HŌSEA
1 Naʻe hoko mai ʻa e folofola ʻa Sihová kia Hōsea* ko e foha ʻo Peʻelí ʻi he ngaahi ʻaho ʻo ʻŪsaia,+ Siotame,+ ʻĀhasi,+ mo Hesekaia,+ ko e ngaahi tuʻi ʻo Siutá,+ pea ʻi he ngaahi ʻaho ʻo Selopoame+ ko e foha ʻo Sōasi,+ ko e tuʻi ʻo ʻIsilelí. 2 ʻI he kamata ke folofola ʻa Sihova fakafou ʻia Hōseá, naʻe pehē ʻe Sihova kia Hōsea: “ʻAlu ʻo mali mo ha fefine feʻauaki* pea te ke maʻu ha fānau ʻi heʻene feʻauakí,* koeʻuhi ʻi he feʻauakí* kuo tafoki fakaʻaufuli ai ʻa e fonuá mei he muimui kia Sihová.”+
3 Ko ia naʻá ne ʻalu ʻo mali mo Kōmela ko e ʻofefine ʻo Tipilaimí, pea naʻá ne feitama ʻo ne fanauʻi kiate ia ha tama tangata.
4 Naʻe pehē ange leva ʻe Sihova kiate ia: “Fakahingoa ia ko Sisilili,* he ʻi ha kiʻi taimi siʻi mei heni te u kounaʻi ai ke fai mai ʻe he fale ʻo Sehú+ ha fakamatala ki he lingitoto ʻa Sisililí, pea te u fakangata ʻa e pule fakatuʻi ʻa e fale ʻo ʻIsilelí.+ 5 ʻI he ʻaho ko iá te u fesiʻi ai ʻa e kaufana ʻa ʻIsilelí ʻi he Teleʻa* ʻo Sisililí.”
6 Naʻá ne toe feitama peá ne fanauʻi ha taʻahine. Pea naʻe tala ʻe he ʻOtuá kia Hōsea: “Fakahingoa ia ko Lo-luhama,* koeʻuhí heʻikai te u toe fakahaaʻi ha meesi+ ki he fale ʻo ʻIsilelí, he ko e moʻoni te u kapusi kinautolu.+ 7 Ka te u fakahaaʻi ha meesi ki he fale ʻo Siutá,+ pea te u fakahaofi kinautolu, ko au Sihova ko honau ʻOtuá;+ heʻikai te u fakahaofi kinautolu ʻaki ha kaufana pe ko ha heletā pe ko ha tau pe ko ha fanga hoosi pe ko ha kau tangata heka hoosi.”+
8 ʻI he hili hono mavae ʻo Lo-luhamá, naʻá ne feitama peá ne fanauʻi ha tamasiʻi. 9 Pea naʻá Ne folofola ange: “Fakahingoa ia ko Lo-ami,* koeʻuhi ʻoku ʻikai ko hoku kakai kimoutolu pea heʻikai ke ʻamoutolu au.
10 “Pea ko e tokolahi ʻo e kakai* ʻo ʻIsilelí ʻe hangē ko e ʻoneʻone ʻo e tahí, ʻa ia ʻe ʻikai lava ke fua pe lau.+ Pea ʻi he feituʻu ʻa ia naʻe pehē ai kiate kinautolu, ‘ʻOku ʻikai ko hoku kakai kimoutolú,’+ ʻe leaʻaki ai kiate kinautolu, ‘Ko e ngaahi foha kimoutolu ʻo e ʻOtua moʻuí.’+ 11 Pea ko e kakai ʻo Siuta mo ʻIsilelí ʻe fakatahatahaʻi ke nau fāʻūtaha+ pea te nau fili maʻanautolu ha taki ʻe taha pea te nau ʻalu atu mei he fonuá, he ʻe hoko ia ko ha ʻaho mahuʻinga ki Sisilili.+
2 “Mou lea ki homou fanga tokouá, ‘Ko hoku kakai!’*+
Pea ki homou fanga tuofāfiné, ‘ʻA koe ko e fefine kuo fakahāhā ki ai ʻa e mēsí!’*+
2 Talatalaakiʻi ʻa hoʻomou faʻeé; talatalaakiʻi ia,
He ko iá ʻoku ʻikai ko hoku uaifi+ pea ko aú ʻoku ʻikai ko hono husepāniti.
ʻOku totonu ke tuku ʻa ʻene faifeʻauakí*
Pea mo ʻene tonó,*
3 He ka ʻikai, te u fakatelefuaʻi ia pea ʻai ia ke ne hangē ko e ʻaho naʻe fanauʻi ai iá,
ʻO ʻai ia ke ne hangē ha toafá,
Pea ʻai ia ke ne hoko ko ha fonua ʻoku ʻikai ʻi ai ha vai,
Pea ʻai ia ke ne mate fieinua.
4 Pea ʻe ʻikai te u fakahaaʻi ha meesi ki heʻene fānaú,
He ko e fānau kinautolu naʻe maʻu ʻi he feʻauaki.*
5 He ko ʻenau faʻeé kuo faifeʻauaki.*+
Ko ia naʻá ne feitamaʻi kinautolú kuó ne fai ʻa e tōʻonga fakamā,+ he naʻá ne pehē,
‘Te u muimui ki hoku ngaahi ʻofaʻanga mamaé,+
ʻA kinautolu ʻoku nau ʻomai ʻa ʻeku maá mo ʻeku vaí,
ʻA ʻeku fulufuluʻisipí mo ʻeku līnení, ʻa ʻeku loló mo hoku inú.’
6 Ko ia te u tāpuni hono halá ʻaki ha kauʻā ʻakau talatala;
Pea te u fokotuʻu ha ʻā maka ʻo taʻofiʻaki ia,
Ke ʻoua ʻe lava ke ne ʻilo hono ngaahi halá.
7 Te ne tulimui ki hono ngaahi ʻofaʻanga mamaé, ka heʻikai te ne maʻu kinautolu;+
Te ne kumi kiate kinautolu, ka heʻikai te ne ʻilo kinautolu.
Te ne pehē leva, ‘Te u foki ki hoku ʻuluaki husepānití,+
He naʻá ku lelei ange ʻi he taimi ko iá ʻi he taimí ni.’+
8 Naʻe ʻikai te ne ʻiloʻi ko au ia naʻá ku ʻoange kiate ia ʻa e uité,+ ko e uaine foʻoú, pea mo e loló,
Pea ko au ia naʻá ku ʻoange kiate ia ʻa e siliva lahi fau
Pea mo e koula, ʻa ia naʻa nau ngāueʻaki ʻi he lotu kia Pēalí.+
9 ‘Ko ia ai, te u foki ʻo ʻave ʻa ʻeku uité ʻi hono taimí
Pea mo ʻeku uaine foʻoú ʻi hono faʻahitaʻú,+
Pea te u faʻao ʻa ʻeku fulufuluʻisipí pea mo ʻeku līnení ʻa ia naʻe fiemaʻu ke ʻufiʻufiʻaki ʻa ʻene telefuá.
10 Ko eni te u fakaeʻa ʻa hono ngaahi kupu ʻoku fakapulipuliʻí ke sio lelei ki ai ʻa hono ngaahi ʻofaʻanga mamaé,
Pea heʻikai ha tangata te ne fakahaofi ia mei hoku nimá.+
11 Te u fakangata ʻa ʻene fiefiá kotoa,
ʻA ʻene ngaahi kātoangá,+ ko ʻene ngaahi māhina foʻoú, ko ʻene ngaahi Sāpaté,* mo ʻene ngaahi faʻahitaʻu kātoangá kotoa.
12 Pea te u maumauʻi ʻa ʻene ʻulu kālepí mo ʻene ʻulu fikí, ʻa ia kuó ne pehē ʻo fekauʻaki mo ia:
“Ko eni ʻa ʻeku totongi, ʻa ia kuo ʻomai kiate au ʻe hoku ngaahi ʻofaʻanga mamaé”;
Te u ʻai ia ke hoko ko ha vaotā,
Pea ʻe keina ia ʻe he fanga manu fekai ʻo e vaó.
13 Te u kounaʻi ia ke ne fai ha fakamatala ki he ngaahi ʻaho naʻá ne fai ai ʻa e ngaahi feilaulau ki he ngaahi ʻīmisi Pēalí,+
ʻA ia naʻá ne teuteu ʻaki ai ʻa ʻene mama-ihú mo ʻene ngaahi meʻa-teuteú peá ne tulimui ki hono ngaahi ʻofaʻanga mamaé,
Pea ko au ʻa e tokotaha naʻá ne fakangaloʻí,’+ ko e fakahaaʻi ia ʻe Sihová.
