KO E ʻULUAKI TOHI KI HE KAU TESALONAIKÁ

1 Ko au Paula, Silivēnusi,*+ pea mo Tīmote,+ ko e tohi atu ki he fakatahaʻanga ʻo e kau Tesalonaiká ʻa ia ʻoku nau fāʻūtaha mo e ʻOtuá ko e Tamaí pea mo e ʻEiki ko Sīsū Kalaisí:

Fakatauange ke mou maʻu ʻa e ʻofa maʻataʻataá mo e melinó.

2 ʻOku mau fakamālō maʻu pē ki he ʻOtuá ʻi he taimi ʻoku mau lave ai kiate kimoutolu kotoa ʻi heʻemau ngaahi lotú,+ 3 he ʻoku hokohoko atu pē ʻemau manatuʻi hoʻomou ngāue faitōnungá, hoʻomou fakaongosia ʻofá, pea mo hoʻomou kātaki koeʻuhi ko hoʻomou ʻamanaki+ ki hotau ʻEiki ko Sīsū Kalaisí ʻi he ʻao ʻo hotau ʻOtuá mo e Tamaí. 4 He ʻoku mau ʻilo, siʻi fanga tokoua ʻoku ʻofaʻi ʻe he ʻOtuá, ko ʻene fili kimoutolu, 5 koeʻuhí ko e ongoongo lelei naʻa mau malangaʻí naʻe ʻikai ʻalu atu ia kiate kimoutolu ʻi he lea ʻataʻatā pē ka ʻi he mālohi foki pea mo e laumālie māʻoniʻoní pea mo e tuipau mālohi, ʻo hangē tofu pē ko hoʻomou ʻiloʻi ʻa e anga ʻo ʻemau ngāue ki ha lelei maʻamoutolú. 6 Pea naʻa mou hoko ko e kau faʻifaʻitaki kiate kimautolu+ pea mo e ʻEikí,+ he naʻa mou tali ʻa e folofolá ʻi he malumalu ʻo e mamahi lahi+ fakataha mo e fiefia tupu mei he laumālie māʻoniʻoní, 7 ko ia naʻa mou hoko ai ko ha faʻifaʻitakiʻanga ki he kotoa ʻo e kau tui ʻi Masitōniá pea ʻi ʻĀkeiá.

8 Ko hono moʻoní, kuo ʻikai ngata pē ʻi he ongo atu ʻa e folofola ʻa Sihová* meiate kimoutolu ʻi Masitōnia mo ʻĀkeiá ka ko hoʻomou tui ki he ʻOtuá kuo mafolalahia atu ia ʻi he potu kotoa pē,+ ko ia ʻoku ʻikai fiemaʻu ai ke mau leaʻaki ha meʻa. 9 He ko kinautolu tonu ʻoku nau hanganaki fakamatala fekauʻaki mo ʻemau ʻuluaki fetuʻutaki mo kimoutolú pea mo e anga hoʻomou tafoki ki he ʻOtuá mei hoʻomou ngaahi ʻaitolí+ ke ngāue fakatamaioʻeiki ki ha ʻOtua moʻui mo moʻoni, 10 pea ke tatali ke haʻu ʻa hono ʻAló mei hēvani,+ ʻa ia naʻá ne fokotuʻu hake mei he pekiá, ʻa ia ko Sīsū, ʻa ē ʻokú ne fakahaofi kitautolu mei he houhau ʻoku tuʻunuku maí.+

