TANIELA

1 ʻI he taʻu hono tolu ʻo e tuʻi ʻa Tuʻi Sihoiakimi+ ʻo Siutá, naʻe haʻu ai ʻa Tuʻi Nepukanesa ʻo Pāpiloné ki Selusalema ʻo ne ʻākoloʻi ia.+ 2 ʻI he faai mai ʻa e taimí naʻe tuku ai ʻe Sihova ʻa Tuʻi Sihoiakimi ʻo Siutá ki hono nimá,+ fakataha mo e niʻihi ʻo e ngaahi naunau ʻo e fale* ʻo e ʻOtua moʻoní, pea naʻá ne ʻave ʻa e ngaahi meʻa ko iá ki he fonua ko Sainá*+ ki he fale* ʻo hono ʻotuá. Naʻá ne tuku ʻa e ngaahi naunaú ʻi he tukuʻanga koloa ʻo hono ʻotuá.+

3 Naʻe tuʻutuʻuni leva ʻa e tuʻí kia ʻAsipenasi ko e ʻōfisa pule ʻi hono lotoʻaá ke ʻomi ha niʻihi ʻo e kau ʻIsilelí,* ʻo kau ai ha faʻahinga ko e hako ʻo e ngaahi tuʻi mo e kau houʻeiki.+ 4 Naʻe fiemaʻu ke nau hoko ko ha kau talavou* ʻoku nau taʻemele, mo hā matamatalelei, maʻu ʻa e poto, ʻilo, mo e ʻiloʻilo,+ pea malava ke nau ngāue ʻi he palasi ʻo e tuʻí. Te ne akoʻi kinautolu ʻi he tohinima mo e lea ʻa e kau Kalitiá. 5 ʻIkai ngata aí, naʻe vaheʻi ʻe he tuʻí kiate kinautolu ha ʻinasi fakaʻaho mei he ngaahi meʻakai vovo ʻa e tuʻí pea mei he uaine naʻá ne inú. Naʻe fiemaʻu ke teuʻi* kinautolu ʻi he taʻu ʻe tolu, pea ʻi he ʻosi ʻa e taimi ko iá te nau hū ki he ngāue ʻa e tuʻí.

6 Pea naʻe ʻi honau lotolotongá ha niʻihi mei he matakali* ʻo Siutá: Ko Taniela,*+ Henania,* Misaeli,* pea mo ʻAsalaia.*+ 7 Pea naʻe vaheʻi ange ʻe he ʻōfisa pule ʻo e lotoʻaá ha ngaahi hingoa* kiate kinautolu; naʻá ne ʻoange kia Taniela ʻa e hingoa ko Pelitisasa,+ kia Henania ʻa e hingoa ko Setaleki, kia Misaeli ʻa e hingoa ko Mēsake, pea kia ʻAsalaia ʻa e hingoa ko ʻApitenikō.+

8 Ka naʻe fakapapauʻi ʻe Taniela ʻi hono lotó heʻikai te ne ʻuliʻi ia ʻaki ʻa e ngaahi meʻakai vovo ʻa e tuʻí pe ko e uaine naʻá ne inú. Ko ia naʻá ne kole ha ngofua ki he ʻōfisa pule ʻo e lotoʻaá ke ʻoua naʻa ʻuliʻi ia ʻi he meʻá ni. 9 Pea naʻe ʻai ʻe he ʻOtua moʻoní ʻa e ʻōfisa pule ʻo e lotoʻaá ke ne fakahāhā ha leleiʻia* mo ha meesi+ kia Taniela. 10 Ka naʻe pehē ange ʻe he ʻōfisa pule ʻo e lotoʻaá kia Taniela: “ʻOku ou manavahē telia ʻa hoku ʻeiki ko e tuʻí, ʻa ia kuó ne vaheʻi atu kiate kimoutolu ha meʻakai mo ha inu. ʻE fēfē kapau te ne sio ʻoku mou hā matamatakovi ange kimoutolu ʻi he kau talavou* kehe ʻi homou toʻú? Te mou ʻai au* ke u halaia ʻi he ʻao ʻo e tuʻí.” 11 Ka naʻe pehē ange ʻe Taniela ki he tauhi ko ia naʻe vaheʻi ange ʻe he ʻōfisa pule ʻo e lotoʻaá ke ne puleʻi ʻa Taniela, Henania, Misaeli, pea mo ʻAsalaiá: 12 “Siviʻi ange muʻa ʻa hoʻo kau sevānití ʻi ha ʻaho ʻe hongofulu, pea ʻomi pē ha vesitapolo ke mau kai mo ha vai ke mau inu; 13 pea fakahoa homau fōtungá ki he fōtunga ʻo e kau talavou* ʻa ia ʻoku nau kai ʻi he ngaahi meʻakai vovo ʻa e tuʻí, peá ke fakafeangai ki hoʻo kau sevānití ʻo fakatatau ki he meʻa te ke sio ki aí.”

14 Ko ia naʻá ne loto-tatau mo ʻenau fokotuʻú peá ne siviʻi kinautolu ʻi he ʻaho ʻe hongofulu. 15 ʻI he ʻosi ʻa e ʻaho ʻe hongofulú naʻe fakaʻofoʻofa ange mo hā moʻui lelei ange ʻa* honau fōtungá ʻi he kotoa ʻo e kau talavou* ko ia naʻa nau kai ʻi he ngaahi meʻakai vovo ʻa e tuʻí. 16 Ko ia naʻe ʻave ʻe he tauhí ia ʻa ʻenau ngaahi meʻakai vovó mo ʻenau uainé pea ʻoange pē kiate kinautolu ʻa e vesitapolo. 17 Pea naʻe ʻoange ʻe he ʻOtua moʻoní ki he kau talavou* ko eni ʻe toko faá ʻa e ʻilo mo e vavanga fakaefakakaukau ki he faʻahinga tohinima mo e poto kotoa pē; pea naʻe ʻoange kia Taniela ʻa e mahino ki he faʻahinga vīsone mo e misi+ kotoa pē.

18 ʻI he ʻosi ʻa e taimi naʻe fakahaaʻi ʻe he tuʻí ke ʻomi ai kinautolú,+ naʻe ʻomai leva kinautolu ʻe he ʻōfisa pule ʻo e lotoʻaá ki he ʻao ʻo Nepukanesá. 19 ʻI he folofola ʻa e tuʻí kiate kinautolú, naʻe ʻikai ke ʻilo ha taha ʻi he kulupu fakakātoa ʻo e kau talavoú ʻe hangē ko Taniela, Henania, Misaeli, pea mo ʻAsalaiá;+ pea naʻe hokohoko atu ʻenau ngāue ʻi he ʻao ʻo e tuʻí. 20 ʻI he meʻa kotoa pē naʻe ʻeke ʻe he tuʻí kiate kinautolu ʻa ia naʻe fiemaʻu ki ai ha poto mo ha mahino, naʻá ne ʻafioʻi naʻa nau lelei ange ʻo liunga hongofulu ʻi he kau taulaʻeiki faimaná mo e kau kikite+ ʻi hono puleʻangá fakakātoa. 21 Pea naʻe ʻi ai ai pē ʻa Taniela ʻo aʻu ki he ʻuluaki taʻu ʻo Tuʻi Kōlesí.+

2 ʻI he taʻu hono ua ʻo e tuʻi ʻa Nepukanesá, naʻá ne faʻa misi ai, pea naʻá ne* mātuʻaki hohaʻatuʻu+ ʻo ʻikai lava ai ke ne mohe. 2 Ko ia naʻe tuʻutuʻuni ai ʻa e tuʻí ke ʻomai ʻa e kau taulaʻeiki faimaná, ko e kau kikité, ko e kau faifakalouʻakaú, mo e kau Kalitiá* ke nau fakahā ki he tuʻí ʻa ʻene misí. Ko ia naʻa nau hū atu ai ʻo tuʻu ʻi he ʻao ʻo e tuʻí.+ 3 Naʻe folofola ange leva ʻa e tuʻí kiate kinautolu: “Naʻe ʻi ai ʻeku misi, pea ʻoku ou* hohaʻatuʻu koeʻuhí ʻoku ou loto ke ʻilo ʻa e meʻa naʻá ku misi ki aí.” 4 Naʻe tali ange ʻa e kau Kalitiá ki he tuʻí ʻi he lea faka-Alameá:*+ “ʻE hoʻo ʻAfio, ʻofa ke ke lākoifie ʻo taʻengata. Fakamatala mai ʻa e misí ki hoʻo kau sevānití, pea te mau tala atu ʻa hono ʻuhingá.”

5 Naʻe tali ange ʻe he tuʻí ki he kau Kalitiá: “Ko ʻeku lea aofangatukú eni: Kapau heʻikai te mou ʻai ke u ʻilo ʻa ʻeku misí, fakataha mo hono ʻuhingá, ʻe tuʻutuʻu kongokonga kimoutolu, pea ʻe fulihi homou ngaahi falé ke hoko ko e ngaahi fale mālōlō ki he kakaí.* 6 Ka ʻo kapau te mou tala mai ʻa e misí mo hono ʻuhingá, te mou maʻu meiate au ha ngaahi meʻaʻofa mo ha pale mo ha lāngilangi lahi.+ Ko ia mou tala mai angé ʻa e misí mo hono ʻuhingá.”

7 Naʻa nau tali ange ko hono tuʻo uá ia: “Tuku ke fakamatalaʻi mai ʻe he tuʻí ʻa e misí ki heʻene kau sevānití, pea te mau tala atu ʻa hono ʻuhingá.”

8 Naʻe tali ange ʻe he tuʻí: “ʻOku ou ʻiloʻi lelei ʻoku mou feinga ke tolotoloi hano fai atu ha meʻa kiate kimoutolu, he ʻoku mou ʻosi ʻiloʻi ʻa ʻeku lea aofangatukú. 9 Kapau heʻikai te mou fakaʻilo mai kiate au ʻa e misí, ʻoku taha pē ʻa e tautea ʻe fai kiate kimoutolú hono kotoa. Ka kuo mou felotoi ke tala mai kiate au ha loi mo e kākā ʻi he ʻamanaki ʻe liliu ʻa ʻeku fakakaukaú. Ko ia mou tala mai ʻa e misí, pea te u ʻilo ai ʻoku lava ke mou fakamatalaʻi ʻa hono ʻuhingá.”

10 Naʻe tali ange ʻe he kau Kalitiá ki he tuʻí: “ʻOku ʻikai ha tangata ʻi he māmaní* ʻe malava ke ne fai ʻa e meʻa ʻoku kounaʻi ʻe he tuʻí, he ʻoku ʻikai ha tuʻi lahi pe ko ha kōvana kuó ne kole ha meʻa pehē ki ha taulaʻeiki faimana pe tokotaha kikite pe ko ha Kalitia. 11 Ko e meʻa ʻoku kole ki ai ʻa e tuʻí ʻoku faingataʻa, pea ʻoku ʻikai ha taha ʻe moʻui ʻe lava ke ne tala ʻa e meʻá ni ki he tuʻí tuku kehe pē ʻa e ngaahi ʻotuá, ʻa ia ʻoku ʻikai te nau nofo ʻi he lotolotonga ʻo e tangata ko e meʻa noa peé.”*

12 Naʻe houhau lahi ʻa e tuʻí ʻi he meʻá ni peá ne fai ha tuʻutuʻuni ke fakaʻauha ʻa e kau tangata poto kotoa pē ʻo Pāpiloné.+ 13 ʻI hono ʻoatu ʻa e tuʻutuʻuní pea teu ke tāmateʻi ʻa e kau tangata potó, naʻa nau kumi foki kia Taniela mo hono ngaahi kaungāmeʻá ke tāmateʻi mo kinautolu.

14 ʻI he taimi ko iá naʻe lea fakapotopoto mo fakaoloolo ai ʻa Taniela kia ʻAlioke ko e pule ʻo e kau kaʻate ʻa e tuʻí, ʻi heʻene ʻalu atu ke tāmateʻi ʻa e kau tangata poto ʻo Pāpiloné. 15 Naʻá ne ʻeke ange kia ʻAlioke ko e ʻōfisa ʻa e tuʻí: “Ko e hā ʻoku ʻomai ai ha tuʻutuʻuni fefeka pehē mei he tuʻí?” Naʻe fakamatala leva ʻa ʻAlioke kia Taniela ʻo fekauʻaki mo e meʻá ni.+ 16 Ko ia naʻe hū atu ai ʻa Taniela ʻo kole ki he tuʻí ke tuku ange kiate ia ha taimi ke ne tala ange ai ʻa e ʻuhinga ʻo e misí ki he tuʻí.

17 Naʻe ʻalu leva ʻa Taniela ki hono falé ʻo fakahā ʻa e meʻá ni ki hono ngaahi kaungāmeʻá, kia Henania, Misaeli, pea mo ʻAsalaia. 18 Naʻá ne kole ange kiate kinautolu ke nau lotu ʻo kole ki ha ʻaloʻofa mei he ʻOtua ʻo langí ʻo fekauʻaki mo e meʻa fakapulipuli ko ení, koeʻuhí ke ʻoua naʻa fakaʻauha ʻa Taniela mo hono ngaahi kaungāmeʻá fakataha mo e toenga ʻo e kau tangata poto ʻo Pāpiloné.

19 Pea naʻe fakaeʻa ʻa e meʻa fakapulipulí kia Taniela ʻi ha vīsone ʻi he poʻulí.+ Ko ia naʻe fakahīkihikiʻi ai ʻe Taniela ʻa e ʻOtua ʻo langí. 20 Naʻe fakahaaʻi ʻe Taniela:

24 Naʻe ʻalu leva ʻa Taniela kia ʻAlioke, ʻa ia naʻe vaheʻi ʻe he tuʻí ke ne fakaʻauha ʻa e kau poto ʻo Pāpiloné,+ peá ne pehē ange kiate ia: “ʻOua naʻá ke fakaʻauha ha taha pē ʻi he kau poto ʻo Pāpiloné. ʻAve au ki he ʻao ʻo e tuʻí, pea te u tala ʻa e ʻuhinga ʻo e misí ki he tuʻí.”

25 Naʻe ʻave fakavave ʻe ʻAlioke ʻa Taniela ki he ʻao ʻo e tuʻí peá ne pehē ange kiate ia: “Kuó u ʻilo ha tangata ʻi he faʻahinga naʻe ʻomi fakamālohi mei Siutá+ ʻa ia ʻe lava ke ne fakaʻilo ʻa e ʻuhinga ʻo e misí ki he tuʻí.” 26 Naʻe folofola ʻa e tuʻí kia Taniela, ʻa ia ko hono hingoá ko Pelitisasa:+ “ʻE lava moʻoni koā ke ke fakaʻilo mai kiate au ʻa e misi naʻá ku mamata ki aí, pea mo hono ʻuhingá?”+ 27 Naʻe tali ange ʻe Taniela ki he tuʻí: “ʻOku ʻikai ha taha ʻi he kau potó, ko e kau kikité, ko e kau taulaʻeiki faimaná, pe ko e kau vavalo ki he fetuʻú* ʻe malava ke ne tala ki he tuʻí ʻa e meʻa fakapulipuli ʻokú ne fiemaʻú.+ 28 Ka ʻoku ʻi ai ha ʻOtua ʻi he langí ʻa ia ko ha Tokotaha-Fakaeʻa ia ʻo e ngaahi meʻa fakapulipulí,+ pea kuó ne fakaʻilo kia Tuʻi Nepukanesa ʻa e meʻa ʻe hoko ʻi he ngaahi ʻaho fakaʻosí. Ko hoʻo misí eni, pea ko e ngaahi vīsone eni naʻá ke mamata ki ai ʻi hoʻo tokoto ʻi ho mohengá:

29 “Ko e meʻa kiate koé, ʻe hoʻo ʻAfio, ʻi hoʻo ʻi ho mohengá naʻe ʻalu ai ʻa hoʻo fakakaukaú ki he meʻa ʻe hoko ʻi he kahaʻú, pea ko e Tokotaha-Fakaeʻa ʻo e ngaahi meʻa fakapulipulí kuó ne fakaʻilo kiate koe ʻa e meʻa ʻe hokó. 30 Ko e meʻa kiate aú, naʻe ʻikai ke fakaeʻa ʻa e meʻa fakapulipulí ni kiate au koeʻuhí ko haʻaku maʻu ha poto lahi ange ʻi ha toe taha pē ʻoku moʻui; ka koeʻuhí ke fakaʻilo ʻa e ʻuhingá ki he tuʻí koeʻuhí ke ke ʻiloʻi ʻa e meʻa ʻa ia naʻá ke fakakaukau ʻo fekauʻaki mo iá.+

31 “Ko koé, ʻe hoʻo ʻAfio, naʻá ke moʻusioa, pea naʻá ke mamata ki ha fuʻu ʻīmisi lahi fakaʻulia. Ko e ʻīmisi ko iá, ʻa ia naʻe lahi fau mo mātuʻaki ngingila, naʻe tuʻu ia ʻi muʻa ʻiate koe, pea naʻe fakailifia ʻa hono fōtungá. 32 Ko e ʻulu ʻo e ʻīmisi ko iá ko e koula lelei,+ ko hono fatafatá mo hono ongo nimá ko e siliva,+ ko hono keté mo hono ongo alangá ko e kopa,+ 33 ko hono ongo kauvaʻé ko e ukamea,+ pea ko hono ongo lauʻivaʻé naʻe ukamea ʻa hono konga pea ʻumea*+ ʻa hono konga. 34 Naʻe hokohoko atu pē ʻa hoʻo sió ʻo aʻu ki hano tā mai ʻo ha maka, ʻo ʻikai ʻaki ʻa e nimá, pea naʻá ne taaʻi ʻa e ʻīmisí ʻi hono lauʻivaʻe ukamea mo e ʻumeá ʻo ne laiki ia.+ 35 ʻI he taimi ko iá ko e ukameá, ko e ʻumeá, ko e kopá, ko e silivá, pea mo e koulá, naʻe laiki fakataha ia pea nau hoko ʻo hangē ko e kafukafu mei he ʻauʻauʻanga uite ʻi he faʻahitaʻu māfaná pea naʻe ʻave ia ʻe he matangí, ko ia naʻe ʻikai lava ai ke maʻu hano toenga. Ka ko e maka naʻá ne taaʻi ʻa e ʻīmisí naʻe hoko ia ko ha fuʻu moʻunga, pea naʻá ne fakafonu ʻa e māmaní kotoa.

