ʻĒMOSI
1 Ko e ngaahi lea ʻa ʻĒmosi,* ʻa ia naʻá ne ʻi he lotolotonga ʻo e kau tauhi-sipi mei Tēkoá,+ ʻa ia naʻá ne maʻu ʻi ha vīsone fekauʻaki mo ʻIsileli ʻi he ngaahi ʻaho ʻo Tuʻi ʻŪsaia+ ʻo Siutá pea ʻi he ngaahi ʻaho ʻo Selopoame+ ko e foha ʻo Sōasi+ ko e tuʻi ʻo ʻIsilelí, ʻi he taʻu ʻe ua ki muʻa ʻi he mofuiké.+ 2 Naʻá ne pehē:
“ʻE ngungulu atu ʻa Sihova ʻi Saione,
Pea te ne hiki hake ʻa hono leʻó ʻi Selusalema.
Ko e ngaahi kaikaiʻanga ʻa e kau tauhi-sipí te nau fakamamahi,
Pea ko e tumutumu ʻo Kāmelí ʻe pakupaku.”+
3 “Ko e meʻa eni ʻoku folofolaʻaki ʻe Sihová,
‘“Koeʻuhi ko e toutou angatuʻu* ʻa Tāmasikusí, heʻikai te u fakafoki mai ʻa hoku nimá,
Koeʻuhí naʻa nau ʻauʻau ʻa Kiliati ʻaki ha ukamea ʻauʻau uite.+
4 Ko ia te u ʻoatu ha afi ki he fale ʻo Hesaelí,+
Pea te ne keina ʻa e ngaahi taua fakakolotau ʻo Peni-hētatí.+
5 Te u maumauʻi ʻa e ngaahi meʻa fakamaʻu ʻo e ngaahi matapā ʻo Tāmasikusí;+
Te u fakaʻauha ʻa e kakai mei Pika-ʻavení
Pea mo e tokotaha ʻoku pule* mei Pete-ʻītení;
Pea ko e kakai ʻo Sīliá te nau ʻalu atu ko e kau ʻave fakamālohi ki Kili,”+ ko e fakahaaʻi ia ʻe Sihová.’
6 Ko e meʻa eni ʻoku folofolaʻaki ʻe Sihová,
‘“Koeʻuhi ko e toutou angatuʻu* ʻa Kesá,+ heʻikai te u fakafoki mai ʻa hoku nimá,
Koeʻuhí naʻa nau ʻave fakamālohi+ ʻa e kakaí kotoa ʻo tuku atu ki ʻĪtomi.
7 Ko ia te u tuku atu ha afi ki he ʻā ʻo Kesá,+
Pea te ne keina ʻa hono ngaahi taua fakakolotaú.
8 Te u fakaʻauha ʻa e kakai mei ʻAsitotí,+
Pea mo e tokotaha ʻoku pule* mei ʻAsikeloní;+
Te u hiki hoku nimá ki ʻEkiloni,+
Pea ko e toenga ʻo e kau Filisitiá ʻe ʻauha,”+ ko e fakahaaʻi ia ʻe he ʻEiki Hau ko Sihová.’
9 Ko e meʻa eni ʻoku folofolaʻaki ʻe Sihová,
‘Koeʻuhi ko e toutou angatuʻu* ʻa Tāiá,+ heʻikai te u fakafoki mai ʻa hoku nimá,
Koeʻuhí naʻa nau tuku atu ʻa e kau ʻave fakamālohí hono kotoa ki ʻĪtomi,
Pea koeʻuhi naʻe ʻikai te nau manatu ki he fuakava fakaefangatokouá.+
10 Ko ia te u tuku atu ha afi ki he ʻā ʻo Tāiá,
Pea te ne keina ʻa hono ngaahi taua fakakolotaú.’+
11 Ko e meʻa eni ʻoku folofolaʻaki ʻe Sihová,
‘Koeʻuhi ko e toutou angatuʻu* ʻa ʻĪtomí,+ heʻikai te u fakafoki mai ʻa hoku nimá,
Koeʻuhí he naʻá ne tuli ʻa hono tokouá tonu ʻaki ʻa e heletaá,+
Pea koeʻuhí naʻá ne fakafisi ke fakahāhā ʻa e mēsí;
ʻI heʻene ʻitá ʻokú ne hanganaki haehae taʻetuku kinautolu,
Pea ʻokú ne nofoʻaki tōlili ai pē kiate kinautolu.+
13 Ko e meʻa eni ʻoku folofolaʻaki ʻe Sihová,
‘“Koeʻuhi ko e toutou angatuʻu* ʻa e kau ʻĀmoní,+ heʻikai te u fakafoki mai ʻa hoku nimá,
Koeʻuhí naʻa nau fahi ua ʻa e kau fefine feitama ʻo Kiliatí ke fakalahi atu honau vahefonuá tonu.+
14 Ko ia te u tutu ʻaki ʻa e afi ʻa e ʻā ʻo Lapá,+
Pea te ne keina ʻa hono ngaahi taua fakakolotaú,
ʻE ʻi ai ha kaila ʻo e tau ʻi he ʻaho ʻo e faitaú,
Pea ʻe hangē ia ha taufa ʻi he ʻaho ʻo e afā.
15 Pea ko honau tuʻí ʻe ʻave fakamālohi fakataha mo ʻene kau houʻeikí,”+ ko e fakahaaʻi ia ʻe Sihová.’
2 “Ko e meʻa eni ʻoku folofolaʻaki ʻe Sihová,
‘“Koeʻuhi ko e toutou angatuʻu* ʻa Mōapé,+ heʻikai te u fakafoki mai ʻa hoku nimá,
Koeʻuhí he naʻá ne tutu ʻa e ngaahi hui ʻo e tuʻi ʻo ʻĪtomí ke hoko ko e lahe.
2 Ko ia te u tuku atu ha afi ki Mōape,
Pea te ne keina ʻa e ngaahi taua fakakolotau ʻo Kiliotí;+
ʻE mate ʻa Mōape ʻi he lotolotonga ʻo ha fuʻu longoaʻa,
Mo ha kaila ʻo e tau, mo e ongo mai ʻa ha ngaahi meʻaifi+ ki he faitau.
3 Te u toʻo ʻa e tokotaha ʻoku pulé* mei hono lotolotongá
Pea tāmateʻi ʻa e kotoa ʻo ʻene kau houʻeikí fakataha mo ia,”+ ko e fakahaaʻi ia ʻe Sihová.’
