KI HE KAU KALĒTIÁ

1 Ko au Paula, ko ha ʻapositolo, ʻo ʻikai mei ha kau tangata pe fakafou ʻi ha tangata, kae fakafou ʻia Sīsū Kalaisi+ mo e ʻOtuá ko e Tamaí,+ ʻa ia naʻá ne fokotuʻu hake ia mei he maté, 2 ko au pea mo e kotoa ʻo e fanga tokoua ʻoku ʻiate aú, ko e faitohi atu ki he ngaahi fakatahaʻanga ʻo Kalētiá:

3 Fakatauange ke mou maʻu ʻa e ʻofa maʻataʻatā mo e melino mei he ʻOtuá ko ʻetau Tamaí pea mo e ʻEiki ko Sīsū Kalaisí. 4 Naʻá ne foaki ʻa ia tonu koeʻuhí ko ʻetau ngaahi angahalá+ ke ne fakahaofi ai kitautolu mei he fokotuʻutuʻu fulikivanu*+ lolotongá ʻo fakatatau ki he finangalo ʻo hotau ʻOtuá mo e Tamaí,+ 5 pea ke ʻa ʻEne ʻAfió ʻa e lāngilangí ʻo taʻengata pea taʻengata. ʻĒmeni.

6 ʻOku ou ofo ʻi he mātuʻaki vave hoʻomou tafoki* mei he Tokotaha ʻa ia naʻá ne ui kimoutolu fakafou ʻi he ʻofa maʻataʻatā ʻa Kalaisí ki ha toe faʻahinga ongoongo lelei kehe.+ 7 ʻOku ʻikai ko e pehē ʻoku ʻi ai ha toe ongoongo lelei kehe; ka ʻoku ʻi ai ʻa e faʻahinga ʻe niʻihi ʻoku nau fakatupu palopalema kiate kimoutolu+ mo nau loto ke mioʻi ʻa e ongoongo lelei fekauʻaki mo e Kalaisí. 8 Kae kehe, neongo kapau ko kimautolu pe ko ha ʻāngelo mei hēvani te ne talaki atu kiate kimoutolu ha ongoongo lelei ʻoku kehe atu ia mei he ongoongo lelei naʻa mau talaki atu kiate kimoutolú, tuku ke malaʻia ʻa e tokotaha ko iá. 9 Hangē ko ia naʻa mau leaʻaki ki muʻá, ʻoku ou toe leaʻaki ia ʻi he taimí ni, ʻIlonga ʻa ia ʻokú ne talaki atu kiate kimoutolu ha ongoongo lelei ʻoku kehe atu ia mei he meʻa naʻa mou talí, tuku ke malaʻia ʻa e tokotaha ko iá.

10 Ko hono moʻoní, ko e tangatá koā ʻoku ou feingá ni ke fakalotoʻí pe ko e ʻOtuá? Pe ko ʻeku feinga koā ke fakahōhōʻiaʻi ʻa e tangatá? Kapau naʻá ku kei fakahōhōʻiaʻi ʻa e tangatá, ʻe ʻikai te u hoko ai ko ha pōpula ʻa Kalaisi. 11 He ʻoku ou loto ke mou ʻilo, fanga tokoua, ko e ongoongo lelei naʻá ku talaki atu kiate kimoutolú ʻoku ʻikai ko e tupu ia mei ha tangata;+ 12 he naʻe ʻikai te u maʻu ia mei ha tangata, pe ko hano akoʻi mai ia kiate au, ka naʻe fakafou mai ia ʻi ha meʻa fakahā meia Sīsū Kalaisi.

13 Ko hono moʻoní, naʻa mou fanongo fekauʻaki mo hoku ʻulungaanga ki muʻa ʻi he lotu faka-Siú,+ ʻa e anga-fakamamahi* ʻa ʻeku hanganaki fakatangaʻi ʻa e fakatahaʻanga ʻa e ʻOtuá mo ʻeku feinga ke fakaʻauha iá;+ 14 pea naʻá ku fai ʻa e fakalakalaka ʻi he lotu faka-Siú ʻo lahi ange ia ʻi he tokolahi ʻo hoku toʻumeʻa ʻi hoku fonuá, he naʻá ku mātuʻaki faivelenga lahi ange ki he ngaahi talatukufakaholo ʻa ʻeku ngaahi tamaí.+ 15 Ka ko e ʻOtuá, ʻa ia naʻá ne fakamavaheʻi au mei he manava ʻo ʻeku faʻeé pea ui au fakafou ʻi heʻene ʻofa maʻataʻataá,+ ʻi heʻene finangalo lelei 16 ke fakaeʻa ʻa hono ʻAló fakafou ʻiate aú koeʻuhi ke u talaki atu ai ʻa e ongoongo lelei fekauʻaki mo iá ki he ngaahi puleʻangá,+ naʻe ʻikai te u kumi faleʻi ʻi he taimi pē ko iá ki ha taha pē ʻi he faʻahinga ʻo e tangatá;* 17 pea naʻe ʻikai te u ʻalu hake ki Selusalema ke kumi faleʻi ki he faʻahinga naʻa nau hoko ko e kau ʻapositolo ki muʻa ʻiate aú, ka naʻá ku ʻalu ki ʻAlepea, pea hili iá naʻá ku foki ki Tāmasikusi.+

18 ʻI he taʻu leva ʻe tolu mei ai naʻá ku ʻalu hake ki Selusalema+ ke ʻaʻahi kia Kīfasi,*+ pea naʻá ku nofo ai mo ia ʻi he ʻaho ʻe 15. 19 Ka naʻe ʻikai te u sio ki ha taha ʻo e kau ʻapositolo kehé, ko Sēmisi+ pē ko e tokoua ʻo e ʻEikí. 20 Ko ia ʻi he fekauʻaki mo e ngaahi meʻa ʻoku ou tohi atu ai kiate kimoutolú, ʻoku ou fakapapauʻi atu ʻi he ʻao ʻo e ʻOtuá ʻoku ʻikai te u loi.