36 “Ko e misí eni, pea te mau tala atu ai leva ki he tuʻí ʻa hono ʻuhingá. 37 Ko koe, ʻe hoʻo ʻAfio—ʻa e tuʻi ʻo e ngaahi tuʻi ʻa ia kuo foaki ki ai ʻe he ʻOtua ʻo langí ʻa e puleʻanga,+ mo e mafai, mo e mālohi, pea mo e lāngilangi, 38 pea kuó ne foaki ki ho nimá ʻa e kau tangata ʻi ha feituʻu pē ʻoku nau nofo ai, pea pehē ki he fanga manu ʻo e vaó mo e fanga manupuna ʻo e langí, pea kuó ne ʻai koe ke ke pule kiate kinautolu hono kotoa+—ko koe tonu ʻa e ʻulu koulá.+

39 “Ka ʻi he hili koé ʻe mahiki hake ha puleʻanga ʻe taha,+ ʻoku māʻulalo ange ia ʻiate koe; pea hoko mai ai ha puleʻanga ʻe taha, ko ha puleʻanga hono tolu, ʻa ia ko e kopá, ʻe pule ia ki he māmaní kotoa.+

40 “Ko e meʻa ki he puleʻanga hono faá, ʻe mālohi ia ʻo hangē ko e ukameá.+ He ʻi he hangē ko hono laiki ʻe he ukameá ʻo fakaʻauha ʻosi ʻa e meʻa kehe kotoa pē, ʻio, hangē ko e ukamea ʻokú ne fai ʻa e havekí, te ne laiki mo haveki ʻa e ngaahi puleʻangá ni kotoa.+

41 “Pea hangē ko ia naʻá ke mamata ki ai ko e lauʻivaʻé mo e louhiʻivaʻé ʻa ia ko hono konga ko e ʻumea ʻa ha tufunga-ʻumea pea ko hono konga ko e ukameá, ko e puleʻangá ʻe māvahevahe, ka ʻe kei ʻi ai pē ha mālohi ʻo e ukameá, ʻo hangē pē ko hoʻo sio ki he fio ʻa e ukameá mo e ʻumea moluú. 42 Pea hangē ko e hoko ʻa e louhiʻivaʻé ʻo konga ʻumea mo ukameá, ko ia ko e puleʻangá ʻe mālohi ʻa hono konga pea vaivai ʻa hono konga. 43 Hangē pē ko hoʻo sio ki he fio ʻa e ukameá mo e ʻumea moluú, te na fio mo e kakaí;* ka heʻikai te na fepikitaki fakataha, ʻa e taha mo e taha, ʻo hangē pē ko e ʻikai ke hoa ʻa e ukameá mo e ʻumeá.

44 “ʻI he ngaahi ʻaho ʻo e ngaahi tuʻi ko iá ʻe fokotuʻu ʻe he ʻOtua ʻo langí ha puleʻanga+ ʻa ia ʻe ʻikai ʻaupito ke fakaʻauha.+ Pea ko e puleʻangá ni ʻe ʻikai tuku ia ki ha toe kakai kehe.+ Te ne laiki mo fakaʻauha ʻa e ngaahi puleʻanga+ kotoa ko ení, pea ʻe tuʻu toko taha pē ia ʻo taʻengata,+ 45 hangē pē ko hoʻo sio ki ha maka naʻe tā mei he moʻungá ʻo ʻikai ʻaki ha nima, pea naʻá ne laiki ʻa e ukameá, ko e kopá, ko e ʻumeá, ko e silivá, pea mo e koulá.+ Ko e ʻOtua Lahí kuó ne fakaʻilo ki he tuʻí ʻa e meʻa ʻe hoko ʻi he kahaʻú.+ ʻOku moʻoni ʻa e misí, pea ko hono fakaʻuhingaʻí ʻoku falalaʻanga.”

46 Pea naʻe tō foʻohifo ʻa Tuʻi Nepukanesa ki he kelekelé ʻi he ʻao ʻo Tanielá ʻo fai ha fakaʻapaʻapa kiate ia. Pea naʻá ne fai ha tuʻutuʻuni ke foaki kiate ia ha meʻaʻofa pea tutu ha ʻinisēnisi kiate ia. 47 Naʻe pehē ange ʻe he tuʻí kia Taniela: “Ko e moʻoni ko homou ʻOtuá ko ha ʻOtua ʻo e ngaahi ʻotua pea ko ha ʻEiki ʻo e ngaahi tuʻi pea ko e Tokotaha-Fakaeʻa ia ʻo e ngaahi meʻa fakapulipulí, koeʻuhí naʻá ke malava ke fakaeʻa ʻa e meʻa fakapulipuli+ ko ení.” 48 Naʻe hakeakiʻi leva ʻe he tuʻí ʻa Taniela peá ne foaki kiate ia ʻa e ngaahi meʻaʻofa lelei lahi, peá ne ʻai ia ke ne pule ki he vahefonua* kotoa ʻo Pāpiloné+ pea ko e ʻōfisa pule ki he kau tangata poto kotoa ʻo Pāpiloné. 49 Pea ʻi he kole ʻa Tanielá, naʻe fakanofo ai ʻe he tuʻí ʻa Setaleki, Mēsake, pea mo ʻApitenikō+ ke nau tokangaʻi ʻa hono fakalele ʻo e vahefonua* ʻo Pāpiloné, kae ngāue ʻa Taniela ʻi he lotoʻā ʻo e tuʻí.

3 Naʻe ngaohi ʻe Nepukanesa ko e tuʻí ha ʻīmisi koula naʻe kiupite ʻe 60* ʻa hono māʻolungá pea kiupite ʻe 6* ʻa hono fālahí. Naʻá ne fokotuʻu ia ʻi he tokalelei ʻo Tulá ʻi he vahefonua* ʻo Pāpiloné. 2 Naʻe fai leva ʻe Tuʻi Nepukanesa ha fekau ke fakatahataha ʻa e kau situlape,* kau ʻōfisa pule, kau kōvana, kau faleʻi, kau tauhi paʻanga, kau fakamaau, kau ʻōfisa fakamaau, mo e kau pule kotoa ʻo e ngaahi vahefonuá* ʻo nau omi ki hono fakatapui ʻo e ʻīmisi naʻe fokotuʻu ʻe Tuʻi Nepukanesá.

3 Ko ia naʻe fakatahataha mai ʻa e kau situlapé, kau ʻōfisa pulé, kau kōvaná, kau faleʻí, kau tauhi paʻangá, kau fakamāú, kau ʻōfisa fakamāú, pea mo e kau pule kotoa ʻo e ngaahi vahefonuá* ki hono fakatapui ʻo e ʻīmisi naʻe fokotuʻu ʻe Tuʻi Nepukanesá. Pea naʻa nau tuʻu ʻi muʻa ʻi he ʻīmisi naʻe fokotuʻu ʻe Nepukanesá. 4 Naʻe fanongonongo leʻo-lahi ʻe he tokotaha fai fanongonongó: “ʻOku tuʻutuʻuni atu kiate kimoutolu, ʻe ngaahi kakai, ngaahi puleʻanga, mo e ngaahi kakai lea kehekehe, 5 ʻi hoʻomou fanongo ki he leʻo ʻo e meʻaifí, meʻaifi paipá, sifá, haʻape tapatolú, meʻalea filó, fuluta lahí, mo e ngaahi meʻalea kehekehé, kuo pau ke mou fakatōmapeʻe ʻo lotu ki he ʻīmisi koula naʻe fokotuʻu ʻe Tuʻi Nepukanesá. 6 ʻIlonga ʻa ia ʻe ʻikai ke fakatōmapeʻe ʻo lotú ʻe lī leva ia ki he loto fōnise afi vela kakahá.”+ 7 Ko ia ʻi he fanongo ʻa e ngaahi kakaí kotoa ki he leʻo ʻo e meʻaifí, meʻaifi paipá, sifá, haʻape tapatolú, meʻalea filó, mo e ngaahi meʻalea kehekehé, naʻe fakatōmapeʻe ʻa e ngaahi kakai kotoa pē, ngaahi puleʻanga, mo e ngaahi kakai lea kehekehé ʻo nau lotu ki he ʻīmisi koula naʻe fokotuʻu ʻe Tuʻi Nepukanesá.

8 Pea ʻi he taimi ko iá naʻe laka atu ki muʻa ha niʻihi ʻo e kau Kalitiá ʻo talatalaakiʻi* ʻa e kau Siú. 9 Naʻa nau pehē kia Tuʻi Nepukanesa: “ʻE hoʻo ʻAfio, ʻofa ke ke lākoifie ʻo taʻengata. 10 Naʻá ke fai ʻa e tuʻutuʻuni, ʻe hoʻo ʻAfio, ʻi he taimi ʻe fanongo ai ʻa e tangata kotoa pē ki he leʻo ʻo e meʻaifí, meʻaifi paipá, sifá, haʻape tapatolú, meʻalea filó, fuluta lahí, mo e ngaahi meʻalea kehekehé, ke nau fakatōmapeʻe ʻo lotu ki he ʻīmisi koulá; 11 pea ʻilonga ʻa ia ʻe ʻikai fakatōmapeʻe ʻo lotú ʻe lī ia ki he loto fōnise afi vela kakahá.+ 12 Ka ʻoku ʻi ai ha kau Siu ʻa ia naʻá ke fakanofo ke nau pule ki he vahefonua* ʻo Pāpiloné: Ko Setaleki, Mēsake, pea mo ʻApitenikō.+ Ko e kau tangatá ni kuo ʻikai te nau tokaʻi koe, ʻe hoʻo ʻAfio. ʻOku ʻikai te nau tauhi ki ho ngaahi ʻotuá, pea ʻoku nau fakafisi ke lotu ki he ʻīmisi koula kuó ke fokotuʻú.”

13 Pea ʻi he houhau lahi ʻa Nepukanesá, naʻá ne tuʻutuʻuni ai ke ʻomi ʻa Setaleki, Mēsake, pea mo ʻApitenikō. Ko ia naʻe ʻomi ʻa e kau tangatá ni ki he ʻao ʻo e tuʻí. 14 Naʻe pehē ange ʻe Nepukanesa kiate kinautolu: “ʻOku moʻoni koā, ʻe Setaleki, Mēsake, mo ʻApitenikō, ʻoku ʻikai te mou tauhi ki hoku ngaahi ʻotuá+ pea ʻoku mou fakafisi ke lotu ki he ʻīmisi koula kuó u fokotuʻú? 15 Ko eni ʻi hoʻomou fanongo ki he leʻo ʻo e meʻaifí, meʻaifi paipá, sifá, haʻape tapatolú, meʻalea filó, fuluta lahí, mo e ngaahi meʻalea kehekehé, kapau ʻoku mou mateuteu ke fakatōmapeʻe ʻo lotu ki he ʻīmisi kuó u ngaohí, ʻoku lelei. Ka ʻo kapau te mou fakafisi ke lotu ki ai, ʻe lī leva kimoutolu ki he loto fōnise afi vela kakahá. Pea ko hai ia ʻa e ʻotua ʻe lava ke ne fakahaofi kimoutolu mei hoku nimá?”+

16 Naʻe tali ange ʻe Setaleki, Mēsake, mo ʻApitenikō ki he tuʻí: “ʻE Nepukanesa, ʻoku ʻikai haʻamau toe tali ʻe fai atu kiate koe ʻi he meʻá ni. 17 Kapau ko e meʻa ia ʻe hokó, ko homau ʻOtuá ʻa ia ʻoku mau tauhi ki aí ʻe malava ke ne fakahaofi kimautolu mei he fōnise afi vela kakahá, ʻe hoʻo ʻAfio, pea mo fakahaofi kimautolu mei ho nimá.+ 18 Ka neongo kapau heʻikai te ne fai pehē, tuku ke ke ʻafioʻi, ʻe hoʻo ʻAfio, ʻe ʻikai te mau tauhi ki ho ngaahi ʻotuá pe lotu ki he ʻīmisi koula kuó ke fokotuʻú.”+

19 Naʻe hoko leva ai ʻo mātuʻaki tōlili ʻa Nepukanesa ʻia Setaleki, Mēsake, mo ʻApitenikō ʻo mafuli ʻa hono fofongá* kiate kinautolu, pea naʻá ne fai ha tuʻutuʻuni ke tafu ʻa e fōnisé ke vela ange ʻo liunga fitu ʻi he tuʻunga anga-mahení. 20 Naʻá ne tuʻutuʻuni ki he niʻihi ʻo e kau tangata toʻa ʻi heʻene kau taú ke nau haʻi ʻa Setaleki, Mēsake, mo ʻApitenikō pea lī kinautolu ki he loto fōnise afi vela kakahá.

21 Ko ia naʻe haʻi ʻa e kau tangatá ni lolotonga ia ʻoku nau kei tui honau pulupulú, kofú, tataá, mo honau teunga kehé kotoa, pea naʻe lī kinautolu ki he loto fōnise afi vela kakahá. 22 Koeʻuhí ko e fuʻu fefeka ʻa e tuʻutuʻuni ʻa e tuʻí pea naʻe anga-kehe ʻa e vela ʻa e fōnisé, ko e kau tangata naʻa nau ʻave ʻa Setaleki, Mēsake, mo ʻApitenikoó ko kinautolu ia naʻa nau mate ʻi he ulo ʻa e afí. 23 Ka ko e kau tangata ko eni ʻe toko tolú, ʻa Setaleki, Mēsake, mo ʻApitenikō, naʻa nau tō ki he loto fōnise afi vela kakahá kuo haʻi kinautolu.

24 Naʻe hoko ʻo ilifia ʻa Tuʻi Nepukanesa he taimi ko iá peá ne tuʻu fakavave hake ʻo ne pehē ki heʻene kau ʻōfisa māʻolungá: “ʻIkai ko e kau tangata ʻe toko tolu naʻa tau haʻi ʻo lī ki he loto afí?” Naʻa nau tali ange ki he tuʻí: “Ko ia, ʻe hoʻo ʻAfio.” 25 Naʻá ne pehē ange: “Vakai atu! ʻOku ou sio ki ha kau tangata ʻe toko fā ʻoku nau lue takai holo ʻi he loto afí ʻoku ʻikai ke haʻi kinautolu, pea ʻoku ʻikai ke hoko ha kovi kiate kinautolu, pea ko e tokotaha hono faá ʻokú ne hangē mai ko ha ʻalo ʻo e ngaahi ʻotuá.”

26 Naʻe fakaofiofi ʻa Nepukanesa ki he matapā ʻo e fōnise afi vela kakahá ʻo ne pehē atu: “ʻE Setaleki, Mēsake, mo ʻApitenikō, ʻa e kau sevāniti ʻa e ʻOtua Fungani Māʻolungá,+ mou hū mai ki tuʻa ʻo omi ki heni!” Naʻe hū mai ki tuʻa ʻa Setaleki, Mēsake, mo ʻApitenikō mei he loto afí. 27 Pea ko e kau situlape, kau ʻōfisa pule, kau kōvana, mo e kau ʻōfisa māʻolunga ʻa e tuʻí naʻe fakatahataha aí+ naʻa nau sio naʻe ʻikai ke uesia ʻe he afí ʻa e* sino ʻo e kau tangatá ni;+ naʻe ʻikai ke māngia hanau fulufuluʻiʻulu ʻe taha, naʻe ʻikai ke toe kehe ʻa honau pulupulú, pea naʻe ʻikai ʻaupito haʻanau namu ʻohuafi.