4 Ko e meʻa eni ʻoku folofolaʻaki ʻe Sihová,
‘Koeʻuhi ko e toutou angatuʻu* ʻa Siutá,+ heʻikai te u fakafoki mai ʻa hoku nimá,
Koeʻuhí naʻa nau siʻaki ʻa e lao* ʻa Sihová,
Pea koeʻuhí naʻe ʻikai te nau tauhi ʻa ʻene ngaahi tuʻutuʻuní;+
Ka ko e ngaahi loi tatau pē ko ia naʻe muimui ai ʻenau fanga kuí kuó ne takiheeʻi kinautolú.+
6 Ko e meʻa eni ʻoku folofolaʻaki ʻe Sihová,
‘Koeʻuhi ko e toutou angatuʻu* ʻa ʻIsilelí,+ heʻikai te u fakafoki mai ʻa hoku nimá,
Koeʻuhí ʻoku nau fakatau atu ʻa e māʻoniʻoní ki ha siliva,
Pea mo e masivá ki ha hoaʻi senitolo.+
7 ʻOku nau tāmalaki ʻa e ʻulu ʻo e māʻulaló ʻi he efu ʻo e kelekelé,+
Pea ʻoku nau taʻofi ʻa e hala ʻo e anga-vaivaí.+
ʻOku mohe* ʻa e tamaí mo e fohá mo ha taʻahine tatau pē ʻe taha,
ʻO taʻefakaʻapaʻapaʻi ʻa hoku huafa māʻoniʻoní.
8 ʻOku nau tākoto fakaloloa ʻo hoko atu ki he ʻōlita+ kotoa pē ʻi he ngaahi kofu kuo nau puke mai ko e maluʻi ʻo ha nō;*+
Pea ko e uaine ʻoku nau inu ʻi he fale* ʻo honau ngaahi ʻotuá naʻe maʻu mai ia mei he faʻahinga naʻa nau ʻeke totongi ki aí.’
9 ‘Ka ko au naʻá ku fakaʻauha ʻosi ʻa e kau ʻĀmolí ʻi honau ʻaó,+
ʻA ia naʻe māʻolunga ʻo hangē ko e ʻulu sitá pea mālohi ʻo hangē ko e ʻulu ʻoké;
Naʻá ku fakaʻauha ʻa hono fuá ʻi ʻolunga mo hono ngaahi aká ʻi lalo.+
10 Naʻá ku ʻomi kimoutolu mei he fonua ko ʻIsipité,+
Pea naʻá ku ʻai kimoutolu ke mou ʻaʻeva holo ʻi he toafá ʻi he taʻu ʻe 40,+
Ke mou maʻu ʻa e fonua ʻo e kau ʻĀmolí.
11 Naʻá ku tauhi hake ha niʻihi ʻo homou ngaahi fohá ko ha kau palōfita+
Pea mo e niʻihi ʻo hoʻomou kau talavoú ko e kau Nāsili.+
ʻIkai ko ia, ʻe kakai ʻo ʻIsileli?’ Ko e fakahaaʻi ia ʻe Sihová.
12 ‘Ka naʻa mou hanganaki ʻoatu ki he kau Nāsilí ʻa e uaine ke nau inu,+
Pea naʻa mou tuʻutuʻuni ki he kau palōfitá: “Kuo pau ke ʻoua te mou kikite.”+
13 Ko ia te u laiki kimoutolu ʻi homou feituʻú,
ʻO hangē pē ko hono laiki ʻe ha saliote ʻoku uta ai ha ʻū uite kuo tutuʻu, ʻa e meʻa ʻi lalo aí.
14 Ko e tokotaha veʻe-vavé heʻikai ha feituʻu ke hola ki ai,+
Ko e tokotaha mālohí heʻikai te ne toe maʻu hono mālohí,
Pea heʻikai ha tangata pāteʻi tau te ne fakahaofi ʻa ʻene moʻuí.
15 Ko e tangata fana ngahaú heʻikai te ne tuʻu ʻi hono tuʻuʻangá,
Ko e veʻe-vavé heʻikai te ne hao,
Pea ko e tangata heka hōsí heʻikai te ne fakahaofi ʻene moʻuí.
16 Naʻa mo e tangata loto-toʻa taha* ʻi he lotolotonga ʻo e kau pāteʻi taú
Te ne hola telefua ʻi he ʻaho ko iá,’+ ko e fakahaaʻi ia ʻe Sihová.”
3 “Fanongo ki he lea ko eni kuo folofolaʻaki ʻe Sihova ʻo fekauʻaki mo kimoutolú, ʻe kakai ʻo ʻIsileli, ʻo fekauʻaki mo e fāmili kotoa naʻá ku ʻomai mei he fonua ko ʻIsipité:
2 ‘Ko kimoutolu pē kuó u ʻilo ʻi he kotoa ʻo e ngaahi fāmili ʻo e māmaní.+
Ko e ʻuhinga ia te u kounaʻi ai kimoutolu ke mou fai mai ha fakamatala ki he kotoa ʻo hoʻomou ngaahi faihalá.+
3 ʻE luelue fakataha ha toko ua ʻo kapau kuo teʻeki ke na loto-taha ke fetaulaki?*
4 ʻE ngungulu ha laione ʻi he vaotaá lolotonga ia ʻoku ʻikai ha monumanu ke ne pō?
ʻE ngungulu ha laione mui mei hono ʻaná lolotonga ia ʻoku ʻikai ke ne maʻu ha meʻa?
5 ʻE tō hifo ha manupuna ki ha tauhele ʻi he kelekelé lolotonga ia ʻoku ʻikai ha tauhele ki ai?*
ʻE puna hake ha tauhele mei he kelekelé lolotonga ia ʻoku ʻikai ha meʻa ʻe maʻu ai?
6 Kapau ʻoku ifi ha meʻaifi ʻi ha kolo, ʻikai ʻe tetetete ʻa e kakaí?
Kapau ʻoku hoko ha fakatamaki ʻi he koló, ʻikai kuo fai ʻe Sihova ha meʻa?
7 He ko e ʻEiki Hau ko Sihová ʻe ʻikai ke ne fai ha meʻa
Kae ʻoua kuó ne fakahā ʻa ʻene meʻa fakapulipulí* ki heʻene kau sevāniti ko e kau palōfitá.+
8 Kuo ngungulu ʻa e laioné!+ Ko hai ia ʻe ʻikai ke ilifia?
Kuo folofola ʻa e ʻEiki Hau ko Sihová! Ko hai ia ʻe ʻikai ke kikite?’+
9 ‘Fanongonongo eni ʻi he ngaahi taua fakakolotau ʻo ʻAsitotí
Pea ʻi he ngaahi taua fakakolotau ʻi he fonua ko ʻIsipité.
Lea ʻo pehē: “Fakatahataha fakataha ki he ngaahi moʻunga ʻo Samēliá;+
Vakai ki he māveuveu ʻi hono lotolotongá
Pea mo e kākā ʻoku ʻiate iá.+
10 He ʻoku ʻikai te nau ʻilo ʻa e founga ke fai ai ʻa e meʻa ʻoku totonú,” ko e fakahaaʻi ia ʻe Sihová,
“ʻA e faʻahinga ʻoku nau fakafonu ʻa honau ngaahi taua fakakolotaú ʻaki ʻa e fakamālohi mo e faifakaʻauha.”’
