KO E TOHI HONO UA KIA TĪMOTÉ

1 Ko au Paula, ko ha ʻapositolo ʻa Kalaisi Sīsū fakafou ʻi he finangalo ʻo e ʻOtuá ʻo fakatatau ki he talaʻofa ʻo e moʻui kuo ʻai ke malava fakafou ʻia Kalaisi Sīsuú,+ 2 ko e tohi atu kia Tīmote, ko ha foha ʻofeina:+

Fakatauange ke ke maʻu ʻa e ʻofa maʻataʻatā, meesi, mo e melino mei he ʻOtuá ko e Tamaí pea mo Kalaisi Sīsū ko hotau ʻEikí.

3 ʻOku ou fakamālōʻia ʻa e ʻOtuá, ʻa ia ʻoku ou fai ki ai ʻa e ngāue toputapú ʻaki ha konisēnisi maʻá, ʻo hangē ko ia naʻe fai ʻe heʻeku fanga kuí, ko ia ai ʻoku ou manatuʻi maʻu pē koe ʻi heʻeku ngaahi hū tōtōakí ʻi he pō mo e ʻaho. 4 ʻI heʻeku manatu ki ho loʻimatá, ʻoku ou fakaʻamu ange ke u sio atu kiate koe, koeʻuhí ke fonu hoku lotó ʻi he fiefia. 5 He ʻoku ou manatuʻi ʻa e tui taʻemālualoi ʻoku ʻiate koé,+ ʻa ia naʻe tomuʻa nofoʻia ʻi hoʻo kui fefine ko Loisí mo hoʻo faʻē ko ʻIunisí, ka ʻoku ou falala pau ʻoku toe ʻiate koe foki.

6 Ko ia ai, ʻoku ou fakamanatu atu ke ke ngāueʻaki ʻa e meʻaʻofa ʻa e ʻOtuá naʻá ke maʻu ʻi heʻeku hilifaki hoku nimá ʻiate koé,+ ʻaki ʻa e faivelenga ʻo hangē haʻo tafunaki ha afí. 7 He naʻe ʻikai ke foaki mai ʻe he ʻOtuá kiate kitautolu ha laumālie loto-foʻi,+ ka ko e laumālie ʻo e mālohi+ mo e ʻofa mo e ʻatamai lelei. 8 Ko ia ʻoua naʻá ke mā ʻi he faifakamoʻoni fekauʻaki mo hotau ʻEikí+ pe ko haʻo maaʻi au, ʻa ia ko ha pōpula maʻana, ka ke mateuteu ke tofanga ʻi he mamahi+ koeʻuhí ko e ongoongo leleí ʻaki ʻa e falala ki he mālohi ʻo e ʻOtuá.+ 9 Naʻá ne fakahaofi kitautolu peá ne ui kitautolu ke hoko ko ha kakai tapu,+ ʻo ʻikai koeʻuhí ko ʻetau ngaahi ngāué, ka koeʻuhí ko ʻene taumuʻa pē ʻaʻaná mo ʻene ʻofa maʻataʻataá.+ Naʻá ne fakahaaʻi mai eni kiate kitautolu fakafou ʻia Kalaisi Sīsū ʻi ha taimi fuoloa ʻi he kuohilí, 10 ka kuo ʻai eni ʻo hā mahino fakafou ʻi he fakaeʻa mai ʻe hotau Fakamoʻuí, ʻa Kalaisi Sīsū,+ ʻa ia kuó ne fakakaʻanga ʻa mate+ pea kuó ne fakaeʻa mai kiate kitautolu fakafou ʻi he ongoongo leleí+ ʻa e founga ke tau maʻu ai ʻa e moʻuí+ mo e taʻefaʻaʻauhá,+ 11 ʻa ia naʻe fakanofo ai au ko ha tokotaha malanga pea ko ha ʻapositolo pea ko ha faiako.+

