HĀKEAI

1 ʻI he taʻu hono ua ʻo e pule ʻa Tuʻi Talaiasí, ʻi he māhina hono onó, ʻi he ʻuluaki ʻaho ʻo e māhiná, naʻe hoko mai ai ʻa e folofola ʻa Sihová fakafou ʻi he palōfita ko Hākeaí*+ kia Seluipēpeli,+ ko e kōvana ʻo Siutá, ʻa ia ko e foha ʻo Saletilí, pea kia Siosiua, ko e taulaʻeiki lahí, ʻa ia ko e foha ʻo Sihosatakí, ʻo pehē:

2 “Ko e meʻa eni ʻoku folofolaʻaki ʻe Sihova ʻo e ngaahi kau taú, ‘ʻOku pehē ʻe he kakaí ni, “Kuo teʻeki ai ke hoko mai ʻa e taimi ke langa*+ ai ʻa e fale* ʻo Sihová.”’”

3 Pea naʻe toe hoko mai ʻa e folofola ʻa Sihová fakafou ʻi he palōfita ko Hākeaí,+ ʻo pehē: 4 “Ko ha taimi eni kiate kimoutolu ke nofo ai ʻi ha ngaahi fale kuo teuteuʻi ʻaki ʻa e papa fakaʻofoʻofa, lolotonga ia ko e koto maumau+ ʻa hoku falé? 5 Ko eni ko e meʻa eni ʻoku folofolaʻaki ʻe Sihova ʻo e ngaahi kau taú, ‘Tuku homou lotó* ki homou ngaahi ʻalungá. 6 Kuo lahi ʻa e tenga kuo mou tūtūʻí, ka ʻoku siʻisiʻi hoʻomou utu-taʻú.+ ʻOku mou kai, ka ʻoku ʻikai fai ha mākona. ʻOku mou inu, ka ʻoku ʻikai te mou fiu. ʻOku mou ʻai vala, ka ʻoku ʻikai ha taha ʻe māfana. Ko e tokotaha ʻoku ngāue totongí ʻokú ne faʻo hono vāhengá ʻi ha kato ava.’”

7 “Ko e meʻa eni ʻoku folofolaʻaki ʻe Sihova ʻo e ngaahi kau taú, ‘Tuku homou lotó* ki homou ngaahi ʻalungá.’

8 “‘Mou ʻalu hake ki he moʻungá pea ʻomi ha papa.+ Pea langa ʻa hoku falé,+ koeʻuhí ke u leleiʻia ai pea fakalāngilangiʻi ai au,’+ ko e folofola ia ʻa Sihová.”

9 “‘Naʻa mou ʻamanekina ʻa e meʻa lahi pea maʻu ʻa e meʻa siʻisiʻi; pea ʻi hoʻomou ʻomi ia ki ʻapí, naʻá ku puhiʻi atu ia.+ Ko e hā hono ʻuhingá?’ Ko e fakahaaʻi ia ʻe Sihova ʻo e ngaahi kau taú. ‘Koeʻuhí ko hoku falé ko e koto maumau, lolotonga ia ʻoku lele takai ʻa e tokotaha taki taha ʻo kimoutolu ke tokangaʻi hono fale pē ʻoʻona.+ 10 Ko ia naʻe taʻofi ʻe he langí ʻa ia ʻoku ʻi ʻolunga ʻiate kimoutolú ʻa hono hahaú, pea taʻofi ʻe he kelekelé ʻa hono fuá. 11 Pea naʻá ku hanganaki ui ha laʻalaʻā ki he māmaní, ki he ngaahi moʻungá, ki he uité, ki he uaine foʻoú, ki he loló, ki he meʻa ʻoku tupu mei he kelekelé, ki he faʻahinga ʻo e tangatá mo e fanga manú, pea ki he kotoa ʻo e ngāue ʻa ho nimá.’”

12 Ko Seluipēpeli+ ko e foha ʻo Saletilí+ mo Siosiua ko e taulaʻeiki lahí, ʻa ia ko e foha ʻo Sihosatakí,+ pea mo e toenga kotoa ʻo e kakaí naʻa nau fanongo ki he leʻo ʻo Sihova ko honau ʻOtuá pea ki he ngaahi lea ʻa e palōfita ko Hākeaí, koeʻuhí naʻe fekauʻi mai ia ʻe Sihova ko honau ʻOtuá; pea naʻe kamata ke fakahāhā ʻe he kakaí ha manavahē koeʻuhí ko Sihova.

13 Naʻe hanga leva ʻe Hākeai, ko e talafekau ʻa Sihová, ʻo ʻoange ʻa e pōpoakí ni ki he kakaí ʻo fehoanaki mo hono fekauʻi ia meia Sihová: “‘ʻOku ou ʻiate kimoutolu kakai,’+ ko e fakahaaʻi ia ʻe Sihová.”

