HIVA ʻA SOLOMONE
1 Ko e hiva ʻo e ngaahi hiva,* ʻa ia ʻoku ʻa Solomoné:+
2 “ʻOfa ke ke ʻuma mai kiate au ʻaki ʻa e ngaahi ʻuma ʻa ho ngutú,
He ko hoʻo fakahāhā ʻa e ʻofá ʻoku lelei ange ia ʻi he uaine.+
3 Ko e ʻalaha ʻa hoʻo ngaahi loló ʻoku namu-lelei.+
Ko ho hingoá ʻoku hangē ko hono lilingi ʻo ha lolo namu-kakalá.+
Ko e ʻuhinga ia ʻoku ʻofa ai ʻiate koe ʻa e kau finemuí.
4 Ke ke ʻave muʻa au;* tuku ke ta ō.
Kuo ʻomi au ʻe he tuʻí ki hono ngaahi loki ʻi lotó!
Tuku muʻa ke ta fiefia peá u fiefia ʻiate koe.
Tuku ke ta viki* ʻa e fakahāhā ʻo hoʻo ʻofá ʻo laka hake ʻi he uainé.
ʻOku totonu pē ʻa ʻenau* ʻofa ʻiate koé.
5 ʻOku ou ʻuliʻuli, ka ʻoku ou fakaʻofoʻofa, ʻe ngaahi ʻofefine ʻo Selusalema,
Hangē ko e ngaahi tēniti ʻo Ketá,+ hangē ko e ngaahi tupenu tēniti+ ʻa Solomoné.
6 ʻOua te mou sio fakamamaʻu kiate au koeʻuhí ko ʻeku ʻuliʻulí,
He kuo tutu au ʻe he laʻaá.
Naʻe ʻita ʻiate au ʻa e fānau tangata ʻa ʻeku faʻeé;
Naʻa nau fakanofo au ko e tauhi ʻo e ngaahi ngoue kālepí,
Ka ko ʻeku ngoue kālepí naʻe ʻikai te u tauhi ia.
7 Tala mai muʻa kiate au, ʻa koe ʻoku ou ʻofa lahi aí,
ʻA e feituʻu ʻokú ke fakakaikai ai hoʻo tākangá,+
ʻA e feituʻu ʻokú ke fakatokoto ai kinautolu ʻi he hoʻatā mālié.
Ko e hā ke u hangē ai ha fefine ʻokú ne ʻai ha pūloú*
ʻI he lotolotonga ʻo e ngaahi tākanga ʻa ho ngaahi kaungāmeʻá?”
8 “Kapau ʻoku ʻikai te ke ʻiloʻi ia, ʻa koe fefine hoihoifua taha ʻi he kau fefiné,
ʻAlu ʻo muimui ʻi he halanga ʻo e tākangá
Pea fakakaikai ʻa e ʻuhiki ʻo hoʻo fanga kosí ʻo ofi ki he ngaahi tēniti ʻo e kau tauhi-sipí.”
9 “ʻOku ou fakatatau koe, ʻe hoku ʻofaʻanga, ki ha* hoosi fefine ʻi he ngaahi saliote ʻa Feló.+
10 Ko ho kouʻahé ʻoku matamatalelei ia ʻi hoʻo ʻai ʻa e ngaahi meʻa-teuteú,*
Mo ho kiá ʻi hoʻo ʻai ki ai ʻa e ngaahi kahoa kulá.
11 Te mau ngaohi maʻau ha ngaahi meʻa-teuteu* koula
Kuo fakafonofono ʻaki ʻa e siliva.”
12 “Lolotonga ʻa e ʻafio ʻa e tuʻí ʻi hono tēpile fuopotopotó,
13 ʻOku hangē kiate au ʻa hoku ʻofaʻangá ko ha kiʻi tangai mula namu-kakalá+
ʻOkú ne mohe ʻi he vahaʻa ʻo hoku ongo huhú.
14 ʻOku hangē kiate au ʻa hoku ʻofaʻangá ko ha fuhinga saipalesi*+
ʻI he ngaahi ngoue kālepi ʻo ʻEni-ketí.”+
15 “Vakai! ʻOkú ke hoihoifua, siʻoku ʻofaʻanga.
Vakai! ʻOkú ke hoihoifua. Ko ho matá ko e mata tofu pē ʻo ha lupe.”+
16 “Vakai! ʻOkú ke fakaʻofoʻofa,* ʻe hoku ʻofaʻanga, mo lelei ʻaupito.+
Ko hota mohengá ko e ngaahi lauʻiʻakau.
17 Ko e ngaahi pimi ʻo hota falé* ko e sita,
Ko ʻeta ngaahi saá ʻoku mei he ʻakau ko e siunipá.