12 Ko e ʻuhinga eni ʻoku ou tofanga foki ai ʻi he ngaahi meʻá ni,+ ka ʻoku ʻikai te u mā.+ He ʻoku ou ʻiloʻi ʻa e Tokotaha ʻa ia kuó u tui ki aí, pea ʻoku ou fakapapauʻi ʻokú ne malava ke maluʻi ʻa e meʻa kotoa pē kuó u tuku kiate ia ke ne tokangaʻí ʻo aʻu ki he ʻaho fakamāú.+ 13 Hanganaki piki ki he sīpinga ʻo e ngaahi lea leleí*+ ʻa ē kuó ke fanongo ai meiate aú fakataha mo e tui mo e ʻofa ʻoku tupu mei he fāʻūtaha mo Kalaisi Sīsuú. 14 Maluʻi ʻa e meʻa mahuʻinga ko ʻeni naʻe tuku atú fakafou ʻi he tokoni ʻa e laumālie māʻoniʻoní ʻa ia ʻokú ne nofoʻia kitautolú.+

15 ʻOkú ke ʻiloʻi eni, ko e kau tangata kotoa pē ʻi he vahefonua ʻo ʻĒsiá+ kuo nau tafoki meiate au, ʻo kau ai ʻa Faikelo mo Heamokena. 16 Fakatauange ke ʻoatu ʻe he ʻEikí ha meesi ki he fale ʻo ʻOnesifoló,+ he naʻá ne faʻa fai ha fakaivifoʻou kiate au, pea naʻe ʻikai te ne maaʻi ʻa hoku ngaahi sēini fakapōpulá. 17 ʻI hono kehé, ʻi he taimi naʻá ne ʻi Loma aí, naʻá ne kumi tōtōivi kiate au ʻo ne ʻilo au. 18 Fakatauange ke tuku kiate ia ʻe he ʻEikí ke ne maʻu ʻa e meesi meia Sihova* ʻi he ʻaho fakamāú. Pea ʻokú ke ʻiloʻi lelei ʻa e ngaahi ngāue naʻá ne fai ʻi ʻEfesoó.

2 Ko ia ai, ko koe, ʻe hoku foha,+ hokohoko atu hono maʻu ʻa e mālohi ʻi he ʻofa maʻataʻatā ʻa ia ʻoku ʻia Kalaisi Sīsuú; 2 pea ko e ngaahi meʻa ko ia naʻá ke fanongo ai meiate aú ʻa ia naʻe poupou ki ai ha kau fakamoʻoni tokolahi,+ tuku atu ʻa e ngaahi meʻá ni ki ha kau tangata faitōnunga, ʻa ia te nau hoko leva ai ʻo taau feʻunga ke akoʻi ʻa e niʻihi kehé. 3 ʻI he tuʻunga ko ha sōtia lelei+ ʻa Kalaisi Sīsuú, mateuteu atu ke ke tofanga ʻi he mamahi.+ 4 ʻOku ʻikai ha tangata ʻoku ngāue ko ha sōtia te ne fakakau* ia ʻi he ngaahi meʻa fakapisinisí,* koeʻuhí ke ne maʻu ai ʻa e hōhōʻia ʻa e tokotaha ko ia naʻá ne fakahū ia ke hoko ko ha sōtiá. 5 Pea ʻi he ngaahi sipotí, ko ha taha pē ʻoku feʻauhi ʻoku ʻikai ke fakakalauni ia tuku kehe pē kapau naʻá ne feʻauhi ʻo fakatatau ki he ngaahi tuʻutuʻuní.+ 6 Ko e tokotaha ngoue ʻoku ngāue mālohí kuo pau ko ia ʻa e tokotaha te ne ʻuluaki kai mei he fua ʻo ʻene ngoué. 7 Fakakaukau maʻu pē ki he meʻa ʻoku ou leaʻakí; ʻe ʻoatu ʻe he ʻEikí kiate koe ʻa e mahino* ʻi he ngaahi meʻa kotoa pē.

