ʻĒSELA

1 ʻI he ʻuluaki taʻu ʻo e pule ʻa Tuʻi Kōlesi+ ʻo Pēsiá, pea koeʻuhí ke fakahoko ʻa e folofola ʻa Sihova fakafou ʻia Selemaiá,+ naʻe ueʻi ai ʻe Sihova ʻa e laumālie ʻo Tuʻi Kōlesi ʻo Pēsiá ke ne fai ha fanongonongo ʻi he kotoa ʻo hono puleʻangá, ʻa ia naʻá ne toe hiki foki,+ ʻo pehē:

2 “Ko e folofola eni ʻa Tuʻi Kōlesi ʻo Pēsiá, ‘Kuo foaki kiate au ʻe Sihova ko e ʻOtua ʻo e langí ʻa e puleʻanga kotoa pē ʻo e māmaní,+ pea kuó ne fekau au ke u langa moʻona ha fale ʻi Selusalema,+ ʻa ia ʻoku ʻi Siutá. 3 ʻIlonga ʻa kimoutolu ʻoku ʻi he lotolotonga ʻo hono kakaí kotoa, ʻofa ke ʻiate ia ʻa hono ʻOtuá, pea tuku ke ne ʻalu hake ki Selusalema, ʻa ia ʻoku ʻi Siutá, pea toe langa ʻa e fale ʻo Sihova ko e ʻOtua ʻo ʻIsilelí—ko e ʻOtua moʻoní ia—ko hono falé ē naʻe ʻi Selusalemá.* 4 Ko ha taha pē ʻoku nofo muli,+ pe ko fē pē ʻa e feituʻu ʻoku ʻi aí, tuku ke tokoniʻi ia ʻe hono ngaahi kaungāʻapí* ʻaki ʻenau ʻoange kiate ia ʻa e siliva mo e koula, koloa mo e monumanu, fakataha mo e feilaulau loto-tauʻatāina ki he fale ʻo e ʻOtua moʻoní,+ ʻa ia naʻe ʻi Selusalemá.’”

5 Pea naʻe tuʻu hake leva ʻa e ngaahi ʻulumotuʻa ʻo e ngaahi fale ʻo e ngaahi tamai ʻa Siuta mo Penisimaní mo e kau taulaʻeikí pea mo e kau Līvaí—ʻa e tokotaha kotoa naʻe ueʻi ʻe he ʻOtua moʻoní ʻa hono laumālié—ʻo teuteu ke ʻalu hake ʻo toe langa ʻa e fale ʻo Sihova naʻe ʻi Selusalemá. 6 Naʻe tokoniʻi kinautolu ʻe he faʻahinga kotoa naʻe nofo takatakai kiate kinautolú ʻi hono foaki kiate kinautolu* ʻa e ngaahi naunau siliva mo e naunau koula, koloa, monumanu, mo e ngaahi meʻa mahuʻinga, tuku kehe ʻa e kotoa ʻo e ngaahi feilaulau loto-tauʻatāiná.

7 Naʻe toe fetuku mai ʻe Tuʻi Kōlesi ʻa e ngaahi naunau ʻo e fale ʻo Sihová ʻa ia naʻe ʻave ʻe Nepukanesa mei Selusalema ʻo ne tuku ʻi he fale ʻo hono ʻotuá.+ 8 Naʻe fetuku mai ia ʻe Tuʻi Kōlesi ʻo Pēsiá ʻi he malumalu ʻo e tataki ʻa Mitelatata ko e tauhi paʻangá, ʻa ia naʻá ne lisi ia ʻo ʻoange kia Sesipasa*+ ko e ʻeiki ʻo Siutá.

9 Pea ko e lisí eni: Ko e ʻaiʻanga meʻa koula hangē ha kató ʻe 30, ʻaiʻanga meʻa siliva hangē ha kató ʻe 1,000, mo e ʻaiʻanga meʻa kehe ʻe 29, 10 fanga kiʻi poulu koula ʻe 30, fanga kiʻi poulu siliva ʻe 410, mo e ngaahi naunau kehe ʻe 1,000. 11 Ko e kotoa ʻo e ngaahi naunau koulá mo e silivá naʻe 5,400. Naʻe ʻohake kotoa ʻa e ngaahi meʻá ni ʻe Sesipasa ʻi he taimi naʻe ʻomi ai ʻa e faʻahinga ne ʻave fakamālohí+ mei Pāpilone ki Selusalemá.

2 Pea ko e kakai eni ʻo e vahefonuá* ʻa ia naʻa nau haʻu mei he kau pōpula naʻe ʻave fakamālohí,+ ʻa ia naʻe ʻave ʻe Tuʻi Nepukanesa ʻo Pāpiloné ki Pāpilone+ pea naʻa nau foki ki mui ai ki Selusalema mo Siuta, ʻa e tokotaha taki taha ki hono kolo ʻoʻona,+ 2 ʻa e faʻahinga naʻe omi mo Seluipēpeli,+ Sīsua,+ Nehemaia, Sēlaia, Lelaia, Motekiai, Pilisani, Mīsipa, Pikivai, Lēhumi, pea mo Peaná.

Ko e tokolahi ʻo e kau tangata ʻIsilelí naʻe kau ai+ 3 ʻa e ngaahi foha ʻo Pālosí, ko e toko 2,172; 4 ngaahi foha ʻo Sefataiá, ko e toko 372; 5 ngaahi foha ʻo ʻAlaʻá,+ ko e toko 775; 6 ngaahi foha ʻo Pahati-mōapé,+ mei he ngaahi foha ʻo Sīsua mo Sioapé, ko e toko 2,812; 7 ngaahi foha ʻo ʻĪlamí,+ ko e toko 1,254; 8 ngaahi foha ʻo Satú,+ ko e toko 945; 9 ngaahi foha ʻo Sakaí, ko e toko 760; 10 ngaahi foha ʻo Paní, ko e toko 642; 11 ngaahi foha ʻo Pepaí, ko e toko 623; 12 ngaahi foha ʻo ʻAsakatí, ko e toko 1,222; 13 ngaahi foha ʻo ʻĀtonikamí, ko e toko 666; 14 ngaahi foha ʻo Pikivaí, ko e toko 2,056; 15 ngaahi foha ʻo ʻĀtiní, ko e toko 454; 16 ngaahi foha ʻo ʻĀteli mei he fale ʻo Hesekaiá, ko e toko 98; 17 ngaahi foha ʻo Pisaí, ko e toko 323; 18 ngaahi foha ʻo Siolá, ko e toko 112; 19 ngaahi foha ʻo Hasumí,+ ko e toko 223; 20 ngaahi foha ʻo Kipiá, ko e toko 95; 21 ngaahi foha ʻo Pētelihemá, ko e toko 123; 22 ko e kau tangata ʻo Netofá, ko e toko 56; 23 kau tangata ʻo ʻAnatotí,+ ko e toko 128; 24 ngaahi foha ʻo ʻAsimavetí, ko e toko 42; 25 ngaahi foha ʻo Kiliate-sialimi, Kefila, mo Pielotí, ko e toko 743; 26 ngaahi foha ʻo Lama+ mo Kepaá,+ ko e toko 621; 27 kau tangata ʻo Mikimesí, ko e toko 122; 28 kau tangata ʻo Pēteli mo ʻAí,+ ko e toko 223; 29 ngaahi foha ʻo Nipó,+ ko e toko 52; 30 ngaahi foha ʻo Makapisí, ko e toko 156; 31 ngaahi foha ʻo ʻĪlami ʻe tahá, ko e toko 1,254; 32 ngaahi foha ʻo Halimí, ko e toko 320; 33 ngaahi foha ʻo Loti, Hatiti, mo Onó, ko e toko 725; 34 ngaahi foha ʻo Sielikoó, ko e toko 345; 35 mo e ngaahi foha ʻo Senaá, ko e toko 3,630.

36 Ko e kau taulaʻeikí:+ Ko e ngaahi foha ʻo Sitaia+ mei he fale ʻo Sīsuá,+ ko e toko 973; 37 ngaahi foha ʻo ʻĪmelí,+ ko e toko 1,052; 38 ngaahi foha ʻo Pasuá,+ ko e toko 1,247; 39 mo e ngaahi foha ʻo Halimí,+ ko e toko 1,017.

40 Ko e kau Līvaí:+ Ko e ngaahi foha ʻo Sīsua mo Katimieli,+ mei he ngaahi foha ʻo Hoteviá, ko e toko 74. 41 Ko e kau hivá:+ Ko e ngaahi foha ʻo ʻĒsafé,+ ko e toko 128. 42 Ko e ngaahi foha ʻo e kau leʻo matapaá:+ Ko e ngaahi foha ʻo Salumí, ngaahi foha ʻo ʻĀtelí, ngaahi foha ʻo Talemoní,+ ngaahi foha ʻo ʻĀkupí,+ ngaahi foha ʻo Hatitá, mo e ngaahi foha ʻo Sōpaí, ko e toko 139 fakakātoa.

43 Ko e kau sevāniti ʻi he temipalé:*+ Ko e ngaahi foha ʻo Sihá, ngaahi foha ʻo Hasufá, ngaahi foha ʻo Tapaotí, 44 ngaahi foha ʻo Kēlosí, ngaahi foha ʻo Siá, ngaahi foha ʻo Patoní, 45 ngaahi foha ʻo Lēpaná, ngaahi foha ʻo Hakapá, ngaahi foha ʻo ʻĀkupí, 46 ngaahi foha ʻo Hakapí, ngaahi foha ʻo Salimeí, ngaahi foha ʻo Hānaní, 47 ngaahi foha ʻo Kitelí, ngaahi foha ʻo Kahalí, ngaahi foha ʻo Laiá, 48 ngaahi foha ʻo Lesiní, ngaahi foha ʻo Nekotá, ngaahi foha ʻo Kasamí, 49 ngaahi foha ʻo Usá, ngaahi foha ʻo Paseá, ngaahi foha ʻo Pesaí, 50 ngaahi foha ʻo ʻAsenaá, ngaahi foha ʻo Meuní, ngaahi foha ʻo Nefusimí, 51 ngaahi foha ʻo Pakipukí, ngaahi foha ʻo Hakufá, ngaahi foha ʻo Halahuá, 52 ngaahi foha ʻo Pasilutí, ngaahi foha ʻo Mēhitá, ngaahi foha ʻo Halesá, 53 ngaahi foha ʻo Pakosí, ngaahi foha ʻo Sīselá, ngaahi foha ʻo Tamá, 54 ngaahi foha ʻo Nēsiá, mo e ngaahi foha ʻo Hatifá.

