KI HE KAU KOLOSÉ

1 Ko au Paula, ko ha ʻapositolo ʻa Kalaisi Sīsū fakafou ʻi he finangalo ʻo e ʻOtuá, pea mo Tīmote+ ko hotau tokouá, 2 ko e tohi atu ki he kakai tapú mo e fanga tokoua faitōnunga ʻi Kolose ʻa ia ʻoku nau fāʻūtaha mo Kalaisí:

Fakatauange ke mou maʻu ʻa e ʻofa maʻataʻatā mo e melino mei he ʻOtuá ko ʻetau Tamaí.

3 ʻOku mau fakamālō maʻu pē ki he ʻOtuá, ko e Tamai ʻa hotau ʻEiki ko Sīsū Kalaisí, ʻi he taimi ʻoku mau lotu ai maʻamoutolú, 4 he kuo mau fanongo fekauʻaki mo hoʻomou tui kia Kalaisi Sīsuú pea mo e ʻofa ʻoku mou maʻu ki he kotoa ʻo e kakai tapú 5 koeʻuhi ko e ʻamanaki ʻoku tuku tauhi maʻa kimoutolu ʻi he langí.+ Naʻa mou fanongo ki muʻa ʻo fekauʻaki mo e ʻamanaki ko ʻení fakafou ʻi he pōpoaki ʻo e moʻoni ʻo e ongoongo leleí 6 ʻa ia kuo aʻu atu kiate kimoutolú. Hangē tofu pē ko e fakatupu fua mo e tupulaki ʻa e ongoongo leleí ʻi he kotoa ʻo e māmaní,+ ʻoku pehē pē foki ʻene hoko ia ʻi homou lotolotongá talu mei he ʻaho naʻa mou fanongo ai mo ʻiloʻi totonu ʻi hono tuʻunga moʻoní ʻa e ʻofa maʻataʻatā ʻa e ʻOtuá. 7 Ko e meʻa ia kuo mou ʻilo meia ʻEpafasi ko siʻomau kaungā-tamaioʻeiki ʻofeiná,+ ʻa ia ko e faifekau* faitōnunga ʻa e Kalaisí maʻa kitautolu. 8 Naʻá ne toe fakaʻilo mai foki kiate kimautolu ʻa hoʻomou ʻofa ʻa ia ʻoku fai ʻi ha founga fakalaumālié.*

9 Ko e toe ʻuhinga foki ia talu mei he ʻaho naʻa mau fanongo ai fekauʻaki mo iá, kuo ʻikai ʻaupito tuku ai ʻemau lotu maʻamoutolú+ mo e kole ke lava ʻo mou hoko ʻo fonu ʻi he ʻilo totonu+ fekauʻaki mo hono finangaló ʻi he poto mo e mahino fakalaumālie kotoa pē,+ 10 koeʻuhi ke mou ʻaʻeva ʻo taau mo Sihova* koeʻuhí ke fakahōifuaʻi kakato ia ʻi hoʻomou hoko atu ko ia ʻo fakatupu fua ʻi he ngāue lelei kotoa pē mo tupulaki ʻi he ʻilo totonu fekauʻaki mo e ʻOtuá;+ 11 pea fakatauange ke fakaivimālohiʻi kimoutolu ʻaki ʻa e mālohi kotoa ʻo fakatatau ki hono māfimafi lāngilangiʻiá+ koeʻuhí ke mou kātekina ʻa e meʻa kotoa pē ʻi he kātaki mo e fiefia, 12 ʻi hoʻomou fakamālōʻia ʻa e Tamaí, ʻa ia naʻá ne ʻai kimoutolu ke mou taau ke kaungāʻinasi ʻi he tofiʻa ʻo e kakai tapú+ ʻa ia ʻoku nau ʻi he māmá.

