ko e fakatupunga ʻe he ʻOtuá. 16 Naʻe sio ʻa e kau tangata leʻo ʻa Saula ʻi Kīpea+ ʻo Penisimaní ki he mafola ʻi he feituʻu kotoa ʻa e māveuveú.+

17 Naʻe pehē ʻe Saula ki he kakai naʻe ʻiate iá: “Kātaki angé ʻo lau, pea sio pe ko hai kuo mavahe meiate kitautolú.” ʻI heʻenau laú, naʻa nau ʻiloʻi ai naʻe ʻikai ke ʻi ai ʻa Sionatane mo ʻene tangata toʻo meʻataú. 18 Naʻe pehē ange leva ʻe Saula kia ʻĀhisa:+ “ʻOmi ke ofi ʻa e ʻAʻake ʻa e ʻOtua moʻoní!” (He ko e ʻAʻake ʻa e ʻOtua moʻoní naʻe ʻi he kau ʻIsilelí ʻi he taimi ko iá.*) 19 Pea ʻi he lolotonga ʻa e lea ʻa Saula ki he taulaʻeikí, naʻe tupu ʻo fakautuutu ʻa e māveuveu ʻi he ʻapitanga ʻo e kau Filisitiá. Naʻe pehē ange leva ʻe Saula ki he taulaʻeikí: “Tuku ʻa e meʻa ʻokú ke faí.”* 20 Ko ia naʻe fakatahataha mai ai ʻa Saula mo e kakai kotoa naʻe ʻiate iá pea nau ʻalu atu ki he taú, ʻa ia naʻa nau ʻilo ai kuo fetāʻaki heletā ʻa e kau Filisitiá ʻiate kinautolu pē, pea naʻe lahi ʻaupito ʻa e puputuʻú. 21 Pehē foki, ko e kau Hepelū naʻa nau faʻahi ki muʻa mo e kau Filisitiá pea naʻa nau ʻalu hake mo kinautolu ki he ʻapitangá naʻa nau ʻalu ʻo kau mo ʻIsileli ʻi he malumalu ʻo Saula mo Sionatané. 22 Ko e kau tangata kotoa ʻo ʻIsileli naʻa nau toi+ ʻi he feituʻu moʻungaʻia ʻo ʻIfalemí naʻa nau fanongo kuo hola ʻa e kau Filisitiá, pea naʻa nau kau mo kinautolu foki ʻi he tulimui kiate kinautolu ʻi he taú. 23 Ko ia naʻe fakahaofi ʻe Sihova ʻa ʻIsileli ʻi he ʻaho ko iá,+ pea naʻe hoko atu ʻa e taú ʻo aʻu ki Pete-ʻaveni.+

24 Ka ko e kau tangata ʻo ʻIsilelí naʻa nau faingataʻaʻia ʻi he ʻaho ko iá, he naʻe fakafuakavaʻi ʻe Saula ʻa e kakaí ʻo peheni: “Malaʻia ē ko e tangata te ne kai ha faʻahinga meʻakai* pē ki muʻa ke efiafí pea ki muʻa ke u faisāuni ki hoku ngaahi filí!” Ko ia naʻe ʻikai ha taha ʻo e kakaí naʻá ne kai ha faʻahinga meʻakai pē.+

25 Pea naʻe haʻu ʻa e kakaí* kotoa ki he vaotaá, pea naʻe ʻi ai ʻa e hone ʻi he kelekelé. 26 ʻI he haʻu ʻa e kakaí ki he vaotaá, naʻa nau sio ki he hafu ʻa e honé, ka naʻe ʻikai ke kai ʻe ha taha ʻa e honé, koeʻuhí naʻa nau manavahē ki he fuakavá. 27 Ka naʻe ʻikai ke fanongo ʻa Sionatane ʻi hono fakafuakavaʻi+ ʻe heʻene tamaí ʻa e kakaí, ko ia naʻá ne mafao atu ʻa e muʻa tokotoko naʻe ʻi hono nimá ʻo unu ʻi he taunga honé. ʻI heʻene kai ʻa e honé, naʻe maama ai hono matá. 28 ʻI he meʻá ni naʻe pehē ange ai ʻe ha taha ʻi he kakaí: “Naʻe mātuʻaki fakafuakavaʻi ʻe hoʻo tamaí ʻa e kakaí, ʻo pehē, ‘Malaʻia ē ko e tangata te ne kai ha meʻakai ʻi he ʻahó ni!’+ Ko e ʻuhinga ia ʻoku fuʻu ongosia ai ʻa e kakaí.” 29 Kae kehe, naʻe pehē ʻe Sionatane: “Kuo hanga ʻe heʻeku tamaí ʻo ʻai ke faingataʻaʻia lahi* ʻa e fonuá. Vakai mai ki he maama ʻa hoku matá koeʻuhi ko ʻeku ʻahiʻahiʻi ʻa e kiʻi meʻi hone ko ení. 30 Huanoa ange ai kapau naʻe kai tauʻatāina+ ʻa e kakaí he ʻahó ni mei he koloa vete* ʻa honau ngaahi filí ʻa ē naʻa nau maʻú! He ka ne pehē ne mei toe lahi ange ai hono tāmateʻi ʻo e kau Filisitiá.”

31 ʻI he ʻaho ko iá naʻa nau hanganaki taaʻi ai ʻa e kau Filisitiá mei Mikimasi ki ʻAsaloni,+ pea naʻe hoko ai ʻa e kakaí ʻo ongosia ʻaupito. 32 Ko ia naʻe kamata ke ʻoho mānumanu atu ʻa e kakaí ki he koloa veté, pea naʻa nau toʻo ʻa e fanga sipi mo e pulu mo e ʻuhikiʻi pulu ʻo tāmateʻi ʻi he kelekelé, pea naʻa nau kai ʻa e kakanoʻi-manú fakataha mo e totó.+ 33 Ko ia naʻe fakahā kia Saula: “Vakai! ʻOku faiangahala ʻa e kakaí kia Sihova ʻi heʻenau kai ʻa e kakanoʻi-manú fakataha mo e totó.”+ ʻI he meʻá ni naʻá ne pehē ange: “Kuo mou taʻefaitōnunga. Tekaʻi mai ha fuʻu maka kiate au he taimí ni.” 34 Naʻe pehē ange leva ʻe Saula: “Mou movete atu ʻi he lotolotonga ʻo e kakaí pea pehē kiate kinautolu, ‘Ko kimoutolu taki taha kuo pau ke ne ʻomai ʻa ʻene pulu mo ʻene sipi ʻo tāmateʻi ia ʻi heni pea kai leva ia. ʻOua ʻe faiangahala kia Sihova ʻaki hono kai ʻa e kakanoʻi-manú fakataha mo e totó.’”+ Ko ia naʻa nau haʻu taki taha mo ʻene pulu ʻi he pō ko iá ʻo tāmateʻi ia ai. 35 Pea naʻe fokotuʻu ʻe Saula ha ʻōlita kia Sihova.+ Ko e ʻuluaki ʻōlita eni naʻá ne fokotuʻu kia Sihová.

36 Naʻe pehē ʻe Saula ki mui ai: “Tau ʻalu hifo poʻuli ʻo tulimui ʻi he kau Filisitiá ʻo puke fakamālohi kinautolu kae ʻoua ke maʻa ʻa e ʻahó. Heʻikai te tau tuku ke hao ha toko taha.” ʻI he meʻá ni naʻa nau pehē ange: “Fai ha meʻa pē ʻoku hā lelei ki hoʻo vakaí.” Naʻe pehē leva ʻe he taulaʻeikí: “Tau fakaofiofi heni ki he ʻOtua moʻoní.”+ 37 Pea naʻe fakafehuʻi ʻa Saula ki he ʻOtuá: “Te u ʻalu hifo ʻo tulimui ʻi he kau Filisitiá?+ Te ke tuku kinautolu ki he nima ʻo ʻIsilelí?” Ka naʻe ʻikai ke fai mai ʻe he ʻOtuá ha tali kiate ia ʻi he ʻaho ko iá. 38 Ko ia naʻe pehē ai ʻe Saula: “Mou omi ki heni, ʻa kimoutolu kotoa ngaahi ʻeiki ʻo e kakaí, pea vakaiʻi pe ko e hā ʻa e angahala kuo fai he ʻaho ní. 39 ʻOku ou fuakava ʻia Sihova ko e ʻOtua moʻuí, ʻa ia naʻá ne fakahaofi ʻa ʻIsilelí, tatau ai pē kapau ko Sionatane ia ko hoku fohá, kuo pau ke ne mate.” Ka naʻe ʻikai ke fai mai ʻe ha taha ʻo e kakaí ha tali kiate ia. 40 Naʻá ne pehē ange leva ki ʻIsileli kotoa: “Te mou ʻi he tafaʻaki ʻe taha, pea ko au mo hoku foha ko Sionatané te ma ʻi he tafaʻaki ʻe taha.” ʻI he meʻá ni naʻe pehē ai ʻe he kakaí kia Saula: “Fai ha meʻa pē ʻe hā lelei ki hoʻo vakaí.”

41 Naʻe pehē leva ʻe Saula kia Sihova: “ʻE ʻOtua ʻo ʻIsileli, ʻomai ha tali ʻi he Tūmemí!”+ Ko ia naʻe filiʻi mai ai ʻa Sionatane mo Saula, pea naʻe ʻatā ʻa e kakaí. 42 Pea naʻe pehē ʻe Saula: “Fai ha lulu+ ke fakapapauʻi ʻi he vahaʻa ʻoʻoku mo hoku foha ko Sionatané.” Pea naʻe filiʻi ʻa Sionatane. 43 Naʻe pehē leva ʻe Saula kia Sionatane: “Tala mai angé, ko e hā ʻa e meʻa kuó ke faí?” Ko ia naʻe tala ange ʻe Sionatane kiate ia: “Naʻá ku kiʻi ʻahiʻahiʻi pē ha meʻi hone naʻe ʻi he muʻa tokotoko ʻi hoku nimá.+ Ko au eni! ʻOku ou mateuteu ke u mate!”

44 ʻI he meʻá ni naʻe pehē ʻe Saula: “ʻOfa ke tauteaʻi mamafa au ʻe he ʻOtuá ʻo kapau heʻikai te ke mate, Sionatane.”+ 45 Ka naʻe pehē ʻe he kakaí kia Saula: “ʻOku totonu koā ke mate ʻa Sionatane—ʻa e tokotaha naʻá ne ʻomi ʻa e fuʻu ikuna*+ ko ení ki ʻIsilelí? Mole ke mamaʻo! ʻOku mau fuakava ʻia Sihova ko e ʻOtua moʻuí, ʻe ʻikai tō naʻa mo ha fulufuluʻiʻulu mei hono ʻulú ki he kelekelé, he naʻe kau mo ia ʻa e ʻOtuá ʻi he ngāue naʻá ne fai he ʻaho ní.”+ Ko ia naʻe fakahaofi* ai ʻe he kakaí ʻa Sionatane, pea naʻe ʻikai te ne mate.

46 Ko ia naʻe tuku ʻa e tulimui ʻa Saula ʻi he kau Filisitiá, pea naʻe ʻalu ʻa e kau Filisitiá ki honau feituʻu ʻonautolú.

47 Naʻe ʻai ʻe Saula ke tuʻu maʻu ʻa ʻene pule ko e tuʻi ki ʻIsilelí peá ne tauʻi ʻa hono ngaahi filí kotoa ʻi he tafaʻaki kotoa pē, ʻa e kau Mōapé,+ ko e kau ʻĀmoní,+ ko e kau ʻĪtomí,+ ko e ngaahi tuʻi ʻo Sopá,+ pea mo e kau Filisitiá;+ pea ko fē pē ha feituʻu naʻá ne ʻalu ki ai naʻá ne ikunaʻi ia. 48 Pea naʻá ne faitau loto-toʻa ʻo ne ikunaʻi ʻa e kau ʻAmalekí+ pea fakahaofi ʻa ʻIsileli mei he nima ʻo honau kau puke fakamālohí.

49 Ko e ngaahi foha ʻo Saulá ko Sionatane, ʻĪsivi, pea mo Maliki-sua.+ Pea naʻe ʻi ai hono ongo ʻofefine; ko e hingoa ʻo e lahí ko Mēlape,+ pea ko e hingoa ʻo e siʻí ko Maikale.+ 50 Ko e hingoa ʻo e uaifi ʻo Saulá ko ʻAhinoami ko e ʻofefine ʻo ʻAhimaasi. Ko e hingoa ʻo e ʻeiki ʻo ʻene kau taú ko ʻĀpina+ ko e foha ʻo Nā, ko e tokoua ʻo e tamai ʻa Saulá. 51 Ko Kisi+ ʻa e tamai ʻa Saulá, pea ko Nā+ ko e tamai ʻa ʻĀpiná ko e foha ia ʻo ʻApieli.

52 Naʻe ʻi ai ʻa e faitau kakaha mo e kau Filisitiá ʻi he ngaahi ʻaho kotoa ʻo Saulá.+ ʻI he taimi naʻe sio ai ʻa Saula ki ha tangata mālohi pe loto-lahí, naʻá ne fakakau mai ia ki heʻene kau taú.+

15 Naʻe pehē ange leva ʻe Sāmiuela kia Saula: “Naʻe fekauʻi mai au ʻe Sihova ke pani koe ke ke hoko ko e tuʻi ki hono kakai ko ʻIsilelí;+ ko ia ke ke fanongo ki he folofola ʻa Sihová.+ 2 Ko e folofola eni ʻa Sihova ʻo e ngaahi kau tau: ‘Te u ʻeke ki he kau ʻAmalekí ʻa e meʻa naʻa nau fai ki ʻIsileli ʻi heʻenau fakafepakiʻi kinautolu ʻi heʻenau fononga mai mei ʻIsipité.+ 3 Ko ia ke ke ʻalu ʻo taaʻi ʻa e kau ʻAmalekí,+ pea tuku atu kinautolu ki he fakaʻauha+ fakataha mo e meʻa kotoa ʻoku nau maʻú. Kuo pau ke ʻoua naʻá ke fakahaofi* kinautolu; te ke tāmateʻi kinautolu,+ ʻa e tangata pea pehē ki he fefine, fānau pea pehē ki he valevale, ʻa e pulu pea pehē ki he sipi, ʻa e kāmeli pea pehē ki he ʻasi.’”+ 4 Naʻe ui ʻe Saula ʻa e kakaí peá ne lau kinautolu ʻi Telaimi: Naʻe toko 200,000 ʻa e kau sōtia ʻalu laló pea toko 10,000 ʻa e kau tangata Siutá.+

5 Naʻe ʻalu atu ʻa Saula ʻo aʻu ki he kolo ʻo ʻAmalekí peá ne fakatoka ha malumu ʻi he veʻe teleʻá.* 6 Naʻe pehē leva ʻe Saula ki he kau Kēnaí:+ “Mou ō, mavahe mei he lotolotonga ʻo e kau ʻAmalekí, ke ʻoua naʻá ku tafiʻi koe fakataha mo kinautolu.+ He naʻá ke fakahaaʻi ʻa e ʻofa mateaki ki he kakai ʻIsilelí+ kotoa ʻi he taimi naʻa nau omi ai mei ʻIsipité.” Ko ia naʻe mavahe ʻa e kau Kēnaí mei he lotolotonga ʻo ʻAmalekí. 7 ʻI he hili iá, naʻe taaʻi ʻe Saula ʻa e kau ʻAmalekí+ mei Havila+ ʻo aʻu ki Sula,+ ʻa ia ʻoku hoko atu ki ʻIsipité. 8 Naʻá ne puke moʻui ʻa ʻĒkaki+ ko e tuʻi ʻo ʻAmalekí, ka ko e kotoa ʻo e kakai kehé naʻá ne tuku atu ia ki he fakaʻauha ʻaki ʻa e heletaá.+ 9 Kae kehe, naʻe fakahaofi ʻe Saula mo e kakaí ʻa* ʻĒkaki pea mo e lelei taha ʻi he fanga sipí, ko e fanga pulú, ko e fanga manu sisinó, ko e fanga sipi tangatá, pea mo e meʻa kotoa pē naʻe leleí.+ Naʻe ʻikai te nau loto ke tuku atu ia ki he fakaʻauha. Ka ko e meʻa kotoa pē naʻe ʻikai ʻaonga mo ʻikai fiemaʻú, naʻa nau tuku atu ia ki he fakaʻauha.

10 Ko ia naʻe hoko mai ʻa e folofola ʻa Sihová kia Sāmiuela ʻo pehē: 11 “ʻOku ou fakaʻiseʻisa* ʻi heʻeku fakanofo ʻa Saula ke tuʻí, he kuó ne tafoki mei he muimui kiate aú pea kuo ʻikai te ne fakahoko ʻeku ngaahi leá.”+ Naʻe loto-mamahi ʻaupito ʻa Sāmiuela, pea naʻá ne hanganaki tangi kia Sihova ʻi he poó kotoa.+ 12 ʻI he tuʻu pongipongia hake ʻa Sāmiuela ke fakafetaulaki kia Saulá, naʻe fakahā ai kia Sāmiuela: “Naʻe ʻalu ʻa Saula ki Kāmeli,+ pea naʻá ne fokotuʻu ai moʻona hano fakamanatu.+ Hili iá, naʻá ne tafoki ʻo ne ʻalu hifo ki Kilikali.” 13 ʻI he faifai pea aʻu atu ʻa Sāmiuela kiate iá, naʻe pehē ange ʻe Saula kiate ia: “Fakatauange ke faitāpuekina koe ʻe Sihova. Kuó u fakahoko ʻa e folofola ʻa Sihová.” 14 Ka naʻe pehē ʻe Sāmiuela: “Ka ko e hā ʻa e tangi ia ko eni ʻa e fanga sipi ʻoku ou fanongo ki aí pea mo e tangi ʻa e fanga pulu ʻoku ou fanongo ki aí?”+ 15 ʻI he meʻá ni naʻe pehē ange ai ʻe Saula: “Naʻe ʻomi ia mei he kau ʻAmalekí, koeʻuhí naʻe fakahaofi ʻe he kakaí ʻa e* fanga sipi mo e fanga pulu lelei tahá ke fai ʻaki kinautolu ha feilaulau kia Sihova ko ho ʻOtuá; ka ko e toengá naʻa mau tuku atu ia ki he fakaʻauha.” 16 ʻI he meʻá ni naʻe pehē ʻe Sāmiuela kia Saula: “Taʻofi! Tuku ke u tala atu ʻa e meʻa naʻe folofola mai ʻaki ʻe Sihova kiate au ʻanepoó.”+ Ko ia naʻá ne pehē ange ai kiate ia: “Lea mai!”

17 Naʻe hoko atu ʻa Sāmiuela: “ʻIkai naʻá ke vakai kiate koe tonu ko ha tokotaha taʻeʻiloa+ ʻi he taimi naʻe ʻai ai koe ko e ʻulumotuʻa ʻo e ngaahi matakali ʻo ʻIsilelí pea ʻi he taimi naʻe pani ai koe ʻe Sihova ke ke hoko ko e tuʻi ki ʻIsilelí?+ 18 Ki mui ai, naʻe tuku atu koe ʻe Sihova ʻi ha fekau ʻo pehē, ‘ʻAlu atu pea tuku atu ʻa e kau ʻAmaleki angahalaʻiá ki he fakaʻauha.+ Tauʻi kinautolu kae ʻoua kuó ke fakaʻauha ʻosi kinautolu.’+ 19 Ko ia ko e hā naʻe ʻikai ai te ke talangofua ki he leʻo ʻo Sihová? ʻI hono kehé, kuó ke ʻoho mānumanu atu ki he koloa veté+ pea fai ʻa e meʻa naʻe kovi ʻi he vakai mai ʻa Sihová!”