55 Ko e ngaahi foha ʻo e kau sevāniti ʻa Solomoné: Ko e ngaahi foha ʻo Sōteí, ngaahi foha ʻo Sofeletí, ngaahi foha ʻo Pelutá,+ 56 ngaahi foha ʻo Sialá, ngaahi foha ʻo Talekoní, ngaahi foha ʻo Kitelí, 57 ngaahi foha ʻo Sefataiá, ngaahi foha ʻo Hatilí, ngaahi foha ʻo Pokileti-hasipá, mo e ngaahi foha ʻo ʻAmí.

58 Ko e kotoa ʻo e kau sevāniti ʻi he temipalé* mo e ngaahi foha ʻo e kau sevāniti ʻa Solomoné naʻe toko 392.

59 Pea ko e faʻahinga eni naʻe ʻalu hake mei Tela-mela, Tela-halesa, Kilupi, ʻĀtani, mo ʻĪmeli, ka naʻe ʻikai lava ke nau ʻomi ha fakamoʻoni ki he fale ʻo ʻenau ngaahi tamaí mo honau tupuʻangá, pe ko e kau ʻIsileli koā kinautolu:+ 60 Ko e ngaahi foha ʻo Telaiá, ngaahi foha ʻo Tōpaiá, mo e ngaahi foha ʻo Nekotá, ko e toko 652. 61 Pea mei he ngaahi foha ʻo e kau taulaʻeikí: Ko e ngaahi foha ʻo Hopaiá, ngaahi foha ʻo Hakosí,+ ngaahi foha ʻo Pāsiliaí, ʻa ia naʻá ne ʻomi hono uaifí mei he ngaahi ʻofefine ʻo Pāsiliai+ ko e tangata Kiliatí pea naʻe uiʻaki ia honau hingoá. 62 Ko e faʻahingá ni naʻa nau kumi ki honau ngaahi lēkōtí ke fakapapauʻiʻaki honau tupuʻangá, ka naʻe ʻikai te nau maʻu ia, ko ia naʻe toʻo kinautolu mei he ngāue fakataulaʻeikí.*+ 63 Naʻe tala ange ʻe he kōvaná* kiate kinautolu ʻe ʻikai lava ke nau kai mei he ngaahi meʻa mātuʻaki toputapú+ kae ʻoua kuo fai ha fehuʻi ʻe ha taulaʻeiki ʻo fakafou ʻi he ʻŪlimí mo e Tūmemí.+

64 Ko e tokolahi fakakātoa ʻo e fakatahaʻangá naʻe toko 42,360,+ 65 ʻo ʻikai lau ki ai ʻenau kau tamaioʻeikí mo ʻenau kau kaunangá, ʻa ia naʻe toko 7,337; naʻe ʻi ai foki mo ʻenau kau tangata hiva mo e kau fefine hiva ʻe toko 200. 66 Naʻe ʻi ai ʻenau fanga hoosi ʻe 736, fanga miuli ʻe 245, 67 fanga kāmeli ʻe 435, pea mo ʻenau fanga ʻasi ʻe 6,720.

68 ʻI heʻenau aʻu ki he fale ʻo Sihová ʻi Selusalemá, naʻe fai ai ʻe he niʻihi ʻo e ngaahi ʻulumotuʻa ʻo e ngaahi fale ʻo ʻenau ngaahi tamaí ha ngaahi feilaulau loto-tauʻatāina+ ki he fale ʻo e ʻOtua moʻoní, ke toe langa ia* ʻi hono tuʻuʻangá.+ 69 Naʻa nau foaki ki he ngāue naʻe faí ʻo fakatatau ki he meʻa naʻa nau maʻú ʻa e tulekimā* koula ʻe 61,000, mina* siliva ʻe 5,000,+ pea mo e kofu tōtōlofa ʻe 100 maʻá e kau taulaʻeikí. 70 Pea ko e kau taulaʻeikí, kau Līvaí, mo e niʻihi ʻo e kakaí, kau hivá, kau leʻo matapaá, pea mo e kau sevāniti ʻi he temipalé* naʻa nau nofo ʻi honau ngaahi koló, pea naʻe nofo ʻa e toenga kotoa ʻo ʻIsilelí* ʻi honau ngaahi koló.+

3 ʻI he aʻu ki he māhina hono fitú+ pea ko e kau ʻIsilelí* ē ʻi honau ngaahi koló, naʻa nau fakatahataha mai ʻi he loto-taha ki Selusalema. 2 Naʻe tuʻu hake ai ʻa Sīsua+ ko e foha ʻo Sihosatakí mo hono ngaahi kaungā-taulaʻeikí mo Seluipēpeli+ ko e foha ʻo Saletilí+ mo hono fanga tokouá ʻo fokotuʻu ʻa e ʻōlita ʻo e ʻOtua ʻo ʻIsilelí, ke nau lava ʻo ʻohake ai ʻa e ngaahi feilaulau tutú, ʻo hangē ko ia kuo hiki ʻi he Lao ʻa Mōsese+ ko e tangata ʻa e ʻOtua moʻoní.

3 Ko ia naʻa nau fokotuʻu ʻa e ʻōlitá ʻi hono tuʻuʻanga ki muʻá, neongo naʻa nau ilifia ki he ngaahi kakai ʻo e ngaahi fonua takatakaí,+ pea naʻe kamata ke nau ʻohake ai ʻa e ngaahi feilaulau tutú kia Sihova, ʻa e ngaahi feilaulau tutu+ ʻi he pongipongí mo e efiafí. 4 Pea naʻa nau fai ʻa e Kātoanga ʻo e Falelouʻakaú* ʻo fakatatau ki he meʻa kuo tohí,+ pea naʻa nau ʻohake ʻi he ʻaho ki he ʻaho ʻa e lahi pau ʻo e ngaahi feilaulau tutu naʻe fiemaʻu ke fai ʻi he ʻaho taki taha.+ 5 ʻI he hili iá, naʻa nau ʻohake ʻa e feilaulau tutu tuʻumaʻú+ mo e ngaahi feilaulau ki he ngaahi māhina foʻoú+ pea ki he ngaahi faʻahitaʻu kātoanga toputapu+ kotoa ʻa Sihová, pea pehē ki he feilaulau mei he tokotaha kotoa naʻe loto ke ne ʻohake ha feilaulau loto-tauʻatāina+ kia Sihová. 6 Naʻe kamata ke nau ʻohake mei he ʻaho ʻuluaki ʻo e māhina hono fitú+ ʻa e ngaahi feilaulau tutu kia Sihova, neongo naʻe teʻeki ai ke fakatoka ʻa e fakavaʻe ʻo e temipale ʻo Sihová.

7 Naʻa nau ʻoange ʻa e paʻanga ki he kau tā maká+ mo e kau tangata nima-meaʻá,+ mo e meʻakai mo e inu pea mo e lolo ki he kau Saitoní mo e kau Tāiá ʻi heʻenau ʻomai ʻi tahi ʻa e papa sitá mei Lepanoni ki Siopa,+ ʻo fakatatau ki he mafai naʻe ʻoange kiate kinautolu ʻe Tuʻi Kōlesi ʻo Pēsiá.+

8 ʻI he taʻu hono ua hili ʻenau haʻu ki he fale ʻo e ʻOtua moʻoní ʻi Selusalemá, ʻi he māhina hono uá, naʻe kamata ai ʻa e ngāué ʻe Seluipēpeli ko e foha ʻo Saletilí, Sīsua ko e foha ʻo Sihosatakí mo e toenga ʻo honau fanga tokouá, ʻa e kau taulaʻeikí mo e kau Līvaí, pea mo e faʻahinga kotoa naʻe omi mei he nofo pōpulá+ ki Selusalemá; naʻa nau fakanofo ʻa e kau Līvai mei he taʻu 20 ʻo faai ki ʻolunga ke nau tokangaʻi ʻa e ngāue ʻo e fale ʻo Sihová. 9 Ko ia naʻe kau fakataha ai ʻa Sīsua, ko hono ngaahi fohá mo hono fanga tokouá, mo Katimieli mo hono ngaahi fohá, ʻa e ngaahi foha ʻo Siutá,* ke tokangaʻi ʻa e faʻahinga naʻa nau fai ʻa e ngāue ʻi he fale ʻo e ʻOtua moʻoní, fakataha mo e ngaahi foha ʻo Henatatí,+ ko honau ngaahi fohá mo honau fanga tokouá, ʻa e kau Līvaí.

10 ʻI hono fakatoka ʻe he kau langá ʻa e fakavaʻe ʻo e temipale ʻo Sihová,+ naʻe tuʻu hake leva ʻa e kau taulaʻeikí ʻoku nau teunga fakataulaʻeiki mo e ngaahi talupité,+ pea ko e kau Līvaí, ʻa e ngaahi foha ʻo ʻĒsafé mo e ngaahi simipalé, ke fakahīkihikiʻi ʻa Sihova ʻo fakatatau ki he fakahinohino ʻa Tuʻi Tēvita ʻo ʻIsilelí.+ 11 Pea naʻe kamata ke nau hiva fetāliaki+ ʻo fakahīkihikiʻi mo ʻoatu ʻa e fakamālō kia Sihova “he ʻoku lelei ia; ko ʻene ʻofa mateaki ki ʻIsilelí ʻoku tolonga ʻo taʻengata.”+ Pea naʻe kaila leʻo-lahi ʻa e kakaí kotoa ʻi he fakahīkihiki kia Sihova koeʻuhí kuo fakatoka ʻa e fakavaʻe ʻo e fale ʻo Sihová. 12 Ko e tokolahi ʻi he kau taulaʻeikí, ko e kau Līvaí, mo e ngaahi ʻulumotuʻa ʻo e ngaahi fale ʻo ʻenau ngaahi tamaí—ʻa e kau tangata taʻumotuʻa naʻa nau sio ʻi he fale ki muʻá+—naʻa nau tangi leʻo-lahi ʻi heʻenau sio ki hono fakatoka ʻa e fakavaʻe ʻo e fale ko ení, lolotonga ia naʻe kaila fiefia leʻo-lahi ʻaupito+ ʻa e tokolahi. 13 Ko ia naʻe ʻikai lava ai ke fakafaikehekeheʻi ʻe he kakaí ʻa e ongo ʻo e kaikaila fiefiá mei he ongo ʻo e tangí, he naʻe kaikaila ʻa e kakaí ʻo fuʻu leʻo-lahi pea naʻe ongo atu ia ki he mamaʻó.