2 ʻOku mou ʻiloʻi moʻoni, fanga tokoua, ko ʻemau ʻaʻahi atu kiate kimoutolú kuo ʻikai ke taʻeʻiai hano ola.+ 2 He neongo naʻa mau ʻuluaki faingataʻaʻia mo ngaohikovia ʻi Filipai,+ hangē tofu pē ko ia ʻoku mou ʻiloʻí, naʻe tafunaki ʻemau loto-lahí* ko e meʻa ʻi hotau ʻOtuá ke mau tala atu kiate kimoutolu ʻa e ongoongo lelei ʻo e ʻOtuá+ ʻi he fehangahangai mo e fakafepaki lahi.* 3 He ko e enginaki ʻoku mau ʻoatú ʻoku ʻikai tupu ia mei ha fehālaaki pe mei ha taʻemaʻa pe kākā, 4 kae hangē tofu pē ko ia kuo hōifua ki ai ʻa e ʻOtuá ke tuku mai kiate kimautolu ʻa e ongoongo leleí, ko ia ʻoku mau lea ai ke fakahōhōʻiaʻi, ʻo ʻikai ko e tangatá, ka ko e ʻOtuá, ʻa ia ʻokú ne sivisiviʻi homau lotó.+

5 Ko hono moʻoní, ʻoku mou ʻilo naʻe ʻikai ʻaupito ke mau ngāueʻaki ha lea fakahekeheke pe ʻai ha faʻahinga fakangalingali pē fakataha mo ha ngaahi taumuʻa mānumanu;+ ʻoku fakamoʻoni ki ai ʻa e ʻOtuá! 6 Pea kuo ʻikai ke mau kumi lāngilangi mei he tangatá, pe meiate kimoutolu pe mei he niʻihi kehé, neongo ʻe lava ke mau hoko ko ha kavenga fakamole lahi ʻi he tuʻunga ko e kau ʻapositolo ʻa Kalaisí.+ 7 ʻI hono kehé, naʻa mau anga-fakaalaala ʻi homou lotolotongá, ʻo hangē ko hono tokangaʻi manavaʻofa* ʻe ha faʻē toutama ʻa ʻene fānaú tonu. 8 Ko ia ʻi hono maʻu ʻa e manavaʻofa loloto kiate kimoutolú, naʻa mau fakapapauʻi* ai ke ʻoatu kiate kimoutolu, ʻo ʻikai ngata pē ʻi he ongoongo lelei ʻa e ʻOtuá kae toe pehē foki mo kimautolu*+ tonu, koeʻuhí naʻa mou hoko ko e faʻahinga mātuʻaki ʻofeina kiate kimautolu.+

9 ʻOku pau pē ʻoku mou manatuʻi, fanga tokoua, ʻa ʻemau ngāue mālohí mo e fakaongosiá. Naʻa mau ngāue ʻi he pō mo e ʻaho, koeʻuhi ke ʻoua te mau hilifaki ai ha kavenga fakamole lahi ki ha taha pē ʻo kimoutolu,+ ʻi he taimi naʻa mau malangaʻi atu ai ʻa e ongoongo lelei ʻa e ʻOtuá kiate kimoutolú. 10 Ko e kau fakamoʻoni kimoutolu, pea pehē foki ki he ʻOtuá, ʻo fekauʻaki mo e anga ʻo e mateaki mo e māʻoniʻoni mo e taʻehalaia ʻa ʻemau tōʻonga kiate kimoutolu kau tuí. 11 ʻOku mou ʻiloʻi lelei naʻa mau hanganaki enginaki mo fakanonga mo faifakamoʻoni atu ki he tokotaha taki taha ʻo kimoutolu,+ ʻo hangē tofu pē ko e fai ʻe ha tamai+ ki heʻene fānaú, 12 koeʻuhi ke hokohoko atu ai hoʻomou ʻaʻeva ʻo taau mo e ʻOtuá,+ ʻa ia ʻokú ne ui kimoutolu ki hono Puleʻangá+ mo e lāngilangí.+

