KO E TOHI HONO UA KI HE KAU TESALONAIKÁ

1 Ko au Paula mo Silivēnusi* pea mo Tīmote,+ ko e tohi atu ki he fakatahaʻanga ʻo e kau Tesalonaiká ʻoku nau fāʻūtaha mo e ʻOtuá ko ʻetau Tamaí pea mo e ʻEiki ko Sīsū Kalaisí:

2 Fakatauange ke mou maʻu ʻa e ʻofa maʻataʻatā mo e melino mei he ʻOtuá ko e Tamaí pea mo e ʻEiki ko Sīsū Kalaisí.

3 ʻOku mau moʻuaʻaki maʻu pē ke fai ha fakamālō ki he ʻOtuá koeʻuhí ko kimoutolu, fanga tokoua. ʻOku feʻungamālie eni, koeʻuhí ko hoʻomou tuí ʻoku tupulaki lahi fau pea ʻoku fakautuutu ʻa e feʻofaʻaki ʻa e tokotaha taki taha ʻo kimoutolu.+ 4 Ko hono olá ko kimautolu tonu ʻoku mau laukauʻaki ai kimoutolu+ ʻi he haʻohaʻonga ʻo e ngaahi fakatahaʻanga ʻa e ʻOtuá koeʻuhí ko hoʻomou kātaki mo e tui ʻi he kotoa ʻo homou ngaahi fakatangá pea mo e ngaahi faingataʻa* ko ia ʻoku mou tofanga aí.*+ 5 Ko ha fakamoʻoni eni ʻo e fakamaau māʻoniʻoni ʻa e ʻOtuá, ʻo taki atu ki hono lau kimoutolu ʻoku mou taau mo e Puleʻanga ʻo e ʻOtuá, ʻa ia ko e ʻuhinga ia ʻoku mou lolotonga faingataʻaʻia aí.+

6 ʻI he fakakaukau atu ki he meʻá ni, tā ʻoku māʻoniʻoni ʻa e ʻOtuá ʻi heʻene tafaʻakí ke ne totongi ʻaki ʻa e mamahi ki he faʻahinga ʻoku nau fai ha fakamamahi kiate kimoutolú.+ 7 Ka ko kimoutolu ko ia ʻoku tofanga ʻi he mamahí, ʻe ʻoatu ʻa e nonga kiate kimoutolu fakataha mo kimautolu ʻi he fakahā mai ʻa e ʻEiki ko Sīsuú+ mei hēvani fakataha mo ʻene kau ʻāngelo mālohí+ 8 ʻi ha uloʻi afi, ʻi heʻene faisāuni ki he faʻahinga ko ia ʻoku ʻikai te nau ʻiloʻi ʻa e ʻOtuá pea mo e faʻahinga ko ia ʻoku ʻikai te nau talangofua ki he ongoongo lelei fekauʻaki mo hotau ʻEiki ko Sīsuú.+ 9 Ko e faʻahingá ni tonu te nau hokosia ʻa e tautea fakaefakamaau ko e fakaʻauha taʻengata+ ʻo fakamavaheʻi mei he ʻao ʻo e ʻEikí pea mei he lāngilangi ʻo hono mālohí, 10 ʻi he haʻu ʻa e ʻEikí ke fakalāngilangiʻi ia fakataha mo hono fanga tokoua māʻoniʻoní, ko e faʻahinga kotoa ʻoku tui kiate iá te nau ofoofo ʻiate ia. Pea koeʻuhi naʻa mou tui ki he ngaahi meʻa naʻa mau tala atu kiate kimoutolú, te mou ʻi honau lotolotongá foki.

