KO E ʻULUAKI TOHI ʻA PITÁ

1 Ko au Pita, ko ha ʻapositolo+ ʻa Sīsū Kalaisi, ko e tohi atu ki he kau nofo fakataimi ʻoku movetevete holo ʻi Ponitō, Kalētia, Kapatōsia,+ ʻĒsia, mo Pitiniá, ki he faʻahinga kuo fili 2 ʻo fakatatau ki hono tomuʻa ʻafioʻi ʻe he ʻOtuá ko e Tamaí,+ pea kuo fakamāʻoniʻoniʻi ʻe he laumālié+ ki he taumuʻa ko e hoko ʻo talangofua pea afuhi ʻaki ʻa e taʻataʻa ʻo Sīsū Kalaisí:+

Fakatauange ke hoko ʻo fakalahi atu kiate kimoutolu ʻa e ʻofa maʻataʻataá mo e melinó.

3 Fakafetaʻi ki he ʻOtuá mo e Tamai ʻa hotau ʻEiki ko Sīsū Kalaisí, he fakatatau ki he lahi ʻene mēsí naʻá ne foaki mai ai kiate kitautolu ha fanauʻi foʻou+ ki he ʻamanaki ʻoku moʻui+ fakafou ʻi he toetuʻu ʻa Sīsū Kalaisi mei he pekiá.+ 4 Kuó ne ʻai ke fanauʻi kitautolu ki ha moʻui ʻoku ʻi ai hono pale ʻa ia kuó ne talaʻofaʻaki kiate kitautolú. Ko e palé ni ko ha tofiʻa taʻefaʻaʻauha mo taʻeʻuliʻi pea mo taʻefaʻamae.+ Kuo tuku tauhi ia ʻi hēvani maʻamoutolu,+ 5 ʻa kimoutolu kuo maluʻi ʻe he mālohi ʻo e ʻOtuá fakafou ʻi he tuí ki ha fakamoʻui kuo mateuteu ke fakahaaʻi ʻi he taimi fakaʻosí. 6 Koeʻuhi ko e meʻá ni ʻoku mou fiefia lahi ai, neongo kuo mou mamahi ʻi ha kiʻi taimi siʻi ʻi he ngaahi ʻahiʻahi kehekehe,+ kapau kuo pau ke pehē, 7 koeʻuhí ke hoko ai hoʻomou tui kuo ʻosi siviʻí,+ ʻa ia ʻoku mahuʻinga mamaʻo ange ia ʻi he koula ʻoku ʻauha neongo hono sivi ʻaki ʻa e afí, ko ha tupuʻanga ia ʻo e fakahīkihiki mo e fakalāngilangi mo e fakangeingeia ʻi he fakahā mai ʻa Sīsū Kalaisí.+ 8 Neongo naʻe ʻikai ʻaupito te mou sio kiate ia, ʻoku mou ʻofa ʻiate ia. Neongo ʻoku ʻikai te mou mātā ia he taimí ni, ka ʻoku mou ngāueʻi ʻa e tui kiate ia pea ʻoku mou fiefia lahi ʻi ha fiefia taʻealafakamatalaʻi mo lāngilangiʻia, 9 ʻi hoʻomou aʻusia ʻa e taumuʻa ʻo hoʻomou tuí, ʻa homou fakamoʻuí.+

10 ʻI he fekauʻaki mo e fakamoʻui ko ʻení, ko e kau palōfita ko ia naʻa nau kikite fekauʻaki mo e ʻofa maʻataʻatā naʻe fakataumuʻa kiate kimoutolú naʻa nau fai ha fekumi tōtōivi mo ha fakatotolo fakalelei ki ai.+ 11 Naʻa nau hanganaki fakatotolo pe ko e hā ʻa e taimi pau pe ko e hā ʻa e kuonga ʻe hoko ai ʻa e ngaahi meʻa naʻe fakahaaʻi ʻe he laumālie māʻoniʻoní ʻi loto ʻiate kinautolú ʻo fekauʻaki mo Kalaisí,+ koeʻuhi naʻe faifakamoʻoni ʻa e laumālie māʻoniʻoní ki muʻa ʻo fekauʻaki mo e faingataʻaʻia ʻa Kalaisí+ pea mo e lāngilangi te ne maʻu ʻi he hili iá. 12 Naʻe fakahaaʻi kiate kinautolu ko ʻenau ngāué ʻo ʻikai maʻanautolu, ka maʻamoutolu, ʻi he fekauʻaki mo e meʻa kuo fanongonongo atu kiate kimoutolu he taimí ni ʻe he faʻahinga naʻa nau talaki atu ʻa e ongoongo leleí kiate kimoutolú ʻaki ʻa e laumālie māʻoniʻoni naʻe fekauʻi hifo mei hēvaní.+ Ko e ngaahi meʻa tofu pē ʻeni ʻoku holi ʻa e kau ʻāngeló ke fakasio hifo ki aí.