13 Ko e moʻoni, ko e ʻuhinga ia ʻoku mau fakamālō taʻetuku foki ai ki he ʻOtuá,+ koeʻuhí ʻi he taimi naʻa mou maʻu ai ʻa e folofola ʻa e ʻOtuá, ʻa ia naʻa mou fanongo ai meiate kimautolú, naʻa mou tali ia ʻo ʻikai ko ha lea ʻa ha tangata, kae hangē tofu pē ko ia ko hono tuʻunga moʻoní, ko e folofola ia ʻa e ʻOtuá, ʻa ia foki ʻoku ngāue ʻiate kimoutolu kau tuí. 14 He ko kimoutolú, fanga tokoua, naʻa mou hoko ko e kau faʻifaʻitaki ki he ngaahi fakatahaʻanga ʻa e ʻOtuá ʻoku fāʻūtaha mo Kalaisi Sīsū ʻa ia ʻoku ʻi Siuteá, koeʻuhí naʻa mou faingataʻaʻia ʻi he nima ʻo homou kau tangataʻifonuá tonu+ ʻi he ngaahi meʻa tatau pē mo ia foki ʻoku faingataʻaʻia ai ʻa e fanga tokoua ʻi Siuteá ʻi he nima ʻo e kau Siú, 15 ʻa ia naʻe aʻu ʻo nau tāmateʻi ʻa e ʻEiki ko Sīsuú+ mo e kau palōfitá pea nau fakatangaʻi kimautolu.+ ʻIkai ngata aí, ʻoku ʻikai te nau fakahōifuaʻi ʻa e ʻOtuá, ka ʻoku nau fakafepaki ki he ngaahi meʻa ʻa e tangata kotoa pē, 16 ʻi heʻenau feinga ke taʻofi kimautolu mei he lea ki he kakai ʻo e ngaahi puleʻangá ke fakahaofi ai kinautolú.+ ʻI hono fai ení ʻoku nau fakalahi maʻu ai pē ʻenau ngaahi angahalá. Ka ko eni kuo mei hoko hifo kiate kinautolu ʻa e houhau ʻa e ʻOtuá.+

17 Ka ʻi he taimi naʻe fakamavaheʻi ai kimautolu* meiate kimoutolú, fanga tokoua, ʻi ha kiʻi taimi nounou pē (ʻi he sino, ʻo ʻikai ʻi homau ngaahi lotó), koeʻuhi ko ʻemau holi mālohí, naʻa mau fai ai ʻa e feinga kotoa pē ke sio tonu kiate kimoutolu.* 18 ʻI he ʻuhinga ko ʻení naʻa mau loto ai ke mau ʻalu atu ke sio kiate kimoutolu, ʻio ko au Paula, naʻá ku feinga ʻo ʻikai tuʻo taha pē kae tuʻo ua foki; ka naʻe fakafeʻātungiaʻi ʻe Sētane ʻa homau halá. 19 He ko e hā homau ʻamanakiʻangá pe fiefiaʻangá pe kalauni ʻo e hākailangitaú ʻi he ʻao ʻo hotau ʻEiki ko Sīsuú ʻi heʻene ʻi hení?* ʻIkai ko hono moʻoní ko kimoutolu ia?+ 20 Ko e moʻoni ko kimoutolu ʻa homau lāngilangí mo e fiefiaʻangá.

3 Ko ia ʻi he ʻikai kei lava ke mau makātakiʻi ʻemau ʻunaloto atu kiate kimoutolú, naʻa mau fakakaukau ai ko e lelei tahá ke mau nofo atu pē ʻi ʻAtenisi;+ 2 pea naʻa mau fekauʻi atu ʻa Tīmote,+ ko homau tokoua mo e faifekau* ʻa e ʻOtuá ʻi he ongoongo lelei fekauʻaki mo e Kalaisí, ke ne ʻai kimoutolu ke mou tuʻu maʻu* mo fakafiemālieʻi kimoutolu ʻi he fekauʻaki mo hoʻomou tuí, 3 koeʻuhi ke ʻoua naʻa ʻi ai ha taha ʻe fakavaivaiʻi* ʻe he ngaahi mamahí ni. He ko kimoutolu tonu ʻoku mou ʻiloʻi ʻe ʻikai lava ke tau kalofi ʻa e tofanga ʻi he ngaahi meʻa peheé.+ 4 He ʻi heʻemau ʻiate kimoutolú, naʻa mau faʻa tala tokamuʻa atu kiate kimoutolu te tau tofanga ʻi he mamahi, pea ko e meʻa ia kuo hokó, ʻo hangē tofu pē ko ia ʻoku mou ʻilo ki aí.+ 5 Ko e ʻuhinga ia, ʻi he ʻikai ke u kei lava ke makātakiʻi iá, naʻá ku fekauʻi atu ai ʻa Tīmoté ke u ʻilo ai ki hoʻomou faitōnungá,+ naʻa kuo fakataueleʻi koā kimoutolu ia ʻe he Tokotaha-ʻAhiʻahí,+ pea kuo hoko ʻemau fakaongosiá ko e koto kulanoa.