20 Kae kehe, naʻe pehē ʻe Saula kia Sāmiuela: “Ka kuó u talangofua ki he leʻo ʻo Sihová! Naʻá ku ʻalu ʻi he fekau ko ia naʻe tuku atu ai au ʻe Sihová, pea naʻá ku ʻomai ʻa ʻĒkaki ko e tuʻi ʻo ʻAmalekí, pea naʻá ku tuku atu ʻa e kau ʻAmalekí ki he fakaʻauha.+ 21 Ka ko e kakaí naʻa nau toʻo ʻa e fanga sipi mo e fanga pulu mei he koloa veté, ʻa e lelei taha ʻo e meʻa naʻe tuku atu ki he fakaʻauhá, ke feilaulau ʻaki kia Sihova ko ho ʻOtuá ʻi Kilikali.”+

22 Naʻe pehē ange leva ʻe Sāmiuela: “Ko e hā ʻoku leleiʻia ange ai ʻa Sihová: Ko e feilaulau tutu monumanú+ pe ko e fanongo ki he leʻo ʻo Sihová? Ko e moʻoni: ʻOku lelei ange ʻa e talangofuá ʻi hono fai ha feilaulaú+ pea ʻoku lelei ange ʻa e fanongo tokangá ʻi he ngako+ ʻo e fanga sipí; 23 he ko e angatuʻú+ ʻoku tatau ia mo e angahala ko e vavaló,+ pea ko e tutui atu ʻi he ʻafungí ʻoku tatau ia mo hono ngāueʻaki ʻa e mālohi fakafaimaná mo e tauhi ʻaitolí.* Koeʻuhí ko hoʻo siʻaki ʻa e folofola Sihová,+ kuó ne siʻaki koe mei hoʻo hoko ko e tuʻí.”+

24 Naʻe pehē ange leva ʻe Saula kia Sāmiuela: “Kuó u faiangahala, he kuó u laka kehe mei he tuʻutuʻuni ʻa Sihová pea mei hoʻo leá, koeʻuhí he naʻá ku manavahē ki he kakaí peá u fanongo ki he meʻa naʻa nau leaʻakí. 25 Pea ko eni, kātaki muʻa ʻo fakamolemoleʻi ʻeku angahalá, peá ke foki mo au koeʻuhí ke u ʻalu ʻo punou kia Sihova.”+ 26 Ka naʻe pehē ʻe Sāmiuela kia Saula: “ʻE ʻikai te u foki mo koe, he kuó ke siʻaki ʻa e folofola ʻa Sihová, pea kuo siʻaki koe ʻe Sihova mei hoʻo hokohoko atu ko e tuʻi ki ʻIsilelí.”+ 27 ʻI he tafoki ʻa Sāmiuela ke ʻalú, naʻe puke ʻe Saula ʻa e kapa ʻo hono kofu taʻenimá, ka naʻe mahae ia. 28 ʻI he meʻá ni, naʻe pehē ʻe Sāmiuela kiate ia: “Kuo hae ʻe Sihova meiate koe ʻa e pule ko e tuʻi ki ʻIsilelí he ʻahó ni, pea te ne foaki ia ki ha taha ʻi hoʻo kau tangatá ʻa ia ʻoku lelei ange ʻiate koé.+ 29 ʻIkai ko ia pē, ko e ʻOtua Fungani ʻo ʻIsilelí+ ʻe ʻikai loi+ pe liliu ʻene fakakaukaú,* he ʻoku ʻikai ko ha tangata pē Ia ke liliu ʻene fakakaukaú.”*+

30 ʻI he meʻá ni naʻá ne pehē: “Kuó u faiangahala. Ka ke fakalāngilangiʻi muʻa au ʻi he ʻao ʻo e kau mātuʻa ʻo hoku kakaí pea ʻi he ʻao ʻo ʻIsilelí. Ke ke foki mo au, pea te u ʻalu ʻo punou kia Sihova ko ho ʻOtuá.”+ 31 Ko ia naʻe foki ʻa Sāmiuela ʻo ne muimui atu ʻia Saula, pea naʻe punou ʻa Saula kia Sihova. 32 Pea naʻe pehē ʻe Sāmiuela: “ʻOmi ʻa ʻĒkaki ko e tuʻi ʻo ʻAmalekí ke ofi mai kiate au.” Pea naʻe ʻalu fakatōtōʻohi* atu ʻa ʻĒkaki kiate ia, he naʻe pehē loto pē ʻe ʻĒkaki: ‘ʻOku pau pē kuo mahili atu ʻa e fakamanamana* ʻo e maté.’ 33 Kae kehe, naʻe pehē ʻe Sāmiuela: “Hangē pē ko hono fakamasivaʻi ʻe hoʻo heletaá mei he kakai fefiné ʻa ʻenau fānaú, ʻe pehē pē ʻa e hoko ʻa hoʻo faʻeé ko e fefine masiva fānau taha ʻi he kakai fefiné.” ʻI he meʻa ko iá naʻe tuʻutuʻu kongokonga ʻe Sāmiuela ʻa ʻĒkaki ʻi he ʻao ʻo Sihová ʻi Kilikali.+

34 Naʻe ʻalu leva ʻa Sāmiuela ki Lama, pea naʻe ʻalu hake ʻa Saula ki hono fale ʻoʻoná ʻi Kīpea. 35 Naʻe ʻikai ke toe sio ʻa Sāmiuela kia Saula ʻo aʻu ki he ʻaho naʻá ne mate aí, kae kehe naʻe tangi mamahi ʻa Sāmiuela ʻia Saula.+ Pea naʻe fakaʻiseʻisa ʻa Sihova ʻi heʻene fakanofo ʻa Saula ke tuʻi ki ʻIsilelí.+

16 Naʻe faifai atu pē pea folofola ʻa Sihova kia Sāmiuela: “Ko e hā hono fuoloa hoʻo mamahi koeʻuhi ko Saulá+ he kuó u siʻaki ia mei heʻene pule ko e tuʻi ki ʻIsilelí?+ Fakafonu hoʻo meʻatuí ʻaki ʻa e lolo+ peá ke ʻalu. Te u fekau atu koe kia Sese+ ko e tangata Pētelihemá, koeʻuhi he kuó u fili mei he lotolotonga hono ngaahi fohá ha tuʻi maʻaku.”+ 2 Ka naʻe pehē ʻe Sāmiuela: “ʻE lava fēfē ke u ʻalu? ʻI he taimi ʻe fanongo ai ʻa Saula fekauʻaki mo iá te ne tāmateʻi au.”+ Naʻe tali ange ʻe Sihova: “ʻAlu mo ha pulu mui peá ke pehē, ‘Kuó u haʻu ke fai ha feilaulau kia Sihova.’ 3 Fakaafeʻi ʻa Sese ki he feilaulaú; pea te u toki fakahā kiate koe ʻa e meʻa ke faí. Kuo pau ke ke pani maʻaku ʻa e tokotaha te u fakahaaʻi atu kiate koé.”+

4 Naʻe fai ʻe Sāmiuela ʻa e meʻa naʻe folofolaʻaki ʻe Sihová. ʻI heʻene aʻu ki Pētelihemá,+ naʻe manavahē ʻa e kau mātuʻa ʻo e koló ʻi he fetaulaki mo iá, pea nau pehē: “ʻOkú ke haʻu melino pē?” 5 ʻI he meʻá ni naʻá ne pehē: “ʻOku melino pē. Kuó u haʻú ke fai ha feilaulau kia Sihova. Fakamāʻoniʻoniʻi kimoutolu, pea tau ō mo au ki he feilaulaú.” Pea naʻá ne fakamāʻoniʻoniʻi ʻa Sese mo hono ngaahi fohá, ʻi he hili iá naʻá ne ui kinautolu ki he feilaulaú. 6 ʻI heʻenau hū atu peá ne sio kia ʻEliapí,+ naʻá ne pehē: “ʻOku tuʻu moʻoni heni ʻi he ʻao ʻo Sihová ʻa ʻene tokotaha paní.” 7 Ka naʻe folofola ʻa Sihova kia Sāmiuela: “ʻOua naʻá ke tokanga ki hono fōtungá pea mo hono māʻolungá,+ he kuó u siʻaki ia. He ko e anga ʻo e sio ʻa e tangatá ʻoku ʻikai ko e anga ia ʻo e sio ʻa e ʻOtuá, koeʻuhí he ʻoku sio ʻa e tangatá pē ki he meʻa ʻoku hā ki he matá, ka ʻoku sio ʻa Sihova ia ki he lotó.”+ 8 Naʻe ui leva ʻe Sese ʻa ʻApinatapi+ pea fekau ke ʻalu atu ʻi muʻa ʻia Sāmiuela, ka naʻá ne pehē: “Kuo ʻikai foki ke fili ʻe Sihova ʻa e tokotahá ni.” 9 Ko hono hokó naʻe ʻoatu leva ʻe Sese ʻa Sama,+ ka naʻá ne pehē: “Kuo ʻikai foki ke fili ʻe Sihova ʻa e tokotahá ni.” 10 Ko ia ai, naʻe fekau ʻe Sese ʻa hono ngaahi foha ʻe toko fitú ke nau ʻalu atu ʻi muʻa ʻia Sāmiuela, ka naʻe pehē ange ʻe Sāmiuela kia Sese: “Kuo ʻikai foki ke fili ʻe Sihova ha taha ʻo kinautolú ni.”

11 Fakaʻosí naʻe pehē ange ʻe Sāmiuela kia Sese: “Ko e kotoa eni hoʻo tamaiki tangatá?” Naʻá ne tali ange: “Ko e siʻi tahá+ pē ʻoku teʻeki ke ʻi hení; ʻokú ne tauhi ʻa e fanga sipí.”+ Naʻe pehē ange leva ʻe Sāmiuela kia Sese: “Fekau kiate ia ke haʻu, koeʻuhi heʻikai ke tau tangutu ʻo kai kae ʻoua kuó ne haʻu ki heni.” 12 Ko ia ai, naʻá ne fai ha fekau ke ʻomi ia peá ne haʻu. Pea naʻá ne pahapaha, mo fakaʻofoʻofa hono kanoʻimatá pea fōtunga matamatalelei.+ Pea naʻe folofola mai leva ʻa Sihova: “Tuʻu hake pea pani ia, he ko ia ʻa e tokotahá!”+ 13 Ko ia naʻe toʻo ʻe Sāmiuela ʻa e meʻatui ʻaiʻanga loló+ pea pani ia ʻi he ʻao ʻo hono fanga tokouá. Pea naʻe kamata ke fakaivimālohiʻi ʻe he laumālie ʻo Sihová ʻa Tēvita mei he ʻaho ko iá ʻo hokohoko atu.+ Ki mui ai, naʻe tuʻu hake ʻa Sāmiuela ʻo ne ʻalu ki Lama.+

14 Pea naʻe mavahe ʻa e laumālie ʻo Sihová meia Saula,+ pea naʻe fakamamahiʻi ia+ ʻe ha laumālie kovi* meia Sihova. 15 Naʻe pehē ange ʻe he kau sevāniti ʻa Saulá kiate ia: “Vakai ʻoku fakamamahiʻi koe ʻe ha laumālie kovi mei he ʻOtuá. 16 Ke ke fekau mai muʻa ʻe homau ʻeiki, ʻa hoʻo kau sevānití ʻa ia ʻoku ʻi ho ʻaó ke kumi mai ha tangata ʻoku pōtoʻi ʻi he tā haʻapé.+ Pea ʻi ha taimi pē ʻe hoko mai ai kiate koe ha laumālie kovi mei he ʻOtuá, te ne tā leva ia pea te ke ongoʻi lelei ange ai.” 17 Ko ia ai, naʻe pehē ange ʻe Saula ki heʻene kau sevānití: “Kātaki ʻo kumi mai ha tangata tā lelei, pea ʻomai ia kiate au.”

18 Naʻe pehē ange ʻe he taha ʻo e kau tamaioʻeikí: “Vakai! Kuó u sio ʻi he pōtoʻi tā ʻa ha foha ʻo Sese ko e tangata Pētelihemá, pea ko e tokotaha toʻa ʻi he taú+ mo loto-lahi. ʻOkú ne pōtoʻi lea, pea ʻokú ne matātangata,+ pea ʻoku kau mo ia+ ʻa Sihova.” 19 Naʻe fekau atu leva ʻe Saula ha kau talafekau kia Sese ʻo pehē: “Fekau ho foha ko Tēvitá, ʻa ia ʻoku ʻi he fanga sipí+ ke haʻu kiate au.” 20 Ko ia naʻe fakaheka ʻe Sese ki ha ʻasi ha mā, mo ha hina kiliʻimanu ʻoku ʻi ai ha uaine, pea mo ha kiʻi kosi pea ʻoatu ia kia Saula ʻi hono foha ko Tēvitá. 21 Ko ia naʻe ʻalu atu ʻa Tēvita kia Saula pea kamata ke ne ngāue kiate ia.+ Naʻe kamata ke ʻofa lahi ʻaupito ʻa Saula ʻiate ia, pea naʻá ne hoko ko ʻene tangata toʻo meʻatau. 22 Naʻe ʻoatu ʻe Saula ha fekau kia Sese: “Kātaki ʻo tuku muʻa ʻa Tēvita ke ngāue ai pē kiate au, he ʻoku ou leleiʻia ʻiate ia.” 23 ʻI he taimi pē naʻe hoko mai ai kia Saula ha laumālie kovi mei he ʻOtuá, naʻe toʻo ʻe Tēvita ʻa e haʻapé peá ne tā ia, pea naʻe maʻu ʻe Saula ha fiemālie peá ne ongoʻi lelei ange, pea naʻe mavahe leva ʻa e laumālie koví meiate ia.+

17 Pea naʻe fakatahatahaʻi mai ʻe he kau Filisitiá+ ʻenau kau taú* ki he tau. Naʻa nau fakatahataha ʻi Soko,+ ʻa ia ʻoku kau ki Siutá, pea naʻa nau ʻapitanga ʻi he vahaʻa ʻo Soko mo ʻĀseká,+ ʻi ʻĒfesi-tamemi.+ 2 Ko Saula mo e kau tangata ʻo ʻIsilelí naʻa nau fakatahataha ʻo ʻapitanga ʻi he Teleʻa* ko ʻElá,+ pea naʻa nau fakatē tau ke fetaulaki mo e kau Filisitiá. 3 Naʻe tuʻu ʻa e kau Filisitiá ʻi he moʻunga he tafaʻaki ʻe tahá, pea naʻe tuʻu ʻa e kau ʻIsilelí ʻi he moʻunga he tafaʻaki ʻe tahá, ʻo ʻi hona vahaʻá ʻa e teleʻá.

4 Pea naʻe haʻu ha fuʻu toʻa mei he ngaahi ʻapitanga ʻo e kau Filisitiá; ko hono hingoá ko Kolaiate+ mei Kati+ pea ko hono māʻolungá ko e kiupite ʻe ono mo ha hanga ʻe taha.* 5 Naʻe ʻi hono ʻulú ha tatā kopa, pea naʻá ne tui ha kofu-tau ʻuno kopa fehilihiliʻi. Ko e mamafa ʻo e kofu-tau kopá+ ko e sikeli ʻe 5,000.* 6 Naʻe ʻi ai ha meʻa maluʻi naʻe ngaohi mei he kopá ʻi he konga ki muʻa ʻo hono ongo vaʻé mo ha kiʻi tao+ kopa ʻi hono tuʻá. 7 Ko e kau papa ʻo ʻene taó naʻe hangē ia ko e vaʻakau ʻa e kau lalangá,+ pea ko e mata ukamea ʻo ʻene taó ko hono mamafá ko e sikeli ʻe 600;* pea naʻe laka atu ʻi muʻa ʻiate ia ʻa ʻene tangata toʻo pā. 8 Pea naʻá ne tuʻu ʻo kaila atu ki he kau tau ʻa ʻIsilelí+ ʻo ne pehē kiate kinautolu: “Ko e hā kuo mou haʻu ai ke fakatē tau maí? ʻIkai ko e Filisitia au, pea ʻikai ko kimoutolu ko e kau sevāniti ʻa Saula? Fili ha tangata maʻamoutolu, pea tuku ke ne ʻalu hifo kiate au. 9 Kapau te ne malava ke tau mo au pea taaʻi au, te mau hoko leva ai ko hoʻomou kau sevāniti. Ka ʻo kapau te u ikunaʻi ia pea taaʻi ia, te mou hoko ai ko ʻemau kau sevāniti pea ngāue kiate kimautolu.” 10 Naʻe toe pehē ʻe he Filisitiá: “ʻOku ou lumaʻi* moʻoni ʻa e kau tau ʻa ʻIsilelí+ he ʻahó ni. ʻOmai ha tangata kiate au, pea tuku ke ma tau!”

11 ʻI he fanongo ʻa Saula mo ʻIsileli kotoa ki he ngaahi lea ko eni ʻa e Filisitiá, naʻa nau hoko ai ʻo manavahē mo ilifia lahi.

12 Pea ko Tēvitá ko e foha ia ʻo e tangata ʻEfalata+ mei Pētelihema+ ʻo Siutá ko hono hingoá ko Sese,+ ʻa ia naʻe ʻi ai hono foha ʻe toko valu+ pea naʻe ʻosi motuʻa ia ʻi he ngaahi ʻaho ʻo Saulá. 13 Ko e ngaahi foha lalahi ʻe toko tolu ʻo Sesé naʻa nau muimui ʻia Saula ki he taú.+ Ko e hingoa ʻo hono ngaahi foha ʻe toko tolu naʻa nau ʻalu ki he taú ko ʻEliapi+ ʻa e ʻuluaki fohá, ko hono foha hono uá ko ʻApinatapi,+ pea ko hono tolú ko Sama.+ 14 Ko Tēvita ʻa e siʻisiʻi tahá,+ pea ko e toko tolu lalahí naʻa nau muimui ʻia Saula.

15 Naʻe ʻalu mo foki ʻa Tēvita meia Saula ke tokangaʻi ʻa e fanga sipi+ ʻa ʻene tamaí ʻi Pētelihema. 16 Lolotonga ení, naʻe ʻunuʻunu mai ʻa e Filisitiá ʻo ne tuʻu ʻi hono tuʻuʻangá ʻi he pongipongi taki taha mo e efiafi taki taha ʻi he ʻaho ʻe 40.

17 Pea naʻe pehē ʻe Sese ki hono foha ko Tēvitá: “Toʻo muʻa ʻa e efa* ʻo e uite tunu ko ení mo e foʻi mā ʻe hongofulu ko ení, pea ʻave fakavave ia ki ho fanga tokoua ʻi he ʻapitangá. 18 Pea ʻave ʻa e ngaahi konga siisi* ʻe hongofulu ko ení ki he ʻeikitau ʻo e toko afé; pehē foki, te ke vakaiʻi pe ʻoku fēfē ʻa ho fanga tokouá pea ʻomi ha fakamatala meiate kinautolu.” 19 Ko kinautolú naʻa nau ʻia Saula pea ko e kau tangata kehe kotoa ʻo ʻIsilelí naʻa nau ʻi he Teleʻa* ko ʻElá,+ ʻo tau mo e kau Filisitiá.+

20 Ko ia naʻe tuʻu pongipongia hake ʻa Tēvita ʻo ne tuku ha taha ke ne tokangaʻi ʻa e fanga sipí; peá ne faʻo leva ʻene ʻū meʻá ʻo ne ʻalu ʻo hangē tofu pē ko e fekau ʻa Sese kiate iá. ʻI heʻene aʻu atu ki he ʻapitangá, naʻe ʻalu atu ʻa e kau taú ki he malaʻe taú, ʻo nau kailaʻaki ha kaila ʻo e tau. 21 Naʻe fakatē tau ʻa ʻIsileli mo e kau Filisitiá, ko ia naʻe fehangahangai ai ʻa e kau tau ʻe tahá mo e kau tau ʻe tahá. 22 Naʻe tuku ʻe Tēvita he taimi pē ko iá ʻene ʻū meʻá ki he tokotaha ʻokú ne tokangaʻi ʻa e ʻū meʻá peá ne lele atu ki he malaʻe taú. ʻI heʻene aʻu atú, naʻá ne kamata ʻeke ki hono fanga tokouá pe ʻoku nau fēfē.+

23 Lolotonga ʻene talanoa mo kinautolú, naʻe haʻu ʻa e fuʻu toʻa ko Kolaiaté,+ ʻa e Filisitia mei Katí. Naʻá ne haʻu mei he malaʻe tau ʻo e kau Filisitiá, ʻo ne leaʻaki ʻa e ngaahi lea tatau pē mo ia ki muʻá,+ pea naʻe fanongo atu ʻa Tēvita kiate ia. 24 ʻI he sio atu ʻa e kau tangata kotoa ʻo ʻIsilelí ki he tangatá, naʻa nau hola meiate ia, ʻi he manavahē.+ 25 Naʻe pehē ʻe he kau tangata ʻo ʻIsilelí: “Kuo mou sio ʻi he tangata ko eni ʻoku haʻú? Ko ʻene haʻú ke lumaʻi* ʻa ʻIsileli.+ ʻE foaki ʻe he tuʻí ʻa e koloa lahi ki he tangata te ne taaʻi iá, te ne foaki kiate ia ʻa hono ʻofefine ʻoʻoná,+ pea te ne fakaʻatā ʻa e fale ʻo ʻene tamaí mei he ngaahi fatongia ʻi ʻIsilelí.”

26 Naʻe kamata ke pehē ʻe Tēvita ki he kau tangata naʻa nau tuʻu ʻo ofi kiate iá: “Ko e hā koā ʻe fai ki he tangata te ne taaʻi ʻa e Filisitia ko eé pea toʻo ʻa e manukiaʻangá mei ʻIsilelí? He ko hai ʻa e Filisitia taʻekamú ni ke ne lumaʻi* ʻa e kau tau ʻa e ʻOtua moʻuí?”+ 27 Naʻe tala ange leva ʻe he kakaí kiate ia ʻa e meʻa tatau mo ia ki muʻá: “Ko e meʻa eni ʻe fai ki he tangata te ne taaʻi iá.” 28 ʻI he fanongo atu ʻa hono tokoua lahi taha ko ʻEliapí+ ki heʻene lea ki he kau tangatá, naʻe kamata ke ne ʻita ʻia Tēvita peá ne pehē ange: “Ko e hā naʻá ke haʻu aí? Pea ko hai ia naʻá ke tuku ki ai ʻa e fanga sipi tokosiʻi ko ia ʻi he toafá?+ ʻOku ou ʻiloʻi lelei ʻa hoʻo ʻafungí mo e ngaahi taumuʻa kovi ʻi ho lotó; naʻá ke haʻú pē ke sio ʻi he taú.” 29 ʻI he meʻá ni naʻe pehē ange ʻe Tēvita: “Ko e hā koā ʻa e meʻa kuó u faí? Ko ʻeku ʻeke pē ha fehuʻi!” 30 Ko ia naʻá ne tafoki meiate ia ki ha tokotaha kehe peá ne ʻeke ʻa e meʻa tatau mo ia ki muʻá,+ pea naʻe ʻoange kiate ia ʻe he kakaí ʻa e tali tatau pē mo ia ki muʻá.+

31 Ko e ngaahi lea naʻe leaʻaki ʻe Tēvitá naʻe fanongoa pea naʻe fakahā ia kia Saula. Ko ia naʻá ne fekau mai ke ne ʻalu ange. 32 Naʻe pehē ʻe Tēvita kia Saula: “Tuku ke ʻoua naʻa vaivai ha loto ʻo ha taha koeʻuhí ko ia. ʻE ʻalu ʻa hoʻo sevānití ʻo tau mo e Filisitiá ni.”+ 33 Ka naʻe pehē ʻe Saula kia Tēvita: “Heʻikai malava ke ke tau mo e Filisitiá ni, he ko koé ko ha tamasiʻi pē,+ ka kuó ne hoko ko ha sōtia* talu mei heʻene kei siʻí.” 34 Naʻe pehē ange leva ʻe Tēvita kia Saula: “Naʻe hoko ʻa hoʻo sevānití ko ha tauhi-sipi ʻo e tākanga ʻa ʻene tamaí, pea naʻe haʻu ha laione,+ pehē foki ki ha pea, ʻo na ʻave taki taha ha sipi mei he tākangá. 35 Naʻá ku muimui ai ʻo taaʻi ia pea fakahaofi ʻa e sipí mei hono ngutú. ʻI heʻene tuʻu hake kiate aú, naʻá ku puke ia ʻi hono fulufulú* ʻo taaʻi pea tāmateʻi ia. 36 Naʻe taaʻi ʻe hoʻo sevānití fakatouʻosi ʻa e laioné pea mo e peá, pea ko e Filisitia taʻekamú ni ʻe hoko ʻo hangē ko ha taha ʻo kinauá, he kuó ne lumaʻi* ʻa e kau tau ʻa e ʻOtua moʻuí.”+ 37 Naʻe hoko atu leva ʻa Tēvita: “Ko Sihova, ʻa ia naʻá ne fakahaofi au mei he pesipesi ʻo e laioné mo e peá, ko ia ʻa e tokotaha te ne fakahaofi au mei he nima ʻo e Filisitiá ni.”+ ʻI he meʻá ni naʻe pehē ange ʻe Saula kia Tēvita: “ʻAlu, pea ʻofa ke kau mo koe ʻa Sihova.”