21 ʻI he hili iá naʻá ku ʻalu ki he ngaahi vahefonua ʻo Sīlia mo Silisiá.+ 22 Ka naʻe ʻikai ke ʻiloʻi fakafoʻituitui au ʻe he ngaahi fakatahaʻanga ʻo Siutea ʻa ia naʻe fāʻūtaha mo Kalaisí. 23 Ko e meʻa pē naʻa nau faʻa fanongo ki aí: “Ko e tangata ko ia naʻá ne fakatangaʻi kitautolu ki muʻá+ ʻokú ne talaki he taimí ni ʻa e ongoongo lelei fekauʻaki mo e tui ʻa ia naʻá ne fakaʻauha ki muʻá.”+ 24 Ko ia naʻa nau kamata ke fakalāngilangiʻi ʻa e ʻOtuá koeʻuhí ko au.

2 Pea ʻi he hili ʻa e taʻu ʻe 14 naʻá ku toe ʻalu hake ki Selusalema mo Panepasa,+ peá u ʻave foki ai mo Taitusi.+ 2 Naʻá ku ʻalu haké koeʻuhí ko ha meʻa fakahā, pea naʻá ku ʻoatu kiate kinautolu ʻa e ongoongo lelei ko ia ʻoku ou malangaʻi ʻi he ngaahi puleʻangá. Kae kehe, naʻá ku fakataha pē ai mo e fanga tokoua naʻe tokaʻi lahí, ke fakapapauʻi ai naʻe ʻikai ko e muna pē ʻa e lele naʻá ku faí pe ko ia kuó u faí. 3 Ka neongo ia, naʻa mo Taitusi,+ ʻa ia naʻe ʻiate aú, naʻe ʻikai kounaʻi ia ke ne kamu,+ neongo ko ha Kalisi ia. 4 Ka naʻe malanga hake ʻa e meʻa ko iá koeʻuhi ko e fanga tokoua loi naʻe ʻomi fakaoloolo,+ ʻa ia naʻa nau moulu mai ke fai hano matakiʻi ʻa e tauʻatāina+ ʻoku tau maʻu ʻi he fāʻūtaha mo Kalaisi Sīsuú, koeʻuhi ke nau mātuʻaki taki pōpula ai kitautolu;+ 5 naʻe ʻikai te mau ʻulutukua ʻo fakamoʻulaloa kiate kinautolu,+ ʻikai, halaʻatā naʻa mo ha foʻi mōmeniti,* koeʻuhí ke ʻiate kimoutolu ai pē ʻa e moʻoni ʻo e ongoongo leleí.

6 Ka ʻi he fekauʻaki mo e faʻahinga naʻe hā ngali ʻoku nau mahuʻingá+—tatau ai pē pe ko e faʻahinga fēfē kinautolu, ʻoku ʻikai haʻanau kehe kiate au, he talaʻehai ʻoku fai ʻa e ʻOtuá ki he fōtunga hā mai ʻo ha tangata—ko e kau tangata naʻe tokaʻi lahi ko iá naʻe ʻikai te nau tuku mai ha meʻa foʻou kiate au. 7 ʻI hono kehé, ʻi heʻenau vakai ko ia kuo tuku mai kiate au ʻa hono malangaʻi ʻo e ongoongo leleí ki he faʻahinga ʻoku taʻekamú,+ ʻo hangē tofu pē ko hono tuku ia kia Pita ke ne malangaʻi ki he faʻahinga ʻoku kamú— 8 he ko e ʻOtuá naʻá ne fakaivia ʻa Pita ke hoko ko e ʻapositolo ki he faʻahinga ʻoku kamú naʻá ne toe fakaivia foki mo au maʻá e faʻahinga ʻo e ngaahi puleʻangá+— 9 pea naʻa nau ʻiloʻi naʻe fakahaaʻi mai kiate au ʻe he ʻOtuá ʻa e ʻofa maʻataʻatā,+ ko ia naʻe hanga ai ʻe Sēmisi+ mo Kīfasi* pea mo Sione, ʻa e faʻahinga naʻe hangē ko ha ngaahi pou ʻo e fakatahaʻangá, ʻo tuku mai kiate au mo Panepasa+ ʻa e nima toʻomataʻu ʻo e ngāue fakatahá,* mo nau pehē: “ʻOku lelei ke mo malanga ki he ngaahi puleʻangá, ka te mau malanga kimautolu ki he faʻahinga ʻoku kamú.” 10 Ko e meʻa pē naʻa nau kole maí ke ma manatuʻi ʻa e kau masivá, pea ko e meʻa foki ia kuó u feinga tōtōivi ke faí.+

