KO E TOHI ʻA SĒMISÍ

1 Ko au Sēmisi,+ ko ha tamaioʻeiki ʻa e ʻOtuá pea mo e ʻEiki ko Sīsū Kalaisí, ko e tohi atu ki he matakali ʻe 12 ʻa ia ʻoku nau movetevete holó:

Mālō e tau mo ena!

2 Mou lau ko e koto fakafiefia, ʻe hoku fanga tokoua, ʻa e taimi ʻoku mou fetaulaki ai mo e ngaahi ʻahiʻahi kehekehé,+ 3 ʻi he ʻiloʻi ko hoʻomou hokosia iá ʻoku fakatupu ai ʻe hoʻomou tui ko ʻeni kuo ʻosi siviʻí ʻa e kātaki.+ 4 Kae tuku muʻa ke fakakakato ʻe he kātakí ʻene ngāué, koeʻuhi ke mou hoko ai ʻo kakato mo haohaoa ʻi he ngaahi tafaʻaki kotoa pē, ʻo ʻikai masiva ʻi ha meʻa.+

5 Ko ia kapau ʻoku ʻi ai ha taha ʻo kimoutolu ʻoku masiva ʻi he potó, tuku ke ne hanganaki kole ki he ʻOtuá,+ he ʻokú ne foaki nima-homo ki he faʻahinga kotoa ʻo ʻikai te ne ʻoatu mo e lau,*+ pea ʻe foaki ia kiate ia.+ 6 Kae tuku ke ne hanganaki kole ʻi he tui,+ ʻo ʻikai ha veiveiua ʻe taha,+ he ko e tokotaha ʻoku veiveiuá ʻokú ne hangē ko e peau ʻo e tahí ʻa ia ʻoku ʻave takai mo fepaleʻekina holo ʻe he matangí. 7 Ko hono moʻoní, ʻoku ʻikai totonu ke ʻamanekina ʻe he tangata ko iá te ne maʻu ha meʻa meia Sihova;* 8 ko ha tangata lotolotoua ia,+ ʻoku ʻikai te ne pau ki ha meʻa ʻi heʻene ngaahi founga kotoa pē.

9 Kae tuku ki he tokoua ʻoku māʻulaló ke ne fiefia* ʻi hono hakeakiʻi iá,+ 10 pea ke fiefia ʻa e tokotaha koloaʻiá ʻi heʻene ako ʻo ʻiloʻi ʻa e anga-fakatōkilaló,+ he ko e tokotaha koloaʻiá te ne mole atu ʻo hangē ha matalaʻiʻakau ʻo e ngoué. 11 He ʻoku hangē pē ko e ʻalu hake ʻa e laʻaá mo ʻene vela kakahá ʻo mae ai ʻa e ʻakaú, pea ngangana hono matalá pea mole atu ʻene hā fakaʻofoʻofá, ko ia ʻe pehē pē ʻa e mole atu ʻa e tangata koloaʻiá ʻi he lotolotonga ʻo e ngaahi meʻa ʻokú ne tuli ki aí.+

12 Fiefia ē ka ko e tangata ko ia ʻokú ne hanganaki kātakiʻi ʻa e ʻahiʻahí,+ koeʻuhí ʻi heʻene hoko ʻo maʻu ʻa e hōifuá te ne maʻu ai ʻa e kalauni ʻo e moʻuí,+ ʻa ia naʻe talaʻofa ʻe Sihova* ki he faʻahinga ʻoku hokohoko atu ʻenau ʻofa kiate Iá.+ 13 ʻI he tofanga ʻi he ʻahiʻahí, tuku ke ʻoua naʻa pehē ʻe ha taha: “Kuo ʻahiʻahiʻi au ʻe he ʻOtuá.” He ʻoku ʻikai malava ke ʻahiʻahiʻi ʻa e ʻOtuá ʻaki ʻa e ngaahi meʻa ʻoku koví, pea ʻoku ʻikai te ne ʻahiʻahiʻi ʻaki ia ha taha. 14 Ka ʻoku ʻahiʻahiʻi ʻa e tokotaha taki taha ʻi hono tohoakiʻi mo fakataueleʻi* ʻe heʻene holi pē ʻaʻaná.+ 15 Ko e holí leva, ʻi heʻene hoko ʻo tuʻituʻiá, ʻokú ne fanauʻi mai ʻa e angahala; ko e angahalá leva, ʻi he ʻosi hono fakahokó, ʻokú ne ʻomai ʻa e mate.+

