KI HE KAU FILIPAÍ

1 Ko au Paula mo Tīmote, ko ha ongo tamaioʻeiki ʻa Kalaisi Sīsū, ko e tohi atu ki he kotoa ʻo e kakai tapu ʻoku fāʻūtaha mo Kalaisi Sīsuú ʻa ia ʻoku nau ʻi Filipaí,+ fakataha mo e kau mātuʻa* ʻo e fakatahaʻangá mo e kau sevāniti fakafaifekaú:+

2 Fakatauange ke mou maʻu ʻa e ʻofa maʻataʻatā mo e melino mei he ʻOtuá ko ʻetau Tamaí pea mo e ʻEiki ko Sīsū Kalaisí.

3 ʻOku ou fakafetaʻi maʻu pē ki hoku ʻOtuá ʻi heʻeku manatuʻi kimoutolu 4 ʻi heʻeku hū tōtōaki kotoa pē maʻá e kotoa ʻo kimoutolú. ʻOku ou fai ʻa e hū tōtōaki taki taha fakataha mo e fiefia,+ 5 koeʻuhi ko e tokoni kuo mou fai ki he* ongoongo leleí mei he ʻuluaki ʻahó pē ʻo aʻu mai ki he mōmeniti ko ení. 6 He ʻoku ou tuipau ki he meʻa tonu ko ení, ko e tokotaha naʻá ne kamata ha ngāue lelei ʻiate kimoutolú te ne fakakakato ia+ kae ʻoua kuo aʻu ki he ʻaho ʻo Kalaisi Sīsuú.+ 7 ʻOku totonu pē ʻa ʻeku fakakaukau peheni fekauʻaki mo e kotoa ʻo kimoutolú, he ʻoku mou ʻi hoku lotó, ʻa kimoutolu ko ia ʻoku mou kaungāʻinasi mo au ʻi he ʻofa maʻataʻataá, fakatouʻosi ʻi hoku tuku pilīsoné+ pea ʻi hono taukapoʻi mo fokotuʻu fakalao ʻa e ongoongo leleí.+

8 He ko e ʻOtuá ko e fakamoʻoni ia kiate au ki heʻeku ʻunaloto atu kiate kimoutolu kotoa ʻi he manavaʻofa loloto ʻo hangē ko ia ʻoku maʻu ʻe Kalaisi Sīsuú. 9 Pea ko e meʻa eni ʻoku ou lotu hokohoko ki aí, ke hoko hoʻomou ʻofá ʻo toe fakautuutu ange+ fakataha mo e ʻilo totonu+ pea mo e mahino kakato;+ 10 ke mou fakapapauʻi ʻa e ngaahi meʻa ʻoku mahuʻinga angé,+ koeʻuhi ke mou hoko ʻo taʻehaʻila mo ʻikai fakatūkiaʻi ʻa e niʻihi kehé+ ʻo aʻu ki he ʻaho ʻo Kalaisí; 11 pea ke fakafonuʻaki kimoutolu ʻa e fua māʻoniʻoni, ʻa ia ʻoku fakafou ʻia Sīsū Kalaisi,+ ki he lāngilangi mo e fakahīkihikiʻi ʻo e ʻOtuá.

12 Ko ia ʻoku ou loto ke mou ʻilo, fanga tokoua, ko e tuʻunga ʻoku ou ʻi aí kuo hoko moʻoni ia ʻo laka ki muʻa ai ʻa e ongoongo leleí, 13 ko ia kuo hoko ai ʻa hoku tuku pilīsone+ koeʻuhi ko Kalaisí ʻo ʻilolahia+ ʻi he haʻohaʻonga kotoa ʻo e Kaʻate ʻa e ʻEmipolá pea mo e niʻihi kehé kotoa. 14 Ko e tokolahi taha leva ʻo e fanga tokoua ʻi he ʻEikí kuo nau maʻu ʻa e loto-pau koeʻuhi ko hoku tuku pilīsoné, pea ʻoku nau fakahāhā ʻo toe lahi ange ʻa e loto-toʻa ke lea taʻemanavahē ʻaki ʻa e folofola ʻa e ʻOtuá.