2 “Hangē ha lile ʻi he lotolotonga ʻo e ʻakau talatalá
ʻOku pehē ʻa hoku ʻofaʻangá ʻi he lotolotonga ʻo e ngaahi ʻofefiné.”
3 “Hangē ko ha fuʻu ʻāpele ʻi he lotolotonga ʻo e ʻuluʻakau ʻo e vaotaá,
ʻOku pehē ʻa hoku ʻofaʻangá ʻi he lotolotonga ʻo e ngaahi fohá.
ʻOku ou holi lahi ke tangutu ʻi hono malumalú,
Pea ko hono fuá ʻoku melie ki hoku uʻá.
4 Naʻá ne ʻomi au ki he fale ʻo e kātoanga kaí,*
Pea ko ʻene fakaʻilonga ʻi ʻolunga ʻiate aú ko e ʻofá.
5 Fakaivifoʻou ʻaki au ʻa e takaonga fuamelié;*+
Fakaivimālohiʻi ʻaki au ʻa e ʻāpelé,
He ʻoku ou puke ʻi he ʻofá.
6 Ko hono nima toʻohemá ʻoku ʻi hoku lalo ʻulú,
Pea ko hono nima toʻomataʻú ʻoku ala mai ke fāʻofua ʻiate au.+
7 ʻOku ou ʻai kimoutolu ke mou fuakava, ʻe ngaahi ʻofefine ʻo Selusalema,
ʻI he fanga kāseli+ mo e fanga tia fefine ʻo e vaó:
ʻOua ʻe feinga ke fafangu pe langaʻi ʻiate au ʻa e ʻofá kae ʻoua kuó u maʻu ha ongoʻi pehē.+
8 ʻOku ou fanongo ki he haʻu ʻa hoku ʻofaʻangá!
Vakai! Ko ena ʻokú ne haʻu,
ʻOkú ne kaka mai ʻi he ngaahi moʻungá, ʻo puna mai ʻi he ngaahi tafungofungá.
9 ʻOku hangē ʻa hoku ʻofaʻangá ko ha kāselí, ʻo hangē ha kiʻi tia tangatá.+
Ko ia ena, ʻokú ne tuʻu mai ʻi mui ʻi he holisi ʻo homau falé,
ʻO fakasio mai ʻi he matapā-teké,
ʻO sio mai ʻi he matapā-teke vangavangá.
10 ʻOku lea ʻa hoku ʻofaʻangá, ʻokú ne pehē mai kiate au:
‘Tuʻu hake, ʻa ʻeku pele,
ʻA ʻeku tokotaha hoihoifua, haʻu ke ta ō.
11 Vakai! Kuo mahili atu ʻa e faʻahitaʻu momokó.*
Kuo ʻosi ʻa e ʻuhá pea kuo mole atu.
12 Kuo fisiki mai ʻa e matalá ʻi he fonuá,+
Kuo aʻu mai ʻa e taimi ʻo e ʻauhaní,+
Pea ʻoku ongona ʻa e hiva ʻa e kulukulú ʻi hotau fonuá.+
13 ʻOku motuʻa ʻa e fua tokamuʻa ʻo e fikí;+
ʻOku fisi ʻa e ʻulu kālepí pea ʻoku maheʻa mai ʻa hono ʻalahá.
Tuʻu hake, ʻa ʻeku pele, peá ke haʻu.
ʻA ʻeku tokotaha hoihoifua, haʻu ke ta ō.
14 ʻA siʻeku lupe, ʻa ia ʻoku ʻi he avaʻi maká,+
ʻI he tepuʻi maka ʻo e lilifá,
Tuku ke u sio atu kiate koe pea fanongo ki ho leʻó,+
He ʻoku mālie ho leʻó pea ʻoku matamatalelei ho fōtungá.’”+
15 “Puke mai kiate kimautolu ʻa e fanga fōkisí,
ʻA e fanga kiʻi fōkisi ʻoku nau maumauʻi ʻa e ngaahi ngoue kālepí,
He ʻoku fisi ʻa ʻemau ngaahi ngoue kālepí.”
16 “ʻOku ʻaʻaku ʻa hoku ʻofaʻangá pea ʻoku ʻoʻona au.+
ʻOkú ne tauhi ʻa e fanga sipí+ ʻi he lotolotonga ʻo e ngaahi lilé.+
17 ʻI he aʻu ki he havilivili* ʻa e ʻahó pea puli atu ʻa e ngaahi ʻatá,
Foki vave mai, siʻoku ʻofaʻanga,
ʻO hangē ko e kāselí+ pe ko e kiʻi tia tangata+ ʻi he ngaahi moʻunga ʻi hota vahaʻá.*
3 “ʻI hoku mohengá ʻi he lolotonga ʻa e poʻulí,
Naʻá ku kumi ai ki he tokotaha ʻoku ou ʻofa aí.+
Naʻá ku kumi kiate ia, ka naʻe ʻikai te u ʻiloʻi ia.+
2 Te u tuʻu hake ʻo ʻalu fano holo ʻi he koló;
ʻI he ngaahi halá pea ʻi he ngaahi malaʻe fakakoló,*
Tuku ke u kumi ki he tokotaha ʻoku ou ʻofa aí.