13 Ko ia ʻai ke mateuteu homou ʻatamaí ki he ngāué;+ tauhi maʻu ke kakato hoʻomou fakakaukau leleí;+ fokotuʻu hoʻomou ʻamanakí ʻi he ʻofa maʻataʻatā ko ia ʻe fakahaaʻi atu kiate kimoutolu ʻi he fakahā mai ʻa Sīsū Kalaisí. 14 ʻI he tuʻunga ko e fānau talangofuá, tuku ʻa e hoko ʻo fakafuo ʻe he* ngaahi holi naʻa mou maʻu ki muʻa ʻi hoʻomou taʻeʻiló, 15 ka ʻi he hangē ko e Tokotaha Māʻoniʻoni ʻa ia naʻá ne ui kimoutolú, mou hoko ʻo māʻoniʻoni ʻi hoʻomou tōʻonga kotoa pē,+ 16 he kuo tohi: “Kuo pau ke mou māʻoniʻoni, koeʻuhí he ʻoku ou māʻoniʻoni.”+

17 Pea kapau ʻoku mou ui ki he Tamaí ʻa ia ʻokú ne fakamaau taʻefilifilimānako+ ʻo fakatatau ki he ngāue ʻa e tokotaha taki taha, mou tōʻongaʻaki ʻa e manavaheé+ lolotonga ʻa e taimi ʻo hoʻomou nofo fakataimí. 18 He ʻoku mou ʻilo naʻe ʻikai ke fai ʻaki ʻa e ngaahi meʻa ʻoku ala ʻauha, ʻaki ʻa e siliva pe koula, ʻa hono fakatauʻatāinaʻi*+ kimoutolu mei hoʻomou founga moʻui muna naʻa mou maʻu mei hoʻomou fanga kuí.* 19 Ka naʻe fai ʻaki ia ʻa e taʻataʻa mahuʻinga, ʻo hangē ko e toto+ ʻo ha lami taʻemele mo taʻehaʻila,+ ʻa e taʻataʻa ko ia ʻo Kalaisí.+ 20 Ko e moʻoni, naʻe toka ʻafioʻi ʻa e tokotaha ko iá ki muʻa ʻi he tanupou ʻo e māmaní,*+ ka naʻe ʻai ia ke ne eʻa ʻi he ngataʻanga ʻo e ngaahi taimí koeʻuhí ko kimoutolu.+ 21 Fakafou ʻiate ia ʻoku mou hoko ai ko e kau tui ki he ʻOtuá,+ ʻa e tokotaha naʻá ne fokotuʻu hake ia mei he pekiá+ pea ʻoange kiate ia ʻa e lāngilangí,+ koeʻuhí ke ʻi he ʻOtuá hoʻomou tuí mo e ʻamanakí.

22 Ko eni kuo fakamaʻa kimoutolu ʻi hoʻomou talangofua ki he moʻoní ʻo mou maʻu ai ʻa hono olá ʻa ia ko e ʻofa fakatokoua taʻemālualoi,+ mou maʻu ā ʻa e ʻofa lahi ki he tokotaha taki taha mei he lotó.+ 23 He kuo fanauʻi foʻou kimoutolu,+ ʻo ʻikai ʻaki ha tenga ʻoku ala ʻauha, kae ʻaki ha tenga taʻealaʻauha,*+ fakafou ʻi he folofola ʻa e ʻOtua moʻui mo tuʻuloá.+ 24 He “ko e kakano kotoa pē* ʻoku hangē ko e mohukú, pea ko e kotoa ʻo hono lāngilangí ʻoku hangē ko e fisi ʻo e ʻakau ʻo e vaó; ʻoku mae ʻa e mohukú, pea ʻoku ngangana hono matalá, 25 ka ko e folofola ia ʻa Sihová* ʻoku tolonga ʻo taʻengata.”+ Pea ko e “folofola” ko ʻení ko e ongoongo lelei ia naʻe talaki atu kiate kimoutolú.+

