SIOELI
1 Ko e folofola eni ʻa Sihova naʻe hoko kia Sioeli* ko e foha ʻo Petuelá:
2 “Fanongo ki he meʻá ni, ʻa kimoutolu kau mātuʻá,
Pea tokanga mai, ʻa kimoutolu kotoa kakai ʻo e fonuá.*
Kuo ʻi ai ha meʻa peheni kuo hoko ʻi homou ngaahi ʻahó
Pe ʻi he ngaahi ʻaho ʻo hoʻomou fanga kuí?+
3 Tala ia ki homou ngaahi fohá,
Pea tuku ki homou ngaahi fohá ke nau tala ia ki honau ngaahi fohá,
Pea ko honau ngaahi fohá ki he toʻutangata hono hokó.
4 Ko e meʻa naʻe fakatoe ʻe he heʻe fakaʻauhá, kuo kai ia ʻe he pupunga heʻé;+
Pea ko e meʻa naʻe fakatoe ʻe he pupunga heʻé, kuo kai ia ʻe he heʻe taʻekapakaú;
Pea ko e meʻa naʻe fakatoe ʻe he heʻe taʻekapakaú, kuo kai ia ʻe he heʻe maumaú.+
5 ʻĀ hake, ʻa kimoutolu kau konā,+ pea tangi!
Tangilāulau, ʻa kimoutolu kotoa kau inu uainé,
Koeʻuhí he kuo toʻo ʻa e uaine melié mei homou ngutú.+
6 He kuo ʻalu hake ha puleʻanga ki hoku fonuá, ʻoku mālohi mo taʻefaʻalaua.+
Ko hono nifó ko e nifo ʻo ha laione+ pea ko hono kaungaó ko e kaungao ʻo ha laione.
7 Kuó ne fakaʻauha ʻa ʻeku kālepí pea ʻai ʻa ʻeku fuʻu fikí ko ha tungaʻiʻakau,
ʻO fohi kakato kinaua pea laku,
ʻO ʻikai toe ha kili ʻi hono ngaahi vaʻá.
8 Tangilāulau ʻo hangē ha fefine kei nofo anga-maʻa* ʻoku ʻai tauangaʻa
ʻI he mole ʻa e tangata mali* ʻo ʻene kei finemuí.
9 Kuo ʻikai ke toe fai ha feilaulau meʻakai*+ mo e feilaulau inu+ ʻi he fale ʻo Sihová;
Ko e kau taulaʻeikí, ʻa e kau faifatongia kia Sihová, ʻoku nau mamahi.
10 Kuo fakaʻauha ʻa e ngoué, ʻoku fakamamahi ʻa e kelekelé;+
He ko e uité kuo fakaʻauha, kuo ʻikai ke toe ha uaine foʻou, kuo ʻosi ʻa e loló.+
11 ʻOku ongoʻi mā ʻa e kau ngoué, ʻoku tangilāulau ʻa e kau tauhi ngoue kālepí,
Koeʻuhí ko e uité mo e paʻalé;
He kuo ʻauha ʻa e utu-taʻu ʻo e ngoué.
12 Kuo mōmoa ʻa e kālepí,
Kuo mate ʻa e fikí.
Ko e pomikānité, ko e pāmé, mo e ʻāpelé,
ʻA e ʻuluʻakau kotoa ʻo e ngoué kuo mōmoa;+
He kuo liliu ʻa e fiefiá ko e meʻa fakamā ʻi he lotolotonga ʻo e kakaí.
13 Mou ʻai tauangaʻa* pea fakamamahi,* ʻa kimoutolu kau taulaʻeikí;
Tangilāulau, ʻa kimoutolu kau faifatongia ʻi he ʻōlitá.+
Mou omi pea ʻai tauangaʻa ʻi ha pō kakato, ʻa kimoutolu kau faifatongia ki hoku ʻOtuá;
He ko e feilaulau meʻakaí+ mo e feilaulau inú+ kuo taʻofi ia mei he fale ʻo homou ʻOtuá.
14 Fanongonongo* ha ʻaukai; ui ha fuʻu fakataha makehe.+
Fakatahatahaʻi mai ʻa e kau mātuʻá, mo e kakai kotoa ʻo e fonuá,
Ki he fale ʻo Sihova ko homou ʻOtuá,+ pea tangi kia Sihova ki ha tokoni.