Naʻá ku kumi kiate ia, ka naʻe ʻikai te u ʻiloʻi ia.
3 Naʻe ʻilo au ʻe he kau tangata leʻó ʻi heʻenau takai ʻi he koló,+ pea naʻá ku ʻeke ange kiate kinautolu,
‘Kuo mou sio atu ki he tokotaha ʻoku ou ʻofa aí?’
4 ʻI heʻeku fakalaka siʻi atu pē meiate kinautolú
Naʻá ku ʻiloʻi ʻa e tokotaha ʻoku ou ʻofa aí.
Naʻá ku puke ia, naʻe ʻikai te u tuku ange ia
Kae ʻoua kuó u ʻave ia ki he fale ʻo ʻeku faʻeé,+
Ki he loki ʻi loto ʻo e fefine naʻá ne feitamaʻi aú.
5 ʻOku ou ʻai kimoutolu ke mou fuakava, ʻe ngaahi ʻofefine ʻo Selusalema,
ʻI he fanga kāseli mo e fanga tia fefine ʻo e vaó:
ʻOua ʻe feinga ke fafangu pe langaʻi ʻiate au ʻa e ʻofá kae ʻoua kuó u maʻu ha ongoʻi pehē.”+
6 “Ko e hā eni ʻoku haʻu mei he toafá ʻo hangē ha kohu ʻoku ʻalu haké,
Kuo fakanamulelei ʻaki ʻa e mula mo e ʻinisēnisi hinehina,
Fakataha mo e ngaahi pauta namu-kakala kotoa ʻa ha mēsianiti?”+
7 “Vakai! Ko e tokaʻanga ia ʻo Solomoné.
ʻOku takatakaiʻi ia ʻe he kau tangata toʻa ʻe toko 60,
ʻI he kau tangata toʻa ʻo ʻIsilelí,+
8 Ko kinautolu kotoa ʻoku nau toʻo ha heletā,
Kuo nau ako kotoa ki he taú,
ʻO taki taha ʻi ai ʻene heletā ʻi hono tafaʻakí
Ke faiʻaki ha leʻohi mei he ngaahi meʻa fakalilifu ʻo e poó.”
9 “Ko e meʻa-fata* fakatuʻi ia ʻo Tuʻi Solomoné
ʻA ia naʻá ne ngaohi maʻana mei he ʻuluʻakau ʻo Lepanoní.+
10 Ko hono ngaahi poú naʻá ne ngaohi ia mei he silivá,
Ko hono meʻa falalá mei he koulá.
Ko hono ʻafioʻangá mei he fulufuluʻisipi vāletí;
Naʻe teuteuʻi ʻa loto ʻi he anga-ʻofa
ʻE he ngaahi ʻofefine ʻo Selusalemá.”
11 “Mou ʻalu atu, ʻe ngaahi ʻofefine ʻo Saione,
Sio fakamamaʻu kia Tuʻi Solomone
ʻOkú ne tui ʻa e kalauni* ʻo e taʻané ʻa ia naʻe ngaohi maʻana ʻe heʻene faʻeé+
ʻI he ʻaho ʻo ʻene taʻané,
ʻI he ʻaho ʻo e fiefia ʻa hono lotó.”
4 “Vakai! ʻOkú ke hoihoifua, siʻoku ʻofaʻanga.
Vakai! ʻOkú ke hoihoifua.
Ko ho matá ko e mata tofu pē ʻo ha lupe mei loto ʻi ho pūloú.
Ko ho louʻulú ʻoku hangē ko ha tākanga kosí
ʻOku nau ʻaukolo hifo mei he ngaahi moʻunga ʻo Kiliatí.+
2 Ko ho nifó ʻoku hangē ko ha tākanga sipi naʻe toki ʻosi hono kosí
Kuo nau ʻalu hake hili honau kaukauʻí,
Ko kinautolu kotoa ʻoku nau tauhoa lelei,
Pea ʻoku ʻikai ha taha ʻe mole ʻa hono ʻuhikí.
3 Ko ho loungutú ʻoku hangē ha filo kula ʻahoʻahó,
Pea ʻoku mālie ʻa hoʻo leá.
ʻOku hangē ha konga pomikānité
ʻA ho kouʻahé* mei loto ʻi ho pūloú.