2 Ko ia, huʻi atu meiate kimoutolu ʻa e kovi kotoa pē+ mo e kākā mo e mālualoi mo e meheka pea mo e laukovi kotoa pē. 2 ʻI he hangē ko e fanga kiʻi valevale toki fanauʻí,+ fakatupu ha holi ki he huʻakau taʻehuʻi* ʻo e folofolá, he ʻoku fakafou ai ʻa hoʻomou tupu ʻo aʻusia ʻa e fakamoʻuí,+ 3 he kuo mou ʻahiʻahiʻi ʻo ʻiloʻi* ʻa e anga-lelei ʻa e ʻEikí.

4 ʻI hoʻomou haʻu kiate ia, ko ha maka moʻui naʻe siʻaki ʻe he tangatá+ ka kuo fili ʻe he ʻOtuá, pea ʻoku mahuʻinga kiate ia,+ 5 ko kimoutolu tonu ʻi he tuʻunga ko e ngaahi maka moʻuí ʻoku langa hake kimoutolu ʻo hoko ko ha fale fakalaumālie+ ke mou hoko ko ha tuʻunga taulaʻeiki māʻoniʻoni, koeʻuhí ke ʻohake ai ʻa e ngaahi feilaulau fakalaumālie+ ʻoku fakahōifua ki he ʻOtuá fakafou ʻia Sīsū Kalaisi.+ 6 He ʻoku pehē ʻi he Folofolá: “Vakai! ʻOku ou fakatoka ʻi Saione ha maka kuo fili, ko ha maka-tuliki fakavaʻe mahuʻinga, pea ʻoku ʻikai ha taha ʻokú ne ngāueʻi ʻa e tui ki aí ʻe faifai ange peá ne loto-mamahi ʻi ha siva ʻa e ʻamanakí.”*+

7 Ko ia ai, ko kimoutolu ia ʻoku mahuʻinga ki ai ʻa e tokotaha ko iá, koeʻuhi ko kimoutolú ko e kau tui; ka ki he faʻahinga ʻoku ʻikai tuí, “ko e maka naʻe siʻaki ʻe he kau tufungá,+ kuo hoko ia ko e maka-tuliki tefitó”*+ 8 pea “ko ha maka ʻo e tūkiaʻanga mo ha maka fakafaingataʻaʻiaʻanga ki honau halá.”+ ʻOku nau tūkiá koeʻuhi ʻoku nau talangataʻa ki he folofolá. Naʻe vaheʻi kinautolu ki he ikuʻanga tofu pē ko ení. 9 Ka ko kimoutolú “ko ha kakai kuo fili, ko ha tuʻunga taulaʻeiki fakatuʻi, ko ha kakai māʻoniʻoni,+ ko ha kakai ke hoko ko ha koloa makehe,+ koeʻuhi ke mou talaki atu ʻa e ngaahi lelei”*+ ʻo e Tokotaha naʻá ne ui kimoutolu mei he fakapoʻulí ki he maama fakaofo ʻaʻaná.+ 10 He naʻe ʻikai te mou hoko ko ha kakai ʻa e ʻOtuá ki muʻa, ka ʻi he taimi ní ko e kakai kimoutolu ʻa e ʻOtuá;+ naʻe ʻikai ke fakahaaʻi kiate kimoutolu ʻa e mēsí ki muʻa, ka ʻi he taimi ní kuo mou maʻu ʻa e mēsí.+

11 Siʻi faʻahinga ʻofeina, ʻoku ou fakalototoʻaʻi atu kimoutolu ʻi he tuʻunga ko e kau muli mo e kau nofo fakataimí+ ke mou hanganaki fakaʻehiʻehi mei he ngaahi holi fakakakanó,+ ʻa ia ʻoku faitau kiate kimoutolú.+ 12 Tauhi maʻu ʻa hoʻomou tōʻongá ke lelei ʻi he lotolotonga ʻo e ngaahi puleʻangá,+ koeʻuhi ʻi he taimi ʻoku nau tukuakiʻi ai kimoutolu ko e kau faihalá, ke nau hoko ko e kau fakamoʻoni sio tonu ʻi hoʻomou ngaahi ngāue leleí+ pea ko hono olá, ʻe fakalāngilangiʻi ai ʻa e ʻOtuá ʻi he ʻaho ʻo ʻene siviʻi ʻa e faʻahinga ʻo e tangatá.