28 Naʻe fakahaaʻi leva ʻe Nepukanesa: “Ke fakahīkihikiʻi ʻa e ʻOtua ʻo Setaleki, Mēsake, mo ʻApitenikoó,+ ʻa ia naʻá ne fekauʻi mai ʻene ʻāngeló ʻo ne fakahaofi ʻa ʻene kau sevānití. Naʻa nau falala kiate ia pea ʻikai te nau fai ki he tuʻutuʻuni ʻa e tuʻí pea naʻa nau loto-lelei ke nau mate* kae ʻikai ke nau tauhi pe lotu ki ha toe ʻotua, tuku kehe pē ʻa honau ʻOtuá.+ 29 Ko ia ʻoku ou fai ai ha tuʻutuʻuni ke ʻilonga ha kakai, puleʻanga, pe kakai lea kehe te nau leaʻaki ha meʻa ʻoku kovi ʻo fekauʻaki mo e ʻOtua ʻo Setaleki, Mēsake, mo ʻApitenikoó ʻe tuʻutuʻu kongokonga kinautolu, pea ʻe fulihi honau ngaahi falé ke hoko ko e ngaahi fale mālōlō ki he kakaí;* he ʻoku ʻikai ha toe ʻotua kehe ʻoku malava ke faifakahaofi ʻo hangē ko e tokotaha ko ení.”+

30 Pea naʻe hanga ʻe he tuʻí ʻo hakeakiʻi* ʻa Setaleki, Mēsake, mo ʻApitenikō ʻi he vahefonua* ʻo Pāpiloné.+

4 “Meia Tuʻi Nepukanesa ki he kotoa ʻo e ngaahi kakaí, ngaahi puleʻangá, mo e ngaahi kakai lea kehekehe ʻoku nofo ʻi he kotoa ʻo e māmaní: ʻOfa ke hulu fau ʻa hoʻomou melinó! 2 ʻOku ou fiefia ke fakahaaʻi ʻa e ngaahi fakaʻilonga mo e ngaahi meʻa fakaofo kuo fai mai kiate au ʻe he ʻOtua Fungani Māʻolungá. 3 He kāfakafa moʻoni ē ko ʻene ngaahi fakaʻilongá, pea he mālohi ē ko ʻene ngaahi meʻa fakaofó! Ko hono puleʻangá ko ha puleʻanga taʻengata, pea ko ʻene pulé ʻoku mei he toʻutangata ki he toʻutangata.+

4 “Ko au Nepukanesa, naʻá ku nofo nonga pē ʻi hoku falé peá u lakalakaimonū ʻi hoku palasí. 5 Naʻá ku mamata ki ha misi ʻa ia naʻá ne ʻai au ke u ilifia. ʻI heʻeku tokoto ʻi hoku mohengá, naʻe fakamanavahē kiate au ʻa e ngaahi meʻa naʻe hā mai mo e ngaahi vīsone naʻá ku mamata ki aí.+ 6 Ko ia naʻá ku ʻoatu ha tuʻutuʻuni ke ʻomi ki hoku ʻaó ʻa e kau tangata poto kotoa ʻo Pāpiloné koeʻuhí ke nau fakaʻilo kiate au ʻa e ʻuhinga ʻo e misí.+

7 “ʻI he taimi ko iá naʻe haʻu ʻa e kau taulaʻeiki faimaná, ko e kau kikité, ko e kau Kalitiá,* pea mo e kau vavalo ki he fetuʻú.*+ ʻI heʻeku fakahā kiate kinautolu ʻa ʻeku misí, naʻe ʻikai te nau malava ke fakaʻilo kiate au ʻa hono ʻuhingá.+ 8 Naʻe faifai pē pea haʻu ʻa Taniela ki hoku ʻaó, ʻa ia ko hono hingoá ko Pelitisasa+ ko e ui ki he hingoa ʻo hoku ʻotuá+ pea naʻe ʻiate ia ʻa e laumālie ʻo e ngaahi ʻotua toputapú,+ pea naʻá ku tala ange kiate ia ʻa ʻeku misí:

9 “‘ʻE Pelitisasa ko e pule ʻo e kau taulaʻeiki faimaná,+ ʻoku ou ʻiloʻi lelei ko e laumālie ʻo e ngaahi ʻotua toputapú ʻoku ʻiate koe+ pea ʻoku ʻikai ha meʻa fakapulipuli ʻe fuʻu faingataʻa kiate koe.+ Ko ia fakamatalaʻi mai kiate au ʻa e ngaahi vīsone naʻá ku mamata ki ai ʻi heʻeku misí pea mo hono ʻuhingá.

10 “‘ʻI he ngaahi vīsone naʻá ku mamata ki ai lolotonga ʻeku ʻi hoku mohengá, naʻá ku sio ai ki ha fuʻu ʻakau+ ʻi he lotolotonga ʻo e māmaní, pea naʻe māʻolunga ʻaupito.+ 11 Naʻe tupu ʻa e fuʻu ʻakaú ʻo mālohi, pea ko hono tumutumú naʻe aʻu ki he langí, pea naʻe malava ke mamata ki ai mei he ngatangataʻanga ʻo e māmaní kotoa. 12 Ko hono laú naʻe fakaʻofoʻofa, pea ko hono fuá naʻe lahi ʻaupito, pea naʻe ʻi ai ha meʻakai ki he tokotaha kotoa. Naʻe fakamalumalu ʻi lalo ai ʻa e fanga manu ʻo e vaó, pea naʻe nofo ʻi hono ngaahi vaʻá ʻa e fanga manupuna ʻo e langí, pea naʻe maʻu meʻatokoni mei ai ʻa e ngaahi meʻamoʻui kotoa pē.*

13 “‘ʻI heʻeku vakai ki he ngaahi vīsone naʻá ku mamata ki ai lolotonga ʻeku ʻi hoku mohengá, naʻá ku sio ai ki ha talafekau,* ko ha tokotaha māʻoniʻoni, naʻe ʻalu hifo mei he langí.+ 14 Naʻá ne kaila leʻo-lahi: “Tā hifo ʻa e fuʻu ʻakaú,+ tutuʻu ʻa hono ngaahi vaʻá, lulu ke ngangana ʻa hono ngaahi laú, pea fakamovetevete ʻa hono fuá. Tuku ke hola ʻa e fanga manu naʻe ʻi lalo aí, mo e fanga manupuná mei hono ngaahi vaʻá. 15 Kae tuku pē ʻa hono tefitó mo hono ngaahi aká ʻi he kelekelé, ʻo haʻiʻaki ʻa e ukamea mo e kopa, ʻi he lotolotonga ʻo e musie ʻo e vaó. Tuku ke viviku ia ʻi he hahau mei he langí, pea tuku ke ʻinasi fakataha ia mo e fanga manú ʻi he lotolotonga ʻo e mohuku ʻo e māmaní.+ 16 Tuku ke liliu ʻa hono lotó mei he loto ʻo ha tangata, pea tuku ke ʻoange ki ai ʻa e loto ʻo ha manu, pea ke fakalaka atu ai+ ha kuonga ʻe fitu.+ 17 Ko e meʻá ni ko e tuʻutuʻuni ia ʻa e kau talafekaú,*+ pea ko e kolé ni ʻoku fanongonongo ia ʻe he kau māʻoniʻoní, koeʻuhi ke ʻilo ʻe he kakai moʻuí ko e Fungani Māʻolungá ʻa e Pule ʻi he puleʻanga ʻo e faʻahinga ʻo e tangatá+ pea ko ia ʻokú ne foaki ʻa e pulé ki ha taha pē ʻokú ne loto ki ai, pea ʻokú ne fokotuʻu ki ai naʻa mo e faʻahinga māʻulalo taha ʻo e tangatá.”

18 “‘Ko e misi ia naʻá ku mamata ki aí, ʻa au Tuʻi Nepukanesa; pea ko koe leva eni, ʻe Pelitisasa, ke ke fakahā mai ʻa hono ʻuhingá, he ko e kotoa ʻo e kau tangata poto ʻi hoku puleʻangá ʻoku ʻikai lava ke nau fakaʻilo mai kiate au ʻa hono ʻuhingá.+ Ka ʻokú ke malava ke fai ia, koeʻuhi ko e laumālie ʻo e ngaahi ʻotua toputapú ʻoku ʻiate koe.’

19 “ʻI he taimi ko iá, ko Taniela ʻa ia ko hono hingoá ko Pelitisasá,+ naʻá ne manavahē ʻi ha kiʻi mōmeniti, pea naʻe kamata ke fakailifiaʻi ia ʻe heʻene ngaahi fakakaukaú.

“Naʻe pehē ange ʻe he tuʻí, ‘ʻE Pelitisasa, ʻoua ʻe tuku ke fakailifiaʻi koe ʻe he misí mo hono fakaʻuhingá.’

“Naʻe tali ange ʻe Pelitisasa, ‘ʻE hoku ʻeiki, ʻofa ke hoko ʻa e misí ki he faʻahinga ʻoku fehiʻa kiate koé, pea mo hono fakaʻuhingá ki ho ngaahi filí.

20 “‘Ko e fuʻu ʻakau naʻá ke mamata ki ai naʻe tupu ʻo lahi pea mālohí, ʻa ia ko hono tumutumú naʻe aʻu ki he langí pea naʻe mamata ki ai ʻa e kotoa ʻo e māmaní,+ 21 ʻa ia ko hono laú naʻe fakaʻofoʻofa, pea ko hono fuá naʻe lahi ʻaupito, pea naʻe hoko ko e meʻakai ki he tokotaha kotoa, naʻe nofo ʻi lalo ai ʻa e fanga manu ʻo e vaó pea naʻe nofo ʻi hono ngaahi vaʻá ʻa e fanga manupuna ʻo e langí,+ 22 ko koe ia, ʻe hoʻo ʻAfio, koeʻuhi kuó ke tupu ʻo lahi pea mo mālohi, pea kuo aʻu hake ho ngeiá ki he ngaahi langí,+ pea mo hoʻo pulé ki he ngatangataʻanga ʻo e māmaní.+

23 “‘Pea naʻe mamata ʻa e tuʻí ki ha talafekau,* ko ha tokotaha māʻoniʻoni,+ ʻoku ʻalu hifo mei he langí, ʻa ia naʻá ne pehē: “Tā hifo ʻa e fuʻu ʻakaú pea fakaʻauha ia, kae tuku pē ʻa hono tefitó mo hono ngaahi aká ʻi he kelekelé, ʻo haʻiʻaki ʻa e ukamea mo e kopa, ʻi he lotolotonga ʻo e musie ʻo e vaó. Pea tuku ke viviku ia ʻi he hahau ʻo e langí, pea tuku ke ʻinasi fakataha ia mo e fanga manu ʻo e vaó kae ʻoua ke fakalaka atu ai ha kuonga ʻe fitu.”+ 24 Ko hono ʻuhingá eni, ʻe hoʻo ʻAfio; ko e tuʻutuʻuni ʻa e Fungani Māʻolungá kuo pau ke hoko ia ki hoku ʻeiki ko e tuʻí. 25 ʻE kapusi koe mei he lotolotonga ʻo e tangatá, pea te ke nofo mo e fanga manu ʻo e vaó, pea ʻe ʻoatu kiate koe ʻa e mohuku ke ke kai ʻo hangē ko e fanga pulú; pea te ke viviku ʻi he hahau ʻo e langí,+ pea ʻe fakalaka atu ʻiate koe+ ʻa e kuonga ʻe fitu,+ kae ʻoua ke ke ʻilo ko e Fungani Māʻolungá ʻa e Pule ʻi he puleʻanga ʻo e faʻahinga ʻo e tangatá pea ʻokú ne foaki ia ki ha taha pē ʻokú ne loto ki ai.+

26 “‘Ka koeʻuhí naʻa nau pehē ke tuku pē ʻa e tefito ʻo e fuʻu ʻakaú mo hono ngaahi aká,+ ko ho puleʻangá ʻe toe ʻaʻau pē ia ʻi he hili ʻa hoʻo ʻiloʻi ʻoku pule ʻa e ʻOtuá ʻi he langí. 27 Ko ia ai, ʻe hoʻo ʻAfio, ʻofa ke fakahōifua kiate koe ʻa ʻeku faleʻí. Tafoki mei hoʻo ngaahi angahalá ʻaki hoʻo fai ʻa e meʻa ʻoku totonú, pea mei hoʻo faikoví ʻo fakahāhā ʻa e meesi ki he masivá. Heiʻilo ʻe hokohoko atu ai ʻa hoʻo lakalakaimonuú.’”+

28 Naʻe hoko kotoa ʻa e meʻá ni kia Tuʻi Nepukanesa.

29 ʻI he hili ha māhina ʻe 12 naʻá ne hāʻele holo ʻi ʻolunga ʻi hono palasi fakatuʻi ʻi Pāpiloné. 30 Naʻe pehē ʻe he tuʻí: “ʻIkai ko Pāpilone ko e Lahi eni ʻa ia kuó u langa ko e nofoʻanga fakatuʻí ʻaki ʻa hoku mālohí mo e iví pea ke u lāngilangiʻia lahi ai?”

31 Lolotonga ʻa e kei lea ʻa e tuʻí, naʻe ongo hifo ha leʻo mei he langí: “Ko e tuʻutuʻuni eni kiate koé, ʻe Tuʻi Nepukanesa, ‘Ko e puleʻangá kuo mavahe ia meiate koe,+ 32 pea kuo kapusi koe mei he faʻahinga ʻo e tangatá. Te ke nofo fakataha mo e fanga manu ʻo e vaó, pea ʻe ʻoatu kiate koe ʻa e mohuku ke ke kai ʻo hangē pē ko e fanga pulú, pea ʻe fakalaka ʻiate koe ʻa e kuonga ʻe fitu, kae ʻoua ke ke ʻiloʻi ko e Fungani Māʻolungá ʻa e Pule ʻi he puleʻanga ʻo e faʻahinga ʻo e tangatá pea ʻokú ne foaki ia ki ha taha pē ʻokú ne loto ki ai.’”+

33 ʻI he mōmeniti pē ko iá naʻe fakahoko ai ʻa e leá ni ʻia Nepukanesa. Naʻe kapusi ia mei he faʻahinga ʻo e tangatá, pea kamata ke ne kai ʻa e mohukú ʻo hangē ko e fanga pulú, pea naʻe viviku ʻa hono sinó ʻi he hahau ʻo e langí, pea naʻe loloa ʻa hono ʻulú ʻo hangē ko e fulufulu ʻo e ʻīkalé pea ko hono ngeʻesi-nimá mo hono ngeʻesi-vaʻé naʻe hangē ko e pesipesi ʻo e fanga manupuná.+

34 “ʻI he ʻosi ʻa e taimi ko iá,+ ko au Nepukanesa, naʻá ku hanga hake ki he langí, pea naʻe foki mai ʻa ʻeku fakakaukau leleí; pea naʻá ku fakahīkihikiʻi ʻa e Fungani Māʻolungá, pea naʻá ku fakahīkihikiʻi mo fakalāngilangiʻi ʻa e Tokotaha ʻoku moʻui ʻo taʻengatá, koeʻuhi ko ʻene pulé ko ha pule taʻengata pea ko hono puleʻangá ʻoku mei he toʻutangata ki he toʻutangata.+ 35 Ko e kotoa ʻo e kakai ʻo māmaní ko e meʻa noa pē, pea ʻokú ne ngāue ʻo fakatatau ki hono finangaló ʻi he lotolotonga ʻo e kongakau ʻo e langí mo e kakai ʻo e māmaní. Pea ʻoku ʻikai ha taha ʻe malava ke ne taʻofi ia*+ pe lea kiate ia, ‘Ko e hā ʻa e meʻa kuó ke faí?’+

36 “ʻI he taimi ko iá naʻe foki mai ʻa ʻeku fakakaukau leleí, pea naʻe foki mai mo e lāngilangi ʻo hoku puleʻangá, mo hoku ngeiá, mo hoku nāunauʻiá.+ Ko ʻeku kau ʻōfisa māʻolungá mo ʻeku kau houʻeikí naʻa nau kumi vēkeveke mai kiate au, pea naʻe toe fakafoki au ki hoku puleʻangá, pea naʻe toe tānaki mai kiate au ʻa e lāngilangi lahi ange ia ʻi he taimi ki muʻá.