16 ʻOua naʻa takihalaʻi kimoutolu, siʻoku fanga tokoua ʻofeina. 17 Ko e meʻaʻofa lelei kotoa pē mo e foaki haohaoa kotoa pē ʻoku mei ʻolunga ia,+ ʻoku ʻalu hifo ia mei he Tamai ʻo e ngaahi maama fakalangí,+ ʻa ē ʻoku ʻikai haʻane liliu pe fetongitongi ʻo hangē ko e ngaahi ʻata feliuliuakí.+ 18 Koeʻuhí ko ʻene taumuʻá ia, naʻá ne ʻai ai kitautolu ke tau moʻui ʻaki hono ngāueʻaki ʻa e pōpoaki ʻo e moʻoní.+ Naʻá ne fai ení koeʻuhí ke tau hoko ai ko e ʻuluaki fua ʻo ʻene ngaahi meʻa fakatupú.+

19 Ke mou ʻilo ʻa e meʻá ni, siʻoku fanga tokoua ʻofeina: Ko e tokotaha kotoa pē kuo pau ke ne vave ki he fanongo, fakatuotuai ki he lea,+ fakatuotuai ki he ʻita,+ 20 he ko e ʻita ʻa e tangatá ʻoku ʻikai te ne fakahāhā ai ʻa e māʻoniʻoni ʻa e ʻOtuá.+ 21 Ko ia ai, huʻihuʻi atu ʻa e kinohaʻa kotoa pē mo e kovi kotoa pē,*+ pea tali anga-malū ʻa hono tō ʻiate kimoutolu ʻa e folofolá ʻa ia ʻoku malava ke ne fakahaofi kimoutolú.

22 Kae kehe, mou hoko ko e kau fai ki he folofolá+ ʻo ʻikai ko e kau fanongo pē, pea ʻe ʻikai ke kākaaʻi ai kimoutolu ʻaki ʻa e ngaahi fakaʻuhinga loí. 23 He kapau ʻoku ʻi ai ha taha ko ha tokotaha fanongo ki he folofolá ʻo ʻikai ko ha tokotaha fai ki ai,+ ʻoku hangē ʻa e tokotahá ni ko ha tangata ʻokú ne sio ki hono fofonga ʻoʻoná ʻi ha sioʻata. 24 He ʻokú ne sio atu kiate ia, peá ne mavahe atu ʻo ʻalu pea ngalo leva ai pe ko e faʻahinga tokotaha fēfē ia. 25 Ka ko e tokotaha ʻokú ne sio fakamamaʻu ki he lao haohaoa+ ʻokú ne ʻomai ʻa e tauʻatāiná pea hanganaki muimui aí kuó ne hoko ai, ʻo ʻikai ko ha tokotaha fanongo pea ngalo, ka ko ha tokotaha fai ʻo e ngāué, pea te ne fiefia ʻi heʻene fai iá.+

26 Kapau ʻoku ʻi ai ha tangata ʻokú ne fakakaukau ko ha tokotaha lotu ia ki he ʻOtuá, ka ʻoku ʻikai te ne hanganaki mapuleʻi fefeka* hono ʻeleló,+ ʻokú ne kākaaʻi pē ʻa hono loto ʻoʻoná, pea ko ʻene lotú ko e muna pē. 27 Ko e founga lotu ʻoku maʻa mo taʻeʻuliʻi ʻi he anga ʻo e vakai ʻa hotau ʻOtuá mo e Tamaí ʻa eni: Ke tokangaʻi ʻa e kau paeá+ mo e kau uitoú+ ʻi heʻenau faingataʻaʻiá,+ pea ke te tauhi kita ke taʻehaʻila mei he māmaní.+