13 Mou anganofo koeʻuhi ko e ʻEikí ki he tuʻunga kotoa pē kuo fokotuʻu ʻe he tangatá,+ ʻo tatau ai pē pe ki ha tuʻi+ ʻa ia ʻoku māʻolunga angé 14 pe ki ha kau kōvana ʻa ia kuó ne fekauʻi mai ke nau tauteaʻi ʻa e kau faihalá ka ke fakahīkihikiʻi ʻa e faʻahinga ʻoku faileleí.+ 15 He ko e finangalo ia ʻo e ʻOtuá, ʻi hoʻomou faileleí ʻe malava ai ke mou fakasīlongoʻi* ʻa e talanoa vale ʻa e kau tangata seselé.+ 16 Mou hoko ko ha kakai tauʻatāina,+ ʻo ngāueʻaki ʻa hoʻomou tauʻatāiná, ʻo ʻikai ko ha ʻufiʻufi* ki hoʻomou faihalá,+ ka ko ha kau tamaioʻeiki ʻa e ʻOtuá.+ 17 Fakaʻapaʻapa ki he faʻahinga kotoa pē ʻo e tangatá,+ maʻu ʻa e ʻofa ki he haʻohaʻonga fakakātoa ʻo e fanga tokouá,*+ manavahē ki he ʻOtuá,+ fakaʻapaʻapa ki he tuʻí.+

18 Tuku ki he kau sevānití ke nau anganofo ki honau ngaahi ʻeikí fakataha mo e manavahē totonu,+ ʻo ʻikai ngata pē kiate kinautolu ʻoku anga-lelei mo anga-fakaʻatuʻí ka kiate kinautolu foki ʻoku anga-faingataʻá. 19 He kapau ʻoku kātekina ʻe ha taha ha faingataʻa* mo ne faingataʻaʻia taʻetotonu koeʻuhí ko hono konisēnisí ʻi he ʻao ʻo e ʻOtuá,+ ko ha meʻa fakahōifua ia kiate ia. 20 He ko e hā hano ʻaonga kapau ʻoku mou kātekina hano haha kimoutolu koeʻuhi ko haʻamou faiangahala?+ Ka ʻo kapau ʻoku mou kātekina ʻa e faingataʻá koeʻuhi ko hoʻomou faileleí, ko ha meʻa fakahōifua eni ki he ʻOtuá.+

21 Ko hono moʻoní, naʻe ui kimoutolu ki he ʻalunga ko ení, koeʻuhi naʻa mo Kalaisi naʻá ne faingataʻaʻia maʻamoutolu,+ ʻo ne tuku atu ha faʻifaʻitakiʻanga kiate kimoutolu ke mou muimui ofi ʻi hono topuvaʻé.+ 22 Naʻe ʻikai te ne fai ha angahala,+ pea naʻe ʻikai ʻilo ha kākā ʻi hono ngutú.+ 23 ʻI he taimi naʻe leakovia* ai iá,+ naʻe ʻikai te ne tali ʻaki ha lea kovi.*+ ʻI he taimi naʻá ne faingataʻaʻia aí,+ naʻe ʻikai te ne fai ha fakamanamana, ka naʻá ne tuku atu ʻa ia tonu ki he Tokotaha ʻoku fakamaau+ māʻoniʻoní. 24 Ko ia tonu naʻá ne fua ʻi hono sino ʻoʻoná ʻetau ngaahi angahalá+ ʻi he ʻakaú,+ koeʻuhi ke tau ʻataʻatā ai mei heʻetau angahalá pea tau moʻui ki he māʻoniʻoní. Pea “ʻi hono ngaahi kafó naʻe fakamoʻui ai kimoutolu.”+ 25 He naʻa mou hangē ha fanga sipi ʻoku ʻalu heé,+ ka ko eni kuo mou foki mai ki he tauhi-sipi+ mo e tokotaha tauhi* ʻo hoʻomou moʻuí.