11 Ki he taumuʻa ko iá ʻoku mau lotu maʻu pē maʻamoutolu, ke lau kimoutolu ʻe hotau ʻOtuá ʻoku mou taau mo ʻene uí+ pea ke fakahoko kakato ʻaki hono mālohí ʻa e meʻa lelei kotoa ʻokú ne finangalo ki aí pea mo e ngāue kotoa ʻo e tuí. 12 ʻOku hoko iá koeʻuhi ke hoko ai ʻa e huafa ʻo hotau ʻEiki ko Sīsuú ʻo fakalāngilangiʻi ʻiate kimoutolu pea ke fakalāngilangiʻi ai kimoutolu ʻi he fāʻūtaha mo iá, ʻo fakatatau ki he ʻofa maʻataʻatā ʻa hotau ʻOtuá pea mo e ʻEiki ko Sīsū Kalaisí.

2 Kae kehe, fanga tokoua, ʻi he fekauʻaki mo e ʻi heni* ʻa hotau ʻEiki ko Sīsū Kalaisí+ pea mo hono fakatahatahaʻi kitautolu kiate iá,+ ʻoku mau kole atu kiate kimoutolu 2 ke ʻoua ʻe hoko ʻo ueʻingofua mei hoʻomou fakaʻuhingá pe hoko ʻo fakahohaʻasi ʻe ha fakamatala fakamānavaʻi*+ pe ʻe ha pōpoaki kuo leaʻaki pe ʻe ha tohi ʻoku hā ngali ko e ʻoatu meiate kimautolu, ʻo pehē ko e ʻaho ʻo Sihová*+ ʻoku ʻi heni.

3 Tuku ke ʻoua ʻe takiheeʻi* kimoutolu ʻe ha taha ʻi ha faʻahinga founga, koeʻuhí ʻe ʻikai hoko mai ʻa e ʻaho ko iá kae ʻoua ke ʻuluaki hoko mai ʻa e tafoki ʻo fakafepaki ki he moʻoní+ pea mo hono fakaeʻa ʻa e tangata ʻo e maumau-laó,+ ʻa e foha ʻo e ʻauhá.+ 4 ʻOkú ne tuʻu ʻo fakafepaki pea ʻokú ne hakeakiʻi ʻa ia tonu ʻo ne māʻolunga ange ʻi ha meʻa pē ʻoku ui ko ha ʻotua pe ko ha meʻa ʻoku fai ki ai ha lotu,* ʻo ne tangutu hifo ʻi he temipale ʻo e ʻOtuá, ʻo ne fakahāhaaʻi atu ʻa ia tonu ko ha ʻotua. 5 ʻOku ʻikai koā te mou manatuʻi ko e taimi naʻá ku kei ʻiate kimoutolu aí, naʻá ku faʻa tala atu kiate kimoutolu ʻa e ngaahi meʻá ni?

6 Pea ʻoku mou ʻiloʻi ʻi he taimí ni ʻa e meʻa ʻoku hoko ko ha taʻotaʻofiʻangá, koeʻuhi ʻe toki fakaeʻa mai ʻa e tokotaha ko iá ʻi hono taimi totonu. 7 Ko e moʻoni, ko e misiteli ʻo e maumau-lao ko ʻení ʻoku ʻosi ngāue ia,+ kae ʻoua pē ke toki puli atu ʻa e tokotaha ʻoku lolotonga hoko he taimí ni ko ha taʻotaʻofiʻangá. 8 Ko ia, ko e moʻoni, ko e tokotaha maumau-laó ʻe fakaeʻa ia, ʻa ia ʻe tafiʻi atu ia ʻe he ʻEiki ko Sīsuú ʻaki ʻa e ngaahi lea mālohi ʻoku haʻu mei hono ngutú*+ pea ʻe fakaʻauha ia ʻi he taimi ʻe fakaeʻa+ ai ʻa e ʻi heni* ʻa Sīsuú. 9 Ka ko e ʻi heni ʻa e tokotaha maumau-laó ʻoku ʻi he malumalu ia ʻo e tākiekina ʻa Sētané+ ʻoku fai ʻaki ʻa e ngāue fakaofo kotoa pē pea ʻaki ʻa e ngaahi fakaʻilonga mo e ngaahi mana loi+ 10 pea mo e kākā taʻemāʻoniʻoni+ kotoa pē ʻoku fai ki he faʻahinga ʻe fakaʻauhá, ko ha tautea ia koeʻuhí naʻe ʻikai te nau tali ʻa e ʻofa ki he moʻoní ka nau hao ai. 11 Ko e ʻuhinga ia ʻoku fakaʻatā ai ʻe he ʻOtuá kinautolu ke kākaaʻi ʻe ha akonaki loi koeʻuhi ke nau tui ai ki he ngaahi lea loí,+ 12 pea ke nau hoko kotoa ai ʻo fakamāuʻi koeʻuhí naʻe ʻikai te nau tui ki he moʻoní ka nau saiʻia kinautolu ʻi he taʻemāʻoniʻoní.