14 Ko ia naʻe ueʻi ʻe Sihova ʻa e loto+ ʻo Seluipēpeli, ko e kōvana ʻo Siutá,+ ʻa ia ko e foha ʻo Saletilí, pea mo e loto ʻo Siosiua,+ ko e taulaʻeiki lahí, ʻa ia ko e foha ʻo Sihosatakí, pea mo e loto ʻo e toenga kotoa ʻo e kakaí; pea naʻa nau haʻu pea kamata ke nau ngāue ʻi he fale ʻo Sihova ʻo e ngaahi kau taú, ko honau ʻOtuá.+ 15 Naʻe hoko eni ʻi he ʻaho hono 24 ʻo e māhina hono onó ʻi he taʻu hono ua ʻo e pule ʻa Tuʻi Talaiasí.+

2 ʻI he māhina hono fitú, ʻi he ʻaho hono 21 ʻo e māhiná, naʻe hoko mai ai ʻa e folofola ʻa Sihová fakafou ʻi he palōfita ko Hākeaí,+ ʻo pehē, 2 “Kātaki muʻa ʻo ʻeke kia Seluipēpeli+ ko e kōvana ʻo Siutá,+ ʻa ia ko e foha ʻo Saletilí, pea mo Siosiua+ ko e taulaʻeiki lahí, ʻa ia ko e foha ʻo Sihosatakí,+ pea ki he toenga ʻo e kakaí: 3 ‘Ko hai ʻoku toe ʻi homou lotolotongá naʻá ne vakai ki he falé ni* ʻi hono tuʻunga lāngilangiʻia ki muʻá?+ ʻOku fēfē hoʻomou vakai ki ai he taimi ní? ʻIkai ʻoku hangē ia ko ha meʻa noa peé ʻi hono fakahoa atu ki hono tuʻunga lāngilangiʻia ki muʻá?’+

4 “‘Ka ko eni, ke ke loto-toʻa, ʻe Seluipēpeli,’ ko e fakahaaʻi ia ʻe Sihová, ‘pea ke ke loto-toʻa, ʻe Siosiua ko e taulaʻeiki lahí, foha ʻo Sihosatakí.’

“‘Pea ke mou loto-toʻa, ʻa kimoutolu kotoa kakai ʻo e fonuá,’+ ko e fakahaaʻi ia ʻe Sihová, ‘pea ngāue.’

“‘He ʻoku ou ʻiate kimoutolu,’+ ko e fakahaaʻi ia ʻe Sihova ʻo e ngaahi kau taú. 5 ‘Manatu ki he meʻa naʻá ku talaʻofa atu kiate kimoutolu ʻi hoʻomou haʻu mei ʻIsipité,+ pea ko hoku laumālié ʻoku ʻi homou lotolotongá.*+ ʻOua ʻe ilifia.’”+

6 “He ko e meʻa eni ʻoku folofolaʻaki ʻe Sihova ʻo e ngaahi kau taú, ‘ʻI ha kiʻi taimi siʻi mei heni—te u toe fai ai hano luluʻi ʻa e ngaahi langí mo e māmaní mo e tahí pea mo e fonua mōmoá.’+

7 “‘Pea te u luluʻi ʻa e kotoa ʻo e ngaahi puleʻangá, pea ko e ngaahi meʻa mahuʻinga* ʻo e kotoa ʻo e ngaahi puleʻangá te nau haʻu;+ pea te u fakafonu ʻa e falé ni ʻaki ʻa e lāngilangi,’+ ko e folofola ia ʻa Sihova ʻo e ngaahi kau tau.

8 “‘ʻOku ʻaʻaku ʻa e silivá, pea ʻoku ʻaʻaku ʻa e koulá,’ ko e fakahaaʻi ia ʻe Sihova ʻo e ngaahi kau tau.

9 “‘Ko e lāngilangi ʻo e falé ni ʻi he kahaʻú ʻe lahi ange ia ʻi he ki muʻá,’+ ko e folofola ia ʻa Sihova ʻo e ngaahi kau tau.

“‘Pea ʻi he feituʻú ni te u tuku ki ai ʻa e melinó,’+ ko e fakahaaʻi ia ʻe Sihova ʻo e ngaahi kau tau.”

10 ʻI he ʻaho hono 24 ʻo e māhina hono hivá, ʻi he taʻu hono ua ʻo e pule ʻa Talaiasí, naʻe hoko mai ai ʻa e folofola ʻa Sihová ki he palōfita ko Hākeaí,+ ʻo pehē: 11 “Ko e meʻa eni ʻoku folofolaʻaki ʻe Sihova ʻo e ngaahi kau tau, ‘Kātaki muʻa ʻo ʻeke ki he kau taulaʻeikí ʻo fekauʻaki mo e laó:+ 12 “Kapau ʻe toʻo ʻe ha tangata ha kanomate toputapu ʻi he pelu ʻo hono kofú, pea lave ʻa hono kofú ki ha mā pe supo pe uaine pe lolo pe ko ha faʻahinga meʻakai pē, ʻe toputapu ʻa e meʻakai ko iá?”’”

