SĒFANAIA
1 Ko e folofola ʻa Sihova naʻe hoko kia Sēfanaia* ko e foha ʻo Kasi ko e foha ʻo Ketalaia ko e foha ʻo ʻAmalaia ko e foha ʻo Hesekaia ʻi he ngaahi ʻaho ʻo Siosaia+ ko e foha ʻo ʻĀmone+ ko e tuʻi Siutá:
2 “Te u tafiʻi fakaʻaufuli atu ʻa e meʻa kotoa pē mei he funga kelekelé,” ko e fakahaaʻi ia ʻe Sihová.+
3 “Te u tafiʻi atu ʻa e tangata mo e monumanu.
Te u tafiʻi atu ʻa e fanga manupuna ʻo e langí mo e ika ʻo e tahí,+
Mo e ngaahi tūkiaʻangá*+ fakataha mo e kau fulikivanú;
Pea te u toʻo ʻa e faʻahinga ʻo e tangatá mei he funga kelekelé,” ko e fakahaaʻi ia ʻe Sihová.
4 “Te u mafao atu hoku nimá ki Siuta
Pea ki he kotoa ʻo e kau nofo ʻi Selusalemá,
Pea te u tafiʻi atu mei he feituʻú ni ʻa e fakaʻilonga* kotoa ʻo Pēalí,+
ʻA e hingoa ʻo e kau taulaʻeiki ʻotua-mulí fakataha mo e kau taulaʻeikí,+
5 Pea mo e faʻahinga ʻoku nau punou hifo ʻi he funga falé ki he kongakau ʻo e langí,+
Pea mo e faʻahinga ʻoku nau punou hifo ʻo tukupā ke mateaki kia Sihova+
Lolotonga ia ʻoku nau tukupā ke mateaki kia Malekami;+
6 Pea mo e faʻahinga ʻoku nau tafoki mei he muimui kia Sihová+
Pea ʻoku ʻikai te nau kumi kia Sihova pe kumi faleʻi kiate ia.”+
7 Mou sīlongo ʻi he ʻao ʻo e ʻEiki Hau ko Sihová, he ko e ʻaho ʻo Sihová ʻoku ofi.+
Kuo teuteu ʻe Sihova ha feilaulau; ko e faʻahinga kuó ne fakaafeʻí* kuó ne ʻai ke nau mateuteu ki ai.
8 “ʻI he ʻaho ʻo e feilaulau ʻa Sihová te u kounaʻi ʻa e kau houʻeikí ke nau fai ha fakamatala,
ʻA e ngaahi foha ʻo e tuʻí,+ pea mo e faʻahinga kotoa pē ʻoku nau tui ha kofu ʻo ha mulí.
9 Te u kounaʻi ʻa e tokotaha kotoa ʻoku ofi ki he taloní* ke ne fai ha fakamatala ʻi he ʻaho ko iá,
ʻA e faʻahinga ʻoku nau fakafonu ʻa e fale ʻo honau pulé ʻaki ʻa e fakamālohi mo e kākā.
10 ʻI he ʻaho ko iá,” ko e fakahaaʻi ia ʻe Sihová,
“ʻE ʻi ai ha ongo ʻo e kalanga mei he Matapā Iká,+
Ko ha tangilāulau mei he Vahefonua Hono Ua ʻo e koló,+
Pea mo e haʻaki mai ha fuʻu longoaʻa mei he ngaahi foʻi māʻolungá.
11 Tangilāulau, ʻa kimoutolu kau nofo ʻi Makatesí,*
He kuo tāmateʻi* ʻa e kau tangata fefakatauʻakí* kotoa;
Ko e faʻahinga kotoa ʻoku nau fua ʻa e silivá kuo fakaʻauha.