11 Ko ia ai, ko e meʻa eni ʻoku folofolaʻaki ʻe he ʻEiki Hau ko Sihová,
‘ʻE takatakaiʻi ʻe ha fili ʻa e fonuá,+
Te ne toʻo ho mālohí,
Pea ko ho ngaahi taua fakakolotaú ʻe hamu fakamālohi.’+
12 Ko e meʻa eni ʻoku folofolaʻaki ʻe Sihová,
‘Hangē ko e hamusi ʻe ha tauhi-sipi ha ongo vaʻe pe ko ha konga ʻo ha telinga mei he ngutu ʻo e laioné,
ʻE pehē pē ʻa hono hamusi ʻa e kakai ʻo ʻIsilelí,
ʻA e faʻahinga ʻoku nau lolotonga nofo ʻi Samēlia ʻi he ngaahi mohenga fakaʻofoʻofá mo e ngaahi sea leleí.’*+
13 ‘Mou fanongo pea fakatokanga* ki he fale ʻo Sēkopé,’ ko e fakahaaʻi ia ʻe he ʻEiki Hau ko Sihová, ko e ʻOtua ʻo e ngaahi kau taú.
14 ‘He ʻi he ʻaho te u ui ai ʻa ʻIsileli ke ne fai ha fakamatala ki he kotoa ʻo ʻene ngaahi angatuʻú,*+
Te u fakaʻauha foki mo e ngaahi ʻōlita ʻo Pētelí.+
Te u tuʻusi ʻa e ngaahi meʻatui ʻo e ʻōlita kotoa pē ke tō ki he kelekelé.+
15 Te u taaʻi hifo ʻa e fale ʻo e faʻahitaʻu momokó fakataha mo e fale ʻo e faʻahitaʻu māfaná.’
‘ʻE ʻauha+ ʻa e ngaahi fale leí,
Pea ko e ngaahi fale lalahí* ʻe ʻikai ke toe ʻi ai,’+ ko e fakahaaʻi ia ʻe Sihová.”
4 “Fanongo ki he leá ni, ʻa kimoutolu fanga pulu ʻo Pēsaní,
ʻA ia ʻoku ʻi he moʻunga ʻo Samēliá,+
ʻA kimoutolu kau fefine ʻoku mou kākaaʻi ʻa e māʻulaló+ mo laiki ʻa e masivá,
ʻA ia ʻoku mou pehē ki homou ngaahi husepānití,* ‘ʻOmai ha meʻa ke mau inu!’
2 Kuo fuakava ʻa e ʻEiki Hau ko Sihová ʻi heʻene māʻoniʻoní,
‘“Vakai! ʻOku hoko mai ʻa e ngaahi ʻaho kiate kimoutolu ʻa ia ʻe hiki hake ai kimoutolu ʻe he filí ʻaki ʻa e ngaahi huka ʻa e tangata fahi-manú
Pea mo e toenga ʻo kimoutolú ʻaki ʻa e ngaahi mātaʻu.
3 Te mou hū atu ki tuʻa ʻi he ngaahi ava ʻi he ʻaá, ʻo ʻalu atu hangatonu ki muʻa ʻa e tokotaha taki taha;
Pea ʻe lī kimoutolu ki Hamona,” ko e fakahaaʻi ia ʻe Sihová.’
ʻOmi ʻa hoʻomou ngaahi feilaulaú+ ʻi he pongipongí,
Pea mo hoʻomou ngaahi vahe hongofulú+ ʻi he ʻaho hono tolú.
5 Tutu ha feilaulau fakafetaʻi ʻo e mā lēvani;+
Fanongonongo leʻo-lahi ʻa hoʻomou ngaahi feilaulau loto-tauʻatāiná!
He ko e meʻa ia ʻoku mou manako ke faí, ʻe kakai ʻo ʻIsileli,’ ko e fakahaaʻi ia ʻe he ʻEiki Hau ko Sihová.
6 ‘Pea ʻi heʻeku tafaʻakí, naʻá ku ʻai ke maʻa homou nifó mei he meʻakaí* ʻi homou ngaahi koló kotoa
Pea ʻai ke siʻi ʻa e maá ʻi homou ngaahi falé kotoa;+
Ka naʻe ʻikai te mou foki mai kiate au,’+ ko e fakahaaʻi ia ʻe Sihová.
7 ‘Naʻá ku taʻofi foki ʻa e ʻuhá meiate kimoutolu ʻi ha māhina ʻe tolu ki muʻa ʻi he utu-taʻú;+
Naʻá ku ʻai ke ʻuha ʻi he kolo ʻe taha kae ʻikai ʻi he kolo ʻe taha.
Naʻe tō ha ʻuha ki ha konga kelekele ʻe taha,
Ka ko e konga kelekele ʻe taha naʻe ʻikai ke tō ki ai ha ʻuhá naʻe pakupaku.
8 Naʻe tāsipa atu ha kakai ʻo e kolo ʻe ua pe tolu ki ha kolo ʻe taha ke nau inu ha vai,+
Pea naʻe ʻikai te nau fiu ai;
Ka naʻe ʻikai te mou foki mai kiate au,’+ ko e fakahaaʻi ia ʻe Sihová.
9 ‘Naʻá ku taaʻi hoʻomou ngoué ʻaki ʻa e vela mo e mahaki.+
Naʻa mou fakalahi hoʻomou ngaahi ngoué mo e ngaahi ngoue kālepí,
Ka naʻe keina ʻe he heʻé hoʻomou ʻulu fikí mo e ʻulu ʻōlivé;+
Pea naʻe kei ʻikai pē ke mou foki mai kiate au,’+ ko e fakahaaʻi ia ʻe Sihová.
10 ‘Naʻá ku tuku atu ha mahaki fakaʻauha ki homou lotolotongá ʻo hangē ko ia ʻi ʻIsipité.+
Naʻá ku tāmateʻi hoʻomou kau talavoú+ ʻaki ʻa e heletā pea puke mo hoʻomou fanga hōsí.+
Naʻá ku ʻai ke ʻalu hake ʻa e namukū ʻo homou ngaahi ʻapitangá ki homou avaʻi ihú;+
Ka naʻe ʻikai pē te mou foki mai kiate au,’ ko e fakahaaʻi ia ʻe Sihová.
11 ‘Naʻá ku liua homou fonuá,
ʻO hangē ko hono liua ʻo Sōtoma mo Komola+ ʻe he ʻOtuá.
Pea naʻa mou hangē ha potuʻi ʻakau naʻe hamusi mai mei he afí;
Ka naʻe ʻikai pē ke mou foki mai kiate au,’+ ko e fakahaaʻi ia ʻe Sihová.
12 Ko ia ko e meʻa ia te u fai kiate koé, ʻe ʻIsileli.
Koeʻuhi ko e meʻa eni te u fai kiate koé,
Tuʻu mateuteu ke ke fetaulaki mo ho ʻOtuá, ʻe ʻIsileli.
13 He vakai, ko ia ʻa e Tokotaha naʻá ne ngaohi ʻa e ngaahi moʻungá+ mo fakatupu ʻa e matangí;+
ʻOkú ne tala ki he tangatá ʻa ʻEne ngaahi fakakaukaú,
ʻOkú ne liliu ʻa e mafoa ʻa e atá ke fakapoʻuli,+
Pea ʻokú ne malaki ʻa e ngaahi feituʻu māʻolunga+ ʻo e māmaní;
Ko Sihova ko e ʻOtua ʻo e ngaahi kau tau ʻa hono huafá.”