4 Ko ho kiá+ ʻoku hangē ko e taua ʻo Tēvitá,+
ʻOku langa fakaʻotu ʻaki ʻa e maká
ʻA ia ʻoku tautau ai ha ngaahi pā ʻe taha afe,
ʻA e ngaahi pā fuopotopoto kotoa ʻa e kau tangata toʻá.+
5 Ko ho ongo huhú ʻoku hangē ko ha ongo ʻuhiki ʻo ha kāselí,
Ko e ongo māhanga ʻa ha kāseli,+
ʻA ia ʻoku kaikai ʻi he lotolotonga ʻo e ngaahi lilé.”
6 “ʻI he aʻu ki he havilivili* ʻa e ʻahó pea puli atu ʻa e ngaahi ʻatá,
Te u ʻalu ki he moʻunga ʻo e mulá
Pea ki he foʻi māʻolunga ʻo e ʻinisēnisi hinehiná.”+
8 Haʻu ke ta mavahe mei Lepanoni, ʻa ʻeku taʻahine mali,
Haʻu ke ta mavahe mei Lepanoni.+
ʻAlu hifo mei he tumutumu ʻo ʻĀmaná,*
Mei he tumutumu ʻo Senilí, ʻa e tumutumu ʻo Heamoní,+
Mei he ʻana ʻo e fanga laioné, mei he ngaahi moʻunga ʻo e fanga lēpatí.
9 Kuó ke maʻu ʻa hoku lotó,+ ʻe hoku tuofefine, ʻa ʻeku taʻahine mali,
Kuó ke maʻu ʻa hoku lotó ʻaki ha foʻi hila pē ʻe taha ʻo ho matá,
ʻAki ʻa e foʻi kula pē ʻe taha ʻo ho kahoá.
10 He fakaʻofoʻofa ē ko e fakahāhā ʻo hoʻo ʻofá,+ ʻe hoku tuofefine, ʻa ʻeku taʻahine mali!
Ko e fakahāhā ʻo hoʻo ʻofá ʻoku lelei mamaʻo ange ia ʻi he uaine,+
Mo e namu-kakala ʻo hoʻo meʻa fakanamuleleí ʻi ha faʻahinga sipaisi pē!+
11 Ko ho loungutú, ʻa ʻeku taʻahine mali, ʻoku tafe mai mei ai ʻa e hone.+
Ko e honé mo e huʻakaú ʻoku ʻi ho lalo ʻeleló,+
Pea ko e namu-kakala ʻo ho ngaahi kofú ʻoku hangē ia ko e namu-kakala ʻo Lepanoní.
12 Ko siʻoku tuofefiné, ʻa ʻeku taʻahine malí, ʻokú ne hangē ko ha ngoue kuo lokaʻí,
Ko ha ngoue kuo lokaʻi, ko ha matavai kuo silaʻi.
13 Ko ho ngaahi vaʻá* ko ha palataisi* ʻo e pomikānite
ʻOku ʻi ai ʻa e ngaahi fua lelei tahá, mo e saipalesi fakataha mo e ʻulu naʻati,
14 Ko e naʻati+ mo ha sipaisi,* mo e kaho namu-kakala+ mo e sinamoni,+
Mo e ʻakau kehekehe ʻoku maʻu mei ai ʻa e ʻinisēnisi hinehiná, mo e mulá, mo e ʻaloé,*+
Fakataha mo e kotoa ʻo e ngaahi meʻa fakanamulelei funganí.+
15 Ko koé ko ha matavai ʻi he ngoué, ko ha vaitupu ʻo e vai maʻa,
Mo e ngaahi vaitafe ʻoku tafe mei Lepanoni.+
16 ʻĀ hake, ʻe matangi tokelau;
Hū mai, ʻe matangi tonga.
Mānava mai* ki heʻeku loto ngoué.
Tuku ke mafola atu ʻa hono ʻalahá.”
“Tuku ke haʻu ʻa hoku ʻofaʻangá ki heʻene ngoué
Pea kai ʻa hono ngaahi fua lelei tahá.”
5 “Kuó u hū atu ki heʻeku ngoué,+
ʻE hoku tuofefine, ʻa ʻeku taʻahine mali.
Kuó u toʻo hake ʻa ʻeku mulá mo ʻeku sipaisí.+
Kuó u kai ʻa e hone mei heʻeku taunga honé;
Kuó u inu ʻeku uainé mo ʻeku huʻakaú.”+
“Mou kai, siʻoku ngaahi kaumeʻa!
Mou inu pea hoko ʻo konā ʻi he fakahāhā ʻo e ʻofá!”+
2 “ʻOku ou mohe, ka ʻoku ʻā pē ʻa hoku lotó.+
ʻOku ongo mai ʻa e tukituki ʻa siʻoku ʻofaʻangá!