2 ʻE hoku fanga tokoua, ʻoku mou piki koā ki he tui ʻa hotau ʻEiki lāngilangiʻia ko Sīsū Kalaisí lolotonga ia ʻoku mou filifilimānako?+ 2 He kapau ʻoku hū atu ki hoʻomou fakatahá ha tangata mo ha ngaahi mama koula ʻi hono ngaahi louhiʻinimá ʻokú ne vala lelei ʻaupito, ka ʻoku toe hū atu foki mo ha tangata masiva ʻoku vala palakū, 3 ʻoku mou sio fakataha koā mo e leleiʻia ki he tokotaha ʻokú ne tui ʻa e vala lelei ʻaupitó pea pehē ange, “Nofo koe he nofoʻanga ko ʻení ʻi ha potu ʻoku leleí,” pea ʻoku mou pehē koā ki he tokotaha masivá, “Tuʻu pē koe hena” pe “Nofo he nofoʻanga ko ē ʻi lalo ʻi hoku tuʻunga-vaʻé”?+ 4 Kapau ko ia, ʻikai ʻoku mou fai ha lau tuʻunga ʻi homou haʻohaʻongá,+ pea ʻikai kuo mou hoko ai ko ha kau fakamaau faituʻutuʻuni fulikivanu?+

5 Fanongo mai, siʻoku fanga tokoua ʻofeina. ʻIkai naʻe fili ʻe he ʻOtuá ʻa e faʻahinga ʻoku masiva ʻi he vakai ʻa e māmaní ke nau koloaʻia ʻi he tuí+ pea hoko ko e ngaahi ʻea ʻo e Puleʻangá, ʻa ia naʻá ne talaʻofaʻaki ki he faʻahinga ʻoku ʻofa ʻiate iá?+ 6 Ka kuo mou taʻetokaʻi ʻa e kau masivá. ʻIkai ko e kau koloaʻiá ʻoku nau fakafeʻātungiaʻi kimoutolu+ pea toho atu kimoutolu ki he ʻao ʻo e ngaahi fakamaauʻanga fakalaó? 7 ʻIkai ʻoku nau laukovi ki he hingoa lelei ʻa ia naʻe uiʻaki kimoutolú? 8 Kapau leva ʻoku mou fakahoko ʻa e lao fakatuʻí ʻo fakatatau ki he potu folofolá, “Kuo pau ke ke ʻofa ki ho kaungāʻapí ʻo hangē pē ko hoʻo ʻofa kiate koé,”+ ʻoku lelei ʻaupito ia. 9 Ka ʻo kapau ʻoku hokohoko atu hoʻomou filifilimānakó,+ ʻoku mou faiangahala ai, pea ʻoku fakahalaiaʻi* ai kimoutolu ʻe he laó ko e kau maumau-lao.+

10 He ka ʻi ai ha taha ʻoku talangofua ki he kotoa ʻo e Laó ka ʻokú ne fai ha laka hala ʻi ha taha ʻo e ngaahi fekaú, kuó ne hoko ai ko ha tokotaha ʻokú ne maumauʻi ʻa e kotoa ʻo e Laó.+ 11 He ko e tokotaha naʻá ne pehē, “Kuo pau ke ʻoua naʻá ke tono,”+ naʻá ne pehē foki, “Kuo pau ke ʻoua naʻá ke fakapō.”+ Kapau leva ʻoku ʻikai te ke tono ka ʻokú ke fakapō, kuó ke hoko koe ko ha tokotaha maumau-lao. 12 Hanganaki lea mo tōʻongafai ʻi ha founga ʻo hangē ko ia ʻoku fai ʻe he faʻahinga ʻa ia ʻoku teu ke fakamāuʻi ʻaki ʻa e lao ʻo ha kakai tauʻatāina.*+ 13 He ko e tokotaha ʻoku ʻikai te ne tōʻongaʻaki ʻa e mēsí ʻe fai hono fakamāuʻí ʻo ʻikai ha meesi ki ai.+ ʻOku ikunaʻi ʻe he mēsí ʻa e fakamāú.