5 “Fanongo ki he lea ko eni ʻoku ou fai atu kiate kimoutolu ʻi ha taʻanga tangí,* ʻe fale ʻo ʻIsileli:
2 ‘Ko e fefine kei nofo anga-maʻá, ʻa ʻIsileli, kuo tō;
ʻOku ʻikai malava ke ne toe tuʻu hake.
Kuo siʻaki ia ʻi hono fonua pē ʻoʻoná;
ʻOku ʻikai ha taha ke ne fokotuʻu hake ia.’
3 “He ko e meʻa eni ʻoku folofolaʻaki ʻe he ʻEiki Hau ko Sihová:
‘Ko e kolo ʻoku laka atu mo ha toko taha afe ki he taú ʻe toe pē mei ai ha toko teau;
Pea ko e kolo ʻoku ʻalu atu mo ha toko teaú ʻe toe pē mei ai ha toko hongofulu, ko e meʻa eni ʻe hoko ki he fale ʻo ʻIsilelí.’+
4 “He ko e meʻa eni ʻoku folofolaʻaki ʻe Sihova ki he fale ʻo ʻIsilelí:
‘Kumi kiate au pea te mou moʻui atu ai pē.+
ʻOua ʻe ʻalu ki Kilikali+ pe laka atu ki Pea-sipa,+
He ko e moʻoni ʻe ʻave fakamālohi+ ʻa Kilikali,
Pea ʻe hoko ʻa Pēteli ko e meʻa noa pē.*
6 Kumi kia Sihova, pea te mou moʻui atu ai pē,+
Koeʻuhi ke ʻoua naʻá ne pā mai ʻo hangē ha afí ki he fale ʻo Siosifá,
ʻO ne keina ʻa Pēteli, pea ʻikai ha taha ke tāmateʻi ia.
7 ʻOku mou liliu ʻa e fakamaau totonú ʻo hoko ko e ʻakau ifo kona,*
Pea ʻoku mou lī ʻa e māʻoniʻoní ki he kelekelé.+
8 Ko e Tokotaha naʻá ne ngaohi ʻa e pupunga fetuʻu ko Kimaá* mo e pupunga fetuʻu ko Kēsilí,*+
ʻA e Tokotaha ʻokú ne liliu ʻa e poʻuli matolú ko e pongipongí,
ʻA e Tokotaha ʻokú ne ʻai ʻa e ʻahó ke fakapoʻuli ʻo hangē ko e poʻulí,+
ʻA e Tokotaha ʻokú ne fakatahatahaʻi ʻa e ngaahi vai mei he tahí
Ke huaʻi hifo kinautolu ki he funga ʻo e māmaní+
—Ko Sihova ʻa hono huafá.
9 Te ne fakatupunga ha fakaʻauha ke pā mai ki he mālohí,
ʻO ne ʻomi ʻa e fakaʻauha ki he ngaahi feituʻu fakakolotaú.
10 ʻOku nau fehiʻa ʻi he faʻahinga ʻoku nau fai ʻa e valoki ʻi he matapā ʻo e koló,
Pea ʻoku nau fakaliliʻa ʻi he faʻahinga ʻoku nau lea moʻoní.+
11 Koeʻuhi ko hoʻomou kounaʻi ha tukuhau ngoue* mei he masivá
Pea ʻoku mou toʻo ʻene uité ko ha totongi tukuhau,+
Heʻikai te mou kei nofo ai pē ʻi he ngaahi fale kuo ngaohi ʻaki ʻa e maka kuo tā ʻa ia kuo mou langá+
Pea heʻikai te mou inu ʻa e uaine mei he ngoue kālepi fungani kuo mou toó.+
12 He ʻoku ou ʻilo ʻa hono lahi ʻo hoʻomou ngaahi angatuʻú*
Pea mo e lahi ʻo hoʻomou ngaahi angahalá
—ʻOku mou fakamamahiʻi ʻa e māʻoniʻoní,
ʻOku mou tali ʻa e ngaahi totongi fufū,*
Pea ʻoku mou fakaʻikaiʻi ʻa e ngaahi totonu ʻa e masivá ʻi he matapā ʻo e koló.+
13 Ko ia ai, ko e faʻahinga ʻoku nau maʻu ʻa e vavanga fakaefakakaukaú te nau hanganaki fakalongolongo ʻi he taimi ko iá,
He ʻe hoko ia ko ha taimi ʻo e fakatamaki.+
Pea heiʻilo ʻe ʻiate kimoutolu ʻa Sihova ko e ʻOtua ʻo e ngaahi kau taú,
ʻO hangē pē ko hoʻomou leaʻaki ʻokú ne ʻiate kimoutolú.+
15 Fehiʻa ki he koví, pea ʻofa ki he leleí,+
Tuku ke nofo ʻa e fakamaau totonú ʻi he matapā ʻo e koló.+
Heiʻilo ʻe hanga ʻe Sihova ko e ʻOtua ʻo e ngaahi kau taú
ʻO fakahaaʻi ha hōifua ki he toenga ʻo Siosifá.’+
16 “Ko ia ai, ko e meʻa eni ʻoku folofolaʻaki ʻe Sihova ko e ʻOtua ʻo e ngaahi kau taú, ʻoku pehē ʻe Sihova:
‘ʻI he kotoa ʻo e ngaahi malaʻe fakakoló* ʻe ʻi ai ha tangilāulau,
Pea ʻi he kotoa ʻo e ngaahi halá te nau pehē ai, “ʻOiauē, ʻoiauē!”
Te nau ui ki he kau ngoué ke nau fai ha tengihia
Pea mo e kau tengihia ʻoku totongiʻi maí ke nau tangilāulau.’
17 ‘ʻI he ngoue kālepi kotoa pē ʻe ʻi ai ha tangilāulau;+
He te u laka atu ʻi ho lotolotongá ke fai ha tautea,’ ko e folofola ia ʻa Sihová.
18 ‘ʻOiauē ʻa e faʻahinga ʻoku nau fakaʻamu ki he ʻaho ʻo Sihová!+
Ko e hā leva ʻe ʻuhinga ki ai ʻa e ʻaho ʻo Sihová kiate kimoutolú?+
ʻE fakapoʻuli ia, ʻo ʻikai maama.+
19 ʻE hangē ia ha tangata ʻoku hola mei ha laione pea fetaulaki mo ha peá,
Pea ʻi heʻene hū ki hono falé ʻo tekenaki atu hono nimá ki he holisí, ʻoku uʻu ia ʻe ha ngata.
20 ʻIkai ko e ʻaho ʻo Sihová ʻe fakapoʻuli, ʻo ʻikai maama;
ʻIkai ʻe fakapoʻuli matolu, ʻo ʻikai maama ʻahoʻaho?
21 ʻOku ou fehiʻa, ʻoku ou fakaliliʻa ʻi hoʻomou ngaahi kātoangá,+
Pea ʻoku ʻikai te u leleiʻia ʻi he ngangatu ʻo e ngaahi feilaulau ʻo hoʻomou ngaahi fakataha makehé.