15 Te u fakafoki kiate ia ʻa ʻene ngaahi ngoue kālepí mei he taimi ko iá ʻo faai mai,+
Pea ko e Teleʻa* ko ʻĀkolí+ ʻe hoko ko ha matapā ia ki he ʻamanakí;
Te ne fai ʻi ai ʻa ʻene talí ʻo hangē ko ia ʻi he ngaahi ʻaho ʻo ʻene kei finemuí,
ʻO hangē ko ia ʻi he ʻaho naʻá ne haʻu ai mei he fonua ko ʻIsipité.+
16 Pea ʻi he ʻaho ko iá,’ ko e fakahaaʻi ia ʻe Sihová,
‘Te ke ui au ko Hoku husepāniti, pea ʻe ʻikai te ke kei ui au ko Hoku ʻeiki.’*
17 ‘Te u toʻo ʻa e ngaahi hingoa ʻo e ngaahi ʻīmisi Pēalí mei hono ngutú,+
Pea heʻikai ke kei manatua ʻa honau hingoá.+
18 ʻI he ʻaho ko iá te u fai maʻanautolu ha fuakava mo e fanga manu fekai ʻo e vaó,+
Pea mo e fanga manupuna ʻo e langí pea mo e fanga manu totolo mo ngaolo ʻo e kelekelé;+
Te u toʻo mei he fonuá ʻa e kaufana mo e heletā pea mo e tau,+
19 Te u fakamaʻu mo koe ʻo taʻengata;
Pea te u fakamaʻu mo koe ʻi he māʻoniʻoni pea ʻi he fakamaau totonu,
ʻI he ʻofa mateaki pea ʻi he meesi.+
20 Te u fakamaʻu mo koe ʻi he faitōnunga,
Pea te ke ʻiloʻi moʻoni ʻa Sihova.’+
21 ‘ʻI he ʻaho ko iá te u fai ha tali,’ ko e fakahaaʻi ia ʻe Sihová,
‘Te u tali ʻa e kole ʻa e ngaahi langí,
Pea ko e ngaahi langí te nau tali ʻa e kole ʻa e māmaní;+
22 Pea ko e māmaní te ne tali ʻa e kole ʻa e uité pea mo e uaine foʻoú pea mo e loló;
23 Te u tūtuuʻi ia maʻaku ʻo hangē ha tenga ʻi he māmaní,+
Pea te u fakahaaʻi ʻa e meesi kiate ia naʻe ʻikai fakahaaʻi ki ai ʻa e mēsí;*
Te u lea ki he faʻahinga ʻoku ʻikai ko hoku kakaí:* “Ko hoku kakai kimoutolu,”+
Pea te nau pehē mai: “Ko homau ʻOtuá koe.”’”+
3 Naʻe folofola mai leva ʻa Sihova kiate au: “Toe ʻalu, ʻo ʻofa ʻi he fefine ʻa ia ʻoku ʻofa ai ha tangata kehe pea ʻokú ne fai ʻa e tono,+ hangē tofu pē ko e ʻofa ʻa Sihova ʻi he kakai ʻo ʻIsilelí+ lolotonga ia ʻenau tafoki ki he ngaahi ʻotua kehé+ pea manako ʻi he takaonga fuamelié.”*
2 Ko ia naʻá ku fakatau mai ʻa e fefiné maʻaku ʻaki ʻa e konga siliva ʻe 15 mo ha fua homa* ʻe taha mo e konga ʻo e paʻalé. 3 Naʻá ku pehē ange leva kiate ia: “Te ke hoko ai pē ʻo ʻaʻaku ʻi he ngaahi ʻaho lahi. Kuo pau ke ʻoua naʻá ke faifeʻauaki,* pea kuo pau ke ʻoua naʻá ke mohe* mo ha toe tangata kehe, pea te u fai atu ʻa e tōʻonga tatau pē kiate koe.”*
4 Koeʻuhí ʻe nofo ʻi ha taimi fuoloa* ʻa e kakai ʻo ʻIsilelí ʻo ʻikai hanau tuʻi,+ ʻikai ha houʻeiki, ʻikai ha feilaulau, ʻikai ha pou maka toputapu, pea ʻikai ha ʻēfoti+ mo ha ngaahi ʻīmisi telafimi.*+ 5 ʻI he hili iá ʻe toe foki mai ʻa e kakai ʻo ʻIsilelí ʻo kumi kia Sihova ko honau ʻOtuá+ pea kia Tēvita ko honau tuʻí,+ pea te nau haʻu ʻi he tetetete kia Sihova pea ki heʻene leleí ʻi he ngaahi ʻaho fakaʻosí.+
4 Fanongo ki he folofola ʻa Sihová, ʻe kakai ʻo ʻIsileli,
He ʻoku ʻi ai ha meʻa ke fakamāuʻi ai ʻe Sihova ʻa e kakai ʻo e fonuá,+
Koeʻuhí ʻoku ʻikai ha moʻoni mo ha ʻofa mateaki mo ha ʻilo ki he ʻOtuá ʻi he fonuá.+
2 Ko e ngaahi fuakava loí+ mo e loí mo e fakapoó+
Pea mo e kaihaʻá mo e tonó+ ʻoku mafolalahia,
Pea ʻoku ʻosi atu ʻa e lingitoto kae hoko mai ʻa e lingitoto.+
3 Ko e ʻuhinga ia ʻe fakamamahi+ ai ʻa e fonuá
Pea ko e kakai kotoa ʻi aí te nau ʻauha;
Ko e fanga manu fekai ʻo e vaó mo e fanga manupuna ʻo e langí,
Naʻa mo e fanga iká, te nau ʻauha.
4 “Kae kehe, ke ʻoua naʻa ʻi ai ha tangata ʻe fakakikihi pe te ne valokiʻi+ ʻa e kakaí,
He ko ho kakaí ʻoku nau hangē ko e faʻahinga ʻoku nau fakakikihiʻi ha taulaʻeikí.+
5 Ko ia te ke humu ʻi he hoʻatā mālié,
Pea ʻe humu ʻa e palōfitá fakataha mo koe, ʻo hangē ia kuo poʻulí.
Pea te u fakasīlongoʻi* ʻa hoʻo faʻeé.
6 Ko hoku kakaí ʻe fakasīlongoʻi,* koeʻuhí he ʻoku ʻikai te nau ʻiloʻi au.+
Koeʻuhí kuó ke fakafisi ke ʻiloʻi au,
Te u talitekeʻi foki koe mei hoʻo ngāue ko ʻeku taulaʻeikí;
Pea koeʻuhi kuó ke fakangaloʻi ʻa e lao* ʻa ho ʻOtuá,+
Te u fakangaloʻi ʻa ho ngaahi fohá.
7 Ko e tupu ʻo tokolahi ange ʻa e kau taulaʻeikí, ko e lahi ange ai pē ia ʻenau faiangahala mai kiate aú.+
Te u liliu ʻenau lāngilangí ki he tuʻunga fakamā.*
8 ʻOku nau ʻai ke nau sisino ʻi he taimi ʻoku faiangahala ai ʻa e kakaí,*
Pea ʻoku nau mānumanu ki heʻenau faihalá.
9 ʻE tatau pē ki he kakaí pea mo e taulaʻeikí;
Te u kounaʻi kinautolu ke nau fai ha fakamatala ki honau ngaahi ʻalungá,
Pea te u ʻoange kiate kinautolu ʻa e ngaahi nunuʻa ʻo ʻenau ngaahi ngāué.+
10 Te nau kai ka heʻikai te nau mākona.+
Te nau fakaʻaluʻalu,* ka heʻikai te nau tupu ʻo tokolahi,+
Koeʻuhí kuo ʻikai te nau tokaʻi ʻa Sihova.
11 Ko e feʻauakí* mo e uainé mo e uaine foʻoú
Te nau toʻo ʻa e fakaueʻiloto ke fai ʻa e meʻa ʻoku totonú.*+
12 ʻOku kumi faleʻi ʻa hoku kakaí ki heʻenau ngaahi ʻaitoli ʻakaú,
ʻO nau fai ʻa e meʻa ʻoku tala ange kiate kinautolu ʻe honau tokotokó;*
Koeʻuhi ko ʻenau maʻu ʻa e laumālie ʻo e faifeʻauakí* ʻoku ʻai ai kinautolu ke nau ʻalu hē,
Pea ʻi heʻenau faifeʻauakí* ʻoku nau fakafisi ke fakamoʻulaloa ki honau ʻOtuá.