6 Ka kuo toki aʻu mai eni ʻa Tīmote meiate kimoutolu+ pea kuó ne ʻomai kiate kimautolu ʻa e ongoongo lelei fekauʻaki mo hoʻomou faitōnungá mo e ʻofá, pea ʻoku hokohoko atu maʻu pē hoʻomou manatu ʻofa mai kiate kimautolú pea ʻoku mou fakaʻamu ke sio kiate kimautolu ʻo hangē pē ko ʻemau fakaʻamu ke sio atu kiate kimoutolú. 7 Ko e ʻuhinga ia, fanga tokoua, ʻi he kotoa ʻo homau faingataʻaʻiá* mo e mamahí, kuo fakafiemālieʻi kimautolu koeʻuhi ko kimoutolu pea mo e faitōnunga ʻoku mou fakahāhaá.+ 8 Pea ʻoku toe fakalongomoʻuiʻi kimautolu* koeʻuhí ko hoʻomou tuʻu maʻu ʻi he ʻEikí. 9 He ʻe lava fēfē ke mau fakahāhā ʻemau fakamālō ki he ʻOtuá ʻi he fekauʻaki mo kimoutolú ke tuha mo e fiefia lahi ʻoku mau ongoʻi ʻi he ʻao ʻo homau ʻOtuá koeʻuhi ko kimoutolú? 10 ʻOku mau fai ʻa e ngaahi hū tōtōaki ʻi he pō mo e ʻaho ʻo fai tōtōivi ia ʻi he lahi taha ʻemau malavá ke mau sio tonu kiate kimoutolu* pea ke tokonaki atu ʻa e meʻa ʻoku ʻikai te mou maʻu ʻi hoʻomou tuí.+

11 Ko ia, fakatauange ke hanga ʻe hotau ʻOtuá mo e Tamaí tonu pea mo hotau ʻEiki ko Sīsuú ʻo tofa ha hala moʻomautolu ke mau aʻu atu ai kiate kimoutolu. 12 ʻIkai ko ia pē, fakatauange ke ʻai kimoutolu ʻe he ʻEikí ke mou tupulekina, ʻio, ke mou hulu atu ʻi he feʻofaʻaki ʻiate kimoutolu+ pea ki he faʻahinga kotoa, hangē tofu pē ko ia ko e hulu ʻemau ʻofa atu kiate kimoutolú, 13 koeʻuhi ke ne ʻai homou lotó ke mālohi, ʻo taʻehalaia ʻi he māʻoniʻoni ʻi he ʻao ʻo hotau ʻOtuá+ mo e Tamaí ʻi he ʻi heni* ʻa hotau ʻEiki ko Sīsuú+ fakataha mo e kotoa ʻo ʻene kakai tapú.

4 Fakaʻosí, fanga tokoua, hangē tofu pē ko hoʻomou maʻu ʻa e fakahinohino meiate kimautolu fekauʻaki mo e founga ʻoku totonu ke mou ʻaʻeva ai koeʻuhi ke fakahōifuaʻi ʻa e ʻOtuá,+ hangē tofu pē ko ia ʻoku mou ʻaʻeva moʻoni aí, ʻoku mau kole atu mo fakatangi atu kiate kimoutolu ʻi he ʻEiki ko Sīsuú ke mou hanganaki fai ia ke toe kakato ange. 2 He ʻoku mou ʻiloʻi ʻa e ngaahi fakahinohino* naʻa mau ʻoatu kiate kimoutolu mei he ʻEiki ko Sīsuú.