11 Kae kehe, ʻi he haʻu ʻa Kīfasi*+ ki ʻAniteoké,+ naʻá ku talitekeʻi ia* mata ki he mata, koeʻuhi he naʻe hā mahino ʻene halá.* 12 He ki muʻa ke aʻu mai ha kau tangata meia Sēmisí,+ naʻá ne faʻa kai fakataha mo e kakai ʻo e ngaahi puleʻangá;+ ka ʻi heʻenau aʻu maí, naʻá ne tuku ʻa hono fai ʻo e meʻá ni peá ne fakamavaheʻi ia, ʻi heʻene manavahē ki he faʻahinga ko ia ʻo e haʻa kamú.+ 13 Naʻe toe kau fakataha foki mo ia ʻa e toenga ʻo e kau Siú ʻi he fakangalingali* ko ení, ko ia naʻa mo Panepasa naʻe tākiekina fakataha atu mo kinautolu ʻi heʻenau fakangalingalí.* 14 Ka ʻi heʻeku sio naʻe ʻikai te nau ʻaʻeva ʻo laka fakataha mo e moʻoni ʻo e ongoongo leleí,+ naʻá ku pehē kia Kīfasi* ʻi he ʻao ʻo kinautolú kotoa: “Kapau ʻokú ke moʻui, neongo ko ha Siu koe, ʻo hangē ko e moʻui ʻa e ngaahi puleʻangá kae ʻikai hangē ko e kau Siú, ʻe lava fēfē ke ke ʻai ʻa e kakai ʻo e ngaahi puleʻangá ke nau moʻui ʻo fakatatau ki he tōʻonga faka-Siú?”+

15 Ko kitautolu ʻa ia ko e kau Siu mei hono fanauʻi maí, ʻo ʻikai ko e kau angahala mei he ngaahi puleʻangá, 16 ʻoku tau ʻiloʻi ʻoku lau ʻoku māʻoniʻoni ha tangata, ʻo ʻikai ʻi he ngaahi ngāue ʻo e laó, kae fakafou pē ʻi he tui+ kia Sīsū Kalaisí.+ Ko ia kuo tau tui kia Kalaisi Sīsū, ko ia ʻe lau ai kitautolu ʻoku tau māʻoniʻoni ʻi he tui kia Kalaisí ʻo ʻikai ʻi he ngaahi ngāue ʻo e laó, he ʻoku ʻikai ha taha* ʻe lau ʻoku māʻoniʻoni ʻi he ngaahi ngāue ʻo e laó.+ 17 Ko ia kapau kuo ʻilo foki kitautolu ko e kau angahala lolotonga ia ʻetau feinga ke lau ʻoku tau māʻoniʻoni fakafou ʻia Kalaisí, ko Kalaisí leva ko ha tokotaha poupouʻi ia ʻo e angahalá? ʻIkai ʻaupito! 18 Kapau ko e ngaahi meʻa tofu pē ko ia naʻá ku holoki hifo ki muʻá ʻoku ou toe langa hake ia, ʻoku ou fakahāhā ai ko ha tokotaha maumau-lao au. 19 He fakafou ʻi he laó naʻá ku mate ai ki he laó,+ koeʻuhí ke u hoko ai ʻo moʻui ki he ʻOtuá. 20 Kuo tutuki au ki he ʻakaú fakataha mo Kalaisi.+ ʻOku ʻikai te u kei moʻui maʻaku,+ ka ʻoku ou moʻui ʻo fāʻūtaha mo Kalaisi. Ko e moʻoni, ko e moʻui ko ia ʻoku ou moʻui ai he taimí ni ʻi he kakanó, ʻoku ou moʻui ʻo fakatatau ki he tui ki he ʻAlo ʻo e ʻOtuá,+ ʻa ia naʻá ne ʻofeina au peá ne tuku atu ia koeʻuhi ko aú.+ 21 ʻOku ʻikai te u talitekeʻi* ʻa e ʻofa maʻataʻatā ʻa e ʻOtuá;+ he kapau ʻoku fakafou ʻi he laó ʻa e māʻoniʻoní, tā ko e koto kulanoa pē ʻa e pekia ʻa Kalaisí.+

3 ʻA e kau Kalētia vale ē! Ko hai kuó ne ʻomi kimoutolu ki he malumalu ʻo e tākiekina kovi ko ení,+ ʻa kimoutolu naʻe fakaʻaliʻali fakahāhā ʻi homou ʻaó ʻa hono tutuki ʻo Sīsū Kalaisi ʻi he ʻakaú?+ 2 Ko e meʻa eni ʻe taha ʻoku ou loto ke ʻeke kiate* kimoutolu: Naʻa mou maʻu ʻa e laumālié fakafou ʻi he ngaahi ngāue ʻo e laó pe koeʻuhí ko e tui ki he meʻa naʻa mou fanongoá?+ 3 ʻOku fuʻu pehē fau koā hoʻomou valé? ʻI he hili ko ia hoʻomou kamata ʻi ha ʻalunga fakalaumālié,* ʻoku mou fakaʻosiʻosi koā ʻi ha ʻalunga fakaekakano?*+ 4 Naʻe hoko koā hoʻomou kātekina ʻa e ngaahi faingataʻa lahi faú ko e koto taʻeʻaonga? ʻOku ou fakapapauʻi naʻe ʻikai moʻoni ke hoko ko e koto taʻeʻaonga! 5 Ko ia ai, ko e tokotaha ko ē ʻokú ne tokonaki atu kiate kimoutolu ʻa e laumālié mo fakahoko ʻa e ngaahi ngāue fakaofo+ ʻi homou lotolotongá, ʻokú ne fai koā iá koeʻuhí ko e ngaahi ngāue ʻo e laó naʻa mou faí pe koeʻuhí ko hoʻomou tui ki he meʻa naʻa mou fanongoá? 6 ʻOku hangē tofu pē ko ʻĒpalahame ʻi heʻene “tui kia Sihová,* pea naʻe lau ai ia ʻokú ne māʻoniʻoni.”+