13 Kae kehe, ʻoku mau moʻuaʻaki maʻu pē ke fakamālō ki he ʻOtuá koeʻuhi ko kimoutolu, fanga tokoua ʻoku ʻofaʻi ʻe Sihová,* koeʻuhí naʻe fili kimoutolu ʻe he ʻOtuá+ mei he kamataʻangá ki he fakamoʻuí. Naʻá ne fakamāʻoniʻoniʻi kimoutolu+ ʻaki hono laumālié koeʻuhi ko hoʻomou tui ki he moʻoní. 14 Naʻá ne ui kimoutolu ki he meʻá ni fakafou ʻi he ongoongo lelei ʻoku mau talakí, koeʻuhi ke mou maʻu ai ʻa e lāngilangi ʻa hotau ʻEiki ko Sīsū Kalaisí.+ 15 Ko ia ai, fanga tokoua, tuʻu maʻu+ pea tauhi maʻu hoʻomou piki ki he ngaahi fakahinohino naʻe akoʻi atu kiate kimoutolú,+ tatau ai pē pe naʻe fakafou ʻi ha pōpoaki kuo leaʻaki pe fakafou ʻi ha tohi atu meiate kimautolu. 16 ʻIkai ko ia pē, fakatauange ki hotau ʻEiki ko Sīsū Kalaisí mo e ʻOtuá ko ʻetau Tamaí, ʻa ia naʻá ne ʻofa ʻiate kitautolu+ mo ne ʻomai ʻa e fakafiemālie taʻengata mo e ʻamanaki lelei+ fakafou ʻi he ʻofa maʻataʻataá, 17 ke na fakafiemālieʻi homou lotó mo ʻai kimoutolu ke mou tuʻu maʻu* ʻi he ngāue mo e lea lelei kotoa pē.

3 Fakaʻosí, fanga tokoua, hokohoko atu ʻa e lotu maʻamautolú,+ ke lava ke mafola vave ai pē ʻa e folofola ʻa Sihová*+ mo hoko ai ʻo fakalāngilangiʻi, ʻo hangē tofu pē ko hono fakalāngilangiʻi ʻiate kimoutolú, 2 pea ke lava ke fakahaofi ai kimautolu mei he kau tangata fakatupu maumau mo fulikivanú,+ he ko e tuí ʻoku ʻikai ko ha meʻa ia ʻa e kakai kotoa pē.+ 3 Ka ʻoku faitōnunga ʻa e ʻEikí, pea te ne fakaivimālohiʻi kimoutolu pea maluʻi kimoutolu mei he tokotaha fulikivanú.* 4 ʻIkai ko ia pē, ʻoku mau maʻu ʻa e falala pau ʻi he ʻEikí fekauʻaki mo kimoutolu, ʻoku mou fakahoko pea te mou hokohoko atu hono fakahoko ʻemau ngaahi fakahinohinó. 5 Fakatauange ki he ʻEikí ke hokohoko atu ʻene tataki lavameʻa homou lotó ki he ʻofa ʻa e ʻOtuá+ pea ki he kātaki+ maʻá e Kalaisí.