13 Naʻá ne fakahaofi kitautolu mei he mafai ʻo e fakapoʻulí+ peá ne ʻave kitautolu ki he puleʻanga ʻo hono ʻAlo ʻofaʻangá, 14 ʻa ia ʻoku fakafou ʻiate ia ʻetau maʻu hotau fakatauʻatāina fakafou ʻi he huhuʻí, ʻa e fakamolemole ʻo ʻetau ngaahi angahalá.+ 15 Ko ia ʻa e ʻīmisi ʻo e ʻOtua taʻehāmaí,+ ko e ʻuluaki fakatupu ia ʻi he meʻa fakatupu kotoa pē;+ 16 koeʻuhí naʻe fakafou ʻiate ia, ʻa hono fakatupu ʻa e ngaahi meʻa kehe kotoa pē ʻi he langí pea ʻi he māmaní, ʻa e ngaahi meʻa hā mai mo e ngaahi meʻa taʻehāmai,+ ʻo tatau ai pē pe ko e ngaahi taloni pe tuʻunga ʻeiki pe ko e ngaahi founga-pule pe ko e ngaahi mafai kinautolu. Ko e ngaahi meʻa kehe kotoa pē kuo fakatupu ia fakafou ʻiate ia+ pea maʻana. 17 Pehē foki, ko e ki muʻa ia ʻi he ngaahi meʻa kehe kotoa pē,+ pea fakafou ʻiate ia naʻe ngaohi ai ʻa e ngaahi meʻa kehe kotoa pē ke nau ʻi ai, 18 pea ko ia ʻa e ʻulu ʻo e sinó, ʻa e fakatahaʻangá.+ Ko ia ʻa e kamataʻangá, ko e ʻuluaki fanauʻi ia mei he maté,+ koeʻuhi ke ne hoko ai ko e tokotaha ʻoku muʻomuʻa ʻi he meʻa kotoa pē; 19 koeʻuhi naʻe finangalo ʻa e ʻOtuá ke ʻai ʻa e meʻa kotoa pē ke kakato ʻi he tokotaha ko iá,+ 20 pea ke fai ha fakalelei ki he ʻOtuá fakafou ʻi hono ʻAló, ʻa e ngaahi meʻa kehe kotoa pē+ ʻaki ʻa e fakamelino fakafou ʻi he taʻataʻa+ ʻo Kalaisi naʻe lilingi ʻi he ʻakau fakamamahí,* ʻo tatau ai pē pe ko e ngaahi meʻa ʻi he māmaní pe ko e ngaahi meʻa ʻi he langí.

21 Ko e moʻoni, naʻa mou hoko ko e ngaahi fili ki muʻa ʻo e ʻOtuá pea mavahe meiate ia koeʻuhí naʻe tuku taha ʻa hoʻomou fakakaukaú ʻi he ngaahi ngāue naʻe fulikivanú, 22 kuó ne fai eni ha fakalelei maʻamoutolu ʻaki ʻa e sino fakaekakano ʻo e tokotaha ko iá fakafou ʻi heʻene pekiá, koeʻuhí ke ʻoatu ai kimoutolu ʻoku mou māʻoniʻoni mo taʻemele mo ʻikai ala tukuakiʻi ʻi hono ʻaó+— 23 kae kehe, kuo pau ke mou hokohoko atu ʻi he tuí,+ ʻo fokotuʻu maʻu kimoutolu ʻi he makatuʻungá+ mo tuʻu maʻu,+ ʻo ʻikai hiki mei he ʻamanaki ʻo e ongoongo lelei ko ia naʻa mou fanongo ai pea naʻe malangaʻi ʻi he meʻa fakatupu kotoa pē ʻi he lalo langí.+ Ko au Paula, naʻá ku hoko ko ha faifekau* ʻo e ongoongo lelei ko ení.+