37 “Pea ko au, Nepukanesa, ʻoku ou fakahīkihikiʻi mo hakeakiʻi mo fakalāngilangiʻi ʻa e Tuʻi ʻo e langí,+ koeʻuhi ko ʻene ngaahi ngāué kotoa ʻoku moʻoni pea ko ʻene ngaahi foungá ʻoku totonu,+ pea koeʻuhi he ʻokú ne malava ke fakamaaʻi ʻa e faʻahinga ʻoku nau ʻaʻeva ʻi he pōlepolé.”+

5 ʻI he fekauʻaki mo Tuʻi Pelisasá,+ naʻá ne fai ha fuʻu kātoanga kai ki ha toko taha afe ʻo ʻene kau houʻeikí, pea naʻá ne inu uaine ʻi honau ʻaó.+ 2 Lolotonga ʻene uaineʻiá, naʻe fai ʻe Pelisasa ha tuʻutuʻuni ke ʻomi ʻa e ngaahi ipu koula mo e ipu siliva naʻe toʻo ʻe heʻene tamai ko Nepukanesá mei he temipale ʻi Selusalemá,+ ke inu ai ʻa e tuʻí mo ʻene kau houʻeikí, mo hono ngaahi uaifí mo ʻene kau sinifú. 3 Naʻa nau ʻomi leva ʻa e ngaahi ipu koula naʻe toʻo mei he temipale ʻi he fale ʻo e ʻOtuá ʻi Selusalemá, pea naʻe inu mei ai ʻa e tuʻí mo ʻene kau houʻeikí, mo hono ngaahi uaifí mo ʻene kau sinifú. 4 Naʻa nau inu uaine, pea nau fakahīkihikiʻi ʻa e ngaahi ʻotua koula mo siliva, kopa, ukamea, ʻakau, pea mo e maká.

5 ʻI he mōmeniti pē ko iá naʻe hā mai ha louhiʻinima ʻo e nima ʻo ha tangata ʻo kamata tohi ʻi he holisi ʻo e palasi ʻo e tuʻí ʻo ofi ki he tuʻunga-māmá, pea naʻe malava ke sio ʻa e tuʻí ki he tuʻa nimá ʻi he lolotonga ʻene tohí. 6 Pea naʻe tea mate ʻa e tuʻí* pea naʻe fakamanavaheeʻi ia ʻe heʻene fakakaukaú, pea naʻe tete+ ʻa hono ongo alangá pea kamata ke fetāʻaki ʻa hono ongo tuí.

7 Naʻe kaila leʻo-lahi atu ʻa e tuʻí ke ui mai ʻa e kau kikité, mo e kau Kalitiá,* pea mo e kau vavalo ki he fetuʻú.*+ Naʻe pehē leva ʻe he tuʻí ki he kau tangata poto ʻo Pāpiloné: “ʻIlonga ha tangata te ne lau mai ʻa e tohinimá ni ʻo tala mai ʻa hono ʻuhingá ʻe fakakofu lanu vāleti ia, pea ʻe ʻai ha kahoa koula ki hono kiá,+ pea te ne hoko ko e pule hono tolu ʻi he puleʻangá.”+

8 Naʻe haʻu kotoa leva ʻa e kau tangata poto ʻa e tuʻí, ka naʻe ʻikai te nau lava ʻo lau ʻa e tohinimá pe fakaʻilo ʻa hono ʻuhingá ki he tuʻí.+ 9 Ko ia naʻe mātuʻaki manavahē ʻa Tuʻi Pelisasa pea tea mate ʻa hono fofongá; pea naʻe moʻutāfuʻua ʻa ʻene kau houʻeikí.+

10 Koeʻuhi ko e ngaahi lea ʻa e tuʻí mo ʻene kau houʻeikí, naʻe hū mai ai ʻa e kuiní ki he holo naʻe fai ai ʻa e kātoanga kaí. Naʻe pehē ange ʻe he kuiní: “ʻE hoʻo ʻAfio, ʻofa ke ke lākoifie ʻo taʻengata. ʻOua ʻe tuku ke fakamanavaheeʻi koe ʻe hoʻo fakakaukaú, pea ʻoua ʻe tuku ke tea mate ho fofongá. 11 ʻOku ʻi ai ha tangata* ʻi ho puleʻangá ʻokú ne maʻu ʻa e laumālie ʻo e ngaahi ʻotua toputapú. ʻI he ngaahi ʻaho ʻo hoʻo tamaí, naʻe maʻu ʻiate ia ʻa e maama mo e vavanga fakaefakakaukau pea mo e poto ʻo hangē ko e poto ʻo e ngaahi ʻotuá.+ Naʻe fakanofo ia ʻe hoʻo tamai ko Tuʻi Nepukanesá ke hoko ko e pule ʻo e kau taulaʻeiki faimaná, mo e kau kikité, mo e kau Kalitiá,* pea mo e kau vavalo ki he fetuʻú;+ naʻe fai eni ʻe hoʻo tamaí, ʻe hoʻo ʻAfio. 12 He ko Taniela, ʻa ia naʻe ui ʻe he tuʻí ko Pelitisasá,+ naʻá ne maʻu ha laumālie makehe atu mo e ʻilo mo e vavanga fakaefakakaukau ke fakaʻuhinga misi, ke ne fakamatalaʻi ʻa e ngaahi tupuʻá, pea ke ne vete ʻa e ngaahi palopalema fihí.*+ Ko ia tuku ke ui mai ʻa Taniela, pea te ne tala atu kiate koe ʻa hono ʻuhingá.”

13 Ko ia naʻe ʻomi ʻa Taniela ki he ʻao ʻo e tuʻí. Naʻe ʻeke ange ʻe he tuʻí kia Taniela: “Ko Taniela koe mei he kau ʻomi fakamālohi mei Siutá,+ ʻa ia naʻe ʻomi ʻe heʻeku tamai ko e tuʻí mei Siutá?+ 14 Kuó u fanongo fekauʻaki mo koe ʻoku ʻiate koe ʻa e laumālie ʻo e ngaahi ʻotuá+ pea kuo maʻu ʻiate koe ʻa e fakamaama mo e vavanga fakaefakakaukau mo e poto makehe atu.+ 15 Ko eni, naʻe ʻomi ki hoku ʻaó ʻa e kau tangata potó mo e kau kikité ke nau lau ʻa e tohinimá ni pea ke fakaʻilo mai kiate au ʻa hono ʻuhingá, ka ʻoku ʻikai te nau malava ke tala mai ʻa e ʻuhinga ʻo e pōpoakí.+ 16 Ka kuó u fanongo ʻo fekauʻaki mo koe ʻokú ke malava ke ʻomai ʻa e ʻuhingá+ pea ke vete ʻa e ngaahi palopalema fihí.* Ko ia kapau ʻokú ke malava ke lau ʻa e tohinimá mo fakaʻilo mai kiate au ʻa hono ʻuhingá, ʻe fakakofu lanu vāleti koe, pea ʻe ʻai ha kahoa koula ki ho kiá, pea te ke hoko ko e pule hono tolu ʻi he puleʻangá.”+

17 Naʻe tali ange leva ʻe Taniela ki he tuʻí: “Maʻu pē muʻa ʻe koe ʻa hoʻo ngaahi meʻaʻofá pea foaki ʻa hoʻo ngaahi meʻaʻofá ki he niʻihi kehé. Kae kehe, te u lau ʻa e tohinimá ki hoʻo ʻAfió pea fakaʻilo ʻa hono ʻuhingá kiate koe. 18 Ko e meʻa kiate koé, ʻe hoʻo ʻAfio, naʻe tuku ʻe he ʻOtua Fungani Māʻolungá kia Nepukanesa ko hoʻo tamaí ʻa e puleʻanga mo e tuʻunga lahi mo e lāngilangi pea mo e ngeia.+ 19 Koeʻuhi ko e tuʻunga lahi naʻá Ne ʻoange kiate iá, ko e ngaahi kakai kotoa pē, ngaahi puleʻanga, mo e ngaahi kakai lea kehekehé naʻa nau tete ʻi he manavahē ʻi hono ʻaó.+ Naʻá ne tāmateʻi pe tuku ke moʻui ha taha pē naʻá ne loto ki ai, pea naʻá ne hakeakiʻi pe fakamaaʻi+ ha taha pē naʻá ne loto ki ai. 20 Ka ʻi he taimi naʻe hīkisia ai ʻa hono lotó pea fakafefeka ʻa hono laumālié, ʻo ne fai ai ha tōʻonga ʻafungí,+ naʻe fakahifo ia mei he taloni ʻo hono puleʻangá, pea naʻe toʻo meiate ia ʻa hono ngeiá. 21 Naʻe kapusi ia mei he faʻahinga ʻo e tangatá, pea naʻe ʻai ʻa hono lotó ke hangē ko e loto ʻo ha manu, pea naʻá ne nofo fakataha mo e fanga ʻasi kaivaó. Naʻe ʻoange kiate ia ʻa e mohuku ke ne kai ʻo hangē ko e fanga pulú, pea naʻe viviku ʻa hono sinó ʻi he hahau ʻo e langí, kae ʻoua kuó ne toki ʻiloʻi ko e ʻOtua Fungani Māʻolungá ʻa e Pule ʻi he puleʻanga ʻo e faʻahinga ʻo e tangatá pea ʻokú ne fakanofo ki ai ha taha pē ʻokú ne loto ki ai.+

22 “Ka ko koe, ʻe Pelisasa ko hono fohá, kuo ʻikai te ke fakatōkilaloʻi ho lotó, neongo naʻá ke ʻilo ʻa e meʻá ni hono kotoa. 23 ʻI hono kehé, naʻá ke hakeakiʻi koe ʻo ke fakafepaki ki he ʻEiki ʻo e langí,+ pea naʻá ke ʻai ke nau ʻomai kiate koe ʻa e ngaahi ipu ʻi hono falé.+ Pea ko koe mo hoʻo kau houʻeikí, mo ho ngaahi uaifí mo hoʻo kau sinifú naʻa mou inu uaine ai mo fakahīkihikiʻi ʻa e ngaahi ʻotua siliva mo koula, kopa, ukamea, ʻakau, pea mo e maká, ʻa e ngaahi ʻotua ʻoku ʻikai lava ke nau sio pe fanongo pe ʻilo ha meʻa ʻe taha.+ Ka kuo ʻikai te ke fakalāngilangiʻi ʻa e ʻOtuá ʻa ia ʻoku ʻi hono nimá ʻa hoʻo mānavá+ mo e kotoa ho ngaahi ʻalungá. 24 Ko ia naʻe fekauʻi mai ʻa e nimá meiate ia, pea naʻe tohi ʻaki ia ʻa e tohinima ko ení. + 25 Pea ko e tohinima eni naʻe tohí: MINE, MINE, TIKELI, mo e PASINI.

26 “Ko e ʻuhinga eni ʻo e ngaahi foʻi leá: MINE, kuo lau ʻe he ʻOtuá ʻa e ngaahi ʻaho ʻo ho puleʻangá pea kuó ne fakangata ia.+

27 “TIKELI, kuo fua koe ʻi he meʻafuá pea ʻilo ʻokú ke taʻefeʻunga.

28 “PESI,* kuo vahevahe ho puleʻangá pea kuo foaki ia ki he kau Mītiá mo e kau Pēsiá.”+

29 Naʻe fai leva ʻe Pelisasa ha tuʻutuʻuni, pea naʻa nau fakakofu lanu vāleti ʻa Taniela pea ʻai ha kahoa koula ki hono kiá; pea naʻa nau fai ha fanongonongo ʻo fekauʻaki mo ia te ne hoko ko e pule hono tolu ʻi he puleʻangá.+

30 ʻI he pō pē ko iá naʻe tāmateʻi+ ai ʻa Pelisasa ko e tuʻi Kalitiá. 31 Pea naʻe maʻu ʻa e puleʻangá ʻe Talaiasi+ ko e Mītiá; naʻá ne taʻu 62 nai.

6 Naʻe hā lelei kia Talaiasi ke fakanofo ha kau situlape* ʻe toko 120 ke nau pule ki he kotoa ʻo e puleʻangá.+ 2 Naʻe pule kiate kinautolu ha kau ʻōfisa māʻolunga ʻe toko tolu, ko e taha ai ko Taniela;+ pea naʻe ʻoatu ʻe he kau situlapé+ ha fakamatala ki he toko tolu ko ení, koeʻuhi ke ʻoua naʻa hoko ha meʻa ki he tuʻí. 3 Pea naʻe mahulu hake ʻa Taniela ʻi he ongo ʻōfisa māʻolunga ko eé pea mo e kau situlapé, he naʻe ʻiate ia ha laumālie makehe atu,+ pea naʻe fakakaukau ʻa e tuʻí ke ʻohake ia ke ne pule ki he puleʻangá fakakātoa.

4 ʻI he taimi ko iá naʻe feinga ʻa e ongo ʻōfisa māʻolungá pea mo e kau situlapé ke maʻu ha ngaahi makatuʻunga ke tukuakiʻi ʻaki ʻa Taniela ʻi he ngaahi meʻa fekauʻaki mo e puleʻangá, ka naʻe ʻikai te nau maʻu ha ngaahi makatuʻunga ke fai ai ha tukuakiʻi pe ko haʻane taʻefaitotonu, he naʻe falalaʻanga ia pea naʻe ʻikai ke ʻilo ʻiate ia ha fakataʻetaʻetokanga pe taʻefaitotonu. 5 Naʻe pehē leva ʻe he kau tangatá ni: “Heʻikai ke tau maʻu ha makatuʻunga ʻe taha ke faiʻaki hano tukuakiʻi ʻo Taniela, tuku kehe ka tau ka maʻu ha meʻa ʻo fekauʻaki mo ia ʻi he lao ʻa hono ʻOtuá.”+

6 Ko ia naʻe fakatahataha ʻa e ongo ʻōfisa māʻolungá mo e kau situlapé pea nau hū atu ki he tuʻí ʻo nau pehē ange kiate ia: “ʻE Tuʻi Talaiasi, ʻofa ke ke lākoifie ʻo taʻengata. 7 Ko e kotoa ʻo e kau ʻōfisa fakatuʻí, kau ʻōfisa pulé, kau situlapé, kau ʻōfisa māʻolunga fakatuʻí, mo e kau kōvaná kuo nau alēlea ke fokotuʻu ha tuʻutuʻuni fakatuʻi pea ke fakahoko ai ha tapui ʻo pehē, ʻi he ʻaho ʻe 30 ka ʻi ai ha taha te ne fai ha hū ki ha ʻotua pe ko ha tangata tuku kehe koe, ʻe hoʻo ʻAfio, ʻe lī ia ki he ʻana ʻo e fanga laioné.+ 8 Ko ia, ʻe hoʻo ʻAfio, fakatauange ke ke fokotuʻu ʻa e tuʻutuʻuní peá ke fakamoʻoni huafa ki ai,+ koeʻuhi ke ʻoua naʻa lava ke toe liliu, ʻo fakatatau ki he lao ʻa e kau Mītiá mo e kau Pēsiá, ʻa ia heʻikai lava ke fakataʻeʻaongaʻi.”+

9 Ko ia naʻe fakamoʻoni huafa ʻa Tuʻi Talaiasi ʻi he tuʻutuʻuní pea mo e tapuí.

10 Ka ʻi hono ʻilo pē ʻe Taniela kuo fai ha fakamoʻoni huafa ki he tuʻutuʻuní, naʻá ne hū ki hono falé, pea ko e fanga kiʻi matapā ʻi hono loki ʻi he funga falé naʻe ava ʻo hanga ki Selusalema.+ Pea naʻe tuʻo tolu ʻi he ʻaho ʻa ʻene tūʻulutui hifo ʻo lotu mo fai ʻene fakafetaʻi ʻi he ʻao ʻo hono ʻOtuá, ʻo hangē ko ia naʻá ne fai tuʻumaʻu ki muʻá. 11 ʻI he taimi ko iá naʻe fehuufi atu ʻa e kau tangatá ni ʻo nau ʻilo ʻa Taniela ʻoku fai ʻene hū mo kōlenga ki ha hōifua ʻi he ʻao ʻo hono ʻOtuá.