7 ʻOku pau pē ʻoku mou ʻiloʻi ko e faʻahinga ko ia ʻoku piki ki he tuí ko e ngaahi foha kinautolu ʻo ʻĒpalahame.+ 8 Ko ia ko e Folofolá, ʻi heʻene tomuʻa ʻiloʻi ʻe lau ʻe he ʻOtuá ʻoku māʻoniʻoni ʻa e kakai ʻo e ngaahi puleʻangá fakafou ʻi he tuí, naʻá ne tomuʻa fakahaaʻi ʻa e ongoongo leleí kia ʻĒpalahame, ʻi heʻene pehē: “Fakafou ʻiate koe ʻe faitāpuekina ʻa e ngaahi puleʻangá kotoa.”+ 9 Ko ia ko e faʻahinga ʻoku piki ki he tuí ʻoku faitāpuekina fakataha kinautolu mo ʻĒpalahame, ʻa ia naʻá ne maʻu ʻa e tuí.+

10 Ko kinautolu kotoa ʻoku nau fakafalala ki he ngaahi ngāue ʻo e laó ʻoku nau ʻi he malumalu ʻo ha fakamalaʻia, he kuo tohi: “ʻOku malaʻia ʻa e tokotaha kotoa ʻoku ʻikai ke nofo maʻu ʻi he ngaahi meʻa kotoa pē kuo tohi ʻi he takainga tohi ʻo e Laó pea ʻikai ke fai ki aí.”+ 11 ʻIkai ko ia pē, ʻoku hā mahino fakafou ʻi he laó, ʻoku ʻikai lau ai ha taha ʻoku māʻoniʻoni ki he ʻOtuá,+ koeʻuhí he “ko e tokotaha māʻoniʻoní te ne moʻui koeʻuhí ko e tuí.”+ 12 Ka ko e Laó ʻoku ʻikai fakatuʻunga ia ʻi he tuí. ʻI hono kehé, “ko ha taha pē ʻokú ne fai ʻa e ngaahi meʻá ni te ne moʻui koeʻuhi ko e ngaahi meʻa ko iá.”+ 13 Naʻe fakatau mai kitautolu ʻe Kalaisi,+ ʻo ne fakatauʻatāinaʻi kitautolu+ mei he fakamalaʻia ʻa e Laó ʻaki ʻene hoko ko ha tokotaha malaʻia kae ʻikai ko kitautolu, koeʻuhí kuo tohi: “ʻOku malaʻia ʻa e tangata kotoa pē kuo tautau ʻi ha ʻakau.”+ 14 Naʻe hoko ení koeʻuhi ke hoko mai ai ʻa e tāpuaki ʻo ʻĒpalahamé ki he ngaahi puleʻangá fakafou ʻia Kalaisi Sīsū,+ ke tau maʻu ai ʻa e laumālie kuo talaʻofaʻakí+ fakafou ʻi heʻetau tuí.

15 Fanga tokoua, ʻoku ou lea ʻo ngāueʻaki ha fakatātā: ʻI hono fakalaoʻi pē ha fuakava, neongo ai pē kapau ko e fai ʻe ha tangata, heʻikai tāmateʻi ia ʻe ha taha pe ko hano fakalahi ia. 16 Ko e ngaahi talaʻofá leva naʻe folofolaʻaki kia ʻĒpalahame pea ki hono hakó.+ ʻOku ʻikai ke pehē ia ai, “pea ki ho ngaahi hakó,” ʻo ʻuhingá ki ha tokolahi. ʻI hono kehé, ko e pehē ko ia, “pea ki ho hakó,” ʻoku ʻuhinga iá ki he toko taha, ʻa ia ko Kalaisi.+ 17 ʻIkai ngata aí, ʻoku ou leaʻaki eni: Ko e Laó, ʻa ia naʻe hoko mai ʻi he taʻu ʻe 430 ki mui aí,+ ʻoku ʻikai ke ne fakataʻeʻaongaʻi ʻe ia ʻa e fuakava naʻe fai ki muʻa ʻe he ʻOtuá, ke hoko ʻo tāmateʻi ai ʻa e talaʻofá. 18 He kapau ʻoku foaki ʻe he ʻOtuá ʻa e tofiʻá ʻo fakafou ʻi he laó, tā ʻoku ʻikai leva ke kei fakafou ia ʻi ha talaʻofa; kae kehe, kuo foaki anga-ʻofa ia ʻe he ʻOtuá kia ʻĒpalahame fakafou ʻi ha talaʻofa.+

19 Pea ko e hā leva ai ʻa e Laó ia? Naʻe tānaki mai ia ke fakaeʻa ʻa e ngaahi maumau-laó,+ kae ʻoua ke aʻu mai ʻa e hako naʻe fai ki ai ʻa e talaʻofá;+ pea naʻe foaki mai ʻe he ʻOtuá ʻa e Laó ki he kau ʻāngeló+ pea naʻa nau talaki ia fakafou ʻi ha fakalaloa.+ 20 Pea ʻoku ʻikai ʻi ai ha fakalaloa kapau ko e toko taha pē ʻoku kaunga ki aí, ko ia ko e ʻOtuá tokotaha pē naʻá ne fai ʻa e talaʻofá. 21 Ko ia ai, ʻoku fepaki koā ʻa e Laó ia mo e ngaahi talaʻofa ʻa e ʻOtuá? ʻIkai ʻaupito! He kapau naʻe foaki mai ha lao ʻoku lava ke ne ʻomi ʻa e moʻuí, tā ne mei ʻi ai moʻoni ʻa e māʻoniʻoni fakafou ʻi he laó. 22 Ka naʻe tuku atu ʻe he Folofolá ʻa e ngaahi meʻa kotoa pē ki he pule ʻa e angahalá, koeʻuhí ke foaki ai ʻa e talaʻofa ʻoku tupu mei he tui kia Sīsū Kalaisí ki he faʻahinga ʻoku nau ngāueʻi ʻa e tuí.