3 ʻI he founga tatau pē, ko kimoutolu ngaahi uaifi, mou anganofo ki homou ngaahi husepānití,+ koeʻuhí kapau ʻoku ʻi ai ha faʻahinga ʻoku ʻikai te nau talangofua ki he folofolá, ʻe lava ke ikunaʻi mai kinautolu ʻo ʻikai ʻaki ha lea kae fakafou ʻi he ʻulungaanga ʻa honau ngaahi uaifí,+ 2 koeʻuhí ko ʻenau hoko ko e kau fakamoʻoni sio tonu ʻi hoʻomou ʻulungaanga maʻá+ fakataha mo e fakaʻapaʻapa lolotó. 3 ʻOua ʻe tuku ke hoko hoʻomou teuteú ʻo fai ia ʻi tuʻa pē—ʻa hono fī ʻo e ʻulú mo hono tui ʻa e ngaahi meʻa-teuteu koulá+ pe vala leleí— 4 ka ke mou teuʻi ʻa e tangata fufū ʻo e lotó ʻaki ʻa e teuteu taʻealaʻauha ʻo e laumālie anga-mokomoko mo anga-malū,+ ʻa ia ʻoku mahuʻinga lahi ʻi he ʻafio mai ʻa e ʻOtuá. 5 He ko e anga ʻeni ʻo e faʻa teuteu ʻa e kau fefine māʻoniʻoni ʻo e kuohilí ʻa ia naʻe tuʻu ʻenau ʻamanakí ʻi he ʻOtuá, ʻo nau anganofo ki honau ngaahi husepānití, 6 ʻo hangē tofu pē ko e talangofua ʻa Sela kia ʻĒpalahamé, ʻo ne ui ia ko e ʻeiki.+ Pea kuo mou hoko ko ʻene fānau, kapau ʻoku hokohoko atu hoʻomou faileleí ʻo ʻoua ʻe tuku ke ikuʻi kimoutolu ʻe he manavaheé.+

7 Ko kimoutolu ngaahi husepāniti, ʻi he founga tatau pē mou hokohoko atu ʻa hoʻomou nofo mo kinautolú ʻo fakatatau ki he ʻilo.* ʻOange kiate kinautolu ʻa e ngeia+ ʻo hangē ko e fai ki ha ipu vaivai ange, ʻa ia ko e fefiné, he ko e ngaahi ʻea foki kinautolu fakataha mo kimoutolu+ ʻo e meʻaʻofa maʻataʻatā ko e moʻuí, telia naʻa ʻikai fanongo mai ʻa e ʻOtuá ki hoʻomou ngaahi lotú.

8 Fakaʻosí, ko kimoutolu kotoa, ke mou fakakaukau uouongataha,*+ kaungāongoʻi, ʻofa fakatokoua, manavaʻofa+ pea anga-fakatōkilalo.+ 9 ʻOua ʻe totongi ʻa e koví ʻaki ʻa e kovi+ pe lea koví ʻaki ʻa e lea kovi.+ ʻI hono kehé, ʻoatu ha tāpuaki,*+ koeʻuhí naʻe ui mai kimoutolu ki he ʻalunga ko ʻení, ke mou maʻu ai ha tāpuaki.

10 He “ʻilonga ha taha ʻe saiʻia ʻi he moʻuí pea ke ne mātā ha ngaahi ʻaho lelei kuo pau ke ne maluʻi hono ʻeleló mei he koví+ pea mo hono loungutú mei he lea kākaá. 11 Tuku ke ne tafoki mei he meʻa ʻoku koví+ pea fai ʻa e meʻa ʻoku leleí;+ tuku ke ne kumi ki he melinó pea tuli ki ai.+ 12 He ko e fofonga ʻo Sihová* ʻoku ʻi he kau māʻoniʻoní, pea ʻoku fanongo hono telingá ki heʻenau hū tōtōakí,+ ka ʻoku siʻaki ʻe he fofonga ʻo Sihová* ʻa e faʻahinga ʻoku nau fai ʻa e ngaahi meʻa ʻoku koví.”+

13 Ko e moʻoni, ko hai ia te ne ngaohikovia kimoutolu kapau ʻoku mou hoko ʻo faivelenga ʻi he meʻa ʻoku leleí?+ 14 Ka neongo kapau ʻoku mou faingataʻaʻia koeʻuhiā ko e māʻoniʻoní, te mou fiefia.+ Kae kehe, ʻoua ʻe manavahē ʻi he meʻa ʻoku nau manavahē aí, pea ʻoua ʻe hohaʻa.*+ 15 Kae ʻai ke tāpuhā ʻa e Kalaisí ʻi homou lotó ko e ʻEikí ia, ʻo mou mateuteu maʻu pē ke fai ha taukapo ʻi he ʻao ʻo e tokotaha kotoa ʻokú ne kounaʻi meiate kimoutolu ha ʻuhinga ki he ʻamanaki ʻoku mou maʻú, kae fai ia ʻaki ha loto anga-malū+ mo e fakaʻapaʻapa loloto.+