12 Ko ia naʻa nau fakaofiofi ki he tuʻí ʻo nau fakamanatu ange kiate ia ʻo fekauʻaki mo e tapui fakatuʻí: “ʻIkai naʻá ke fakamoʻoni huafa ʻi ha tapui ʻo pehē ʻi he ʻaho ʻe 30 ka ʻi ai ha tangata te ne fai ha hū ki ha ʻotua pe ko ha tangata tuku kehe koe, ʻe hoʻo ʻAfio, ʻe lī ia ki he ʻana ʻo e fanga laioné?” Naʻe tali ange ʻe he tuʻí: “Kuo ʻosi fakapapauʻi ʻa e meʻá ni ʻo fakatatau ki he lao ʻa e kau Mītiá mo e kau Pēsiá, ʻa ia heʻikai lava ke fakataʻeʻaongaʻi.”+ 13 Naʻa nau pehē ange leva ki he tuʻí: “Ko Taniela, ʻa ia ʻoku kau ʻi he kau ʻomi fakamālohi mei Siutá,+ kuo ʻikai te ne tokaʻi koe, ʻe hoʻo ʻAfio, pea pehē ki he tapui naʻá ke fakamoʻoni huafa ki aí, ka ʻokú ne lotu ʻo tuʻo tolu ʻi he ʻaho.”+ 14 ʻI he fanongo pē ʻa e tuʻí ki he meʻá ni, naʻá ne loto-mamahi lahi, pea naʻá ne feinga ke fakakaukauʻi ha founga ke hao ai ʻa Taniela; pea naʻá ne fai ʻene feinga taupotu tahá ʻo aʻu ki he tō ʻa e laʻaá ke fakahaofi ia. 15 Faifai atu pē, naʻe hū fakataha mai ʻa e kau tangatá ni ki he tuʻí, ʻo nau pehē ki he tuʻí: “Fakatokangaʻi ange, ʻe hoʻo ʻAfio, ko e lao ʻa e kau Mītiá mo e kau Pēsiá ʻoku pehē ai ʻilonga ha faʻahinga tapui pē pe ko ha tuʻutuʻuni ʻoku fokotuʻu ʻe he tuʻí ʻe ʻikai lava ke toe liliu.”+

16 Ko ia naʻe fai ʻe he tuʻí ha tuʻutuʻuni, pea naʻa nau ʻomai ʻa Taniela ʻo lī ia ki he ʻana ʻo e fanga laioné.+ Naʻe pehē ange ʻe he tuʻí kia Taniela: “Ko ho ʻOtua ʻa ia ʻokú ke hanganaki tauhi ki aí te ne fakahaofi koe.” 17 Naʻe ʻomi leva ha fuʻu maka ʻo tāpuniʻaki ʻa e hūʻanga* ʻo e ʻaná, pea naʻe silaʻi ia ʻe he tuʻí ʻaki hono mama silá pea mo e mama sila ʻa ʻene kau houʻeikí, koeʻuhi ke ʻoua naʻa toe liliu ha meʻa ʻo fekauʻaki mo Taniela.

18 Naʻe ʻalu leva ʻa e tuʻí ki hono palasí. Naʻe ʻosi atu ʻa e pō ko iá mo ʻene ʻaukai pea ʻikai te ne tali ha faʻahinga fakafiefia,* pea naʻe ʻikai lava ke ne mohe.* 19 Pea ʻi he mafoa mai ʻa e atá, naʻe mālanga hake ʻa e tuʻí ʻo ne fakavave atu ki he ʻana ʻo e fanga laioné. 20 ʻI heʻene ofi atu ki he ʻaná, naʻá ne ui leʻoʻi mamahi atu kia Taniela. Naʻe ʻeke atu ʻe he tuʻí kia Taniela: “ʻE Taniela, ko e sevāniti ʻa e ʻOtua moʻuí, kuo malava ʻe ho ʻOtua ʻa ia ʻokú ke hanganaki tauhi ki aí ʻo fakahaofi koe mei he fanga laioné?” 21 Naʻe tali mai leva ʻe Taniela ki he tuʻí: “ʻE hoʻo ʻAfio, ʻofa ke ke lākoifie ʻo taʻengata. 22 Naʻe fekauʻi mai ʻe hoku ʻOtuá ʻa ʻene ʻāngeló ʻo ne tāpuni ʻa e ngutu ʻo e fanga laioné,+ pea kuo ʻikai te nau fai ha meʻa kiate au,+ he naʻá ku tonuhia ʻi hono ʻaó; pea kuo ʻikai ke u fai ha hala ʻe taha kiate koe, ʻe hoʻo ʻAfio.”

23 Naʻe fiefia ʻaupito ʻa e tuʻí, peá ne fekau ke ʻohake ʻa Taniela mei he ʻaná. ʻI hono ʻohake ʻo Taniela mei he ʻaná, naʻe ʻikai ʻaupito ke hoko ha meʻa ʻe taha kiate ia, koeʻuhi naʻá ne falala ki hono ʻOtuá.+

24 Naʻe ʻoatu leva ʻe he tuʻí ha tuʻutuʻuni, pea naʻe ʻomai ʻa e kau tangata ko ia naʻa nau tukuakiʻi* ʻa Tanielá, pea naʻe lī kinautolu ki he ʻana ʻo e fanga laioné, fakataha mo honau ngaahi fohá mo honau ngaahi uaifí. ʻI he teʻeki ai ke nau aʻu ki he takele ʻo e ʻaná kuo ʻohofi kinautolu ʻe he fanga laioné ʻo laiki honau ngaahi huí kotoa.+

25 Naʻe faitohi leva ʻa Tuʻi Talaiasi ki he ngaahi kakai kotoa pē, ngaahi puleʻanga, mo e ngaahi kakai lea kehekehe naʻe nofo ʻi he kotoa ʻo e māmaní:+ “Fakatauange ke mou maʻu ha melino lahi fau! 26 ʻOku ou ʻoatu ha tuʻutuʻuni ki he feituʻu kotoa pē ʻo hoku puleʻangá, ki he kakaí ke nau tetetete ʻi he manavahē ʻi he ʻao ʻo e ʻOtua ʻo Tanielá.+ He ko e ʻOtua moʻui ia pea ʻokú ne tolonga ʻo taʻengata. Ko hono puleʻangá ʻe ʻikai ʻaupito ke ʻauha, pea ko ʻene pulé* ʻoku taʻengata.+ 27 ʻOkú ne faifakahaofi,+ mo faifakamoʻui, mo fakahoko ʻa e ngaahi fakaʻilonga mo e ngaahi meʻa fakaofo ʻi he langí pea ʻi he māmaní,+ he naʻá ne fakahaofi ʻa Taniela mei he pesipesi ʻo e fanga laioné.”

28 Ko ia naʻe lakalakaimonū ʻa Taniela ʻi he puleʻanga ʻo Talaiasí+ pea ʻi he puleʻanga ʻo Kōlesi ko e Pēsiá.+

7 ʻI he ʻuluaki taʻu ʻo e pule ʻa Tuʻi Pelisasa+ ʻo Pāpiloné, naʻe mamata ai ʻa Taniela ki ha misi mo ha ngaahi vīsone ʻi heʻene tokoto ʻi hono mohengá.+ Naʻá ne hiki leva ʻa e misí;+ naʻá ne hiki kakato ʻa e fakamatala ʻo fekauʻaki mo e ngaahi meʻá ni. 2 Naʻe fakahaaʻi ʻe Taniela:

“Naʻá ku mamata ʻi heʻeku ngaahi vīsone ʻi he poʻulí, pea vakai, ko e matangi ʻe fā ʻo e langí naʻe angi mālohi mai ki he tahi lahí.+ 3 Pea naʻe ʻalu hake mei he tahí ʻa e ngaahi fuʻu manu ʻe fā,+ naʻe kehekehe ʻa e manu taki taha.

4 “Ko e ʻuluaki manú naʻe hangē ha laioné,+ pea naʻá ne maʻu ʻa e ongo kapakau ʻo ha ʻīkale.+ Naʻá ku mamata pē kae ʻoua kuo fusi ʻa hono ongo kapakaú, pea naʻe hiki hake ia mei he kelekelé ʻo ʻai ia ke ne tuʻu ʻaki hono ongo vaʻé ʻo hangē ha tangatá, pea naʻe ʻoange kiate ia ʻa e loto ʻo ha tangata.

5 “Pea vakai, ko ha toe manu ʻe taha, ko hono uá ia, naʻe hangē ha peá.+ Naʻá ne hiki hake ʻa hono vaʻe ʻe taha, pea naʻá ne ʻūtaki ha hui palalulu ʻe tolu; pea naʻe tala kiate ia, ‘Tuʻu hake, ʻo kai kakano lahi.’+

6 “ʻI he hili ʻa e meʻá ni naʻá ku moʻusioa pē, pea vakai, ko ha manu ʻe taha, naʻe hangē ha lēpatí,+ ka naʻe ʻi hono tuʻá ʻa e kapakau ʻe fā hangē ko e kapakau ʻo ha manupuná. Pea ko e manú naʻe ʻulu fā,+ pea naʻe ʻoange kiate ia ʻa e mafai ke ne pule.

7 “ʻI he hili ʻa e meʻá ni naʻá ku moʻusioa pē ʻi heʻeku vīsone poʻulí, pea naʻá ku mamata ki ha manu ko hono faá ia, naʻe fakailifia mo fakamanavahē mo mālohi anga-kehe atu, pea naʻe ʻi ai hono ngaahi foʻi nifo ukamea lalahi. Naʻá ne fai ʻa e keina mo e fakaʻauha, pea ko e meʻa naʻe toé naʻá ne tāmalaki ʻaki ia ʻa hono vaʻé.+ Naʻe kehe ia mei he fanga manu kotoa ko ē ki muʻá, pea naʻe ʻi ai hono meʻatui ʻe hongofulu. 8 Lolotonga ʻeku kei fakakaukau ki he ngaahi meʻatuí, vakai, naʻe ʻasi hake ha meʻatui ʻe taha, ko ha meʻatui siʻisiʻi,+ ʻi honau lotolotongá, pea ko ha meʻatui ʻe tolu ʻi he ʻuluaki ngaahi meʻatuí naʻe taʻaki ia mei hono ʻaó. Pea vakai, naʻe ʻi ai ha ongo foʻi mata hangē ko e mata ʻo e tangatá ʻi he meʻatui ko ení, pea naʻe ʻi ai ha ngutu naʻe lea pōlepole.*+

9 “Naʻá ku moʻusioa pē kae ʻoua kuo fokotuʻu ʻa e ngaahi taloni pea naʻe ʻafio+ ai ʻa Talumeimuʻa.+ Ko hono teungá naʻe hinehina ʻo hangē ko e sinoú,+ pea ko hono fulufuluʻiʻulú naʻe hangē ha fulufuluʻisipi maʻá. Ko hono taloní ko e uloʻi afi; ko hono ngaahi veʻeteká ko ha afi ulo kakaha.+ 10 Naʻe tafe mai ha afi mei ai ʻo ʻalu atu mei hono ʻaó.+ Naʻe hanganaki tauhi kiate ia ha toko taha afe liunga afe, pea naʻe tuʻu ʻi hono ʻaó ʻa e toko taha mano liunga mano.+ Naʻe kamata ʻa e ngāue ʻa e Fakamaauʻangá,+ pea naʻe fakaava ʻa e ngaahi tohi.

11 “Naʻá ku moʻusioa pē ʻi he taimi ko iá koeʻuhí ko e ongo mai ʻa e ngaahi lea pōlepole* naʻe fai ʻe he meʻatuí;+ naʻá ku sio pē kae ʻoua kuo tāmateʻi ʻa e fuʻu manú pea fakaʻauha ʻa hono sinó pea naʻe tuku atu ia ke tutu ʻi he afi. 12 Ka ko e toenga ʻo e fanga manú,+ naʻe toʻo ʻa ʻenau pulé, pea naʻe fakalōloa atu ʻa ʻenau moʻuí ʻi ha vahaʻa taimi.

13 “Naʻá ku moʻusioa pē ʻi heʻeku vīsone poʻulí, pea vakai, naʻe haʻu ha taha hangē ha foha ʻo e tangatá+ ʻi he ngaahi ʻao ʻo e langí; pea naʻe fakaʻatā ia ke ne ʻalu atu kia Talumeimuʻa,+ pea naʻa nau ʻomi ia ke ofi ki he ʻao ʻo e Tokotaha ko iá. 14 Pea naʻe ʻoange kiate ia ʻa e tuʻunga-pule,+ mo e lāngilangi,+ mo ha puleʻanga, koeʻuhí ke tauhi kotoa kiate ia ʻa e ngaahi kakai, ngaahi puleʻanga mo e ngaahi kakai lea kehekehe.+ Ko hono tuʻunga-pulé ko ha tuʻunga-pule taʻengata ʻa ia ʻe ʻikai ke mole atu, pea ko hono puleʻangá ʻe ʻikai ke fakaʻauha.+

15 “Ka ko au, Taniela, naʻe hohaʻatuʻu ʻa hoku laumālié ʻi loto ʻiate au koeʻuhí ko e ngaahi vīsone naʻá ku mamata ki aí naʻá ne ʻai au ke u ilifia.+ 16 Naʻá ku fakaofiofi atu ki ha taha ʻi he faʻahinga naʻe tuʻu aí ke ʻeke kiate ia ʻa e ʻuhinga moʻoni ʻo e meʻá ni. Ko ia naʻá ne tali mai ʻo ne fakaʻilo kiate au ʻa e ʻuhinga ʻo e ngaahi meʻá ni.

17 “‘Ko e ngaahi fuʻu manu ko ení, ʻa ia naʻe toko faá,+ ko e ngaahi tuʻi ia ʻe fā ʻa ia te nau ʻalu hake mei he māmaní.+ 18 Ka ko e kakai tapu ʻa e Tokotaha Aoniú+ ʻe foaki kiate kinautolu ʻa e puleʻangá,+ pea te nau maʻu ʻa e puleʻangá ʻo taʻengata,+ ʻio, ʻo taʻengata pea taʻengata.’

19 “Pea naʻá ku loto ke u ʻilo lahi ange ʻo fekauʻaki mo e manu hono faá, ʻa ia naʻe kehe mei he fanga manu kotoa ko eé; naʻe fakailifia anga-kehe atu, naʻe nifo ukamea mo pesipesi kopa, pea naʻá ne fai ʻa e keina mo e fakaʻauha, ʻo ne tāmalaki ʻa e meʻa naʻe toé ʻaki hono vaʻé;+ 20 pea ʻi he fekauʻaki mo e meʻatui ʻe hongofulu+ ʻi hono ʻulú, pea mo e meʻatui ʻe taha naʻe ʻalu hake pea tō ai ʻi hono ʻaó ʻa e meʻatui ʻe tolú,+ ʻa e meʻatui naʻe ʻi ai hono ongo foʻi mata mo ha ngutu naʻe lea pōlepolé* pea ko ʻene hā maí naʻe lahi ange ia ʻi he fanga manu kehé.

21 “Naʻá ku moʻusioa pē ʻi he faitau ʻa e meʻatui ko iá mo e kakai tapú, pea naʻá ne ikunaʻi kinautolu,+ 22 kae ʻoua ke haʻu ʻa Talumeimuʻa+ pea naʻe fai ha fakamaau ʻo lelei ia ki he kakai tapu ʻa e Tokotaha Aoniú,+ pea naʻe hoko mai ʻa e taimi kuo kotofa ke maʻu ai ʻe he kakai tapú ʻa e puleʻangá.+

23 “Ko e meʻa eni naʻe leaʻaki ʻe he tokotaha naʻá ne fakaʻilo mai kiate au ʻa e ʻuhingá: ‘Ko e meʻa ki he manu hono faá, ʻe ʻi ai ha puleʻanga hono fā ʻi he māmaní. ʻE kehe ia mei he kotoa ʻo e ngaahi puleʻanga ko eé, pea te ne keina ʻa e māmaní kotoa peá ne tāmalaki mo laiki ia.+ 24 Ko e meʻa ki he meʻatui ʻe hongofulú, ʻe ʻalu hake ha tuʻi ʻe hongofulu mei he puleʻanga ko iá; pea ʻe toe ʻi ai mo e tuʻi ʻe taha ʻe tupu hake ʻi he hili kinautolú, pea ʻe kehe ia mei he ʻuluaki ngaahi tuʻí, pea te ne fakavaivaiʻi ʻa e ngaahi tuʻi ʻe tolu.+ 25 Te ne leaʻaki ʻa e ngaahi lea fakafepaki ki he Fungani Māʻolungá,+ pea te ne toutou fakamamahiʻi ʻa e kakai tapu ʻa e Tokotaha Aoniú. Te ne fakakaukau ke liliu ʻa e ngaahi taʻú mo e laó, pea ʻe tuku kinautolu ki hono nimá, ʻi ha kuonga, mo e kuonga ʻe ua, mo e vaeuaʻi kuonga.*+ 26 Ka naʻe kamata ʻa e ngāue ʻa e Fakamaauʻangá, pea naʻa nau toʻo meiate ia ʻa ʻene pulé, koeʻuhí ke fakaʻauha ʻosi pea mo fakaʻauhamālie ia.+

27 “‘Pea ko e puleʻangá mo e tuʻunga-pulé mo e ngeia ʻo e ngaahi puleʻanga ʻi he lalo langí kotoa naʻe foaki ia ki he faʻahinga ʻa ia ko e kakai tapu ʻa e Tokotaha Aoniú.+ Ko honau puleʻangá ko ha puleʻanga taʻengata,+ pea ko e tuʻunga-pule kotoa pē te nau ngāue mo talangofua kiate kinautolu.’

28 “Ko e ngataʻanga eni ʻo e meʻá ni. Ka ko e meʻa kiate aú, ʻa au Taniela, naʻe fakahohaʻasi lahi au ʻe heʻeku ngaahi fakakaukaú, ko ia naʻá ku hoko ai ʻo tea mate;* ka naʻá ku tukulotoʻi pē ʻa e meʻá ni.”