13 ʻOku nau faifeilaulau+ ʻi he ngaahi tumutumu ʻo e ngaahi moʻungá,
Pea ʻoku nau ʻai ʻa e ngaahi feilaulaú ke kohu ʻi he ngaahi foʻi māʻolungá,
ʻI he ngaahi lalo ʻoké mo e ʻulu sitolakí* mo e ʻuluʻakau lalahi kotoa pē,+
Koeʻuhí ʻoku lelei ʻa honau malumalú.
Ko e ʻuhinga ia kuo faifeʻauaki* ai homou ngaahi ʻofefiné
Pea tono ʻa homou ngaahi ʻofefine-ʻi-he-fonó.
14 ʻE ʻikai te u kounaʻi ke fai ʻe homou ngaahi ʻofefiné ha fakamatala koeʻuhi ko ʻenau feʻauakí,*
Pea mo ho ngaahi ʻofefine-ʻi-he-fonó koeʻuhí ko ʻenau tonó.
He ʻoku ʻalu ʻa e kau tangatá mo e kau paʻumutú
Pea faifeilaulau mo e kau feʻauaki ʻo e temipalé;
Ko ha kakai taʻemahino+ pehē ʻe fakaʻauha.
15 Neongo ʻa hoʻo faifeʻauakí,* ʻe ʻIsileli,+
Tuku ke ʻoua naʻa halaia ʻa Siuta ʻi he angahala tatau.+
ʻOua naʻá ke ʻalu ki Kilikali+ pe ki Pete-ʻaveni,+
Pea ʻoua naʻá ke fai ha fakapapau, ‘ʻOku ou fuakava ʻia Sihova ko e ʻOtua moʻuí!’+
16 He ʻi he hangē ha pulu ongongataʻá, kuo hoko ʻa ʻIsileli ʻo ongongataʻa.+
ʻE tauhi koā kinautolu ʻe Sihova ʻo hangē ha kiʻi sipi tangata ʻi ha manafa kaikaiʻangá?*
17 ʻOku pīkitai ʻa ʻIfalemi ki he ngaahi ʻaitolí.+
Tukunoaʻi pē ia!
Pea ko hono kau pulé* ʻoku nau mātuʻaki manako ʻi he tōʻonga fakamaá.+
19 ʻE takatakaiʻi* ia ʻe he matangí ʻi hono ngaahi kapakaú,
Pea te nau mā ʻi heʻenau ngaahi feilaulaú.”
5 “Fanongo mai ki he meʻá ni, ʻa kimoutolu kau taulaʻeiki,+
Tokanga mai, ʻe fale ʻo ʻIsileli,
Fanongo mai, ʻa e fale ʻo e tuʻí,
He ʻoku kaunga ʻa e fakamāú kiate kimoutolu;
Koeʻuhí ko ha tauhele kimoutolu ki Misipā
Pea ko ha kupenga ʻoku lafo atu ki Tēpoa.+
2 Pea ko e faʻahinga ʻoku tō mamaʻo meiate aú* kuo nau kau lahi ʻi he tāmaté,
Pea ʻoku ou fai ha fakatokanga* kiate kinautolu kotoa.
3 ʻOku ou ʻilo ʻa ʻIfalemi,
Pea ʻoku ʻikai puli ʻa ʻIsileli meiate au.
4 Ko ʻenau ngaahi feangaingá ʻoku ʻikai te ne fakaʻatā kinautolu ke nau foki ki honau ʻOtuá,
Koeʻuhí ʻoku ʻi ai ha laumālie ʻo e faifeʻauaki* ʻi honau lotolotongá;+
Pea ʻoku ʻikai te nau lāuʻilo kia Sihova.
5 Ko e pōlepole ʻa ʻIsilelí kuó ne talatalaakiʻi pē ia;*+
Kuo fakatou humu ʻa ʻIsileli mo ʻIfalemi ʻi heʻena faihalá,
Pea kuo humu ʻa Siuta fakataha mo kinaua.+
6 Naʻa nau ʻalu mo ʻenau fanga sipi mo ʻenau fanga pulu ke kumi kia Sihova,
Ka naʻe ʻikai malava ke nau maʻu ia.
Naʻá ne mavahe meiate kinautolu.+
7 Kuo nau lavakiʻi ʻa Sihova,+
He kuo nau hoko ko e tamai ʻa ha ngaahi foha muli.
ʻI loto ʻi ha māhina ʻe taha ʻe keina ai kinautolu mo honau ngaahi tofiʻá.*
8 Ifi ha meʻaifi+ ʻi Kīpea, ha talupite ʻi Lama!+
Fai ha kaila ʻo e tau ʻi Pete-ʻaveni+—ʻoku mau muimui atu ʻiate koe, ʻe Penisimani!
9 ʻE ʻIfalemi, te ke hoko ko ha meʻa ke fai ai ha fakalilifuʻia ʻi he ʻaho ʻo e tauteá.+
Kuó u fakaʻilo atu ʻa e meʻa ʻe hoko moʻoni ʻi he lotolotonga ʻo e ngaahi matakali ʻo ʻIsilelí.
10 Ko e houʻeiki ʻo Siutá ʻoku nau hangē ha faʻahinga ʻoku nau ʻunuaki ha kauʻaá.+
Te u huaʻi ʻeku houhaú kiate kinautolu ʻo hangē ha vaí.
11 ʻOku lōmekina ʻa ʻIfalemi, ʻo laiki ʻi hono fakamāuʻí,
He naʻá ne fakapapauʻi ke ne muimui ʻi hono filí.+
12 Ko ia naʻá ku hangē ha ané ki ʻIfalemi
Pea hangē ha popó ki he fale ʻo Siutá.
13 ʻI he sio ʻa ʻIfalemi ki heʻene puké, mo Siuta ki hono palá,
Naʻe ʻalu ʻa ʻIfalemi ki ʻAsīlia+ peá ne fai atu ha fekau ki ha tuʻi lahi.
Ka naʻe ʻikai te ne malava ke fakamoʻui kimoutolu,
Pea naʻe ʻikai malava ke ne faitoʻo homou palá.
14 He te u hangē ha laione muí ki ʻIfalemi,
Pea hangē ha laione mālohí ki he fale ʻo Siutá.
Ko au tonu te u haehae kinautolu peá u ʻalu;+
Te u ʻave kinautolu, pea heʻikai ha taha te ne fakahaofi kinautolu.+
15 Te u ʻalu ʻo foki ki hoku feituʻú kae ʻoua ke nau fua ʻa e ngaahi nunuʻa ʻo ʻenau halaiá,
ʻI heʻenau mamahí, te nau kumi kiate au.”+
Naʻá ne taaʻi kitautolu, ka te ne haʻihaʻi ʻa hotau ngaahi laveá.
2 Te ne fakaake kitautolu ʻi he ʻosi ha ʻaho ʻe ua.
ʻI he ʻaho hono tolú te ne fokotuʻu hake kitautolu,
Pea te tau moʻui ʻi hono ʻaó.
3 Te tau ʻiloʻi Ia, te tau kumi tōtōivi ke ʻiloʻi ʻa Sihova.
Ko ʻene hāʻele maí ʻoku papau ʻo hangē ko e mafoa ʻa e atá;
Te ne hāʻele mai kiate kitautolu ʻo hangē ko ha ʻuha lōvaí,
ʻO hangē ko ha ʻuha ʻi he faʻahitaʻu failaú ʻa ia ʻokú ne fakaviviku ʻa e māmaní.”
4 “Ko e hā ʻa e meʻa te u fai kiate koé, ʻe ʻIfalemi?
Ko e hā ʻa e meʻa te u fai kiate koé, ʻe Siuta?
He ko hoʻomo ʻofa mateakí ʻoku hangē ko e ngaahi ʻao ʻi he pongipongí,
Hangē ko e hahau ʻa ia ʻoku vave ʻene mole atú.
5 Ko e ʻuhinga ia te u tuʻusi ai kinautolu fakafou ʻi he kau palōfitá;+
Te u tāmateʻi kinautolu ʻaki ʻa e ngaahi lea ʻoku ʻalu atu mei hoku fofongá.+
Pea ko e fakamaau ʻe fai kiate koé ʻe ulo ʻo hangē ko e māmá.+
6 He ʻoku ou leleiʻia ʻi he ʻofa mateakí,* ʻo ʻikai ʻi he feilaulaú,
Pea ʻi he ʻilo ki he ʻOtuá, kae ʻikai ʻi he ngaahi feilaulau tutu kakató.+
7 Ka ko kinautolú, ʻi he hangē ko e tangata angahalaʻiá, kuo nau maumauʻi ʻa e fuakavá.+
Kuo nau lavakiʻi au ʻi honau fonuá.