15 Ko e moʻoni, ʻoku malangaʻi ʻe he niʻihi ʻa e Kalaisí ʻi he meheka mo e fakavahavahaʻa, ka ko e niʻihi ʻi he taumuʻa lelei. 16 Ko e faʻahinga ʻoku malanga ʻi he taumuʻa leleí ʻoku nau fanongonongo ʻa e Kalaisí ʻi he ʻofa, he ʻoku nau ʻilo kuo fakanofo au ke u taukapoʻi ʻa e ongoongo leleí;+ 17 ka ko e faʻahinga ʻoku malanga ʻi he meheka mo e fakavahavahaʻá ʻoku nau fai ia tupu mei he loto-fekeʻikeʻi, ʻo ʻikai ʻi he taumuʻa ʻoku maʻa, he ko ʻenau taumuʻá ke fakatupu ha faingataʻa kiate au ʻi hoku tuku pilīsoné. 18 Ko e hā leva ʻa e olá? Ko e olá pē, ʻi he founga kotoa tatau ai pē pe ʻoku fai fakangalingali pe fai ʻi he moʻoni, ʻoku hoko ʻo fanongonongo ai ʻa Kalaisi, pea ʻoku ou fiefia ʻi he meʻá ni. Ko hono moʻoní, ʻe hokohoko atu pē ʻeku fiefiá, 19 he ʻoku ou ʻilo ʻe iku ʻa e meʻá ni ki hoku fakamoʻui fakafou ʻi hoʻomou hū tōtōakí+ pea ʻi he poupou ʻa e laumālie ʻo Sīsū Kalaisí.+ 20 ʻOku fehoanaki eni mo ʻeku fakatuʻotuʻa vēkeveke mo e ʻamanaki ʻe ʻikai te u mā ʻi ha faʻahinga meʻa, ka ʻi he tauʻatāina kotoa pē ʻo e leá ʻe hoko ai he taimí ni ʻa Kalaisi, ʻo hangē ko ʻene pehē maʻu pē ki muʻá, ʻo fakahīkihikiʻi fakafou ʻi hoku sinó, tatau ai pē pe ko e fakafou ʻi he moʻui pe fakafou ʻi he mate.+

21 He ʻi hoku tuʻungá, kapau te u moʻui, ʻoku ou moʻui maʻa Kalaisi,+ pea kapau te u mate, ʻoku lelei ia kiate au.+ 22 Kapau leva te u moʻui atu ʻi he kakanó, ʻe lava ke u maʻu ʻa e fua lahi ange mei heʻeku ngāué; kae kehe, ʻi he fekauʻaki mo e maté pe moʻuí, ʻoku ʻikai te u fakahaaʻi pe ko fē ʻoku ou loto ke fili ki aí. 23 ʻOku fefūsiaki au ʻi he ongo meʻa ko ení, he ʻoku ou holi ke fakatauʻatāinaʻi au pea ke u fakataha mo Kalaisi,+ ʻa ia, ko hono moʻoní, ʻoku lelei mamaʻo ange ia.+ 24 Kae kehe, ʻoku fiemaʻu ange ia ke u moʻui ai pē ʻi he kakanó koeʻuhí ko kimoutolu. 25 ʻI he ʻuhingá ni, te u kei moʻui atu pē mo kimoutolu, ʻio, te u kei ʻiate kimoutolu kotoa koeʻuhi ke mou tupulekina ʻi hoʻomou ngāue ki he ʻOtuá pea ke mou fiefia ʻi hoʻomou tuí, 26 koeʻuhi ʻi heʻeku toe foki atu kiate kimoutolú, ʻe tupulaki ai hoʻomou fiefiá he ko e kau muimui kimoutolu ʻo Kalaisi Sīsū.