3 He ko e finangalo eni ʻo e ʻOtuá, ʻoku totonu ke mou māʻoniʻoni+ pea fakaʻehiʻehi mei he fehokotaki fakasino taʻetāú.*+ 4 Ko e tokotaha taki taha ʻo kimoutolu ʻoku totonu ke ne ʻiloʻi ʻa e founga ke mapuleʻi ai hono sino ʻoʻoná+ ʻi he māʻoniʻoni+ mo e ngeia, 5 ʻo ʻikai ʻaki ʻa e holi fakaefehokotaki fakasino mānumanu taʻemapuleʻi,+ ʻo hangē ko ia ʻoku maʻu ʻe he ngaahi puleʻanga ʻoku ʻikai te nau ʻiloʻi ʻa e ʻOtuá.+ 6 ʻOku ʻikai totonu ki ha taha ke ne fakalaka atu ʻi he ngaahi fakangatangata fakaeʻulungaanga totonú peá ne fakatupunga ha kovi ki hono tokouá ʻi he meʻá ni, koeʻuhí ʻoku fakahoko tautea ʻa Sihova* ki he ngaahi meʻá ni kotoa, ʻo hangē tofu pē ko ia naʻa mau tala tokamuʻa atu kiate kimoutolú mo fakatokanga mālohi atu foki kiate kimoutolú. 7 He kuo ui kitautolu ʻe he ʻOtuá, ʻo ʻikai ki he taʻemaʻa, ka ki he māʻoniʻoni.+ 8 Ko ia ai, ko e tangata ʻokú ne taʻetokaʻi ʻa e akonaki ko ení, ʻokú ne taʻetokaʻi ʻo ʻikai ko e tangatá ka ko e ʻOtuá,+ ʻa ia ʻokú ne ʻoatu kiate kimoutolu ʻa hono laumālie māʻoniʻoní.+

9 Kae kehe, ʻi he fekauʻaki mo e ʻofa fakatokouá,+ ʻoku ʻikai fiemaʻu ia ke mau faitohi atu ai kiate kimoutolu, he ʻoku akonekina kimoutolu tonu ʻe he ʻOtuá ke mou feʻofaʻaki.+ 10 Ko hono moʻoní, ʻoku mou fai pehē ki he kotoa ʻo e fanga tokoua ʻi he kotoa ʻo Masitōniá. Ka ʻoku mau enginaki atu kiate kimoutolu, fanga tokoua, ke mou hokohoko atu hono fai iá ke toe kakato ange. 11 ʻAi ko hoʻomou taumuʻá ia ke mou nofo nonga+ ʻo taki taha fai pē ʻene meʻa ʻo ʻoua ʻe kaunoa holo,+ pea ngāue ʻaki homou nimá,+ ʻo hangē tofu pē ko ia naʻa mau fakahinohino atú, 12 koeʻuhí ke mou ʻaʻeva taau ʻi he vakai mai ʻa e kakai ʻi tuʻá+ pea ʻikai te mou masiva ʻi ha meʻa.