22 Neongo ka mou ka ʻomi kiate au ha ngaahi feilaulau tutu kakato mo ha ngaahi feilaulau meʻaʻofa,
Heʻikai te u leleiʻia ai;+
Pea heʻikai te u hāngaifofonga ki hoʻomou ngaahi feilaulau feʻinasiʻaki ʻo e fanga manu sisinó.+
23 Tuku hoʻo ʻai ke u longoaʻaʻia ʻi hoʻo ngaahi hivá;
Pea ʻai ke ʻoua te u fanongo ki he ngaahi leʻo ʻo hoʻo ngaahi meʻalea filó.+
24 Tuku ke tafe atu ʻa e fakamaau totonú ʻo hangē ko e ngaahi vaí,+
Mo e māʻoniʻoní ʻo hangē ha vaitafe ʻoku tafe maʻu peé.
25 Naʻa mou ʻomi kiate au ha ngaahi feilaulau mo ha ngaahi feilaulau meʻaʻofa
ʻI he taʻu ʻe 40 ko ia ʻi he toafá, ʻe fale ʻo ʻIsileli?+
26 Ko eni kuo pau ke mou fua ʻo ʻave ʻa Sikuti ko homou tuʻí pea mo Kiuni,*
ʻA hoʻomou ongo ʻīmisí, ʻa e fetuʻu ko homou ʻotuá, ʻa ia naʻa mou ngaohi maʻamoutolú,
27 Pea te u tuku atu kimoutolu ke ʻave fakamālohi ʻo mamaʻo atu mei Tāmasikusi,’+ ko e folofola ia ʻa e tokotaha ko hono huafá ko Sihova ko e ʻOtua ʻo e ngaahi kau tau.”+
6 “ʻOiauē ʻa e faʻahinga ʻoku nau falala pē kiate kinautolu* ʻi Saioné,
ʻA e faʻahinga ʻoku nau ongoʻi malu ʻi he moʻunga ʻo Samēliá,+
ʻA e kau tangata mahuʻinga ʻo e ngaahi puleʻanga tuʻu-ki-muʻá,
ʻA e faʻahinga ʻoku ʻalu ki ai ʻa e fale ʻo ʻIsilelí!
2 Mou laka atu ki Kaline pea vakai.
Mou ʻalu atu mei ai ki Hēmati Lahi,+
Pea mou ʻalu hifo ki Kati ʻo e kau Filisitiá.
ʻOku nau lelei ange koā ʻi he ongo puleʻangá ni,*
Pe ʻoku lalahi ange koā honau vahefonuá ʻi haʻamoutolú?
4 ʻOku nau tākoto ʻi he ngaahi mohenga lei+ pea fakaloloa atu ʻi he ngaahi sea,+
ʻO kai ʻa e fanga sipi tangata ʻo e tākangá pea mo e fanga kiʻi ʻuhikiʻi pulu sisinó;*+
5 ʻOku nau faʻu ʻa e ngaahi hiva ki he ongo mai ʻa e tā ʻo e haʻapé,*+
Pea ʻi he hangē ko Tēvitá, ʻoku nau ngaohi ʻa e ngaahi meʻalea;+
6 ʻOku nau inu uaine mei he poulu ʻoku fonu+
Pea ʻoku nau tākai kinautolu ʻaki ʻa e ngaahi lolo lelei tahá.
Ka ʻoku nau fakataʻetaʻetokanga ʻo fekauʻaki mo e* tuʻutāmaki ʻa Siosifá.+
7 Ko ia te nau hoko ko e ʻuluaki faʻahinga ʻe ʻave fakamālohí,+
Pea ko e fakafiefia longoaʻa ʻa e faʻahinga naʻe tākoto fakaloloa atú ʻe ngata.
8 ‘Kuo fuakava ʻa e ʻEiki Hau ko Sihová ʻiate ia pē,’+ ko e fakahaaʻi ia ʻe Sihova ko e ʻOtua ʻo e ngaahi kau taú,
‘“ʻOku ou fakaliliʻa ʻi he pōlepole ʻa Sēkopé,+
ʻOku ou fehiʻa ʻi hono ngaahi taua fakakolotaú,+
Pea te u tuku ange atu ʻa e koló mo e meʻa ʻokú ne fakafonu iá+ ki hono ngaahi filí.
9 “‘“Pea kapau ʻe toe ha kau tangata ʻe toko hongofulu ʻi ha fale ʻe taha, te nau mate foki mo kinautolu. 10 ʻE haʻu ha kāinga* ʻo ʻave kinautolu pea tutu taha taha kinautolu. Te ne ʻomi honau ngaahi huí mei he falé; pea te ne pehē ki ha taha pē ʻoku ʻi he ngaahi loki ʻi loto ʻi he falé, ‘ʻOku toe ʻi ai ha taha mo koe?’ Pea te ne pehē mai, ‘ʻOku ʻikai ha taha!’ Pea te ne pehē atu leva, ‘Hanganaki fakalongolongo! He ʻoku ʻikai ko ha taimi eni ke leaʻaki ai ʻa e huafa ʻo Sihová.’”
11 He ko Sihova ia ʻokú ne fai ʻa e tuʻutuʻuní,+
Pea te ne taaʻi hifo ʻa e ngaahi fale lalahí ʻo hoko ko e mapakipakiʻi maka,
Pea mo e fanga kiʻi fale īkí ʻo hoko ko e veve.+
12 ʻOku lele koā ʻa e fanga hōsí ʻi ha funga maka,
Pe ʻe fai ai ʻe ha taha ha palau ʻaki ha fanga pulu?
He kuo mou liliu ʻa e fakamaau totonú ko ha ʻakau kona,
13 ʻOku mou fiefia ʻi he meʻa ko e koto taʻeʻaonga,
Pea ʻoku mou pehē, “ʻIkai kuo tau hoko ʻo mālohi* ʻi hotau ivi pē ʻo kitautolú?”+
14 Ko ia ai, ʻe fale ʻo ʻIsileli, te u ʻai ke tuʻu ha puleʻanga+ kiate kimoutolu,’ ko e fakahaaʻi ia ʻe Sihova ko e ʻOtua ʻo e ngaahi kau taú,
‘Pea te nau lōmekina kimoutolu mei Lipo-hēmati*+ ʻo aʻu hifo ki he Teleʻa* ʻo e ʻAlapá.’”