15 ʻOiauē koeʻuhi ko e ʻaho ko iá!
He ko e ʻaho ʻo Sihová ʻoku ofi,+
Pea ʻe hoko mai ia ʻo hangē ha fakaʻauha mei he Māfimafi-Aoniú!
16 ʻIkai kuo ʻave ʻa e meʻakaí ʻi muʻa ʻi hotau matá tonu,
Pea ʻave ʻa e fiefiá mo e mavavá mei he fale ʻo hotau ʻOtuá?
17 Naʻa mo e fiki mōmoá ʻoku taʻeʻaonga.
ʻOku halaʻatā ha meʻa ʻi he ngaahi feleokó.
Ko e ngaahi fale tukuʻanga koloá kuo holoki, he kuo mōmoa ʻa e uité.
18 Naʻa mo e fanga monumanú ʻoku nau toʻe!
ʻOku hē holo ʻa e fanga pulú ʻi he puputuʻu, he kuo ʻikai hanau kaikaiʻanga!
Pea ko e tākanga sipí ʻoku nau fua ʻa e tauteá.
19 Te u ui kiate koe, ʻe Sihova;+
He kuo keina ʻe he afí ʻa e ngaahi kaikaiʻanga ʻo e toafá,
Pea kuo keina ʻe ha uloʻi afi ʻa e ʻuluʻakau kotoa ʻo e ngoué.
20 Naʻa mo e fanga manu fekaí ʻoku nau fakaʻamu atu kiate koe,
Koeʻuhí kuo mōmoa ʻa e ngaahi matavaí
Pea kuo keina ʻe he afí ʻa e ngaahi kaikaiʻanga ʻo e toafá.”
2 “Ifi ha meʻaifi ʻi Saione!+
Kailaʻaki ha kaila ʻo e tau ʻi hoku moʻunga tapú.
Tuku ke tetetete ʻa e kakai kotoa ʻo e fonuá,*
He ʻoku hoko mai ʻa e ʻaho ʻo Sihová!+ ʻOku ofi mai ia!
2 Ko ha ʻaho ia ʻo e fakapoʻuli mo e kaupōʻuli,+
Ko ha ʻaho ia ʻo e ʻaoʻaofia mo e poʻuli matolu,+
Hangē ko e mafola ʻa e maama ʻo e mafoa ʻa e atá ʻi he ngaahi moʻungá.
ʻOku ʻi ai ha kakai tokolahi fau mo mālohi;+
Kuo ʻikai ʻaupito ke ʻi ai ha fuʻu kakai hangē ko iá ki muʻa,
Pea heʻikai ʻaupito ke toe ʻi ai ha fuʻu kakai pehē
ʻI he toʻutangata ki he toʻutangata.
3 ʻOku keina ʻe ha afi ʻa e meʻa kotoa ʻoku ʻi muʻa ʻiate kinautolú,
Pea ʻoku keina ʻe ha uloʻi afi+ ʻa e meʻa kotoa ʻi mui ʻiate kinautolú.
Ko e fonua ʻi muʻa ʻiate kinautolú ʻoku hangē ko e ngoue ʻo ʻĪtení,+
Ka ʻoku ʻi mui ʻiate kinautolu ha toafa maomaonganoa,
Pea ʻe ʻikai ha meʻa ʻe lava ke hao.
4 Ko honau fōtungá ʻoku hangē ko e fōtunga ʻo ha fanga hōsí,
Pea ʻoku nau lele ʻo hangē ko ha fanga hoosi ki he taú.+
5 ʻOku ongo mai ia ʻo hangē ko ha ngaahi salioté ʻi heʻenau mahiki ʻi he ngaahi funga moʻungá,+
Hangē ha pākakihi ʻa ha afi kakaha ʻokú ne keina ʻa e mohukú.
ʻOku hangē ia ha kakai toʻa ʻoku nau fakatē atu ki he taú.+
6 ʻE mamahi ʻa e ngaahi kakaí, koeʻuhí ko kinautolu.
ʻE hā ʻa e manavahē ʻi he mata kotoa pē.