8 ʻI he taʻu hono tolu ʻo e pule ʻa Tuʻi Pelisasá,+ ko au, Taniela, naʻá ku mamata ki ha vīsone ʻa ia naʻe kehe ia mei he vīsone naʻá ku mamata ai ki muʻá.+ 2 Naʻá ku mamata ʻi he vīsoné, pea ʻi heʻeku sio ki aí naʻá ku ʻi Sūsani*+ ko e feituʻu fakakolotau,* ʻa ia ʻoku ʻi he vahefonua* ʻo ʻĪlamí;+ naʻá ku vakai ki he vīsoné, pea tā naʻá ku ʻi he veʻe tafengavai ʻo ʻŪlaí. 3 ʻI he hanga hake ʻa hoku matá, vakai, naʻe ʻi ai ha sipi tangata+ naʻe tuʻu ʻi muʻa ʻi he tafengavaí, pea naʻe ʻi ai hono meʻatui ʻe ua.+ Ko e ongo meʻatuí naʻe lōloa, ka naʻe lōloa ange ʻa e taha ʻi he taha, pea ko e taha naʻe lōloa angé naʻe toki tupu hake ia ki mui.+ 4 Naʻá ku sio ki he sipi tangatá ʻokú ne ʻoho atu ki he hihifó pea ki he tokelaú pea ki he tongá, pea naʻe ʻikai ha manu fekai naʻe lava ʻo tuʻu ʻi hono ʻaó, pea naʻe ʻikai ha taha ʻe lava ke ne fakahaofi ha taha pē mei hono mālohí.*+ Naʻá ne fai ha meʻa pē naʻá ne loto ki ai peá ne hakeakiʻi pē ʻe ia ia.

5 ʻI heʻeku moʻusioá, vakai, naʻe haʻu ha kosi tangata+ mei he hihifó* ʻo kolosi mai ʻi he funga ʻo e māmaní kotoa ʻo ʻikai te ne pā ki he kelekelé. Pea ko e kosí naʻe tekeutua mai ha meʻatui ʻi he vahaʻa ʻo hono ongo matá.+ 6 Naʻe haʻu ia ki he sipi tangata naʻe meʻatui ʻe uá, ʻa ia naʻá ku sio ʻokú ne tuʻu ʻi muʻa ʻi he tafengavaí; naʻá ne lele mai ki ai ʻokú ne ʻita teketekelili.

7 Naʻá ku mamata ki ai ʻokú ne fakaofiofi atu ki he sipi tangatá, pea naʻá ne ʻita lahi kiate ia. Naʻá ne ʻohofi ʻa e sipi tangatá ʻo ne motuhi ʻa hono ongo meʻatuí, pea naʻe ʻikai ha mālohi ʻo e sipi tangatá ke ne tuʻu atu ki ai. Naʻá ne haʻaki ʻa e sipi tangatá ki he kelekelé pea tāmalaki ia, pea naʻe ʻikai ha taha ke ne fakahaofi ia mei hono mālohí.*

8 Pea naʻe hakeakiʻi lahi ʻe he kosi tangatá ʻa ia tonu, ka ʻi heʻene hoko pē ʻo mālohí, naʻe motu ʻa hono meʻatui lahí; pea naʻe tupu hake leva ai ha meʻatui naʻe tekeutua ʻe fā ʻo fetongi ʻa e meʻatui ʻe tahá, ʻo hanga ki he matangi ʻe fā ʻo e langí.+

9 Naʻe tupu hake ha meʻatui ʻe taha mei he taha ʻo kinautolu, ko ha meʻatui siʻisiʻi, pea naʻe tupu ia ʻo lahi ʻaupito ʻo hanga ki he tongá pea ki he hahaké* pea ki he Fonua Fakaʻofoʻofá.+ 10 Naʻe tupu ia ʻo lahi ʻaupito ʻo aʻu hake ki he kongakau ʻo e langí, pea naʻá ne ʻai ʻa e niʻihi ʻo e kongakaú mo e niʻihi ʻo e ngaahi fetuʻú ke nau tō hifo ki he māmaní, pea naʻá ne tāmalaki ia. 11 Naʻá ne hakeakiʻi ia ʻo fakafepaki ki he Pilinisi ʻo e kongakaú, pea naʻe toʻo mei he Pilinisí ʻa e ngaahi feilaulau tuʻumaʻú, pea naʻe haveki ʻa e potu naʻe fokotuʻu maʻu ai ʻa hono feituʻu toputapú.+ 12 Pea naʻe ʻoange ki he meʻatuí ha kongakau, fakataha mo e feilaulau tuʻumaʻú, koeʻuhi ko ʻene laka halá; pea naʻá ne hanganaki lī hifo ʻa e moʻoni ki he māmaní, pea naʻe ngāue ia peá ne lavameʻa.

13 Pea naʻá ku fanongo ki ha tokotaha māʻoniʻoni ʻoku lea, pea naʻe lea ha tokotaha māʻoniʻoni ʻe taha ki he tokotaha ʻoku leá: “Ko e hā hono fuoloa ʻo e hokohoko atu+ ʻa e vīsone ki he feilaulau tuʻumaʻú pea mo e laka hala ʻokú ne fakatupunga ʻa e fakaʻauhá, ʻa hono ʻai fakatouʻosi ke tāmalaki ʻa e potu toputapú mo e kongakaú?” 14 Ko ia naʻá ne pehē mai kiate au: “Kae ʻoua kuo fakalaka atu ai ʻa e efiafi mo e pongipongi ʻe 2,300; pea kuo pau ke toe fakafoki ʻa e potu toputapú ki hono tuʻunga totonú.”

15 Lolotonga ʻa ʻeku mamata ʻa au, Taniela, ʻi he vīsoné pea feinga ke mahinoʻi iá, fakafokifā pē naʻá ku sio ʻoku tuʻu ʻi muʻa ʻiate au ha tokotaha naʻe hā mai ko ha tangata. 16 Naʻá ku fanongo leva ki he leʻo ʻo ha tangata ʻi he lotolotonga ʻo ʻŪlaí,+ pea naʻá ne kaila: “ʻE Kepaleli,+ ʻai ke mahino ki he tokotahá ʻa e meʻa naʻá ne sio ki aí.”+ 17 Ko ia naʻá ne haʻu ʻo ofi mai ki he feituʻu naʻá ku tuʻu aí, ka ʻi heʻene aʻu maí naʻá ku fuʻu manavahē peá u tō foʻohifo. Naʻá ne pehē mai kiate au: “ʻE foha ʻo e tangata, ke ke mahinoʻi, ko e vīsoné ʻoku fekauʻaki ia mo e taimi ʻo e ngataʻangá.”+ 18 Ka ʻi he lolotonga ʻene lea mai kiate aú, naʻá ku mohe maʻu ʻo hanga ki he kelekelé. Ko ia naʻá ne ala mai kiate au ʻo ne fokotuʻu hake au ʻi he feituʻu naʻá ku tuʻu aí.+ 19 Naʻá ne pehē mai leva: “Ko eni ʻoku ou ʻai koe ke ke ʻilo ʻa e meʻa ʻe hoko ʻi he ngaahi ʻaho fakaʻosi ʻo e houhau ʻa e ʻOtuá, koeʻuhí he ʻoku fekauʻaki ʻa e vīsoné mo e taimi kuo kotofa ki he ngataʻangá.+

20 “Ko e sipi tangata meʻatui ʻe ua naʻá ke mamata ki aí ʻokú ne fakafofongaʻi ʻa e ongo tuʻi ʻo Mītia mo Pēsiá.+ 21 Ko e kosi tangata fulufuluá ʻokú ne fakafofongaʻi ʻa e tuʻi ʻo Kalisí;+ pea ko e meʻatui lahi naʻe ʻi he vahaʻa ʻo hono ongo matá ʻokú ne fakafofongaʻi ʻa e ʻuluaki tuʻí.+ 22 Ko e meʻa ki he meʻatui naʻe motú, ko ia naʻe tupu hake ʻa e fā ʻo fetongi ia,+ ʻoku ʻi ai ha puleʻanga ʻe fā mei hono kakaí ʻe tuʻu hake, ka heʻikai te nau maʻu ʻa hono mālohí.

23 “Pea ʻi he ngaahi ʻaho fakaʻosi ʻo honau puleʻangá, ʻi he kakato ʻa e meʻa ʻoku fai ʻe he kau laka halá,* ʻe tuʻu hake ai ha tuʻi mataʻi-fītaʻa ʻokú ne mahinoʻi ʻa e ngaahi lea ʻoku ʻikai mahinó.* 24 ʻE hoko ʻo lahi ʻa hono mālohí, kae ʻikai ʻi hono mālohi pē ʻoʻona. Te ne ʻomi ha fakaʻauha ʻi ha founga anga-kehe,* pea te ne lavameʻa pea ngāue ʻo ola lelei. Te ne fakaʻauha ʻa e kau toʻá, pehē foki ki he kakai māʻoniʻoní.+ 25 Pea ʻi heʻene olopotó te ne ngāueʻaki ʻa e kākaá ke lavameʻa; pea te ne hakeakiʻi ia ʻi hono lotó; pea ʻi he lolotonga ʻo ha taimi malu* te ne fakaʻauha ai ʻa e tokolahi. ʻE aʻu ʻo ne tuʻu hake ʻo fakafepaki ki he Pilinisi ʻo e ngaahi pilinisí, ka ʻe motuhi ia ʻo ʻikai ʻaki ha nima ʻo ha tangata.

26 “Ko e meʻa naʻe leaʻaki ʻi he vīsoné ʻo fekauʻaki mo e ngaahi efiafí mo e ngaahi pongipongí ʻoku moʻoni, ka kuo pau ke ke tauhi ʻa e vīsoné ke fakapulipuli, he ʻoku ʻuhinga ia ki ha taimi ko e ngaahi ʻaho lahi mei he taimí ni.”*+

27 Ka ko au, Taniela, naʻá ku ongoʻi ongosia pea naʻá ku puke ʻi ha ngaahi ʻaho.+ Pea naʻá ku tuʻu hake ʻo fakahoko ʻa e ngāue ʻa e tuʻí;+ ka naʻá ku moʻutāfuʻua ʻi he meʻa naʻá ku mamata ki aí, pea naʻe ʻikai ha taha naʻe lava ke ne mahinoʻi ʻa e vīsoné.+

9 ʻI he ʻuluaki taʻu ʻo Talaiasi+ ko e foha ʻo ʻEhasiveló—ko ha hako ʻo e kau Mītiá ʻa ia naʻe fakanofo ko e tuʻi ki he puleʻanga ʻo e kau Kalitiá+— 2 ʻi he ʻuluaki taʻu ʻo ʻene pulé, ko au, Taniela, naʻá ku ʻilo ʻi he ngaahi tohí* ʻa e lahi ʻo e ngaahi taʻu naʻe fakahaaʻi ʻi he folofola ʻa Sihova kia Selemaia ko e palōfitá ke fakahoko ai ʻa e fakalala ʻo Selusalemá,+ ʻa ia, ko e taʻu ʻe 70.+ 3 Ko ia naʻe hanga ʻa hoku matá kia Sihova ko e ʻOtua moʻoní, ʻo kōlenga kiate ia ʻi he lotu, fakataha mo e ʻaukai+ mo e ʻai tauangaʻa pea mo e fakaefuefu. 4 Naʻá ku lotu kia Sihova ko hoku ʻOtuá mo vetehia ʻo pehē:

“ʻE Sihova ko e ʻOtua moʻoní, ʻa e Tokotaha lahi mo fakamanavaheé, ʻa ia ʻokú ne fai ki heʻene fuakavá mo fakahaaʻi ʻa e ʻofa mateaki+ ki he faʻahinga ʻoku ʻofa kiate iá mo tauhi ʻene ngaahi fekaú,+ 5 kuo mau angahala mo faihala pea tōʻonga fulikivanu mo angatuʻu;+ pea kuo mau afe mei hoʻo ngaahi fekaú pea mo hoʻo ngaahi tuʻutuʻuni fakaefakamāú. 6 Kuo ʻikai te mau fanongo ki hoʻo kau sevāniti ko e kau palōfitá,+ ʻa ia naʻa nau lea ʻi ho huafá ki homau ngaahi tuʻí, mo ʻemau kau houʻeikí, mo ʻemau fanga kuí, pea mo e kotoa ʻo e kakai ʻo e fonuá. 7 ʻE Sihova, ʻoku ʻaʻau ʻa e māʻoniʻoní, ka ʻoku ʻamautolu ʻa e mā* ʻo hangē ko ia ʻi he ʻaho ní, ʻa e kau tangata ʻo Siutá, ʻa e kau nofo ʻi Selusalemá, pea mo e kotoa ʻo ʻIsilelí, ʻa e faʻahinga ʻoku ofi maí mo kinautolu ʻoku mamaʻó, ʻi he kotoa ʻo e ngaahi fonua ʻa ia naʻá ke fakamovetevete kinautolu ki ai koeʻuhi ko ʻenau tōʻonga taʻefaitōnunga kiate koé.+

8 “ʻE Sihova, ʻoku ʻamautolu ʻa e maá,* ʻa homau ngaahi tuʻí, ʻa ʻemau kau houʻeikí, mo ʻemau fanga kuí, koeʻuhí kuo mau faiangahala kiate koe. 9 ʻE Sihova ko homau ʻOtua, ʻokú ke faʻa fakamolemole mo faimeesi,+ ka kuo mau angatuʻu kiate koe.+ 10 Kuo ʻikai te mau talangofua ki he leʻo ʻo Sihova ko homau ʻOtuá ʻo muimui ki heʻene ngaahi lao naʻá ne fokotuʻu ʻi homau ʻaó fakafou ʻi heʻene kau sevāniti ko e kau palōfitá.+ 11 Ko e kotoa ʻo ʻIsilelí kuo nau laka kehe mei hoʻo Laó pea tafoki mei ai ʻaki ʻa e ʻikai te nau talangofua ki ho leʻó, ko ia naʻá ke huaʻi mai ai kiate kimautolu ʻa e mala naʻe fai ʻa e fuakava ki ai pea naʻe tohi ʻo fekauʻaki mo ia ʻi he Lao ʻa Mōsese ko e sevāniti ʻa e ʻOtua moʻoní,+ he kuo mau faiangahala kiate koe. 12 Kuó ke fakahoko hoʻo folofola naʻá ke folofolaʻaki ʻe hoko kiate kimautolu+ pea ki homau kau pule naʻa nau pule kiate kimautolú,* ʻaki hono ʻomai ha fuʻu fakatamaki kiate kimautolu; kuo ʻikai ʻaupito ke faifai ange pea fai ha meʻa pehē ʻi he lalo langí kotoa ʻo hangē ko e meʻa ko ia naʻe fai ʻi Selusalemá.+ 13 Hangē ko ia kuo tohi ʻi he Lao ʻa Mōsesé, kuo hoko kotoa mai ʻa e fakatamakí ni kiate kimautolu,+ ka kuo ʻikai te mau kole ki haʻo hōifua ʻe* Sihova ko homau ʻOtuá ʻaki ʻa e tafoki mei heʻemau faihalá+ pea fakahaaʻi ʻa e vavanga fakaefakakaukau ki hoʻo moʻoní.*

14 “Ko ia naʻá ke hanganaki siofi ʻe Sihova peá ke ʻomi ʻa e fakatamaki kiate kimautolu, he ko koe ʻe Sihova ko homau ʻOtuá ʻokú ke māʻoniʻoni ʻi he kotoa ʻo e ngaahi ngāue kuó ke faí; ka kuo ʻikai te mau talangofua ki ho leʻó.+

15 “Ko eni, ʻe Sihova ko homau ʻOtua, ʻa koe ko e Tokotaha naʻá ke ʻomi ho kakaí mei he fonua ko ʻIsipité ʻaki ha nima mālohi+ pea naʻá ke ʻai ai ke ongoongoa ho huafá ʻo aʻu mai ki he ʻahó ni,+ kuo mau faiangahala pea fai ʻa e tōʻonga fulikivanu. 16 ʻE Sihova, fakatatau ki he kotoa ʻo hoʻo ngaahi tōʻonga māʻoniʻoní,+ ʻofa ke mavahe muʻa ʻa hoʻo ʻitá mo hoʻo houhaú mei ho kolo ko Selusalemá, ʻa ho moʻunga tapú; he koeʻuhi ko ʻemau ngaahi angahalá mo e ngaahi faihala ʻa ʻemau fanga kuí, kuo hoko ai ʻa Selusalema mo ho kakaí ko ha lumaʻanga ki he faʻahinga kotoa ʻoku takatakai ʻiate kimautolú.+ 17 Pea ko eni fanongo mai muʻa, ʻe homau ʻOtua, ki he lotu ʻa hoʻo sevānití pea ki heʻene ngaahi kōlengá, pea ʻai muʻa ke ulo mai ho fofongá ki ho feituʻu toputapu+ kuo lalá,+ koeʻuhí pē ko ho huafá, ʻe Sihova. 18 Fokotuʻu telinga mai muʻa, ʻe hoku ʻOtua, ʻo fanongo mai! Hanga mai muʻa ho fofongá ʻo vakai ki homau tuʻunga maomaonganoá pea mo e kolo kuo uiʻaki ho huafá; he ʻoku ʻikai ko ʻemau kōlenga atu kiate koé koeʻuhí ko haʻamau ngaahi tōʻonga māʻoniʻoni ka koeʻuhí ko e lahi ʻo hoʻo mēsí.+ 19 ʻE Sihova, fanongo mai muʻa. ʻE Sihova, fakamolemoleʻi muʻa kimautolu.+ ʻE Sihova, tokanga mai muʻa mo fai mai ha meʻa! ʻOua muʻa naʻá ke tautoloi, ʻe hoku ʻOtua, koeʻuhí pē ko ho huafá, he ko ho huafá kuo uiʻaki ho koló pea mo ho kakaí.”+

20 ʻI he lolotonga ʻeku kei lea mo lotu mo vete ʻa ʻeku angahalá pea mo e angahala ʻa hoku kakai ko ʻIsilelí pea fai ha kole ki ha hōifua ʻi he ʻao ʻo Sihova ko hoku ʻOtuá ʻo fekauʻaki mo e moʻunga tapu ʻa hoku ʻOtuá,+ 21 ʻio, lolotonga ʻeku kei lea ʻi heʻeku lotú, naʻe haʻu kiate au ʻa e tangata ko Kepalelí,+ ʻa ia naʻá ku mamata ki ai ki muʻa ʻi he vīsoné,+ ʻi heʻeku mātuʻaki ongosia ʻi he taimi nai ʻo e feilaulau meʻaʻofa efiafí. 22 Pea naʻá ne ʻomai kiate au ha mahino, ʻo ne pehē:

“ʻE Taniela, ko eni kuó u haʻu ke ʻoatu kiate koe ʻa e vavanga fakaefakakaukau mo e mahino. 23 ʻI he taimi naʻe kamata ai ʻa hoʻo kōlengá, naʻá ku maʻu ai ha pōpoaki, pea kuó u haʻu ke fakahaaʻi atu ia kiate koe, koeʻuhí ko ha tokotaha mahuʻinga ʻaupito+ koe.* Ko ia fakakaukau ki he meʻá ni peá ke mahinoʻi ʻa e vīsoné.