38 Naʻe fakatui leva ʻe Saula ʻia Tēvita ʻa hono teungá. Naʻá ne ʻai ha tatā kopa ki hono ʻulú, ʻi he hili iá naʻá ne fakatui ʻiate ia ha kofu-tau. 39 Naʻe haʻi leva ʻe Tēvita ʻa ʻene heletaá ʻi hono teungá pea naʻá ne feinga ke ʻalu ka naʻe ʻikai ke lava, he naʻe ʻikai te ne anga ki ai. Naʻe pehē ange ʻe Tēvita kia Saula: “ʻOku ʻikai lava ke u ʻalu mo tui ʻa e ngaahi meʻá ni, he ʻoku ʻikai ke u anga ki ai.” Ko ia naʻe vete ia ʻe Tēvita. 40 Naʻá ne toʻo leva ʻa hono tokotokó ʻi hono nimá peá ne filifili ha ngaahi foʻi maka molemole ʻe nima mei he tafengavaí* pea faʻo ia ki heʻene kato tauhi-sipí, pea naʻe ʻi hono nimá ʻa ʻene makataá.+ Pea naʻá ne kamata ke fakaofiofi atu ki he Filisitiá.

41 Naʻe haʻu ʻa e Filisitiá ʻo ofi mo toe ofi ange kia Tēvita, pea naʻe muʻomuʻa ʻiate ia ʻa ʻene tangata toʻo paá. 42 ʻI he hanga mai ʻa e Filisitiá ʻo ne sio kia Tēvitá, naʻá ne manumanukiʻi ia koeʻuhí ko ha tamasiʻi pahapaha pē ia mo matātangata.+ 43 Ko ia naʻe pehē ai ʻe he Filisitiá kia Tēvita: “Ko ha kulī au,+ ke ke haʻu ai kiate au mo e tokotokó?” Ko ia naʻe talatukiʻi ai ʻe he Filisitiá ʻa Tēvita ʻi he hingoa ʻo hono ngaahi ʻotuá. 44 Naʻe pehē ʻe he Filisitiá kia Tēvita: “Haʻu pē koe kiate au, pea te u foaki ho kakanó ki he fanga manupuna ʻo e langí pea ki he fanga manu ʻo e vaó.”

45 Naʻe tali ange ʻe Tēvita ki he Filisitiá: “ʻOkú ke haʻu kiate au mo e heletā mo e fuʻu tao mo ha kiʻi tao,+ ka ʻoku ou ʻalu atu kiate koe ʻi he huafa ʻo Sihova ʻo e ngaahi kau tau,+ ko e ʻOtua ʻo e kau tau ʻa ʻIsilelí, ʻa ia kuó ke lumaʻí.*+ 46 ʻI he ʻaho tofu pē ko ení ʻe tuku mai ai koe ʻe Sihova ki hoku nimá,+ pea te u taaʻi koe pea tuʻusi ho ʻulú; pea ʻi he ʻahó ni te u tuku ai ʻa e ngaahi ʻangaʻanga ʻo e ʻapitanga ʻo e kau Filisitiá ki he fanga manupuna ʻo e langí pea ki he fanga manu fekai ʻo e māmaní; pea ko e kakai ʻo e māmaní kotoa te nau ʻiloʻi ʻoku ʻi ai ha ʻOtua ʻi ʻIsileli.+ 47 Pea ko e faʻahinga kotoa ʻoku fakatahataha hení* te nau ʻiloʻi ʻoku ʻikai fai ʻe Sihova ʻa e fakahaofí+ ʻaki ʻa e heletā pe ko e tao, he ʻoku ʻa Sihova ʻa e taú,+ pea te ne tuku kotoa mai kimoutolu ki homau nimá.”+

48 Naʻe tuʻu hake leva ʻa e Filisitiá ʻo ne laka mai ke toe ofi ange ke fetaulaki mo Tēvita, ka naʻe lele vave atu ʻa Tēvita ki he malaʻe taú ke fakafetaulaki ki he Filisitiá. 49 Naʻe ala hifo ʻa Tēvita ki heʻene kató ʻo ne toʻo hake ha foʻi maka mei ai peá ne makataaʻi atu ia. Naʻá ne ʻai ia ʻo tau ʻi he laʻe ʻo e Filisitiá, pea naʻe ngalo ʻa e foʻi maká ʻi hono foʻi laʻé peá ne tō foʻohifo ki he kelekelé.+ 50 Ko ia naʻe ikunaʻi ʻe Tēvita ʻa e Filisitiá ʻaki ha makatā mo ha foʻi maka; naʻá ne taaʻi ʻa e Filisitiá peá ne tāmateʻi ia, neongo naʻe ʻikai ha heletā ʻi he nima ʻo Tēvitá.+ 51 Naʻe hoko atu pē ʻa e lele ʻa Tēvitá ʻo ne tuʻu ʻi hono tafaʻakí. Naʻá ne ala atu leva ki he heletā ʻa e Filisitiá+ ʻo ne unuhi hake ia mei hono ʻaiʻangá peá ne fakapapauʻi kuó ne mate ʻaki ʻene tuʻusi ʻaki ia hono ʻulú. ʻI he sio ʻa e kau Filisitiá kuo mate ʻenau fuʻu toʻá, naʻa nau hola.+

52 Naʻe tuʻu hake leva ai ʻa e kau tangata ʻo ʻIsileli mo Siutá ʻo nau kaikaila mo tulimui atu ʻi he kau Filisitiá ʻo faai atu mei he teleʻá+ ki he ngaahi matapā ʻo ʻEkiloní,+ pea ko e ʻangaʻanga ʻo e kau Filisitiá naʻe fola pē ʻi he halá mei Sālaimi,+ ʻo aʻu atu ki Kati mo ʻEkiloni. 53 ʻI he hili ʻa e foki mai ʻa e kau ʻIsilelí mei he tuli mālohi ki he kau Filisitiá, naʻa nau faʻao fakamālohi honau ngaahi ʻapitangá.

54 Naʻe toʻo leva ʻe Tēvita ʻa e ʻulu ʻo e Filisitiá ʻo ne ʻomai ia ki Selusalema, ka naʻá ne tuku ʻa e naunau tau ʻa e Filisitiá ʻi hono tēniti ʻoʻoná.+

55 ʻI he mōmeniti pē naʻe sio ai ʻa Saula kia Tēvita ʻokú ne ʻalu atu ke fakafetaulaki ki he Filisitiá, naʻá ne pehē kia ʻĀpina,+ ko e ʻeikitaú: “Ko e foha ʻo hai ʻa e tamasiʻí ni,+ ʻĀpina?” Naʻe tali ange ʻe ʻĀpina: “ʻOku ou fakapapau atu, ʻe hoʻo ʻAfio, ʻoku ʻikai te u ʻilo!” 56 Naʻe pehē ange ʻe he tuʻí: “Kumi ke ʻilo pe ko e foha ʻo hai ʻa e talavoú ni.” 57 ʻI he foki mai pē ʻa Tēvita mei hono taaʻi ʻo e Filisitiá, naʻe ʻomai ia ʻe ʻĀpina ʻo ne ʻoatu ia ki he ʻao ʻo Saulá pea naʻe ʻi hono nimá ʻa e ʻulu ʻo e Filisitiá.+ 58 Naʻe pehē atu ʻe Saula kiate ia: “Ko e foha koe ʻo hai, tamasiʻi?” Naʻe tali ange ʻe Tēvita: “Ko e foha au ʻo hoʻo sevāniti ko Sese+ ko e tangata Pētelihemá.”+

18 ʻI he ʻosi pē ʻa e lea ʻa Tēvita kia Saulá, naʻe kamata ke fāitaha ʻa Sionatane+ mo Tēvita ʻi he kaumeʻa vāofi, pea naʻe kamata ke ʻofa ʻa Sionatane ʻia Tēvita ʻo hangē pē ko ʻene ʻofa ʻiate iá.+ 2 Mei he ʻaho ko iá, naʻe tuku ai ʻe Saula ʻa Tēvita ʻiate ia, pea naʻe ʻikai te ne fakaʻatā ia ke ne foki ki he fale ʻo ʻene tamaí.+ 3 Pea naʻe fai ʻe Sionatane mo Tēvita ha fuakava,+ koeʻuhí naʻá ne ʻofa ʻia Tēvita ʻo hangē pē ko ʻene ʻofa ʻiate iá.+ 4 Naʻe vete ʻe Sionatane ʻa e kofu taʻenima naʻá ne tuí peá ne ʻoange ia kia Tēvita, fakataha mo hono ngaahi teunga kehé, ko ʻene heletaá, ko ʻene kaufaná, mo hono letá. 5 Naʻe kamata ke ʻalu atu ʻa Tēvita pea naʻá ne lavameʻa*+ ʻi ha feituʻu pē naʻe fekauʻi ia ki ai ʻe Saula. Ko ia naʻe ʻai ia ʻe Saula ke ne tokangaʻi ʻa e kau tangata taú,+ pea naʻe leleiʻia ʻi he meʻá ni ʻa e kakaí kotoa pea mo e kau sevāniti ʻa Saulá.

6 ʻI he taimi naʻe foki mai ai ʻa Tēvita mo e niʻihi kehé mei hono taaʻi ʻa e kau Filisitiá, naʻe haʻu ʻa e kau fefiné mei he ngaahi kolo kotoa ʻo ʻIsilelí ʻoku nau hiva+ mo tauʻolunga ke fakafetaulaki kia Tuʻi Saula mo e ngaahi nafa,+ ʻi he fiefia, pea mo e ngaahi meʻalea filo tolu. 7 Ko e kau fefine ne nau fakafiefiaʻi ʻa e meʻa naʻe hokó naʻa nau hiva:

8 Naʻe hoko ai ʻo ʻita lahi+ ʻa Saula, pea naʻe ʻikai te ne leleiʻia ʻi he foʻi hiva ko ení, he naʻá ne pehē: “Kuo nau fakalāngilangiʻi ʻa Tēvita ʻaki ʻa e ngaahi toko mano, ka kuo nau fakalāngilangiʻi au ʻaki ʻa e ngaahi toko afe. Ko e meʻa pē ʻoku toe ke ʻoange kiate iá ko e tuʻunga-tuʻí!”+ 9 Mei he ʻaho ko iá ʻo faai mai ai, naʻe sio mataʻi huʻuhuʻu maʻu pē ʻa Saula kia Tēvita.

10 ʻI he ʻaho hono hokó naʻe hoko mai ai ha laumālie kovi* mei he ʻOtuá ʻo ne maʻunimā ʻa Saula,+ pea naʻe kamata ke faikehe ʻene tōʻongá* ʻi loto ʻi he falé, lolotonga ia hono tā ʻe Tēvita ʻa e fasi ʻi he haʻapé+ ʻo hangē ko ia ʻi he ngaahi taimi kehé. Naʻe ʻi he nima ʻo Saulá ha tao,+ 11 pea naʻá ne veloʻi ʻa e taó+ ʻo ne pehē loto pē: ‘Te u fakamaʻu ʻa Tēvita ki he holisí!’ Ka naʻe hola tuʻo ua ʻa Tēvita meiate ia. 12 Pea naʻe ilifia ʻa Saula ʻia Tēvita koeʻuhí naʻe kau mo ia+ ʻa Sihova ka naʻá Ne mavahe meia Saula.+ 13 Ko ia naʻe toʻo ai ia ʻe Saula mei hono ʻaó pea fakanofo ia ko e ʻeiki ʻo ha toko afe, pea naʻe taki ʻe Tēvita ʻa e kau taú ki he taú.*+ 14 Naʻe hokohoko atu ʻa e lavameʻa*+ ʻa Tēvita ʻi he meʻa kotoa naʻá ne faí, pea naʻe kau mo ia+ ʻa Sihova. 15 Pea ʻi he sio ʻa Saula naʻá ne mātuʻaki lavameʻá, naʻá ne hoko ai ʻo ilifia ʻiate ia. 16 Ka ko ʻIsileli kotoa mo Siuta naʻa nau ʻofa ʻia Tēvita, koeʻuhí he naʻá ne taki kinautolu ʻi heʻenau ngaahi feingataú.

17 Naʻe pehē ki mui ai ʻe Saula kia Tēvita: “Ko eni ʻa hoku ʻofefine lahi ko Mēlapé.+ Te u foaki atu ia kiate koe ke ne hoko ko ho uaifi.+ Kae kehe, ke ke hokohoko atu hono fakahāhā ʻa hoʻo loto-toʻá koeʻuhí ko au pea tau ʻi he ngaahi tau ʻa Sihová.”+ He naʻe pehē loto pē ʻe Saula: ‘ʻOua naʻa tuku ke ala hoku nimá kiate ia. Tuku ke taaʻi ia+ ʻe he nima ʻo e kau Filisitiá.’ 18 ʻI he meʻá ni naʻe pehē ai ʻe Tēvita kia Saula: “Ko hai au pea ko hai ʻa hoku kāingá, ʻa e fāmili ʻo ʻeku tamaí ʻi ʻIsilelí, ke u hoko ai ko e foha-ʻi-he-fono ki he tuʻí?”+ 19 Kae kehe, ʻi he hoko mai ʻa e taimi ke foaki ai ʻa e ʻofefine ʻo Saula ko Mēlapé kia Tēvitá, tā naʻe ʻosi foaki ia ke ne hoko ko e uaifi ʻo ʻAtalieli+ ko e tangata Meholá.

20 Pea ko e ʻofefine ʻo Saula ko Maikalé+ naʻá ne ʻofa ʻia Tēvita, pea naʻe fakahā ia kia Saula, pea naʻá ne leleiʻia ʻi he meʻá ni. 21 Ko ia naʻe pehē ʻe Saula: “Te u foaki ia kia Tēvita ke ne hoko ko ha tauhele kiate ia, koeʻuhí ke hoko mai ʻa e nima ʻo e kau Filisitiá kiate ia.”+ Naʻe pehē ange leva ʻe Saula kia Tēvita ko hono tuʻo uá ia: “Te ke fai he ʻahó ni ha aleapau fakaemali mo au.”* 22 ʻIkai ko ia pē, naʻe tuʻutuʻuni ʻa Saula ki heʻene kau sevānití: “Lea fakafufū kia Tēvita ʻo pehē, ‘Vakai! ʻOku leleiʻia ʻa e tuʻí ʻiate koe, pea ko ʻene kau sevānití kotoa ʻoku nau ʻofa ʻiate koe. Ko ia ke ke fai mo e tuʻí ha aleapau fakaemali.’” 23 ʻI hono tala ange ʻe he kau sevāniti ʻa Saulá kia Tēvita ʻa e ngaahi meʻá ni, naʻe pehē ʻe Tēvita: “Ko ha meʻa siʻi koā kiate kimoutolu ke fai ha aleapau fakaemali mo e tuʻí lolotonga iá ko ha motuʻa masiva kita mo ʻikai ke loko tokaʻi?”+ 24 Naʻe fakahaaʻi leva ʻe he kau sevāniti ʻa Saulá kiate ia: “Ko eni ʻa e ngaahi lea naʻe leaʻaki ʻe Tēvitá.”

25 Ko ia naʻe pehē ai ʻe Saula: “Ko e meʻa eni te mou leaʻaki kia Tēvitá, ‘ʻOku ʻikai ke fiemaʻu ʻe he tuʻí ia ha totongi+ ʻo e taʻahine malí tuku kehe pē ʻa e muʻa kili ʻe 100 ʻo e fakatangata+ ʻo e kau Filisitiá, ke faisāuni ʻaki ki he ngaahi fili ʻo e tuʻí.’” He naʻe faʻufaʻu ʻa Saulá ke ʻai ke tō ʻa Tēvita ʻi he nima ʻo e kau Filisitiá. 26 Ko ia naʻe fakahā ʻe heʻene kau sevānití ʻa e ngaahi leá ni kia Tēvita, pea naʻe leleiʻia ai ʻa Tēvita ke fai ha aleapau fakaemali mo e tuʻí.+ Ki muʻa ʻi he taimi naʻe vaheʻi ki aí, 27 naʻe ʻalu atu ʻa Tēvita mo ʻene kau tangatá ʻo taaʻi ʻa e kau Filisitia ʻe toko 200, pea naʻe ʻomi kakato ʻe Tēvita ʻa e lahi ʻo e muʻa kili ʻo honau fakatangatá ki he tuʻí, ke fai ʻaki ha aleapau fakaemali mo e tuʻí. Ko ia ai, naʻe ʻoange ʻe Saula kiate ia ʻa hono ʻofefine ko Maikalé ke hoko ko hono uaifi.+ 28 Naʻe ʻiloʻi ʻe Saula naʻe kau ʻa Sihova mo Tēvita+ pea ko hono ʻofefine ko Maikalé naʻá ne ʻofa ʻiate ia.+ 29 Naʻe ʻai ʻe he meʻá ni ʻa Saula ke ne toe ilifia lahi ange ai ʻia Tēvita, pea naʻe hoko ʻa Saula ko ha fili ʻo Tēvita ʻi he toenga ʻo ʻene moʻuí.+

30 Ko e ngaahi ʻeiki ʻo e kau Filisitiá naʻa nau ʻalu atu ʻi he taú, ka ko e lahi ange ʻo ʻenau ʻalu atú, ko e lavameʻa lahi ange* ai pē ia ʻa Tēvita ʻi he kotoa ʻo e kau sevāniti ʻa Saulá;+ pea ko hono hingoá naʻe tokaʻi lahi.+

19 Naʻe lea ʻa Saula ki mui ai kia Sionatane ko hono fohá pea ki heʻene kau sevānití kotoa ʻo fekauʻaki mo hano tāmateʻi ʻo Tēvita.+ 2 Koeʻuhí naʻe ʻofa ʻaupito ʻa e foha ʻo Saula ko Sionatané ʻia Tēvita,+ naʻe tala ange ai ʻe Sionatane kia Tēvita: “ʻOku loto ʻa Saula ko ʻeku tamaí ke tāmateʻi koe. Ke ke tokanga muʻa ʻauhu, peá ke ʻalu ki ha feituʻu fakapulipuli ʻo ke toi ai pē. 3 Te u ʻalu ʻo tuʻu ʻi he tafaʻaki ʻo ʻeku tamaí ʻi he tuʻa koló ʻa ia te ke ʻi aí. Te u talanoa ki heʻeku tamaí ʻo fekauʻaki mo koe, pea kapau te u ʻilo ha meʻa, ko e moʻoni te u tala atu ia kiate koe.”+

4 Ko ia naʻe fai ʻe Sionatane ha talanoa lelei ʻo fekauʻaki mo Tēvita+ kia Saula ko ʻene tamaí. Naʻá ne pehē ange kiate ia: “ʻOku ʻikai totonu ki he tuʻí ke faiangahala ki heʻene sevāniti ko Tēvitá, he kuo ʻikai te ne faiangahala kiate koe pea ko e meʻa kuó ne fai maʻaú kuo ʻaonga ia kiate koe. 5 Naʻá ne tuku atu ʻene moʻuí ki he tuʻunga fakatuʻutāmaki ʻi heʻene taaʻi ʻa e Filisitiá,+ ʻo ʻomi ai ʻe Sihova ha fuʻu ikuna* maʻa ʻIsileli kotoa. Naʻá ke mamata ai, pea naʻá ke fiefia lahi. Ko ia ko e hā ke ke faiangahala ai ki he toto taʻehalaiá ʻi hono ʻai ke tāmateʻi taʻeʻuhinga ʻa Tēvitá?”+ 6 Naʻe fanongo ʻa Saula kia Sionatane, pea naʻe fai ʻe Saula ha fuakava: “ʻOku ou fuakava ʻia Sihova ko e ʻOtua moʻuí, ʻe ʻikai ke tāmateʻi ia.” 7 ʻI he hili iá, naʻe ui ʻe Sionatane ʻa Tēvita ʻo ne tala ange kiate ia ʻa e ngaahi meʻá ni kotoa. Ko ia naʻe ʻomi ai ʻe Sionatane ʻa Tēvita kia Saula, pea naʻe hokohoko atu ʻene ngāue kiate iá ʻo hangē pē ko ia ki muʻá.+

8 ʻI he faai atu ʻa e taimí, naʻe toe hoko ha tau, pea naʻe ʻalu atu ʻa Tēvita ʻo ne tauʻi ʻa e kau Filisitiá peá ne taaʻi kinautolu ʻi ha tāmate lahi, pea naʻa nau hola mei hono ʻaó.