16 Tauhi maʻu ha konisēnisi lelei,+ koeʻuhí ko e hā pē ha faʻahinga founga ʻoku fai ai ha laukovi kiate kimoutolu, ke hoko ai ʻa e faʻahinga ʻoku nau laukovi kiate kimoutolú ʻo mā+ koeʻuhí ko homou ʻulungaanga lelei ʻi he tuʻunga ko e kau muimui ʻo Kalaisí.+ 17 He ʻoku lelei ange ke faingataʻaʻia koeʻuhí ko haʻamou failelei,+ kapau ʻoku fakaʻatā ia ʻe he ʻOtuá, ʻi haʻamou faingataʻaʻia koeʻuhí ko haʻamou faikovi.+ 18 He ko Kalaisi naʻá ne pekia tā-tuʻo-taha maʻá e ngaahi angahalá,+ ko ha tokotaha māʻoniʻoni maʻá e faʻahinga taʻemāʻoniʻoni,+ koeʻuhí ke taki ai kimoutolu ki he ʻOtuá.+ Naʻe tāmateʻi ia ʻi he kakano+ ka naʻe fakamoʻui hake ia ʻi he laumālie.+ 19 Pea ʻi he tuʻunga ko ʻení naʻá ne ʻalu ai ʻo malanga ki he ngaahi laumālie nofo pilīsone,+ 20 ʻa ia naʻa nau talangataʻa ki muʻa ʻi he taimi naʻe tatali anga-kātaki ai ʻa e ʻOtuá ʻi he ʻaho ʻo Noá,+ lolotonga ia hono faʻu ʻa e ʻaʻaké,+ ʻa ia naʻe fakahaofi ai ʻi he vaí ha kiʻi kakai tokosiʻi, ko e toko valu.+

21 Ko e papitaisó, ʻa ia ʻoku fehoanaki mo e meʻá ni, ʻokú ne toe fakahaofi foki kimoutolu he taimí ni (ʻo ʻikai ko hono toʻo atu ʻa e ʻuli ʻo e kakanó, ka ʻi he kole ki he ʻOtuá ki ha konisēnisi lelei),+ fakafou ʻi he toetuʻu ʻa Sīsū Kalaisí. 22 ʻOkú ne ʻi he nima toʻomataʻu ʻo e ʻOtuá,+ he naʻá ne ʻalu hake ki hēvani, pea naʻe fakamoʻulaloaʻi kiate ia ʻa e kau ʻāngelo mo e kau maʻu mafai mo e ngaahi mālohi.+

4 Koeʻuhi naʻe faingataʻaʻia ʻa Kalaisi ʻi he kakanó,+ ko kimoutolu foki ke mou teuʻi kimoutolu ʻaki ʻa e tūkunga fakaefakakaukau* tatau mo ia naʻe maʻu ʻe Kalaisí; koeʻuhi ko ha taha pē kuó ne faingataʻaʻia ʻi he kakanó kuó ne tuku ʻa hono fai ʻa e ngaahi angahalá,+ 2 koeʻuhí ke ne moʻui ʻi he toenga ʻo hono taimi ʻi he kakanó, ʻo ʻikai maʻá e ngaahi holi ʻa e tangatá,+ ka maʻá e finangalo ʻo e ʻOtuá.+ 3 He ko e taimi kuo mahili atú kuo ʻosi feʻungaʻānoa ia kiate kimoutolu ke fakahoko ai ʻa e loto ʻo e ngaahi puleʻangá+ ʻi he taimi naʻa mou ʻaʻeva ai ʻi he ngaahi ngāue ʻo e faikovi taʻemīngaó,* ngaahi holi taʻemapuleʻi, inu tōtuʻa, ngaahi paati uatau,* ngaahi paati inu kona efu, mo e ngaahi tauhi ʻaitoli fakalielia.+ 4 ʻOku nau puputuʻu ʻi he ʻikai te mou hokohoko atu ʻi he lele fakataha mo kinautolu ki he ʻalunga ololalo tatau ʻo e anga-fulikivanú, ko ia ʻoku nau lauʻikovi ai kimoutolu.+ 5 Ka ko e kakaí ni te nau fai ha fakamatala ki he tokotaha ko ia ʻokú ne mateuteu ke fakamāuʻi ʻa e kau moʻuí mo e kau maté.+ 6 Ko hono moʻoní, ko e ʻuhinga eni naʻe toe talaki ai ʻa e ongoongo leleí ki he kau maté,*+ he neongo ʻoku fakamāuʻi kinautolu ʻo hangē ko e fakamāuʻi ʻo ha tangata fakaekakanó, ʻe lava ke nau moʻui ʻi he malumalu ʻo e tataki ʻa e laumālie ʻo e ʻOtuá.