6 Ko ia ʻoku mau ʻoatu eni ha ngaahi fakahinohino, fanga tokoua, ʻi he huafa ʻo hotau ʻEiki ko Sīsū Kalaisí, ke mou fakamamaʻo mei he tokoua kotoa pē ʻoku fakamoveuveu+ pea ʻikai ʻaʻeva ʻo fakatatau ki he ngaahi fakahinohino naʻa mou* maʻu meiate kimautolú.+ 7 He ʻoku mou ʻiloʻi ʻa e founga ʻoku totonu ke mou faʻifaʻitaki mai ai kiate kimautolú,+ koeʻuhí naʻe ʻikai te mau tōʻongaʻaki ha founga fakamoveuveu ʻi homou lotolotongá, 8 pea naʻe ʻikai te mau kai taʻetotongi ha meʻakai ʻa ha taha.+ ʻI hono kehé, ʻi he ngāue mālohi mo e fakaongosia naʻa mau ngāue ai ʻi he pō mo e ʻaho koeʻuhí ke ʻoua naʻa mau hilifaki atu ha kavenga fakamole lahi ki ha taha ʻo kimoutolu.+ 9 ʻOku ʻikai ke pehē ia ʻoku ʻikai te mau maʻu ha mafai,+ ka naʻa mau loto ke tuku atu kimautolu ko ha faʻifaʻitakiʻanga ke mou faʻifaʻitaki ki ai.+ 10 Ko hono moʻoní, ʻi he taimi naʻa mau ʻiate kimoutolu aí, naʻa mau faʻa ʻoatu kiate kimoutolu ʻa e tuʻutuʻuni ko ʻení: “Kapau ʻoku ʻi ai ha taha ʻoku ʻikai ke fie ngāue, ʻoua naʻa tuku ia ke ne kai.”+ 11 He ʻoku mau fanongo ʻoku ʻi ai ʻa e niʻihi ʻoku nau fakamoveuveu ʻi homou lotolotongá,+ ʻo ʻikai te nau teitei fai ha ngāue, ka ko ʻenau kaunoa holo pē ʻi he meʻa ʻoku ʻikai hanau kaunga ki ai.+ 12 Ko e kakai peheé ʻoku mau tuʻutuʻuni mo enginaki atu ʻi he ʻEiki ko Sīsū Kalaisí, ʻoku totonu ke nau ngāue fakalongolongo pea kai ʻa e meʻakai ʻoku nau ngāueʻi ʻe kinautolu tonu.+

13 ʻI he tafaʻaki ʻa kimoutolú, fanga tokoua, ʻoua ʻe foʻi ʻi he faileleí. 14 Ka ʻo kapau ʻoku ʻikai talangofua ha taha ki he fekau ʻoku mau ʻoatu fakafou ʻi he tohí ni, hanganaki fakaʻilongaʻi ʻa e tokotahá ni pea tuku ʻa e feohi mo iá,+ koeʻuhí ke ne mā. 15 Pea neongo iá ʻoua te mou lau ia ko ha fili, kae hokohoko atu ʻa e enginaki kiate ia+ ʻi he tuʻunga ko ha tokoua.

16 Ko ia fakatauange ki he ʻEiki ʻo e melinó ke ne ʻoatu maʻu pē ʻa e melinó ʻi he tafaʻaki kotoa pē.+ Fakatauange ke ʻiate kimoutolu kotoa ʻa e ʻEikí.

17 Ko au, Paula, ʻoku ou tohi atu ʻa e ʻofá ni ʻaki hoku nimá tonu,+ ʻa ia ko e founga ia ʻoku ou fakapapauʻiʻaki ʻeku ngaahi tohí kotoa.

18 Ke ʻiate kimoutolu kotoa ʻa e ʻofa maʻataʻatā ʻa hotau ʻEiki ko Sīsū Kalaisí.