27 Mou tōʻongaʻaki pē ha anga ʻoku* taau mo e ongoongo lelei ʻo fekauʻaki mo e Kalaisí,+ koeʻuhi ke tatau ai pē pe te u ʻalu atu ʻo sio kiate kimoutolu pe ʻikai te u ʻi hena, ʻe lava ke u fanongo fekauʻaki mo kimoutolu mo ʻilo ʻoku mou tuʻu maʻu ʻi he laumālie pē taha, fakataha mo e loto-taha+ ʻo feinga uouongataha maʻá e tui makatuʻunga ʻi he ongoongo leleí, 28 pea ʻoua naʻa mou hoko ʻo manavahē ʻi ha faʻahinga founga ʻi homou kau fakafepakí. Ko e meʻá ni tonu ko ha fakamoʻoni ia ʻo e fakaʻauha+ kiate kinautolu, ka ko e fakamoʻui kiate kimoutolu;+ pea ʻoku mei he ʻOtuá ia. 29 He kuo foaki atu kiate kimoutolu ʻa e monū ke ʻikai ngata pē ʻi hoʻomou tui kia Kalaisí, ka ke mou faingataʻaʻia foki koeʻuhi ko ia.+ 30 He ʻoku mou fehangahangai mo e fāinga tatau mo ia naʻa mou sio mai naʻá ku fehangahangai mo iá,+ ʻa ia ʻoku mou fanongo he taimí ni ʻoku ou kei fehangahangai pē mo iá.

2 Kapau leva ʻoku ʻi ai ha fakalototoʻa ʻia Kalaisi, kapau ʻoku ʻi ai ha fakanonga ʻi he ʻofa, kapau ʻoku ʻi ai ha fetokangaʻaki, kapau ʻoku ʻi ai ha manavaʻofa loloto mo e kaungāongoʻi loloto, 2 ko ia mou ʻai ʻeku fiefiá ke kakato ʻi hoʻomou maʻu ʻa e ʻatamai tatau mo maʻu ʻa e ʻofa tatau, ʻi he hoko ʻo fāʻūtaha kakato, ʻo maʻu ʻa e fakakaukau taha.+ 3 ʻOua naʻa fai ha meʻa tupu mei he loto-fekeʻikeʻi+ pe ʻi he fakamafutofuta,+ kae ʻaki ʻa e anga-fakatōkilalo* ʻo mou vakai ki he niʻihi kehé ʻoku nau māʻolunga ange ʻiate kimoutolu,+ 4 ʻoua ʻe kumi pē ki he lelei ʻa kimoutolú,+ kae kumi foki ki he lelei ʻa e niʻihi kehé.+

5 Tauhi ʻa e fakakaukau fakaeʻatamai ko ʻení ʻiate kimoutolu ʻa ia foki naʻe ʻia Kalaisi Sīsuú,+ 6 ʻa ia, neongo naʻá ne hangē ko e ʻOtuá,+ naʻe ʻikai ʻi ai haʻane teitei fakakaukau ke ne feinga ke hoko ‘o tatau mo e ‘Otuá.+ 7 ʻIkai, ka naʻá ne fakamasivesivaʻi ʻa ia tonu peá ne hoko ʻo hangē ko ha tamaioʻeiki+ peá ne hoko ai ko ha tangata.*+ 8 Mahulu hake aí, ʻi he taimi naʻá ne hoko mai ai ko ha tangatá,* naʻá ne fakatōkilaloʻi ia peá ne hoko ʻo talangofua ʻo aʻu ki he tuʻunga ʻo e maté,+ ʻio, ko e mate ʻi ha ʻakau fakamamahi.*+ 9 ʻI he ʻuhinga tofu pē ko ʻení, naʻe hakeakiʻi ai ia ʻe he ʻOtuá ki ha tuʻunga māʻolunga+ peá ne foaki anga-lelei ange kiate ia ʻa e hingoa ʻa ia ʻoku māʻolunga ia ʻi he hingoa kehe kotoa pē,+ 10 koeʻuhi ke tūʻulutui ʻa e tui kotoa pē ki he huafa ʻo Sīsuú—ʻa e faʻahinga ʻi hēvaní mo e faʻahinga ʻi māmaní pea mo e faʻahinga ʻi lolofonuá+— 11 pea ke talaki fakahāhā ʻe he tokotaha* kotoa pē ko Sīsū Kalaisi ʻa e ʻEikí+ ke lāngilangiʻia ai ʻa e ʻOtuá ko e Tamaí.