14 Ko e hā hano ʻaonga, ʻe hoku fanga tokoua, kapau ʻoku pehē ʻe ha taha ʻokú ne maʻu ʻa e tuí ka ʻoku ʻikai te ne maʻu ʻa e ngāué?+ ʻE lava koā ʻe he tui ko iá ʻo fakahaofi ia?+ 15 Kapau ʻoku ʻi ai ha tokoua pe ha tuofefine ʻoku masiva vala* mo ʻikai haʻane meʻakai feʻunga ki he ʻaho ko iá, 16 ka ʻoku pehē ange ʻe ha taha ʻo kimoutolu ki ai, “ʻAlu ʻi he fiemālie; ke ke māfana peá ke mākona,” ka ʻoku ʻikai te mou ʻoange ki ai ʻa e meʻa ʻoku fiemaʻu ki hono sinó, ko e hā hano ʻaonga?+ 17 ʻOku pehē pē foki, ko e tuí ʻiate ia pē, ʻo taʻekau ai ʻa e ngāué, ʻoku mate ia.+

18 Neongo ia, ʻe pehē ʻe ha taha: “ʻOkú ke maʻu ʻe koe ʻa e tuí, pea ʻoku ou maʻu ʻe au ʻa e ngāué. Fakahā mai kiate au ʻa hoʻo tuí taʻekau ai ʻa e ngāué, pea te u fakahā atu ʻeku tuí ʻaki ʻeku ngāué.” 19 ʻOkú ke tui koā ʻoku taha pē ʻa e ʻOtuá? ʻOku lelei ʻaupito ia. Pea neongo iá ko e fanga tēmenioó ʻoku nau tui ki ai pea nau teteki.+ 20 Ka ʻoku ʻi ai koā haʻo tokotokanga ke ke ʻiloʻi, ʻe tangata vale, ko e tui ʻoku taʻekau ai ʻa e ngāué ʻoku taʻeʻaonga ia? 21 ʻIkai ko ʻetau tamai ko ʻĒpalahamé naʻe lau ia ʻokú ne māʻoniʻoni ko e meʻa ʻi heʻene ngaahi ngāué ʻi he hili ko ia ʻene ʻoatu ʻa ʻAisake ko hono fohá ki he funga ʻōlitá?+ 22 ʻOkú ke sio ai ko ʻene tuí naʻe ngāue fakataha ia mo ʻene ngaahi ngāué pea ko ʻene tuí naʻe fakahaohaoaʻi ia ʻe heʻene ngāué,+ 23 pea naʻe fakahoko ai ʻa e potu folofola ko ia ʻoku pehē: “Naʻe tui ʻa ʻĒpalahame kia Sihova,* pea naʻe lau ai ia ʻokú ne māʻoniʻoni,”+ pea naʻe ui ia ko e kaumeʻa ʻo Sihova.*+

24 ʻOku mou ʻiloʻi ai ʻe lau ha tangata ʻoku māʻoniʻoni ko e meʻa ʻi he ngāué ʻo ʻikai ʻi he tuí ʻataʻatā pē. 25 ʻI he founga tatau pē, ʻikai naʻe lau foki ʻa Lēhapi ko e fefine feʻauakí ʻoku māʻoniʻoni ko e meʻa ʻi heʻene ngaahi ngāué, hili ia ʻene talitali lelei ʻa e ongo talafekaú peá ne tuku atu kinaua ʻi ha hala kehe?+ 26 Ko e moʻoni, hangē pē ko e mate ʻa e sinó ʻi he ʻikai ha laumālié,*+ ʻoku pehē pē ʻa e mate ʻa e tuí ʻi he ʻikai ha ngāué.+