7 ʻOku nau ʻoho ʻo hangē ha kau pāteʻi taú,
ʻOku nau kaka ʻi he ʻaá ʻo hangē ha kau sōtiá,
ʻOku nau ʻalu taki taha ʻi hono ʻalunga,
Pea ʻoku ʻikai te nau afe mei honau ngaahi halá.
8 ʻOku ʻikai te nau fetēkeaki;
ʻOku ʻalu atu ʻa e tangata taki taha ʻi hono ʻalunga.
Kapau ʻoku ʻai ʻe he meʻataú* ha niʻihi ke nau tō,
ʻOku ʻikai mavahe ʻa e niʻihi kehé mei honau tuʻungá.
9 ʻOku nau fakavave ki he loto koló, ʻoku nau lele ʻi he ʻaá.
ʻOku nau kaka ki he ngaahi falé, ʻoku nau hū atu ʻi he matapā-teké ʻo hangē ko ha kaihaʻá.
10 ʻOku tetetete ʻa e fonuá ʻi honau ʻaó pea ʻoku ngalulu ʻa e ngaahi langí.
Kuo hoko ʻa e laʻaá mo e māhiná ʻo fakapoʻuli,+
Pea kuo mole ʻa e ngingila ʻo e ngaahi fetuʻú.
11 ʻE hiki hake ʻe Sihova ʻa hono leʻó ʻi he ʻao ʻo ʻene kau taú,+ he ʻoku tokolahi ʻaupito+ ʻa ʻene ʻapitangá.
He ko e tokotaha ʻokú ne fakahoko ʻa ʻEne folofolá ʻoku mālohi;
ʻIo, ʻoku lahi mo fakamanavahē+ ʻa e ʻaho ʻo Sihová.
Ko hai ʻe lava ke ne matuʻuaki ia?”+
12 “Neongo ia, naʻa mo e taimí ni,” ko e fakahaaʻi ia ʻe Sihová, “mou foki mai kiate au ʻaki homou lotó kotoa,+
ʻI he ʻaukai+ mo e tangi pea mo e tangilāulau.
13 Mou hae homou lotó,+ ʻo ʻikai ko homou kofú,+
Pea foki kia Sihova ko homou ʻOtuá,
He ʻokú ne manavaʻofa* mo mohu meesi, tuai ki he houhau+ pea fonu ʻi he ʻofa mateaki,+
Pea te ne toe fakakaukauʻi ʻa e* malá.
14 Ko hai ʻokú ne ʻiloʻi pe te ne foki ʻo toe fakakaukauʻi*+
Pea tuku mai ha tāpuaki kiate kimoutolu,
Koeʻuhí ke mou foaki ha feilaulau meʻakai mo ha feilaulau inu kia Sihova ko homou ʻOtuá?
15 Ifi ha meʻaifi ʻi Saione!
Fanongonongo* ha ʻaukai; ui ha fuʻu fakataha makehe.+
16 Fakatahatahaʻi ʻa e kakaí; fakamāʻoniʻoniʻi ʻa e fakatahaʻangá.+
Tānaki mai ʻa e kau tangata taʻumotuʻá;* fakatahatahaʻi mai ʻa e fānaú mo e kau valevale kei huhú.+
Tuku ke ʻalu atu ʻa e tangata malí mei hono lokí, pea mo e taʻahine malí mei hono loki mohé.
17 ʻI he vahaʻa ʻo e fale-hūʻangá mo e ʻōlitá+
Tuku ke tangi ai ʻa e kau taulaʻeikí, ʻa e kau faifatongia kia Sihová, ʻo pehē:
‘Ke ke fakaʻofaʻia muʻa, ʻe Sihova, ki ho kakaí;
ʻOua naʻá ke ʻai ho tofiʻá ke hoko ko ha lumaʻanga,
ʻI hono tuku ke puleʻi kinautolu ʻe he ngaahi puleʻangá.