12 Ko ia ai, siʻoku ngaahi ʻofaʻanga, hangē tofu pē ko ia ko hoʻomou talangofua maʻu peé, ʻo ʻikai ngata pē ʻi he lolotonga ʻeku ʻi hená ka ʻoku toe ʻāsili ange ia he taimí ni ʻi he ʻikai ke u ʻi hená, mou hanganaki ngāueʻi homou fakamoʻui ʻo kimoutolú ʻi he manavahē mo e tetetete. 13 He ko e ʻOtuá ʻa e tokotaha ʻokú ne fakaivia kimoutolú, ʻo ne fakatou ʻoatu kiate kimoutolu ʻa e holi mo e mālohi ke mou ngāue ki he meʻa ʻokú ne hōhōʻia aí. 14 Hanganaki fai ʻa e ngaahi meʻa kotoa pē ʻo ʻikai ha lāunga+ mo ha fakakikihi,+ 15 ke mou hoko ai ʻo taʻehalaia mo tonuhia, ko e fānau ʻa e ʻOtuá+ ʻoku taʻehamele ʻi he lotolotonga ʻo ha toʻutangata pikopiko mo mioʻi,+ ʻa ia ko honau lotolotongá ʻoku mou ulo atu ai ko e ngaahi maamaʻanga ʻi he māmaní,+ 16 pea hanganaki piki ke maʻu ki he folofola ʻo e moʻuí.+ Pea te u maʻu ai ʻa e ʻuhinga ke u fiefia ʻi he ʻaho ʻo Kalaisí, ʻi hono ʻiloʻi naʻe ʻikai ke kulanoa ʻeku lelé pe kulanoa ʻeku ngāue mālohí. 17 Kae kehe, neongo kapau ʻoku lilingi atu au ʻo hangē ha feilaulau inu+ ʻi he feilaulaú+ pea mo e ngāue toputapu ʻa ia kuo hanga ʻe hoʻomou tuí ʻo taki atu kimoutolu ki aí, ʻoku ou fiefia mo nēkeneka fakataha mo kimoutolu kotoa. 18 ʻI he founga tatau pē, ʻoku totonu foki ke mou fiefia mo nēkeneka fakataha mo au.

19 Pea ʻoku ou ʻamanaki ʻi he ʻEiki ko Sīsuú ke fekau atu ʻa Tīmote+ kiate kimoutolu ʻi ha taimi nounou mei heni, koeʻuhi ke hoko ʻo fakalototoʻaʻi ai au ʻi he taimi te u maʻu ai ha ongoongo fekauʻaki mo kimoutolú. 20 He ʻoku ʻikai te u maʻu ha toe taha mo ha hehema fakaefakakaukau hangē ko ia ʻokú ne maʻú ʻa ia te ne tokanga moʻoni kiate kimoutolu. 21 He ko e kotoa ʻo e niʻihi kehé ʻoku nau kumi ki he lelei pē ʻa kinautolú, ʻo ʻikai ki he meʻa ʻoku fiemaʻu ʻe Sīsū Kalaisí. 22 Ka ʻoku mou ʻiloʻi ʻa e fakamoʻoni naʻá ne tuku mai fekauʻaki mo ia tonú, ʻa ia ʻi he hangē ha kiʻi tama+ mo haʻane tamaí naʻá ne ngāue fakatamaioʻeiki fakataha mo au ke laka ki muʻa ai ʻa e ongoongo leleí. 23 Ko ia ai, ko ia ʻa e tokotaha ʻoku ou ʻamanaki ke fekauʻi atu ʻi heʻeku ʻiloʻi pē ko ia ʻa e meʻa ʻe hoko kiate aú. 24 Ko e moʻoni, ʻoku ou falala pau ʻi he ʻEikí ʻe vavé ni ke u ʻalu atu mo au foki.+