23 Kae kehe, ki muʻa ke aʻu mai ʻa e tuí, naʻe leʻohi kitautolu ʻi he malumalu ʻo e laó, ʻo tuku atu ki he pule ʻa e laó, ʻo tau tatali ai ki he meʻa ʻe fakaeʻa mai ʻe he ʻOtuá.+ 24 Ko ia naʻe hoko ʻa e Laó ko hotau tauhi* ʻo taki atu ai kitautolu kia Kalaisi,+ koeʻuhi ke lau kitautolu ʻoku tau māʻoniʻoni fakafou ʻi he tuí.+ 25 Ka ko eni kuo aʻu mai ʻa e tuí,+ ʻoku ʻikai ke tau kei ʻi he malumalu ʻo ha tauhi.*+

26 Ko kimoutolu kotoa, ko hono moʻoní, ko e ngaahi foha ʻo e ʻOtuá+ fakafou ʻi hoʻomou tui kia Kalaisi Sīsuú.+ 27 He ko kimoutolu kotoa naʻe papitaiso kia Kalaisí kuo mou ʻai ʻa Kalaisi ʻiate kimoutolu.+ 28 ʻOku ʻikai ha Siu pe ha Kalisi,+ ʻoku ʻikai ha pōpula pe ha taha tauʻatāina,+ ʻoku ʻikai ha tangata pe ha fefine,+ he ko kimoutolu kotoa ʻoku mou taha pē ʻi he fāʻūtaha mo Kalaisi Sīsuú.+ 29 ʻIkai ngata aí, kapau ʻoku mou kau kia Kalaisi, ko e hako moʻoni kimoutolu ʻo ʻĒpalahame,+ ko e ngaahi ʻea+ ʻi he felāveʻi mo ha talaʻofa.+

4 Ko ia ʻoku ou leaʻaki ʻo pehē ʻi he kei hoko ʻa e ʻeá ko ha kiʻi tamá, ʻoku ʻikai te ne toe kehe ai mei ha pōpula, neongo ko e ʻeiki ia ʻo e meʻa kotoa pē, 2 koeʻuhí ʻoku ʻi ai ʻa e kakai ʻoku nau tokangaʻi ia mo hono falé kae ʻoua ke aʻu ki he ʻaho ne tomuʻa kotofa ʻe heʻene tamaí. 3 ʻI he founga meimei tatau, ko kitautolu foki, ʻi he taimi naʻa tau kei hoko ai ko e fānaú, naʻa tau pōpula ki he ngaahi meʻa tefito ʻo e māmaní.+ 4 Ka ʻi he aʻu ki he kakato ʻa e taimí, naʻe fekau mai ʻe he ʻOtuá hono ʻAló, ʻa ia naʻe fanauʻi mai ʻe ha fefine+ pea naʻá ne ʻi he malumalu ʻo e laó,+ 5 ke ne hanga ʻo fakatauʻatāinaʻi ʻaki hono fakatau mai ʻa e faʻahinga ʻi he malumalu ʻo e laó,+ koeʻuhi ke ohi ai kitautolu ʻe he ʻOtuá ko hono ngaahi foha.+

6 Pea koeʻuhi ko e ngaahi foha kimoutolu, kuo fekau mai ʻe he ʻOtuá ʻa e laumālie+ ʻo hono ʻAló ki hotau lotó,+ pea ʻoku kalanga ia: “ʻApā,* Tamai!”+ 7 Ko ia ʻoku ʻikai ai te ke kei hoko ko ha pōpula ka ko ha foha; pea kapau ko ha foha, tā ko ha ʻea foki mo koe fakafou ʻi he ʻOtuá.+

8 Ka neongo ia, ʻi he taimi naʻe ʻikai ke mou ʻilo ai ʻa e ʻOtuá, naʻa mou pōpula ai ki he faʻahinga ʻa ia ko e ngaahi ʻotua loi. 9 Ka ko eni kuo mou hoko ʻo ʻiloʻi ʻa e ʻOtuá, pe ʻi hono kehé, kuo mou hoko ʻo ʻiloʻi ʻe he ʻOtuá, ʻoku anga-fēfē leva hoʻomou toe tafoki ki he ngaahi meʻa tefito ʻo e māmaní ʻa ia ʻoku vaivai+ mo masivá mo mou loto ke mou toe pōpula ki aí?+ 10 ʻOku mou tauhi fakamākukanga ʻa e ngaahi ʻaho mo e ngaahi māhina+ mo e ngaahi faʻahitaʻu pea mo e ngaahi taʻu. 11 ʻOku ou manavahē koeʻuhí ko kimoutolu, naʻa kuo mole noa pē ʻeku ngaahi feinga naʻe fai maʻamoutolú.