4 ʻI he fanongo ʻa e ngaahi fili ʻo Siuta mo Penisimaní+ ʻoku langa ʻe he faʻahinga naʻe foki mei honau ʻave fakamālohí+ ha temipale kia Sihova ko e ʻOtua ʻo ʻIsilelí, 2 naʻa nau fakaofiofi atu he taimi pē ko iá kia Seluipēpeli mo e ngaahi ʻulumotuʻa ʻo e ngaahi fale ʻo e ngaahi tamaí ʻo pehē kiate kinautolu: “Tuku ke mau langa fakataha mo kimoutolu; he ʻi he hangē ko kimoutolú, ʻoku mau lotu* ki homou ʻOtuá+ pea kuo mau faifeilaulau kiate ia talu mei he ngaahi ʻaho ʻo Tuʻi ʻEsa-hātoni+ ʻo ʻAsīliá, ʻa ia naʻá ne ʻomi kimautolu ki hení.”+ 3 Kae kehe, naʻe pehē ange ʻe Seluipēpeli mo Sīsua pea mo e toenga ʻo e ngaahi ʻulumotuʻa ʻo e ngaahi fale ʻo e ngaahi tamai ʻa ʻIsilelí kiate kinautolu: “ʻOku ʻikai hamou kaunga kiate kimautolu ʻi hono langa ha fale ki homau ʻOtuá,+ ko kimautolu pē te mau langa ia kia Sihova ko e ʻOtua ʻo ʻIsilelí, ʻo hangē pē ko ia naʻe fekauʻi mai ʻe Tuʻi Kōlesi ko e tuʻi ʻo Pēsiá.”+

4 Pea ko e kakai ʻo e fonuá naʻa nau hokohoko fakalotosiʻiʻi ʻa e* kakai ʻo Siutá pea fakavaivaiʻi honau lotó ʻi hono fai ʻo e langá.+ 5 Naʻa nau totongiʻi mai ʻa e kau faleʻi ke veuki ʻenau ngaahi palaní+ ʻi he ngaahi ʻaho kotoa ʻo Tuʻi Kōlesi ʻo Pēsiá ʻo aʻu ki he pule ʻa Tuʻi Talaiasi+ ʻo Pēsiá. 6 ʻI he kamata ʻa e pule ʻa ʻEhasiveló, naʻa nau fai ai ha tohi ʻo talatalaakiʻi ʻa e kakai ʻo Siuta mo Selusalemá. 7 Pea ʻi he ngaahi ʻaho ʻo Tuʻi ʻAtasease ʻo Pēsiá, naʻe faitohi ai ʻa Pisilami, Mitelatata, Tapeeli, mo e toenga ʻo hono kaungāngāué kia ʻAtasease ko e tuʻí; naʻa nau liliu ʻa e tohí ki he lea faka-Alameá,+ ʻo hiki ia ʻi he ngaahi mataʻitohi faka-Alamea.*

8 * Naʻe faitohi ʻa Lēhumi ko e ʻōfisa pule fakapuleʻangá mo Simisai ko e sikalaipé ʻo fekauʻaki mo Selusalema kia Tuʻi ʻAtasease, ʻo peheni: 9 (Naʻe ʻoatu ia meia Lēhumi ko e ʻōfisa pule fakapuleʻangá mo Simisai ko e sikalaipé mo e toenga ʻo hona kaungāngāué, ʻa ia ko e kau fakamāú mo e kau kōvana māʻulalo angé, ko e kau sekelitalí, ko e kakai ʻo ʻElekí,+ ko e kau Pāpiloné, ko e kakai ʻo Susá,+ ʻa ia ko e kau ʻĪlamí,+ 10 mo e toenga ʻo e ngaahi puleʻanga naʻe ʻave fakamālohi ʻe he ʻeiki lahi mo lāngilangiʻia ko ʻAsinapá ʻo fakanofonofo ʻi he ngaahi kolo ʻo Samēliá,+ pea mo e toenga ʻi he vahefonua he Tuʻa Vaitafé,* pea ko eni 11 ko ha tatau eni ʻo e tohi naʻa nau ʻoatu kiate iá.)

“Kia Tuʻi ʻAtasease, mei hoʻo kau sevānití, ʻa e kau tangata ʻo e vahefonua ʻi he Tuʻa Vaitafé: Ko eni 12 tuku ke ʻilo ʻe he ʻAfioná ko e kau Siu ko ia naʻe omi ki heni meiate koé kuo nau aʻu mai ki Selusalema. ʻOku nau toe langa ʻa e kolo angatuʻu mo fulikivanú, pea fakaʻosiʻosi ʻa e ngaahi ʻaá+ mo fakaleleiʻi ʻa hono ngaahi fakavaʻé. 13 Ko eni tuku ke ʻilo ʻe he ʻAfioná kapau ʻe toe langa ʻa e koló ni pea ʻosi ʻa hono ngaahi ʻaá, heʻikai ke nau totongi ha ngaahi tukuhau,*+ pea ʻe iku ai ki he mole ʻa e ngaahi koloa ʻa e ngaahi tuʻí. 14 Koeʻuhí ʻoku mau maʻu homau vāhengá mei he palasí* pea ʻoku ʻikai totonu kiate kimautolu ke sio ʻoku hoko ha maumau ki he ngaahi meʻa ʻa e tuʻí, ko ia kuo mau ʻoatu ai ʻa e tohí ni ke ʻilo ʻa e meʻá ni ʻe he ʻAfioná, 15 koeʻuhí ke fai ha fakatotolo ʻi he tohi lēkooti ʻo hoʻo fanga kuí.+ Te ke kumi ʻi he tohi lēkōtí ʻo ʻilo ai ko e koló ni ko ha kolo angatuʻu, fakatupu maumau ki he ngaahi tuʻí mo e ngaahi vahefonuá,* pea kuo ʻi ai ʻa e faʻahinga naʻa nau langaʻi ʻa e angatuʻu talu pē mei he kuohilí. Ko e ʻuhinga ia naʻe fakaʻauha ai ʻa e koló ni.+ 16 ʻOku mau ʻai ke ʻilo ʻe he ʻAfioná kapau ʻe toe langa ʻa e koló ni pea ʻosi ʻa hono ngaahi ʻaá, heʻikai te ke toe pule ki he* vahefonua ʻi he Tuʻa Vaitafé.”+

17 Naʻe ʻoatu ʻe he tuʻí ha tali kia Lēhumi ko e ʻōfisa pule fakapuleʻangá mo Simisai ko e sikalaipé mo e toenga ʻo hona kaungāngāue naʻe nofo ʻi Samēliá pea mo e toenga naʻe ʻi he vahefonua ʻi he Tuʻa Vaitafé:

“Mālō e lelei! Ko eni 18 ko e tohi kuo mou ʻomi kiate aú kuo lau ia ʻo mahino* ʻi hoku ʻaó. 19 ʻI heʻeku tuʻutuʻuní naʻe fai ai ha fakatotolo, pea naʻe ʻilo ai talu pē mei he kuohilí mo e ʻi ai ʻa e ngaahi fakafetau ʻi he koló ki he ngaahi tuʻí, pea kuo hoko ai ʻa e ngaahi angatuʻu mo e fakafepaki.+ 20 Naʻe ʻi ai ʻa e ngaahi tuʻi mālohi naʻa nau pule ki Selusalema ʻa ia naʻa nau puleʻi ʻa e vahefonua kotoa ʻi he Tuʻa Vaitafé, pea naʻe totongi kiate kinautolu ʻa e ngaahi tukuhau.* 21 Ko eni, fai ha tuʻutuʻuni ki he kau tangatá ni ke taʻofi ʻa e ngāué, koeʻuhí ke ʻoua naʻa toe langa ʻa e koló kae ʻoua kuó u ʻoatu ha tuʻutuʻuni. 22 Tokanga ke ʻoua naʻa mou tukunoaʻi ʻo ʻikai fai ki he meʻá ni, koeʻuhí ke ʻoua naʻa toe hoko ha maumau+ ki he ngaahi meʻa ʻa e tuʻí.”

23 Pea ʻi he hili hono lau ʻa e tatau ʻo e tohi ʻa Tuʻi ʻAtaseasé ʻi he ʻao ʻo Lēhumi mo Simisai ko e sikalaipé pea mo hona kaungāngāué, naʻa nau ʻalu fakavave ki Selusalema ki he kau Siú pea ngāueʻaki ha ngaahi meʻatau ke taʻofi kinautolu. 24 Ko e taimi leva ia naʻe taʻofi ai ʻa e ngāue ki he fale ʻo e ʻOtuá, ʻa ia naʻe ʻi Selusalemá; pea naʻe tuʻu ai pē ia ʻo aʻu ki he taʻu hono ua ʻo e pule ʻa Tuʻi Talaiasi ʻo Pēsiá.+

5 Pea naʻe fai ʻe he ongo palōfita ko Hākeai+ mo Sākalaia+ ko e mokopuna ʻo ʻItó+ ha kikite ki he kau Siu naʻe ʻi Siuta mo Selusalemá, ʻi he huafa ʻo e ʻOtua ʻo ʻIsilelí ʻa ia naʻe ʻiate kinautolú. 2 Ko e taimi ia naʻe kamata ke toe langa ai ʻe Seluipēpeli+ ko e foha ʻo Saletilí mo Sīsua+ ko e foha ʻo Sihosatakí ʻa e fale ʻo e ʻOtuá,+ ʻa ia naʻe ʻi Selusalemá; pea naʻe kau mo kinaua ʻa e ongo palōfita ʻa e ʻOtuá ʻo poupou kiate kinaua.+ 3 ʻI he taimi ko iá naʻe haʻu kiate kinautolu ʻa Tatenai ko e kōvana ʻo e vahefonua ʻi he Tuʻa Vaitafé* mo Setali-posenai mo hona kaungāngāué ʻo ʻeke ange: “Ko hai naʻá ne ʻoatu ʻa e tuʻutuʻuni ke mou langa ʻa e fale ko ení mo fakaʻosi ʻa e langa* ko ení?” 4 Pea naʻa nau ʻeke ange kiate kinautolu: “Ko hai ʻa e hingoa ʻo e kau tangata ʻoku nau ngāue ʻi he langa ko ení?” 5 Ka naʻe tokangaʻi hifo ʻe he ʻOtuá ʻa e* kau mātuʻa ʻo e kau Siú,+ pea naʻe ʻikai te nau taʻofi kinautolu kae ʻoua ke ʻave ʻa e fakamatalá ni kia Talaiasi pea lava ke ʻomai mei ai ha tohi ʻo fekauʻaki mo e meʻá ni.