25 Ka ʻi he taimi ní ʻoku ou fakakaukau ʻoku totonu ke fekau atu kiate kimoutolu ʻa ʻEpafalotaito, ko hoku tokoua ʻi he tuí mo e kaungāngāue pea ko ha sōtia foki ʻa Kalaisi, pea ko hoʻomou talafekau mo e sevāniti fakafoʻituitui ki heʻeku fiemaʻú,+ 26 he ʻokú ne fakaʻamu ke sio ki he kotoa ʻo kimoutolú pea ʻokú ne loto-mafasia koeʻuhí ko hoʻomou fanongo ʻi heʻene puké. 27 Ko e moʻoni, naʻá ne puke ʻo ne meimei mate; ka naʻe meesi ʻa e ʻOtuá kiate ia, ko hono moʻoní, ʻo ʻikai kiate ia pē kae toe pehē foki kiate au, koeʻuhi ke ʻoua ʻe hoko ʻo taulōfuʻu mai ʻa e mamahí kiate au. 28 Ko ia ai, ʻoku ou fekau atu ia ʻi he vave tahá, koeʻuhi ke mou toe fiefia ʻi hoʻomou sio kiate iá pea siʻi ange ai foki mo ʻeku loto-moʻuá. 29 Ko ia mou fai kiate ia ʻa e talitali lelei ʻoku mou angaʻakí ʻi he ʻEikí ʻaki ʻa e fiefia kotoa, pea hanganaki fakamahuʻingaʻi ʻa e kau tangata peheé,+ 30 koeʻuhí naʻá ne meimei mate koeʻuhi ko e ngāue ʻa Kalaisí,* ʻi hono tuku atu ʻene moʻuí ki he tuʻunga fakatuʻutāmaki koeʻuhi ke ne fai mai kiate au ʻa e tokoni, ʻa ia naʻe ʻikai lava ke mou faí.+

3 Fakaʻosí, ʻe hoku fanga tokoua, hokohoko atu ʻa e fiefia ʻi he ʻEikí.+ ʻOku ʻikai fakaongosia kiate au ke u tohi atu ʻa e ngaahi meʻa tatau kiate kimoutolu, pea ko e fai atu iá ke mou malu ai.

2 Vakavakai telia ʻa e fanga kulií;* vakavakai telia ʻa e kau fakatupu maumaú; vakavakai telia ʻa e faʻahinga ʻoku nau loto ke mou kamú.*+ 3 He ko kitautolu ia ʻa e faʻahinga kuo kamu moʻoní,+ ʻa kitautolu ʻoku tau fai ʻa e ngāue toputapú ʻaki ʻa e laumālie ʻo e ʻOtuá pea pōlepole ʻia Kalaisi Sīsū+ pea ʻoku ʻikai fakatuʻunga ʻetau falala paú ʻi he kakanó, 4 kapau ʻoku ʻi ai ha taha ʻoku pōlepole koeʻuhi ko ʻene falala pau ʻi he kakanó, ʻe lava ke u pōlepole lahi ange au ʻiate ia: 5 Naʻe kamu au ʻi he ʻaho hono valú,+ ko aú mei he puleʻanga ʻo ʻIsilelí, mei he matakali ʻo Penisimaní, ko ha Hepelū ne fāʻeleʻi ʻe ha ongo mātuʻa Hepelū;+ ʻi he fekauʻaki mo e laó, ko ha Fālesi au;+ 6 ʻi he fekauʻaki mo e faivelengá, naʻá ku fakatangaʻi ʻa e fakatahaʻangá;+ ʻi he fekauʻaki mo e māʻoniʻoni makatuʻunga ʻi he laó, ko ha tokotaha au naʻá ku fakamoʻoniʻi atu ʻoku ou taʻehalaia. 7 Neongo ia, ko e ngaahi meʻa naʻe hoko ko e fakakoloa kiate aú, naʻá ku lau ia ko e koto taʻeʻaonga* koeʻuhi ko e Kalaisí.+ 8 Ko hono moʻoní, ʻi he meʻa ko iá, ʻoku ou lau moʻoni foki ai ʻa e ngaahi meʻa kotoa pē ko e koto taʻeʻaonga koeʻuhi ko e mahuʻinga taʻehanotatau ʻo e ʻilo kia Kalaisi Sīsū ko hoku ʻEikí. Ko e meʻa kiate iá, kuó u siʻaki ai ʻa e ngaahi meʻa kotoa pē pea ʻoku ou lau ia ko e fuʻu koto kinohaʻa,* koeʻuhí ke u maʻu ʻa Kalaisi 9 pea ke u hoko ai ʻo fāʻūtaha mo ia, ʻo ʻikai koeʻuhi ko ʻeku māʻoniʻoni ʻi heʻeku muimui ʻi he Laó, ka koeʻuhi ko e māʻoniʻoni ʻa ia ʻoku fakafou ʻi he tui+ kia Kalaisí,+ ʻa e māʻoniʻoni mei he ʻOtuá ʻa ia ʻoku makatuʻunga ʻi he tuí.+ 10 Ko ʻeku taumuʻá ke ʻiloʻi ia pea mo e mālohi ʻokú ne fokotuʻu hake+ ia mei he maté. ʻOku ou loto ke u faingataʻaʻia+ hangē ko iá pea mate foki ʻo hangē ko iá,+ 11 heiʻilo naʻa lava ai ke u kau ʻi he ʻuluaki toetuʻu mei he maté.+