‘Fakaava kiate au, ʻe hoku tuofefine, siʻoku ʻofaʻanga,
ʻA ʻeku lupe, ʻa ʻeku tokotaha taʻemele!
He ʻoku viviku ʻa hoku ʻulú ʻi he hahaú,
ʻA hoku louʻulú ʻi he hauhau ʻo e poʻulí.’+
3 Kuó u vete ʻa hoku kofú.
Te u toe tui koā ia?
Kuó u fufulu ʻa hoku vaʻé.
Te u toe fakaʻuliʻi koā ia?
4 Naʻe toʻo ʻe hoku ʻofaʻangá ʻa hono nimá mei he foʻi ava ʻi he matapaá,
Pea naʻe langaʻi ai ʻa e ongoʻi ʻoku ou maʻu kiate iá.
5 Naʻá ku tuʻu hake ke fakaava ʻa e matapaá ki hoku ʻofaʻangá;
Naʻe hafu ʻa e mulá ʻi hoku nimá,
Pea naʻe hafu ʻa e mulá mei hoku louhiʻinimá,
Ki he kau ʻo e polotá.*
6 Naʻá ku fakaava ia ki hoku ʻofaʻangá,
Ka naʻe tafoki atu ʻa hoku ʻofaʻangá, naʻá ne puli atu.
Naʻá ku ongoʻi loto-mamahi ʻi heʻene mavahé.
Naʻá ku kumi kiate ia, ka naʻe ʻikai te u maʻu ia.+
Naʻá ku ui kiate ia, ka naʻe ʻikai te ne fai mai ha tali.
7 Naʻe maʻu au ʻe he kau tangata leʻó ʻi heʻenau takai ʻi he koló.
Naʻa nau taaʻi au, naʻa nau fakalaveaʻi au.
Naʻe toʻo ʻe he kau tangata leʻo ʻo e ʻaá ʻa hoku pulupulú* meiate au.
8 ʻOku ou ʻai kimoutolu ke mou fuakava, ʻe ngaahi ʻofefine ʻo Selusalema:
Kapau te mou ʻilo ʻa siʻoku ʻofaʻangá,
Tala kiate ia ʻoku ou puke ʻi he ʻofá.”
9 “He ʻoku mahulu fēfē hake ʻa ho ʻofaʻangá ʻi ha toe ʻofaʻanga kehe,
ʻA koe fefine hoihoifua taha ʻi he kau fefiné?
ʻOku mahulu fēfē hake ʻa ho ʻofaʻangá ʻi ha toe ʻofaʻanga kehe,
ʻOkú ke ʻai ai kimautolu ke mau fai ʻa e fuakava ko iá?”
10 “Ko hoku ʻofaʻangá ʻoku ulo mo pahapaha;
ʻOkú ne fotu mai ʻi he lotolotonga ʻo ha toko mano.
11 Ko hono ʻulú ko e koula, ʻa e koula lelei tahá.
Ko hono louʻulú ʻoku hangē ha lauʻipaame* ʻoku vilingiá,
Pea ʻoku lanu ʻuliʻuli ʻo hangē ko e lēvení.
12 Ko hono matá ʻoku hangē ko e fanga lupe ʻi he veʻe vaitafé,
ʻOku nau kaukau ʻi he huʻakaú,
Pea ʻoku nau nofo ʻi ha veʻe vai fonu ngutungutu.*
13 Ko hono kouʻahé ʻoku hangē ha mohenga matalaʻiʻakau namu-kakalá,+
Ko e fokotuʻunga lauʻiʻakau namu-kakala.
Ko hono loungutú ko e lile, ʻoku toʻi mei ai ʻa e mula.+
14 Ko hono louhiʻinimá ko e koula ʻoku fakafonofono ʻaki ʻa e kalisolaite.
Ko hono keté ko e lei kuo fakangingila ʻoku kofuʻaki ʻa e sāfaia.
15 Ko hono ongo vaʻé ko e ongo pou māpele ʻoku tuʻu ʻi he tuʻuʻanga ngaohi mei he koula lelei tahá.
Ko hono fōtungá ʻoku hangē ko Lepanoní, ʻi he hangē ko e ʻulu sitá ʻoku ʻikai ke toe fakauouaʻi ia.+
Ko hoku ʻofaʻangá eni, ko ʻeku pelé eni, ʻe ngaahi ʻofefine ʻo Selusalema.”
6 “Kuo ʻalu ki fē ho ʻofaʻangá,
ʻA koe fefine hoihoifua taha ʻi he kau fefiné?
Naʻe afe ki fē ʻa ho ʻofaʻangá?
Tau kumi fakataha mo koe kiate ia.”