9 Ko e kulupu ʻo e kau taulaʻeikí ʻoku nau hangē ko e kau kaihaʻa fakamālohi ʻoku nau toka malumu ki ha tangatá.
ʻOku nau fakapō ʻi he hala ʻi Sīkemí,+
He ʻoku nau fai ʻa e tōʻonga fakamā.
10 Kuó u mamata ki ha meʻa fakalilifu ʻi he fale ʻo ʻIsilelí.
11 ʻIkai ko ia pē, ʻe Siuta, kuo fokotuʻu maʻau ha utu-taʻu,
ʻI he taimi te u fakatahatahaʻi mai ai ʻa e kau pōpula ʻi hoku kakaí.”+
7 “ʻI he taimi ʻoku ou fakamoʻui ai ʻa ʻIsilelí,
ʻOku eʻa foki ai ʻa e faihala ʻa ʻIfalemí,+
Mo e fulikivanu ʻa Samēliá.+
He ʻoku nau faikākā;+
ʻOku hae fale ʻa e kau kaihaʻá pea ko e kau kaihaʻa fakamālohí ʻoku nau fai ʻa e ʻohofi ʻi tuʻa.+
2 Ka ʻoku ʻikai te nau pehē ʻi honau lotó te u manatua ʻa ʻenau fulikivanú kotoa.+
Kuo nau fihia ʻi heʻenau tōʻonga fulikivanu pē ʻanautolú.
ʻOku ʻikai haʻanau tōʻonga ʻe puli meiate au.
3 ʻOku nau fakafiefiaʻi ʻa e tuʻí ʻaki ʻenau fulikivanú,
Mo e kau houʻeikí ʻaki ʻenau kākaá.
4 Ko kinautolu kotoa ko e kau tono,
ʻOku nau vela ʻo hangē ha ʻōvani kuo tutu ʻe ha tokotaha taʻo-maá,
ʻA ia ʻoku ʻikai te ne kei tolo ʻa e afí lolotonga ʻene natu ʻa e takaonga mahoaʻá mo tatali ke tupú.
5 ʻI he ʻaho kātoanga ʻo hotau tuʻí, ʻoku puke ʻa e kau houʻeikí
—ʻOku nau ʻita tōlili ko e ngāue ʻa e uainé.+
Kuo mafao atu ʻe he tuʻí ʻa hono nimá ki he kau manukí.
6 He ʻoku nau ʻunuʻunu mai mo ha loto ʻoku vela ʻo hangē ha ʻōvaní.*
ʻOku mohe ʻa e tokotaha taʻo-maá ʻi he poó kotoa;
Ka ʻi he pongipongí ʻoku puho ʻa e ʻōvaní ʻo hangē ha afi ʻoku uló.
7 Ko kinautolu kotoa ʻoku nau vela ʻo hangē ha ʻōvaní,
Pea ʻoku nau keina ʻa honau kau pulé.*
8 ʻOku feohi ʻa ʻIfalemi mo e ngaahi puleʻangá.+
ʻOku hangē ʻa ʻIfalemi ha mā lafalafa fuopotopoto kuo taʻo ʻo ʻikai ke fulihí.
9 Kuo keina ʻe he kau mulí ʻa hono mālohí,+ ka ʻoku ʻikai te ne ʻilo.
Pea kuo hinā ʻa hono ʻulú, ka ʻoku ʻikai te ne fakatokangaʻi.
10 Ko e pōlepole ʻa ʻIsilelí kuó ne talatalaakiʻi pē ia,+
Ka kuo ʻikai te nau foki kia Sihova ko honau ʻOtuá,+
Pea kuo ʻikai te nau hanga kiate ia neongo ʻa e meʻa kotoa ko ení.
11 Ko ʻIfalemí ʻoku hangē ko ha lupe ʻoku vale, ʻo ʻikai fakakaukau leleí.*+
Kuo nau ui ki ʻIsipite;+ kuo nau ō ki ʻAsīlia.+
12 Ko ha feituʻu pē ʻoku nau ʻalu ki ai, te u lafo ʻeku kupengá kiate kinautolu.
Te u ʻohifo kinautolu ʻo hangē ko e fanga manupuna ʻo e langí.
Te u akonakiʻi kinautolu ʻo fakatatau ki he fakatokanga naʻe ʻoange ki heʻenau fuʻu fakatahá.+
13 ʻOiauē ʻa kinautolu, he kuo nau hola meiate au!
Ko ha fakaʻauha kiate kinautolu, he kuo nau faihala kiate au!
Naʻá ku mateuteu ke huhuʻi kinautolu, ka kuo nau lea loi ʻo fekauʻaki mo au.+
14 Naʻe ʻikai te nau ui tokoni+ kiate au mei honau lotó,
Neongo ʻenau hanganaki tangilāulau ʻi honau mohengá.
ʻOku nau tafatafaʻi kinautolu ʻi heʻenau kole ki ha uite mo ha uaine foʻou;
ʻOku nau fakafepaki kiate au.
15 Neongo naʻá ku akonakiʻi kinautolu mo fakaivimālohiʻi ʻa honau nimá,
ʻOku nau fakafepaki mo faʻufaʻu ʻa e meʻa ʻoku koví kiate au.
16 ʻOku nau liliu ʻa honau ʻalungá, kae ʻikai ki ha meʻa ʻoku māʻolunga angé;*
Naʻa nau taʻefalalaʻanga ʻo hangē ha kaufana ʻoku ngahomohomó.+
ʻE tō ʻa ʻenau kau houʻeikí ʻi he heletaá koeʻuhi ko honau ʻelelo fakafetaú.
Koeʻuhi ko e meʻá ni, te nau hoko ai ko e manukiaʻanga ʻi he fonua ko ʻIsipité.”+
8 “ʻAi ha meʻaifi ki ho ngutú!+
ʻOku haʻu ha tokotaha ʻo hangē ha ʻīkalé ki he fale ʻo Sihová,+
He kuo nau maumauʻi ʻa ʻeku fuakavá+ pea laka hala mei heʻeku laó.+
2 ʻOku nau tangi kiate au, ‘ʻE homau ʻOtua, ko kimautolu ʻIsilelí, ʻoku mau ʻiloʻi koe!’+
3 Kuo liʻaki ʻe ʻIsileli ʻa e meʻa ʻoku leleí.+
Tuku ke tuli ia ʻe he filí.
4 Kuo nau fakanofo ha ngaahi tuʻi, ka naʻe ʻikai fakafou ia ʻiate au.
Kuo nau fakanofo ha kau houʻeiki, ka naʻe ʻikai te u ʻiloʻi kinautolu.
5 Kuo talitekeʻi atu hoʻo ʻaitoli ʻuhikiʻi pulú, ʻe Samēlia.+
ʻOku ʻalu hake ʻa ʻeku ʻitá kiate kinautolu.+
Ko e hā hono fuoloa ʻa e ʻikai te nau malava ke fakamaʻa kinautolu mei he hiá ni?
6 He ko e haʻu ʻa e meʻá ni mei ʻIsileli.
Naʻe ngaohi ia ʻe ha tangata nima-meaʻa, pea ʻoku ʻikai ko e ʻOtuá ia;
Ko e ʻaitoli ʻuhikiʻi pulu ʻo Samēliá ʻe ʻai ke momo iiki.
ʻOku ʻikai ha vaʻa uite ʻe motuʻa ʻa hono fuá;+
ʻIlonga ha huli ʻe tupu mai heʻikai ke maʻu ai ha mahoaʻa.
Pea kapau ʻokú ne fua, ʻe folofua+ ia ʻe ha kau muli.*
8 ʻE folofua+ ʻa ʻIsileli ʻe he filí.
Ko eni te nau ʻi he lotolotonga ʻo e ngaahi puleʻangá,+
ʻO hangē ha poulu ʻoku ʻikai ʻaongá.
9 He kuo nau ʻalu hake ki ʻAsīlia,+ ʻo hangē ha ʻasi kaivao ʻoku taka tokotaha pē.
Kuo totongi ʻe ʻIfalemi ha kau fefine ke hoko ko honau ngaahi ʻofaʻanga.+
10 Neongo ʻoku nau totongiʻi mai ʻa e ngaahi ʻofaʻangá mei he ngaahi puleʻangá,
Te u fakatahatahaʻi kinautolu he taimí ni;
ʻE kamata ke nau faingataʻaʻia+ koeʻuhi ko e kavenga kuo hilifaki kiate kinautolu ʻe he tuʻí mo e kau houʻeikí.