7 Ko e meʻa eni naʻe fakahaaʻi mai ʻe he ʻEiki Hau ko Sihová kiate au ʻi ha vīsone: Vakai! Naʻá ne tuku mai ha pupunga heʻe ʻi he kamata ke tupu hake ʻa e ngoue tokamuí.* Ko e ngoue tokamui eni hili ʻa hono tutuʻu ʻa e mohuku ʻa e tuʻí. 2 ʻI he ʻosi hono kai ʻe he pupunga heʻé ʻa e mohuku ʻo e fonuá, naʻá ku pehē ange: “ʻE ʻEiki Hau Sihova, fakamolemoleʻi+ ange muʻa kinautolu! ʻE lava fēfē ke hao* ʻa Sēkope? He ʻokú ne vaivai!”+
3 Ko ia naʻe toe fakakaukauʻi ʻa e meʻá ni+ ʻe* Sihova. “ʻE ʻikai ke hoko ia,” ko e folofola ia ʻa Sihová.
4 Ko e meʻa eni naʻe fakahaaʻi mai ʻe he ʻEiki Hau ko Sihová kiate aú: Vakai! Naʻe ui mai ʻe he ʻEiki Hau ko Sihová ha tautea ke faiʻaki ha afi. Naʻe keina ʻe he afí ʻa e fuʻu moana lolotó, pea naʻá ne keina mo ha konga ʻo e fonuá. 5 Naʻá ku pehē ange: “ʻE ʻEiki Hau Sihova, taʻofi ange muʻa ʻa e meʻá ni.+ ʻE lava fēfē ke hao* ʻa Sēkope? He ʻokú ne vaivai!”+
6 Ko ia naʻe toe fakakaukauʻi ʻa e meʻá ni+ ʻe* Sihova. “ʻE ʻikai ke hoko mo eni foki,” ko e folofola ia ʻa e ʻEiki Hau ko Sihová.
7 Ko e meʻa eni naʻá ne fakahaaʻi mai kiate aú: Vakai! Naʻe tuʻu ʻa Sihova ʻi ha funga ʻā naʻe ngaohi ʻo ngāueʻaki ha palamu,* pea naʻe ʻi hono nimá ha palamu. 8 Naʻe pehē mai leva ʻe Sihova kiate au: “Ko e hā ʻa e meʻa ʻokú ke sio ki aí, ʻĒmosi?” Ko ia naʻá ku pehē ange: “Ko ha palamu.” Naʻe pehē mai leva ʻe Sihova: “Ko eni ʻoku ou ʻai ha palamu ki he lotolotonga ʻo hoku kakai ko ʻIsilelí. Heʻikai te u kei fakamolemoleʻi kinautolu.+ 9 Ko e ngaahi potu māʻolunga ʻo ʻAisaké+ ʻe maomaonganoa, pea ko e ngaahi feituʻu toputapu ʻo ʻIsilelí ʻe ʻauha;+ pea te u ʻalu atu ki he fale ʻo Selopoamé mo ha heletā.”+
10 Naʻe ʻave ʻe ʻAmasaia ko e taulaʻeiki ʻo Pētelí+ ʻa e pōpoaki ko ení kia Tuʻi Selopoame+ ʻo ʻIsilelí: “ʻOku fai ʻe ʻĒmosi ha faʻufaʻufono kiate koe ʻi he lotolotonga ʻo e fale ʻo ʻIsilelí.+ Heʻikai ke kei matuʻuaki ʻe he kakai ʻo e fonuá ʻa e kotoa ʻo ʻene ngaahi leá.+ 11 He ko e meʻa eni ʻoku leaʻaki ʻe ʻĒmosí, ‘ʻE mate ʻa Selopoame ʻi he heletā, pea ko e moʻoni ʻe ʻave fakamālohi ʻa ʻIsileli mei hono fonuá.’”+
12 Pea naʻe pehē ange ʻe ʻAmasaia kia ʻĒmosi: “ʻE tokotaha-vīsone, ʻalu, lele ki he fonua ko Siutá, ngāueʻi hoʻo maá* ai, pea fai ai hoʻo kikité.+ 13 Ka kuo pau ke ʻoua naʻá ke toe kikite ʻi Pēteli,+ he ko e feituʻu toputapu ia ʻo ha tuʻi+ pea ko ha fale fakapuleʻanga ia.”
14 Naʻe tali ange leva ʻe ʻĒmosi kia ʻAmasaia: “Naʻe ʻikai ko ha palōfita au, pe ko e foha ʻo ha palōfita; ka ko ha tangata tauhi monumanu+ au, pea naʻá ku tokangaʻi ʻa e ʻulu sukaminó.* 15 Ka naʻe toʻo au ʻe Sihova mei he muimui ʻi he tākangá, pea naʻe pehē mai ʻe Sihova kiate au, ‘ʻAlu ʻo kikite ki hoku kakai ko ʻIsilelí.’+ 16 Ko ia fanongo he taimí ni ki he folofola ʻa Sihová: ‘ʻOkú ke pehē, “ʻOua naʻa fai ha kikite ki ʻIsileli,+ pea ʻoua naʻá ke lea+ ki he fale ʻo ʻAisaké.” 17 Ko ia ai, ko e meʻa eni ʻoku folofolaʻaki ʻe Sihová: “Ko ho uaifí ʻe hoko ko ha fefine feʻauaki ʻi he koló, pea ko ho ngaahi fohá mo ho ngaahi ʻofefiné te nau tō ʻi he heletā. Ko ho fonuá ʻe vahevahe atu ia ʻaki ha afo fua, pea ko koe tonu te ke mate ʻi ha fonua taʻemaʻa; pea ko e moʻoni ʻe ʻave fakamālohi ʻa ʻIsileli mei hono fonuá.”’”+
8 Ko e meʻa eni naʻe fakahaaʻi mai ʻe he ʻEiki Hau ko Sihová kiate au ʻi ha vīsoné: Vakai! Naʻe ʻi ai ha kato fuaʻiʻakau ʻo e faʻahitaʻu māfaná. 2 Naʻá ne folofola mai leva, “Ko e hā ʻokú ke sio ki aí, ʻĒmosi?” Naʻá ku tali ange, “Ko ha kato fuaʻiʻakau ʻo e faʻahitaʻu māfaná.” Naʻe folofola mai leva ʻa Sihova kiate au: “Kuo hoko mai ʻa e ngataʻangá ki hoku kakai ko ʻIsilelí. Heʻikai te u kei fakamolemoleʻi kinautolu.+ 3 ‘Ko e ngaahi hiva ʻo e temipalé ʻe hoko ko e tangilāulau ʻi he ʻaho ko iá,’+ ko e fakahaaʻi ia ʻe he ʻEiki Hau ko Sihová. ‘ʻE lahi ʻa e ngaahi ʻangaʻanga ʻe laku holo ʻi he feituʻu kotoa pē+—ke ʻi ai ha sīlongo!’
4 Fanongo ki he meʻá ni, ʻa kimoutolu ʻoku mou tāmalaki ʻa e masivá
Pea ʻoku mou ʻai ʻa e vaivaí ke ʻikai ke nau toe ʻi ai ʻi he fonuá,+
5 ʻA ia ʻoku mou pehē, ‘Ko ʻafē ʻe ngata ai+ ʻa e kātoanga ʻo e māhina foʻoú, ka tau fakatau atu ʻetau uité,
Koeʻuhi ka tau fakasiʻisiʻi ʻa e fua efá*
Pea fakalahi ʻa e mamafa ʻo e sikelí,*
Ke ʻai ke hala ʻetau ngaahi meʻafua kākaá;+
6 Koeʻuhi ke tau fakatau mai ʻa e tuʻutāmakí ʻaki ʻa e siliva
Mo e masivá ʻaki ha hoaʻi senitolo,+
Pea fakatau atu ʻa e uite taʻeʻaongá.’