2 “Kuo ʻalu hifo ʻa hoku ʻofaʻangá ki heʻene ngoué,
Ki he ngaahi mohenga matalaʻiʻakau namu-kakalá,
Ke tauhi ʻa e fanga sipí ʻi he lotolotonga ʻo e ngaahi ngoué
Pea ke paki ʻa e ngaahi lilé.+
3 ʻOku ʻa hoku ʻofaʻangá au,
Pea ʻoku ʻaʻaku ʻa hoku ʻofaʻangá.+
ʻOkú ne tauhi ʻa e fanga sipí ʻi he lotolotonga ʻo e ngaahi lilé.”+
4 “ʻOkú ke fakaʻofoʻofa hangē ko Tilisá,*+ ʻa ʻeku pele,+
Pea matamatalelei ʻo hangē ko Selusalemá,+
Pea fakaleleloto ʻo hangē ha kau tau ʻoku tuʻu takai ʻi heʻenau ngaahi fakaʻilongá.+
Ko ho louʻulú ʻoku hangē ha tākanga kosi
ʻOku nau ʻaukolo hifo ʻi he ngaahi tahifo ʻo Kiliatí.+
6 Ko ho nifó ʻoku hangē ko ha tākanga sipi
Kuo nau ʻalu hake hili honau kaukauʻí,
Ko kinautolu kotoa ʻoku nau tauhoa lelei,
Pea ʻoku ʻikai ha taha ʻe mole ʻa hono ʻuhikí.
7 ʻOku hangē ha konga pomikānité
ʻA ho kouʻahé* mei loto ʻi ho pūloú.
9 Ka ʻoku toko taha mātē pē ʻa ʻeku lupé,+ ʻa ʻeku tokotaha taʻemelé.
Ko e toko taha pē ia ʻa ʻene faʻeé.
Ko e ʻofaʻanga* ia ʻa e tokotaha naʻá ne fanauʻi iá.
ʻOku sio kiate ia ʻa e ngaahi ʻofefiné, pea ʻoku nau talamonū kiate ia;
Mo e ngaahi kuiní mo e kau sinifú, pea ʻoku nau fakahīkihikiʻi ia.
10 ‘Ko hai ia ʻa e fefine ʻoku malama mai* ʻo hangē ko e mafoa ʻa e atá,
ʻOku fakaʻofoʻofa ʻo hangē ko e kātoa ʻa e māhiná,
ʻOku maʻa ʻo hangē ko e maama ʻo e laʻaá,
ʻOku fakaleleloto ʻo hangē ko e kau tau ʻoku nau tuʻu takai ʻi heʻenau ngaahi fakaʻilongá?’”+
11 “Naʻá ku ʻalu hifo ki he ngoue natí+
Ke sio ki he ʻakau ʻoku tupu foʻou ʻi he teleʻá,*
Ke sio pe kuo tā huli* hake ʻa e kālepí,
Pe kuo fisi ʻa e ʻulu pomikānité.
12 Ki muʻa ke u ʻilo iá,
Ne hanga ʻe heʻeku holí ʻo ʻave au
Ki he ngaahi saliote ʻa hoku kakai anga-fakaʻeiʻeikí.”*
13 “Foki mai, foki mai, siʻi taʻahine Sūlemi!
Foki mai, foki mai,
Ke mau siofia koe!”
“Ko e hā ʻoku mou sio fakamamaʻu ai ki he taʻahine Sūlemí?”+
“ʻOkú ne hangē ko e meʻe ʻa ha ongo faʻahi ʻe uá!”*
7 “He fakaʻofoʻofa ē ko ho vaʻé ʻi ho senitoló,
ʻE ʻofefine anga-fakaʻeiʻeiki!
Ko e ngaofe ʻo ho alangá ʻoku hangē ha meʻa-teuteú,
Ko e ngāue ʻa ha tokotaha nima-meaʻa.
2 Ko ho pitó ko ha poulu fuopotopoto.
ʻOfa ke ʻoua ʻaupito naʻa masiva ʻi ha uaine kuo huʻi.
Ko ho keté ko ha fokotuʻunga uite,
ʻOku takatakaiʻi ʻe he ngaahi lile.
3 Ko ho ongo huhú ʻoku hangē ko ha ongo ʻuhiki ʻo ha kāselí,
Ko e ongo māhanga ʻa ha kāseli.+
4 Ko ho kiá+ ʻoku hangē ha taua leí.+
Ko ho ihú ʻoku hangē ko e taua ʻo Lepanoní,
ʻA ia ʻoku hanga atu ki Tāmasikusí.
5 Ko ho ʻulú ʻokú ne teuʻi koe ke ke fakaʻofoʻofa ʻo hangē ko Kāmelí,+
ʻOku toʻoa* ʻa e tuʻí ʻi he tuku ange ho louʻulú.