7 Ka ko e ngataʻanga ʻo e ngaahi meʻa kotoa pē kuo ofi. Ko ia ai, mou fakakaukau lelei,+ pea ke faʻa leʻo* fakataha mo e taumuʻa ke fai ha ngaahi lotu.+ 8 Hiliō he meʻa kotoa, maʻu ʻa e ʻofa lahi ki he tokotaha taki taha,+ koeʻuhi ko e ʻofá ʻokú ne ʻufiʻufi ha fuʻufuʻunga angahala.+ 9 Hoko ʻo fetalitalikakaiʻaki taʻeʻiai ha lāunga.+ 10 Fakatatau ki he meʻaʻofa kuo maʻu ʻe he tokotaha taki taha, ngāueʻaki ia ke mou fetauhiʻaki ai ʻi he tuʻunga ko e kau tamaioʻeiki* lelei ʻo e ʻofa maʻataʻatā ʻa e ʻOtuá ʻa ia ʻoku fakahaaʻi ʻi he ngaahi founga kehekehe.+ 11 Kapau ʻoku lea ha taha, tuku ke ne fai ia ʻo hangē ko haʻane leaʻaki ha ngaahi pōpoaki mei he ʻOtuá; kapau ʻoku fai ʻe ha taha ha tokoni, tuku ke ne fai ia ʻo fakatuʻunga ʻi he mālohi ʻoku tokonaki mai ʻe he ʻOtuá;+ koeʻuhi ke fakalāngilangiʻi ʻa e ʻOtuá ʻi he ngaahi meʻa kotoa pē+ ʻo fakafou ʻia Sīsū Kalaisi. Ko e lāngilangí mo e mālohí ʻoku ʻoʻona ia ʻo taʻengata pea taʻengata. ʻĒmeni.

12 Siʻi faʻahinga ʻofeina, ʻoua te mou ʻohovale ʻi he fekauʻaki mo e ngaahi ʻahiʻahi vela kakaha ʻoku mou hokosiá,+ ʻo hangē ia ha meʻa foʻou naʻe hoko kiate kimoutolú. 13 ʻI hono kehé, koeʻuhi ʻoku mou faingataʻaʻia ʻi he ʻuhinga tatau naʻe faingataʻaʻia ai ʻa Kalaisí,+ ʻoku totonu ke hokohoko atu hoʻomou fiefiá,+ koeʻuhí ke hulu atu hoʻomou fiefiá ʻi he lolotonga ʻo e fakahā mai ʻa hono lāngilangí.+ 14 Kapau kuo manukiʻi* kimoutolu koeʻuhi ko e huafa ʻo Kalaisí, ʻoku mou fiefia,+ koeʻuhí ko e laumālie ʻo e lāngilangí, ʻio, ʻa e laumālie ʻo e ʻOtuá, ʻoku nofo ia ʻiate kimoutolu.