Ko e hā ke pehē ai ʻe he ngaahi kakaí, “Ko fē ʻa honau ʻOtuá?”’+
19 ʻE fai ʻe Sihova ha tali ki hono kakaí:
‘Ko eni ʻoku ou ʻoatu kiate kimoutolu ʻa e uite mo e uaine foʻou pea mo e lolo,
Pea te mou mātuʻaki mākona;+
Heʻikai te u toe ʻai kimoutolu ko ha lumaʻanga ʻi he lotolotonga ʻo e ngaahi puleʻangá.+
20 Te u kapusi ke mamaʻo meiate kimoutolu ʻa e faʻahinga ʻi he tokelaú;
Te u fakamovetevete kinautolu ki ha fonua pakukā mo maomaonganoa,
Pea ko ʻenau kau tau maluʻi ʻi muʻá* ki he tahi fakahahaké.*
Pea mo ʻenau kau tau maluʻi mei muí ki he tahi fakahihifó.*
ʻE ʻalu hake meiate kinautolu ʻa e namukū,
Ko e nanamu meiate kinautolú ʻe ʻalu hake ai pē;+
He te Ne fai ʻa e ngaahi meʻa lalahi.’
21 ʻOua ʻe ilifia, ʻa e fonuá.
Fiefia mo mavava, he ʻe fai ʻe Sihova ʻa e ngaahi meʻa lalahi.
22 ʻOua ʻe ilifia, ʻa kimoutolu fanga manu ʻo e vaó,
He ko e ngaahi kaikaiʻanga ʻo e toafá ʻe lanu mata,+
Pea ko e ʻuluʻakaú te nau laku fua;+
Ko e fuʻu fikí mo e fuʻu kālepí kuo pau ke na fua lahi.+
23 Ke fiefia mo mavava ʻia Sihova ko homou ʻOtuá;+ ʻa kimoutolu ngaahi foha ʻo Saioné;
He te ne ʻoatu kiate kimoutolu ʻa e ʻuha ʻi he faʻahitaʻu fakatōlaú ʻi hono lahi totonu,
Pea te ne tuku atu kiate kimoutolu ha fuʻu lōvai,
ʻA e ʻuha ʻi he faʻahitaʻu fakatōlaú mo e ʻuha ʻi he faʻahitaʻu failaú, ʻo hangē ko ia ki muʻá.+
24 Ko e ngaahi ʻauʻauʻangá ʻe fonu ʻi he uité,
Pea ʻe fonu mahuohua ʻa e ngaahi tataʻoʻangá ʻi he uaine foʻou pea mo e lolo.+
25 Pea te u fai ha totongi fakafoki kiate kimoutolu ki he ngaahi taʻu ʻo e ngaahi utu-taʻu kuo molé
ʻA ia kuo keina ʻe he pupunga heʻé, mo e heʻe taʻekapakaú, mo e heʻe maumaú, pea mo e heʻe fakaʻauhá,
ʻA ʻeku fuʻu kau tau naʻá ku fekauʻi atu ki homou lotolotongá.+
26 Ko e moʻoni te mou kai ʻo mākona,+
Pea te mou fakahīkihikiʻi ʻa e huafa ʻo Sihova ko homou ʻOtuá,+
ʻA ia kuó ne fai ʻa e ngaahi meʻa fakaofo maʻamoutolú;
ʻE ʻikai ʻaupito ke toe fakamaaʻi ʻa hoku kakaí.+
27 Pea kuo pau ke mou ʻiloʻi ʻoku ou ʻi he lotolotonga ʻo ʻIsilelí+
Pea ko au Sihova ko homou ʻOtuá+—ʻoku ʻikai mo ha toe taha kehe!
ʻE ʻikai ʻaupito ke toe fakamaaʻi ʻa hoku kakaí.
28 ʻI he hili iá, te u huaʻi hifo ʻa hoku laumālié+ ki he faʻahinga kakano kotoa pē,
Pea ko homou ngaahi fohá mo homou ngaahi ʻofefiné te nau kikite,
Ko hoʻomou kau tangata taʻumotuʻá te nau misi ʻi ha ngaahi misi,
Pea ko hoʻomou kau talavoú te nau mata vīsone.+
29 Pea naʻa mo ʻeku kau tamaioʻeikí mo ʻeku kau kaunangá
Te u huaʻi hifo ki ai ʻa hoku laumālié ʻi he ngaahi ʻaho ko iá.
30 Pea te u ʻai ʻa e ngaahi meʻa fakaofo ʻi he ngaahi langí pea ʻi he māmaní,
Ko e toto mo e afi mo e kohu+ ʻoku ʻalu hake.