24 ʻOku ou fiefia he taimí ni ke u faingataʻaʻia maʻamoutolu,+ pea ʻoku ou loto-lelei ke hokohoko atu ʻeku tofanga ʻi he faingataʻá ʻi hoku tuʻunga ko ha kupu ʻo e sino ʻo Kalaisí. Ko e faingataʻaʻiá ni ʻe iku ia ki ha lelei maʻá e sino ʻo Kalaisí,+ ʻa ia ko e fakatahaʻangá.+ 25 Naʻá ku hoko ko ha faifekau ʻo e fakatahaʻanga ko ʻení ʻo fakatatau ki he fatongia+ mei he ʻOtuá ʻa ia naʻe ʻomai kiate au ke u malangaʻi kakato ʻa e folofola ʻa e ʻOtuá ko ha lelei maʻamoutolu, 26 ʻa e fakalilolilo toputapu+ naʻe fufū talu mei he ngaahi fokotuʻutuʻu ʻi he kuohilí*+ pea talu mei he ngaahi toʻutangata ʻi he kuohilí. Ka ko eni kuo fakaeʻa ia ki heʻene kakai tapú,+ 27 ʻa kinautolu kuo finangalo ʻa e ʻOtuá ke fakaʻilo ki ai ʻa e ngaahi koloa lāngilangiʻia ʻo e fakalilolilo toputapú ni+ ʻi he lotolotonga ʻo e ngaahi puleʻangá, ʻa ia ko e fāʻūtaha ʻa Kalaisi mo kimoutolú, pea mo e ʻamanaki atu ke kaungāʻinasi mo ia ʻi hono lāngilangí.+ 28 Ko ia ʻa e tokotaha ʻoku tau fanongonongo atú, ʻo enginaki ki he tokotaha kotoa mo akoʻi ʻa e tokotaha kotoa ʻi he poto kotoa pē, koeʻuhi ke tau ʻoatu ai ʻa e tangata kotoa pē kuo kakato* ʻi he fāʻūtaha mo Kalaisí.+ 29 Ko e moʻoni ʻoku ou ngāue mālohi ki he taumuʻa ko ʻení, ʻo u feinga tōtōivi ʻaki ʻa e tokoni ʻa hono mālohi ʻa ia ʻokú ne ngāueʻaki ʻiate aú.+

2 He ʻoku ou loto ke mou ʻiloʻi ʻa e fuʻu fāinga lahi ʻoku ou fai maʻamoutolú pea maʻá e faʻahinga ʻi Leotisiá+ pea maʻá e kotoa ʻo e faʻahinga kuo teʻeki ai ke nau mamata tonu ʻiate aú.* 2 Ko ʻeku taumuʻá ke fakafiemālieʻi honau lotó+ pea ke fakafāʻūtahaʻi lelei kinautolu ʻi he ʻofa+ pea ke nau koloaʻia ai, ko e koloa ko iá ko hono ʻiloʻi totonu mo mahinoʻi lelei ʻa e fakalilolilo toputapu ʻa e ʻOtuá, ʻa ia ko e fakalilolilo ko iá ko Kalaisi.+ 3 ʻOku fufū ʻiate ia ʻa e kotoa ʻo e ngaahi koloa ʻo e potó pea mo e ʻiló.+ 4 ʻOku ou leaʻaki ení ke ʻoua naʻa kākaaʻi kimoutolu ʻe ha taha ʻaki ha ngaahi fakaʻuhinga fakatupu fakalotoʻi. 5 Neongo ʻoku ʻikai te u ʻi hena ʻi he sinó, ʻoku ou ʻi hena mo kimoutolu ʻi he laumālie, ʻo fiefia ke sio ki hoʻomou ʻi he tuʻunga māú+ pea mo e tuʻu maʻu ʻa hoʻomou tui kia Kalaisí.+

6 Ko ia ai, hangē tofu pē ko hoʻomou tali ʻa Kalaisi Sīsū ko e ʻEikí, hokohoko atu ʻa e ʻaʻeva ʻi he fāʻūtaha mo iá, 7 ʻo faiaka mo langa hake ʻiate ia+ pea hoko ʻo tuʻu maʻu ʻi he tuí,+ ʻo hangē tofu pē ko ia ne akoʻi kimoutolu ki aí, pea mou fonu mahuohua ʻi he fai ʻo e fakafetaʻí.+

8 Tokanga ke ʻoua naʻa tauheleʻi* kimoutolu ʻe ha taha ʻaki ʻenau filōsofia mo e ngaahi fakaʻuhinga hala+ ʻa ia ʻoku ʻikai makatuʻunga ʻia Kalaisi ka ʻi he talatukufakaholo ʻa e tangatá mo e ngaahi meʻa ʻo e māmaní; 9 kae kehe, ko e ngaahi ʻulungaanga kotoa ʻo e ʻOtuá ʻoku kakato ia ʻia Kalaisi.+ 10 Ko ia kuo mou maʻu ai ha tuʻunga kakato fakafou ʻiate ia, ʻa e tokotaha ʻa ia ko e ʻulu ia ʻo e founga-pule mo e mafai kotoa pē.+ 11 Ko e meʻa ʻi homou vahaʻangatae mo iá, kuo kamu ai kimoutolu, ʻo ʻikai ʻaki ʻa e nima ʻo e tangatá ka ko hono siʻaki atu ʻa e sino angahalaʻiá,+ koeʻuhi ko e founga ia ke kamu ai ʻa e kau sevāniti ʻa Kalaisí.+ 12 He naʻe tanu fakataha kimoutolu mo ia ʻi heʻene papitaisó,+ pea ʻi homou vahaʻangatae mo iá naʻe toe fokotuʻu fakataha hake ai kimoutolu+ fakafou ʻi hoʻomou tui ki he ngāue fakaofo ʻa e ʻOtuá, ʻa ia naʻá ne fokotuʻu hake ia mei he pekiá.+