7 Ko Sihova, ʻa e lāngilangi ʻo Sēkopé,+ kuó ne fai ha fuakava ʻiate ia pē,
‘ʻE ʻikai ʻaupito haʻaku fakangaloʻi ʻa e kotoa ʻo ʻenau ngaahi ngāué.+
ʻIkai ʻe ʻalu kotoa hake ʻo hangē ko Nailá,
Pea aake mo ʻalu hifo ʻo hangē ko Naila ʻo ʻIsipité?’+
9 ‘ʻI he ʻaho ko iá,’ ko e fakahaaʻi ia ʻe he ʻEiki Hau ko Sihová,
‘Te u ʻai ke tō hifo ʻa e laʻaá ʻi he hoʻatā mālié,
Pea te u ʻai ke fakapoʻuli ʻa e fonuá ʻi ha ʻaho ʻoku maamaloa.+
10 Te u liliu hoʻomou ngaahi kātoangá ki he tengihia+
Pea mo e kotoa ʻo hoʻomou ngaahi hivá ki he ngaahi taʻanga tangi.*
Te u ʻai ʻa e tauangaʻa ki he kongaloto kotoa pē pea ʻai ke tula ʻa e ʻulu kotoa pē;
Te u ʻai ia ke hangē ko e tengihia ʻo ha foha pē ʻe tahá,
Pea ko e ngataʻanga ʻo e ʻaho ko iá ʻe hangē ha ʻaho fakamamahí.’
11 ‘Vakai! ʻOku hoko mai ʻa e ngaahi ʻaho,’ ko e fakahaaʻi ia ʻe he ʻEiki Hau ko Sihová,
‘ʻA ia te u tuku atu ai ha honge ki he fonuá,
ʻO ʻikai ko ha honge ʻi he mā pe ko ha fieinua ki ha vai,
Ka ʻi he fanongo ki he ngaahi folofola ʻa Sihová.+
12 Te nau tāsipa mei he tahi ki he tahi
Pea mei he tokelaú ki he hahaké.*
Te nau lele holo ʻo kumi ki he folofola ʻa Sihová, ka heʻikai te nau maʻu ia.
13 ʻI he ʻaho ko iá ʻe pongia ʻa e kau finemui hoihoifua kei nofo anga-maʻá,
Pea pehē ki he kau talavoú, koeʻuhi ko ʻenau fieinuá;
14 Ko kinautolu ko ia ʻoku nau fuakava ʻi he angahala ʻa Samēliá+ mo nau pehē,
“ʻOku mau fuakava ʻi ho ʻotua ʻoku moʻuí, ʻe Tani!”+
Pea, “ʻOku mau fuakava ʻi he hala ki Pea-sipá!”+
Te nau tō, pea heʻikai te nau toe tuʻu hake.’”+
9 Naʻá ku sio naʻe ʻafio ʻa Sihova+ ʻi ʻolunga ʻi he ʻōlitá, pea naʻá ne folofola mai: “Taaʻi ʻa e ngaahi ʻuluʻi-poú koeʻuhi ke ngalulu ʻa e falé. Tuʻusi kinautolu ʻi he ʻulú, pea te u tāmateʻi ʻa e toenga ʻo e kakaí ʻaki ʻa e heletā. Heʻikai hao ha taha ʻe hola, pea ʻe ʻikai lavameʻa+ ha taha ʻoku feinga ke hola.
2 Kapau te nau keli hifo ki he Faʻitoká,*
ʻE toʻo kinautolu mei ai ʻe hoku nimá;
Pea kapau te nau ʻalu hake ki he langí,
Te u ʻohifo kinautolu mei ai.
3 Pea kapau te nau toi ʻi he tumutumu ʻo Kāmelí,
Te u kumi kinautolu mei ai ʻo ʻave kinautolu.+
Kapau te nau fufū kinautolu mei hoku fofongá ʻi he kilisitahí,
Te u tuʻutuʻuni mei ai ha ngata ke ne uʻu kinautolu.
4 Pea kapau ʻe ʻave pōpula kinautolu ʻe honau ngaahi filí,
Te u tuʻutuʻuni mei ai ha heletā, pea te ne tāmateʻi kinautolu;+
Te u fakahangataha hoku fofongá kiate kinautolu ki ha kovi ʻo ʻikai ki ha lelei.+
5 He ko e ʻEiki Haú, ʻa Sihova ʻo e ngaahi kau tau, ʻa e Tokotaha ʻoku ala ki he fonuá,*
Ko ia ʻe vaia+ ia, pea ko e kotoa ʻo e kau nofo aí te nau mamahi;+
Pea ʻe ʻalu kotoa hake ia ʻo hangē ko Nailá,
Pea ʻalu hifo ʻo hangē ko Naila ʻo ʻIsipité.+
6 ‘Ko e tokotaha ko ia ʻokú ne langa hono ngaahi ʻaluʻanga ʻi he langí
Pea fokotuʻu ha ʻaofi* ʻi ʻolunga ki he māmaní;
ʻA e tokotaha ʻokú ne ui mai ʻa e ngaahi vai ʻo e tahí,
Ke huaʻi kinautolu ki he funga ʻo e māmaní+
—Ko Sihova ʻa hono huafá.’+
7 ‘ʻIkai ʻoku mou hangē ko e ngaahi foha ʻo e kau Kusá* kiate au, ʻe kakai ʻo ʻIsileli?’ Ko e fakahaaʻi ia ʻe Sihová.
‘ʻIkai naʻá ku ʻohake ʻa ʻIsileli mei he fonua ko ʻIsipité,+
8 ‘Vakai! Ko e fofonga ʻo e ʻEiki Hau ko Sihová ʻoku ʻi he puleʻanga angahalá,
Pea te ne fakaʻauha ʻosi ia mei he funga ʻo e fonuá.+
Ka heʻikai te u fakaʻauha ʻosi ʻa e fale ʻo Sēkopé,’+ ko e fakahaaʻi ia ʻe Sihová.
9 ‘He vakai, ʻoku ou fai ʻa e tuʻutuʻuni,
Pea te u luluʻi ʻa e fale ʻo ʻIsilelí ʻi he lotolotonga ʻo e ngaahi puleʻangá kotoa,+
Hangē tofu pē ko hano luluʻi ʻe ha taha ha meʻa-sivi,
Pea ʻikai tō hifo ha kiʻi foʻi maka ki he kelekelé.
10 Te nau mate ʻi he heletā, ʻa e kotoa ʻo e kau faiangahala ʻi hoku kakaí,
ʻA e faʻahinga ko ia ʻoku nau pehē, “Heʻikai haʻu ʻa e fakatamakí ʻo ofi mai pe aʻu mai kiate kitautolu.”’