11 He kuo fakalahi ʻe ʻIfalemi ʻa e ngaahi ʻōlita ke nau faiangahala+ ai.
Naʻe hoko ia ko ʻene ngaahi ʻōlita ki he faiangahalá.+
13 ʻOku nau fai ʻa e ngaahi feilaulau ko ha ngaahi meʻaʻofa kiate au, pea ʻoku nau kai ʻa e kakanó,
Ka ʻoku ʻikai leleiʻia ai ʻa Sihova.+
Ko eni te ne manatu ki heʻenau faihalá pea tautea kinautolu ʻi heʻenau ngaahi angahalá.+
14 Kuo fakangaloʻi ʻe ʻIsileli ʻa hono Tokotaha-Ngaohí+ pea kuo nau langa ha ngaahi temipale,+
Pea kuo fakalahi ʻe Siuta ʻa hono ngaahi kolo fakakolotaú.+
Ka te u tuku atu ha afi ki hono ngaahi koló,
Pea te ne keina ʻa e ngaahi taua ʻo e kolo taki taha.”+
9 “ʻOua te ke fiefia, ʻe ʻIsileli,+
ʻOua te ke fai ha fakafiefia ʻo hangē ko e ngaahi kakaí.
He ʻi he feʻauakí* kuó ke hē ai mei ho ʻOtuá.+
Kuó ke saiʻia ʻi he totongi ʻoku maʻu ʻi he feʻauaki kuó ke fai ʻi he ʻauʻauʻanga uite+ kotoa pē.
2 Ka ko e ʻauʻauʻanga uité mo e tataʻoʻanga uainé heʻikai ke maʻu ai ha meʻa ke nau kai,
Pea ʻe ʻosi ʻa ʻene uaine foʻoú.+
3 ʻE ʻikai ke hokohoko atu ʻenau nofo ʻi he fonua ʻo Sihová;+
ʻI hono kehé, ʻe foki ʻa ʻIfalemi ki ʻIsipite,
Pea te nau kai ʻi ʻAsīlia ʻa e meʻa ʻoku taʻemaʻá.+
4 Heʻikai te nau kei lilingi ha ngaahi feilaulau uaine kia Sihova;+
Heʻikai te ne hōifua ʻi heʻenau ngaahi feilaulaú.+
ʻOku nau hangē ko e mā ʻi he taimi ʻo e tengihiá;
Ko e faʻahinga kotoa ʻoku nau kai iá te nau ʻuliʻi kinautolu.
He ko ʻenau maá ʻoku maʻanautolu pē ia;
ʻE ʻikai ke ʻomi ia ki he fale ʻo Sihová.
5 Ko e hā te mou fai ʻi he ʻaho ʻo e fakatahá,*
ʻI he ʻaho ʻo e kātoanga ʻa Sihová?
6 He vakai, kuo pau ke nau hola koeʻuhí ko e fakaʻauhá.+
ʻE tānaki fakataha kinautolu ʻe ʻIsipite,+ pea ʻe tanu kinautolu+ ʻe Memifisi.
ʻE kāpui ʻe he talatalaʻāmoá ʻa ʻenau ngaahi meʻa siliva mahuʻingá,
Pea ʻe tupu ʻa e ʻakau talatalá ʻi honau ngaahi tēnití.
7 ʻE hoko mai ʻa e ngaahi ʻaho ʻo e fakamaau,+
ʻE hoko mai ʻa e ngaahi ʻaho ʻo e faitautea,
Pea ʻe ʻiloʻi ia ʻe ʻIsileli.
ʻE hoko ko ha vale ʻa ʻenau palōfitá, pea ko e tangata lea fakamānavaʻí te ne hoko ʻo sesele;
Koeʻuhí ko e lahi fau ʻa hoʻo faihalá, ʻoku lahi fau ai ʻa e tāufehiʻa kiate koé.”
8 Ko e tangata leʻo+ ʻo ʻIfalemí naʻe kau mo hoku ʻOtuá.+
Ka ko eni ko e ngaahi ʻalunga kotoa ʻo ʻene kau palōfitá+ ʻoku hangē ko e ngaahi tauhele ʻa ha tokotaha pō manupuná;
ʻOku ʻi ai ha tāufehiʻa ʻi he fale ʻo hono ʻOtuá.
9 Kuo nau kau lahi ʻi he meʻa ʻe iku ai ki heʻenau ʻauhá, ʻo hangē ko ia ʻi he ngaahi ʻaho ʻi Kīpeá.+
Te ne manatuʻi ʻa ʻenau faihalá pea fai ha tautea ʻi heʻenau ngaahi angahalá.+
10 “Naʻá ku maʻu ʻa ʻIsileli ʻo hangē ko ha ngaahi foʻi kālepi ʻi he toafá.+
Naʻá ku sio ki hoʻomou fanga kuí ʻo hangē ko e ʻuluaki ngaahi foʻi fiki tokamuʻá.
Ka naʻa nau ō kia Pēali ʻo Peolí;+
Naʻa nau fakatapui kinautolu ki he meʻa fakamā,*+
Pea naʻa nau hoko ʻo palakū hangē ko e meʻa ʻoku nau ʻofa ki aí.
11 ʻOku puna atu ʻa e lāngilangi ʻo ʻIfalemí ʻo hangē ha foʻi manupuná;
ʻOku ʻikai ha fāʻele, ʻikai ha feitama, pea ʻikai ha tuʻituʻia.+
12 Neongo kapau te nau tauhi hake ha fānau,
Te u ʻave kinautolu kae ʻoua kuo ʻikai ke toe ha tokotaha;+
ʻIo, ʻoiauē ka ko kinautolu ʻi heʻeku sītuʻa meiate kinautolú!+
13 Ko ʻIfalemi, naʻe hunuki ʻo tō ʻi ha kaikaiʻangá, naʻe hangē kiate au ko Tāiá;+
Ko eni kuo pau ke ʻomi ʻe ʻIfalemi ʻa hono ngaahi fohá ke tāmateʻi.”
14 ʻOange kiate kinautolu, ʻe Sihova, ʻa e meʻa ʻoku totonu ke ke ʻoange kiate kinautolú;
Ko ha manava ʻoku tamatō mo e ongo huhu kuo maha.*
15 “Ko ʻenau tōʻonga fulikivanú kotoa naʻe fai ʻi Kilikali,+ he naʻá ku fehiʻa ai ʻiate kinautolu.
Te u kapusi kinautolu mei hoku falé koeʻuhi ko ʻenau ngaahi ngāue koví.+
Heʻikai te u kei ʻofa ʻiate kinautolu;+
Ko ʻenau houʻeikí kotoa ʻoku nau anga-fefeka.
16 ʻE taaʻi ʻa ʻIfalemi.+
ʻE mōmoa ʻa honau aká, pea ʻe ʻikai te nau laku fua.
Neongo kapau te nau fāʻele, te u tāmateʻi ʻa ʻenau fānau ʻoku nau ʻofa aí.”
17 ʻE siʻaki kinautolu ʻe hoku ʻOtuá,
He kuo ʻikai te nau fanongo kiate ia,+
Pea te nau hoko ko e faʻahinga ʻoku hola holo ʻi he lotolotonga ʻo e ngaahi puleʻangá.+
10 “Ko ʻIsilelí ko ha fuʻu kālepi vao* ʻoku laku fua.+
Ko e lahi ange ʻa ʻene fuá, ko e lahi ange ai pē ia ʻa ʻene fakalahi ʻa hono ngaahi ʻōlitá;+
Ko e lelei ange ʻa e fua ʻi hono fonuá, ko e fakaʻofoʻofa ange ai pē ia ʻa ʻene ngaahi pou maka toputapú.+
ʻOku ʻi ai ha tokotaha te ne haveki ʻa honau ngaahi ʻōlitá pea fakaʻauha ʻa ʻenau ngaahi pou maka toputapú.
3 Pea te nau pehē, ‘ʻOku ʻikai hatau tuʻi,+ he kuo ʻikai te tau manavahē kia Sihova.
Pea ko e hā ʻe lava ke fai ʻe ha tuʻi kiate kitautolu?’
4 ʻOku nau leaʻaki ʻa e ngaahi lea ko e koto kulanoa, ʻo fai ʻa e ngaahi fakapapau loi,+ pea fai mo e ngaahi fuakava;
Ko ia ai, ko e fakamaau kiate kinautolú ʻoku hangē ia ha vao kona ʻi he ngaahi ngoue kuo palau.+
5 Ko e kau nofo ʻi Samēliá te nau manavahē koeʻuhi ko e ʻaitoli ʻuhikiʻi pulu ʻi Pete-ʻavení.+
ʻE tengihia ia ʻe hono kakaí,
Pea pehē ki hono kau taulaʻeiki ʻotua-muli naʻa nau fiefia ʻi he ʻaitolí pea ʻi hono lāngilangí,
He ʻe ʻave fakamālohi ia meiate kinautolu.