9 Pea naʻe hoko mai kia Saula+ ha laumālie kovi* meia Sihova ʻi he taimi naʻá ne tangutu ai ʻi hono falé ʻokú ne toʻo ʻene taó ʻi hono nimá, lolotonga ia hono tā ʻe Tēvita ʻa e fasi ʻi he haʻapé.+ 10 Naʻe feinga ʻa Saula ke fakamaʻu ʻa Tēvita ki he holisí ʻaki ʻa e taó, ka naʻá ne kalo meia Saula, ʻa ia naʻá ne veloʻi ʻa e taó ki he holisí. Naʻe hola ʻa Tēvita ʻo ne hao lolotonga ʻa e pō ko iá. 11 Naʻe fekauʻi atu ʻe Saula ki mui ai ha kau talafekau ki he fale ʻo Tēvitá ke nau siofi ia pea ke tāmateʻi ia ʻi he pongipongi haké,+ ka ko e uaifi ʻo Tēvitá ʻa Maikale naʻá ne tala ange kiate ia: “Kapau ʻe ʻikai te ke hola he poó ni, ko ʻapongipongí te ke hoko ai ko ha tangata mate.” 12 Naʻe tokoniʻi leva ʻe Maikale ʻa Tēvita ke ʻalu hifo ʻi he matapā-teké, koeʻuhí ke ne hola ai ʻo hao. 13 Naʻe toʻo ʻe Maikale ʻa e ʻīmisi telafimí* ʻo ne tuku ia ʻi he mohengá, pea naʻá ne tuku ha tupenu fulufuluʻi kosi vangavanga ʻi he feituʻu naʻe ʻulu ki aí, peá ne ʻufiʻufi ia ʻaki ha kofu.

14 Pea naʻe fekauʻi atu ʻe Saula ha kau talafekau ke nau puke ʻa Tēvita, ka naʻe pehē ʻe Maikale: “ʻOku puke ia.” 15 Ko ia naʻe fekauʻi atu ʻe Saula ʻa e kau talafekaú ke nau ō ʻo vakaiʻi ʻa Tēvita peá ne tala kiate kinautolu: “ʻOmi ia kiate au ʻi hono mohengá ke tāmateʻi.”+ 16 ʻI he hū atu ʻa e kau talafekaú, ko e ʻīmisi telafimí* ena naʻe ʻi he mohengá mo ha tupenu fulufuluʻi kosi vangavanga ʻi he feituʻu naʻá ne ʻulu ki aí. 17 Naʻe pehē ange ʻe Saula kia Maikale: “Ko e hā naʻá ke kākaaʻi peheni ai au peá ke tuku ange ai hoku filí+ ke ne holá?” Naʻe tali ange ʻe Maikale kia Saula: “Naʻá ne pehē mai kiate au, ‘Tuku au ke u ʻalu, pe ko ʻeku tāmateʻi koe!’”

18 Pea naʻe hola ʻa Tēvita ʻo ne hao, peá ne aʻu kia Sāmiuela ki Lama.+ Naʻá ne tala kiate ia ʻa e meʻa kotoa naʻe fai ʻe Saula kiate iá. Ko ia naʻá ne ʻalu ai mo Sāmiuela, pea naʻá na nofo ʻi Naoti.+ 19 ʻI he faai atu ʻa e taimí, naʻe fakahā kia Saula: “Vakai! Ko Tēvita ē ʻoku ʻi Naoti ʻi Lama.” 20 ʻI he taimi pē ko iá, naʻe fekauʻi atu ʻe Saula ha kau talafekau ke puke ʻa Tēvita. ʻI heʻenau sio ki he faʻahinga taʻumotuʻa ʻi he kau palōfitá ʻoku nau kikite pea ʻoku tuʻu ʻa Sāmiuela ʻo ne tataki kinautolú, naʻe hoko mai ʻa e laumālie ʻo e ʻOtuá ki he kau talafekau ʻa Saulá, pea naʻe kamata foki mo kinautolu ke nau fai ʻa e tōʻonga ʻo hangē ko ha kau palōfitá.

21 ʻI heʻenau tala ia kia Saulá, naʻá ne fekauʻi atu leva ʻa e kau talafekau kehe, pea ko kinautolu foki naʻe kamata ke nau fai ʻa e tōʻonga ʻo hangē ko ha kau palōfitá. Ko ia naʻe toe fekauʻi atu ai ʻe Saula ha kau talafekau, ko e kulupu ia hono tolú, pea ko kinautolu foki naʻe kamata ke nau fai ʻa e tōʻonga ʻo hangē ko ha kau palōfitá. 22 Fakaʻosí, naʻá ne ʻalu foki mo ia ki Lama. ʻI heʻene aʻu ki he fuʻu lepa lahi ʻa ia ʻoku ʻi Sikiú, naʻá ne ʻeke: “ʻOku ʻi fē ʻa Sāmiuela mo Tēvita?” Naʻa nau tali ange: “Ko ena ʻi Naoti+ ʻi Lama.” 23 Lolotonga ʻa e ʻalu atu ʻa Saula mei ai ki Naoti ʻi Lamá, naʻe hoko mai foki ʻa e laumālie ʻo e ʻOtuá kiate ia, pea naʻá ne lue atu ʻokú ne fai ʻa e tōʻonga naʻe hangē ko ha palōfitá ʻo ne aʻu ki Naoti ʻi Lamá. 24 Naʻá ne hae foki hono ngaahi kofú, pea ko ia foki naʻá ne fai ʻa e tōʻonga ʻo hangē ko ha palōfitá ʻi he ʻao ʻo Sāmiuelá, pea naʻá ne tokoto telefua* ai ʻi he ʻaho kotoa ko iá pea ʻi he pō kotoa ko iá. Ko e ʻuhinga ia ʻoku nau pehē ai: “ʻOku toe kau koā mo Saula ʻi he kau palōfitá?”+

20 Naʻe hola leva ʻa Tēvita mei Naoti ʻi Lamá. Kae kehe, naʻá ne haʻu kia Sionatane peá ne pehē: “Ko e hā ʻa e meʻa kuó u faí?+ Ko e hā haʻaku hia, pea ko e hā haʻaku angahala kuo fai ki hoʻo tamaí ke ne kumi ai ki heʻeku moʻuí?” 2 ʻI he meʻá ni naʻe pehē ange ai ʻe Sionatane kiate ia: “Mole ke mamaʻo!+ Heʻikai te ke mate. Vakai! Heʻikai ke fai ʻe heʻeku tamaí ha meʻa, lahi pe siʻi, ʻo ʻikai te ne fakahā mai ia kiate au. Ko e hā ka fufū ai ʻa e meʻá ni ʻe heʻeku tamaí meiate au? Heʻikai ke hoko ʻa e meʻá ni.” 3 Ka naʻe toe fakapapau ange ʻa Tēvita ʻo pehē: “ʻOku ʻilo lelei ʻe hoʻo tamaí ʻokú ke leleiʻia ʻiate au+ pea te ne pehē, ‘ʻOua naʻa tuku ke ʻilo ʻe Sionatane ʻa e meʻá ni he te ne loto-mamahi.’ ʻOku ou fuakava ʻia Sihova ko e ʻOtua moʻuí pea ʻoku ou fakapapau atu kiate koe, ʻoku ʻikai te u vāmamaʻo mo e maté!”+

4 Naʻe pehē leva ʻe Sionatane kia Tēvita: “Ko e hā pē ʻa e meʻa te ke leaʻakí, te u fai ia maʻau.” 5 Naʻe pehē ange ʻe Tēvita kia Sionatane: “ʻE māhina foʻou ʻapongipongi,+ pea ʻoku ʻamanekina moʻoni au ke u tangutu fakataha mo e tuʻí ʻi he kaí; kuo pau ke ke tuku au ke u ʻalu, pea te u toi ʻi he tuʻa koló kae ʻoua ke aʻu ki he efiafi ʻo e ʻaho hono tolú. 6 Kapau ʻe fakatokangaʻi moʻoni ʻe hoʻo tamaí ʻa ʻeku pulí, te ke pehē ange leva, ‘Naʻe kōlenga mai ʻe Tēvita kiate au ke fakaʻatā ia ke ne ʻalu fakavave ki hono koló ki Pētelihema,+ koeʻuhí ʻoku fai ai ha feilaulau fakataʻu maʻá e fāmilí hono kotoa.’+ 7 Kapau ko ʻene talí ʻe peheni, ‘ʻOku lelei,’ ʻoku ʻuhinga iá ko e fiemālie ki hoʻo sevānití. Ka ʻo kapau te ne hoko ʻo ʻita, ʻe lava ke ke ʻilo pau ai ʻokú ne fakapapauʻi ke fai ha kovi kiate au. 8 Fakahāhā ʻa e ʻofa mateaki ki hoʻo sevānití,+ he kuó ke ʻomi au ki ha fuakava ʻi he ʻao ʻo Sihová.+ Ka ʻo kapau ʻoku ou halaia,+ ke ke tāmateʻi ʻe koe au. Ko e hā ke ke tuku ai au ki hoʻo tamaí?”

9 ʻI he meʻá ni naʻe pehē ai ʻe Sionatane: “Mole ke mamaʻo ha fakakaukau pehē fekauʻaki mo koe! Kapau te u ʻiloʻi ʻoku fakapapauʻi ʻe heʻeku tamaí ke fai ha kovi kiate koe, ʻikai te u tala atu ia?”+ 10 Naʻe pehē ange leva ʻe Tēvita kia Sionatane: “Ko hai te ne tala mai kiate au kapau ʻe fai atu ʻe hoʻo tamaí ha tali fefeka kiate koe?” 11 Naʻe pehē ai ʻe Sionatane kia Tēvita: “Haʻu, ta ʻalu ki he tuʻa koló.” Ko ia ko kinaua fakatouʻosi naʻá na ʻalu atu ki he vaó. 12 Pea naʻe pehē ʻe Sionatane kia Tēvita: “Tuku ke hoko ʻa Sihova ko e ʻOtua ʻo ʻIsilelí ko ha fakamoʻoni, te u fai ha fehuʻi ki heʻeku tamaí ʻi he taimi nai ko ení ʻapongipongi pe ʻi he ʻaho hono tolú. Kapau te ne fakahaaʻi ʻa e leleiʻia ʻia Tēvita, ʻikai te u ʻoatu leva ha fakamatala pea fakahaaʻi atu ia kiate koe? 13 Ka ʻo kapau ʻoku fakataumuʻa ʻa ʻeku tamaí ke fai ha kovi kiate koe, ʻofa ke fai ʻe Sihova kia Sionatane ʻa e meʻa ko iá pea fai ke hulu atu ai kapau ʻe ʻikai ke u fakahaaʻi atu ia kiate koe pea tuku ke ke ʻalu ʻi he fiemālie. ʻOfa ke kau ʻa Sihova mo koe,+ ʻo hangē pē ko ʻene kau mo ʻeku tamaí.+ 14 Pea ʻikai te ke fakahaaʻi mai kiate au ʻa e ʻofa mateaki ʻa Sihová lolotonga ʻa ʻeku moʻuí pea naʻa mo e taimi te u mate aí?+ 15 ʻOua ʻaupito naʻa toʻo hoʻo ʻofa mateakí mei hoku falé,+ naʻa mo e taimi ʻe tafiʻi atu ai ʻe Sihova ʻa e ngaahi fili kotoa ʻo Tēvitá mei he funga ʻo māmaní.” 16 Ko ia naʻe fai ai ʻe Sionatane ha fuakava mo e fale ʻo Tēvitá, ʻo pehē, “ʻE kounaʻi ʻe Sihova ha totongi kapau ʻe maumauʻi ʻa e aleapau ko ení pea te ne fiemaʻu ʻa e ngaahi fili ʻo Tēvitá ke nau fai ha fakamatala.” 17 Ko ia naʻe ʻai ai ʻe Sionatane ke toe fai ʻe Tēvita ha fakapapau ʻi heʻene ʻofa kiate iá, he naʻe ʻofa ʻa Sionatane ʻia Tēvita ʻo hangē pē ko ʻene ʻofa ʻiate iá.+

18 Naʻe pehē ange leva ʻe Sionatane kiate ia: “ʻE māhina foʻou ʻapongipongi,+ pea ʻe fakatokangaʻi ʻa hoʻo pulí, koeʻuhí ʻe ʻatā ho nofoʻangá. 19 ʻI he ʻaho hono tolú, ʻe toe ʻāsili ange ai hono fakatokangaʻi hoʻo pulí, pea kuo pau ke ke ʻalu ki he feituʻu ʻa ia naʻá ke toi ai ʻi he ʻaho* ko eé pea nofo ʻo ofi ki he fuʻu maka ko ení. 20 Te u fanaʻi leva ʻa e foʻi ngahau ʻe tolu ki he tafaʻaki ʻe taha ʻo e fuʻu maká, ʻo hangē ko haʻaku fana ki ha tāketí. 21 ʻI heʻeku fekauʻi ʻa e tamaioʻeikí, te u pehē ange, ‘ʻAlu, ʻo kumi ʻa e ngaahi foʻi ngahaú.’ Kapau te u pehē ki he tamaioʻeikí, ‘Vakai! Ko e ngaahi foʻi ngahaú ʻoku ʻi he tafaʻaki ko eni ʻoʻoú, toʻo mai ia,’ te ke foki mai leva, he ʻoku ou fuakava ʻia Sihova ko e ʻOtua moʻuí, ʻoku ʻuhinga iá ʻe lelei ʻa e meʻa kotoa kiate koe pea ʻoku ʻikai ha fakatuʻutāmaki. 22 Ka ʻo kapau te u pehē ki he tamasiʻí, ‘Vakai! Ko e ngaahi foʻi ngahaú ʻoku kiʻi mamaʻo atu meiate koe,’ te ke ʻalu leva, he kuo tuku koe ʻe Sihova ke ke ʻalu. 23 Ko e meʻa ki he palōmesi kuó ta faí,+ ʻa koe mo aú, ʻofa ke ʻi hota vahaʻá ʻa Sihova ʻo taʻengata.”+

24 Ko ia naʻe toi ʻa Tēvita ʻi he tuʻa koló. ʻI he hoko mai ʻa e māhina foʻoú, naʻe tangutu ʻa e tuʻí ʻi hono nofoʻangá ki he kaí.+ 25 Naʻe tangutu ʻa e tuʻí ʻi hono nofoʻanga anga-mahení ʻi he veʻe holisí. Naʻe hanga atu kiate ia ʻa Sionatane, pea naʻe tangutu ʻa ʻĀpina+ ʻi he tafaʻaki ʻo Saulá, ka naʻe ʻatā ʻa e nofoʻanga ʻo Tēvitá. 26 Naʻe ʻikai ke leaʻaki ʻe Saula ha meʻa ʻi he ʻaho ko iá, he naʻá ne pehē loto pē: ‘Kuo hoko ha meʻa ʻo ʻikai ai te ne maʻa.+ ʻIo, ʻoku pau pē ʻokú ne taʻemaʻa.’ 27 Pea ʻi he ʻaho hili ʻa e māhina foʻoú, ʻi he ʻaho hono uá, naʻe kei ʻatā ai pē ʻa e nofoʻanga ʻo Tēvitá. Pea naʻe pehē ai ʻe Saula kia Sionatane ko hono fohá: “Ko e hā kuo ʻikai ke haʻu ai ʻa e foha ʻo Sesé+ ki he kaí ʻaneafi pe ʻi he ʻahó ni?” 28 Naʻe tali ange ʻe Sionatane kia Saula: “Naʻe kōlenga mai ʻe Tēvita kiate au ke fakaʻatā ia ke ne ʻalu ki Pētelihema.+ 29 Naʻá ne pehē mai, ‘Tuku muʻa au ke u ʻalu, koeʻuhí he ʻoku fai ʻemau feilaulau fakafāmili ʻi he koló, pea ko hoku tokouá tonu naʻá ne fekau mai ke u ʻalu ange. Ko ia kapau ʻokú ke leleiʻia ʻiate au, tuku muʻa ke u kiʻi ʻalu ʻo sio ki hoku fanga tokouá.’ Ko e ʻuhinga ia kuo ʻikai ai te ne haʻu ki he tēpile ʻa e tuʻí.” 30 Naʻe hoko leva ai ʻo ʻita tōlili ʻa Saula ʻia Sionatane, pea naʻá ne pehē ange kiate ia: “ʻA koe ko e tama ʻa ha fefine angatuʻu, ʻokú ke pehē ʻoku ʻikai te u ʻiloʻi ʻokú ke fili ke kau mo e foha ʻo Sesé, ʻo fakamaaʻi ai ʻa koe tonu pea fakamaaʻi ai ʻa hoʻo faʻeé?* 31 Lolotonga ʻa e moʻui ʻa e foha ʻo Sesé ʻi he māmaní, ko koe mo ho tuʻunga-tuʻí ʻe ʻikai ke fokotuʻu maʻu ia.+ Ko ia fekau he taimí ni ha taha ke ʻomi ia kiate au, he kuo pau ke ne mate.”*+

32 Kae kehe, naʻe pehē ʻe Sionatane kia Saula ko ʻene tamaí: “Ko e hā ke tāmateʻi ai iá?+ Ko e hā ʻa e meʻa kuó ne faí?” 33 ʻI he meʻa ko iá naʻe veloʻi atu ʻe Saula ʻa e taó ke tau ʻiate ia,+ ko ia naʻe ʻilo ai ʻe Sionatane naʻe fakapapauʻi ʻe heʻene tamaí ke tāmateʻi ʻa Tēvita.+ 34 Naʻe mālanga hake leva ʻa Sionatane mei he tēpilé ʻokú ne tōtōlili, pea naʻe ʻikai te ne kai ha meʻakai ʻi he ʻaho hono ua hili ʻa e māhina foʻoú, he naʻá ne loto-mamahi koeʻuhi ko Tēvita+ pea kuo fakamaaʻi ʻe heʻene tamaí tonu ʻa Tēvita.

35 ʻI he pongipongi haké naʻe ʻalu atu ai ʻa Sionatane ki he tuʻa koló ki heʻene alea mo Tēvitá, pea naʻe ʻalu mo ia ha tamaioʻeiki kei siʻi.+ 36 Pea naʻá ne pehē ki heʻene tamaioʻeikí: “Lele muʻa ʻo kumi ʻa e ngaahi foʻi ngahau te u fanaʻí.” Naʻe lele ʻa e tamaioʻeikí, pea naʻe fanaʻi ʻe Sionatane ʻa e foʻi ngahaú ʻo kiʻi mamaʻo atu meiate ia. 37 ʻI he aʻu ʻa e tamaioʻeikí ki he feituʻu naʻe fanaʻi ki ai ʻe Sionatane ʻa e foʻi ngahaú, naʻe ui atu ʻa Sionatane ki he tamaioʻeikí: “ʻIkai ʻoku kiʻi mamaʻo atu ʻa e foʻi ngahaú meiate koe?” 38 Naʻe ui atu ʻa Sionatane ki he tamaioʻeikí: “Fakatoʻotoʻo! ʻAlu ke vave! ʻOua ʻe fakatuotuai!” Pea naʻe toʻo hake ʻe he tamaioʻeiki ʻa Sionatané ʻa e ngaahi foʻi ngahaú peá ne foki mai ki hono ʻeikí. 39 Naʻe ʻikai ke mahino ki he tamaioʻeikí ha meʻa ʻo fekauʻaki mo e meʻá ni; ko Sionatane pē mo Tēvita naʻá na ʻilo ʻa hono ʻuhingá. 40 Naʻe ʻoange leva ʻe Sionatane ʻa ʻene naunau taú ki heʻene tamaioʻeikí peá ne tala ange kiate ia: “ʻAlu ʻo ʻave ia ki he koló.”

41 ʻI he mavahe ʻa e tamaioʻeikí, naʻe mālanga hake ʻa Tēvita mei ha feituʻu ofi ai naʻe hanga ki he tongá. Pea naʻá ne tō foʻohifo ki he kelekelé ʻo ne punou tuʻo tolu, pea naʻá na feʻiloaki mo fetāngihi, ka naʻe lahi ange ʻa e tangi ʻa Tēvitá. 42 Naʻe pehē ʻe Sionatane kia Tēvita: “ʻAlu fiemālie, he kuó ta fai ha fuakava+ ʻi he huafa ʻo Sihová ʻo pehē, ‘ʻOfa ke ʻi hota vahaʻá ʻa Sihova pea ke ne ʻi he vahaʻa ʻo ho hakó mo hoku hakó ʻo taʻengata.’”+

Naʻe mālanga hake leva ʻa Tēvita ʻo ne mavahe atu, pea naʻe foki ʻa Sionatane ki he koló.

21 Naʻe aʻu ki mui ai ʻa Tēvita ki Nopi+ kia ʻAhimeleki ko e taulaʻeikí. Naʻe kamata ke tete ʻa ʻAhimeleki ʻi heʻene fetaulaki mo Tēvitá, pea naʻá ne pehē kiate ia: “Ko e hā ʻokú ke haʻu toko taha ai ʻo ʻikai ha taha mo koé?”+ 2 Naʻe tali ange ʻe Tēvita kia ʻAhimeleki ko e taulaʻeikí: “Naʻe fekauʻi au ʻe he tuʻí ke u fai ha meʻa, ka naʻá ne pehē, ‘ʻOua naʻa tuku ke ʻilo ʻe ha taha ha meʻa fekauʻaki mo e ngāue ʻa ia ʻoku ou fekauʻi atu ai koé pea mo e ngaahi fakahinohino kuó u ʻoatu kiate koé.’ Naʻá ku fai ha alea mo ʻeku kau talavoú ke mau fetaulaki ki ha feituʻu. 3 Ko eni kapau ʻoku ʻi ai ha foʻi mā ʻe nima ʻiate koe, ʻomai pē ia kiate au, pe ko e hā pē ha meʻa ʻoku ala maʻú.” 4 Ka naʻe tali ange ʻe he taulaʻeikí kia Tēvita: “ʻOku ʻikai ha mā anga-maheni ʻi heni, ka ʻoku ʻi ai ha mā tapu+—ʻo kapau pē kuo fakaʻehiʻehi ʻa e kau talavoú mei he kakai fefiné.”*+ 5 Naʻe tali ange ʻe Tēvita ki he taulaʻeikí: “Kuo mau fakaʻehiʻehi moʻoni mei he kakai fefiné ʻo hangē pē ko ia ʻi he ngaahi taimi ki muʻá ʻi he taimi naʻá ku ʻalu atu ai ʻi ha feingatau.+ Kapau ʻoku māʻoniʻoni ʻa e sino ʻo e kau talavoú neongo ko e ngāue anga-maheni pē, huanoa ange ai ʻa e pau ke nau māʻoniʻoni ʻi he ʻaho ní!” 6 Ko ia naʻe ʻoange ai ʻe he taulaʻeikí kiate ia ʻa e mā tapú,+ koeʻuhí he naʻe ʻikai ha mā ʻi ai tuku kehe pē ʻa e mā foakí, ʻa ia naʻe toʻo mei he ʻao ʻo Sihová ke fetongiʻaki ʻa e mā foʻou ʻi he ʻaho naʻe toʻo aí.