8 Manatuʻi ko Sīsū Kalaisí naʻe fokotuʻu hake ia mei he pekiá+ pea ko ha hako ia ʻo Tēvita,+ ʻo fakatatau ki he ongoongo lelei ʻoku ou malangaʻí,+ 9 ʻa ia ko e meʻa ia ʻoku ou faingataʻaʻia ai mo tuku pilīsone ʻo hangē ha tokotaha faihiá.+ Ka neongo ia, ʻoku ʻikai ke haʻisia ai ʻa e folofola ʻa e ʻOtuá.+ 10 ʻI he ʻuhingá ni ʻoku ou hokohoko atu ai hono kātekina ʻa e ngaahi meʻa kotoa pē koeʻuhiā ko e faʻahinga kuo filí,+ koeʻuhi ke nau kau mo kinautolu ʻi hono maʻu ʻa e fakamoʻui ʻoku fakafou mai ʻia Kalaisi Sīsuú, fakataha mo e lāngilangi taʻengata. 11 ʻOku falalaʻanga ʻa e leá ni: Ko e moʻoni kapau naʻa tau mate fakataha mo ia, te tau moʻui fakataha foki mo ia;+ 12 kapau te tau hokohoko atu ai pē ʻi he kātakí, te tau pule fakataha foki mo ia ko e ngaahi tuʻi;+ kapau ʻoku tau fakafisingaʻi ia, te ne fakafisingaʻi foki kitautolu;+ 13 neongo ʻoku ʻikai ke tau fai ʻa e meʻa ʻoku folofolaʻaki ʻe he ʻOtuá, ʻokú ne fai maʻu pē ki heʻene leá, he ʻoku ʻikai lava ke ne fai ha meʻa ʻoku fepaki mo ʻene ngaahi tuʻungá.*

14 Hanganaki fakamanatu kiate kinautolu ʻa e ngaahi meʻá ni, ʻo fakahinohinoʻi* kinautolu ʻi he ʻao ʻo e ʻOtuá ke ʻoua te nau fakafekiki fekauʻaki mo ha ngaahi foʻi lea, ʻa e meʻa ʻoku ʻikai hano ʻaonga ʻe taha koeʻuhí ʻokú ne fakatupu ʻa e maumau ki he* faʻahinga ko ia ʻoku fanongó. 15 Fai ho tūkuingatá ke fakahāhaaʻi atu koe ʻokú ke fakahōifua ki he ʻOtuá, ko ha tangata ngāue ʻoku ʻikai ha meʻa ke mā ai, ʻo tofa totonu ʻa e folofola ʻo e moʻoní.+ 16 Kae siʻaki ʻa e ngaahi lea taʻeʻaonga ʻokú ne maumauʻi ʻa e meʻa ʻoku toputapú,+ he ʻe iku ia ʻo toe fakautuutu ange ai ʻa e anga-taʻefakaʻotuá, 17 pea ko ʻenau leá ʻe mafola hangē ha palá.* Ko Haiminia mo Failito ʻokú na kau ʻi honau lotolotongá.+ 18 Ko e ongo tangatá ni kuó na afe mei he moʻoní, ʻo na pehē kuo ʻosi hoko ʻa e toetuʻú,+ pea ʻokú na fulihi ai ʻa e tui ʻa e niʻihi. 19 Neongo ia, ko e makatuʻunga fefeka ʻa e ʻOtuá ʻoku kei tuʻu pē ia, ʻo tohi tongi ai eni, “ʻOku ʻafioʻi ʻe Sihova* ʻa e faʻahinga ʻoku haʻaná,”+ pea mo eni “Tuku ki he tokotaha kotoa ʻoku ui ki he huafa ʻo Sihová*+ ke ne siʻaki ʻa e taʻemāʻoniʻoní.”

20 ʻI ha fuʻu fale lahi ʻoku ʻi ai ʻa e ngaahi ipu,* ʻo ʻikai ngata pē ʻi he ipu koula mo e siliva kae pehē foki ki he ipu ʻakau mo e ʻumea, pea ko e niʻihi ke ngāueʻaki lāngilangiʻia ka ko e niʻihi ki hano ngāueʻaki ʻoku ʻikai lāngilangiʻia. 21 Ko ia ka hanganaki fakamamaʻo ha taha mei he ngaahi ipu ʻoku ʻikai ke ngāueʻaki lāngilangiʻiá, te ne hoko ai ko ha meʻangāue* ki hano ngāueʻaki lāngilangiʻia, kuo fakamāʻoniʻoniʻi, ʻo ʻaonga ki he tokotaha ʻoku ʻoʻoná, ʻo mateuteu ki he ngāue lelei kotoa pē. 22 Ko ia hola mei he ngaahi holi fakatalavoú, kae tuli ki he māʻoniʻoní, tuí, ʻofá, melinó, fakataha mo e faʻahinga ko ia ʻoku nau ui ki he ʻEikí ʻi ha loto-maʻá.