6 Ko ha tatau eni ʻo e tohi naʻe ʻave ʻe Tatenai ko e kōvana ʻo e vahefonua ʻi he Tuʻa Vaitafé mo Setali-posenai mo hono kaungāngāué, ʻa e kau kōvana māʻulalo ange ʻo e vahefonua ʻi he Tuʻa Vaitafé, kia Tuʻi Talaiasí; 7 naʻa nau ʻoatu ʻa e fakamatalá kiate ia, pea ko e meʻa eni naʻa nau tohí:

“Kia Tuʻi Talaiasi:

“Ke ʻiate koe ʻa e melinó! 8 Tuku ke ʻilo ʻe he ʻAfioná naʻa mau ʻalu ki he vahefonua* ʻo Siutá ki he fale ʻo e ʻOtua lahí, pea ʻoku langa ia ʻaki ʻa e ngaahi fuʻu maka lalahi, pea naʻe fakatoka ʻa e papá ʻi he ngaahi holisí. ʻOku vēkeveke ʻa e kakaí ʻi hono fai ʻo e ngāué pea ʻoku laka ia ki muʻa tupu mei heʻenau ngaahi feingá. 9 Pea naʻa mau fakafehuʻi ʻa ʻenau kau mātuʻá, ʻo ʻeke ange: ‘Ko hai naʻá ne ʻoatu ʻa e tuʻutuʻuni ke mou langa ʻa e fale ko ení mo fakaʻosi ʻa e langa*+ ko ení?’ 10 Naʻa mau toe ʻeke foki ʻa honau hingoá ke fakahā atu kiate koe, koeʻuhí ke lava ʻo mau hiki ʻa e hingoa ʻo e kau tangata ʻoku nau takimuʻá.

11 “Ko e tali eni naʻa nau ʻomí: ‘Ko e kau sevāniti kimautolu ʻa e ʻOtua ʻo langi mo māmaní, pea ʻoku mau toe langa ʻa e fale ʻa ia naʻe langa ʻi he ngaahi taʻu lahi kuo maliu atú, ʻa ia naʻe langa mo fakaʻosi+ ʻe ha tuʻi lahi ʻo ʻIsileli. 12 Kae kehe, koeʻuhi naʻe fakahouhauʻi ʻe heʻemau ngaahi tamaí ʻa e ʻOtua ʻo langí,+ naʻá ne tuku kinautolu ki he nima ʻo Tuʻi Nepukanesa+ ʻo Pāpiloné, ʻa e tangata Kalitiá, ʻa ia naʻá ne haveki ʻa e falé ni+ pea ʻave fakamālohi ʻa e kakaí ki Pāpiloné.+ 13 Neongo ia, ʻi he ʻuluaki taʻu ʻo e pule ʻa Tuʻi Kōlesi ʻo Pāpiloné, naʻe ʻomai ai ʻe Tuʻi Kōlesi ha tuʻutuʻuni ke toe langa ʻa e fale ko eni ʻo e ʻOtuá.+ 14 ʻIkai ngata aí, naʻe ʻave ʻe Tuʻi Kōlesi mei he temipale ʻo Pāpiloné ʻa e ngaahi ʻaiʻanga meʻa koula mo siliva ʻo e fale ʻo e ʻOtuá ʻa ia naʻe toʻo ʻe Nepukanesa mei he temipale ʻi Selusalemá ʻo ʻave ki he temipale ʻi Pāpiloné.+ Naʻe ʻoange ia ki ha tangata ko Sesipasa,*+ ʻa ia naʻe fakanofo ʻe Kōlesi ko e kōvana.+ 15 Naʻe pehē ange ʻe Kōlesi kiate ia: “ʻAve ʻa e ngaahi ʻaiʻanga meʻa ko ení. ʻAlu ʻo tuku ia ʻi he temipale ʻa ia ʻoku ʻi Selusalemá pea tuku ke toe langa ʻa e fale ʻo e ʻOtuá ʻi hono tuʻuʻanga ki muʻá.”+ 16 Pea naʻe haʻu ʻa e tangata ko eni ko Sesipasá, peá ne fakatoka ʻa e ngaahi fakavaʻe ʻo e fale ʻo e ʻOtuá,+ ʻa ia ʻoku ʻi Selusalemá; pea talu mei ai kuo fai ʻa e langá ʻo aʻu mai ki he taimí ni, ka kuo teʻeki ai ke kakato.’+

17 “Ko eni kapau ʻoku hā lelei ki he ʻAfioná, tuku ke fai ha fakatotolo ʻi he tukuʻanga koloa fakatuʻi ʻi Pāpiloné, ke fakapapauʻi pe naʻe tuku atu ʻe Tuʻi Kōlesi ha tuʻutuʻuni ke toe langa ʻa e fale ko ia ʻo e ʻOtuá ʻi Selusalemá;+ pea tuku ke ʻomi ʻa e tuʻutuʻuni ʻa e ʻAfioná ʻo fekauʻaki mo e meʻá ni kiate kimautolu.”

6 Naʻe tuku atu leva ʻi he taimi ko iá ʻe Tuʻi Talaiasi ha tuʻutuʻuni, pea naʻa nau fai ha fakatotolo ʻi he tauhiʻanga lēkooti* naʻe tuku ai ʻa e ngaahi meʻa mahuʻinga ʻi Pāpiloné. 2 Pea naʻe maʻu ha takainga tohi ʻi he feituʻu fakakolotau ʻi ʻEkipatena ʻi he vahefonua* ʻo Mītiá, pea ko e fakamatala eni naʻe hiki aí:

3 “ʻI he ʻuluaki taʻu ʻo e pule ʻa Tuʻi Kōlesí, naʻe ʻoatu ʻe Tuʻi Kōlesi ha tuʻutuʻuni ʻo fekauʻaki mo e fale ʻo e ʻOtuá ʻi Selusalemá:+ ‘Tuku ke toe langa ʻa e falé ko e feituʻu ia ke nau ʻoatu ai ʻa e ngaahi feilaulaú, pea ke fokotuʻu maʻu ʻa hono ngaahi fakavaʻé; ko hono māʻolungá ʻe kiupite ʻe 60,* ko hono fālahí ʻe kiupite ʻe 60,+ 4 pea ke ʻotu maka lalahi ʻe tolu mo e ʻotu papa ʻe taha;+ pea ke totongi ʻa e fakamolé mei he fale ʻo e tuʻí.+ 5 Pehē foki, ko e ngaahi ʻaiʻanga meʻa koula mo siliva ʻo e fale ʻo e ʻOtuá ʻa ia naʻe toʻo ʻe Nepukanesa mei he temipale naʻe ʻi Selusalemá ʻo ʻave ki Pāpiloné,+ ke fakafoki ia koeʻuhí ke tuku ki honau tukuʻanga ʻi he temipale ʻi Selusalemá pea ke fakahū ki he fale ʻo e ʻOtuá.’+

6 “Pea ko eni ʻe Tatenai ko e kōvana ʻo e vahefonua ʻi he Tuʻa Vaitafé,* Setali-posenai, mo homo kaungāngāué, ʻa e kau kōvana māʻulalo ange ʻo e vahefonua ʻi he Tuʻa Vaitafé+—mou mavahe. 7 ʻOua te mou kaunoa ʻi he ngāue ʻi he fale ko ia ʻo e ʻOtuá. Ko e kōvana ʻo e kau Siú mo e kau mātuʻa ʻo e kau Siú te nau toe langa ʻa e fale ko ia ʻo e ʻOtuá ʻi hono tuʻuʻanga ki muʻá. 8 ʻIkai ko ia pē, ʻoku ou ʻoatu ha tuʻutuʻuni ki he meʻa ke mou fai ki he kau mātuʻa ko eni ʻo e kau Siú ki hono toe langa ʻa e fale ko ia ʻo e ʻOtuá: Mou toʻo leva ʻa e ngaahi fakamolé mei he koloa fakatuʻí,+ mei he tukuhau naʻe tānaki ʻi he vahefonua ʻi he Tuʻa Vaitafé, ʻo ʻoange ki he kau tangatá ni ke nau hokohoko atu ʻo ʻikai fakahohaʻasi.+ 9 Pea ko e hā pē ʻe fiemaʻú—ko e fanga kiʻi pulu tangata+ pea pehē ki he fanga sipi tangata+ mo e fanga lami+ ki he ngaahi feilaulau tutu ki he ʻOtua ʻo langí, ko e uite,+ māsima,+ uaine,+ pea mo e lolo,+ ʻo fakatatau ki he lau ʻa e kau taulaʻeiki ʻi Selusalemá—ke hokohoko atu hono ʻoange fakaʻaho kiate kinautolú ʻo ʻoua ʻe tuku, 10 koeʻuhí ke nau ʻoatu hokohoko ʻa e ngaahi feilaulau ʻoku fakahōifua ki he ʻOtua ʻo langí pea lotu koeʻuhi ko e moʻui ʻa e tuʻí mo hono ngaahi fohá.+ 11 Kuó u toe ʻoatu foki ʻa e tuʻutuʻuni kapau ʻe maumauʻi ʻe ha taha ʻa e laó ni, ʻe taʻaki ha vaʻa papa mei hono falé pea ʻe hiki hake ia ʻo fakamaʻu ki ai,* pea ʻe fulihi ʻa hono falé ke hoko ko ha fale mālōlō ki he kakaí* koeʻuhi ko e hiá ni. 12 Pea ʻofa ke hanga ʻe he ʻOtuá ʻa ia kuó ne ʻai ke ʻi he potu ko iá ʻa hono huafá+ ʻo liua ha tuʻi mo ha kakai pē ʻe hiki hake honau nimá ke maumauʻi ʻa e tuʻutuʻuni ko ení pea fakaʻauha ʻa e fale ko ia ʻo e ʻOtuá, ʻa ia ʻoku ʻi Selusalemá. Ko au Talaiasi, ʻoku ou ʻoatu ʻa e tuʻutuʻuni ko ení. Ke fai leva ʻa e meʻa ko iá.”