13 ʻIkai ngata aí, neongo naʻa mou mate ʻi hoʻomou ngaahi faihalá pea ʻi he tuʻunga taʻekamu ʻo homou kakanó, naʻe ʻai kimoutolu ʻe he ʻOtuá ke mou moʻui fakataha mo Kalaisi.+ Naʻá ne anga-lelei ʻo fakamolemoleʻi ʻa ʻetau ngaahi faihalá kotoa+ 14 peá ne tāmateʻi ʻa e tohi tohinima+ ʻa ia naʻe ʻi ai ha ngaahi tuʻutuʻuni+ naʻe fepaki ia mo kitautolu.+ Kuó ne toʻo atu ia ʻaki hono tukifaʻo ki he ʻakau fakamamahí.*+ 15 Kuó ne fakamaeʻeeʻa atu ʻa e ngaahi founga-pulé mo e kau maʻu mafaí mo fakaʻaliʻali fakahāhaaʻi atu kinautolu kuó ne ikunaʻi,+ ʻo ne taki atu kinautolu ko ha kau pōpula ʻi ha laka maʻalali ʻo e ikuna fakafou ai.*

16 Ko ia ai, ʻoua naʻa tuku ke fakamāuʻi koe ʻe ha taha ʻi he fekauʻaki mo e meʻa ʻokú ke kaí mo inú+ pe ʻi he fekauʻaki mo hono tauhi ʻo ha kātoanga pe ko e māhina foʻoú+ pe ko ha Sāpate.*+ 17 Ko e ngaahi meʻa ko iá ko ha ʻata ia ʻo e ngaahi meʻa ka hoko maí,+ ka ko e meʻa moʻoní ia ko e Kalaisí.+ 18 Tuku ke ʻoua naʻa ʻi ai ha tangata te ne toʻo meiate kimoutolu ʻa e palé,+ ʻa ia ʻokú ne saiʻia ʻi ha anga-fakatōkilalo fakangalingali mo e founga lotu ʻoku fai ki he kau ʻāngeló, “ʻo ne tuʻu ʻaki”* ʻa e ngaahi meʻa kuó ne mamata ki aí. Ko hono moʻoní, ʻokú ne fakafuofuolahi ʻo taʻeʻiai hano ʻuhinga totonu ʻi heʻene founga fakakaukau fakaekakanó, 19 pea ʻoku ʻikai te ne piki maʻu ki he ʻulú,+ ki he tokotaha ʻokú ne fai ʻa e tokonaki ki he sinó kotoa mo fakafehokotaki lelei ʻa hono ngaahi hokotanga huí mo hono ngaahi uouá mo ʻai ʻa e sinó ke tupu, ʻa ia ko e tupu ko iá mei he ʻOtuá.+

20 Kapau naʻa mou mate fakataha mo Kalaisi ʻi he felāveʻi mo e ngaahi meʻa tefito ʻo e māmaní,+ ko e hā ʻoku mou kei moʻui ai ʻo hangē ʻoku mou kei hoko ko ha konga ʻo e māmaní ʻaki hono toe fakamoʻulaloaʻi kimoutolu ki he ngaahi tuʻutuʻuni:+ 21 “ʻOua ʻe toʻo, ʻoua ʻe ʻahiʻahiʻi, ʻoua ʻe ala ki ai”? 22 He ko e ngaahi meʻá ni kuo pau ke nau ʻauha kotoa ʻi he hili hono fakaʻaongaʻí pea ko e ngaahi tuʻutuʻuni ko ení ko e ngaahi fekau ia mo e ngaahi akonaki ʻa e tangatá.+ 23 Ko e ngaahi fekau ko ení ʻoku hā ngali ʻokú ne ʻomai ʻa e poto, ka ʻoku ʻikai te ne tokoniʻi ʻa e kakaí ke nau fakafepakiʻi ʻa e holi honau sinó.+ ʻOku hoko ení koeʻuhi ʻoku fili pē ʻe he kakaí ia ʻa e founga ke nau lotu ai ki he ʻOtuá, ʻoku nau anga-fakatōkilalo fakangalingali pea ʻoku nau ʻai ke faingataʻaʻia honau sinó.