7 Pea ko e taha ʻo e kau sevāniti ʻa Saulá naʻá ne ʻi ai ʻi he ʻaho ko iá, kuo taʻofi ia ʻi he ʻao ʻo Sihová ʻi he tāpanekalé. Ko hono hingoá ko Toeki+ ko e tangata ʻĪtomi,+ ko e pule ʻo e kau tauhi-sipi ʻa Saulá.

8 Pea naʻe pehē ʻe Tēvita kia ʻAhimeleki: “ʻOku ʻiate koe ha tao pe ko ha heletā? Naʻe ʻikai te u haʻu mo ʻeku heletaá pe ko ʻeku ngaahi meʻataú, koeʻuhí he naʻe fakavavevave ʻa e ngāue naʻe fekauʻi mai ʻe he tuʻí.” 9 ʻI he meʻá ni naʻe pehē ange ʻe he taulaʻeikí: “Ko e heletā ʻa Kolaiate+ ko e Filisitiá, ʻa ia naʻá ke taaʻi ʻi he Teleʻa* ko ʻElá,+ ʻoku ʻi heni, ʻoku kofukofuʻi ʻi ha konga tupenu ʻa ia ʻoku ʻi he tuʻa ʻēfotí.+ Kapau te ke loto ke toʻo ia maʻau, toʻo ia, koeʻuhí he ko e heletā pē ia ʻe taha ʻoku ʻi hení.” Naʻe pehē ange ai ʻe Tēvita: “ʻOku ʻikai ha heletā ʻe tatau mo ia. ʻOmai ia kiate au.”

12 Naʻe tukulotoʻi ʻe Tēvita ʻa e ngaahi leá ni, pea naʻá ne hoko ʻo ilifia lahi+ ʻia ʻĀkisi ko e tuʻi ʻo Katí. 13 Ko ia naʻá ne fakapuliki ʻokú ne ʻatamai lelei+ ʻi honau ʻaó pea fakangalingali sesele lolotonga ʻene ʻiate kinautolú.* Naʻá ne takohikohi ʻi he ngaahi matapā ʻo e ʻaá pea tuku ke tafe ʻa hono fāvaí ki hono kavá. 14 Faifai atu pē naʻe pehē ange ʻe ʻĀkisi ki heʻene kau sevānití: “Mou sio atu ko e tangatá ni ʻoku fakasesele! Ko e hā ʻoku mou ʻomi ai ia kiate aú? 15 ʻOku tokosiʻi koā ʻa ʻeku kau tangata seselé ke u fiemaʻu ai ʻa e tokotahá ni ke fai mai ʻene tōʻonga fakaseselé ʻi hoku ʻaó? ʻOku totonu koā ke hū mai ʻa e tangatá ni ki hoku falé?”

22 Ko ia naʻe ʻalu ʻa Tēvita mei ai,+ ʻo ne hola ki he ʻana ʻi ʻAtulamí.+ ʻI he fanongo ai ʻa hono fanga tokouá mo e fale kotoa ʻo ʻene tamaí, naʻa nau ʻalu hifo kiate ia ki ai. 2 Pea ko e faʻahinga kotoa ko ia naʻe faingataʻaʻia pea ʻi ai honau moʻua pea naʻa nau mamahí naʻa nau fakatahataha kiate ia, pea naʻá ne hoko ko honau ʻeiki. Naʻe ʻiate ia ha kau tangata nai ʻe toko 400.

3 Ki mui ai, naʻe ʻalu ʻa Tēvita mei ai ki Misipā ʻi Mōapé peá ne pehē ki he tuʻi ʻo Mōapé:+ “Tuku muʻa ke nofo mo kimoutolu ʻa ʻeku tamaí mo ʻeku faʻeé kae ʻoua ke u ʻiloʻi ʻa e meʻa ʻe fai ʻe he ʻOtuá maʻakú.” 4 Ko ia naʻá ne tuku kinaua ʻi he tuʻi ʻo Mōapé, pea naʻá na nofo mo ia ʻi he taimi kotoa naʻe ʻi he toitoiʻangá+ ai ʻa Tēvitá.

5 ʻI he faai atu ʻa e taimí naʻe pehē ʻe Kata+ ko e palōfitá kia Tēvita: “ʻOua te ke nofo ʻi he toitoiʻangá. ʻAlu mei ai ki he fonua ko Siutá.”+ Ko ia naʻe mavahe ʻa Tēvita ʻo ne ʻalu ki he vaotā ʻo Hāletí.

6 Naʻe fanongo ʻa Saula kuo ʻiloʻi ʻa Tēvita mo e kau tangata naʻe ʻiate iá. Naʻe tangutu ʻi he taimi ko iá ʻa Saula ʻi he lalo tamalisi ʻi ha foʻi māʻolunga ʻi Kīpea+ ʻokú ne toʻo ʻene taó ʻi hono nimá, pea ko ʻene kau sevānití kotoa naʻa nau nofo takatakai ʻiate ia. 7 Naʻe pehē ange leva ʻe Saula ki heʻene kau sevāniti naʻe nofo takatakai ʻiate iá: “Fanongo mai muʻa, ʻa kimoutolu haʻa Penisimani. ʻE toe foaki koā ʻe he foha ʻo Sesé+ ha ngaahi kelekele mo e ngoue kālepi kiate kimoutolu kotoa? Te ne fakanofo koā kimoutolu kotoa ke mou hoko ko e ngaahi ʻeiki ʻo e ngaahi toko afe mo e ngaahi ʻeiki ʻo e ngaahi toko teau?+ 8 Ko kimoutolu kotoa kuo mou faʻufaʻu ha kovi kiate au! Naʻe ʻikai fakahā mai ʻe ha taha kiate au ʻa e taimi naʻe fai ai ʻe hoku fohá tonu ha fuakava mo e foha ʻo Sesé!+ ʻOku ʻikai ha taha ʻiate kimoutolu te ne ongoʻi ʻofa ʻiate au, pea fakahā mai kiate au kuo fakaʻaiʻai ʻe hoku fohá tonu ʻa ʻeku sevāniti ʻaʻakú ke ne faʻufaʻu ha kovi kiate au, ʻo hangē ko ia ʻoku hoko he taimi ní.”

9 Naʻe tali+ mai leva ʻe Toeki+ ko e tangata ʻĪtomí, ʻa ia naʻe ʻi ai ʻo ne pule ki he kau sevāniti ʻa Saulá: “Naʻá ku sio ki he foha ʻo Sesé ʻi heʻene haʻu ki Nopi kia ʻAhimeleki ko e foha ʻo ʻAhitupí.+ 10 Pea naʻá ne kumi ki ha tataki ʻa Sihova maʻa Tēvita peá ne ʻoange kiate ia ha meʻakai. Naʻe aʻu ʻo ne ʻoange kiate ia ʻa e heletā ʻa Kolaiate ko e Filisitiá.”+ 11 ʻI he taimi pē ko iá naʻe fekau ai ʻe he tuʻí ke ʻomai ʻa ʻAhimeleki ko e foha ʻo ʻAhitupi ko e taulaʻeikí pea mo e kau taulaʻeiki kotoa ʻo e fale ʻo ʻene tamaí, ʻa ia naʻa nau ʻi Nopí. Ko ia ko kinautolu kotoa naʻa nau haʻu ki he tuʻí.

12 Pea naʻe pehē ʻe Saula: “Fanongo mai muʻa, ʻa koe ko e foha ʻo ʻAhitupí!” Naʻá ne tali ange: “Ko au eni, ʻe hoku ʻeiki.” 13 Naʻe pehē ange ʻe Saula kiate ia: “Ko e hā kuó mo faʻufaʻu ai ha kovi kiate aú, ʻa koe pea mo e foha ʻo Sesé, ʻi hono ʻoange kiate ia ha mā pea mo ha heletā pea ʻi hono fai ha kumi ki he tataki ʻa e ʻOtuá maʻaná? ʻOkú ne fakafepakiʻi au pea faʻufaʻu ha kovi kiate au, ʻo hangē ko ia ʻoku lolotonga hokó.” 14 ʻI he meʻá ni naʻe tali ange ʻe ʻAhimeleki ki he tuʻí: “Ko hai ia ʻi hoʻo kau sevānití kotoa ʻoku falalaʻanga* ʻo hangē ko Tēvitá?+ Ko ia ʻa e foha-ʻi-he-fono ʻo e tuʻí+ pea ko ha ʻeiki ia ki hoʻo kau kaʻaté pea kuo fakalāngilangiʻi ia ʻi ho falé.+ 15 Ko e ʻahó ni koā ʻa e ʻuluaki taimi kuó u kumi ai ki he tataki ʻa e ʻOtuá maʻaná?+ Mole ke mamaʻo haʻaku faʻufaʻu ha kovi ke fai kiate koe! ʻOua muʻa naʻa houhau mai ʻa e tuʻí ki heʻene sevānití pea ki he fale kotoa ʻo ʻeku tamaí, he naʻe ʻikai ke ʻilo ʻe hoʻo sevānití ha momoʻi meʻa ʻo fekauʻaki mo e meʻá ni.”+

16 Ka naʻe pehē ʻe he tuʻí: “Kuo pau ke ke mate+ ʻAhimeleki, ʻa koe fakataha mo e kotoa ʻo e fale ʻa hoʻo tamaí.”+ 17 Ko ia naʻe pehē atu ai ʻe he tuʻí ki he kau kaʻate* naʻe nofo takatakai kiate iá: “Mou hanga atu ʻo tāmateʻi ʻa e kau taulaʻeiki ʻa Sihová, koeʻuhí kuo nau kau mo Tēvita! Naʻa nau ʻosi ʻilo pē ko ha tokotaha hola ia, pea naʻe ʻikai te nau fakahā mai ia kiate au!” Ka naʻe ʻikai ke loto ʻa e kau sevāniti ʻa e tuʻí ke hiki honau nimá ke ʻohofi ʻa e kau taulaʻeiki ʻa Sihová. 18 Naʻe pehē atu leva ʻe he tuʻí kia Toeki:+ “Hanga atu koe ʻo ʻohofi ʻa e kau taulaʻeikí!” ʻI he taimi pē ko iá naʻe ʻalu atu ʻa Toeki ko e tangata ʻĪtomí+ ʻo ne ʻohofi ʻa e kau taulaʻeikí. Naʻá ne tāmateʻi ʻi he ʻaho ko iá ʻa e kau tangata ʻe toko 85 ʻa ia naʻa nau tui ʻa e ʻēfoti līnení.+ 19 Naʻá ne taaʻi foki mo Nopi,+ ʻa e kolo ʻo e kau taulaʻeikí, ʻaki ʻa e heletaá; ʻa e tangata pea pehē ki he fefine, ʻa e fānau pea pehē ki he valevale, ʻa e pulu, ʻasi, pea mo e sipi, naʻá ne tāmateʻi ʻaki ʻa e heletaá.

20 Kae kehe, naʻe hao ha foha ʻe taha ʻo ʻAhimeleki ko e foha ʻo ʻAhitupí, ʻa ia ko hono hingoá ko ʻĀpaiata,+ ʻo ne hola ʻo muimui ʻia Tēvita. 21 Naʻe tala ange ʻe ʻĀpaiata kia Tēvita: “Kuo tāmateʻi ʻe Saula ʻa e kau taulaʻeiki ʻa Sihová.” 22 ʻI he meʻá ni naʻe pehē ai ʻe Tēvita kia ʻĀpaiata: “Naʻá ku ʻosi ʻilo ʻi he ʻaho ko iá,+ ʻi he ʻi ai ʻa Toeki ko e tangata ʻĪtomí, ʻe pau ke ne tala ia kia Saula. ʻOku ou kaunga tonu ki he mate ʻa e tokotaha kotoa ʻi he fale ʻo hoʻo tamaí. 23 Nofo koe mo au. ʻOua ʻe ilifia, he ʻilonga ʻa ia ʻokú ne kumi ki hoʻo moʻuí ʻokú ne kumi ki heʻeku moʻuí; ʻokú ke ʻi hoku malumalú ke u maluʻi koe.”+

23 Faifai atu pē naʻe tala kia Tēvita: “Ko e kau Filisitiá ē ʻoku nau tauʻi ʻa Kiʻila,+ pea ʻoku nau ʻohofi ʻa e ngaahi ʻauʻauʻanga uité.” 2 Ko ia naʻe fehuʻi ʻa Tēvita kia Sihova:+ “Te u ʻalu ʻo taaʻi ʻa e kau Filisitia ko ení?” Naʻe folofola ʻa Sihova kia Tēvita: “ʻAlu ʻo taaʻi ʻa e kau Filisitiá pea fakahaofi ʻa Kiʻila.” 3 Ka naʻe pehē ange ʻe he kau tangata ʻa Tēvitá kiate ia: “Vakai! ʻOku mau ilifia pē lolotonga ʻemau ʻi heni ʻi Siutá;+ huanoa ai kapau te mau ʻalu ki Kiʻila ʻo tauʻi ʻa e kau tau ʻa e kau Filisitiá!”+ 4 Ko ia naʻe toe fai ʻe Tēvita ha fehuʻi kia Sihova.+ Naʻe tali ange leva ʻe Sihova kiate ia: “Tuʻu hake; ʻalu hifo ki Kiʻila koeʻuhí he te u tuku atu ʻa e kau Filisitiá ki ho nimá.”+ 5 Ko ia naʻe ʻalu ʻa Tēvita mo ʻene kau tangatá ki Kiʻila ʻo nau tauʻi ʻa e kau Filisitiá; naʻá ne ʻave ʻenau fanga manú pea taaʻi kinautolu ʻi ha tāmate lahi, pea naʻe fakahaofi ʻe Tēvita ʻa e kakai ʻo Kiʻilá.+

6 Pea ʻi he taimi naʻe hola ai ʻa ʻĀpaiata+ ko e foha ʻo ʻAhimelekí kia Tēvita ki Kiʻilá, naʻe ʻiate ia ha ʻēfoti. 7 Naʻe fakahā kia Saula: “Kuo haʻu ʻa Tēvita ki Kiʻila.” Naʻe pehē ange leva ʻe Saula: “Ko e ʻOtuá kuó ne tuku mai ia kiate au,*+ he kuó ne ʻai ia ke ne fihia ʻi heʻene hū ki ha kolo ʻoku ʻi ai hono ngaahi matapā mo e ngaahi meʻa fakamaʻu.” 8 Ko ia naʻe ui ʻe Saula ʻa e kakaí kotoa ki he taú, ke nau ʻalu hifo ki Kiʻila ʻo ʻākoloʻi ʻa Tēvita mo ʻene kau tangatá. 9 ʻI he ʻilo ʻe Tēvita naʻe faʻufaʻu ʻa Saula ke fai ha kovi kiate iá, naʻá ne pehē kia ʻĀpaiata ko e taulaʻeikí: “ʻOmi ʻa e ʻēfotí ki heni.”+ 10 Naʻe pehē leva ʻe Tēvita: “ʻE Sihova ko e ʻOtua ʻo ʻIsilelí, kuo fanongo moʻoni ʻa hoʻo sevānití ʻoku palani ʻa Saula ke haʻu ki Kiʻila ke fakaʻauha ʻa e koló koeʻuhí ko au.+ 11 ʻE tuku ange atu au ʻe he kau taki* ʻo Kiʻilá ki hono nimá? ʻE ʻalu hifo koā ʻa Saula ʻo hangē ko e meʻa kuo fanongo ai ʻa hoʻo sevānití? ʻE Sihova ko e ʻOtua ʻo ʻIsilelí, fakamolemole muʻa ʻo tala mai ki hoʻo sevānití.” ʻI he meʻá ni naʻe folofola ʻa Sihova: “Te ne ʻalu hifo.” 12 Naʻe ʻeke ʻe Tēvita: “ʻE tuku ange atu au mo ʻeku kau tangatá ʻe he kau taki ʻo Kiʻilá ki he nima ʻo Saulá?” Naʻe tali ange ʻe Sihova: “Te nau tuku ange atu kimoutolu.”

13 ʻI he taimi pē ko iá naʻe tuʻu hake ʻa Tēvita mo ʻene kau tangatá, ko e toko 600+ nai ʻo nau mavahe mei Kiʻila pea nau hiki holo ʻi ha feituʻu pē naʻe malava ke nau ʻalu ki ai. ʻI hono fakahā kia Saula kuo hola ʻa Tēvita mei Kiʻilá, naʻe ʻikai te ne toe tuli kiate ia. 14 Naʻe nofo ʻa Tēvita ʻi he toafá ʻi ha ngaahi feituʻu naʻe faingataʻa ʻa e aʻu ki aí, ʻi he feituʻu moʻungaʻia ʻo e toafa ʻo Sifiá.+ Naʻe kumi maʻu pē ʻa Saula kiate ia,+ ka naʻe ʻikai ke tuku ia ʻe Sihova ki hono nimá. 15 Naʻe lāuʻilo ʻa Tēvita* kuo ʻalu atu ʻa Saula ke kumi ki heʻene moʻuí lolotonga ia ʻa ʻene ʻi he toafa ʻo Sifiá ʻi Hōlesi.

16 Naʻe ʻalu atu leva ʻa Sionatane ko e foha ʻo Saulá kia Tēvita ki Hōlesi, pea naʻá ne tokoni kiate ia ke ne maʻu ha mālohi* ʻia Sihova.+ 17 Naʻá ne pehē kiate ia: “ʻOua ʻe ilifia, koeʻuhí heʻikai ke maʻu koe ʻe heʻeku tamai ko Saulá; te ke hoko koe ko e tuʻi ki ʻIsileli,+ pea te u fika ua au kiate koe; pea ko ʻeku tamai ko Saulá ʻokú ne ʻiloʻi foki ia.”+ 18 Pea naʻá na fai ha fuakava+ ʻi he ʻao ʻo Sihová, pea naʻe nofo ʻa Tēvita ʻi Hōlesi, pea ko Sionatane naʻá ne foki ki hono ʻapí.

19 Ki mui ai naʻe ʻalu hake ʻa e kau tangata ʻo Sifiá kia Saula ki Kīpea+ ʻo nau pehē: “ʻIkai ʻoku toi ʻa Tēvita ʻo ofi mai kiate kimautolu+ ʻi he ngaahi feituʻu ʻoku faingataʻa ʻa e aʻu ki aí ʻi Hōlesi,+ ʻi he foʻi māʻolunga ko Hakilá,+ ʻa ia ʻoku tuʻu ʻi he tafaʻaki fakatonga* ʻo Sesimoní?*+ 20 Ko fē pē ʻa e taimi ʻe lelei ai kiate koe ke ke ʻalu hifó, ʻe hoʻo ʻAfio, peá ke haʻu, pea te mau tuku ange atu ia ki he nima ʻo e tuʻí.”+ 21 ʻI he meʻá ni naʻe pehē ʻe Saula: “ʻOfa ke faitāpuekina kimoutolu ʻe Sihova, he kuo mou fakahāhā ʻa e manavaʻofa kiate au. 22 Mou ʻalu muʻa pea feinga ke ʻilo ʻa e feituʻu tofu pē ʻokú ne ʻi aí pea ko hai naʻe sio kiate ia ʻi aí, he kuo fakahā mai kiate au ʻokú ne olopoto ʻaupito. 23 Fakapapauʻi fakalelei ʻa e ngaahi feituʻu kotoa pē ʻokú ne toi aí pea mou foki mai kiate au mo ha fakamoʻoni pau. Pea te u toki ʻalu leva mo kimoutolu, pea kapau ʻokú ne ʻi he fonuá, te u kumi kiate ia ʻi he lotolotonga ʻo e ngaahi toko afe* ʻo Siutá.”

24 Ko ia naʻa nau mavahe ʻo nau muʻomuʻa ʻia Saula ki Sifia,+ lolotonga ia ko Tēvita mo ʻene kau tangatá naʻa nau ʻi he toafa ʻo Māoní,+ ʻi he ʻAlapá+ ki he tafaʻaki fakatonga ʻo Sesimoní. 25 Pea naʻe ʻalu atu ʻa Saula mo ʻene kau tangatá ke kumi kiate ia.+ ʻI hono fakahā ia kia Tēvitá, naʻá ne ʻalu hifo ʻi he taimi pē ko iá ki he fuʻu maká+ ʻo ne nofo ʻi he toafa ʻo Māoní. ʻI he fanongo ʻa Saula ki he meʻá ni, naʻá ne tuli atu kia Tēvita ki he toafa ʻo Māoní. 26 ʻI he aʻu atu ʻa Saula ki he tafaʻaki ʻe taha ʻo e moʻungá, naʻe ʻi he tafaʻaki ʻe taha ʻo e moʻungá ʻa Tēvita ia mo ʻene kau tangatá. Naʻe fakavave ʻa Tēvita ke hola+ meia Saula, ka ko Saula mo ʻene kau tangatá naʻa nau fakaofi atu kia Tēvita mo ʻene kau tangatá ke puke kinautolu.+ 27 Ka naʻe haʻu ha talafekau kia Saula, ʻo ne pehē: “Haʻu ke vave, he kuo ʻohofi ʻe he kau Filisitiá ʻa e fonuá!” 28 Ko ia naʻe tuku ai ʻe Saula ʻene tuli kia Tēvitá+ peá ne ʻalu atu ke fehangahangai mo e kau Filisitiá. Ko e ʻuhinga ia naʻe ui ai ʻa e feituʻu ko iá ko e Fuʻu Maka ʻo e Mavahevahé.