13 Naʻe fai leva ʻe Tatenai ko e kōvana ʻo e vahefonua ʻi he Tuʻa Vaitafé, mo Setali-posenai,+ pea mo hona kaungāngāué ʻa e meʻa kotoa pē naʻe tuʻutuʻuni ʻe Tuʻi Talaiasí. 14 Pea ko e kau mātuʻa ʻo e kau Siú naʻe hokohoko atu ʻenau langá pea naʻe laka ki muʻa,+ ʻi hono fakaʻaiʻai ʻe he kikite ʻa Hākeai+ ko e palōfitá mo Sākalaia+ ko e mokopuna ʻo ʻItó; naʻe ʻosi ʻenau langa iá ʻi he tuʻutuʻuni ʻa e ʻOtua ʻo ʻIsilelí+ pea ʻi he tuʻutuʻuni ʻa Kōlesi+ mo Talaiasi+ pea mo Tuʻi ʻAtasease+ ʻo Pēsiá. 15 Naʻa nau fakakakato ʻa e falé ʻi he ʻaho hono tolu ʻo e māhina ko ʻĀtalí,* ʻi he taʻu hono ono ʻo e pule ʻa Tuʻi Talaiasí.

16 Pea naʻe huufi* ʻe he kau ʻIsilelí, ʻo kau ai ʻa e kau taulaʻeikí, mo e kau Līvaí,+ pea mo e toenga ʻo e faʻahinga naʻe ʻave fakamālohi ki muʻá, ʻa e fale ko eni ʻo e ʻOtuá ʻi he fiefia. 17 Pea naʻa nau ʻoatu ki he huufi ʻo e fale ko eni ʻo e ʻOtuá ʻa e fanga pulu tangata ʻe 100, sipi tangata ʻe 200, lami ʻe 400, pea faiʻaki ha feilaulau angahala maʻa ʻIsileli kotoa ha fanga kosi tangata ʻe 12 ʻo fakatatau ki he tokolahi ʻo e ngaahi matakali ʻo ʻIsilelí.+ 18 Pea naʻa nau fakanofo ʻa e kau taulaʻeikí ʻi honau ngaahi kulupú pea mo e kau Līvaí ʻi honau ngaahi vāhengá ki he ngāue ʻa e ʻOtuá ʻi Selusalemá,+ ʻo fakatatau ki he meʻa kuo hiki ʻi he tohi ʻa Mōsesé.+

19 Pea naʻe fai ʻa e Pāsová ʻe he faʻahinga naʻe ʻave fakamālohi ki muʻá ʻi he ʻaho hono 14 ʻo e ʻuluaki māhiná.+ 20 Ko e kau taulaʻeikí mo e kau Līvaí, ko e moʻoni naʻa nau fakamaʻa kinautolu,+ ko ia naʻa nau maʻa kotoa ai; naʻa nau tāmateʻi ʻa e fanga monumanu ʻo e feilaulau Pāsová maʻá e faʻahinga kotoa naʻe ʻave fakamālohi ki muʻá, pea maʻa honau kaungā-taulaʻeikí, pea maʻanautolu. 21 Pea ko e kau ʻIsileli naʻa nau foki mei he ʻave fakamālohí naʻa nau kai ia, fakataha mo e tokotaha kotoa naʻe kau mo kinautolu pea kuó ne fakamavaheʻi ia mei he taʻemaʻa ʻa e ngaahi kakai ʻo e fonuá ke lotu* kia Sihova ko e ʻOtua ʻo ʻIsilelí.+ 22 Naʻa nau fai fiefia foki ʻa e Kātoanga ʻo e Mā Taʻelēvaní+ ʻi he ʻaho ʻe fitu, he naʻe ʻai kinautolu ʻe Sihova ke nau fiefia pea naʻá ne ʻai ke loto-lelei kiate kinautolu+ ʻa e tuʻi ʻAsīliá, ko ia naʻá ne poupouʻi kinautolu* ʻi he ngāue ʻo e fale ʻo e ʻOtua moʻoní, ʻa e ʻOtua ʻo ʻIsilelí.

7 ʻI he hili ʻa e ngaahi meʻá ni, lolotonga ʻa e pule ʻa Tuʻi ʻAtasease+ ʻo Pēsiá, naʻe foki ai ʻa ʻĒsela.*+ Ko e foha ia ʻo Sēlaia,+ foha ʻo ʻAsalaia, foha ʻo Hilikaia,+ 2 foha ʻo Salumi, foha ʻo Sātoki, foha ʻo ʻAhitupi, 3 foha ʻo ʻAmalaia, foha ʻo ʻAsalaia,+ foha ʻo Melaioti, 4 foha ʻo Silaia, foha ʻo ʻOsi, foha ʻo Puki, 5 foha ʻo ʻApisua, foha ʻo Fineasi,+ foha ʻo ʻEliesa,+ ko e foha ʻo ʻĒlone+ ko e taulaʻeiki lahí. 6 Ko ʻĒsela eni naʻe haʻu mei Pāpiloné. Ko ha tokotaha hiki-tatau* ia naʻe ʻilo lahi ki he* Lao ʻa Mōsesé,+ ʻa ia naʻe ʻomi ʻe Sihova ko e ʻOtua ʻo ʻIsilelí. Naʻe foaki kiate ia ʻe he tuʻí ʻa e meʻa kotoa naʻá ne kolé, he naʻe ʻiate ia ʻa e nima ʻo Sihova ko hono ʻOtuá.

7 Ko e niʻihi ʻo e kau ʻIsilelí, kau taulaʻeikí, kau Līvaí,+ kau hivá,+ kau leʻo matapaá,+ pea mo e kau sevāniti ʻi he temipalé,*+ naʻa nau ʻalu hake ki Selusalema ʻi he taʻu hono fitu ʻo e pule ʻa Tuʻi ʻAtaseasé. 8 Pea naʻe ʻalu ʻa ʻĒsela ki Selusalema ʻi he māhina hono nimá, ʻi he taʻu hono fitu ʻo e pule ʻa e tuʻí. 9 ʻI he ʻaho ʻuluaki ʻo e ʻuluaki māhiná, naʻe kamata ai ʻene fononga mei Pāpiloné, pea naʻá ne aʻu ki Selusalema ʻi he ʻuluaki ʻaho ʻo e māhina hono nimá, he naʻe tokoniʻi ia ʻe hono ʻOtuá.+ 10 Naʻe teuteu ʻe ʻĒsela ʻa hono lotó* ke kumi ki he Lao ʻa Sihová pea ke ngāueʻaki ia,+ pea ke akoʻi ʻa e ngaahi tuʻutuʻuní mo e ngaahi fakamāú ʻi ʻIsileli.+

11 Ko ha tatau eni ʻo e tohi naʻe ʻoange ʻe Tuʻi ʻAtasease kia ʻĒsela ko e taulaʻeikí pea ko e tokotaha hiki-tataú,* ko ha tokotaha naʻe mataotao ʻi hono ako ʻa e* ngaahi fekau ʻa Sihová pea mo ʻene ngaahi tuʻutuʻuni ki ʻIsilelí:

12 * “Ko au ʻAtasease,+ ko e tuʻi ʻo e ngaahi tuʻí, kia ʻĒsela ko e taulaʻeikí, ʻa e tokotaha hiki-tatau* ʻo e Lao ʻa e ʻOtua ʻo langí: ʻOfa ke ke maʻu ʻa e melino lahi fau. Pea ko eni 13 kuó u ʻoatu ha tuʻutuʻuni ko e tokotaha kotoa pē ʻi hoku puleʻanga ʻo e kakai ʻo ʻIsilelí mo honau kau taulaʻeikí mo e kau Līvaí ʻoku loto-lelei ke ʻalu mo koe ki Selusalemá, ke nau ʻalu.+ 14 He kuo fekauʻi koe ʻe he tuʻí mo ʻene kau faleʻi ʻe toko fitú ke fakatotoloʻi pe ʻoku ngāueʻaki ʻa e Lao ʻa ho ʻOtuá, ʻa ia ʻoku ʻiate koé,* ʻi Siuta mo Selusalema, 15 pea ke ʻave ʻa e siliva mo e koula ko ia kuo foaki loto-lelei ʻe he tuʻí mo ʻene kau faleʻí ki he ʻOtua ʻo ʻIsilelí, ʻa ia ko hono ʻafioʻangá ʻoku ʻi Selusalemá, 16 mo e siliva pea mo e koula kotoa ʻokú ke tānaki* ʻi he kotoa ʻo e vahefonua* ʻo Pāpiloné, fakataha mo e meʻaʻofa ʻoku foaki loto-lelei ʻe he kakaí mo e kau taulaʻeikí ki he fale ʻo honau ʻOtuá, ʻa ia ʻoku ʻi Selusalemá.+ 17 Pea te ke fakatau fakavavevave ʻaki ʻa e paʻangá ni ha fanga pulu tangata,+ fanga sipi tangata,+ fanga lami,+ fakataha mo honau ngaahi feilaulau meʻakaí*+ mo honau ngaahi feilaulau inú,+ pea te ke ʻoatu ia ʻi he ʻōlita ʻo e fale ʻo homou ʻOtuá ʻi Selusalemá.

18 “Pea ko e hā pē ha meʻa ʻoku hā lelei kiate koe mo ho fanga tokouá ke faí, ʻe lava ke mou faiʻaki ia ʻa e toenga ʻo e silivá mo e koulá, ʻo fakatatau ki he finangalo ʻo homou ʻOtuá. 19 Pea ko e kotoa ʻo e ngaahi ʻaiʻanga meʻa kuo ʻoatu kiate koe ki he ngāue ʻi he fale ʻo ho ʻOtuá, te ke ʻave ia ki Selusalema ʻo tuku ʻi he ʻao ʻo e ʻOtuá.+ 20 Pea ko e toenga ʻo e ngaahi meʻa ʻoku fiemaʻu ki he fale ʻo ho ʻOtuá ʻa ia ʻoku fiemaʻu ke ke foaki atú, te ke foaki atu ia mei he koloa ʻa e tuʻí.+

21 “Ko au, Tuʻi ʻAtasease, kuó u ʻoatu ha tuʻutuʻuni ki he kotoa ʻo e kau tauhi koloa ʻi he vahefonua ʻo e Tuʻa Vaitafé,* ko e meʻa kotoa pē ʻoku fiemaʻu meiate kimoutolu ʻe ʻĒsela+ ko e taulaʻeikí, ʻa e tokotaha hiki-tatau* ʻo e Lao ʻa e ʻOtua ʻo langí, ʻe ʻoange fakavavevave ia, 22 ʻo aʻu ki he talēniti* siliva ʻe 100, fua koa* ʻe 100 ʻo e uite, fua pate* ʻe 100 ʻo e uaine,+ fua pate ʻe 100 ʻo e lolo,+ mo e māsima+ taʻefakangatangata. 23 Ko e hā pē ha meʻa ʻoku tuʻutuʻuni ʻe he ʻOtua ʻo langí ʻo fekauʻaki mo e fale ʻo e ʻOtua ʻo langí,+ ke fai ia ʻi he faivelenga, koeʻuhí ke ʻoua naʻa hoko mai ha houhau ki he puleʻanga ʻo e tuʻí mo hono ngaahi fohá.+ 24 Pea ʻoku toe fai atu ʻa e faleʻi ko ení kiate kimoutolu, ʻoku ʻikai ngofua ke hilifaki ha faʻahinga tukuhau*+ ki ha taha pē ʻo e kau taulaʻeikí mo e kau Līvaí, kau mūsiká,+ kau leʻo matapaá, kau sevāniti ʻo e temipalé,*+ pea mo e kau ngāue ʻi he fale ko eni ʻo e ʻOtuá.