3 Kae kehe, kapau naʻe fokotuʻu fakataha hake kimoutolu mo e Kalaisí,+ hokohoko atu ʻa e kumi ki he ngaahi meʻa ʻi ʻolungá, ʻa e feituʻu ʻoku nofo ai ʻa e Kalaisí ʻi he nima toʻomataʻu ʻo e ʻOtuá.+ 2 Hanganaki fakamaʻu homou ʻatamaí ʻi he ngaahi meʻa ʻi ʻolungá,+ ʻo ʻikai ʻi he ngaahi meʻa ʻoku ʻi he māmaní.+ 3 He naʻa mou mate, pea ko hoʻomou moʻuí ʻoku fufū ia ʻia Kalaisi koeʻuhí ʻoku fehoanaki ia mo e finangalo ʻo e ʻOtuá. 4 ʻI he taimi ʻe fakaeʻa mai ai ʻa e Kalaisí,+ ʻa hotau moʻuiʻangá, ʻe fakaeʻa foki mo kimoutolu fakataha mo ia ʻi he lāngilangi.+

5 Ko ia ai, mou ʻai ke mate ʻa e ngaahi kupu ʻo homou sinó+ ʻa ia ʻoku ʻi he māmaní ʻi he fekauʻaki mo e fehokotaki fakasino taʻetāú,* taʻemaʻá, holi taʻemapuleʻi fakaefehokotaki fakasinó,+ holi pangó, mo e mānumanú, ʻa ia ko e tauhi ʻaitoli ia. 6 Koeʻuhi ko e ngaahi meʻa ko iá ʻoku hoko mai ai ʻa e houhau ʻa e ʻOtuá. 7 Ko e anga ia naʻa mou faʻa tōʻongaʻaki* ʻi hoʻomou founga moʻui ki muʻá.+ 8 Ka ʻi he taimí ni kuo pau ke mou siʻaki ʻa e ngaahi meʻá ni kotoa meiate kimoutolu: ʻA e tōlilí, ʻitá, faikoví,+ lea koví,+ pea mo e talanoa fakalieliá+ mei homou ngutú. 9 ʻOua te mou feloiʻaki.+ Huʻi atu ʻa e angaʻitangata* motuʻá+ mo ʻene ngaahi tōʻongá, 10 pea mou kofuʻaki kimoutolu ʻa e angaʻitangata foʻoú,+ ʻa ia ʻoku fai ai pē hono fakafoʻou fakafou ʻi he ʻilo totonú ʻo fakatatau ki he ʻīmisi ʻo e Tokotaha naʻá ne fakatupu ʻa e angaʻitangata foʻoú,+ 11 ʻa ia ʻoku ʻikai ʻi ai ha faikehekehe ʻi he Kalisí mo e Siú, kamú mo e taʻekamú, muli, Sitia,* pōpula, pe tangata tauʻatāiná; ka ʻoku ʻo Kalaisi ʻa e meʻa kotoa pē pea ʻoku ʻi he meʻa kotoa pē.+

12 Ko ia ai, ʻi he tuʻunga ko e kakai fili ʻa e ʻOtuá,+ ʻa ia ʻoku māʻoniʻoni mo ʻofeiná, mou kofuʻaki kimoutolu ʻa e manavaʻofa kaungāongoʻi loloto,+ anga-lelei, anga-fakatōkilalo,*+ anga-malū,+ mo e kātaki.+ 13 Hokohoko atu ʻa e fekātakiʻaki mo e fefakamolemoleʻaki loto-lelei+ neongo ai pē ʻo kapau ʻoku ʻi ai ha taha ʻokú ne maʻu ha ʻuhinga ke lāunga ai fekauʻaki mo ha taha.+ Hangē tofu pē ko ia ne fakamolemoleʻi loto-lelei kimoutolu ʻe Sihová,* kuo pau foki ke mou fai ʻa e meʻa tatau.+ 14 Kae tuku kehe ʻa e ngaahi meʻá ni kotoa, mou kofuʻaki kimoutolu ʻa e ʻofá,+ he ko ha fakamaʻu haohaoa ia ʻo e fāʻūtahá.+