12 Fanga tokoua, ʻoku ou kole atu kiate kimoutolu, mou hoko ʻo hangē ko aú, koeʻuhi naʻá ku faʻa hangē pē foki ko kimoutolú.+ Naʻe ʻikai te mou fai mai ha hala kiate au. 13 Ka ʻoku mou ʻilo koeʻuhi ko ʻeku puké naʻá ku maʻu ai ʻa e ʻuluaki faingamālie ke u talaki atu ai ʻa e ongoongo leleí kiate kimoutolu. 14 Pea neongo naʻe hoko hoku tuʻunga fakaesinó ko ha ʻahiʻahi kiate kimoutolu, naʻe ʻikai te mou taʻetokaʻi au pe palakūʻia ʻiate* au; ka naʻa mou tali au ʻo hangē ha ʻāngelo ʻa e ʻOtuá, ʻo hangē ko Kalaisi Sīsuú. 15 Ko fē ʻa e fiefia ko ia naʻa mou maʻú? He ʻoku ou fakamoʻoni atu kiate kimoutolu, kapau ko ha meʻa naʻe ala malava, ne mou mei kapeʻi homou matá ʻo ʻomai ia kiate au.+ 16 Pea ko ia ai, kuó u hoko koā ko homou fili koeʻuhi ko ʻeku tala atu kiate kimoutolu ʻa e moʻoní? 17 ʻOku tōtōivi ʻa e kakai ʻe niʻihi ke nau maʻu kimoutolu, kae ʻikai ki ha taumuʻa lelei; ʻoku nau loto ke fakamavaheʻi kimoutolu meiate au, koeʻuhi ke mou hoko ai ʻo vēkeveke ke muimui ʻiate kinautolu. 18 Kae kehe, ʻoku lelei maʻu pē ki ha taha ke ne kumi tōtōivi ke maʻu kimoutolu ki ha taumuʻa lelei ʻo ʻikai ʻi he taimi pē ʻoku ou ʻiate kimoutolu aí, 19 siʻeku fānau,+ ʻoku ou toe ongoʻi ʻa e langa koeʻuhí ko kimoutolu, pea ʻoku hangē ia ko e langā ʻa ha faʻē ʻoku teu fāʻelé. Pea ʻe hokohoko atu ʻeku ongoʻi ʻa e langá ni kae ʻoua kuo mou tapua atu ʻa e angaʻitangata ʻo e Kalaisí. 20 ʻOku ou fakaʻamu ange naʻe malava ke u ʻi hena mo kimoutolu he taimí ni pē, pea lea atu ʻi ha founga kehe ia, koeʻuhi ʻoku ou puputuʻu ʻiate kimoutolu.

21 Tala mai angé, ʻe kimoutolu ko ia ʻoku mou loto ke mou ʻi he malumalu ʻo e laó, ʻOku ʻikai koā te mou fanongo ki he Laó? 22 Ko e fakatātaá, kuo tohi ko ʻĒpalahamé naʻá ne maʻu ha foha ʻe toko ua, ko e taha ʻi he kaunangá+ pea ko e taha ʻi he fefine tauʻatāiná;+ 23 ka ko e tokotaha ʻi he kaunangá naʻe fanauʻi mai ia ʻo fakafou ʻi he tukufakaholo fakanatulá*+ pea ko e tokotaha ko ē ʻi he fefine tauʻatāiná naʻe fou mai ia ʻi ha talaʻofa.+ 24 Ko e ngaahi meʻá ni ʻoku lava ke vakai ki ai ko ha talanoa fakaefakatātā; he ko e ongo fefiné ni ʻokú na fakafofongaʻi ha ongo fuakava, ko e taha mei Moʻunga Sainai,+ ʻa ia ʻoku fakatupu fānau mai ki he nofo pōpula pea ko Hekaʻā ia. 25 Ko ia ko Hekaʻaá ʻokú ne fakafofongaʻi ʻa Sainai,+ ko ha moʻunga ʻi ʻAlepea, pea ʻoku fehoanaki ia mo Selusalema he ʻaho ní, he ʻokú ne nofo pōpula mo ʻene fānaú. 26 Ka ko e Selusalema ʻi ʻolungá ʻoku tauʻatāina, pea ko ia ʻa ʻetau faʻeé.

27 He kuo tohi: “Ke fiefia, ʻa koe fefine paʻa ʻa ia ʻoku ʻikai te ke fāʻelé; kalanga ʻi he fiefia, ʻa koe fefine ʻa ia ʻoku ʻikai te ke aʻusia ʻa e langaá; he ko e fānau ʻa e fefine liʻekiná ʻoku tokolahi ange ia ʻi he fānau ʻa e fefine ko ia ʻokú ne maʻu husepānití.”+ 28 Ko ia ko kimoutolu, fanga tokoua, ko e fānau ʻo e talaʻofá ʻo tatau pē mo ʻAisake.+ 29 Kae hangē tofu pē ko e taimi ko iá ʻi hono kamata fakatangaʻi ʻe he tokotaha naʻe fanauʻi ʻo fakafou ʻi he tukufakaholo fakanatulá* ʻa e tokotaha naʻe fanauʻi fakafou ʻi he laumālié,+ ʻoku pehē pē foki ʻi he taimí ni.+ 30 Ka neongo ia, ko e hā ʻa e lau ʻa e potu folofolá? “Kapusi ʻa e kaunangá mo ʻene tamá, he ko e tama ʻa e kaunangá ʻe ʻikai ʻaupito te ne hoko ko ha ʻea fakataha mo e tama ʻa e fefine tauʻatāiná.”+ 31 Ko ia fanga tokoua, ko e fānau kitautolu, ʻo ʻikai ʻa ha kaunanga, ka ko e fānau ʻa e fefine tauʻatāiná.

5 Ko e tauʻatāina ko iá kuo fakatauʻatāinaʻi kitautolu ki ai ʻe Kalaisí. Ko ia ai, tuʻu maʻu,+ pea ʻoua te mou tuku kimoutolu ke toe haʻisia ki ha ʻioke ʻo e fakapōpulá.+

2 Vakai! Ko au Paula, ʻoku ou tala atu kiate kimoutolu kapau te mou kamu, ʻe ʻikai hano ʻaonga ʻo Kalaisi kiate kimoutolu.+ 3 ʻOku ou toe fakamoʻoni atu ki he tangata kotoa pē ʻoku kamú te ne moʻuaʻaki leva ke tauhi ʻa e kotoa ʻo e Laó.+ 4 Kuo fakamavaheʻi kimoutolu meia Kalaisi, ʻa kimoutolu ʻoku mou feinga ke lau ʻoku mou māʻoniʻoni ko e meʻa ʻi he laó;+ kuo mou tō mamaʻo mei heʻene ʻofa maʻataʻataá. 5 Ko kitautolu ʻi heʻetau tafaʻakí, fakafou ʻi he laumālié ʻoku tau tatali vēkeveke ki he māʻoniʻoni ʻoku tau ʻamanaki ki aí ʻa ia ʻoku tupu mei he tuí. 6 He ʻi he fāʻūtaha mo Kalaisi Sīsuú, ʻoku ʻikai hano ʻaonga ʻoʻona ʻo e kamú pe taʻekamú,+ ka ko e tui ʻoku ngāue fakafou ʻi he ʻofá.