12 ʻI he taimi ko iá te u fai ha kumi fakamātoato ʻi Selusalema ʻaki ha ngaahi maama,
Pea te u kounaʻi ʻa e kau fakafiefiemālié* ke nau fai ha fakamatala ʻa ia ʻoku nau pehē ʻi honau lotó,
‘Heʻikai fai ʻe Sihova ha lelei, pea heʻikai te ne fai ha kovi.’+
13 Ko ʻenau koloá ʻe faʻao fakamālohi pea ko honau ngaahi falé ʻe fakaʻauha.+
Te nau langa ha ngaahi fale, ka heʻikai te nau nofo ai;
Pea te nau tō ha ngaahi ngoue kālepi, ka heʻikai te nau inu uaine mei ai.+
14 Ko e ʻaho lahi ʻo Sihová ʻoku ofi!+
ʻOku ofi ia pea ʻoku tuʻunuku vave ʻaupito mai!*+
Ko e ongo mai ʻa e ʻaho ʻo Sihová ʻoku fakailifia.+
ʻI he ʻaho ko iá ʻe tangi ʻa e tokotaha pāteʻi taú.+
15 Ko e ʻaho ko iá ko ha ʻaho ʻo e tuputāmaki,+
Ko ha ʻaho ʻo e tuʻutāmaki mo e mamahi,+
Ko ha ʻaho ʻo e afā mo e maomaonganoa,
Ko ha ʻaho ʻo e fakapoʻuli mo e kaupōʻuli,+
Ko ha ʻaho ʻo e ʻaoʻaofia mo e poʻuli matolu,+
16 Ko ha ʻaho ʻo e ifi ʻo e meʻaifi mo e kaila ʻo e tau,+
Ki he ngaahi kolo fakakolotaú pea ki he ngaahi taua māʻolunga ʻi he tulikí.+
17 Te u fakatupunga ha tuʻutāmaki ki he faʻahinga ʻo e tangatá,
Pea te nau ʻalu ʻo hangē ha kau tangata kuí,+
Koeʻuhí he kuo nau faiangahala+ kia Sihova.
18 Heʻikai lava ʻe heʻenau silivá pe ko ʻenau koulá ke fakahaofi kinautolu ʻi he ʻaho ʻo e tuputāmaki ʻa Sihová;+
He ʻi he kakaha ʻo ʻene fuaʻá ʻe keina+ ai ʻa e māmaní kotoa,
Koeʻuhí he te ne fai ha fakaʻauha ʻosiʻosingamālie, ko ha fakaʻauha fakalilifu moʻoni, ʻo e faʻahinga kotoa ʻoku nofo ʻi he māmaní.”+
2 Ki muʻa ke fakahoko ʻa e tuʻutuʻuní,
Ki muʻa ke ʻalu atu ʻa e ʻahó ʻo hangē ha kafukafú,
Ki muʻa ke hoko hifo kiate kimoutolu ʻa e houhau kakaha ʻa Sihová,+
Ki muʻa ke hoko hifo kiate kimoutolu ʻa e ʻaho ʻo e houhau ʻa Sihová,
3 Mou kumi kia Sihova,+ ʻa kimoutolu kotoa ʻa e kau anga-vaivai* ʻo e māmaní,
ʻA ia ʻoku mou tauhi ʻa ʻene ngaahi tuʻutuʻuni māʻoniʻoní.*
Mou kumi ki he māʻoniʻoní, mou kumi ki he anga-vaivaí.*
Heiʻilo ʻe* fufū ai kimoutolu ʻi he ʻaho ʻo e houhau ʻa Sihová.+
4 He ʻe hoko ʻa Kesa ko ha kolo liʻaki;
Pea ʻe hoko ʻa ʻAsikeloni ʻo maomaonganoa.+
5 “ʻOiauē ʻa e faʻahinga ʻoku nofo ʻi he matāfangá, ʻa e puleʻanga ʻo e kau Kēletí!+
ʻOku fakahanga kiate kimoutolu ʻa e folofola ʻa Sihová.
ʻE Kēnani, ʻa e fonua ʻo e kau Filisitiá, te u fakaʻauha koe,
Koeʻuhi ke ʻoua naʻa ʻi ai ha taha ʻe kei nofo ʻi ai.
6 Pea ʻe hoko ʻa e matāfangá ko e ngaahi kaikaiʻanga,
Mo e ngaahi vaitupu maʻá e kau tauhi-sipí mo ha ngaahi lotoʻā maka maʻá e fanga sipí.
7 ʻE hoko ia ko ha feituʻu maʻá e toenga ʻi he fale ʻo Siutá;+
Te nau fai ai ʻenau fafangá.
Te nau tākoto ʻi he efiafí ʻi he ngaahi fale ʻo ʻAsikeloní.