13 ʻIkai ko ia pē, fanga tokoua, ʻoku ʻikai ke mau loto ke mou hoko ʻo taʻeʻilo fekauʻaki mo e kahaʻu ʻo e faʻahinga ʻoku nau mohe ʻi he maté,+ koeʻuhí ke ʻoua te mou mamahi ʻo hangē ko e faʻahinga ko ia ʻoku ʻikai haʻanau ʻamanakí.+ 14 He kapau ʻoku tau tui naʻe pekia ʻa Sīsū peá ne toetuʻu hake,+ ʻe pehē pē ʻa hono fakafoki mai ʻe he ʻOtuá ke fakataha mo ia* ʻa e faʻahinga kuo nau mohe ʻi he maté fakafou ʻia Sīsū.+ 15 He ko e meʻa eni ʻoku mau tala atu kiate kimoutolu ʻi he folofola ʻa Sihová,* ko kitautolu kau moʻuí ʻa ia ʻoku tau hao moʻui atu ʻo aʻu ki he ʻi heni* ʻa e ʻEikí ʻe ʻikai ʻaupito te tau muʻomuʻa ʻi he faʻahinga ko ia kuo nau mohe ʻi he maté; 16 koeʻuhí ʻe ʻalu hifo ʻa e ʻEikí mei hēvani ʻo ne ʻoatu ha tuʻutuʻuni ʻi ha leʻo ʻo ha ʻāngelo-pule+ fakataha mo e leʻo ʻo e talupite ʻa e ʻOtuá, pea ko e faʻahinga ʻoku nau mate ʻi he fāʻūtaha mo Kalaisí te nau ʻuluaki toetuʻu hake kinautolu.+ 17 Hili iá ko kitautolu kau moʻuí ʻa ia ʻoku tau hao moʻui atú ʻe ʻohake kitautolu, fakataha mo kinautolu ʻi he ngaahi ʻaó+ ke fetaulaki mo e ʻEikí+ ʻi he langí; pea ko ia ai, te tau ʻi he ʻEikí maʻu ai pē.+ 18 Ko ia mou hanganaki fefakafiemālieʻaki ʻaki ʻa e ngaahi leá ni.

5 Ko ia ko e meʻa ki he ngaahi taimí mo e ngaahi faʻahitaʻú, fanga tokoua, ʻoku ʻikai ha meʻa ia ʻe fiemaʻu ke fai atu ai ha tohi kiate kimoutolu. 2 He ko kimoutolú tonu ʻoku mou ʻiloʻi lelei ko e ʻaho ʻo Sihová*+ ʻoku haʻu ia ʻo hangē ko ha kaihaʻa ʻi he poʻulí.+ 3 ʻI he taimi pē ʻoku nau pehē ai, “Melino mo malu!” ʻE hoko fakafokifā mai leva ʻa e fakaʻauhá ʻi he taimi pē ko iá kiate kinautolu,+ ʻo hangē tofu pē ko e langā ʻa ha fefine feitama, pea ʻe ʻikai ʻaupito te nau hao. 4 Ka ko kimoutolu, fanga tokoua, ʻoku ʻikai te mou ʻi he fakapoʻulí hangē ko e kau kaihaʻá, ke maʻungamālie taʻeʻamanekina ai kimoutolu ʻe he ʻaho ko iá, 5 he ko e ngaahi foha kotoa kimoutolu ʻo e māmá pea ko e ngaahi foha ʻo e ʻahó.+ ʻOku ʻikai ʻo e poʻulí pe fakapoʻulí ʻa kitautolu.+

6 Ko ia ai, tuku ke ʻoua te tau kei mohe ai pē ʻo hangē ko e niʻihi ko ē,+ kae tuku ke tau nofoʻaki ʻāʻā+ mo tauhi maʻu ʻetau fakakaukau leleí.+ 7 He ko e faʻahinga ʻoku mohé, ʻoku nau mohe ʻi he poʻulí, pea ko e faʻahinga ʻoku konaá, ʻoku nau konā ʻi he poʻulí.+ 8 Ka ko kitautolu ko ia ʻoku ʻo e ʻahó, tuku ke tau tauhi maʻu ʻetau fakakaukau leleí pea tui ʻa e sifa-fatafata ko e tuí mo e ʻofá pea tui ʻa e tatā ko e ʻamanaki ʻo e fakamoʻuí+ 9 koeʻuhí naʻe vaheʻi kitautolu ʻe he ʻOtuá, ʻo ʻikai ki he houhau, ka ki hono maʻu ʻa e fakamoʻui+ fakafou ʻi hotau ʻEiki ko Sīsū Kalaisí. 10 Naʻá ne pekia maʻatautolu,+ koeʻuhí tatau ai pē pe ʻoku tau nofoʻaki ʻāʻā pe ʻoku tau mohe,* ʻoku totonu ke tau moʻui fakataha mo ia.+ 11 Ko ia ai, mou hanganaki fefakalototoʻaʻaki* mo felangahakeʻaki,+ ʻo hangē tofu pē ko ia ʻoku mou lolotonga faí.