6 ʻE ʻave ia ki ʻAsīlia ko ha meʻaʻofa ki ha tuʻi lahi.+
ʻE fakamaaʻi ʻa ʻIfalemi,
Pea ʻe mā ʻa ʻIsileli koeʻuhi ko e faleʻi naʻe muimui ki aí.+
7 Ko Samēlia mo hono tuʻí kuo pau ke fakaʻauha,*+
ʻO hangē ko ha kiʻi vaʻa kuo mafesi ʻo tētē ʻi he fukahi vaí.
8 Ko e ngaahi potu māʻolunga ʻo Pete-ʻavení,+ ʻa ia ʻoku faiangahala ai ʻa ʻIsilelí,+ ʻe fakaʻauha ʻosi.+
ʻE tupu ʻa e talatala mo e talatalaʻāmoa ʻi honau ngaahi ʻōlitá.+
ʻE pehē ʻe he kakaí ki he ngaahi moʻungá, ‘ʻUfiʻufi kimautolu!’
Pea ki he ngaahi foʻi māʻolungá, ‘Holo mai kiate kimautolu!’+
9 Kuó ke faiangahala+ talu mei he ngaahi ʻaho ʻo e meʻa naʻe hoko ʻi Kīpeá, ʻe ʻIsileli.
Kuo nau kīvoi ai ʻi he tōʻonga tatau.
Naʻe ʻikai ke maʻu* ʻi he taú ʻa e ngaahi foha ʻo e taʻemāʻoniʻoni ʻi Kīpeá.
10 Te u akonakiʻi foki kinautolu ʻi heʻeku faʻiteliha.
Pea ʻe fakatahataha ʻa e ngaahi kakaí ʻo fakafepaki kiate kinautolu,
ʻI he taimi ʻe haʻisia ai kinautolu ki heʻenau ongo faihalá.*
11 Ko ʻIfalemí ko ha kiʻi pulu fefine kuo akoʻi ʻa ia naʻe manako ʻi he ʻauʻau uité,
Ko ia naʻá ku fakahaofi ʻa hono kia fakaʻofoʻofá.
Ko eni te u ʻai ke heka ha taha ʻi* ʻIfalemi.+
ʻE fai ʻe Siuta ʻa e palaú; ʻe fakamolū kelekele ʻa Sēkope ki he tokotaha ʻoku heká.
12 Tūtuuʻi ʻa e tenga maʻamoutolu ʻi he māʻoniʻoni pea utu ʻa e ʻofa mateakí.
Palau maʻamoutolu ha konga kelekele ʻoku feʻunga ki he ngoué+
Lolotonga ʻoku kei ʻi ai ʻa e taimi ke kumi kia Sihová,+
Kae ʻoua kuó ne hāʻele mai ʻo fakahinohinoʻi kimoutolu ʻi he māʻoniʻoni.+
13 Ka kuo mou tūtuuʻi* ʻa e fulikivanú,
Kuo mou utu ʻa e taʻemāʻoniʻoní,+
Pea kuo mou kai ʻa e fua ʻo e kākaá;
He kuó ke falala ki hoʻo founga pē ʻaʻaú,
ʻI he tokolahi ʻa hoʻo kau taú.
14 ʻE hoko ha fuʻu longoaʻa ki ho kakaí,
Pea ko ho ngaahi kolo fakakolotaú ʻe fakaʻauha kotoa,+
ʻO hangē ko e fakaʻauha ʻe Salemani ʻa e fale ʻo ʻĀpelá,
ʻI he ʻaho ʻo e taú ʻi hono haveki ʻa e ngaahi faʻeé ʻi he tafaʻaki ʻo ʻenau fānaú.
15 Ko e meʻa eni ʻe fai kiate kimoutolú, ʻe Pēteli,+ koeʻuhí ko hoʻomou mātuʻaki fulikivanú.
Ko e moʻoni ʻe fakaʻauha*+ ʻa e tuʻi ʻo ʻIsilelí ʻi he mafoa ʻa e atá.”
11 “ʻI he kei tamasiʻi ʻa ʻIsilelí, naʻá ku ʻofa ʻiate ia,+
Pea naʻá ku ui mai ʻa hoku fohá+ mei ʻIsipite.
Naʻa nau hanganaki faifeilaulau ki he ngaahi ʻīmisi Pēalí+
Pea fai ʻa e ngaahi feilaulau ki he ngaahi ʻīmisi kuo tongi.+
3 Ka ko au naʻá ku akoʻi ʻa ʻIfalemi ke luelué,+ ʻo puke kinautolu ʻi hoku nimá;+
Pea naʻe ʻikai te nau ʻiloʻi naʻá ku fakamoʻui kinautolu.
4 Naʻá ku ngāueʻaki ʻa e ʻofá mo e anga-leleí ʻo hangē ha afó*+ ke fusi mai ʻaki kinautolu kiate au;
Pea naʻá ku hangē kiate kinautolu ha taha ʻokú ne hiki ha ʻioke mei honau kiá,*
Pea naʻá ku ʻoange fakaalaala ha meʻakai ki he tokotaha taki taha.
5 Heʻikai te nau foki ki he fonua ko ʻIsipité, ka ʻe hoko ʻa ʻAsīlia ko honau tuʻi,+
Koeʻuhí naʻa nau fakafisi ke foki mai kiate au.+
6 Pea ʻe vilovilo atu ha heletā ki hono ngaahi koló+
ʻO ne fakaʻauha ʻa e ngaahi meʻa fakamaʻu ʻo e ngaahi matapā ʻo e koló mo keina kinautolu koeʻuhí ko ʻenau ngaahi faʻufaʻú.+
7 ʻOku hehema ʻa hoku kakaí ke taʻefaitōnunga mai kiate au.+
Neongo ʻenau ui kiate kinautolu ke nau hanga haké,* ʻoku ʻikai ke mālanga hake ha taha ia.
8 ʻE lava fēfē ke u siʻaki koe, ʻe ʻIfalemi?+
ʻE lava fēfē ke u tuku ange atu koe, ʻe ʻIsileli?
ʻE lava fēfē ke u ʻai koe ke ke hangē ko ʻĀtimá?
ʻE lava fēfē ke u ʻai koe ke ke hangē ko Sipoimí?+
9 Heʻikai te u tuku ange atu ʻa ʻeku ʻita kakahá.
Heʻikai te u toe fakaʻauha ʻa ʻIfalemi,+
He ko e ʻOtua au ʻo ʻikai ko ha tangata,
Ko e Tokotaha Māʻoniʻoni ʻi ho lotolotongá;
Pea heʻikai te u ʻalu atu kiate koe ʻi heʻeku tuputāmakí.
10 Te nau muimui ʻia Sihova, pea te ne ngungulu ʻo hangē ha laioné;+
ʻI heʻene ngungulú, ʻe haʻu tetetete ai ʻene fānaú mei he hihifó.+
11 Te nau tetetete ʻo hangē ha manupuná ʻi heʻenau haʻu mei ʻIsipité,
Hangē ha lupe ʻoku haʻu mei he fonua ko ʻAsīliá;+
Pea te u ʻai kinautolu ke nau nofo ʻi honau ngaahi falé,” ko e fakahaaʻi ia ʻe Sihová.+
12 “Kuo kāpui au ʻe ʻIfalemi ʻaki ʻa e loí,
Pea ʻaki ʻa e kākaá+ ʻe he fale ʻo ʻIsilelí.
Ka ko Siuta ʻokú ne kei ʻalu fano holo* pē mo e ʻOtuá,
Pea ʻokú ne faitōnunga ki he Tokotaha Fungani Māʻoniʻoní.”+
12 “Ko ʻIfalemí ʻoku kai matangi.
ʻOkú ne tulimui ʻi he matangi hahaké ʻi he ʻahó kotoa.
ʻOkú ne fakalahi ʻa e loí mo e fakamālohí.
ʻOkú ne fai ha fuakava mo ʻAsīlia+ pea ʻave ʻa e lolo ki ʻIsipite.+
2 ʻOku ʻi ai ha meʻa ke fakamāuʻi ai ʻe Sihova ʻa Siuta;+
Te ne kounaʻi ha fakamatala ke fai ʻe Sēkope ʻo fakatatau ki hono ngaahi ʻalungá,
Pea te ne totongi kiate ia ʻo fakatatau ki heʻene ngaahi ngāué.+
3 Naʻá ne puke ʻi manava ʻa e muivaʻe ʻo hono tokouá,+
Pea naʻá ne fefaʻuhi mo e ʻOtuá+ ʻaki hono mālohí.