31 Ko e laʻaá ʻe liliu ʻo fakapoʻuli pea ko e māhiná ʻe liliu ʻo toto+
Ki muʻa ke hoko mai ʻa e ʻaho lahi mo fakamanavahē ʻo Sihová.+
32 Pea ko e tokotaha kotoa pē ʻoku ui ki he huafa ʻo Sihová ʻe fakahaofi;+
He ʻe ʻi ai ʻa e faʻahinga ʻe hao+ ʻi Moʻunga Saione pea ʻi Selusalema, ʻo hangē tofu pē ko e meʻa kuo folofolaʻaki ʻe Sihová,
ʻA e kau hao moʻui ʻa ia ʻoku ui ʻe Sihová.”
3 “He vakai, ʻi he ngaahi ʻaho ko iá mo e taimi ko iá,
ʻI heʻeku fakafoki mai ʻa e kau pōpula ʻo Siuta mo Selusalemá,+
2 Te u toe fakatahatahaʻi mai ʻa e ngaahi puleʻangá kotoa
Te u fai ha fakamaau mo kinautolu ʻi ai+
Maʻa hoku kakaí pea mo hoku tofiʻa ko ʻIsilelí,
He naʻa nau fakamovetevete kinautolu ʻi he lotolotonga ʻo e ngaahi puleʻangá,
Pea naʻa nau vahevahe ʻa hoku fonuá ʻi honau lotolotongá.+
3 ʻOku nau fai ha lulu+ ke nau vahevahe ʻa hoku kakaí;
Naʻa nau fakatau atu ha tamasiʻi ke totongi mai ʻaki ha fefine feʻauaki
Pea fakatau atu ha taʻahine ki ha uaine ke inu.
4 Pehē foki, ko e hā kuo mou fai ai ʻa e meʻá ni kiate aú,
ʻE Tāia mo Saitoni mo e ngaahi vahefonua kotoa ʻo Filisitiá?
Ko hoʻomou totongi fakafoki mai ia ha meʻa kiate au?
Kapau ko hoʻomou fai mai ha totongi fakafoki kiate au,
Te u ʻoatu vave mo oma ki homou tumuʻakí ʻa e totongi fakafoki kiate kimoutolú.+
5 Koeʻuhí kuo mou ʻave ʻa ʻeku silivá mo e koulá,+
Pea kuo mou ʻave ʻa ʻeku ngaahi koloa lelei tahá ki homou ngaahi temipalé;
6 Pea ko e kakai ʻo Siuta mo Selusalemá kuo mou fakatau atu ki he kau Kalisí,+
Koeʻuhí ke ʻave kinautolu ke mamaʻo mei honau feituʻú;
7 Ko eni ʻoku ou ʻai kinautolu ke nau haʻu mei he feituʻu ʻa ia naʻa mou fakatau atu kinautolu ki aí,+
Pea te u ʻoatu ki homou tumuʻakí ʻa e totongi fakafoki kiate kimoutolú.
8 Te u fakatau atu homou ngaahi fohá mo homou ngaahi ʻofefiné ki he nima ʻo e kakai ʻo Siutá,+
Pea te nau fakatau atu kinautolu ki he kau tangata ʻo Sipá, ki ha puleʻanga mamaʻo;
He kuo folofola tonu ʻaki ia ʻe Sihova.
9 Fanongonongo ʻa e meʻá ni ʻi he lotolotonga ʻo e ngaahi puleʻangá:+
‘Mou teuteu ki he* tau! Uki ʻa e kau tangata toʻá!
Tuku ke ʻunuʻunu ofi mai ʻa e kau sōtiá kotoa, tuku ke nau laka atu!+
10 Tuki hoʻomou ngaahi mataʻi-palaú ke hoko ko e ngaahi heletā mo hoʻomou ngaahi hele ʻauhaní ke hoko ko e ngaahi tao.
Tuku ke pehē ʻe he tokotaha ʻoku vaivaí: “ʻOku ou mālohi.”
11 Mou omi ʻo tokoni, ʻa kimoutolu kotoa ngaahi puleʻanga takatakaí, mou fakatahataha mai!’”+
ʻOhifo ʻa hoʻo faʻahinga mālohí,* ʻe Sihova, ki he feituʻu ko iá.