23 ʻIkai ngata aí, siʻaki ʻa e ngaahi fakakikihi ngalivale mo taʻeʻuhingá,+ ʻi hono ʻiloʻi ʻoku fakatupunga ai ʻa e keé. 24 He ko ha tamaioʻeiki ʻa e ʻEikí ʻoku ʻikai fiemaʻu ia ke ne kē, ka ʻoku fiemaʻu ke ne hoko ʻo anga-fakaalaala* ki he tokotaha kotoa pē,+ taau ke faiako, mo fakahāhā ʻa e faʻamataʻofi ʻi he taimi ʻoku fai mai ai ha faihala kiate iá,+ 25 ʻo akoʻi ʻi he anga-malū ʻa e faʻahinga ʻoku fakafepakí.+ Heiʻilo naʻa tuku ʻe he ʻOtuá ke nau fakatomala,* ʻo taki atu ai ki ha ʻilo totonu ki he moʻoní,+ 26 pea ʻe foki mai ai ʻenau fakakaukau leleí ʻo nau hao ai mei he tauhele ʻa e Tēvoló, he kuó ne puke moʻui kinautolu ke nau fai hono lotó.+

3 Ka ke ʻiloʻi ʻa e meʻá ni, ʻi he ngaahi ʻaho fakaʻosí+ ʻe ʻi heni ai ʻa e ngaahi taimi fakalilifu ʻa ia ʻe faingataʻa ke fekuki mo ia. 2 He ko e tangatá te nau hoko ko e kau ʻofa kiate kinautolu pē, ko e kau ʻofa ki he paʻangá, loto-mahikihiki, hīkisia, kau lea taʻetokaʻi, talangataʻa ki he mātuʻá, kau taʻehoungaʻia, taʻemateaki, 3 ʻikai maʻu ʻa e ʻofa fakanatulá, lotolotokehe, kau laukovi loi, ʻikai maʻu ʻa e mapuleʻi-kitá, anga-kakaha, ʻikai ʻofa ki he leleí, 4 kau lavaki, taʻefieauna, fakafuofuolahi ʻi he hīkisia, kau ʻofa ki he mālié kae ʻikai ʻofa ki he ʻOtuá, 5 hā fakangalingali atu ʻoku nau maʻu ʻa e anga-fakaʻotuá ka ʻoku ʻikai ke hā moʻoni ʻa hono mālohí ʻiate kinautolu;+ pea ko e faʻahingá ni ke ke tafoki meiate kinautolu. 6 He ʻoku tupu hake mei he faʻahingá ni ha kau tangata ʻoku nau hūhū olopoto atu ki he ngaahi ʻapí ʻo taki pōpula ha kakai fefine ʻoku kākaaʻingofua kuo nau mafasia ʻi heʻenau ngaahi angahalá, kuo tākiekina ʻe he ngaahi holi kehekehe, 7 ʻa ia ʻoku nau ako maʻu pē kae ʻikai ʻaupito pē malava ke nau maʻu ha ʻilo totonu ki he moʻoní.