15 Pehē foki, tuku ke pule ʻi homou lotó ʻa e nonga* ʻa e Kalaisí,+ he naʻe ui kimoutolu ki he nonga ko iá ʻi he sino ʻe taha. Pea mou fai maʻu pē ʻa e fakamālō. 16 Tuku ke mātuʻaki nofoʻia kimoutolu ʻe he lea ʻa e Kalaisí fakataha mo e poto kotoa pē. Hanganaki feakoʻaki mo fefakalototoʻaʻaki* ʻaki ʻa e ngaahi saame,+ ʻa e ngaahi fakahīkihiki ki he ʻOtuá, ʻa e ngaahi hiva fakalaumālie ʻoku hivaʻaki fakataha mo e houngaʻia,* ʻo mou hiva mei homou lotó kia Sihova.*+ 17 ʻIlonga ha meʻa ʻoku mou fai ʻi he lea pe ʻi he ngāue, fai ʻa e meʻa kotoa pē ʻi he huafa ʻo e ʻEiki ko Sīsuú, ʻo fakamālō ki he ʻOtuá ko e Tamaí fakafou ʻiate ia.+

18 Ko kimoutolu ngaahi uaifi, mou anganofo ki homou ngaahi husepānití,+ he ʻoku taau ia ʻi he vakai mai ʻa e ʻEikí. 19 Ko kimoutolu ngaahi husepāniti, mou hanganaki ʻofa ki homou ngaahi uaifí+ pea ʻoua te mou ʻita tōlili* kiate kinautolu.+ 20 Ko kimoutolu fānau, mou talangofua ki hoʻomou mātuʻá ʻi he meʻa kotoa pē,+ he ʻoku fakahōifua eni ki he ʻEikí. 21 Ko kimoutolu ngaahi tamai, ʻoua te mou fakaʻitaʻi hoʻomou fānaú,+ koeʻuhi ke ʻoua te nau hoko ʻo loto-mafasia.* 22 Ko kimoutolu kau tamaioʻeiki, mou talangofua ʻi he meʻa kotoa pē ki he faʻahinga ko ia ko homou ngaahi ʻeiki fakaetangatá,*+ ʻo ʻikai ʻi he taimi pē ʻoku nau sio atu aí, koeʻuhi pē ke fakahōhōʻiaʻi ʻa e tangatá,* kae fai ʻaki ʻa e moʻoni ʻo e lotó, fakataha mo e manavahē kia Sihova.* 23 ʻIlonga ha meʻa ʻoku mou fai, ngāue ki ai ʻaki homou kotoá ʻo hangē ko ha fai ia kia Sihova,*+ kae ʻikai ki he tangatá, 24 he ʻoku mou ʻiloʻi ko Sihova* ia te mou maʻu mei ai ʻa e tofiʻá ko homou pale.+ Mou ngāue fakatamaioʻeiki ki he ʻEikí, ʻa Kalaisi. 25 Ko e moʻoni, ko e tokotaha ʻoku faihalá ʻe totongi fakafoki kiate ia ʻa e hala kuó ne faí,+ pea ʻoku ʻikai ke ʻi ai ha filifilimānako.+

4 Ko kimoutolu ngaahi ʻeiki, mou tōʻongafai ki hoʻomou kau tamaioʻeikí ʻi ha founga māʻoniʻoni mo totonu, ʻi hono ʻiloʻi ʻoku ʻi ai foki homou ʻEiki ʻi hēvani.+

2 Kītaki ʻi he lotú,+ ʻo nofoʻaki ʻāʻā ʻi hono fai iá fakataha mo e fakafetaʻi.+ 3 ʻI he taimi tatau, mou lotu foki maʻamautolu,+ ke ʻomai ʻe he ʻOtuá ha faingamālie ke talaki ai ʻa e folofolá mo e fakalilolilo toputapu fekauʻaki mo e Kalaisí, he ko e meʻa ia ʻoku tuku pilīsone ai aú,+ 4 pea ke u talaki ia ke mahino ʻo hangē ko ia ʻoku totonu ke u faí.