He ko Sihova ko honau ʻOtuá te ne tokanga kiate kinautolu,*
Pea te ne fakatahatahaʻi mai ʻenau kau pōpulá.”+
8 “Kuó u fanongo ki he manuki kuo fai ʻe Mōapé+ mo e lea taʻetokaʻi ʻa e kau ʻĀmoní,+
ʻA ia kuo nau lumaʻi ʻa hoku kakaí mo fakamanamana loto-pōlepole ke faʻao honau feituʻú.+
9 Ko ia ai, ʻoku ou fuakava ʻiate au,”* ko e fakahaaʻi ia ʻe Sihova ʻo e ngaahi kau tau, ko e ʻOtua ʻo ʻIsilelí,
“ʻE hangē pē ʻa Mōape ko Sōtomá,+
Pea ʻe hangē ʻa e kau ʻĀmoní ko Komolá,+
Ko ha feituʻu ʻo e ʻakau talatala, ko ha feituʻu kelekele māsima, pea ko ha feituʻu lala tuʻuloa.+
Ko e toenga ʻo hoku kakaí te nau faʻao fakamālohi ʻenau koloá,
Pea ko e toenga ʻo hoku puleʻangá te nau ikunaʻi kinautolu.
10 Ko e meʻa eni te nau maʻu koeʻuhi ko ʻenau pōlepolé,+
Koeʻuhí naʻa nau lumaʻi mo fakamafutofuta ki he kakai ʻa Sihova ʻo e ngaahi kau taú.
11 ʻE fakamanavahē* ʻa Sihova kiate kinautolu;
He te ne ʻai ko e koto halaʻatā* ʻa e ngaahi ʻotua kotoa ʻo e māmaní,
Pea ko e kotoa ʻo e ʻotu motu ʻo e ngaahi puleʻangá te nau punou* kiate ia,+
ʻA e tokotaha taki taha mei hono feituʻu.
12 ʻE tāmateʻi foki ʻa kimoutolu kau ʻItiopea ʻaki ʻeku heletaá.+
13 Te ne mafao atu hono nimá ki he tokelaú ʻo fakaʻauha ʻa ʻAsīlia,
Pea te ne ʻai ʻa Ninive ke maomaonganoa,+ ʻo pakukā hangē ha toafá.
14 ʻE tākoto ʻi loto ʻiate ia ʻa e ngaahi tākanga, ʻa e faʻahinga manu kaivao kotoa pē.*
ʻE mohe fakatouʻosi ʻa e pelikaní mo e pōkiupainé ʻi hono ngaahi ʻuluʻi-poú.
ʻE ongo mai ha hiva ʻi he matapā-teké.
Ko e fokotuʻunga maumau pē ʻe ʻi he hūʻangá;
He te ne fakaeʻa atu ʻa e ngaahi ʻaofi sitá.
15 Ko e kolo pōlepole eni naʻe nofo malú,
ʻA ia naʻá ne pehē ʻi hono lotó, ‘Ko au pē taha, ʻoku ʻikai mo ha toe taha kehe.’
ʻOi siʻene hoko ko ha meʻa ke fai ai ha fakalilifuʻia,
Ko ha feituʻu ke tākoto ai ʻa e fanga manu kaivaó!
Ko e tokotaha kotoa ʻoku fakalaka atu aí te ne fai ha manuki* ki ai mo kalokalo atu hono ʻulú.”+
3 ʻOiauē ʻa e kolo angatuʻu, kuo ʻuliʻi mo fakafeʻātungiá!+
2 Kuo ʻikai ke ne fiefanongo;+ kuo ʻikai ke ne tali ha akonaki.+
Kuo ʻikai ke ne falala+ kia Sihova; kuo ʻikai ke ne ʻunuʻunu ofi ki hono ʻOtuá.+
3 Ko hono kau houʻeiki ʻoku ʻiate iá ko e fanga laione ngungulu.+
Ko hono kau fakamāú ko e fanga ulofi ʻi he poʻulí;
ʻOku ʻikai te nau tuku naʻa mo ha foʻi hui ke nau kai ʻo aʻu ki he pongipongi ʻe tahá.