8 Pea ʻi he founga ko ia naʻe fakafepaki ai ʻa Siani mo Siamepi kia Mōsesé, ʻoku pehē foki mo e faʻahingá ni ʻi he hokohoko atu ʻenau fakafepaki ki he moʻoní. Ko e kau tangata peheé kuo fakameleʻi fakaʻaufuli honau ʻatamaí, ʻoku nau taʻefakahōifua ʻi he fekauʻaki mo e tuí. 9 Ka neongo ia, ʻe ʻikai haʻanau toe laka ki muʻa, he ko ʻenau valé* ʻe mātuʻaki hā mahino atu ia ki he tokotaha kotoa, ʻo hangē foki ko e ongo tangata ko iá.+ 10 Ka kuó ke muimui ofi ʻi heʻeku akonakí, ʻi heʻeku ʻalunga moʻuí,+ ʻi heʻeku taumuʻá, ʻi heʻeku tuí, ʻi heʻeku kātakí, ʻi heʻeku ʻofá, ʻi heʻeku ʻūkumá, 11 ʻi he ngaahi fakatangá mo e ngaahi faingataʻaʻiá ʻo hangē ko ia naʻá ku hokosia ʻi ʻAniteoké,+ ʻi ʻAikoniumé,+ ʻi Līsitá.+ Naʻá ku kātekina ʻa e ngaahi fakatanga ko ʻení, pea naʻe fakahaofi au ʻe he ʻEikí mei he ngaahi meʻa kotoa ko iá.+ 12 Ko hono moʻoní, ko e faʻahinga kotoa ʻoku nau loto ke moʻui ʻaki ʻa e anga-līʻoa fakaʻotua ʻi he fekauʻaki mo Kalaisi Sīsuú, ʻe fakatangaʻi foki kinautolu.+ 13 Ka ko e kau tangata fulikivanú mo e kau kākaá te nau ʻalu mei he kovi ki he kovi ange, ʻo fai ʻa e takihalaʻi pea ʻe takihalaʻi kinautolu.+

14 Ka ko koe, hokohoko atu ʻi he ngaahi meʻa naʻá ke ako mo fakatuipauʻi koe ke ke tui ki aí,+ he ʻokú ke ʻiloʻi ʻa e faʻahinga naʻá ke ako ia mei aí 15 pea talu mei hoʻo kei valevalé+ mo hoʻo ʻilo ki he ngaahi tohi māʻoniʻoní,*+ ʻa ia ʻoku malava ke ne ʻai koe ke ke poto ke maʻu ai ʻa e fakamoʻui fakafou ʻi he tui kia Kalaisi Sīsuú.+ 16 Ko e potu Folofola kotoa pē kuo fakamānavaʻi ia ʻe he ʻOtuá+ pea ʻoku ʻaonga ki he akonaki,+ ki he valoki, ki he fakatonutonu, ki he akonekina ʻi he māʻoniʻoni,+ 17 koeʻuhi ke hoko ai ʻa e tangata ʻa e ʻOtuá ʻo maʻu ʻa e malava kakato, kuo teuʻi kakato ki he ngāue lelei kotoa pē.

4 ʻOku ou mātuʻaki tuʻutuʻuni atu kiate koe ʻi he ʻao ʻo e ʻOtuá mo Kalaisi Sīsū, ʻa ia te ne fakamāuʻi+ ʻa e kau moʻuí mo e kau maté,+ fakafou ʻi heʻene hā maí+ pea mo hono Puleʻangá:+ 2 Malangaʻi ʻa e folofolá;+ fai fakavavevave ia ʻi he taimi faingamālie mo e taimi faingataʻa; valoki,+ fakatokanga mālohi, enginaki, ʻaki ʻa e anga-kātaki fakaʻaufuli mo e pōtoʻi fakafaiako.+ 3 He ʻe ʻi ai ha vahaʻa taimi ʻa ia heʻikai te nau kātakiʻi ai ʻa e akonaki leleí,*+ kae fakatatau ki heʻenau ngaahi holi ʻanautolú, te nau kumi ha kau faiako ke nau fanongo ai ki he meʻa ʻoku ongo lelei ki honau telingá.+ 4 Te nau tafoki mei he fanongo ki he moʻoní ʻo tuku ʻenau tokangá ki he ngaahi talanoa loi. 5 Ka ko koe, tauhi maʻu hoʻo fakakaukau leleí ʻi he ngaahi meʻa kotoa pē, kātakiʻi ʻa e faingataʻá,+ fai ʻa e ngāue ʻa ha ʻevangeliō,* fakahoko kakato ʻa hoʻo ngāue fakafaifekaú.+