11 ‘ʻI he ʻaho ko iá te u fokotuʻu hake ʻa e palepale* ʻo Tēvita+ ʻa ia kuo holó,
Te u monomono ʻa e* avaavá,
Pea te u toe fakafoʻou ʻa hono ngaahi maumaú;
Te u toe langa ia ke hangē ko ia naʻe ʻi ai ʻi he ngaahi ʻaho ʻi he kuohilí,+
12 Koeʻuhi ke nau maʻu ʻa e meʻa ʻoku toe ʻi ʻĪtomí,+
Pea mo e ngaahi puleʻanga kotoa ʻa ia kuo ui ʻaki hoku hingoá,’ ko e fakahaaʻi ia ʻe Sihová, ʻa ia ʻokú ne fai ʻa e meʻá ni.
13 ‘Vakai! ʻOku hoko mai ʻa e ngaahi ʻaho,’ ko e fakahaaʻi ia ʻe Sihová,
‘ʻA ia ʻe fakalaka ai ʻa e tangata palaú ʻi he tokotaha utu-taʻú,
Pea mo e tokotaha malaki kālepí ʻi he tokotaha toʻo tengaʻi ʻakaú;+
Pea ʻe toʻi hifo ʻi he ngaahi moʻungá ha uaine melie,+
Pea ʻe tafe hifo* ia mei he ngaahi foʻi māʻolunga kotoa pē.+
14 Te u tānaki fakataha mai ʻa e kau pōpula ʻo hoku kakai ko ʻIsilelí,+
Pea te nau toe langa ʻa e ngaahi kolo maomaonganoá pea nofoʻi ia;+
Te nau tō ʻa e ngaahi ngoue kālepi pea inu uaine+ mei ai,
Pea tō mo ha ngaahi ngoue pea kai honau fuá.’+
15 ‘Te u tō kinautolu ʻi honau fonuá,
Pea heʻikai ʻaupito ke toe taʻaki kinautolu
Mei honau fonua kuó u foaki kiate kinautolú,’+ ko e folofola ia ʻa Sihova ko ho ʻOtuá.”
ʻOku ʻuhingá ko e “Hoko ko ha Kavenga” pe “Toʻo ha Kavenga.”
Fakafoʻilea, “Koeʻuhí ko e angatuʻu ʻe tolu mo fā.”
Fakafoʻilea, “tokotaha ʻokú ne puke ʻa e sēpitá.”
Fakafoʻilea, “Koeʻuhí ko e angatuʻu ʻe tolu mo fā.”
Fakafoʻilea, “tokotaha ʻokú ne puke ʻa e sēpitá.”
Fakafoʻilea, “Koeʻuhí ko e angatuʻu ʻe tolu mo fā.”
Fakafoʻilea, “Koeʻuhí ko e angatuʻu ʻe tolu mo fā.”
Fakafoʻilea, “Koeʻuhí ko e angatuʻu ʻe tolu mo fā.”
Fakafoʻilea, “Koeʻuhí ko e angatuʻu ʻe tolu mo fā.”
Fakafoʻilea, “fakamāú.”
Fakafoʻilea, “Koeʻuhí ko e angatuʻu ʻe tolu mo fā.”
Pe “fakahinohino.”
Fakafoʻilea, “Koeʻuhí ko e angatuʻu ʻe tolu mo fā.”
Pe “fehokotaki fakasino.”
Pe “ko ha talifaki.”
Pe “temipale.”
Pe “faʻahinga loto-lahi.”
Pe “fokotuʻutuʻu ke fetaulaki?”
Pe ngalingali, “lolotonga ia ʻoku ʻikai ha mounu ʻi ai?”
Pe “ʻa ʻene meʻa fufuú.”
Pe “ngaahi sea Tāmasikusí.”
Pe “fai ha fakamoʻoni.”
Pe “ngaahi faihiá.”
Pe ngalingali, “Pea ko e ngaahi fale lahi.”
Pe “kau pulé.”
Pe “angatuʻu ai.”
Pe “naʻe ʻikai ke u ʻoatu ha meʻakai ke mou kai.”
Pe “hiva ʻo e tengihiá.”
Pe ngalingali, “ko e meʻa fakafaʻahikehe.”
Pe “tamala.”
Ngalingali ko e ngaahi fetuʻu ko Pelaiatisí ʻi he pupunga fetuʻu ko Taulusí.
Ngalingali ko e pupunga fetuʻu ko ʻOlioní.
Pe “tukuhau kelekele.”
Pe “ngaahi faihiá.”
Pe “paʻanga totongi fufū.”
ʻA ia, ko ha feituʻu faiʻanga meʻa tefito ia ʻo e koló ki he kakaí.
Ko e ongo ʻotuá ni fakatouʻosi ʻoku ʻuhinga nai ia ki he palanite ko Sātuná, ʻa ia naʻe fai ʻa e lotu ki ai ko ha ʻotua.
Pe “fakataʻetaʻehohaʻa.”
ʻOku hā mahino ko e ʻuhinga ki he ongo puleʻanga ko Siuta mo ʻIsilelí.
Fakafoʻilea, “nofoʻanga ʻo e.”
Pe “fanga kiʻi pulu muí.”
Pe “meʻalea filó.”
Fakafoʻilea, “naʻe ʻikai te nau hoko ʻo puke ʻi he.”
Fakafoʻilea, “ʻa e tokoua ʻo ʻene tamaí.”
Pe “tamala.”
Fakafoʻilea, “ʻai ha ngaahi meʻatui moʻotautolu.”
Pe “mei he hūʻanga ʻo Hēmatí.”
Sio ki he Lea mo Hono ʻUhinga.
ʻA ia, ko e lolotonga ʻo Sanuali mo Fepuelí.
Fakafoʻilea, “tuʻu hake.”
Pe “naʻe ongoʻi fakaʻiseʻisa ʻi he meʻá ni ʻa.”
Fakafoʻilea, “tuʻu hake.”
Pe “naʻe ongoʻi fakaʻiseʻisa ʻi he meʻá ni ʻa.”
Pe “palameti.” Ko e meʻangāué ni ko ha meʻa fakamamafa ʻoku tautau ʻi ha afo pea ʻoku ngāueʻaki ke fakapapauʻi ʻa e tonu ʻa ha meʻa ʻoku tuʻu hangatonu ki ʻolunga.
Fakafoʻilea, “kai hoʻo maá.”
Pe “hoko ko ha tokotaha ʻokú ne teleʻi ʻa e fua ʻo e sukaminó.”
Sio ki he Lea mo Hono ʻUhinga.
Sio ki he Fakamatala Fakalahi E14.
Sio ki he Fakamatala Fakalahi E14.
Pe “māmaní.”
Pe “ngaahi hiva ʻo e tengihia.”
Pe “hopoʻanga laʻaá.”
Pe “ki Seoli,” ʻa ia, ko e faʻitoka anga-maheni ʻo e faʻahinga ʻo e tangatá. Sio ki he Lea mo Hono ʻUhinga.
Pe “māmaní.”
Pe “ʻaofi fuopotopoto.”
Pe “ʻItiopeá.”
Pe “tēniti; kiʻi fale.”
Pe “hona.”
Fakafoʻilea, “vaia.”