25 “Pea ko koe, ʻĒsela, fakatatau ki he poto ʻokú ke maʻu mei ho ʻOtuá,* fakanofo ha kau ʻōfisa fakamaauʻanga mo ha kau fakamaau ke nau fakamāuʻi ʻa e kakai kotoa ʻi he vahefonua ʻo e Tuʻa Vaitafé, ʻa e faʻahinga kotoa ʻoku nau ʻiloʻi ʻa e ngaahi lao ʻa ho ʻOtuá; pea ʻoku totonu ke mou akoʻi ha taha pē ʻoku ʻikai te ne ʻilo iá.+ 26 Pea ko e tokotaha kotoa pē ʻoku ʻikai te ne tauhi ʻa e Lao ʻa ho ʻOtuá pea mo e lao ʻa e tuʻí ʻoku totonu ke fakahoko ha fakamaau fakavavevave kiate ia, tatau ai pē pe ko e mate, kapusi, moʻua paʻanga, pe tuku pilīsone.”

27 ʻOfa ke fakahīkihikiʻi ʻa Sihova ko e ʻOtua ʻo ʻetau fanga kuí, ʻa ia kuó ne ʻai ʻa e meʻa ko iá ki he loto ʻo e tuʻí ke ngaohi ke fakaʻofoʻofa ʻa e fale ʻo Sihova ʻi Selusalemá!+ 28 Pea kuó ne fakahaaʻi mai kiate au ʻa e ʻofa mateaki ʻi he ʻao ʻo e tuʻí+ mo ʻene kau faleʻí+ pea mo e kotoa ʻo e houʻeiki mālohi ʻa e tuʻí. Ko ia naʻá ku loto-toʻa* koeʻuhí naʻe ʻiate au ʻa e nima ʻo Sihova ko hoku ʻOtuá, pea naʻá ku fakatahatahaʻi mei ʻIsileli ʻa e kau tangata takimuʻá* ke mau ō hake.

8 Pea ko e ngaahi ʻulumotuʻa eni ʻo e ngaahi fale ʻo ʻenau ngaahi tamaí mo e tohi hohoko ʻo e faʻahinga naʻe ʻalu hake mo au mei Pāpilone he lolotonga ʻa e pule ʻa Tuʻi ʻAtaseasé:+ 2 ʻI he ngaahi foha ʻo Fineasí,+ ko Kēsomi; ʻi he ngaahi foha ʻo ʻĪtamá,+ ko Taniela; ʻi he ngaahi foha ʻo Tēvitá, ko Hatusi; 3 ʻi he ngaahi foha ʻo Sikaniá, pea ʻi he ngaahi foha ʻo Pālosí, ko Sākalaia, pea naʻe kau fakataha mo ia ʻi he tohi hohokó ʻa e kau tangata ʻe toko 150; 4 ʻi he ngaahi foha ʻo Pahati-mōapé,+ ko ʻElihoi-nai ko e foha ʻo Silaiá, pea naʻe kau fakataha mo ia ʻa e kau tangata ʻe toko 200; 5 ʻi he ngaahi foha ʻo Satú,+ ko Sikania ko e foha ʻo Sehesilí, pea naʻe kau fakataha mo ia ʻa e kau tangata ʻe toko 300; 6 ʻi he ngaahi foha ʻo ʻĀtiní,+ ko ʻĒpeti ko e foha ʻo Sionatané, pea naʻe kau fakataha mo ia ʻa e kau tangata ʻe toko 50; 7 ʻi he ngaahi foha ʻo ʻĪlamí,+ ko Sisaia ko e foha ʻo ʻAtalaiá, pea naʻe kau fakataha mo ia ʻa e kau tangata ʻe toko 70; 8 ʻi he ngaahi foha ʻo Sefataiá,+ ko Sepataia ko e foha ʻo Maikelí, pea naʻe kau fakataha mo ia ʻa e kau tangata ʻe toko 80; 9 ʻi he ngaahi foha ʻo Sioapé, ko ʻOpataia ko e foha ʻo Sihelí, pea naʻe kau fakataha mo ia ʻa e kau tangata ʻe toko 218; 10 ʻi he ngaahi foha ʻo Paní, ko Selomiti ko e foha ʻo Siosifiá, pea naʻe kau fakataha mo ia ʻa e kau tangata ʻe toko 160; 11 ʻi he ngaahi foha ʻo Pepaí,+ ko Sākalaia ko e foha ʻo Pepaí, pea naʻe kau fakataha mo ia ʻa e kau tangata ʻe toko 28; 12 ʻi he ngaahi foha ʻo ʻAsakatí,+ ko Siohānani ko e foha ʻo Hakataní, pea naʻe kau fakataha mo ia ʻa e kau tangata ʻe toko 110; 13 ʻi he ngaahi foha ʻo ʻĀtonikamí,+ ko kinautolu naʻe fakamuimui tahá, pea ko honau hingoá eni: Ko ʻElifeleti, Sieli, pea mo Semaia, pea naʻe kau fakataha mo kinautolu ʻa e kau tangata ʻe toko 60; 14 pea ʻi he ngaahi foha ʻo Pikivaí,+ ko ʻUtai mo Saputi, pea naʻe kau fakataha mo kinaua ʻa e kau tangata ʻe toko 70.

15 Naʻá ku fakatahatahaʻi kinautolu ʻi he vaitafe ʻoku haʻu ki ʻAhavá,+ pea naʻa mau ʻapitanga ai ʻi he ʻaho ʻe tolu. Ka ʻi he taimi naʻá ku vakaiʻi ai ʻa e kakaí pea mo e kau taulaʻeikí, naʻe ʻikai te u maʻu ai ha taha ʻo e kau Līvaí. 16 Ko ia naʻá ku fekauʻi atu ai ke haʻu ʻa ʻEliese, ʻAlieli, Semaia, ʻElinatani, Sialipi, ʻElinatani, Nētane, Sākalaia, pea mo Mēsuilame, ʻa ia ko e kau tangata takimuʻá, mo Sialipe pea mo ʻElinatani, ʻa ia ko e ongo faiakó. 17 Ko ia naʻá ku fai kiate kinautolu ha fekau ʻo fekauʻaki mo ʻIto ko e taki ʻi he feituʻu naʻe ui ko Kasifia. Naʻá ku tala kiate kinautolu ke fakahā kia ʻIto mo hono fanga tokouá, ʻa e kau sevāniti ʻi he temipalé* naʻe ʻi Kasifiá, ke ʻomai kiate kimautolu ha kau sevāniti ke nau ngāue ʻi he fale ʻo homau ʻOtuá. 18 Koeʻuhí naʻe tokoniʻi kimautolu ʻe homau ʻOtuá, naʻa nau ʻomi ha tangata fakapotopoto mei he ngaahi foha ʻo Mahali+ ko e mokopuna ʻo Līvai ko e foha ʻo ʻIsilelí, ʻa ia ko Selepaia,+ mo hono ngaahi fohá pea mo hono fanga tokouá, ko e kau tangata ʻe toko 18; 19 mo Hasapaia, pea naʻe kau fakataha mo ia ʻa Sisaia mei he haʻa Mēlalí,+ mo hono fanga tokouá mo honau ngaahi fohá, ko e kau tangata ʻe toko 20. 20 Pea naʻe toko 220 ʻa e kau sevāniti ʻi he temipalé* ʻa ia naʻe foaki ʻe Tēvita mo e houʻeikí ki he ngāue ʻa e kau Līvaí, ʻa ia naʻe fakahaaʻi kotoa ʻa honau hingoá.

21 Pea naʻá ku fanongonongo ke fai ha ʻaukai ʻi he vaitafe ʻAhavá, ke fakavaivaiʻi kimautolu ʻi he ʻao ʻo homau ʻOtuá, ke kumi ki ha tataki meiate ia koeʻuhi ko ʻemau fonongá, maʻa kimautolu mo ʻemau fānaú pea mo ʻemau koloá kotoa. 22 Naʻá ku mā ke kole ki he tuʻí ha kau sōtia mo ha kau tangata heka hoosi ke maluʻi kimautolu mei he ngaahi fili ʻi he halá, koeʻuhí naʻa mau pehē ki he tuʻí: “Ko e nima ʻo homau ʻOtuá ʻoku kau mo e faʻahinga kotoa ʻoku kumi kiate iá,+ ka ʻoku hoko mai ʻa hono mālohí mo ʻene houhaú kiate kinautolu kotoa ʻoku nau liʻaki iá.”+ 23 Ko ia naʻa mau ʻaukai ai pea fai ha kole ki homau ʻOtuá ʻo fekauʻaki mo e meʻá ni, pea naʻá ne fanongo mai ki heʻemau tautapá.+

24 Naʻá ku vaheʻi leva ha toko 12 mei he kau pule ʻo e kau taulaʻeikí, ʻa ia ko Selepaia mo Hasapaia,+ fakataha mo e toko hongofulu ʻo hona fanga tokouá. 25 Pea naʻá ku fua kiate kinautolu ʻa e siliva mo e koula pea mo e ngaahi naunau, ko e foaki ia naʻe fai ʻe he tuʻí mo ʻene kau faleʻí mo ʻene houʻeikí pea mo e kotoa ʻo e kau ʻIsileli naʻe ʻi aí, ki he fale ʻo homau ʻOtuá.+ 26 Ko ia naʻá ku fua ai ki honau nimá ʻa e talēniti* siliva ʻe 650, naunau siliva ʻe 100 naʻe feʻunga mo e talēniti ʻe ua ʻa hono mahuʻingá, mo e talēniti koula ʻe 100, 27 fanga kiʻi poulu koula ʻe 20 naʻe feʻunga hono mahuʻingá mo e talaiki* ʻe 1,000, mo e naunau kopa lelei ʻe 2, naʻe kulokula uloulo, ʻo mahuʻinga tatau mo e koulá.