24 “ʻOku ʻi ai ʻa e uike* ʻe 70 kuo fakapapauʻi ki ho kakaí pea mo ho kolo tapú,+ koeʻuhi ke fakangata ʻa e laka halá, ke fakaʻosi ʻa e angahalá,+ ke fai ha feilaulau ʻufiʻufi angahala maʻá e faihalá,+ ke ʻomi ʻa e māʻoniʻoni taʻengatá,+ ke silaʻi ʻa e vīsoné mo e kikité,*+ pea ke pani ʻa e Feituʻu Toputapu Tahá.* 25 ʻOku totonu ke ke ʻiloʻi mo mahinoʻi mei hono ʻoatu ʻa e tuʻutuʻuni ke toe fokotuʻu pea ke toe langa ʻa Selusalemá+ ʻo aʻu ki he Mīsaia*+ ko e Takimuʻá,+ ʻe uike ʻe 7, mo ha toe uike ʻe 62.+ ʻE toe fokotuʻu mo toe langa ai ia, fakataha mo hano malaʻe fakakolo* pea mo e tafengavai takatakai, ka ʻi he ngaahi taimi faingataʻa.

26 “Pea ʻi he hili ʻa e uike ʻe 62, ʻe tuʻusi*+ ʻa e Mīsaiá, ʻo ne halaʻatā ʻi ha meʻa.+

“Pea ko e kakai ʻa ha taki ʻoku haʻu te nau fakaʻauha ʻa e koló mo e potu toputapú.+ Pea ʻe fakangata ia ʻaki ʻa e lōmaki. Pea ʻe ʻi ai ha tau ʻo aʻu ki he ngataʻangá; ko e meʻa kuo ʻosi fakapapauʻi ki aí ko e fakalala.+

27 “Pea te ne tauhi maʻu ʻa e fuakava ki he tokolahí ʻi ha uike ʻe taha; pea ʻi he vaeua ʻo e uiké, te ne ʻai ai ke ngata ʻa e feilaulau monumanú mo e feilaulau meʻaʻofá.+

“Pea ko e tokotaha ʻokú ne fai ʻa e fakalalá te ne heka mai ʻi he kapakau ʻo e ngaahi meʻa fakalieliá;+ pea aʻu ki ha fakaʻauhamālie, ko e meʻa naʻe fakapapauʻí ʻe huaʻi atu foki ia ki he kolo* kuo fakalalá.”

10 ʻI he taʻu hono tolu ʻo e pule ʻa Tuʻi Kōlesi+ ʻo Pēsiá, naʻe ʻoange ai ha meʻa fakahā kia Taniela, ʻa ia naʻe uiʻaki ʻa e hingoa ko e Pelitisasá;+ pea naʻe moʻoni ʻa e pōpoakí, naʻe fekauʻaki ia mo ha fuʻu fepaki. Pea naʻe mahino kiate ia ʻa e pōpoakí pea naʻe ʻoange kiate ia ʻa e mahino ʻo fekauʻaki mo e meʻa naʻá ne mamata ki aí.

2 ʻI he ngaahi ʻaho ko iá, ko au, Taniela, naʻá ku fakamamahi+ ʻi he uike kakato ʻe tolu. 3 Naʻe ʻikai te u kai ha meʻakai vovo, pea naʻe ʻikai ʻai ki hoku ngutú ha kakanoʻi-manu pe ko ha uaine, pea naʻe ʻikai te u tākai ʻaki ha lolo ʻi he uike kakato ʻe tolu. 4 ʻI he ʻaho hono 24 ʻo e ʻuluaki māhiná, lolotonga ʻa ʻeku ʻi he veʻe vaitafe lahí, ʻa e Taikilisí,*+ 5 naʻá ku hanga hake ʻo vakai ki ha tangata ʻoku kofu līneni,+ pea naʻe nonoʻo ʻa hono kongalotó ʻaki ha leta koula mei ʻŪfasi. 6 Naʻe hangē ʻa hono sinó ko e kalisolaité,+ ko hono fofongá naʻe ulo ʻo hangē ha ʻuhilá, ko hono ongo foʻi matá naʻe hangē ko ha tūhulu naʻe ulo kakahá, ko hono ongo nimá mo hono ongo vaʻé naʻe hangē ha kopa kuo fakangingilá,+ pea ko e ongo mai ʻa ʻene leá naʻe hangē ko e ongo mai ʻa e leʻo ʻo ha fuʻu tokolahí. 7 Ko au pē, Taniela, naʻá ku mamata ki he vīsoné; ko e kau tangata naʻe ʻiate aú naʻe ʻikai te nau sio ki he vīsoné.+ Kae kehe, naʻa nau mātuʻaki tetetete, pea naʻa nau hola ʻo toi.

8 Pea ko au pē naʻe toé, pea ʻi heʻeku mamata ki he fuʻu vīsone ko ení, naʻe ʻikai ke kei ʻi ai haku ivi pea naʻe mole ʻa hoku fōtunga fakangeingeiá pea naʻe mole ʻa hoku mālohí kotoa.+ 9 Naʻá ku fanongo leva ki hono leʻó ʻokú ne lea; ka ʻi heʻeku fanongo kiate ia ʻi heʻene leá, naʻá ku mohe maʻu ʻo hanga ki he kelekelé.+ 10 Ka naʻe ala mai leva ha nima kiate au,+ pea naʻá ne ueʻi au ke u mālanga hake ʻo tūʻulutui. 11 Naʻá ne pehē mai leva kiate au:

“ʻE Taniela, ʻa koe ko e tangata mahuʻinga ʻaupitó,*+ ke ke tokanga ki he lea ʻoku teu ke u leaʻaki atu kiate koé. Ko eni ke ke tuʻu hake ʻi ho tuʻuʻangá, he kuo fekauʻi mai au kiate koe.”

ʻI heʻene leaʻaki mai eni kiate aú, naʻá ku tuʻu hake ʻi he tetetete.

12 Naʻá ne pehē mai leva kiate au: “ʻOua naʻá ke ilifia,+ ʻe Taniela. Kuo fanongoa ʻa hoʻo ngaahi leá mei he ʻuluaki ʻaho naʻá ke tuku ai ho lotó ke ne maʻu ʻa e mahinó pea fakavaivaiʻi koe ʻi he ʻao ʻo ho ʻOtuá, pea kuó u haʻú koeʻuhí ko hoʻo ngaahi leá.+ 13 Ka ko e ʻeiki+ ʻo e puleʻanga fakatuʻi ʻo Pēsiá naʻá ne tuʻu ʻo fakafepaki kiate au ʻi he ʻaho ʻe 21. Ka naʻe haʻu leva ʻa Maikeli,*+ ko e taha ʻo e ngaahi ʻeiki tuʻu-ki-muʻa tahá,* ʻo tokoniʻi au; pea naʻá ku nofo ai pē ʻi he tafaʻaki ʻo e ngaahi tuʻi ʻo Pēsiá. 14 Kuó u haʻú ke ʻai koe ke ke mahinoʻi ʻa e meʻa ʻe hoko ki ho kakaí ʻi he ngaahi ʻaho fakaʻosí,+ koeʻuhí ko ha vīsone ia ʻoku kei tuʻu ki he ngaahi ʻaho ka hoko maí.”+

15 Pea ʻi heʻene leaʻaki mai kiate au ʻa e ngaahi lea ko ení, naʻá ku hanga ki he kelekelé peá u moʻulongoa. 16 Ko e tokotaha leva naʻe hangē ko ha foha ʻo e tangatá naʻá ne ala mai ki hoku loungutú,+ pea naʻe ava ʻa hoku ngutú ʻo u lea ki he tokotaha naʻe tuʻu ʻi muʻa ʻiate aú: “ʻE hoku ʻeiki, ʻoku ou teteki koeʻuhí ko e vīsoné, pea ʻoku ʻikai haku mālohi.+ 17 Ko ia ʻe lava fēfē kiate au ko hoʻo sevānití ke u lea kiate koe ko hoku ʻeikí?+ He ko eni ʻoku ʻikai haku mālohi, pea ʻoku ʻikai ke u kei mānava.”+

18 Ko e tokotaha naʻe hangē ko ha tangatá naʻá ne toe ala mai kiate au ʻo fakaivimālohiʻi au.+ 19 Naʻá ne pehē mai leva: “ʻOua naʻá ke ilifia,+ ʻa koe ko e tangata mahuʻinga ʻaupitó.*+ ʻOfa ke ke maʻu ʻa e melinó.+ Ke ke loto-toʻa, ʻio, ke ke loto-toʻa.” ʻI heʻene lea mai kiate aú naʻe fakaivimālohiʻi ai au peá u pehē ange: “Tuku ke lea ʻa hoku ʻeikí, he kuó ke fakaivimālohiʻi au.”

20 Naʻá ne pehē mai leva: “ʻOkú ke ʻiloʻi ʻa e ʻuhinga kuó u haʻu ai kiate koé? Ko eni te u foki ʻo faitau mo e ʻeiki ʻo Pēsiá.+ ʻI heʻeku mavahé, ʻe haʻu ʻa e ʻeiki ʻo Kalisí. 21 Kae kehe, te u tala atu kiate koe ʻa e ngaahi meʻa naʻe hiki ʻi he ngaahi tohi ʻo e moʻoní. ʻOku ʻikai ha taha te ne poupouʻi mālohi au ʻi he ngaahi meʻá ni ka ko Maikeli+ pē, ko ho ʻeiki lahí.+

11 “Ka ko au, ʻi he ʻuluaki taʻu ʻo e pule ʻa Talaiasi+ ko e Mītiá, naʻá ku tuʻu hake ke fakaivimālohiʻi mo poupouʻi ʻa Maikeli.* 2 Ko e meʻa te u tala atu kiate koe he taimi ní ko e moʻoni:

“Vakai! ʻE tuʻu hake* ha toe tuʻi ʻe toko tolu maʻa Pēsia, pea ko e tuʻi hono faá te ne tānaki ha koloa ʻo lahi ange ia ʻi he niʻihi kotoa ko eé. Pea ʻi heʻene hoko ʻo mālohi koeʻuhí ko ʻene koloá, te ne ueʻi ʻa e meʻa kotoa pē ke fakafepaki ki he puleʻanga ʻo Kalisí.+

3 “Pea ʻe tuʻu hake ha tuʻi mālohi ʻo ne pule ʻi he mafai lahi+ peá ne fai ha meʻa pē ʻokú ne loto ki aí. 4 Ka ʻi heʻene tuʻu haké, ko hono puleʻangá ʻe motuhi pea ʻe vahevahe atu ia ki he matangi ʻe fā ʻo e langí,+ kae ʻikai ki hono hakó pea ko honau mafaí heʻikai ke tatau ia mo e mafai naʻá ne puleʻakí; he ko hono puleʻangá ʻe taʻaki ia ʻo ʻave ki ha niʻihi kehe.

5 “Pea ko e tuʻi ʻo e tongá, ʻa ia, ko e taha ia ʻi heʻene kau houʻeikí, te ne hoko ʻo mālohi; ka ʻe ʻi ai ʻa e tokotaha ʻe mālohi ange ia ʻiate ia pea te ne pule ʻi he mafai lahi, ʻo lahi ange ʻi he mafai ʻo e tokotaha ko iá.*

6 “ʻI he hili ha ngaahi taʻu te na faʻahi, pea ko e ʻofefine ʻo e tuʻi ʻo e tongá te ne ʻalu atu ki he tuʻi ʻo e tokelaú koeʻuhí ke fai ha aleapau. Ka ko e ʻofefiné ni heʻikai te ne kei pukepuke ʻa hono mafaí;* ʻe mole ʻa e mafai ia ʻo e tuʻí; pea ʻe tukulolo ʻa e ʻofefiné, ʻa ia mo e faʻahinga naʻa nau ʻomi iá, mo e tokotaha naʻá ne tupu mei aí, pea mo e tokotaha naʻá ne ʻai ia ke ne mālohi ʻi he taimi ko iá. 7 Pea ko e tokotaha mei he huli ʻo e ngaahi aka ʻo e ʻofefiné ni te ne tuʻu hake ʻo fetongi ʻa ʻene tamaí, pea te ne ʻalu atu ki he kau taú ʻo ne ʻohofi ʻa e kolotau ʻo e tuʻi ʻo e tokelaú pea te ne fai ha meʻa kiate kinautolu pea te ne ikuna. 8 Te ne ʻalu atu foki ki ʻIsipite mo ʻenau ngaahi ʻotuá, mo ʻenau ngaahi ʻīmisi mētalé,* mo ʻenau ngaahi naunau siliva mo e koula fakaʻofoʻofá,* fakataha mo ha kau pōpula. Te ne fakamamaʻo ʻi ha ngaahi taʻu mei he tuʻi ʻo e tokelaú, 9 ʻa ia ʻe ʻalu atu ke faitau mo e puleʻanga ʻo e tuʻi ʻo e tongá, ka te ne foki ki hono fonua ʻoʻoná.

10 “Ko e meʻa ki hono ngaahi fohá, te nau teuteu ki he tau ʻo nau fakatahatahaʻi ha fuʻu kau tau tokolahi fau. Ko e moʻoni te ne ʻalu atu ʻo ne tafiʻi ʻa e fonuá hangē ha tāfeá. Ka te ne foki, pea te ne faitau ai pē ʻo aʻu ki hono kolotaú.

11 “Pea ʻe ʻita ʻa e tuʻi ʻo e tongá ʻo ne ʻalu atu ʻo faitau mo ia, ʻa ia, ko e tuʻi ʻo e tokelaú; pea ko e tuʻí ni te ne tānaki mai ha fuʻu kakai tokolahi, ka ko e fuʻu kakaí ni ʻe tuku kinautolu ki he nima ʻo e tuʻi ko eé.* 12 Pea ʻe ʻave ʻa e fuʻu kakaí. ʻE mahiki ʻa hono lotó, pea te ne fakatupunga ke tō ha laui mano; ka heʻikai te ne ngāueʻaongaʻaki ʻa hono tuʻunga mālohí.

13 “Pea ʻe foki ʻa e tuʻi ʻo e tokelaú ʻo ne tānaki ha fuʻu kakai ʻoku tokolahi ange ia ʻi he ʻuluaki fuʻu kakaí; pea ʻi he hili ha vahaʻa taimi, ʻa ia ko e hili ha ngaahi taʻu, ko e moʻoni te ne haʻu mo ha fuʻu kau tau tokolahi kuo fakanaunau tau. 14 ʻI he ngaahi taimi ko iá ʻe tuʻu ʻa e tokolahi ki he tuʻi ʻo e tongá.