6 He hoihoifua ē ko koe, pea he fakaʻofoʻofa ē ko koe,
ʻE taʻahine ko hoku ʻofaʻanga, ʻokú ke mahulu hake ʻi he ngaahi meʻa kotoa pē ʻoku fakaholomamatá!
8 Naʻá ku pehē, ‘Te u kaka ʻi he fuʻu pāmé
Ke u puke ʻa hono fuá.’
ʻOfa ke hangē ho ongo huhú ha fuhinga kālepí,
Ko hoʻo mānavá ʻoku namu-lelei ʻo hangē ko e ʻāpelé,
9 Pea ko ho ngutú* ʻoku hangē ko e uaine moʻoniá.”
“ʻOfa ke momole ʻene ʻalu hifó ki hoku ʻofaʻangá,
ʻO tafetafe lelei ʻi he loungutu ʻo kinautolu ʻoku mohé.
10 ʻOku ʻa hoku ʻofaʻangá au,+
Pea ʻoku nofo ʻa ʻene holí ʻiate au.
11 Haʻu, ʻe hoku ʻofaʻanga,
Ke ta ō ki he ngaahi ngoué;
Ke ta nofo ʻi he lotolotonga ʻo e ngoue saipalesí.+
12 Ta tuʻu pongipongia hake ʻo ʻalu ki he ngaahi ngoue kālepí
Ke sio pe kuo tā huli* hake ʻa e kālepí,
Pe kuo matala ʻa e fisí,+
Pe kuo fisi ʻa e ʻulu pomikānité.+
Te u fakahāhā atu ai ʻa ʻeku ʻofá kiate koe.+
13 ʻOku namu-lelei atu ʻa e ngaahi fuaʻiʻakaú;+
ʻOku ʻi hota ngaahi matapaá ʻa e faʻahinga kehekehe ʻo e fuaʻiʻakau lelei tahá.+
ʻA e fuaʻiʻakau foʻou pea pehē ki he fuaʻiʻakau motuʻa,
ʻE hoku ʻofaʻanga, kuó u tuku tauhi ia maʻau.
8 “Taumaiā naʻá ke hangē ko haku tuongaʻané,
ʻA ia naʻe fakahuhu ʻi he ongo huhu ʻo ʻeku faʻeé!
Pea ka u ka ʻilo koe ʻi tuʻa, te u ʻuma atu kiate koe,+
Pea ʻe ʻikai ke manuki mai ha taha kiate au.
Te u ʻoatu kiate koe ha uaine kuo huʻi ʻaki ha sipaisi ke ke inu,
Mo e huhuʻa foʻou ʻo e pomikānité.
3 Ko hono nima toʻohemá ʻe ʻi hoku lalo ʻulú,
Pea ko hono nima toʻomataʻú ʻe ala mai ke fāʻofua ʻiate au.+
4 ʻOku ou ʻai kimoutolu ke mou fuakava, ʻe ngaahi ʻofefine ʻo Selusalema:
ʻOua ʻe feinga ke fafangu pe langaʻi ʻiate au ʻa e ʻofá kae ʻoua kuó u maʻu ha ongoʻi pehē.”+
5 “Ko hai eni ʻoku haʻu mei he toafá,
ʻOkú ne falala atu ki hono ʻofaʻangá?”
“Naʻá ku fafangu koe ʻi he lalo ʻāpelé.
ʻA e feituʻu naʻe langā ai ʻa hoʻo faʻeé ʻiate koé.
ʻA e feituʻu naʻe langā ai ʻa ia naʻá ne fanauʻi koé.
6 ʻAi au ko ha sila ki ho lotó,
Ko ha sila ki ho nimá,
He ko e ʻofá ʻoku mālohi ʻo hangē ko e maté,+
Pea ko e anga-līʻoa maʻataʻataá ʻoku taʻeʻunua ʻo hangē ko e Faʻitoká.*
Ko e ulo ʻa e ʻofá ko ha afi kakaha, ko e ulo meia Iā.*+
7 Heʻikai lava ke tāmateʻi ʻa e ʻofá ʻe he ngaahi vai ʻoku tafe mālohí,+
Pea heʻikai lava ke tafiʻi atu ia ʻe he ngaahi vaitafé.+
Kapau ʻe foaki ʻe ha tangata ʻa e kotoa ʻo e koloa ʻo hono falé koeʻuhi ko e ʻofá,
ʻE manukiʻi lahi ai ia.”
8 “ʻOku ʻi ai homau kiʻi tuofefine,+
Pea ʻoku teʻeki ai ke tupu ʻa hono huhú.
Ko e hā te mau fai ki homau tuofefiné
ʻI he ʻaho ʻe fai mai ai ha lea mali kiate iá?”