4 Naʻá ne hanganaki fefaʻuhi mo ha ʻāngelo peá ne mālohi.
Naʻá ne tangi peá ne kōlenga ki ha tāpuaki.”+
Naʻe ʻilo ia ʻe he ʻOtuá ʻi Pēteli, pea naʻá Ne folofola mai ai ʻo fekauʻaki mo kitautolu,+
5 ʻA Sihova ko e ʻOtua ʻo e ngaahi kau taú,+
6 “Ko ia ai, foki ki ho ʻOtuá,+
Tauhi maʻu ʻa e ʻofa mateakí mo e fakamaau totonú,+
Pea nofo ʻamanaki maʻu pē ki ho ʻOtuá.
7 Ka ʻoku ʻi he nima ʻo e tangata fefakatauʻakí* ʻa e ngaahi meʻafua kākā;
ʻOkú ne manako ʻi he kākaá.+
Pea heʻikai te nau maʻu ha meʻa ʻoku hala pe ko ha faihala ʻi heʻeku ngāué hono kotoa.’
9 Ka ko au Sihova ko ho ʻOtua talu mei he fonua ko ʻIsipité.+
Te u toe ʻai koe ke ke nofo ʻi he ngaahi tēniti
ʻO hangē ko ia ʻi he ngaahi ʻaho ʻo ha taimi kotofá.*
10 Naʻá ku lea ki he kau palōfitá,+
Naʻá ku fakalahi ʻa ʻenau ngaahi vīsoné,
Pea naʻá ku leaʻaki ha ngaahi talanoa fakatātā fakafou ʻi he kau palōfitá.
11 Kuo ʻi ai ʻa e kākā*+ mo e loi ʻi Kiliati.
Kuo nau feilaulauʻi ʻa e fanga pulu+ ʻi Kilikali,
Pea ko honau ngaahi ʻōlitá ʻoku hangē ha ngaahi fokotuʻunga maka ʻi he ngoue kuo palaú.+
12 Naʻe hola ʻa Sēkope ki he vahefonua* ʻo ʻĒlamí;*+
Naʻe ngāue ai ʻa ʻIsileli+ ke maʻu hano uaifi,+
Pea ke maʻu hano uaifí, naʻá ne leʻohi ʻa e fanga sipí.+
13 Naʻe ʻomi ʻe Sihova ʻa ʻIsileli mei ʻIsipite fakafou ʻi ha palōfita,+
Pea naʻá Ne leʻohi+ ia fakafou ʻi ha palōfita.
14 Kuo fakatupunga ʻe ʻIfalemi ʻa e ʻita lahi;+
ʻOkú ne kei halaia pē ʻi he totó;
ʻE totongi fakafoki ʻe hono ʻEikí kiate ia ʻa e fakamā+ naʻá ne fakatupungá.”
13 “ʻI he taimi naʻe lea ai ʻa ʻIfalemí, naʻe tetetete ʻa e kakaí;
Naʻá ne tuʻu-ki-muʻa ʻi ʻIsileli.+
Ka naʻá ne hoko ʻo halaia ʻi heʻene kaunga ki he lotu Pēalí+ peá ne mate ai.
2 Ko eni ʻoku nau fakalahi ʻenau angahalá
Pea ngaohi ʻa e ngaahi ʻīmisi mētale* mei heʻenau silivá;+
ʻOku nau ngaohi pōtoʻi ʻa e ngaahi ʻaitolí, ko e ngāue kotoa ʻa e kau tangata nima-meaʻá.
ʻOku nau pehē ki he ngaahi ʻaitolí, ‘Tuku ʻa e kau tangata ʻoku faifeilaulaú ke nau ʻuma ki he fanga kiʻi ʻuhikiʻi pulú.’+
3 Ko ia te nau hoko ʻo hangē ko e ngaahi ʻao ʻi he pongipongí,
Hangē ko e hahau ʻoku vave ʻene mole atú,
Hangē ko e kafukafu ʻoku puhiʻi atu ʻe ha afā mei he ʻauʻauʻanga uité,
Pea hangē ha kohu ʻoku ʻalu hake ʻi ha foʻi ava ʻi he ʻató.
4 Ka ko Sihova au ko ho ʻOtuá talu mei he fonua ko ʻIsipité;+
Naʻe ʻikai ke ke ʻilo ha ʻOtua ka ko au pē,
Pea ka ʻikai au ʻoku ʻikai ha fakamoʻui.+
5 Naʻá ku ʻilo koe ʻi he toafá,+ ʻi he fonua pakukaá.
6 Naʻa nau mākona ʻi heʻenau ngaahi kaikaiʻangá,+
Naʻa nau mākona pea nau hoko ai ʻo loto-pōlepole.
Pea naʻa nau fakangaloʻi ai au.+
7 Te u hoko ʻo hangē ha laione muí kiate kinautolu,+
Hangē ha lēpati ʻokú ne toitoi ʻi he halá.
8 Te u ʻalu atu kiate kinautolu ʻo hangē ha pea kuo mole ʻa hono ʻuhikí,
Pea te u fahi ua ʻa honau fatafatá.*
ʻI he hangē ha laioné te u keina kinautolu ʻi ai;
ʻE haehae kinautolu ʻe ha manu fekai ʻo e vaó.
9 Te ne fakaʻauha koe, ʻe ʻIsileli,
Koeʻuhi he naʻá ke fakafepaki kiate au, pea ki ho tokoní.
10 Ko fē leva, ʻa ho tuʻí, ke ne fakahaofi koe ʻi he kotoa ho ngaahi koló,+
Pea mo ho kau pulé,* ʻa ia naʻá ke pehē mai ai,
‘ʻOmi kiate au ha tuʻi mo ha kau houʻeiki’?+
12 Kuo kofukofu* ʻa e faihala ʻa ʻIfalemí;
Kuo tuku tauhi ʻa ʻene angahalá.
13 ʻE hoko kiate ia ʻa e langa mamahi ʻo e fāʻelé.
Ka ko ha kiʻi tama taʻefakapotopoto ia;
ʻI he taimi ke fanauʻi aí ʻoku ʻikai te ne loto ke ne haʻu ki tuʻa.
ʻE Mate, ko fē hoʻo huhu koná?+
ʻE Faʻitoka, ko fē hoʻo fakaʻauhá?+
ʻE puli mei hoku fofongá ʻa e manavaʻofá.
15 Neongo kapau te ne tupu ʻāfaʻafa ʻi he lotolotonga ʻo e ngaahi kahó,
ʻE haʻu ha matangi mei he hahaké, ʻa e matangi ʻa Sihová,
ʻE haʻu ia mei he toafá, ke ne ʻai ke pakupaku ʻa ʻene vaitupú mo ʻai ke maha ʻa ʻene matavaí.
ʻE puke fakamālohi ʻe he tokotaha ko iá ʻa e tukuʻanga koloa ʻoku ʻi ai ʻene ngaahi meʻa mahuʻingá+ kotoa.
16 ʻE halaia ʻa Samēlia,+ he kuó ne angatuʻu ki hono ʻOtuá.+
Te nau tō ʻi he heletā,
Ko ʻenau fānaú ʻe haveki ke lailai,+
Pea ko ʻenau kau fefine feitamá ʻe fahi ua.”
14 “Foki kia Sihova ko ho ʻOtuá, ʻe ʻIsileli,+
He kuó ke humu koeʻuhí ko hoʻo faihalá.
2 Foki kia Sihova peá ke fai ʻa e ngaahi leá ni,
Lea kiate ia, ‘ʻOfa ke ke fakamolemoleʻi ʻemau faihalá+ peá ke tali muʻa ʻa e meʻa ʻoku lelei meiate kimautolú,
Pea te mau ʻoatu ʻa e fakahīkihiki ʻaki ʻa homau loungutú+ ʻo hangē ko haʻamau ʻoatu ha fanga kiʻi pulu tangatá.*
3 ʻE ʻikai fakahaofi kimautolu ʻe ʻAsīlia.+
Heʻikai te mau heka ʻi ha fanga hoosi,+
Pea heʻikai te mau toe pehē ki he ngāue ʻa homau nimá, “Ko homau ʻOtuá koe!”
He ko koe ʻokú ke fakahāhā ʻa e meesi ki he kiʻi tama tamai-maté.’+
4 Te u fakamoʻui kinautolu pea heʻikai te nau toe taʻefaitōnunga.+
Te u ʻofa kiate kinautolu ʻi heʻeku loto-lelei pē ki ai,+
Koeʻuhí he kuo foki ʻa ʻeku ʻitá meiate ia.+
5 Te u hoko ʻo hangē ko e hahaú ki ʻIsileli;
Te ne matala ʻo hangē ko e lilé
Pea te ne faiaka ʻo hangē ko e ʻuluʻakau ʻo Lepanoní.