Naʻe tali ange ʻe he kau taulaʻeikí: “ʻIkai!”

13 Naʻe ʻeke leva ʻe Hākeai: “Kapau ʻoku ʻi ai ha taha ʻoku taʻemaʻa mei heʻene pā ki ha sino kuo mate peá ne lave ki he taha ʻo e ngaahi meʻá ni, ʻe taʻemaʻa ʻa e meʻa ko iá?”+

Naʻe tali ange ʻe he kau taulaʻeikí: “ʻE hoko ia ʻo taʻemaʻa.”

14 Ko ia naʻe pehē ʻe Hākeai: “‘ʻOku pehē pē ʻa e kakaí ni, pea ʻoku pehē pē ʻa e puleʻangá ni ʻi hoku ʻaó,’ ko e fakahaaʻi ia ʻe Sihová, ‘pea ʻoku pehē pē ʻa e kotoa ʻo e ngāue ʻa honau nimá; ko ha meʻa pē ʻoku nau ʻomai ko ha feilaulau ʻoku taʻemaʻa ia.’

15 “‘Ka ko eni, kātaki muʻa ʻo tuku homou lotó* ki he meʻá ni mei he ʻahó ni ʻo faai atu: Ki muʻa ke kamata ʻa hono toe langa ʻa e* temipale ʻo Sihová,+ 16 naʻe anga-fēfē ʻa e taimi ko iá? ʻI he ʻalu atu ha taha ki ha fokotuʻunga uite ʻo ne ʻamanekina ha fua uite ʻe 20, ko e 10 pē naʻe maʻú; pea ʻi he ʻalu atu ha taha ki he tataʻoʻanga uainé ke ʻutu ha fua uaine ʻe 50 mei he fuʻu ʻaiʻanga uainé, ko e 20 pē naʻe maʻú;+ 17 naʻá ku taaʻi kimoutolu—ʻa e kotoa ʻo e ngaahi ngāue ʻo homou nimá—ʻaki ʻa e mahunu mo e mahakiʻia ʻa e ʻakaú+ mo e ʻuha-ʻaisi,* ka naʻe ʻikai ha taha ʻo kimoutolu ʻe tafoki mai kiate au,’ ko e fakahaaʻi ia ʻe Sihová.

18 “‘Tuku muʻa homou lotó* ki he meʻá ni mei he ʻahó ni ʻo faai atu, mei he ʻaho hono 24 ʻo e māhina hono hivá, mei he ʻaho naʻe fakatoka ai ʻa e fakavaʻe ʻo e temipale ʻo Sihová;+ tuku homou lotó ki he meʻá ni: 19 ʻOku ʻi ai koā ha tengaʻi ʻakau ʻi he feleokó?*+ Ko e kālepí, ko e fikí, ko e pomikānité, mo e fuʻu ʻōlivé—kuo teʻeki ke nau fua, ʻikai ko ia? Mei he ʻahó ni, te u ʻoatu ha tāpuaki.’”+

20 Naʻe toe hoko mai ʻa e folofola ʻa Sihová kia Hākeai ko hono tuʻo uá ia ʻi he ʻaho hono 24 ʻo e māhiná,+ ʻo pehē: 21 “Lea kia Seluipēpeli, ko e kōvana ʻo Siutá, ‘Te u luluʻi ʻa e ngaahi langí mo e māmaní.+ 22 Te u liua ʻa e taloni ʻo e ngaahi puleʻangá pea fakaʻauha ʻosi ʻa e mālohi ʻo e ngaahi puleʻanga ʻo e ngaahi kakaí;+ pea te u fulihi ʻa e salioté mo kinautolu ʻoku heka aí, pea ko e fanga hōsí mo kinautolu ʻoku heka aí te nau tō, ʻa e tokotaha taki taha ʻi he heletā ʻa hono tokouá.’”+

23 “‘ʻI he ʻaho ko iá,’ ko e fakahaaʻi ia ʻe Sihova ʻo e ngaahi kau taú, ‘Te u ngāueʻaki koe, ʻa ʻeku sevāniti ko Seluipēpeli+ ko e foha ʻo Saletilí,’+ ko e fakahaaʻi ia ʻe Sihová, ‘pea te u ʻai koe ke ke hangē ha mama silá, koeʻuhí he ko koe ʻa e tokotaha kuó u filí,’ ko e fakahaaʻi ia ʻe Sihova ʻo e ngaahi kau taú.”