“Pea ko e kau anga-fakamālohi* ʻi he lotolotonga ho kakaí ʻe tākiekina kinautolu ke nau feinga ke fakahoko ha vīsone; ka te nau tō.

15 “Pea ko e tuʻi ʻo e tokelaú te ne ʻalu atu ʻo fokotuʻu ha fakatafunga kelekele ʻo ne hamu ha kolo fakakolotau. Pea ko e kau tau ʻo e tongá ʻe ʻikai ke nau tuʻu atu, pe ko ʻene kau tangata kuo filí; pea heʻikai hanau mālohi ke nau tuʻu atu. 16 Ko e tokotaha ʻe ʻalu atu ke faitau mo iá* te ne fai pē ʻa e meʻa ʻokú ne loto ki aí, pea heʻikai ha taha ʻe tuʻu ʻi hono ʻaó. Te ne tuʻu ʻi he Fonua Fakaʻofoʻofá,+ pea ʻe ʻi hono nimá ʻa e malava ke faifakaʻauha. 17 Te ne fakapapauʻi ke ʻalu atu ʻaki ʻa e mālohi kakato ʻo hono puleʻangá, pea te ne fai ha aleapau mo ia; pea ʻe lavameʻa ʻa e ngāue te ne faí. ʻI he fekauʻaki mo e ʻofefiné, ʻe tuku kiate ia ke ne fakaʻauha ʻa e ʻofefiné. Pea heʻikai ke kei tuʻu ʻa e ʻofefiné, pea heʻikai te ne kei mateaki kiate ia. 18 Te ne toe hanga ki mui ki he ngaahi matāfonuá pea te ne hamu ʻa e tokolahi. Pea ʻe fakangata ʻe ha ʻeikitau ʻa e tōʻonga ʻafungi ʻa e tokotaha ko iá, koeʻuhí ke ʻoua ʻe kei hokohoko atu ʻa ʻene ʻafungí. Te ne toe fakafoki pē ki he tokotaha ko iá ʻa ʻene ʻafungí. 19 Pea te ne* toe hanga ki he ngaahi kolotau ʻi hono fonua ʻoʻoná, pea te ne humu ʻo tō, pea heʻikai ke toe ʻilo ia.

20 “Pea ʻe tuʻu hake ha taha ʻo fetongi ia ʻa ia te ne fekauʻi ha tokotaha tānaki tukuhau* ke ʻalu atu ki he puleʻanga fisifisimuʻá ni, ka ʻe fakaʻauha ia ʻi he hili ha ngaahi ʻaho siʻi, neongo ʻe ʻikai ke fai ia ʻi he ʻita pe ʻi he tau.

21 “Pea ʻe tuʻu hake ha tokotaha anga-taʻetokaʻi* ʻo fetongi ia, pea heʻikai te nau ʻoange kiate ia ʻa e ngeia fakatuʻi ʻo e puleʻangá; pea te ne ʻalu atu ʻi ha taimi nonga* ʻo ne puke ʻa e puleʻangá fakafou ʻi he kākā.* 22 Pea ko e kau tau ʻoku hangē ha tāfeá te ne tafiʻi atu, pea ʻe fakaʻauha kinautolu; pea pehē ki he Taki+ ʻo e fuakavá.+ 23 Pea koeʻuhi ko ʻenau faʻahi mo iá, ʻe hokohoko atu ʻene kākaá ʻo ne mahiki hake pea hoko ʻo mālohi fakafou ʻi ha kiʻi kakai tokosiʻi. 24 ʻI he lolotonga ha taimi nonga* te ne hū atu ai ki he feituʻu lelei taha* ʻo e vahefonuá* ʻo ne fai ʻa e meʻa naʻe ʻikai ke fai ʻe heʻene ngaahi tamaí mo ʻenau ngaahi tamaí. Te ne tufa ʻi honau lotolotongá ʻa e koloa vete* mo ha ngaahi koloa kehe; pea te ne fai ha ngaahi faʻufaʻu fakafufū ki he ngaahi feituʻu fakakolotaú, ka ʻe hoko pē ia ʻi ha vahaʻa taimi.

25 “Pea te ne tafunaki ʻa hono mālohí mo hono lotó fakataha mo ha fuʻu kau tau tokolahi ke fakafepaki ki he tuʻi ʻo e tongá, pea ʻe teuteu atu ʻa e tuʻi ʻo e tongá ki he taú fakataha mo ha fuʻu kau tau mālohi mo tokolahi ʻaupito. Pea heʻikai te ne* kei tuʻu atu, koeʻuhí he te nau fai ha ngaahi faʻufaʻu fakafufū kiate ia. 26 Pea ko e faʻahinga ʻoku nau kai ʻi heʻene ngaahi meʻakai vovó te nau fakatupunga ʻa ʻene toó.

“Ko e meʻa ki heʻene kau taú, ʻe tafiʻi atu ia,* pea ʻe tāmateʻi ʻa e tokolahi.

27 “ʻI he fekauʻaki mo e ongo tuʻi ko ení, ʻe hehema ʻa hona lotó ke fai ʻa e meʻa ʻoku koví, pea te na tangutu pē ʻi he tēpile ʻe taha ʻo na tauʻaki loi. Ka ʻe ʻikai ke ola ha meʻa ʻe taha, koeʻuhí ʻe toki hoko mai ʻa e ngataʻangá ʻi hono taimi kuo kotofa.+

28 “Pea te ne* foki mo ha fuʻu koloa lahi ki hono fonuá, pea ʻe fakafepaki ʻa hono lotó ki he fuakava māʻoniʻoní. ʻE lavameʻa ʻa e ngāue te ne faí pea te ne foki ki hono fonuá.

29 “ʻI he taimi kuo kotofá te ne foki ai ʻo ne ʻalu atu ke faitau mo e fonua ʻo e tongá. Ka ko e taimi ko ení ʻe ʻikai ke tatau ia mo e taimi ki muʻá, 30 he ko e ngaahi vaka ʻo Kītimí+ ʻe ʻalu atu ke faitau mo ia, pea ʻe fakavaivaiʻi ai ia.

“Te ne foki pea ʻe tō ʻa ʻene ʻitá* ki he fuakava māʻoniʻoní+ pea ʻe lavameʻa ʻa e ngāue te ne faí; pea te ne foki ʻo ne fakahanga ʻa ʻene tokangá ki he faʻahinga ʻoku nau mavahe mei he fuakava māʻoniʻoní. 31 Pea ʻe tuʻu hake ha kau tau, ko e ʻalu atu meiate ia; pea te nau taʻetokaʻi ʻa e feituʻu toputapú,+ ʻa e hūfangaʻangá, pea te nau toʻo ʻa e feilaulau tuʻumaʻú.+

“Pea te na fokotuʻu ʻa e meʻa fakalielia ʻokú ne fakatupunga ʻa e ʻauhá.+

32 “Pea ko e faʻahinga ʻoku nau anga-fulikivanu ki he fuakavá, te ne* taki atu kinautolu ke nau tafoki ʻo fakafepaki ki he moʻoní fakafou ʻi ha ngaahi lea kākā.* Ka ko e kakai ʻoku nau ʻiloʻi ʻa honau ʻOtuá te nau ikuna pea ʻe lavameʻa ʻa e ngāue te nau faí. 33 Pea ko e faʻahinga ʻoku nau maʻu ʻa e vavanga fakaefakakaukau+ ʻi he lotolotonga ʻo e kakaí te nau ʻoatu ʻa e mahinó ki he tokolahi. Pea te nau tō ʻi he heletā mo e uloʻi afi, ʻi he taki pōpula pea ʻi he ʻave fakamālohi, ʻi ha ngaahi ʻaho. 34 Ka ʻi he taimi te nau tō aí, ʻe fai atu ha kiʻi tokoni kiate kinautolu; pea ʻe kau ha tokolahi mo kinautolu fakafou ʻi ha ngaahi lea kākā.* 35 Pea ko e niʻihi ʻo e faʻahinga ʻoku nau maʻu ʻa e vavanga fakaefakakaukaú te nau tō, koeʻuhí ke siviʻi ʻa e kakaí koeʻuhi ko kinautolu pea ke fai ha fakamaʻa mo ha fakahinehina+ kae ʻoua ke aʻu ki he ngataʻangá; koeʻuhí he ʻe hoko mai ia ʻi he taimi kuo kotofa.

36 “ʻE fai ʻe he tuʻí ha meʻa pē te ne loto ki ai, pea te ne hakeakiʻi mo fakahīkihikiʻi ia ʻo ne māʻolunga ʻi he ʻotua kotoa pē; pea te ne leaʻaki ʻa e ngaahi meʻa fakaʻohovale ʻo fakafepaki ki he ʻOtua ʻo e ngaahi ʻotuá.+ Pea te ne lavameʻa ʻo aʻu ki he taimi ʻe ngata ai ʻa e fakahalaiá; koeʻuhi kuo pau ke hoko ʻa e meʻa kuo ʻosi fakapapauʻí. 37 Heʻikai te ne tokaʻi ʻa e ʻOtua ʻo ʻene ngaahi tamaí; pea heʻikai te ne tokaʻi ʻa e holi ʻa e kakai fefiné pe ko ha toe ʻotua kehe pē, ka te ne fakahīkihikiʻi ia ʻo ne māʻolunga ʻi he tokotaha kotoa pē. 38 Ka te ne* fakalāngilangiʻi ʻe ia ʻa e ʻotua ʻo e ngaahi kolotaú; te ne fakalāngilangiʻi ʻa e ʻotua naʻe ʻikai ke ʻiloʻi ʻe heʻene ngaahi tamaí ʻaki ʻa e koula mo e siliva mo e maka mahuʻinga pea mo e ngaahi meʻa fakaʻofoʻofa.* 39 ʻE lavameʻa ʻa e meʻa te ne fai ki he ngaahi kolotau mālohi tahá, ʻi he tokoni ʻa ha ʻotua muli. Te ne fakalāngilangiʻi lahi ʻa e faʻahinga ʻoku nau poupou kiate iá,* pea te ne fakanofo kinautolu ke nau pule ki he tokolahi; pea te ne vahe atu ʻa e kelekelé ki ha totongi.

40 “ʻI he hoko ʻa e ngataʻangá ʻe fetēkeaki ai mo ia ʻa e tuʻi ʻo e tongá, pea ʻe ʻalu atu kiate ia ʻa e tuʻi ʻo e tokelaú ʻo hangē ha afaá fakataha mo e ngaahi saliote mo e kau tangata heka hoosi mo e ngaahi vaka lahi; pea te ne hū atu ki he ngaahi fonuá ʻo ne tafiʻi ia ʻo hangē ha tāfeá. 41 Te ne hū atu foki ki he Fonua Fakaʻofoʻofá,+ pea ʻe tō ʻa e ngaahi fonua lahi. Ka ko e faʻahinga eni ʻe hao mei hono nimá: Ko ʻĪtomi mo Mōape pea mo e konga tefito ʻo e kau ʻĀmoní. 42 Pea te ne hanganaki mafao atu hono nimá ki he ngaahi fonuá; pea ko e meʻa ki he fonua ko ʻIsipité, ʻe ʻikai te ne hao. 43 Pea te ne pule ki he ngaahi koloa fufuú, ki he koulá mo e silivá, pea ki he ngaahi meʻa fakaʻofoʻofa* kotoa pē ʻo ʻIsipité. Pea ʻe muimui kiate ia ʻa e kau Līpiá mo e kau ʻItiopeá.

44 “Ka ʻe fakahohaʻasi ia ʻe ha ngaahi ongoongo mei he hahaké* mo e tokelaú, pea te ne ʻalu atu ʻokú ne ʻita tōlili ke fai ha fakaʻauha pea ke tuku atu ʻa e tokolahi ke fakaʻauha. 45 Pea te ne fokotuʻu ʻa hono ngaahi tēniti fakatuʻí* ʻi he vahaʻa ʻo e tahi lahí mo e moʻunga tapu ʻo e Fonua Fakaʻofoʻofá;+ pea te ne hoko mai ai ki hono ngataʻangá, pea heʻikai ha taha ʻe tokoni kiate ia.

12 “Lolotonga ʻa e taimi ko iá ʻe tuʻu hake ʻa Maikeli,*+ ʻa e ʻeiki lahi+ ʻa ia ʻokú ne tuʻu* maʻa ho kakaí.* Pea ʻe hoko ai ha taimi ʻo e faingataʻa ʻa ia kuo teʻeki ai ke hoko ha meʻa pehē talu mei he hoko mai ha puleʻanga ʻo aʻu mai ki he taimi ko iá. Pea ʻi he lolotonga ʻa e taimi ko iá ʻe hao+ ʻa ho kakaí, ʻa e tokotaha kotoa pē kuo hiki honau hingoá ʻi he tohí.+ 2 Pea ko e tokolahi ʻo e faʻahinga ʻoku nau mohe ʻi he efu ʻo e kelekelé te nau ʻā hake, ko e niʻihi ki he moʻui taʻengata pea ko e niʻihi ki he luma mo e fehiʻanekinaʻi taʻengata.

3 “Pea ko e faʻahinga ʻoku nau maʻu ʻa e vavanga fakaefakakaukaú te nau ulo ngingila ʻo hangē ko e ʻatāloa ʻo e langí, pea ko e faʻahinga ʻoku nau ʻomai ʻa e tokolahi ki he māʻoniʻoní te nau hangē ko e ngaahi fetuʻú, ʻo taʻengata pea taʻengata.

4 “Ko e meʻa kiate koé, Taniela, tauhi ʻa e ngaahi leá ke fakapulipuli, pea silaʻi ʻa e tohí kae ʻoua ke aʻu ki he taimi ʻo e ngataʻangá.+ ʻE lele holo ʻa e* tokolahi, pea ʻe lahi ʻaupito ʻa e ʻilo moʻoní.”+

5 Pea ko au, Taniela, naʻá ku mamata ki he toko ua ʻokú na tuʻu ʻi ai, ko e taha ʻi he kauvai ko eni ʻo e vaitafé pea ko e taha ʻi he kauvai ʻe tahá.+ 6 Naʻe pehē ange leva ʻe he tokotaha ki he tangata naʻe kofu līneni,+ ʻa ia naʻe ʻi ʻolunga ʻi he ngaahi vai ʻo e vaitafé: “Ko e hā hono fuoloa pea aʻu ki he ngataʻanga ʻo e ngaahi meʻa fakaofo ko ení?” 7 Naʻá ku fanongo leva ki he tangata naʻe kofu līnení, ʻa ia naʻe ʻi ʻolunga ʻi he ngaahi vai ʻo e vaitafé, ʻi heʻene hiki hake hono nima toʻomataʻú mo hono nima toʻohemá ki he langí ʻo ne fai ha fuakava ki he Tokotaha ʻa ia ʻoku moʻui taʻengatá:+ “Ko hono fuoloá ko ha kuonga, mo ha kuonga ʻe ua, mo e vaeuaʻi kuonga.* ʻI he ngata pē ʻa hono laiki ʻa e mafai ʻo e kakai māʻoniʻoní,+ ʻe ngata ai ʻa e ngaahi meʻá ni hono kotoa.”

8 Pea ko e meʻa kiate aú, naʻá ku fanongo, ka naʻe ʻikai lava ke u mahinoʻi;+ ko ia naʻá ku pehē ange: “ʻE hoku ʻeiki, ko e hā ʻa e ikuʻanga ʻo e ngaahi meʻá ni?”

9 Naʻá ne pehē mai leva: “ʻAlu, ʻe Taniela, koeʻuhí ʻoku fiemaʻu ke tauhi ʻa e ngaahi leá ke fakapulipuli pea silaʻi kae ʻoua ke aʻu ki he taimi ʻo e ngataʻangá.+ 10 Ko e tokolahi te nau fakamaʻa kinautolu pea fakahinehina kinautolu pea sivi.+ Pea ko e kau fulikivanú te nau fai ʻa e tōʻonga fulikivanu, pea ʻe ʻikai ha kau fulikivanu te nau mahinoʻi; ka ko e faʻahinga pē ʻoku nau maʻu ʻa e vavanga fakaefakakaukaú te nau mahinoʻí.+

11 “Pea mei he taimi ʻo hono toʻo ʻa e feilaulau tuʻumaʻú+ pea fokotuʻu ʻa e meʻa fakalielia ʻokú ne fakatupunga ʻa e ʻauhá,+ ko e ʻaho ʻe 1,290.

12 “Fiefia ē ko e tokotaha ʻokú ne hanganaki ʻamanaki* pea ʻokú ne aʻu ki he ʻaho ʻe 1,335!

13 “Ka ko e meʻa kiate koé, ʻalu atu ke aʻu ki he ngataʻangá. Te ke mālōlō, ka te ke tuʻu hake ʻo maʻu ho ʻinasí* ʻi he ngataʻanga ʻo e ngaahi ʻahó.”+