7 Naʻa mou lele lelei mai pē.+ Ko hai naʻá ne taʻofi kimoutolu mei he hokohoko atu hoʻomou talangofua ki he moʻoní? 8 Ko e faʻahinga fakalotoʻi ko ʻení ʻoku ʻikai haʻu ia mei he Tokotaha ʻokú ne ui kimoutolú. 9 Ko ha kiʻi meʻi lēvani* ʻokú ne fakatupu ʻa e takaonga mahoaʻá kotoa.+ 10 ʻOku ou falala atu ko kimoutolu ko ia ʻoku fāʻūtaha mo e ʻEikí+ heʻikai ke kehe hoʻomou fakakaukaú; ka ko e tokotaha ʻokú ne fakatupunga ʻa e māveuveu kiate kimoutolú,+ tatau ai pē pe ko hai, te ne maʻu ʻa e fakamaau ʻoku tuha mo iá. 11 Ka kiate au, fanga tokoua, kapau naʻá ku kei malangaʻi ʻa e kamú heʻikai te nau fakatangaʻi au, pea ko ʻeku akonaki fekauʻaki mo e pekia ʻa Sīsū ʻi he ʻakau fakamamahí*+ heʻikai ke kei fakaʻitaʻi ai ʻa e kakaí. 12 ʻOku ou fakaʻamu ange mai ko e kau tangata ko ia ʻoku nau tala atu ke mou kamú te nau fai ha meʻa ʻoku toe kovi ange kiate kinautolu.*

13 Naʻe ui kimoutolu ki he tauʻatāina, fanga tokoua; kehe pē ke ʻoua ʻe ngāueʻaki ʻa e tauʻatāina ko ʻení ko ha faingamālie ia ke tuli ai ki he ngaahi holi fakakakanó,+ kae fakafou ʻi he ʻofá, mou fetamaioʻeikiʻaki.+ 14 He ko e Laó kotoa kuo fakahoko* ia ʻi he foʻi fekau ko ʻení ʻe taha: “Kuo pau ke ke ʻofa ki ho kaungāʻapí ʻo hangē pē ko hoʻo ʻofa kiate koé.”+ 15 Ka ʻo kapau ʻoku mou kei feʻūʻuusi mo fekainaki,+ tokanga ke ʻoua naʻa mou hoko ʻo fefakaʻauhaʻaki ai.+

16 Ka ʻoku ou tala atu, Hanganaki ʻaʻeva ʻi he laumālié+ pea ʻe ʻikai ʻaupito te mou fakahoko ai ʻa e holi fakakakanó.+ 17 He ko e kakanó mo ʻene ngaahi holí ʻoku fepaki ia mo e laumālié, pea ʻoku fepaki ʻa e laumālié mo e kakanó; ko e ongo meʻá ni ʻokú na fepaki, ko ia ʻe ʻikai ai te mou fai ʻa e ngaahi meʻa tofu pē ko ia ʻoku mou loto ke faí.+ 18 ʻIkai ko ia pē, kapau ʻoku tataki kimoutolu ʻe he laumālié, ʻoku ʻikai te mou ʻi he malumalu ʻo e laó.

19 Ka ko eni ko e ngaahi ngāue ʻa e kakanó kuo hā mahino ia, ʻa ia ko e fehokotaki fakasino taʻetaau,*+ taʻemaʻa, faikovi taʻemīngao,*+ 20 tauhi ʻaitoli, fakahaʻele fakafaʻahikehe,*+ fakafili, fekeʻikeʻi, meheka, ʻita tōlili, fekīhiaki, fakafaʻafaʻahi, muimui ʻi he akonaki ʻa e tangatá, 21 loto-kovi, konā,+ ngaahi paati uatau,* mo e ngaahi meʻa hangē ko ʻení.+ ʻOku ou tomuʻa fakatokanga atu kiate kimoutolu ʻo fekauʻaki mo e ngaahi meʻá ni, hangē pē ko ia naʻá ku ʻosi fakatokanga atu ai kiate kimoutolú, ko e faʻahinga ʻoku nau tōʻongaʻaki ʻa e ngaahi meʻa peheé ʻe ʻikai te nau maʻu tofiʻa ʻi he Puleʻanga ʻo e ʻOtuá.+

22 ʻI he tafaʻaki ʻe tahá, ko e fua ʻo e laumālié ko e ʻofa, fiefia, melino, kātaki,* anga-lelei, lelei,+ tui, 23 anga-malū, mapuleʻi-kita.+ ʻOku ʻikai ha lao ke ne taʻofi ʻa e ngaahi meʻa ko ʻení. 24 ʻIkai ko ia pē, ko e faʻahinga ʻoku ʻo Kalaisi Sīsuú kuo nau tutuki ki he ʻakaú ʻa e kakanó fakataha mo ʻene ngaahi havalá mo ʻene ngaahi holí.+

25 Kapau ʻoku tau moʻui ʻo fakatatau ki he laumālié, tau ʻaʻeva taau ai pē foki ʻi he laumālié.+ 26 ʻAi ke ʻoua te tau hoko ʻo hīkisia,+ ʻo fakatupunga ha feʻauʻauhi,+ mo e femehekaʻaki.