6 He kuo lilingi atu au hangē ha feilaulau inú,+ pea ko e taimi ki hoku fakatauʻatāiná+ ʻoku ofí ni mai. 7 Kuó u faitau tōtōivi,+ kuó u ʻosiki ʻa e lová,+ kuó u tuʻu maʻu ʻi he tuí. 8 Mei he taimi ko ʻení ʻo faai atu, kuo tuku tauhi mai maʻaku ʻa e kalauni ʻo e māʻoniʻoní,+ ʻa ia ʻe foaki mai kiate au ʻe he ʻEikí, ko e fakamaau māʻoniʻoní,+ ko ha pale ʻi he ʻaho ko iá,+ ʻo ʻikai kiate au pē, kae toe pehē foki ki he kotoa ʻo e faʻahinga ʻoku nau fakatuʻamelie ki heʻene hā maí.

9 Fai ho tūkuingatá ke ke haʻu vave kiate au. 10 He ko Tīmasi+ kuó ne liʻaki au koeʻuhí naʻá ne ʻofa ʻi he ngaahi meʻa ʻo e fokotuʻutuʻu lolotongá,* pea kuó ne ʻalu ki Tesalonaika, ko Kilisini ki Kalētia, ko Taitusi ki Talamati. 11 Ko Luke pē ʻoku ʻiate aú. ʻOmi ʻa Maʻake ʻi hoʻo haʻú, he ʻokú ne ʻaonga kiate au ʻi he ngāue fakafaifekaú. 12 Ka kuó u fekauʻi atu ʻa Tikiko+ ki ʻEfesō. 13 ʻI hoʻo haʻú, ʻomai ʻa e pulupulu naʻá ku tuku ʻi Taloasi ʻia Kāpusí, pea mo e ngaahi takainga tohí, tautefito ki he ngaahi takainga tohi kiliʻimanú.

14 Ko ʻĀlekisānita ko e tufunga kopá naʻe lahi ʻene faikovi mai kiate aú. ʻE totongi fakafoki ʻe Sihova* kiate ia ʻo fakatatau ki heʻene ngaahi ngāué.+ 15 ʻOku totonu ke ke maluʻi mo koe foki meiate ia, he naʻe tōtuʻa ʻa ʻene fakafepakiʻi ʻetau pōpoakí.

16 ʻI heʻeku ʻuluaki taukapó naʻe ʻikai kau ha taha ki heʻeku tafaʻakí, ka naʻa nau liʻaki kotoa au—fakatauange ke ʻoua naʻa tukuakiʻi ia kiate kinautolu. 17 Ka naʻe tuʻu ʻa e ʻEikí ʻo ofi kiate au ʻo ne fakahūhū mai kiate au ʻa e mālohi, ke lava ai fakafou ʻiate au ʻo fakahoko kakato ʻa e malangá pea lava ke fanongo ki ai ʻa e ngaahi puleʻanga kotoa pē;+ pea naʻá ne fakahaofi au mei he ngutu ʻo e laioné.+ 18 ʻE fakahaofi au ʻe he ʻEikí mei he ngāue fulikivanu kotoa pē pea te ne fakahaofi au ʻo ʻohake ki hono Puleʻanga fakahēvaní.+ Ke ʻiate ia ʻa e lāngilangí ʻo taʻengata pea taʻengata. ʻĒmeni.

19 ʻOatu hoku ʻofa kia Pīsila mo ʻAkuila+ pea mo e fale ʻo ʻOnesifoló.+

20 Ko ʻElasito+ naʻe nofo ia ʻi Kolinitō, ka naʻá ku tuku pē ʻa Talofima+ ʻi Mīleto he naʻá ne puke. 21 Fai ho tūkuingatá ke ke aʻu mai ki muʻa ʻi he taimi momokó.

ʻOku ʻoatu ʻe ʻIupolo hono ʻofa, pea ʻoku pehē pē mo Piutena mo Laino mo Kalōtia pea mo e fanga tokouá kotoa.

22 Ke ʻi he laumālie ʻoku mou fakahāhaá ʻa e ʻEikí. Ke ʻiate kimoutolu ʻene ʻofa maʻataʻataá.