12 ʻOku ʻikai ke pehē ia kuó u ʻosi maʻu ia pe kuo ʻosi fakahaohaoa au, ka ʻoku ou tutui atu+ heiʻilo naʻa lava ai ke u maʻu ʻa e meʻa ko ia naʻe fili au ki ai ʻe Kalaisi Sīsuú.+ 13 Fanga tokoua, ʻoku teʻeki te u lau ʻe au kuó u ʻosi maʻu ia; ka ko e meʻa ʻe taha ʻoku paú: ʻOku ou fakangaloʻi ʻa e ngaahi meʻa ʻi muí+ pea ʻoku ou kakapa atu ki he ngaahi meʻa ʻi muʻá,+ 14 ʻoku ou tutui atu ki he taumuʻa ko ia ke maʻu ʻa e pale+ ʻo e ui fakahēvani+ mei he ʻOtuá fakafou ʻia Kalaisi Sīsuú. 15 Ko ia ai, tuku ki he faʻahinga ʻo kitautolu ʻoku matuʻotuʻá+ ke tau maʻu ʻa e fakakaukau fakaeʻatamai ko ení, pea kapau ʻoku kehe hoʻomou hehema fakaefakakaukaú ʻi ha faʻahinga tafaʻaki, ʻe fakaeʻa atu ʻe he ʻOtuá ʻa e fakakaukau totonú kiate kimoutolu. 16 Tatau ai pē pe ko e hā, ko e tuʻunga ko ia kuo aʻu ki ai ʻetau fakalakalaká, tuku ke hokohoko atu ʻetau ʻaʻeva taau ʻi he ʻalunga tatau pē ko iá.

17 Mou fāʻūtaha ʻo faʻifaʻitaki kiate au,+ fanga tokoua, pea mou tokanga ai pē ki he faʻahinga ʻoku nau ʻaʻeva ʻi ha founga ʻoku fehoanaki mo e faʻifaʻitakiʻanga naʻa mau fokotuʻu kiate kimoutolú. 18 He ʻoku ʻi ai ʻa e tokolahi—naʻá ku faʻa toutou lave kiate kinautolu ka ko eni ʻoku ou toe lave kiate kinautolu fakataha mo e tangi—ʻa ia ʻoku nau ʻaʻeva ko e ngaahi fili ʻo e ʻakau fakamamahi* ʻo e Kalaisí. 19 Ko honau ikuʻangá ko e ʻauha, pea ko honau ʻotuá ʻa honau keté,* pea ʻoku nau pōlepole ʻi he ngaahi meʻa kuo pau ke nau mā ai, pea ʻoku tuku honau ʻatamaí ʻi he ngaahi meʻa ʻo e māmaní.+ 20 Ka ko hotau tuʻunga tangataʻifonuá+ ʻoku ʻi he langí,+ pea ʻoku tau tatali vēkeveke atu ki ha tokotaha fakamoʻui mei ai, ko e ʻEiki ko Sīsū Kalaisí,+ 21 ʻa ia te ne liliu ʻa hotau sino vaivaí ke hangē ko* hono sino lāngilangiʻiá+ ʻaki ʻa hono fuʻu mālohi ko ia ʻokú ne fakaivia ia ke ne fakamoʻulaloaʻi ʻa e ngaahi meʻa kotoa pē kiate iá.+