12 “Tuku ke uki ʻa e ngaahi puleʻangá pea ke nau ʻalu hake ki he Teleʻa* ʻo Sihosafaté;
He te u nofo ai koeʻuhí ke fakamāuʻi ʻa e ngaahi puleʻanga takatakaí kotoa.+
13 Hiki hake ʻa e hele tuʻusí, he kuo motuʻa ʻa e utu-taʻú.
ʻAlu hifo ʻo malamalaki, he ʻoku fonu ʻa e tataʻoʻanga uainé.+
ʻOku fonu mahuohua ʻa e ngaahi tataʻoʻanga uainé, he ʻoku lahi fau ʻenau koví.
14 Ko e ngaahi fuʻu kakaí, ko e ngaahi fuʻu kakaí ʻoku nau ʻi he teleʻa* ʻo e fakamāú,
He ko e ʻaho ʻo Sihová ʻoku ofi ʻi he teleʻa* ʻo e fakamāú.+
15 ʻE hoko ʻo fakapoʻuli ʻa e laʻaá mo e māhiná.
Pea ʻe mole ʻa e ngingila ʻo e ngaahi fetuʻú.
16 Pea ʻe ngungulu atu ʻa Sihova ʻi Saione,
Te ne hiki hake ʻa hono leʻó ʻi Selusalema.
Pea ʻe ngalulu ʻa e langí mo e māmaní;
Ka ʻe hoko ʻa Sihova ko e hūfangaʻanga ki hono kakaí,+
Ko ha kolotau ki he kakai ʻo ʻIsilelí.
17 Pea kuo pau ke mou ʻilo ko au Sihova ko homou ʻOtuá, ʻoku ou nofo ʻi Saione, ʻa hoku moʻunga tapú.+
18 ʻI he ʻaho ko iá ʻe toʻi hifo ʻi he ngaahi moʻungá ha uaine melie,+
ʻE tafe hifo ʻi he ngaahi foʻi māʻolungá ʻa e huʻakau,
Pea ko e ngaahi vaitafe ʻo Siutá ʻe tafe kotoa ai ʻa e vaí.
19 Ka ʻe hoko ʻa ʻIsipite ʻo lala,+
Pea ʻe hoko ʻa ʻĪtomi ko ha toafa maomaonganoa,+
Koeʻuhí ko e fakamālohi kuo fai ki he kakai ʻo Siutá,+
ʻA ia ko honau fonuá naʻa nau lilingi ai ʻa e toto taʻehalaiá.+
20 Ka ʻe nofoʻi maʻu pē ʻa Siuta,
Pea mo Selusalema ʻi he toʻutangata ki he toʻutangata.+
21 Te u toʻo ʻa ʻenau halaia ʻi he totó ʻa ia naʻa nau ʻi ai ki muʻá;+
Pea ʻe nofo ʻa Sihova ʻi Saione.”+
ʻOku ʻuhingá “Ko Sihova ʻa e ʻOtuá.”
Pe “māmaní.”
Pe “ha finemui.”
Pe “husepāniti.”
Pe “feilaulau uite.” Sio ki he fakamatala ʻi lalo ʻi he Liv 2:1.
Fakafoʻilea, “ʻAi homou noʻó.”
Pe “tuki homou fatafatá.”
Fakafoʻilea, “Fakatoputapuʻi.”
Pe “māmaní.”
Pe “ngaahi taó.”
Pe “anga-ʻofa.”
Pe “ongoʻi fakaʻiseʻisa ʻi he.”
Pe “ongoʻi fakaʻiseʻisa.”
Fakafoʻilea, “Fakatoputapuʻi.”
Pe “kau mātuʻá.”
Fakafoʻilea, “ko hono matá.”
ʻA ia, ko e Tahi Maté.
ʻA ia, ko e Tahi Metiteleniané.
Pe “Talalo.”
ʻOku ʻuhingá “Ko Sihova ʻa e Fakamāú.”
Fakafoʻilea, “Fakatoputapuʻi ʻa e.”
Pe “hoʻo kau pāteʻi taú.”
Pe “Talalo.”
Pe “talalo.”
Pe “talalo.”
Pe “kau muli.”
Sio ki he Lea mo Hono ʻUhinga.
ʻOku ʻuhingá “ki he ʻuluʻakau ko e sitimi.”