6 ʻE mafola atu hono ngaahi vaʻá,
Ko hono lāngilangí ʻe hangē ko e lāngilangi ʻo ha fuʻu ʻōlivé,
Pea ko hono ʻalahá ʻe hangē ko e fuʻu ʻakau ʻo Lepanoní.
7 Te nau toe nofo ʻi hono malumalú.
Te nau tō uite pea te nau fisi ʻo hangē ko e kālepí.+
Ko hono ongoongó* ʻe hangē ko e uaine ʻo Lepanoní.
8 ʻE pehē ʻe ʻIfalemi, ‘Ko e hā haʻaku kei kaunga ki he ngaahi ʻaitolí?’+
Te u fai ha tali kiate ia mo leʻohi ia.+
Te u hangē ha fuʻu siunipa tupu ʻāfaʻafá.
Ko au ʻa e tokotaha te u ʻoatu kiate koe ʻa e fuá.”
9 Ko hai ia ʻoku potó? Tuku ke ne mahinoʻi ʻa e ngaahi meʻá ni.
Ko hai ia ʻoku fakapotopotó? Tuku ke ne ʻiloʻi ia.
He ko e ngaahi ʻalunga ʻo Sihová ʻoku totonu,+
Pea ko e māʻoniʻoní te ne ʻaʻeva ai;
Ka ko e kau faihalá te nau tūkia ai.
Ko e fakanounou ia ʻo e Hōsaiá, ʻa ia ʻoku ʻuhingá “Naʻe Fakahaofi ʻe Iā; Kuo Fakahaofi ʻe Iā.”
Pe “ʻulungaanga taʻetaau; fakaʻaluʻalu.”
Pe “ʻulungaanga taʻetāú; fakaʻaluʻalú.”
Pe “ʻulungaanga taʻetāú; fakaʻaluʻalú.”
ʻOku ʻuhingá “ʻE Tūtuuʻi ʻe he ʻOtuá ʻa e Tenga.”
Pe “Talalo.”
ʻOku ʻuhingá “Naʻe ʻIkai Fakahaaʻi ha Meesi.”
ʻOku ʻuhingá “ʻOku ʻIkai ko Hoku Kakai.”
Fakafoʻilea, “ngaahi foha.”
Sio ki he fakamatala ʻi lalo ʻi he Hōs 1:9.
Sio ki he fakamatala ʻi lalo ʻi he Hōs 1:6.
Pe “ʻulungaanga taʻetāú; fakaʻaluʻalú.”
Fakafoʻilea, “Pea mo ʻene tonó mei he vahaʻa ʻo hono huhú.”
Pe “ʻulungaanga taʻetaau; fakaʻaluʻalu.”
Pe “kuó ne fai ʻa e ʻulungaanga taʻetaau (fakaʻaluʻalu).”
Sio ki he Lea mo Hono ʻUhinga.
Pe “Talalo.”
Pe “ko ʻEku Pēali.”
Pe “tuku kinautolu ke nau moʻui.”
ʻOku ʻuhingá “ʻE Tūtuuʻi ʻe he ʻOtuá ʻa e Tenga.”
Sio ki he fakamatala ʻi lalo ʻi he Hōs 1:6.
Sio ki he fakamatala ʻi lalo ʻi he Hōs 1:9.
ʻOku ʻuhinga eni ki he kālepi tauaki kuo fakafuo ʻo hangē ha keké. ʻA ia, naʻe ngāueʻaki ʻi he lotu loí.
Ko ha homa naʻe tatau ia mo e lita ʻe 220 (kuata ʻe 200 ʻi he fua mōmoá). Sio ki he Fakamatala Fakalahi E14.
Pe “fai ʻa e ʻulungaanga taʻetaau (fakaʻaluʻalu).”
Pe “fehokotaki fakasino.”
Pe “heʻikai te u mohe mo koe.”
Fakafoʻilea, “ngaahi ʻaho lahi.”
Pe “ngaahi ʻotua ʻo e fāmilí; ngaahi ʻaitoli.”
Pe “fakaʻauha.”
Pe “fakaʻauha.”
Pe “fakahinohino.”
Pe ngalingali, “Kuo nau fakafetongi ʻa hoku lāngilangí ʻaki ʻa e tuʻunga fakamā.”
ʻA ia, ʻi he ngaahi feilaulau kuo pau ke nau foaki koeʻuhi ko ʻenau ngaahi angahalá.
Pe “mātuʻaki ʻulungaanga taʻetaau; faifeʻauaki.”
Pe “ʻulungaanga taʻetāú; fakaʻaluʻalú.”
Fakafoʻilea, “Te nau toʻo ʻa e lotó.”
Pe “ʻe he vaʻakau ʻa ʻenau tokotaha vavaló.”
Pe “ʻulungaanga taʻetāú; fakaʻaluʻalú.”
Pe “ʻulungaanga taʻetāú; fakaʻaluʻalú.”
Ko ha fuʻu ʻakau matala fakaʻofoʻofa mo namu-kakala.
Pe “ʻulungaanga taʻetaau; fakaʻaluʻalu.”
Pe “ʻulungaanga taʻetāú; fakaʻaluʻalú.”
Pe “ʻulungaanga taʻetāú; fakaʻaluʻalú.”
Fakafoʻilea, “feituʻu ʻatāloá?”
Pe “pia uité.”
Pe “mātuʻaki ʻulungaanga taʻetaau; faifeʻauaki.”
Fakafoʻilea, “ko ʻene ngaahi paá.”
Pe “tafiʻi atu.”
Pe “ko e kau angatuʻú.”
Pe “te u fai ha akonaki.”
Pe “fai ʻa e ʻulungaanga taʻetaau; faifeʻauaki.”
Pe “ʻulungaanga taʻetaau; fakaʻaluʻalu.”
Fakafoʻilea, “ʻa hono matá.”
Pe “ʻenau ngaahi ngoué.”
Fakafoʻilea, “hoku fofongá.”
Pe “ʻi he faimēsí.”
Pe ngalingali, “He ko honau lotó ʻoku hangē ha ʻōvaní ʻi heʻenau ʻunuʻunu mai mo ʻenau ngaahi faʻufaʻu fakafufuú.”
Fakafoʻilea, “kau fakamāú.”
Fakafoʻilea, “ʻo ʻikai hano lotó.”
ʻA ia, kae ʻikai ki ha founga lotu māʻolunga ange.
Pe “sola.”
Pe “fakahinohino.”
Pe ngalingali, “Te nau toe foki.”
Pe “ʻulungaanga taʻetāú; fakaʻaluʻalú.”
Pe “ʻi hoʻomou kātoanga tuʻutuʻuní.”
Pe “ʻotua fakamā.”
Pe “mingi.”
Pe ngalingali, “ʻoku mafola atu.”
Pe “fakahekeheke; momole-ʻolunga.”
Fakafoʻilea, “fakasīlongoʻi.”
Pe “fakaʻauha fakaʻaufuli.”
ʻA ia, ʻi heʻenau fua honau tauteá ʻo hangē ha ʻioké.
Pe “te u fakapiti ʻa.”
Fakafoʻilea, “palau.”
Fakafoʻilea, “fakasīlongoʻi.”
ʻA ia, ko e kau palōfitá mo e niʻihi kehe naʻe fekauʻi atu ke nau fakahinohinoʻi ʻa ʻIsilelí.
Ngalingali ko ha afo naʻe ngāueʻaki ʻe ha mātuʻa ke akoʻiʻaki ʻene kiʻi tamá ke luelue.
Fakafoʻilea, “hangē ha faʻahinga ʻoku nau hiki ha ʻioke mei honau kaungaó.”
ʻA ia, ki ha founga lotu māʻolunga ange.
Fakafoʻilea, “kuo hoko ʻo mafana.”
Pe “ʻaʻeva.”
Pe “ʻa e huafa ʻoku manatua ai iá.”
Pe “ʻo e mēsianití.”
Pe ngalingali, “ʻo ha kātoangá.”
Pe “meʻa fakafaʻahikehe; meʻa fakafaimana.”
Fakafoʻilea, “ngoue.”
Pe “Sīliá.”
Pe “ngaahi ʻīmisi mētale kuo haka.”
Fakafoʻilea, “ʻa e kofu ʻo honau mafú.”
Fakafoʻilea, “kau fakamāú.”
Pe “fakatolonga.”
Pe “ʻo Seolí,” ʻa ia, ko e faʻitoka anga-maheni ʻo e faʻahinga ʻo e tangatá. Sio ki he Lea mo Hono ʻUhinga.
Fakafoʻilea, “ʻoatu leva ʻa e fanga kiʻi pulu tangata ko homau loungutú.”
Fakafoʻilea, “fakamanatú.”