4 Ko hono kau palōfitá ko e kau tangata anga-taʻetokaʻi mo kākā.+
5 ʻOku māʻoniʻoni ʻa Sihova ʻi hono lotolotongá;+ ʻoku ʻikai ke ne faihala.
ʻI he pongipongi ki he pongipongi ʻokú ne ʻai ke ʻiloa ʻene ngaahi fakamāú,+
ʻO hangē ko e pau ʻa e maama ʻo e ʻahó.
Ka ʻoku ʻikai ke mā ʻa e tokotaha taʻemāʻoniʻoní.+
6 “Naʻá ku fakaʻauha ʻa e ngaahi puleʻangá; pea tuku ke maomaonganoa honau ngaahi taua ʻi he tuliki ʻaá.
Naʻá ku ʻai ke lala ʻa honau ngaahi halá, ke ʻoua naʻa toe laka atu ai ha taha.
Naʻe tuku ai pē honau ngaahi koló ko e fokotuʻunga maumau, ʻo ʻikai ʻi ai ha tangata ai, ʻo ʻikai ha nofo ai.+
7 Naʻá ku pehē, ‘Ko e moʻoni te ke manavahē kiate au pea tali ʻa e akonakí,’*+
Koeʻuhi ke ʻoua naʻa fakaʻauha+ ʻa hono feituʻu nofoʻangá
—Kuo pau ke u kounaʻi ia ke ne fai ha fakamatala* koeʻuhi ko e kotoa ʻo e ngaahi meʻá ni.
Ka naʻa nau mātuʻaki vēkeveke ke faikākā.+
8 ‘Ko ia ke mou hanganaki nofo ʻamanaki* kiate au,’+ ko e fakahaaʻi ia ʻe Sihová,
‘ʻO aʻu ki he ʻaho te u tuʻu hake ai ke ʻave ʻa e koloa veté,*
He ko ʻeku tuʻutuʻuni fakaefakamāú ke tānaki ʻa e kakaí pea fakatahatahaʻi ʻa e ngaahi puleʻangá,
Ke lilingi atu kiate kinautolu ʻa ʻeku tuputāmakí mo e kotoa ʻo ʻeku houhau kakahá;+
He ʻi he kakaha ʻo ʻeku fuaʻá ʻe keina+ ai ʻa e māmaní kotoa.
9 He ʻi he taimi ko iá te u liliu ʻa e lea ʻa e ngaahi kakaí ko ha lea maʻa,
Koeʻuhi ke nau ui kotoa ki he huafa ʻo Sihová,
10 Mei he vahefonua ʻo e ngaahi vaitafe ʻo ʻItiopeá,
Ko e faʻahinga ʻoku nau tautapa kiate aú, ʻa e ʻofefine ʻo hoku kakai naʻe fakamovetevete atú, te nau ʻomi ha meʻaʻofa kiate au.+
11 ʻI he ʻaho ko iá ʻe ʻikai ke fakamaaʻi koe
Koeʻuhi ko e ngaahi ngāue kotoa naʻá ke angatuʻu ai kiate aú,+
He te u toʻo ai ʻa e kau pōlepole hīkisiá mei ho lotolotongá;
Pea heʻikai ʻaupito te ke toe pōlepole ʻi hoku moʻunga tapú.+
12 Te u fakaʻatā ha kakai anga-fakatōkilalo mo anga-vaivai ke nau nofo ʻi ho lotolotongá,+
Pea te nau hūfanga ki he huafa ʻo Sihová.
13 Ko e faʻahinga ʻoku toe ʻi ʻIsilelí+ heʻikai te nau fai ha tōʻonga taʻemāʻoniʻoni;+
Heʻikai te nau leaʻaki ha loi, pea heʻikai ke maʻu ha ʻelelo kākā ʻi honau ngutú;
Te nau kai* pea tākoto, ʻo ʻikai ha taha te ne ʻai kinautolu ke nau ilifia.”+
14 Kaila fiefia, ʻe ʻofefine ʻo Saione!
Kaila ʻi he ikuna, ʻe ʻIsileli!+
Ke fiefia mo mavava ʻaki ho lotó kotoa, ʻe ʻofefine ʻo Selusalema!+
15 Kuo toʻo ʻe Sihova ʻa e tauteá meiate koe.+
Kuó ne kapusi ho filí.+
Ko e Tuʻi ʻo ʻIsilelí, ʻa Sihova, ʻoku ʻi ho lotolotongá.+
Heʻikai ʻaupito haʻo toe manavahē ki ha fakatamaki.+
16 ʻI he ʻaho ko iá ʻe leaʻaki ai ki Selusalema:
“ʻOua naʻá ke ilifia, ʻe Saione.+
ʻOua naʻa tuku ho nimá ke vaivai.