6 Fanga tokoua, neongo kapau ʻoku fai ʻe ha tangata ha laka hala ki muʻa ke ne lāuʻilo ki aí, ko kimoutolu ko ia ʻoku mou maʻu ʻa e ngaahi tuʻunga taau fakalaumālié mou feinga ke fakatonutonu ha tangata pehē ʻi ha laumālie ʻo e anga-malū.+ Kae vakavakai kiate koe,+ telia naʻa fakataueleʻi foki ai mo koe.+ 2 Hokohoko atu hoʻomou fefuaʻaki hoʻomou ngaahi kavenga fakamafasiá,+ pea ʻi he foungá ni te mou fakahoko ai ʻa e lao ʻa e Kalaisí.+ 3 He kapau ʻoku fakakaukau ha taha ʻokú ne mahuʻinga lolotonga ia ʻoku ʻikai te ne mahuʻinga,+ ʻokú ne kākaaʻi ai ʻa ia tonu. 4 Kae tuku ki he tokotaha taki taha ke ne sivisiviʻi ʻene ngaahi ngāue pē ʻaʻaná,+ pea te ne maʻu leva ai ha ʻuhinga ke fiefia ʻi he fekauʻaki mo ia toko taha pē, ʻo ʻikai ʻi hono fakahoa atu ki ha taha kehe.+ 5 He ko e tokotaha taki taha te ne fua ʻene kavenga pē ʻaʻana.*+

6 ʻIkai ko ia pē, tuku ki ha taha pē ʻoku akoʻi* ʻi he folofolá ke ne fevahevaheʻaki ʻi he ngaahi meʻa lelei kotoa pē mo e tokotaha ʻokú ne ʻoatu ʻa e akonaki*+ peheé.

7 ʻOua ʻe tuku ke takihalaʻi kimoutolu: Ko e ʻOtuá ʻoku ʻikai ko ha tokotaha ia ʻe ala kākaaʻi.* He ʻilonga ha meʻa ʻoku tō ʻe ha taha, ko e meʻa ia te ne utú foki;+ 8 koeʻuhí ko e tokotaha ʻoku tō fakataha mo e fakakaukau atu ki hono kakanó te ne utu ʻa e ʻauʻauhá mei hono kakanó, ka ko e tokotaha ʻoku tō fakataha mo e fakakaukau atu ki he laumālié te ne utu ʻa e moʻui taʻengatá mei he laumālié.+ 9 Ko ia ʻai ke ʻoua naʻa tau foʻi ʻi hono fai ʻa e meʻa ʻoku leleí, he te tau utu ʻi hono taimi totonú kapau heʻikai ke tau helaʻia.*+ 10 Ko ia leva, lolotonga ko ia ʻetau kei maʻu ʻa e faingamālié,* tuku ke tau fai ha ngāue ʻoku leleí ki he tokotaha kotoa, kae tautautefito ki he faʻahinga ʻoku fekauʻaki mo kitautolu ʻi he tuí.

11 Mou sio ki he ngaahi mataʻitohi lalahi kuó u tohi atu ʻaki hoku nimá tonu kiate kimoutolú.

12 Ko e faʻahinga kotoa ʻoku nau loto ke ʻai ke nau hā matamatalelei ʻi he kakanó* ko e faʻahinga ia ʻoku nau feinga ke kounaʻi kimoutolu ke mou kamú, ʻoku nau fai pē iá ke nau hao ai mei hono fakatangaʻi koeʻuhi ko e ʻakau fakamamahi* ʻo e Kalaisí. 13 He naʻa mo e faʻahinga ʻoku kamú ʻoku ʻikai te nau tauhi ʻe kinautolu tonu ʻa e Laó,+ ka ʻoku nau loto ke mou kamu koeʻuhí ke nau maʻu ai ha ʻuhinga ke pōlepole ai fekauʻaki mo e meʻa kuo fai ki homou kakanó. 14 Kae fakatauange ke ʻoua ʻaupito naʻá ku pōlepole, tuku kehe pē ʻi he ʻakau fakamamahi* hotau ʻEiki ko Sīsū Kalaisí,+ ʻa ia fakafou ʻiate ia kuo tāmateʻi ai* ʻa e māmaní ʻi he fekauʻaki mo aú pea mo au ʻi he fekauʻaki mo e māmaní. 15 He ʻoku ʻikai mahuʻinga ʻa e kamú pe ko e taʻekamú,+ ka ko ha fakatupu foʻou+ ʻoku mahuʻingá. 16 Ko e meʻa ki he faʻahinga kotoa ʻoku nau ʻaʻeva taau ʻo fakatatau ki he tuʻutuʻuni fakaeʻulungaanga ko ʻení, ke ʻiate kinautolu ʻa e melinó mo e mēsí, ʻio, ke ʻi he ʻIsileli ʻa e ʻOtuá.+

17 Mei he taimí ni ʻo faai atu, tuku ke ʻoua ʻe fakahohaʻa mai ha taha kiate au, he ʻoku ou fataki ʻi hoku sinó ʻa e ngaahi fakaʻilonga ʻo ha pōpula ʻa Sīsū.+

18 Fanga tokoua, ke ʻi he laumālie ʻoku mou fakahāhaá ʻa e ʻofa maʻataʻatā ʻa hotau ʻEiki ko Sīsū Kalaisí, ʻĒmeni.