29 Naʻe ʻalu hake leva ʻa Tēvita mei ai ʻo ne nofo ʻi he ngaahi feituʻu naʻe faingataʻa ʻa e aʻu ki aí ʻi ʻEni-keti.+

24 ʻI he foki mai pē ʻa Saula mei heʻene tuli ki he kau Filisitiá, naʻa nau tala ange kiate ia: “Vakai! Ko Tēvita ē ʻoku ʻi he toafa ʻEni-ketí.”+

2 Ko ia naʻe ʻave ʻe Saula ha kau tangata ʻe toko 3,000 kuo fili mei he kotoa ʻo ʻIsilelí pea nau ʻalu ke kumi kia Tēvita mo ʻene kau tangatá ʻi he ngaahi lilifa makaʻia ʻo e fanga kosi nofo moʻungá. 3 Naʻe aʻu atu ʻa Saula ki he ngaahi ʻā maka ʻo e fanga sipí ʻi he veʻehalá, ʻa ia naʻe ʻi ai ha ʻana, peá ne hū atu ki ai ke ʻalu ki tuaʻā lolotonga ia naʻe tangutu ʻa Tēvita mo ʻene kau tangatá ʻi he tafatafaʻaki he muiʻi ʻaná.+ 4 Naʻe pehē ange ʻe he kau tangata ʻa Tēvitá kiate ia: “Ko e ʻaho eni ʻa ia ʻoku folofola atu ai ʻa Sihova kiate koe, ‘Vakai! ʻOku ou tuku atu ho filí ki ho nimá,+ pea ʻe lava ke ke fai kiate ia ha meʻa pē ʻe hā lelei kiate koé.’” Ko ia naʻe mālanga hake ʻa Tēvita ʻo ne tuʻusi fakaoloolo ʻa e kapa ʻo e kofu tōtōlofa ʻo Saulá. 5 Ka ʻi he hili iá naʻe hanganaki fakahalaiaʻi ʻa Tēvita ʻe hono lotó*+ koeʻuhí ko ʻene tuʻusi ʻa e kapa ʻo e kofu tōtōlofa ʻo Saulá. 6 Naʻá ne pehē ange ki heʻene kau tangatá: “Hangē ko e vakai ʻa Sihová, ʻe mole ke mamaʻo haʻaku fai ha meʻa pehē ki hoku ʻeikí, ʻa e pani ʻa Sihová, ʻaki hono hiki ʻa hoku nimá kiate ia, he ko e pani ia ʻa Sihova.”+ 7 Ko ia ʻi he ngaahi leá ni naʻe taʻofi ai ʻe Tēvita* ʻa ʻene kau tangatá, pea naʻe ʻikai te ne fakaʻatā kinautolu ke nau ʻohofi ʻa Saula. Ka ko Saula, naʻá ne mālanga hake mei he ʻaná ʻo hoko atu ʻa ʻene fonongá.

8 Naʻe tuʻu hake leva ʻa Tēvita ʻo ʻalu atu mei he ʻaná peá ne ui atu kia Saula: “ʻE hoku ʻeiki ko e tuʻí!”+ ʻI he sio mai ʻa Saula ki muí, naʻe punou ʻa Tēvita ʻo hanga ki he kelekelé peá ne fakatōmapeʻe. 9 Naʻe pehē ange ʻe Tēvita kia Saula: “Ko e hā ʻokú ke fanongo ai ki he lea ʻa e kau tangata ʻa ia ʻoku nau pehē, ‘Vakai! ʻOku feinga ʻa Tēvita ke fai ha kovi kiate koe’?+ 10 ʻI he ʻaho tofu pē ko ení kuo mātā tonu ai ʻe ho matá ʻa hono tuku mai koe ʻe Sihova ki hoku nimá ʻi he ʻaná. Ka ʻi he pehē mai ʻe ha tokotaha ke tāmateʻi koé,+ naʻá ku fakaʻofaʻia ʻiate koe peá u pehē, ‘ʻE ʻikai hiki ʻa hoku nimá ki hoku ʻeikí, he ko e pani ia ʻa Sihova.’+ 11 Pea vakai, ʻa ʻeku tamai, ʻio, sio mai ki he kapa ʻo ho kofu tōtōlofá ʻa ia ʻoku ou toʻó; he ʻi he taimi naʻá ku tuʻusi ai ʻa e kapa ʻo ho kofu tōtōlofá, naʻe ʻikai te u tāmateʻi koe. ʻE lava ke ke sio he taimí ni pea mahino kiate koe ʻoku ʻikai te u palani ke fai ha kovi pe angatuʻu kiate koe, pea kuo ʻikai te u fai ha angahala kiate koe,+ lolotonga ia ʻokú ke tuli ʻe koe au ke toʻo ʻa ʻeku moʻuí.+ 12 ʻOfa ke fakamaau ʻa Sihova ʻi hota vahaʻá,+ pea ʻofa ke faisāuni ʻa Sihova kiate koe maʻaku,+ ka ʻe ʻikai ala ʻa hoku nimá kiate koe.+ 13 Hangē pē ko e lau ʻa e palōveepi ʻi he kuonga muʻá, ‘ʻOku haʻu mei he fulikivanú ʻa e fulikivanu,’ ka ʻe ʻikai ala ʻa hoku nimá kiate koe. 14 Ko e ʻalu atu ʻa e tuʻi ʻo ʻIsilelí kia hai? Ko hai ʻokú ke tulí? Ko ha kulī mate? Ko ha kiʻi kutufisi?+ 15 ʻOfa ke hoko ʻa Sihova ko e fakamaau, pea te ne fakamaau ʻi hota vahaʻá, pea te ne vakai pea taukapoʻi au+ pea fakamāuʻi au pea fakahaofi au mei ho nimá.”

16 ʻI he mōmeniti naʻe ʻosi ai hono leaʻaki ʻe Tēvita ʻa e ngaahi leá ni kiate iá, naʻe pehē ʻe Saula: “Ko ho leʻó eni, ʻe Tēvita ʻa hoku foha?”+ Pea naʻe kamata ke tangi leʻo-lahi ʻa Saula. 17 Naʻá ne pehē kia Tēvita: “ʻOkú ke māʻoniʻoni ange koe ʻiate au, he kuó ke failelei kiate au pea kuó u totongi ʻaki ia ʻa e kovi kiate koe.+ 18 ʻIo, ʻi he ʻahó ni kuó ke tala mai ai kiate au ʻa e lelei naʻá ke faí ʻi he ʻikai te ke tāmateʻi au ʻi hono tuku ange atu au ʻe Sihova ki ho nimá.+ 19 He ko hai ia ha tangata ʻokú ne maʻu ʻa hono filí pea tuku ange ke ne ʻalu ʻo ʻikai fai ha kovi kiate ia? ʻE totongiʻaki ha lelei kiate koe+ ʻe Sihova koeʻuhí ko e meʻa kuó ke fai kiate au he ʻaho ní. 20 Pea ko eni vakai, ʻoku ou ʻiloʻi ko e moʻoni te ke pule ko e tuʻi+ pea ʻe tuʻuloa ʻi ho nimá ʻa e puleʻanga ʻo ʻIsilelí. 21 Ko eni ke ke fai mai ha fakapapau kiate au ʻia Sihova+ ʻe ʻikai te ke tafiʻi ʻa hoku hako ʻamuí pea ʻe ʻikai te ke fakaʻauha ʻosi ʻa hoku hingoá mei he fale ʻo ʻeku tamaí.”+ 22 Ko ia naʻe fai ai ʻe Tēvita ha fakapapau kia Saula, ʻi he hili iá naʻe ʻalu ʻa Saula ki hono ʻapí.+ Ka naʻe ʻalu hake ʻa Tēvita mo ʻene kau tangatá ki he toitoiʻangá.+

25 ʻI he faai mai ʻa e taimí naʻe mate ʻa Sāmiuela;+ pea naʻe fakatahataha mai ʻa ʻIsileli kotoa ke tengihia ia pea ke tanu ia ʻi hono ʻapí ʻi Lama.+ Naʻe mālanga hake leva ʻa Tēvita ʻo ʻalu hifo ki he toafa Pēlaná.

2 Pea naʻe ʻi ai ha tangata ʻi Māoni+ ʻa ia naʻe ngāue ʻi Kāmeli.*+ Naʻe tuʻumālie ʻaupito ʻa e tangatá; naʻá ne maʻu ha fanga sipi ʻe 3,000 mo e fanga kosi ʻe 1,000, pea naʻá ne kosi ʻene fanga sipí ʻi he taimi ko iá ʻi Kāmeli. 3 Ko e hingoa ʻo e tangatá ko Nāpale,+ pea ko e hingoa ʻo hono uaifí ko ʻApikale.+ Ko e uaifí naʻe ʻiloʻilo mo hoihoifua, ka ko e husepānití, ko ha tangata mei he fāmili ʻo Kēlepí,+ naʻe anga-fefeka, pea naʻá ne ʻulungaanga kovi.+ 4 Naʻe fanongo ʻa Tēvita ʻi he toafá ʻoku kosi ʻe Nāpale ʻene fanga sipí. 5 Ko ia naʻe fekauʻi atu ʻe Tēvita ha kau talavou ʻe toko hongofulu kiate ia, pea naʻe tala ange ʻe Tēvita kiate kinautolu: “Mou ʻalu hake ki Kāmeli, pea ʻi hoʻomou aʻu kia Nāpalé, ʻeke kiate ia ʻi hoku hingoá pe ʻokú ne fēfē. 6 Pea mou pehē leva, ‘ʻOfa ke ke moʻui fuoloa pea ʻofa ke ke lakalakaimonū* pea ʻofa ke lakalakaimonū ho falé pea ʻofa ke lakalakaimonū ʻa e meʻa kotoa ʻokú ke maʻú. 7 Ko eni ʻoku ou fanongo ai ʻoku fai hoʻo kosi sipi. ʻI he taimi naʻe ʻiate kimautolu ai hoʻo kau tauhi-sipí, naʻe ʻikai te mau fai ha kovi kiate kinautolu,+ pea naʻe ʻikai ha meʻa ʻe taha ne mole meiate kinautolu ʻi he taimi kotoa naʻa nau ʻi Kāmeli aí. 8 ʻEke ange ki hoʻo kau talavoú, pea te nau tala atu kiate koe. ʻOfa ke ke leleiʻia ʻi heʻeku kau talavoú, koeʻuhí kuo mau aʻu mai ʻi ha taimi fakafiefia.* Kātaki muʻa ʻo ʻomai ki hoʻo kau sevānití pea ki ho foha ko Tēvitá ha meʻa pē ʻe lava ke ke foaki.’”+

9 Ko ia naʻe ʻalu ʻa e kau talavou ʻa Tēvitá ʻo tala ʻa e meʻa kotoa ko ení kia Nāpale ʻi he hingoa ʻo Tēvitá. ʻI he ʻosi ʻenau leá, 10 naʻe tali ange ʻe Nāpale ki he kau sevāniti ʻa Tēvitá: “Ko hai ʻa Tēvita, pea ko hai ʻa e foha ʻo Sesé? ʻI he ngaahi ʻahó ni ʻoku hola ai ʻa e kau sevāniti tokolahi mei honau kau pulé.+ 11 ʻE pau koā ke u toʻo ʻeku maá mo ʻeku vaí mo e kakanoʻi-manu naʻá ku fahi ki heʻeku kau tangata kosí pea foaki ia ki he kau tangata ʻoku ʻikai ʻilo pe ko ʻenau haʻú mei fē?”

12 Ko ia naʻe foki ai ʻa e kau talavou ʻa Tēvitá ʻo fakahā ʻa e ngaahi leá ni kotoa kiate ia. 13 Naʻe pehē ʻe Tēvita ʻi he taimi pē ko iá ki heʻene kau tangatá: “Ke haʻi ʻe he tokotaha kotoa ʻa ʻene heletā!”+ Ko ia naʻa nau haʻi kotoa ʻa ʻenau heletaá, pea naʻe haʻi foki ʻe Tēvita ʻa ʻene heletā ʻaʻaná, pea ko e kau tangata ʻe toko 400 nai naʻa nau ʻalu hake mo Tēvitá, lolotonga ia naʻe nofo ʻa e kau tangata ʻe toko 200 mo ʻenau ʻū meʻá.

14 Lolotonga ení, naʻe fakahā ʻe ha taha ʻo e kau sevānití kia ʻApikale, ko e uaifi ʻo Nāpalé: “Vakai! Naʻe fekau mai ʻe Tēvita ʻa e kau talafekau mei he toafá ke talamonū ki homau pulé, ka naʻá ne kaikaila ʻo ngāhiʻi kinautolu.+ 15 Ko e kau tangata ko iá naʻa nau anga-lelei ʻaupito kiate kimautolu. Naʻe ʻikai ʻaupito te nau fai ha kovi kiate kimautolu, pea naʻe ʻikai mole ha meʻa ʻe taha meiate kimautolu ʻi he taimi kotoa naʻa mau nofo ai mo kinautolu ʻi he vaó.+ 16 Naʻa nau hangē ha ʻā maluʻi takatakai ʻiate kimautolú, fakatouʻosi ʻi he poʻuli pea mo e ʻaho, ʻi he taimi kotoa naʻa mau ʻiate kinautolu ai ʻo tauhi ʻa e tākangá. 17 Ko eni, ke ke fakapapauʻi ʻa e meʻa te ke faí, he kuo pau ke hoko mai ʻa e fakatamaki ki homau pulé pea ki he kotoa ʻo hono falé,+ pea ko e tangata ko iá ko e koto taʻeʻaonga+ he ʻoku ʻikai lava ke lea ha taha kiate ia.”

18 Ko ia naʻe toʻo fakavave ʻe ʻApikale+ ʻa e foʻi mā ʻe 200, ko e siā uaine lalahi ʻe ua, sipi ʻe nima kuo ʻosi ngaahi, fua sia* ʻe nima ʻo e uite tunu, takaonga fuamelie* ʻe 100, mo e takaonga fiki* ʻe 200 pea fakaheka kotoa ia ʻi ha fanga ʻasi.+ 19 Naʻá ne pehē leva ki heʻene kau sevānití: “Mou muʻomuʻa ʻiate au; te u muimui atu ʻiate kimoutolu.” Ka naʻe ʻikai te ne tala ha meʻa ki hono husepāniti ko Nāpalé.

20 Lolotonga ʻene heka ʻi he ʻasí ʻo ne ʻalu hifo ʻo puli ʻi he moʻungá, ko e taimi tofu pē ia naʻe ʻalu hifo ai ʻa Tēvita mo ʻene kau tangatá kiate ia, pea naʻá ne fetaulaki ai mo kinautolu. 21 Pea naʻe ʻosi pehē ʻe Tēvita: “Kuo taʻeʻaonga ʻa ʻeku leʻohi ʻa e meʻa kotoa pē ʻoku ʻa e tangatá ni ʻi he toafá. Naʻe ʻikai mole haʻane meʻa ʻe taha,+ ka neongo ia ʻokú ne totongi mai ʻaki ʻa e kovi kiate au.+ 22 ʻOfa ke fai ʻe he ʻOtuá ki he ngaahi fili ʻo Tēvitá* ʻa e meʻa tatau pea hulu atu ai ʻo kapau te u tuku ke hao ha taha ʻo ʻene kau tangatá* ʻo aʻu ki he pongipongí.”

23 ʻI he sio atu pē ʻa ʻApikale kia Tēvitá, naʻá ne hifo fakavave mei he ʻasí ʻo ne tō foʻohifo ʻi muʻa ʻia Tēvita, ʻo punou ki he kelekelé. 24 Pea naʻá ne tō atu ʻi hono veʻe vaʻé ʻo ne pehē: “ʻE hoku ʻeiki, tukuakiʻi pē muʻa au; tuku ke lea atu kiate koe ʻa hoʻo kaunangá, peá ke fanongo muʻa ki he ngaahi lea ʻa hoʻo kaunangá. 25 ʻOua muʻa naʻa tuku ke tokanga ʻa hoku ʻeikí ki he koto taʻeʻaonga ko eni ko Nāpalé,+ he ʻokú ne hangē tofu pē ko hono hingoá. Ko Nāpale* ʻa hono hingoá, pea ʻoku nofoʻia ia ʻe he valé. Ka ko au, ʻa hoʻo kaunangá, naʻe ʻikai te u sio ki he kau talavou ʻa hoku ʻeikí ʻa ia naʻá ke fekauʻi maí. 26 Pea ko eni, ʻe hoku ʻeiki, ʻoku ou fuakava ʻia Sihova ko e ʻOtua moʻuí pea ʻiate koe, ko Sihova ia kuó ne taʻofi koe+ mei hono ʻai ke hoko ha halaia ʻi he totó+ pea mei he faisāuni ʻaki ho nima ʻoʻoú. ʻOfa ke hoko ʻo hangē ko Nāpalé ʻa ho ngaahi filí mo e faʻahinga kotoa ʻoku nau feinga ke hoko ha kovi ki hoku ʻeikí. 27 Pea tuku ke ʻoatu ʻa e meʻaʻofa*+ ko eni kuo ʻomi ʻe hoʻo kaunangá ki hoku ʻeikí ki he kau talavou ʻoku nau muimui ʻi hoku ʻeikí.+ 28 Fakamolemoleʻi ange muʻa ʻa e laka hala ʻa hoʻo kaunangá, he ʻe mātuʻaki ʻai ʻe Sihova ke tuʻuloa ʻa e fale+ ʻa hoku ʻeikí, koeʻuhí he ʻoku fai ʻe hoku ʻeikí ʻa e ngaahi tau ʻa Sihová,+ pea kuo ʻikai ʻilo ha kovi ʻiate koe ʻi he kotoa ho ngaahi ʻahó.+ 29 ʻI he tuʻu hake ha taha ke tuli kiate koe pea kumi ki hoʻo moʻuí, ko Sihova ko ho ʻOtuá te ne maluʻi koe ʻo hangē tofu pē ko hano maluʻi ʻe ha taha ha ngaahi meʻa mahuʻinga kuo kofu ʻo faʻo kato, ka ko e moʻui ʻa ho ngaahi filí te ne makataaʻi atu ʻo hangē ha ngaahi foʻi maka ʻi ha makataá. 30 Pea ʻi he taimi ʻe ʻosi ai hono fai ʻe Sihova ki hoku ʻeikí ʻa e ngaahi meʻa lelei kotoa pē kuó ne talaʻofá peá ne fakanofo koe ke hoko ko e taki ki ʻIsilelí,+ 31 heʻikai haʻo fakatomala pe fakaʻiseʻisa* ʻi ho lotó ʻi hano lilingi taʻeʻuhinga ha toto pea ʻi hono tuku ʻa e nima ʻo hoku ʻeikí ke faisāuní.+ ʻI he taimi ʻe ʻomi ai ʻe Sihova ʻa e lelei ki hoku ʻeikí, manatuʻi muʻa ʻa hoʻo kaunangá.”

32 ʻI he meʻá ni naʻe pehē ai ʻe Tēvita kia ʻApikale: “Ke fakahīkihikiʻi ʻa Sihova ko e ʻOtua ʻo ʻIsilelí, ʻa ia naʻá ne fekauʻi mai koe ʻi he ʻahó ni ke fetaulaki mo aú! 33 Pea ke faitāpuekina koe ʻi hoʻo fakakaukau leleí! ʻOfa ke faitāpuekina koe ʻi hono taʻotaʻofi au he ʻahó ni mei hono ʻai ke hoko ha halaia ʻi he totó+ pea mei hono fai ha sāuni ʻaki hoku nimá tonu. 34 Ka ne taʻeʻoua ia, ʻoku ou fuakava ʻia Sihova ko e ʻOtua moʻui ʻo ʻIsilelí ʻa ia naʻá ne taʻofi au mei hono fai ha kovi kiate koé,+ kapau naʻe ʻikai te ke haʻu vave ke fakafetaulaki kiate au,+ ʻi he aʻu ki he pongipongí ne mei ʻikai ke toe ha tangata ʻe taha ʻa Nāpale.”*+ 35 Ko ia naʻe tali ai ʻe Tēvita meiate ia ʻa e meʻa naʻá ne ʻomi kiate iá peá ne pehē ange kiate ia: “ʻAlu ʻi he fiemālie ki ho falé. Vakai, kuó u fanongo kiate koe, pea te u tali ʻa hoʻo kolé.”

36 Ki mui ai, naʻe foki ʻa ʻApikale kia Nāpale, ʻa ia naʻá ne kai kātoanga ʻo hangē ha tuʻí ʻi hono falé, pea naʻe ongoʻi fiefia ʻa Nāpale* peá ne kona ʻosi. Naʻe ʻikai ke tala ʻe ʻApikale kiate ia ha momoʻi meʻa kae ʻoua ke maʻa ʻa e ʻahó. 37 ʻI he pongipongi haké, ʻi he taimi naʻe malele ai ʻa Nāpalé, naʻe tala ange ʻe hono uaifí kiate ia ʻa e ngaahi meʻá ni. Pea naʻe meimei tuʻu ʻa e tā ʻo hono mafú,* pea naʻá ne tokoto mamatea ʻo hangē ha fuʻu maká. 38 ʻI he ʻaho nai ʻe hongofulu ki mui ai, naʻe taaʻi ai ʻe Sihova ʻa Nāpale, pea naʻá ne mate.