4 Ko ia ai, ʻe hoku fanga tokoua ʻa ia ʻoku ou ʻofa mo ʻunaloto atu ki ai, ko hoku fiefiaʻanga mo hoku kalauni,+ mou tuʻu maʻu+ ʻi he ʻEikí ʻo hangē ko ia naʻá ku lave atu ki aí, siʻoku ngaahi ʻofaʻanga.

2 ʻOku ou enginaki kia ʻIuotia mo Siniteke ke na fakakaukau taha ʻi he ʻEikí.+ 3 ʻIo, ʻoku ou kole atu kiate koe foki, ʻi he tuʻunga ko ha kaungāngāue* moʻoní, ke ke hanganaki tokoniʻi ʻa e ongo fefiné ni ʻa ia kuó na ngāue mālohi fakataha mo au ʻi hono fanongonongo ʻa e ongoongo leleí, fakataha mo Kelemeni pea pehē ki he toenga ʻo hoku ngaahi kaungāngāué, ʻa ia ko honau ngaahi hingoá ʻoku ʻi he tohi ʻo e moʻuí.+

4 Fiefia maʻu ai pē ʻi he ʻEikí. Te u toe lea atu, Mou fiefia!+ 5 Tuku ke hoko hoʻomou fakakaukau leleí*+ ʻo ʻiloʻi ʻe he tangata kotoa pē. ʻOku ofi ʻa e ʻEikí. 6 ʻOua ʻe hoko ʻo loto-moʻua ʻi ha faʻahinga meʻa,+ ka ʻi he meʻa kotoa pē mou ʻai ke ʻilo hoʻomou ngaahi kolé ʻe he ʻOtuá, fakafou ʻi he lotu mo e hū tōtōaki fakataha mo e fakafetaʻi;+ 7 pea ko e nonga*+ ʻa e ʻOtuá ʻa ia ʻoku fakalaka atu ʻi he mahino kotoa pē te ne maluʻi homou lotó+ pea mo homou ngaahi mafai fakaefakakaukaú* fakafou ʻia Kalaisi Sīsū.

8 Fakaʻosí, fanga tokoua, ʻilonga ʻa e ngaahi meʻa ʻoku moʻoní, ʻilonga ʻa e ngaahi meʻa ʻoku mafatukitukí, ʻilonga ʻa e ngaahi meʻa ʻoku māʻoniʻoní, ʻilonga ʻa e ngaahi meʻa ʻoku maʻá, ʻilonga ʻa e ngaahi meʻa ʻoku ʻofeiná, ʻilonga ʻa e ngaahi meʻa ʻoku lauʻi leleí, ʻilonga ʻa e ngaahi meʻa ʻoku leleí, pea ʻilonga ʻa e ngaahi meʻa ʻoku taau ke fakahīkihikiʻí, hokohoko atu ʻa e tokanga* ki he ngaahi meʻá ni.+ 9 Ko e ngaahi meʻa naʻa mou ako pea mo ia foki naʻa mou tali mo fanongo ai pea mo mātā ʻi he fekauʻaki mo aú, mou fai ʻa e ngaahi meʻá ni,+ pea ko e ʻOtua ʻo e melinó te ne ʻiate kimoutolu.