28 Pea naʻá ku pehē kiate kinautolu: “ʻOku mou māʻoniʻoni kia Sihova,+ pea ʻoku toputapu ʻa e ngaahi naunaú, pea ko e silivá mo e koulá ko ha feilaulau loto-tauʻatāina ia kia Sihova ko e ʻOtua ʻo hoʻomou fanga kuí. 29 Mou tokangaʻi lelei ia kae ʻoua ke mou fua ia ʻi he ʻao ʻo e kau pule ʻo e kau taulaʻeikí mo e kau Līvaí pea mo e houʻeiki ʻo e ngaahi fale ʻo e ngaahi tamai ʻa ʻIsilelí ʻi Selusalemá,+ ʻi he ngaahi loki* ʻo e fale ʻo Sihová.” 30 Pea naʻe toʻo ʻe he kau taulaʻeikí mo e kau Līvaí ʻa e siliva mo e koula mo e ngaahi naunau naʻe fua ange kiate kinautolú, koeʻuhí ke ʻave ia ki Selusalema ki he fale ʻo homau ʻOtuá.

31 Faifai atu pē naʻa mau mavahe mei he vaitafe ʻAhavá+ ʻi he ʻaho hono 12 ʻo e ʻuluaki māhiná+ ke mau ō ki Selusalema, pea naʻe kau mo kimautolu ʻa e nima ʻa homau ʻOtuá, ʻo ne fakahaofi kimautolu mei he nima ʻo e filí pea mei he malumu ʻi he halá. 32 Ko ia naʻa mau aʻu ki Selusalema+ pea mau nofo ai ʻi he ʻaho ʻe tolu. 33 Pea ʻi he ʻaho hono faá, naʻa mau fua ʻa e silivá mo e koulá mo e ngaahi naunaú ʻi he fale ʻo homau ʻOtuá+ pea ʻoange ia kia Milemoti+ ko e foha ʻo ʻUlisa ko e taulaʻeikí, pea naʻe ʻiate ia ʻa ʻEliesa ko e foha ʻo Fineasí, pea naʻe ʻiate kinaua ʻa e ongo Līvai ko Siosapati+ ko e foha ʻo Sīsuá pea mo Noataia ko e foha ʻo Pinuí.+ 34 Naʻe lau mo fua ʻa e meʻa kotoa, pea naʻe hiki hono mamafá kotoa. 35 Ko e faʻahinga naʻe haʻu mei he nofo pōpulá, ʻa e faʻahinga naʻe ʻave fakamālohi ki muʻá, naʻa nau ʻoatu ʻa e ngaahi feilaulau tutu ki he ʻOtua ʻo ʻIsilelí, ko e pulu tangata ʻe 12+ maʻa ʻIsileli kotoa, sipi tangata ʻe 96,+ lami tangata ʻe 77, pea mo e kosi tangata ʻe 12+ ko ha feilaulau angahala; ko e meʻá ni kotoa ko ha feilaulau tutu ia kia Sihova.+

36 Pea naʻa mau ʻoange ʻa e ngaahi tuʻutuʻuni ʻa e tuʻí+ ki he kau situlape* ʻa e tuʻí mo e kau kōvana ʻo e vahefonua ʻi he Tuʻa Vaitafé,*+ pea naʻa nau tokoniʻi ʻa e kakaí pea mo e fale ʻo e ʻOtua moʻoní.+

9 Pea ʻi he hili pē hono fai ʻa e ngaahi meʻá ni, naʻe fakaofiofi mai ʻa e houʻeikí kiate au ʻo nau pehē: “Ko e kakai ʻo ʻIsilelí mo e kau taulaʻeikí mo e kau Līvaí kuo ʻikai te nau fakamavaheʻi kinautolu mei he ngaahi kakai ʻo e ngaahi fonuá mo ʻenau ngaahi tōʻonga fakalieliá,+ ʻa e kau Kēnaní, kau Hetí, kau Pēlisí, kau Siepusí, kau ʻĀmoní, kau Mōapé, kau ʻIsipité,+ pea mo e kau ʻĀmolí.+ 2 Kuo nau ʻave ha niʻihi ʻo honau ngaahi ʻofefiné ke hoko ko honau uaifi pea ke hoko ko e uaifi ʻo honau ngaahi fohá.+ Pea ko kinautolu, ʻa e hako māʻoniʻoní,+ kuo nau fefiohi pē mo e ngaahi kakai ʻo e ngaahi fonuá.+ Ko e kau houʻeikí mo e kau tokoni pulé ko e kau takimuʻa kovi kinautolu ʻi he tōʻonga taʻefaitōnungá ni.”

3 Pea ʻi heʻeku fanongo pē ki he meʻá ni, naʻá ku hae hoku kofú pea fusi ʻo toʻo ha niʻihi hoku fulufuluʻiʻulú mo hoku kavá, peá u tangutu hifo ʻo moʻutāfuʻua. 4 Pea naʻe fakatahataha mai ʻo takatakai kiate au ʻa e tokotaha kotoa naʻe ʻapasia ki he* ngaahi folofola ʻa e ʻOtua ʻo ʻIsilelí koeʻuhí ko e taʻefaitōnunga ʻa e kakai naʻe ʻave fakamālohí, lolotonga ia ʻeku tangutu kuó u moʻutāfuʻua ʻo aʻu ki he feilaulau meʻakai efiafí.+

5 Pea ʻi he taimi ʻo e feilaulau meʻakai efiafí,+ naʻá ku tuʻu hake mei heʻeku fakavaivaiʻi aú, pea kuo mahae hoku kofú peá u tūʻulutui hifo ʻo fola nima kia Sihova ko hoku ʻOtuá. 6 Pea naʻá ku pehē: “ʻE hoku ʻOtua, ʻoku ou ongoʻi mā mo taʻefeʻunga ke hanga hake kiate koe, ʻe hoku ʻOtua, he ko ʻemau faihalá kuo liuliunga ʻo fakalaka ʻi homau ʻulú pea ko ʻemau halaiá kuo fokotuʻuna ʻo aʻu ki he langí.+ 7 Mei he ngaahi ʻaho ʻo ʻemau fanga kuí ʻo aʻu mai ki he ʻahó ni kuo lahi ʻemau halaiá;+ pea koeʻuhí ko ʻemau ngaahi faihalá, ko kimautolu, mo homau ngaahi tuʻí, mo ʻemau kau taulaʻeikí kuo tuku atu ia ki he nima ʻo e ngaahi tuʻi ʻo e ngaahi fonuá, ki he heletaá,+ ki he taki pōpulá,+ ki he ʻave fakamālohí,+ pea ki he fakamaá, ʻo hangē ko ia ʻoku hoko ʻi he ʻaho ní.+ 8 Ka ko eni ʻi ha kiʻi taimi nounou, kuo hoko mai ʻa e hōifua ʻa Sihova ko homau ʻOtuá ʻi hono tuku ha toenga ke hao pea ʻi hono foaki mai ha tuʻunga malu ʻi hono feituʻu toputapú,+ ʻe homau ʻOtua, ke ʻai ai ke ulo homau matá ʻi he fiefia, pea ke ʻomi ha kiʻi fakafiemālie ʻi heʻemau nofo pōpulá. 9 He neongo ko kimautolú ko e kau pōpula,+ kuo ʻikai siʻaki kimautolu ʻe homau ʻOtuá ʻi heʻemau nofo pōpulá; ka kuó ne fakaaʻu mai ʻa ʻene ʻofa mateakí ʻi he ʻao ʻo e ngaahi tuʻi ʻo Pēsiá,+ ke fakamoʻui kimautolu koeʻuhí ke mau fokotuʻu ʻa e fale ʻo homau ʻOtuá+ pea ke toe fakaleleiʻi ʻa hono ngaahi maumaú pea ke foaki mai ha ʻā maluʻi* kiate kimautolu ʻi Siuta pea ʻi Selusalema.

10 “Ka ko eni ko e hā ʻe lava ke mau leaʻakí, ʻe homau ʻOtua, ʻi he hili ʻa e meʻá ni? He kuo mau liʻaki ʻa hoʻo ngaahi fekaú, 11 ʻa ia kuó ke foaki mai fakafou ʻi hoʻo kau sevāniti ko e kau palōfitá, ʻo pehē: ‘Ko e fonua ʻoku mou ʻalu atu ke maʻú ko ha fonua taʻemaʻa koeʻuhí ko e taʻemaʻa ʻa e ngaahi kakai ʻo e ngaahi fonua ko iá, pea koeʻuhí ko ʻenau ngaahi tōʻonga fakalielia kuo nau fakafonuʻaki ai ʻa e fonuá ʻenau taʻemaʻá+ mei he ngataʻanga ʻe tahá ki he ngataʻanga ʻe tahá. 12 Ko ia, ʻoua te mou foaki homou ngaahi ʻofefiné ki honau ngaahi fohá, pe tali honau ngaahi ʻofefiné maʻa homou ngaahi fohá;+ pea kuo pau ke ʻoua ʻaupito naʻa mou feinga ke nau maʻu ha melino mo tuʻumālie,+ koeʻuhí ke mou hoko ʻo mālohi pea mou kai ʻa e momona ʻo e fonuá pea maʻu ia maʻa homou ngaahi fohá ʻo taʻengata.’ 13 Pea ʻi he hili ʻa e meʻa kotoa kuo hoko mai kiate kimautolu koeʻuhí ko ʻemau ngaahi ngāue koví pea mo e lahi ʻemau halá—he ko koe, ʻe homau ʻOtua, kuo ʻikai te ke fai kiate kimautolu ʻo fakatatau ki heʻemau faihalá,+ pea kuó ke tuku ke hao ʻa kimautolu ʻoku ʻi hení+— 14 te mau toe maumauʻi koā hoʻo ngaahi fekaú pea fai ha ngaahi aleapau fakaemali* mo e ngaahi kakai ʻoku nau fai ʻa e ngaahi meʻa fakalieliá ni?+ ʻIkai te ke mātuʻaki houhau mai ʻo ke fakaʻauha ʻosi kimautolu, ʻo ʻikai ai hamau toenga pe ha taha ʻe hao? 15 ʻE Sihova ko e ʻOtua ʻo ʻIsilelí, ʻokú ke māʻoniʻoni,+ he kuo hao hamau toenga ʻo aʻu mai ki he ʻahó ni. Ko eni ʻoku mau ʻi ho ʻaó koeʻuhí ko ʻemau halaiá, he ʻoku ʻikai faʻa malava ke mau tuʻu ʻi ho ʻaó koeʻuhí ko e meʻá ni.”+

10 Lolotonga ʻa e lotu ʻa ʻĒsela+ mo fakahoko ʻa e vetehiá, peá ne tangi mo tokoto foʻohifo ʻi he ʻao ʻo e fale ʻo e ʻOtua moʻoní, naʻe fakatahataha takatakai mai kiate ia ha fuʻu tokolahi ʻo e kau tangata, kau fefine, mo e fānau ʻa ʻIsilelí, he naʻe tangi lahi ʻa e kakaí. 2 Naʻe pehē leva ʻe Sikania ko e foha ʻo Siheli+ mei he ngaahi foha ʻo ʻĪlamí+ kia ʻĒsela: “Kuo mau taʻefaitōnunga ki homau ʻOtuá ʻi heʻemau mali mo e* kau fefine muli mei he ngaahi kakai ʻo e fonuá.+ Neongo ia, ʻoku kei ʻi ai ʻa e ʻamanaki ki ʻIsileli. 3 Pea ko eni, tau fai ha fuakava mo hotau ʻOtuá+ ke tuku ange ʻa e ngaahi uaifí kotoa mo e faʻahinga naʻa nau fanauʻí, ʻo fakatatau ki he fakahinohino ʻa Sihová pea mo e faʻahinga ʻoku nau ʻapasia ki he* fekau ʻa hotau ʻOtuá.+ Tuku ke tau ngāue ʻo fakatatau ki he Laó. 4 Tuʻu hake, he ko e meʻá ni ko ho fatongia ia, pea ʻoku mau kau mo koe. Loto-toʻa pea fai ha meʻa.”