39 ʻI he fanongo ʻa Tēvita kuo mate ʻa Nāpalé, naʻá ne pehē: “Ke fakahīkihikiʻi ʻa Sihova, ʻa ia kuó ne taukapoʻi au+ mei he fakamā ʻia Nāpalé+ pea kuó ne taʻofi ʻa ʻene sevānití mei hono fai ha meʻa pē ʻoku kovi,+ pea kuo hilifaki ʻe Sihova ʻa e kovi ʻa Nāpalé ki hono tumuʻaki pē ʻoʻoná!” Naʻe ʻoatu leva ʻe Tēvita ha fekau ke kole kia ʻApikale ke ne hoko ko hono uaifi. 40 Ko ia naʻe aʻu atu ai ʻa e kau sevāniti ʻa Tēvitá kia ʻApikale ki Kāmeli pea nau pehē kiate ia: “Kuo fekauʻi mai kimautolu ʻe Tēvita kiate koe ke ʻave koe ke ke hoko ko hono uaifi.” 41 Naʻá ne mālanga hake ʻi he taimi pē ko iá ʻo punou mo hanga ki he kelekelé peá ne pehē: “Ko eni ʻa hoʻo kaunangá ko ha sevāniti ke ne fufulu ʻa e vaʻe+ ʻo e kau sevāniti ʻa hoku ʻeikí.” 42 Naʻe mālanga fakavave hake leva ʻa ʻApikale+ ʻo ne heka ʻi heʻene ʻasí pea muimui ʻiate ia ʻa e toko nima ʻo ʻene kau kaunangá; naʻá ne ʻalu fakataha mo e kau talafekau ʻa Tēvitá peá ne hoko ko hono uaifi.

43 Naʻe mali foki ʻa Tēvita mo ʻAhinoami+ mei Sisililí,+ pea ko e ongo fefiné fakatouʻosi naʻá na hoko ko hono ongo uaifi.+

44 Ka naʻe foaki ʻe Saula ʻa hono ʻofefine ko Maikalé,+ ʻa e uaifi ʻo Tēvitá, kia Pāleti+ ko e foha ʻo Laisi, ʻa ia mei Kālimí.

26 Naʻe faifai pē pea aʻu ʻa e kau tangata ʻo Sifiá+ kia Saula ki Kīpea,+ ʻo nau pehē: “Ko Tēvita ē ʻoku toi ʻi he foʻi māʻolunga ko Hakilá ʻa ia ʻoku hanga ki Sesimoní.”*+ 2 Ko ia naʻe mālanga hake ʻa Saula ʻo ne ʻalu hifo ki he toafa ʻo Sifiá mo e kau tangata ʻe toko 3,000 kuo fili mei ʻIsileli ke kumi kia Tēvita ʻi he toafa ʻo Sifiá.+ 3 Naʻe ʻapitanga ʻa Saula ʻi he veʻehalá ʻi he foʻi māʻolunga ko Hakilá, ʻa ia ʻoku hanga ki Sesimoní. Naʻe nofo he taimi ko iá ʻa Tēvita ʻi he toafá, pea naʻá ne ʻiloʻi naʻe haʻu ʻa Saula ki he toafá ʻo kumi ia. 4 Ko ia naʻe fekauʻi atu ʻe Tēvita ʻa e kau asiasi ke fakapapauʻi naʻe haʻu moʻoni ʻa Saula. 5 Ki mui ai, naʻe ʻalu ʻa Tēvita ki he feituʻu ʻa ia naʻe ʻapitanga ai ʻa Saulá, pea naʻe sio ʻa Tēvita ki he feituʻu ʻa ia naʻe māʻumohe ai ʻa Saula mo ʻĀpina+ ko e foha ʻo Naá, ʻa e ʻeiki ʻo ʻene kau taú; naʻe mohe ʻa Saula ʻi he ʻapitangá pea naʻe ʻapitanga takatakai ʻiate ia ʻa e kau taú. 6 Naʻe pehē leva ʻe Tēvita kia ʻAhimeleki ko e tangata Hetí+ pea mo ʻApisai+ ko e tama ʻa Seluvaiá,+ ʻa e tokoua ʻo Sioapé: “Ko hai ʻe ʻalu hifo mo au ki he ʻapitangá kia Saulá?” Naʻe tali ange ʻe ʻApisai: “Te u ʻalu hifo mo koe.” 7 Ko ia naʻe ʻalu ʻa Tēvita mo ʻApisai ki he kau taú ʻi he poʻulí, pea naʻá na ʻilo ʻa Saula ʻokú ne mohe ʻi he ʻapitangá pea ko ʻene taó ʻoku fokotuʻu ʻi he kelekelé ʻi hono veʻe ʻulú; ko ʻĀpina mo e kau taú naʻa nau tākoto takatakai ʻiate ia.

8 Pea naʻe pehē ange ʻe ʻApisai kia Tēvita: “Kuo tuku ange atu he ʻahó ni ʻe he ʻOtuá ʻa ho filí ki ho nimá.+ Pea ko eni, tuku muʻa ke u hokaʻi ia ʻaki ʻa e taó ʻo fakamaʻu ki he kelekelé ke tuʻo taha pē, pea ʻe ʻikai fiemaʻu ke u toe fai tuʻo ua ia.” 9 Kae kehe, naʻe pehē ʻe Tēvita kia ʻApisai: “ʻOua naʻá ke fai ha kovi kiate ia, he ko hai ia ʻe hiki hono nimá ki he pani ʻa Sihová+ pea kei tonuhia ai pē?”+ 10 Naʻe hoko atu ʻa Tēvita: “ʻOku ou fuakava ʻia Sihova ko e ʻOtua moʻuí, ko Sihova tonu te ne taaʻi ia,+ pe ʻe hoko mai hono ʻaho+ pea te ne mate ai, pe te ne ʻalu hifo ki he taú ʻo ne ʻauha ai.+ 11 Hangē ko e vakai ʻa Sihová, mole ke mamaʻo haʻaku hiki hoku nimá ki he pani ʻa Sihová!+ Ko ia toʻo muʻa ʻa e tao ʻoku ʻi hono veʻe ʻulú pea mo e sioki vaí, peá ta ō kitaua.” 12 Ko ia naʻe toʻo ʻe Tēvita ʻa e taó mo e sioki vaí mei he veʻe ʻulu ʻo Saulá, pea naʻá na ʻalu. Naʻe ʻikai ha taha ʻe sio+ pe te ne fakatokangaʻi kinaua pe ʻā hake, he naʻa nau mohe hono kotoa, koeʻuhí naʻe tō kiate kinautolu ha mohe maʻu meia Sihova. 13 Naʻe kolosi leva ʻa Tēvita ki he tafaʻaki ʻe tahá ʻo ne tuʻu ʻi he tumutumu ʻo e moʻungá ʻo kiʻi mamaʻo atu, ʻo vā mamaʻo ʻa hona vahaʻá.

14 Naʻe ui atu ʻa Tēvita ki he kau taú pea kia ʻĀpina+ ko e foha ʻo Naá, ʻo pehē: “ʻE ʻĀpina, ʻokú ke fanongo mai?” Naʻe tali ange ʻe ʻĀpina: “Ko hai koe ʻokú ke ui mai ki he tuʻí?” 15 Naʻe pehē ange ʻe Tēvita kia ʻĀpina: “ʻIkai ko ha tangata koe? Pea ko hai ia ʻoku tatau mo koe ʻi ʻIsileli? Ko ia ko e hā naʻe ʻikai ai te ke hanganaki leʻohi ho ʻeikí, ʻa e tuʻí? He ko e taha ʻo e kau sōtiá naʻe hū atu ke tāmateʻi ho ʻeikí, ʻa e tuʻí.+ 16 Ko e meʻa kuó ke faí ʻoku ʻikai lelei. ʻOku ou fuakava ʻia Sihova ko e ʻOtua moʻuí, ʻoku mou tuha mo e mate, koeʻuhí kuo ʻikai te mou hanganaki leʻohi homou ʻeikí, ʻa e pani ʻa Sihová.+ Ko eni sio takai holo! Ko fē ʻa e tao ʻa e tuʻí pea mo e sioki vai+ ʻa ia naʻe ʻi hono veʻe ʻulú?”

17 Pea naʻe ʻiloʻi ʻe Saula ʻa e leʻo ʻo Tēvitá peá ne pehē: “Ko ho leʻó koā eni, ʻe Tēvita ʻa hoku foha?”+ Naʻe tali mai ʻe Tēvita: “Ko hoku leʻó ia, ʻe hoku ʻeiki ko e tuʻí.” 18 Naʻá ne hoko atu: “Ko e hā ʻoku tuli ai ʻa hoku ʻeikí ki heʻene sevānití,+ he ko e hā koā ʻa e meʻa kuó u faí, pea ko e hā ʻa e meʻa ʻoku ou halaia aí?+ 19 ʻE hoku ʻeiki ko e tuʻí, fanongo mai muʻa ki he lea ʻa hoʻo sevānití: Kapau ko Sihova naʻá ne ueʻi koe ke ke fakafepaki kiate aú, tuku ke ne tali* ʻa ʻeku feilaulau meʻakaí.* Ka ʻo kapau ko e kau tangata kuo nau ueʻi koé,+ ke nau malaʻia ʻi he ʻao ʻo Sihová, koeʻuhí kuo nau kapusi au he ʻahó ni mei he nofo ʻi he tofiʻa+ ʻo Sihová, ʻi heʻenau pehē, ‘ʻAlu, ʻo tauhi ʻa e ngaahi ʻotua kehé!’ 20 Pea ko eni ʻoua naʻa tuku ke lilingi ʻa hoku totó ʻi he kelekelé ʻi he ʻao ʻo Sihová, he kuo ʻalu atu ʻa e tuʻi ʻo ʻIsilelí ke kumi ki ha kiʻi kutufisi,+ ʻo hangē ia ko haʻane tuli ki ha manupuna hehengi* ʻi he ngaahi moʻungá.”

21 Naʻe pehē ange leva ʻe Saula: “Kuó u faiangahala.+ Foki mai, ʻe Tēvita ko hoku foha, koeʻuhí heʻikai te u toe fai ha kovi kiate koe, he naʻá ke vakai ki heʻeku moʻuí ko e meʻa mahuʻinga+ ia ʻi he ʻahó ni. ʻIo, kuó u fai vale pea kuó u fai ha fehālaaki lahi fakaʻulia.” 22 Naʻe tali mai ʻe Tēvita: “Ko eni ʻa e tao ʻa e tuʻí. Tuku ke haʻu ha taha ʻo e kau talavoú ʻo ʻoatu ia. 23 Ko Sihova ia te ne totongi ki he tokotaha taki taha ki heʻene māʻoniʻoni ʻaʻaná+ pea mo ʻene faitōnunga ʻaʻaná, he ʻi he ʻahó ni kuo tuku mai koe ʻe Sihova ki hoku nimá, ka naʻe ʻikai te u loto ke hiki ʻa hoku nimá ki he pani ʻa Sihová.+ 24 Vakai! Hangē pē ko e mahuʻinga ʻa hoʻo moʻuí kiate au he ʻaho ní, ko ia ʻofa ke hoko ʻa ʻeku moʻuí ʻo mahuʻinga ʻi he vakai mai ʻa Sihová, pea ʻofa ke ne fakahaofi au mei he faingataʻa kotoa pē.”+ 25 Naʻe tali ange ʻe Saula kia Tēvita: “ʻOfa ke faitāpuekina koe, ʻe Tēvita ko hoku foha. Ko e moʻoni te ke fai ʻa e ngaahi meʻa lahi, pea ko e moʻoni te ke ikuna.”+ Naʻe hoko atu leva ʻa Tēvita ʻi heʻene fonongá, pea naʻe foki ʻa Saula ki hono feituʻú.+

27 Kae kehe, naʻe pehē ʻe Tēvita ʻi hono lotó: “ʻE ʻi ai pē ʻa e ʻaho te u ʻauha ai ʻi he nima ʻo Saulá. Ko e meʻa lelei taha kiate aú ke u hola+ ki he fonua ʻo e kau Filisitiá; pea ʻe tuku ai ʻe Saula ʻene kumi kiate au ʻi he feituʻu kotoa ʻo ʻIsilelí,+ pea te u hao ai mei hono nimá.” 2 Ko ia naʻe mālanga hake ʻa Tēvita mo e kau tangata ʻe toko 600+ naʻe ʻiate iá ʻo nau ō kia ʻĀkisi+ ko e foha ʻo Maoki, ko e tuʻi ʻo Katí. 3 Naʻe nofo ʻa Tēvita ʻia ʻĀkisi ʻi Kati, ko ia mo ʻene kau tangatá, ko e tangata taki taha mo hono fāmili. Naʻe ʻia Tēvita ʻa hono ongo uaifí, ʻa ʻAhinoami+ mei Sisililí pea mo ʻApikale+ ko e fefine Kāmelí, ʻa ia naʻe hoko ko e uaifi ʻo Nāpalé. 4 ʻI hono fakahā kia Saula kuo hola ʻa Tēvita ki Katí, naʻe tuku ai ʻene kumi kiate iá.+

5 Pea naʻe pehē ʻe Tēvita kia ʻĀkisi: “Kapau ʻokú ke leleiʻia ʻiate au, ʻomai muʻa ha feituʻu moʻoku ʻi he taha ʻo e ngaahi kolo ʻi he feituʻu ʻutá, koeʻuhí ke u nofo ai. Ko e hā ke nofo ai hoʻo sevānití fakataha mo koe ʻi he kolo fakatuʻí?” 6 Ko ia naʻe ʻoange kiate ia ʻe ʻĀkisi ʻa Sikilaki+ ʻi he ʻaho ko iá. Ko e ʻuhinga ia ʻoku maʻu ai ʻa Sikilaki ʻe he ngaahi tuʻi ʻo Siutá ʻo aʻu mai ki he ʻaho ní.

7 Ko e lōloa ʻo e taimi* naʻe nofo ai ʻa Tēvita ʻi he feituʻu ʻuta ʻo e kau Filisitiá ko e taʻu ʻe taha mo e māhina ʻe fā.+ 8 Naʻe faʻa ʻalu hake ʻa Tēvita mo ʻene kau tangatá ke ʻohofi ʻa e kau Kēsulí,+ ko e kau Kisilí, pea mo e kau ʻAmalekí,+ he naʻa nau nofoʻi ʻa e fonua naʻe lele mei Telami ʻo aʻu ki Sulá+ pea ʻalu hifo ai ki he fonua ko ʻIsipité. 9 ʻI he taimi naʻe ʻohofi ai ʻe Tēvita ʻa e fonuá, naʻe ʻikai te ne fakahaofi moʻui+ ha tangata pe ko ha fefine, ka naʻá ne ʻave ʻa e fanga sipí, fanga pulú, fanga ʻasí, fanga kāmelí, pea mo e valá, ʻi he hili iá naʻá ne foki kia ʻĀkisi. 10 Naʻe ʻeke ange leva ʻe ʻĀkisi: “Ko fē naʻa mou ʻohofi ʻi he ʻaho ní?” Naʻe tali ange ʻe Tēvita: “Ko e fakatonga* ʻo Siutá”+ pe “Ko e fakatonga ʻo e kau Selamilí”+ pe “Ko e fakatonga ʻo e kau Kēnaí.”+ 11 Naʻe ʻikai ke fakahaofi moʻui ʻe Tēvita ha tangata pe ko ha fefine ke ʻomi ki Kati, ʻi heʻene pehē: “Ke ʻoua naʻa nau tala kiate kinautolu ha meʻa ʻo fekauʻaki mo kimautolu ʻo pehē, ‘Ko e meʻa eni naʻe fai ʻe Tēvitá.’” (Pea ko e meʻa ia naʻá ne faí ʻi he taimi kotoa naʻá ne nofo ai ʻi he feituʻu ʻuta ʻo e kau Filisitiá.) 12 Ko ia naʻe tui ai ʻa ʻĀkisi kia Tēvita, ʻo ne pehē loto pē: ‘Kuó ne hoko moʻoni ʻo namukū ʻi he lotolotonga ʻo hono kakaí, ʻa ʻIsileli, ko ia te ne hoko maʻu ai pē ko ʻeku sevāniti.’

28 ʻI he ngaahi ʻaho ko iá naʻe fakatahatahaʻi ʻe he kau Filisitiá ʻenau kau taú ke tauʻi ʻa ʻIsileli.+ Ko ia naʻe pehē ange ʻe ʻĀkisi kia Tēvita: “Ke ke ʻilo foki ko koe mo hoʻo kau tangatá ʻe ō mo au ki he taú.”+ 2 Ko ia naʻe pehē ai ʻe Tēvita kia ʻĀkisi: “ʻOkú ke ʻiloʻi moʻoni ʻa e meʻa ʻe fai ʻe hoʻo sevānití.” Naʻe pehē ange ʻe ʻĀkisi kia Tēvita: “Ko e ʻuhinga ia te u fakanofo ai koe ke ke hoko maʻu pē ko ʻeku kaʻaté.”*+

3 Pea naʻe mate ʻa Sāmiuela, pea naʻe tengihia ia ʻe ʻIsileli kotoa pea tanu ia ʻi Lama, ʻa hono kolo ʻoʻoná.+ Pea naʻe ʻosi kapusi ʻe Saula ʻa e kau taula faʻahikehé mo e kau tala meʻa ki he kahaʻú mei he fonuá.+

4 Naʻe fakatahataha ʻa e kau Filisitiá pea nau ʻalu ʻo fokotuʻu ʻapitanga ʻi Sūnemi.+ Ko ia naʻe fakatahatahaʻi ʻe Saula ʻa ʻIsileli kotoa, pea naʻa nau fokotuʻu ʻapitanga ʻi Kilipoa.+ 5 ʻI he sio ʻa Saula ki he ʻapitanga ʻo e kau Filisitiá, naʻá ne ilifia, pea naʻe mātuʻaki tetetete hono mafú.+ 6 Neongo naʻe fehuʻi ʻa Saula kia Sihova,+ naʻe ʻikai ʻaupito ke fai mai ʻe Sihova ha tali kiate ia, ʻi ha ngaahi misi pe ʻi he ʻŪlimí+ pe fakafou ʻi he kau palōfitá. 7 Naʻe faifai pē pea pehē ʻe Saula ki heʻene kau sevānití: “Kumi mai kiate au ha fefine ʻa ia ko ha taula faʻahikehe,+ pea te u ʻalu ʻo kumi faleʻi kiate ia.” Naʻe tali ange ʻe heʻene kau sevānití: “Vakai! ʻOku ʻi ai ha fefine ʻa ia ko ha taula faʻahikehe ʻi ʻEni-toa.”+

8 Ko ia naʻe fakapuli ʻa Saula peá ne tui ha ngaahi kofu kehe peá ne ʻalu poʻuli ki he fefiné mo e toko ua ʻi heʻene kau tangatá. Naʻá ne pehē: “Ke ke fai ʻaki muʻa ʻa hoʻo ngāue ko ha taula faʻahikehé+ ha vavalo, pea ʻohake kiate au ʻa e tokotaha ʻa ia te u fakahaaʻi atu kiate koé.” 9 Kae kehe, naʻe pehē ange ʻe he fefiné kiate ia: “Kuo pau pē ʻokú ke ʻiloʻi ʻa e meʻa naʻe fai ʻe Saulá, ʻa ʻene kapusi ʻa e kau taula faʻahikehé mo e kau tala meʻa ki he kahaʻú mei he fonuá.+ Ko e hā leva ʻokú ke feinga ai ke tauheleʻi au ke tāmateʻí?”+ 10 Naʻe fai leva ʻe Saula ha fakapapau kiate ia ʻia Sihova, ʻo pehē: “ʻOku ou fuakava ʻia Sihova ko e ʻOtua moʻuí, ʻe ʻikai te ke hoko ʻo halaia ʻi he meʻá ni!” 11 ʻI he meʻá ni naʻe pehē ʻe he fefiné: “Ko hai te u ʻohake kiate koé?” Naʻá ne tali ange: “ʻOhake kiate au ʻa Sāmiuela.” 12 ʻI he sio ʻa e fefiné kia “Sāmiuelá,”*+ naʻá ne kaila ʻaki ʻa e leʻo-lahi tahá ʻo ne pehē kia Saula: “Ko e hā naʻá ke kākaaʻi ai aú? Ko Saula koe!” 13 Naʻe pehē ʻe he tuʻí kiate ia: “ʻOua te ke ilifia, ka ko e hā ʻokú ke sio ki aí?” Naʻe tali ange ʻe he fefiné kia Saula: “ʻOku ou sio ki he tokotaha hangē ha ʻotuá ʻoku ʻalu hake mei he kelekelé.” 14 Naʻá ne ʻeke ange kiate ia ʻi he taimi pē ko iá: “ʻOku fēfē hono fōtungá?” Ko ia naʻá ne tali mai: “Ko ha tangataʻeiki ʻoku ʻalu haké, pea ʻokú ne tui ha kofu taʻenima.”+ Ko ia naʻe ʻiloʻi ai ʻe Saula ko “Sāmiuela” ia, pea naʻá ne punou ʻo hanga ki he kelekelé peá ne fakatōmapeʻe.