9 “Kapau ko ha ʻā ia,
Te mau langa ʻi hono fungá hano teuteu siliva,
Ka ʻo kapau ko ha matapā ia,
Te mau tuki tāpuni ia ʻaki ʻa e lauʻipapa sita.”
10 “Ko ha ʻā au,
Pea ko hoku ongo huhú ʻoku hangē ha ongo tauá.
Ko ia ʻi heʻene vakaí kuó u hoko
ʻO hangē ko e tokotaha ʻokú ne maʻu ʻa e nongá.
11 Naʻe maʻu ʻe Solomone ha ngoue kālepi+ ʻi Pēali-hamoni.
Naʻá ne tuku ʻa e ngoue kālepí ki he kau tauhí.
Naʻe fiemaʻu ke ʻomi ʻe he tokotaha taki taha ha konga siliva ʻe taha afe ki hono fuá.
12 ʻOku ʻi ai ʻeku ngoue vaine pē ʻaʻaku ʻoku ou faʻiteliha ki ai.
Ko e ngaahi konga siliva ʻe taha afe* ʻoku ʻaʻau ia, ʻe Solomone,
Pea ko e uangeau ki he faʻahinga ʻoku nau tokangaʻi ʻa hono fuá.”
13 “ʻA koe ʻokú ke nofo ʻi he ngaahi ngoué,+
ʻOku fanongo ʻa e ngaahi kaungāmeʻá ki ho leʻó.
Tuku ke u fanongo ki ai.”+
14 “Fakatoʻotoʻo mai, ʻa hoku ʻofaʻanga,
Pea ke ke veʻe-vave ʻo hangē ha kāseli+
Pe ko ha kiʻi tia tangatá
Ki he ngaahi moʻunga ʻo e ʻuluʻakau namu-kakalá.”
Pe “Ko e hiva mālie taha.”
Fakafoʻilea, “Fusi atu au.”
Pe “fakalau.”
ʻA ia, ko e kau finemuí.
Pe “ha pūlou ʻo e tēngihiá.”
Pe “ki haʻaku.”
Pe ngalingali, “ʻi he ngaahi fī ʻo e ʻulú.”
Pe “ngaahi meʻa fuopotopoto.”
Pe “naʻatí.”
Ko ha ʻakau ʻoku namu-lelei hono matalá; ʻoku maʻu mei hono laú ʻa e fakalanu melomelo fiofio kulokula.
Pe “matātangata.”
Pe “fale fakaʻofoʻofá.”
Fakafoʻilea, “fale ʻo e uainé.”
ʻOku ʻuhinga eni ki he kālepi tauaki kuo fakafuo ʻo hangē ha keké.
Pe “faʻahitaʻu ʻuhoʻuhá.”
Fakafoʻilea, “mānava mai.”
Pe “ngaahi moʻunga ʻo Petá.”
ʻA ia, ko ha feituʻu faiʻanga meʻa tefito ia ʻo e koló ki he kakaí.
Ko ha tokaʻanga kuo ʻato naʻe ngāueʻaki ke fata ai ha tokotaha mahuʻinga.
Pe “pale; kahoa.”
Pe “manifí.”
Fakafoʻilea, “mānava mai.”
Pe “ʻo e ngaahi moʻunga ʻoku hanga ki Lepanoní.”
Pe ngalingali, “Ko ho kilí.”
Pe “ngoue.”
Ko ha sipaisi ʻoku maʻu mei ha faʻahinga matalaʻiʻakau meimei tatau mo e lilé.
Sio ki he fakamatala ʻi lalo ʻi he Nōm 24:6.
Pe “Angiiki mai.”
Fakafoʻilea, “ava ki he polotá.”
Pe “pūloú.”
Pe ngalingali, “hangē ha fuhinga teiti.”
Pe ngalingali, “ʻi he ngutu ʻo e vaí.”
Fakafoʻilea, “ʻaoʻingutú.”
Pe “Kolo Fakalatá.”
Pe “manifí.”
Fakafoʻilea, “tama haohaoa.”
Fakafoʻilea, “sio mai.”
Sio ki he Lea mo Hono ʻUhinga.
Pe “talamuka.”
Pe “loto-leleí.”
Pe “meʻe ʻa Mehanemí.”
Fakafoʻilea, “ko ho ʻulú.”
Pe “kāvea.”
Ko e faʻahinga paame eni ʻoku tupu ʻi Pālesitaine.
Fakafoʻilea, “ʻaoʻingutú.”
Pe “talamuka.”
Pe “ko Seolí,” ʻa ia, ko e faʻitoka anga-maheni ʻo e faʻahinga ʻo e tangatá. Sio ki he Lea mo Hono ʻUhinga.
Ko e “Iā” ko ha faʻunga fakanounou ia ʻo e huafa Sihová.
Fakafoʻilea, “Ko e taha afe.”