10 ʻOku ou fiefia lahi ʻi he ʻEikí koeʻuhi kuo faifai ange eni pea mou toe fakakaukau mai kiate au.+ Neongo naʻa mou tokanga mai fekauʻaki mo au, naʻe ʻikai ha faingamālie ke mou fakahāhaaʻi ai ia. 11 ʻOku ʻikai ko ʻeku leaʻaki ʻení koeʻuhí ko ʻeku masivá, he kuó u ako ke u loto-topono* ʻo tatau ai pē pe ko e hā hoku ngaahi tuʻungá.+ 12 ʻOku ou ʻiloʻi ʻa e founga ke moʻui ai ʻi he feʻamokakí+ pea mo e founga ke moʻui ai ʻi he hulu fau ʻa e ngaahi meʻá. ʻI he meʻa kotoa pē pea ʻi he tuʻunga kotoa pē kuó u ako ai ʻo ʻilo ʻa e fakapulipuli fakatouʻosi ki he founga ke moʻui mākona aí mo e founga ke moʻui ai ʻi he fiekaiá, fakatouʻosi ʻa e founga ke moʻui ai ʻi he hulu fau ʻa e ngaahi meʻá pea mo e founga ke moʻui ai ʻi he taʻemaʻu ha meʻá. 13 ʻOku ou malava ʻa e meʻa kotoa pē koeʻuhi ʻoku ou maʻu ʻa e ivi fakafou ʻi he tokotaha ko ia ʻokú ne ʻomai kiate au ʻa e mālohí.+

14 Ka neongo ia, ko e meʻa lelei hoʻomou kau fakataha mo au ʻi hoku mamahí. 15 Ko hono moʻoní, ko kimoutolu kau Filipai ʻoku mou ʻilo foki ko e hili ko ia hoʻomou fuofua ako ʻo ʻilo ʻa e ongoongo leleí, ʻi he taimi naʻá ku mavahe ai mei Masitōniá, naʻe ʻikai ha fakatahaʻanga naʻe tokoni mai kiate au pe tali ʻa ʻeku tokoní, tuku kehe pē kimoutolu;+ 16 he ʻi he lolotonga ʻeku ʻi Tesalonaiká, naʻa mou ʻomai ha tokoni kiate au ki heʻeku fiemaʻú ʻo ʻikai tuʻo taha pē kae tuʻo ua. 17 ʻOku ʻikai ko haʻaku feinga ke maʻu ha meʻaʻofa, ka ʻoku ou fiemaʻu ke u sio ki he fua ʻokú ne ʻomai ʻa e tupu lahi ange kiate kimoutolu. 18 Kae kehe, ʻoku ou maʻu ʻa e meʻa kotoa pē ʻoku ou fiemaʻú mo e toe meʻa lahi ange. Kuo lato ʻeku fiemaʻú, he ko eni kuó u maʻu meia ʻEpafalotaito+ ʻa e meʻa naʻa mou ʻomaí, ko ha meʻa namu-kakala,+ ko ha feilaulau fakahōifua, ʻoku hōhōʻia ai ʻa e ʻOtuá. 19 Ko ia ai, ʻe tokonaki kakato atu ʻe he ʻOtuá ʻa hoʻomou ngaahi fiemaʻú+ ʻo fakatatau ki heʻene koloa lāngilangiʻiá fakafou ʻia Kalaisi Sīsū. 20 Pea ki hotau ʻOtuá mo e Tamaí, ke ʻaʻana ʻa e lāngilangí ʻo taʻengata pea taʻengata. ʻĒmeni.

21 ʻOatu hoku ʻofa ki he tokotaha tapu kotoa pē ʻoku fāʻūtaha mo Kalaisi Sīsuú. Ko e fanga tokoua ko ia ʻoku nau ʻi heni mo aú ʻoku ʻoatu honau ʻofa kiate kimoutolu. 22 Ko e kotoa ʻo e kakai tapú, kae tautefito ki he faʻahinga ʻo e fale ʻo Sisá,+ ʻoku ʻoatu honau ʻofa kiate kimoutolu.

23 Ko e ʻofa maʻataʻatā ʻa e ʻEiki ko Sīsū Kalaisí ke ʻi he laumālie ia ʻoku mou fakahāhaá.