17 Ko Sihova ko ho ʻOtuá ʻoku ʻi ho lotolotongá.+
Ko ha Tokotaha mālohi ia, te ne faifakahaofi.
Te ne hākahaka ʻiate koe ʻi he fiefia lahi.+
Te ne hoko ʻo sīlongo* ʻi heʻene ʻofá.
Te ne fiefia ʻiate koe ʻi he kaila ʻo e fiefia.
18 Te u tānaki fakataha mai ʻa e faʻahinga ʻoku mamahi ʻi he ʻikai ke nau maʻu ʻa hoʻo ngaahi kātoangá;+
Naʻa nau liʻaki koe koeʻuhi ko hono manukia kinautolu+ ʻi ha fonua mulí.
19 Vakai! ʻI he taimi ko iá te u fai ha meʻa ki he kotoa ʻo e faʻahinga ʻoku nau fakafeʻātungiaʻi koé;+
Pea te u fakahaofi ʻa e tokotaha ʻoku heké,+
Pea te u tānaki fakataha mai ʻa e faʻahinga naʻe fakamoveteveté.+
Te u ʻai kinautolu ko ha meʻa ke fakahīkihikiʻi mo ongoongoa
ʻI he kotoa ʻo e fonua naʻe fakamaaʻi ai kinautolú.
20 ʻI he taimi ko iá te u ʻomi kimoutolu,
ʻI he taimi ko iá te u tānaki fakataha kimoutolu.
He te u ʻai kimoutolu ko ha meʻa ke ongoongoa mo fakahīkihikiʻi+ ʻi he lotolotonga ʻo e ngaahi kakai kotoa ʻo e māmaní,
ʻI heʻeku tānaki fakataha mai ʻa hoʻomou kau pōpulá ki homou ʻaó,” ko e folofola ia ʻa Sihová.+
ʻOku ʻuhingá “Kuo Fufū (Koloaʻaki) ʻe Sihova.”
ʻOku hā mahino ko e ngaahi meʻa pe ngaahi ngāue naʻe fekauʻaki mo e tauhi ʻaitolí.
Pe “toetoenga.”
Fakafoʻilea, “fakatoputapuʻí.”
Pe “tuʻuʻangá.” Ngalingali ko e tuʻuʻanga ʻo e taloni ʻo e tuʻí.
Ngalingali ko ha konga ʻo Selusalema naʻe ofi ki he Matapā Iká.
Fakafoʻilea, “fakasīlongoʻi.”
Pe “kau mēsianití.”
Fakafoʻilea, “faʻahinga ʻoku totoka ʻi he takelé,” hangē ko ia ʻi ha tataʻoʻanga uainé.
Pe “ngaʻunu vave ʻaupito mai!”
Fakafoʻilea, “toʻotoʻongá.”
Pe “kau anga-fakatōkilalo.”
Fakafoʻilea, “ʻa ʻene ngaahi fakamāú.”
Pe “anga-fakatōkilaló.”
Pe “Naʻa faifai pea.”
Pe “hoʻatā mālié.”
Pe “tokangaʻi kinautolu.”
Fakafoʻilea, “hangē pē ko ʻeku moʻuí.”
Pe “fakalilifu.”
Pe “te ne fakahongeʻi.”
Pe “lotu.”
Fakafoʻilea, “ʻa e monumanu kotoa ʻo ha puleʻanga.”
Fakafoʻilea, “mapumapu.”
Pe “fakatonutonú.”
Pe “tautea ia.”
Pe “tatali anga-kātaki.”
Pe ngalingali, “tuʻu hake ai ko ha fakamoʻoní.”
Pe “Ke lotu kiate ia ʻi he fāʻūtaha.”
Pe “kaikai.”
Pe “fakalongolongo; nonga; fiemālie.”