15 Naʻe pehē leva ʻe “Sāmiuela” kia Saula: “Ko e hā kuó ke fakahohaʻasi ai au ʻaki hono ʻai ke ʻohake aú?” Naʻe tali ange ʻe Saula: “ʻOku ou faingataʻaʻia lahi. ʻOku tauʻi au ʻe he kau Filisitiá, pea kuo mavahe ʻa e ʻOtuá meiate au pea ʻikai te ne kei fai mai ha tali kiate au, fakafou ʻi he kau palōfitá pe ʻi he ngaahi misí;+ ko ia ʻa e ʻuhinga ʻoku ou ui atu ai kiate koé ke ke fakahā mai ke u ʻilo ʻa e meʻa ke faí.”+

16 Pea ko “Sāmiuela” naʻá ne pehē ange: “Ko e hā ʻokú ke ʻeke mai ai kiate aú lolotonga ia kuo mavahe ʻa Sihova meiate koe+ pea kuó ne hoko ko ho filí? 17 ʻE fai ʻe Sihova ʻa e meʻa naʻá ne tomuʻa tala fakafou ʻiate aú: ʻE hae ʻe Sihova ʻa e puleʻangá mei ho nimá pea foaki ia ki ha taha ʻi hoʻo kau tangatá, kia Tēvita.+ 18 Koeʻuhi naʻe ʻikai te ke talangofua ki he leʻo ʻo Sihová pea naʻe ʻikai te ke fakahoko ʻa ʻene houhau kakahá ki he kau ʻAmalekí,+ ko e ʻuhinga ia ʻoku fai ai ʻe Sihova ʻa e meʻá ni kiate koe he ʻaho ní. 19 ʻE tuku foki ʻe Sihova fakatouʻosi ʻa ʻIsileli mo koe ki he nima ʻo e kau Filisitiá,+ pea ʻi he ʻapongipongí ko koe+ mo ho ngaahi fohá+ te mou ʻiate au. ʻE tuku foki ʻe Sihova ʻa e kau tau ʻa ʻIsilelí ki he nima ʻo e kau Filisitiá.”+

20 ʻI he taimi pē ko iá naʻe tō fakalafalafa ʻa Saula ʻi he kelekelé peá ne hoko ʻo mātuʻaki ilifia lahi koeʻuhi ko e ngaahi lea ʻa “Sāmiuelá.” Pea naʻe ʻikai ke kei ʻiate ia ha mālohi, koeʻuhí naʻe ʻikai te ne kai ha meʻakai ʻi he ʻahó kotoa mo e poó kotoa. 21 ʻI he haʻu ʻa e fefiné kia Saula ʻo ne sio kuo fakahohaʻasi lahi iá, naʻá ne pehē ange kiate ia: “Ko eni kuo talangofua ʻa hoʻo sevānití ki he meʻa naʻá ke leaʻakí, pea naʻá ku tuku ʻeku moʻuí ki he tuʻunga fakatuʻutāmaki+ pea fai ʻa e meʻa naʻá ke tala mai ke u faí. 22 Ko eni, fanongo mai muʻa ki he meʻa ʻe leaʻaki ʻe hoʻo sevānití. Tuku ke u tuku atu ʻi ho ʻaó ha konga mā; peá ke kai leva koeʻuhí ke ke maʻu ai ha mālohi ke hoko atu ʻa hoʻo fonongá.” 23 Ka naʻá ne fakafisi peá ne pehē: “ʻE ʻikai te u kai.” Kae kehe, ko ʻene kau sevānití pea pehē ki he fefiné naʻa nau vilitaki kiate ia. Naʻe faifai pē peá ne fanongo kiate kinautolu peá ne tuʻu hake mei he kelekelé ʻo ne tangutu ʻi he mohengá. 24 Naʻe ʻi ai ha ʻuhikiʻi pulu sino ʻa e fefiné ʻi he falé, ko ia naʻá ne tāmateʻi* fakavave ia peá ne toʻo ʻa e mahoaʻa ʻo natu ha takaonga pea taʻo ʻaki ia ha mā taʻelēvani. 25 Naʻá ne ʻoatu ia kia Saula mo ʻene kau sevānití, pea naʻa nau kai. ʻI he hili iá, naʻa nau mālanga hake ʻo nau mavahe lolotonga ʻa e poʻulí.+

29 Naʻe fakatahatahaʻi ʻe he kau Filisitiá+ ʻenau kau taú kotoa ʻi ʻĒfeki, lolotonga iá naʻe ʻapitanga ʻa e kau ʻIsilelí ia ʻi he veʻe vai ʻi Sisililí.+ 2 Pea ko e ngaahi ʻeiki ʻo e kau Filisitiá naʻa nau laka atu mo ʻenau kau taú ʻo tautau toko teau mo tautau toko taha afe, pea naʻe laka atu ʻa Tēvita mo ʻene kau tangatá ʻi mui mo ʻĀkisi.+ 3 Ka naʻe pehē ʻe he houʻeiki ʻo e kau Filisitiá: “Ko e hā ʻoku ʻi heni ai ʻa e kau Hepelū ko ení?” Naʻe tali ange ʻe ʻĀkisi ki he houʻeiki ʻo e kau Filisitiá: “Ko Tēvita eni, ko e sevāniti ʻa Tuʻi Saula ʻo ʻIsilelí, ʻa ia kuó ne ʻiate au ʻi ha taʻu ʻe taha pe lahi ange.+ Kuo ʻikai te u maʻu haʻane hala ʻe taha talu mei he ʻaho naʻá ne mavahe mai ai kiate aú ʻo aʻu mai ki he ʻahó ni.” 4 Ka naʻe hoko ʻa e houʻeiki ʻo e kau Filisitiá ʻo ʻita ʻiate ia, pea nau pehē kiate ia: “ʻAi ʻa e tangatá ke ne foki.+ Tuku ia ke ne foki ki he feituʻu naʻá ke vaheʻi ia ki aí. ʻOua ʻe tuku ia ke ne ʻalu hifo mo kitautolu ki he taú, koeʻuhi ke ʻoua naʻá ne toe hanga hake ʻo fakafepaki mai kiate kitautolu lolotonga ʻa e taú.+ He ko e hā ha toe founga lelei ange ke ne toe maʻu ai ʻa e leleiʻia ʻa hono ʻeikí ka ko e ngaahi foʻi ʻulu ʻo ʻetau kau tangatá? 5 ʻIkai ko Tēvita eni ʻa ia naʻa nau hiva fekauʻaki mo ia ʻi heʻenau tauʻolungá, ʻo pehē:

6 Ko ia naʻe ui ʻe ʻĀkisi+ ʻa Tēvita ʻo ne pehē kiate ia: “ʻOku ou fuakava ʻia Sihova ko e ʻOtua moʻuí, ʻokú ke anga-tonu, pea ʻoku ou fiefia ʻi hoʻo ʻalu ʻi he feingataú ni fakataha mo ʻeku kau taú,+ he kuo ʻikai te u maʻu haʻo hala ʻe taha talu mei he ʻaho naʻá ke haʻu ai kiate aú ʻo aʻu mai ki he ʻahó ni.+ Ka ʻoku ʻikai ke falala atu ʻa e ngaahi ʻeikí kiate koe.+ 7 Ko ia ke ke foki ʻi he melino, pea ʻoua naʻá ke fai ha meʻa ʻe taha ke mamahi ai ʻa e ngaahi ʻeiki ʻo e kau Filisitiá.” 8 Kae kehe, naʻe pehē ange ʻe Tēvita kia ʻĀkisi: “Ko e hā e ʻuhingá, ko e hā ha meʻa kuó u fai? Ko e hā ha hala kuó ke maʻu ʻi hoʻo sevānití talu mei he ʻaho naʻá ku haʻu ai kiate koé ʻo aʻu mai ki he ʻahó ni? Ko e hā heʻikai te u ʻalu ai mo koe pea faitau mo e ngaahi fili ʻo hoku ʻeiki ko e tuʻí?” 9 Naʻe tali ange ʻe ʻĀkisi kia Tēvita: “ʻOkú ke lelei ʻi heʻeku vakaí ʻo hangē ha ʻāngelo ʻa e ʻOtuá.+ Ka ko e houʻeiki ʻo e kau Filisitiá kuo nau pehē, ‘ʻOua ʻe tuku ia ke ne ʻalu mo kitautolu ʻi he taú.’ 10 Ko ia ke ke tuʻu pongipongia hake mo e kau sevāniti ʻa ho ʻeikí ʻa ia naʻe haʻu mo koé; mou mālanga hake ʻo mavahe pongipongia ʻi he maama mai pē ʻa e ʻahó.”

11 Ko ia naʻe mālanga pongipongia hake ʻa Tēvita mo ʻene kau tangatá ke nau foki ki he fonua ʻo e kau Filisitiá, pea naʻe ʻalu hake ʻa e kau Filisitiá ia ki Sisilili.+

30 ʻI he aʻu atu ʻa Tēvita mo ʻene kau tangatá ki Sikilaki+ ʻi he ʻaho hono tolú, naʻe ʻosi ʻohofi ʻe he kau ʻAmalekí+ ia ʻa e feituʻu fakatongá* pea mo Sikilaki, pea kuo nau ʻohofi ʻa Sikilaki pea tutu ia ʻaki ʻa e afi. 2 Naʻa nau ʻave pōpula ʻa e kakai fefiné+ mo e tokotaha kotoa naʻe ʻi aí, mei he siʻi taha ki he lahi taha. Naʻe ʻikai te nau tāmateʻi ha taha, ka naʻa nau ʻave kinautolu pea hoko atu ʻenau fonongá. 3 ʻI he aʻu atu ʻa Tēvita mo ʻene kau tangatá ki he koló, naʻa nau ʻilo kuo tutu ia, pea ko honau ngaahi uaifí mo honau ngaahi fohá mo honau ngaahi ʻofefiné naʻe ʻave pōpula ia. 4 Ko ia naʻe kamata ke tangi leʻo-lahi ʻa Tēvita mo e kau tangata naʻe ʻiate iá ʻo aʻu ki he ʻikai ke kei ʻi ai hanau ivi ke tangi. 5 Naʻe ʻave pōpula foki mo e ongo uaifi ʻo Tēvitá, ʻa ʻAhinoami mei Sisililí pea mo ʻApikale ʻa ia naʻe hoko ko e uaifi ʻo Nāpale ko e tangata Kāmelí.+ 6 Naʻe faingataʻaʻia ʻaupito ʻa Tēvita, koeʻuhí he naʻe alēlea ʻa e kau tangatá ʻo kau ki hano tolomakaʻi ia, he naʻe mamahi ʻaupito ʻa e kau tangatá kotoa ʻi he mole ʻa honau ngaahi fohá mo honau ngaahi ʻofefiné. Ka naʻe fakaivimālohiʻi ʻe Tēvita ʻa ia tonu fakafou ʻi he tokoni ʻa Sihova ko hono ʻOtuá.+

7 Naʻe pehē leva ʻe Tēvita kia ʻĀpaiata+ ko e taulaʻeikí, ʻa e foha ʻo ʻAhimelekí: “ʻOmai muʻa ʻa e ʻēfotí ki heni.”+ Ko ia naʻe ʻomi ʻe ʻĀpaiata ʻa e ʻēfotí kia Tēvita. 8 Naʻe fehuʻi ʻa Tēvita kia Sihova:+ “Te u tuli koā ki he kau kaihaʻa fakamālohi ko ení? Te u maʻu atu kinautolu?” ʻI he meʻá ni, naʻá ne folofola kiate ia: “Tuli atu, he te ke maʻu moʻoni kinautolu, pea te ke fai ʻa e fakahaofí.”+

9 Naʻe fononga atu ʻi he taimi pē ko iá ʻa Tēvita mo e kau tangata ʻe toko 600+ naʻe ʻiate iá, pea nau ʻalu atu ʻo aʻu ki he Teleʻa* Pēsoá, ʻa ia naʻe nofo ai ha niʻihi ʻo e kau tangatá. 10 Naʻe hoko atu ʻa e tuli ʻa Tēvitá mo e kau tangata ʻe toko 400, ka ko e kau tangata ʻe toko 200 ʻa ia naʻa nau fuʻu helaʻia ke kolosi ʻi he Teleʻa Pēsoá naʻa nau nofo kinautolu.+

11 Naʻa nau ʻilo ha tangata ʻIsipite ʻi he vaó pea nau ʻave ia kia Tēvita. Naʻa nau ʻoange haʻane meʻakai ke kai mo e vai ke ne inu, 12 pea mo ha konga ʻo ha takaonga fiki* pea mo ha ongo takaonga fuamelie.* ʻI he hili ʻene kaí, naʻe toe maʻu hono ivi, he naʻe ʻikai te ne kai ha meʻakai pe inu ha vai ʻi he ʻaho ʻe tolu mo e pō ʻe tolu. 13 Pea naʻe ʻeke ange ʻe Tēvita kiate ia: “Ko e sevāniti koe ʻa hai, pea ko hoʻo haʻú mei fē?” Naʻá ne pehē ange: “Ko ha tamaioʻeiki ʻIsipite au, ko ha sevāniti ʻa ha tangata ʻAmaleki, ka naʻe liʻaki au ʻe hoku ʻeikí koeʻuhi naʻá ku puke ʻi he ʻaho ʻe tolu kuo maliu atú. 14 Naʻa mau ʻohofi ʻa e feituʻu fakatonga* ʻo e kau Kēletí+ pea mo e feituʻu ʻo Siutá pea mo e fakatonga* ʻo e feituʻu ʻo Kēlepí,+ pea ko Sikilaki naʻa mau tutu ʻaki ʻa e afi.” 15 ʻI he meʻá ni naʻe pehē ʻe Tēvita kiate ia: “Te ke taki hifo au ki he kau kaihaʻa fakamālohi ko ení?” Naʻá ne tali ange: “Kapau te ke fai mai ha fakapapau ʻi he ʻOtuá ʻe ʻikai te ke tāmateʻi au pea ʻe ʻikai te ke tuku atu au ki hoku ʻeikí, te u taki hifo koe ki he kau kaihaʻa fakamālohi ko ení.”

16 Ko ia naʻá ne taki hifo ia ki he feituʻu naʻa nau movete holo ai ʻi he kotoa ʻo e fonuá, ʻoku nau kai mo inu mo fakafiefia koeʻuhí ko e fuʻu koloa vete kotoa naʻa nau ʻave mei he fonua ʻo e kau Filisitiá pea mo e fonua ko Siutá. 17 Pea naʻe taaʻi ʻe Tēvita kinautolu mei he hengihengi ʻo aʻu ki he efiafi ʻo e ʻaho hono hokó; naʻe ʻikai ha tangata ne hao+ tuku kehe pē ʻa e kau tangata ʻe toko 400 ʻa ia naʻa nau hola ʻi ha fanga kāmeli. 18 Naʻe toe fakafoki mai ʻe Tēvita ʻa e meʻa kotoa naʻe ʻave+ ʻe he kau ʻAmalekí, pea naʻe fakahaofi mai ʻe Tēvita ʻa hono ongo uaifí. 19 Naʻe ʻikai haʻanau meʻa naʻe mole, mei he siʻi taha ki he lahi taha. Naʻa nau toe fakafoki mai honau ngaahi fohá mo e ngaahi ʻofefiné pea mo e koloa veté;+ naʻe toe fakafoki mai ʻe Tēvita ʻa e meʻa kotoa pē naʻa nau ʻavé. 20 Ko ia naʻe ʻave ʻe Tēvita ʻa e fanga sipi mo e fanga pulu kotoa, ʻo nau fakateka kinautolu ʻo muʻomuʻa ia ʻi heʻenau fanga manu ʻanautolú. Naʻa nau pehē: “Ko e koloa vete eni ʻa Tēvita.”

21 Naʻe haʻu leva ʻa Tēvita ki he kau tangata ʻe toko 200 ʻa ia naʻa nau fuʻu helaʻia ke ō mo ia pea naʻa nau nofo ʻi he veʻe Teleʻa Pēsoá,+ pea naʻa nau ʻalu atu ke fakafetaulaki kia Tēvita mo e kakai naʻe ʻiate iá. ʻI he fakaofiofi atu ʻa Tēvita ki he kau tangatá, naʻá ne ʻeke pe naʻa nau fēfē. 22 Kae kehe, ko e tangata kovi mo koto taʻeʻaonga kotoa pē ʻi he lotolotonga ʻo e faʻahinga naʻe ō mo Tēvitá naʻa nau pehē: “Ko e meʻa ʻi he ʻikai te nau ō mo kitautolú, ʻe ʻikai te tau ʻoange ha meʻa ʻi he koloa vete naʻa tau toe fakafoki maí, tuku kehe pē ʻa e uaifi mo e ngaahi foha ʻo e tangata taki taha ke ne ʻave ia peá ne mavahe.” 23 Ka naʻe pehē ʻe Tēvita: “ʻE hoku fanga tokoua, kuo pau ke ʻoua te mou fai ʻa e meʻá ni ki he meʻa kuo foaki mai ʻe Sihova kiate kitautolú. Naʻá ne maluʻi kitautolu pea tuku mai ki hotau nimá ʻa e kau kaihaʻa fakamālohi naʻe omi ke tauʻi kitautolú.+ 24 Ko hai ia ʻe loto-tatau mo kimoutolu ʻi he meʻá ni? Ko e ʻinasi ʻo e tokotaha naʻe ʻalu hifo ki he taú ʻe tatau pē ia mo e ʻinasi ʻo e tokotaha naʻe nofo mo e ʻū meʻá.+ ʻE kau ʻa e tokotaha kotoa ʻi he maʻu ʻinasí.”+ 25 Pea mei he ʻaho ko iá ʻo faai atu, naʻá ne fokotuʻu ia ke hoko ko ha tuʻutuʻuni mo ha lao ki ʻIsileli ʻo aʻu mai ki he ʻahó ni.

26 ʻI he foki ʻa Tēvita ki Sikilakí, naʻá ne ʻoatu ha niʻihi ʻo e koloa veté ki he kau mātuʻa ʻo Siuta ʻa ia ko hono ngaahi kaungāmeʻá, ʻo ne pehē: “Ko ha meʻaʻofa* ena maʻamoutolu mei he koloa vete ʻo e ngaahi fili ʻo Sihová.” 27 Naʻá ne ʻoatu ʻa e meʻaʻofa ki he faʻahinga naʻe ʻi Pētelí,+ ki he faʻahinga ʻi Lēmoti ʻo e feituʻu Nīkepí,* ki he faʻahinga ʻi Satilí,+ 28 ki he faʻahinga ʻi ʻAloelí, ki he faʻahinga ʻi Sifimotí, ki he faʻahinga ʻi ʻEsitimoá,+ 29 ki he faʻahinga ʻi Lakalí, ki he faʻahinga ʻi he ngaahi kolo ʻo e kau Selamilí,+ ki he faʻahinga ʻi he ngaahi kolo ʻo e kau Kēnaí,+ 30 ki he faʻahinga ʻi Hoamá,+ ki he faʻahinga ʻi Polasaní, ki he faʻahinga ʻi ʻAtakí, 31 ki he faʻahinga ʻi Hepeloní,+ pea ki he ngaahi feituʻu kotoa naʻe faʻa ʻalu holo ai ʻa Tēvita mo ʻene kau tangatá.

31 Pea naʻe tauʻi ʻe he kau Filisitiá ʻa ʻIsileli.+ Pea naʻe hola ʻa e kau tangata ʻo ʻIsilelí mei he ʻao ʻo e kau Filisitiá, pea naʻe tō ʻa e tokolahi ʻi hono tāmateʻi ʻi Moʻunga Kilipoa.+ 2 Naʻe tuli ofi atu ʻa e kau Filisitiá kia Saula mo hono ngaahi fohá, pea naʻe taaʻi ʻe he kau Filisitiá ʻa Sionatane,+ ʻApinatapi, pea mo Maliki-sua, ko e ngaahi foha ʻo Saulá.+ 3 Naʻe fakaʻaʻau ʻo mālohi ange ʻa e taú kia Saula, pea naʻe maʻu ia ʻe he kau fana ngahaú, pea naʻe fakalaveaʻi lahi ia ʻe he kau fana ngahaú.+ 4 Naʻe pehē leva ʻe Saula ki heʻene tangata toʻo meʻataú: “Unuhi hoʻo heletaá ʻo hokaʻi ʻaki au, ke ʻoua naʻa omi ʻa e kau tangata taʻekamú ni+ ʻo hokaʻi au pea nau fakamamahiʻi* au.” Ka naʻe ʻikai ke loto ki ai ʻa ʻene tangata toʻo meʻataú, he naʻá ne ilifia lahi ʻaupito. Ko ia naʻe toʻo ai ʻe Saula ʻa e heletaá ʻo ne tō hifo ki ai.+ 5 ʻI he sio ʻa ʻene tangata toʻo meʻataú kuo mate ʻa Saulá,+ naʻá ne tō hifo mo ia ki heʻene heletā ʻaʻaná ʻo ne mate fakataha mo ia. 6 Ko ia ko Saula, ko hono foha ʻe toko tolú, ko ʻene tangata toʻo meʻataú, pea mo ʻene kau tangatá kotoa naʻa nau mate fakataha ʻi he ʻaho ko iá.+ 7 ʻI he sio ʻa e kakai ʻIsileli naʻe ʻi he feituʻu ʻo e teleʻá* pea ʻi he feituʻu Sioataní ki he hola ʻa e kau tangata ʻo ʻIsilelí pea kuo mate ʻa Saula mo hono ngaahi fohá, naʻe kamata ke nau liʻaki ʻa e ngaahi koló pea nau hola;+ naʻe omi leva ʻa e kau Filisitiá ʻo nofo ai.

8 ʻI he ʻaho hono hokó, ʻi he omi ʻa e kau Filisitiá ke huʻi ʻa e ngaʻotoʻotá mei he faʻahinga kuo tāmateʻí, naʻa nau ʻilo ʻa Saula mo hono foha ʻe toko tolú kuo nau tō tau ʻi Moʻunga Kilipoa.+ 9 Ko ia naʻa nau tuʻusi ʻa hono ʻulú pea huʻi ʻa ʻene meʻataú pea ʻoatu ha tala ki he kotoa ʻo e fonua ʻo e kau Filisitiá ke fakamafola ʻa e ongoongó ni+ ʻi he ngaahi fale* ʻo honau ngaahi ʻaitolí+ pea ʻi he lotolotonga ʻo e kakaí. 10 Pea naʻa nau tuku ʻa ʻene meʻataú ʻi he fale ʻo e ngaahi ʻīmisi ʻAsitelotí pea fakamaʻu ʻa hono ʻangaʻangá ki he ʻā ʻo Pete-saní.+ 11 ʻI he fanongo ʻa e kakai ʻo Siepesi-kiliatí+ ki he meʻa naʻe fai ʻe he kau Filisitiá kia Saulá, 12 naʻe tuʻu hake ʻa e kau taú kotoa ʻo nau fononga atu ʻi he pō kotoa ko iá ʻo ʻomi ʻa e sino ʻo Saulá pea mo hono ngaahi fohá mei he ʻā ʻo Pete-saní. Naʻa nau foki ki Siepesi ʻo tutu kinautolu ʻi ai. 13 Pea naʻa nau ʻave honau ngaahi huí+ ʻo tanu ia ʻi he fuʻu lalo tamalisi ʻi Siepesi,+ pea naʻa nau ʻaukai ʻi he ʻaho ʻe fitu.