3 ʻOku ʻikai totonu ki he tokolahi ʻo kimoutolu ke mou hoko ko e kau faiako, ʻe hoku fanga tokoua, ʻi hono ʻiloʻi te tau maʻu ha fakamaau mafatukituki ange.*+ 2 He ko e kotoa ʻo kitautolú ʻoku tau tūkia* ʻo tā-tuʻo-lahi.+ Kapau ʻoku ʻi ai ha taha ʻoku ʻikai ke tūkia ʻi he leá, ko ha tangata haohaoa ia, ʻa ia ʻoku malava ke ne ʻai piti foki hono sinó kotoa. 3 Kapau ʻoku tau ʻai ʻa e pití ki he ngutu ʻo e fanga hōsí ke ʻai kinautolu ke nau talangofua mai kiate kitautolu, ʻoku tau tataki foki ai honau sinó kotoa. 4 Vakai atu foki ki he ngaahi vaká: Neongo honau fuʻu lalahí mo hono ʻave takai ʻe he ngaahi matangi mālohí, ʻoku puleʻi kinautolu ʻe ha kiʻi foheʻuli siʻisiʻi ʻaupito ki ha feituʻu pē ʻoku loto ʻa e tangata ʻi he fohé ke ʻalu ki aí.

5 ʻOku pehē pē foki, ko e ʻeleló ko ha kiʻi kupu siʻisiʻi ia ʻo e sinó, ka ʻokú ne fai ha ngaahi pōlepole lalahi. Vakai he kiʻi afi siʻisiʻi ē ʻoku lava ke vela ʻo puho ai ha fuʻu vaotā! 6 Ko e ʻeleló foki ko ha afi.+ Ko e ʻeleló ko ha kiʻi foʻi māmani taʻemāʻoniʻoni ia ʻoku ʻi he lotolotonga ʻo e ngaahi kupu ʻo hotau sinó, he ʻokú ne ʻuliʻi ʻa e sinó kotoa+ peá ne tutu ʻo vela ʻa e ʻalunga kakato ʻo e moʻuí,* pea ko e afi ko iá ʻoku haʻu mei Kihena.* 7 He ko e faʻahinga kotoa pē ʻo e manu kaivaó mo e manupuná mo e fanga manu totolo mo ngaoló mo e meʻamoʻui ʻi tahí ʻe ala fakalalataʻi pea kuo fakalalataʻi ʻe he tangatá. 8 Ka ʻoku ʻikai lava ʻe ha tangata ke ne fakalalataʻi ʻa e ʻeleló. ʻOku puleʻingataʻa ia mo fakatupu maumau, ʻo fonu ʻi he kona fakatupu mate.+ 9 ʻOku tau fakahīkihikiʻi ʻaki ia ʻa Sihova,* ko e Tamaí, pea ʻoku tau toe talatukiʻi ʻaki ia ʻa e tangata ʻa ia kuó ne hoko mai “ʻi he tatau ʻo e ʻOtuá.”+ 10 ʻOku haʻu mei he ngutu tatau pē ʻa e fakahīkihikí mo e talatukí.

ʻE hoku fanga tokoua, ʻoku ʻikai totonu ke hoko ha meʻa peheni.+ 11 ʻOku mapunopuna mai koā ha vai melie pea mo ha vai kona mei he matavai tatau pē? 12 ʻE hoku fanga tokoua, ʻoku ʻikai lava ke fua mai ha fuʻu fiki ko ha ngaahi foʻi ʻōlive, pe fua mai ha fuʻu kālepi ko ha ngaahi foʻi fiki, ʻikai ko ia?+ Pehē foki ki he vai konokoná ʻoku ʻikai lava ke haʻu mei ai ha vai melie.

13 Ko hai ia ʻoku poto mo ne maʻu ʻa e mahinó ʻi homou haʻohaʻongá? Tuku kiate ia ke ne fakahāhā fakafou ʻi heʻene ʻulungaanga leleí ʻa e ngaahi ngāue ʻoku fakahoko fakataha mo ha anga-malū ʻa ia ʻoku tupu mei he potó. 14 Ka ʻo kapau ʻoku mou mātuʻaki meheka+ mo maʻu ha loto-fekeʻikeʻi,*+ ʻoua ʻe hīkisia+ mo lohiakiʻi ʻa e moʻoní. 15 ʻOku ʻikai ko e poto eni ʻoku ʻalu hifo mei ʻolungá; ʻoku fakamāmani,+ fakakakano, mo fakatēmeniō ia. 16 He ko e feituʻu pē ʻoku ʻi ai ʻa e meheká mo e loto-fekeʻikeʻí,* ʻe ʻi ai foki ʻa e māveuveú mo e meʻa fulikivanu kotoa pē.+