5 Hokohoko atu ʻo ʻaʻeva ʻi he poto ʻi he feangainga mo e faʻahinga ʻi tuʻá, ʻo ngāue lelei taha ʻaki homou taimí.*+ 6 Tuku ke hoko maʻu pē hoʻomou leá ʻo anga-ʻofa, ʻo fakaifoifo ʻaki ha māsima,+ koeʻuhi ke mou ʻilo ai ʻa e founga ʻoku totonu ke mou taliʻaki ki he tokotaha taki taha.+

7 Ko Tikiko,+ ko hoku tokoua ʻofeina mo e faifekau* faitōnunga pea ko hoku kaungā-tamaioʻeiki ʻi he ʻEikí, te ne tala atu kiate kimoutolu ʻa e ongoongo kotoa fekauʻaki mo aú. 8 ʻOku ou fekauʻi atu ia kiate kimoutolu koeʻuhi ke mou ʻilo ai pe ʻoku mau fēfē pea ke ne fakafiemālieʻi homou lotó. 9 ʻOkú ne ʻalu atu mo ʻOnesema,+ ko hoku tokoua faitōnunga mo ʻofeina, ʻa ia ʻoku mei homou lotolotongá; te na tala atu kiate kimoutolu ʻa e ngaahi meʻa kotoa pē ʻoku lolotonga hoko hení.

10 Ko ʻAlisitako,+ ko hoku kaungā-pōpulá, ʻoku ʻoatu hono ʻofa kiate kimoutolu, pea pehē foki kia Maʻake,+ ʻoku tokouaʻaki ʻe Panepasá (ʻi he fekauʻaki mo iá naʻa mou maʻu ʻa e ngaahi fakahinohino ke talitali lelei ia+ kapau te ne ʻalu atu kiate kimoutolu), 11 pea mo Sīsū ʻa ia ʻoku ui ko Siusitasá, ʻa kinautolú ni ʻa ia ʻoku kau ʻi he faʻahinga kamú. Ko e faʻahingá ni pē ʻa hoku kaungāngāue maʻá e Puleʻanga ʻo e ʻOtuá, pea kuo nau hoko ko ha matavai ʻo e fakafiemālie lahi* kiate au. 12 Ko ʻEpafasi,+ ko ha tamaioʻeiki ʻa Kalaisi Sīsū ʻa ia ʻoku mei homou lotolotongá, ʻoku ʻoatu hono ʻofa kiate kimoutolu. ʻOkú ne lotu tōtōivi maʻu pē maʻamoutolu, koeʻuhi ke mou tuʻu maʻu ko ha faʻahinga ʻoku matuʻotuʻa fakataha mo e tuipau mālohi ki he meʻa kotoa ʻe fai ʻe he ʻOtuá. 13 He ʻoku ou fakamoʻoniʻi ʻokú ne fai ha ngaahi feinga lahi maʻamoutolu pea maʻá e faʻahinga ʻi Leotisia mo Hailapolí.

14 ʻOku ʻofa atu ʻa Luke,+ ko e toketā ʻofeiná kiate kimoutolu, pea pehē foki kia Tīmasi.+ 15 ʻOatu hoku ʻofa ki he fanga tokoua ʻi Leotisiá pea kia tuofefine Nīmifa pea ki he fakatahaʻanga ʻi hono falé.+ 16 Pea ʻi he taimi ʻe ʻosi ai hono lau ʻa e tohí ni ʻi homou lotolotongá, fokotuʻutuʻu ke lau+ foki ia ʻi he fakatahaʻanga ʻo e kau Leotisiá pea ke mou lau foki mo e tohi naʻá ku ʻave ki Leotisiá. 17 Pehē foki, tala kia ʻĀkipo:+ “Tokanga ke fakahoko ʻa e ngāue naʻá ke maʻu mei he ʻEikí.”

18 Ko au, Paula, ʻoku ou tohi atu ʻa e ʻofá ni ʻaki hoku nimá tonu.+ Tauhi maʻu ʻi he fakakaukaú ʻa hoku tuku pilīsoné.+ Ke ʻiate kimoutolu ʻa e ʻofa maʻataʻataá.