5 ʻI he meʻá ni naʻe tuʻu hake ʻa ʻĒsela ʻo ne ʻai ʻa e kau pule ʻo e kau taulaʻeikí, mo e kau Līvaí, mo e kotoa ʻo ʻIsilelí ke nau fai ha fuakava ke fai ʻa e meʻa kuo leaʻakí.+ Ko ia naʻa nau fai ha fuakava. 6 Naʻe tuʻu hake leva ʻa ʻĒsela mei he ʻao ʻo e fale ʻo e ʻOtua moʻoní ʻo ʻalu ki he loki* ʻo Siohanani ko e foha ʻo ʻEliasipí. Neongo naʻá ne ʻalu ki ai, naʻe ʻikai te ne kai ha meʻakai mo inu ha vai, he naʻá ne kei fakamamahi koeʻuhí ko e taʻefaitōnunga ʻa e kakai naʻe ʻave fakamālohí.+

7 Naʻa nau fanongonongo leva ʻi he kotoa ʻo Siuta mo Selusalemá ke fakatahataha ʻa e kotoa ʻo e kau ʻave fakamālohi ki muʻá ki Selusalema; 8 pea fakatatau ki he tuʻutuʻuni ʻa e kau houʻeikí mo e kau mātuʻá, ka ʻi ai ha taha ʻe ʻikai ke haʻu ʻi he hili ʻa e ʻaho ʻe tolu ʻe faʻao fakamālohi* ʻene koloá kotoa, pea ʻe kapusi ia mei he fakatahaʻanga ʻo e kakai naʻe ʻave fakamālohí.+ 9 Ko ia naʻe fakatahataha ʻa e kau tangata kotoa ʻo Siuta mo Penisimaní ki Selusalema ʻi loto ʻi he ʻaho ʻe tolú, ʻa ia, ʻi he māhina hono hivá, ʻi he ʻaho hono 20 ʻo e māhiná. Naʻe tangutu ʻa e kakaí kotoa ʻi he lotoʻā ʻo e fale ʻo e ʻOtua moʻoní, ʻoku nau tetetete koeʻuhí ko e meʻá ni pea koeʻuhí ko e fuʻu ʻuha lahi.

10 Pea naʻe tuʻu hake ʻa e taulaʻeiki ko ʻĒselá ʻo ne pehē kiate kinautolu: “Kuo mou taʻefaitōnunga ʻi hoʻomou mali mo e kau fefine mulí,+ pea kuo mou fakalahi ai ʻa e halaia ʻa ʻIsilelí. 11 Ko ia mou vetehia kia Sihova ko e ʻOtua ʻo hoʻomou fanga kuí pea fai hono finangaló. Fakamavaheʻi kimoutolu mei he ngaahi kakai ʻo e fonuá pea mei he ngaahi uaifi mulí ni.”+ 12 ʻI he meʻá ni naʻe tali leʻo-lahi ʻe he fakatahaʻangá kotoa: “Ko homau fatongiá ia ke fai ʻa e meʻa tofu pē ko ia ʻokú ke leaʻakí. 13 Kae kehe, ʻoku tokolahi ʻa e kakaí, pea ko e faʻahitaʻu ʻuhoʻuha eni. ʻOku ʻikai malava ha tuʻu ʻi tuʻa, pea ko e meʻá ni ʻe ʻikai feʻunga ʻi ha ʻaho ʻe taha pe ua, he ko e angatuʻu lahi kuo mau fai ʻi he meʻá ni. 14 Ko ia, kātaki tuku ki hotau kau houʻeikí ke nau fakafofongaʻi ʻa e fakatahaʻangá kotoa;+ pea tuku ki he faʻahinga kotoa ʻi homau ngaahi koló kuo nau mali mo e kau fefine mulí ke nau haʻu ʻi ha taimi kuo vaheʻi, fakataha mo e kau mātuʻa mo e kau fakamaau ʻi he kolo taki taha, kae ʻoua kuo mau fakafoki ʻa e houhau kakaha ʻa hotau ʻOtuá meiate kimautolu ʻi he fekauʻaki mo e meʻá ni.”

15 Kae kehe, ko Sionatane ko e foha ʻo ʻAsaelí mo Sehasia ko e foha ʻo Tikivá naʻá na fakafepaki ki he meʻá ni, pea naʻe poupou ki ai ʻa e ongo Līvai ko Mēsuilame mo Sapetaí.+ 16 Ka ko e faʻahinga naʻe ʻave fakamālohi ki muʻá naʻa nau fai ʻa e meʻa naʻe fai ki ai ʻa e felotoí; pea ko e taulaʻeiki ko ʻĒselá mo e ngaahi ʻulumotuʻa ʻo e fāmili ʻo e ngaahi fale ʻo ʻenau ngaahi tamaí, ʻa ia ko honau hingoá kotoa naʻe fakahaaʻi, naʻa nau fai ha fakataha mavahe ʻi he ʻuluaki ʻaho ʻo e māhina hono hongofulú ke vakaiʻi ʻa e meʻá ni; 17 pea ʻi he aʻu ki he ʻaho ʻuluaki ʻo e ʻuluaki māhiná naʻe ʻosi ai ʻa ʻenau ngāue ki he kotoa ʻo e kau tangata naʻa nau mali mo e kau fefine mulí. 18 Pea naʻe ʻilo ai ko e niʻihi ʻo e ngaahi foha ʻo e kau taulaʻeikí naʻa nau mali mo e kau fefine muli:+ ʻI he ngaahi foha ʻo Sīsua+ ko e foha ʻo Sihosatakí mo hono fanga tokouá, ko Māseia, ʻEliese, Sialipi, mo Ketalaia. 19 Ka naʻa nau fai ha palōmesi* ke tuku ange honau ngaahi uaifí, pea koeʻuhí ko ʻenau halaiá, te nau foaki ha sipi tangata mei he tākangá koeʻuhí ko ʻenau hiá.+

20 ʻI he ngaahi foha ʻo ʻĪmelí,+ ko Hēnani mo Sepataia; 21 pea ʻi he ngaahi foha ʻo Halimí,+ ko Māseia, ʻIlaisiā, Semaia, Siheli, mo ʻŪsaia; 22 pea ʻi he ngaahi foha ʻo Pasuá,+ ko ʻElioenai, Māseia, ʻIsimeʻeli, Netanili, Siosapati, mo ʻElasa. 23 Pea ʻi he kau Līvaí, ko Siosapati, Simi, Kelaia, (ʻa ia ko Kelitá), Petahaia, Siuta, mo ʻEliese; 24 pea ʻi he kau hivá, ko ʻEliasipi; pea ʻi he kau leʻo matapaá, ko Salumi, Telemi, mo ʻUli.

25 Pea ʻi ʻIsilelí, ʻi he ngaahi foha ʻo Pālosí,+ ko Lamaia, ʻĪsiā, Malakaia, Misamini, ʻEliesa, Malakaia, mo Penaia; 26 pea ʻi he ngaahi foha ʻo ʻĪlamí,+ ko Matanaia, Sākalaia, Siheli,+ ʻĀpeti, Selemoti, mo ʻIlaisiā; 27 pea ʻi he ngaahi foha ʻo Satú,+ ko ʻElioenai, ʻEliasipi, Matanaia, Selemoti, Sapati, mo ʻĀsisa; 28 pea ʻi he ngaahi foha ʻo Pepaí,+ ko Siohanani, Henania, Sapai, mo ʻAtelai; 29 pea ʻi he ngaahi foha ʻo Paní, ko Mēsuilame, Maluki, ʻAtaia, Siasupi, Seali, mo Selemoti; 30 pea ʻi he ngaahi foha ʻo Pahati-mōapé,+ ko ʻAtinā, Kelali, Penaia, Māseia, Matanaia, Pesalili, Pinui, mo Manase; 31 pea ʻi he ngaahi foha ʻo Halimí,+ ko ʻEliese, ʻĪsisa, Malakaia,+ Semaia, Simeone, 32 Penisimani, Maluki, mo Semalaia; 33 ʻi he ngaahi foha ʻo Hasumí,+ ko Matenai, Matatā, Sapati, ʻElifeleti, Selemai, Manase, mo Simi; 34 ʻi he ngaahi foha ʻo Paní, ko Mātai, ʻAmilami, Ueli, 35 Penaia, Peteia, Keluhi, 36 Vanaia, Milemoti, ʻEliasipi, 37 Matanaia, Matenai, mo Siasu; 38 pea ʻi he ngaahi foha ʻo Pinuí, ko Simi, 39 Selemia, Nētane, ʻAtaia, 40 Makanatepai, Sesai, Salei, 41 ʻAsalili, Selemia, Semalaia, 42 Salumi, ʻAmalaia, mo Siosifa; 43 pea ʻi he ngaahi foha ʻo Nipó, ko Sieli, Matitaia, Sapati, Sēpina, Satai, Sioeli, mo Penaia. 44 Ko e faʻahingá ni kotoa naʻa nau maʻu ha ngaahi uaifi muli,+ pea naʻa nau tuku ange atu honau ngaahi uaifí, fakataha mo ʻenau fānaú.+