17 Ka ko e poto ʻoku mei ʻolungá, ʻuluakí ʻoku maʻa,+ hoko ai ʻa e fakamelino,+ fakaʻatuʻi,+ mateuteu ke talangofua, fonu ʻi he meesi mo e ngaahi fua lelei,+ taʻefilifilimānako+ mo ʻikai ke mālualoi.+ 18 ʻIkai ko ia pē, ko e fua ʻo e māʻoniʻoní ʻoku tūtuuʻi ia ʻi he ngaahi tuʻunga melino+ maʻá e* faʻahinga ʻoku fakamelinó.+

4 Ko e hā ʻa e tupuʻanga ʻo e ngaahi tau mo e ngaahi fekeʻikeʻi ʻoku ʻi homou lotolotongá? ʻIkai ʻoku nau tupu mei hoʻomou ngaahi holi fakakakano ʻa ia ʻokú ne fakahoko ha faitau ʻi loto ʻiate kimoutolú?*+ 2 ʻOku mou holi ki ha meʻa, ka ʻoku ʻikai te mou maʻu. ʻOku mou fakapō mo mānumanu, ka ʻoku ʻikai malava ke mou maʻu. ʻOku mou fekeʻikeʻi mo faitau.+ ʻOku ʻikai te mou maʻu koeʻuhí ko e ʻikai te mou kolé. 3 ʻI he taimi ʻoku mou kole aí, ʻoku ʻikai te mou maʻu koeʻuhí ʻoku mou kole ʻi ha taumuʻa hala, ke fakalatoʻaki hoʻomou ngaahi holi fakakakanó.

4 ʻA e kau tono tangata,* ʻikai ʻoku mou ʻilo ko e kaumeʻa mo e māmaní ko e fakafili ia ki he ʻOtuá? Ko ia ai, ʻilonga ha taha ʻoku loto ke hoko ko ha kaumeʻa ʻo e māmaní ʻokú ne hoko ai ko ha fili ʻo e ʻOtuá.+ 5 Pe ʻoku mou fakakaukau ʻoku taʻeʻuhinga ʻa e potu folofola ia ʻoku pehē: “Ko e laumālie kuo nofo loto ʻiate kitautolú ʻokú ne holi ai pē ʻi he meheka”?+ 6 Kae kehe, ko e ʻofa maʻataʻatā ʻokú Ne foaki maí ʻoku mahulu hake ia. Ko ia ʻoku pehē ʻe he potu folofolá: “ʻOku talitekeʻi ʻe he ʻOtuá ʻa e kau hīkisiá,+ ka ʻokú ne foaki ʻa e ʻofa maʻataʻataá ki he kau anga-fakatōkilaló.”+

7 Ko ia ai, fakamoʻulaloaʻi kimoutolu ki he ʻOtuá;+ kae talitekeʻi ʻa e Tēvoló,+ pea te ne hola meiate kimoutolu.+ 8 ʻUnuʻunu ofi ki he ʻOtuá, pea te ne ʻunuʻunu ofi mai kiate kimoutolu.+ Fakamaʻa homou nimá, ʻa kimoutolu kau angahala,+ pea ʻai ke maʻa homou lotó,+ ʻa kimoutolu kau lotolotoua. 9 Mou faingataʻaʻia pē mo mamahi mo tangi.+ Tuku ke hoko hoʻomou katá ko e mamahi, pea mo hoʻomou fiefiá ki he siva ʻa e ʻamanakí. 10 Mou anga-fakatōkilalo ʻi he vakai mai ʻa Sihová,*+ pea te ne hakeakiʻi kimoutolu.+