12 Ko ia ʻoku mau kole atu kiate kimoutolu, fanga tokoua, ke mou fakahāhā ʻa e fakaʻapaʻapa ki he faʻahinga ʻoku ngāue mālohi ʻi homou lotolotongá mo tokangaʻi kimoutolu ʻi he ʻEikí mo faienginaki atu kiate kimoutolú; 13 pea ke mou fakaʻatuʻi kiate kinautolu ʻi he ʻofa ʻoku mahulu atu koeʻuhí ko ʻenau ngāué.+ Mou nofo femelinoʻaki.+ 14 ʻI he tafaʻaki ʻe tahá, ʻoku mau enginaki atu kiate kimoutolu, fanga tokoua, ke mou fai ha fakatokanga* ki he kau fakamoveuveú,+ lea fakanonga ki he faʻahinga ʻoku loto-mafasiá,* poupou ki he kau vaivaí, mou kātaki ʻi he feangainga mo e tokotaha kotoa.+ 15 Vakavakai ke ʻoua naʻa hanga ʻe ha taha ʻo fetongi ʻa e kovi ʻaki ʻa e kovi ki ha taha,+ kae tuli maʻu pē ki he meʻa ʻoku lelei ki he tokotaha taki taha pea ki he kotoa ʻo e niʻihi kehé.+

16 Fiefia maʻu pē.+ 17 Lotu maʻu pē.+ 18 Fai ʻa e fakafetaʻi ʻi he meʻa kotoa pē.+ Ko e finangalo eni ʻo e ʻOtuá kiate kimoutolú ʻia Kalaisi Sīsū. 19 ʻOua ʻe taʻofi ʻa e ngāue ʻa e* laumālié ʻiate kimoutolú.+ 20 ʻOua ʻe taʻetokaʻi ʻa e ngaahi kikité.+ 21 Fakapapauʻi ʻa e ngaahi meʻa kotoa pē;+ piki maʻu ki he meʻa ʻoku leleí. 22 Fakaʻehiʻehi mei he founga kotoa pē ʻo e fulikivanú.+

23 Fakatauange ki he ʻOtua ʻo e melinó ke ne fakamāʻoniʻoniʻi kakato kimoutolu. Pea fakatauange ke hoko ʻa e laumālie mo e moʻui mo e sino ʻo kimoutolú fanga tokoua, ʻo lelei ʻi he tafaʻaki kotoa pē, ʻo kei ʻi he tuʻunga taʻemele ʻo aʻu ki he lolotonga ʻa e ʻi heni* ʻa hotau ʻEiki ko Sīsū Kalaisí.+ 24 Ko e tokotaha ʻokú ne ui kimoutolú ʻokú ne faitōnunga, pea te ne fakahoko moʻoni ia.

25 Fanga tokoua, mou hanganaki lotu maʻamautolu.+

26 Fakafeʻiloaki ki he kotoa ʻo e fanga tokouá ʻaki ha ʻuma māʻoniʻoni.*

27 ʻOku ou tuku atu kiate kimoutolu ʻa e ngafa mafatukituki ʻi he ʻEikí ke mou lau ʻa e tohí ni ki he kotoa ʻo e fanga tokouá.+

28 Ke ʻiate kimoutolu ʻa e ʻofa maʻataʻatā ʻa hotau ʻEiki ko Sīsū Kalaisí.