11 Tuku hoʻomou felaukoviʻakí, fanga tokoua.+ ʻIlonga ha taha ʻokú ne laukovi ki ha tokoua pe fakamāuʻi hono tokouá ʻokú ne laukovi ai ki he laó mo ne fakamāuʻi ai ʻa e laó. Ko ia kapau ʻokú ke fakamāuʻi ʻa e laó, ko koé ʻoku ʻikai ko ha tokotaha fai ki he laó ka ko ha fakamaau. 12 ʻOku toko taha pē ʻa e Tokotaha Foaki-Laó mo e Fakamāú,+ ʻa e tokotaha ʻokú ne malava ke faifakahaofi mo faifakaʻauhá.+ Ka ko koe, ko hai koe ke ke fakamāuʻi ho kaungāʻapí?+

13 Fanongo mai angé, ʻa kimoutolu ko ia ʻoku mou pehē: “Ko e ʻahó ni pe ko ʻapongipongi te mau fononga ki he kolo ko ení pea te mau nofo ai ʻi ha taʻu ʻe taha, pea te mau pisinisi ai mo fakatupu paʻanga,”+ 14 lolotonga ia ʻoku ʻikai te mou ʻilo pe ʻe fēfē hoʻomou moʻuí ʻapongipongi.+ He ko kimoutolú ko ha kakapu pē ʻoku hā ʻi ha kiʻi taimi siʻi pea puli atu leva.+ 15 ʻI hono kehé, ʻoku totonu ke mou pehē: “Kapau ko e finangalo ia ʻo Sihová,*+ te mau moʻui ʻo fai eni pe ko ē.” 16 Kae kehe ʻoku mou laukau mo pōlepole ʻo fekauʻaki pē mo kimoutolu. Ko e pōlepole peheé ʻoku fulikivanu. 17 Ko ia ai, kapau ʻoku ʻilo ʻe ha taha ʻa e meʻa ʻoku totonu ke ne faí kae ʻikai te ne fai ia, ʻokú ne faiangahala ai.+

5 Fanongo mai angé, ʻa kimoutolu kau tangata koloaʻia, mou tangi mo fākafoa ʻi he ngaahi meʻa fakamamahi ʻa ia ʻoku teu ke hoko mai kiate kimoutolú.+ 2 Kuo popo hoʻomou koloá, pea ko homou valá kuo kai ʻe he ané.+ 3 Ko hoʻomou koulá mo e silivá kuo ʻumeʻumea, pea ko e ʻumeʻumeá te ne fakahaaʻi hoʻomou fehālaakí pea te ne keina homou kakanó. Ko e meʻa kuo mou faʻoakí ʻe hoko ia ʻo hangē ha afí ʻi he ngaahi ʻaho fakaʻosí.+ 4 Vakai! Ko e kau ngāue kuo nau utu hoʻomou ngaahi ngoué ʻoku nau hanganaki tangi hake koeʻuhí ko e ʻikai te mou ʻoange ʻenau totongí, pea ko e ngaahi ui tokoni ʻa e kau utú kuo fanongo ki ai ʻa Sihova* ʻo e ngaahi kau taú.+ 5 Kuo mou moʻui fakatuʻumālie pea mo fakahōhōʻiaʻi-kita ʻi he māmaní. Kuo mou ʻai ke ngeʻengeʻe homou lotó ʻi he ʻaho ʻo e tāmateʻí.+ 6 Kuo mou fakahalaiaʻi; kuo mou fakapoongi ʻa e tokotaha māʻoniʻoní. ʻIkai ʻokú ne fakafepakiʻi kimoutolu?

7 Ko ia ai, mou kātaki fanga tokoua, ke aʻu ki he ʻi heni* ʻa e ʻEikí.+ Vakai! Ko e tokotaha ngoué ʻokú ne hanganaki tatali ʻi he kātaki ki he fua lelei ʻo e fonuá, kae ʻoua ke aʻu mai ʻa e ʻuha tokamuʻá mo e ʻuha tōmuí.+ 8 Mou ngāueʻaki foki ʻa e kātakí;+ ʻai ke tuʻu maʻu homou lotó, koeʻuhí ko e ʻi heni* ʻa e ʻEikí kuo fakaʻaʻau ke ofi mai.+

9 ʻOua te mou fengulunguluʻi,* fanga tokoua, koeʻuhi ke ʻoua ʻe fakamāuʻi ai kimoutolu.+ Vakai! Ko e Fakamāú ena ʻoku tuʻu mai ʻi muʻa ʻi he matapaá. 10 Fanga tokoua, sio ki he kau palōfitá ko ha sīpinga ia ʻo e tofanga ʻi he koví+ pea mo hono ngāueʻaki ʻo e kātakí,+ ʻa kinautolu naʻa nau lea ʻi he huafa ʻo Sihová.*+ 11 Vakai! ʻOku tau lau ʻoku fiefia* ʻa e faʻahinga kuo nau kātakí.+ Kuo mou fanongo ʻi he kātaki ʻa Siopé+ pea kuo mou mātā ʻa e ola naʻe ʻoange ʻe Sihová,*+ ʻa ia ko Sihová* ʻoku manavaʻofa loloto ʻaupito mo mohu meesi.+

12 Hiliō he meʻa kotoa, ʻe hoku fanga tokoua, tuku ʻa e fai fakapapaú, tatau ai pē pe ʻoku fai ia ki he langí pe ki he māmaní pe ki ha toe fuakava pē. Kae ʻai hoʻomou “ʻIó” ke ʻuhingá ko e ʻio pea mo hoʻomou “ʻIkaí,” ko e ʻikai,+ ke ʻoua ʻe ala fakamāuʻi ai kimoutolu.

13 ʻOku ʻi ai ha taha ʻoku tofanga ʻi ha faingataʻa ʻi homou lotolotongá? Tuku ke ne hokohoko atu ʻa e lotú.+ ʻOku ʻi ai ha taha ʻoku loto-fiefia? Tuku ke ne hivaʻaki ʻa e ngaahi sāmé.+ 14 ʻOku ʻi ai ha taha ʻoku puke ʻi homou lotolotongá? Tuku ke ne ui mai ʻa e kau mātuʻa+ ʻo e fakatahaʻangá kiate ia, pea tuku ke nau lotua ia mo tākaiʻaki ʻa e lolo+ ʻi he huafa ʻo Sihová.* 15 Pea ko e lotu ʻoku fai ʻi he tuí te ne ʻai ʻa e tokotaha puké* ke ne sai, pea ʻe ʻai ia ʻe Sihova* ke ne mālohi. Pehē foki, kapau kuó ne fakahoko ha ngaahi angahala, ʻe fakamolemoleʻi ia.

16 Ko ia ai, mou feveteʻaki tauʻatāina hoʻomou ngaahi angahalá+ pea mou felotuʻaki, ke hoko ai ʻo fakamoʻui kimoutolu. Ko e hū tōtōaki ʻa ha tangata māʻoniʻoni ʻoku ʻi ai hono mālohi mo ola lelei.*+ 17 Ko ʻIlaisiaá ko ha tangata ia naʻá ne maʻu ʻa e ngaahi ongo ʻo hangē pē ko kitautolú, ka neongo iá naʻá ne lotu fakamātoato ke ʻoua ʻe ʻuha, pea naʻe ʻikai ai ke tō hifo ha ʻuha ki he fonuá ʻi he taʻu ʻe tolu mo e māhina ʻe ono.+ 18 Pea naʻá ne toe lotu, pea naʻe ʻohifo ʻe he langí ʻa e ʻuha pea naʻe laku fua mai ʻa e fonuá.+

19 ʻE hoku fanga tokoua, kapau ʻoku ʻi ai ha taha ʻi homou lotolotongá kuo takiheeʻi mei he moʻoní pea fakatafokiʻi mai ia ʻe ha taha, 20 mou ʻiloʻi ai ʻilonga ha taha ʻokú ne fakatafokiʻi mai ha tokotaha faiangahala mei hono ʻalunga halá+ te ne fakahaofi ai ʻene* moʻuí mei he maté pea ʻe ʻufiʻufiʻi ai ha fuʻufuʻunga angahala.+