15 Kae kehe, tuku ke ʻoua naʻa ʻi ai ha taha ʻo kimoutolu te ne faingataʻaʻia ʻi haʻane hoko ko ha tokotaha fakapō pe ko ha kaihaʻa pe ko ha tokotaha faihala pe ko ha tokotaha kaunoa ʻi he ngaahi meʻa ʻa e kakai kehé.+ 16 Ka ʻo kapau ʻoku faingataʻaʻia ha taha ʻi heʻene hoko ko ha Kalisitiané, tuku ke ʻoua naʻá ne ongoʻi mā,+ kae tuku ke ne hanganaki fakahīkihikiʻi ʻa e ʻOtuá ʻaki ʻene moʻui ko ha Kalisitiané. 17 He ko e taimi kotofa eni ke kamata ai ʻa e fakamāú ʻi he fale ʻo e ʻOtuá.+ Ko ia kapau ʻoku ʻuluaki kamata ia ʻiate kitautolu,+ ko e hā ʻa e ikuʻanga ʻe hoko ki he faʻahinga ko ia ʻoku ʻikai te nau talangofua ki he ongoongo lelei ʻa e ʻOtuá?+ 18 “Pea kapau ʻoku faingataʻa hono fakahaofi ʻa e tangata māʻoniʻoní, ko e hā ʻe hoko ki he tangata anga-taʻefakaʻotuá pea mo e tokotaha angahalá?”+ 19 Ko ia ai, tuku ki he faʻahinga ko ia ʻoku nau faingataʻaʻia ʻi he fehoanaki mo e finangalo ʻo e ʻOtuá, ke nau hanganaki tuku atu ʻenau moʻuí kiate ia, he ko ia ʻa e Tokotaha-Fakatupú pea ʻoku malava ke nau falala kiate ia lolotonga ʻenau fai ʻa e meʻa ʻoku leleí.+

5 Ko ia ai, ʻi hoku tuʻunga ko ha kaungā-mātuʻá, ko ha fakamoʻoni ki he ngaahi faingataʻaʻia ʻo e Kalaisí pea mo ha kaungāʻinasi ʻi he lāngilangi ʻa ia ʻe fakahā maí,+ ʻoku ou fai atu ʻa e fakatangi* ko ení ki he kau mātuʻa ʻi homou lotolotongá: 2 Tauhi ʻa e tākanga ʻa e ʻOtuá+ ʻoku mou tokangaʻí, ʻo mou ngāue ko e kau mātuʻa,* ʻo ʻikai fai fakafatongia pē, ka ʻi he loto-lelei ʻi he ʻao ʻo e ʻOtuá;+ ʻo ʻikai ʻi he ʻofa ki ha meʻa ʻoku maʻu taʻefaitotonu,+ ka ʻi he loto-vēkeveke; 3 pea ʻikai hoko ʻo fiepule ki he faʻahinga ʻa ia ko e tofiʻa ʻo e ʻOtuá,+ kae hoko ko e ngaahi faʻifaʻitakiʻanga ki he tākangá.+ 4 Pea ʻi he hili hono fakaeʻa mai ʻa e tauhi-sipi lahí,+ te mou maʻu ʻa e kalauni lāngilangiʻia ʻoku taʻefaʻamae.+

5 ʻI he tuʻunga tatau pē, ko kimoutolu ʻa e kau tangata kei talavou angé, ke mou anganofo ki he kau tangata taʻumotuʻa angé.*+ Ka ko kimoutolu kotoa ke mou kofuʻaki* kimoutolu ʻa e feangafakatōkilaloʻaki, koeʻuhí ʻoku talitekeʻi ʻe he ʻOtuá ʻa e kau hīkisiá, ka ʻokú ne foaki ʻa e ʻofa maʻataʻataá ki he kau anga-fakatōkilaló.+

6 Ko ia ai, mou fakatōkilaloʻi kimoutolu ʻi he malumalu ʻo e toʻukupu māfimafi ʻo e ʻOtuá, koeʻuhí ke ne hakeakiʻi kimoutolu ʻi hono taimi totonú,+ 7 lolotonga ia hoʻomou lī atu ʻa e kotoa hoʻomou loto-moʻuá* kiate ia,+ koeʻuhí he ʻokú ne tokanga mai kiate kimoutolu.+ 8 Tauhi maʻu hoʻomou fakakaukau leleí, faʻa leʻo!+ Ko homou filí, ʻa e Tēvoló, ʻokú ne ʻalu fano holo ʻo hangē ha laione ngungulú, ʻo kumi ki ha taha ke ne folofua.*+ 9 Ka mou tuʻu ʻo fakafepakiʻi ia,+ tuʻu maʻu ʻi he tuí, ʻi hono ʻiloʻi ko e faʻahinga faingataʻaʻia tatau pē ʻoku hokosia ʻe he haʻohaʻonga kotoa ʻo homou fanga tokouá* ʻi māmaní.+ 10 Ka ʻi he hili hoʻomou faingataʻaʻia ʻi ha kiʻi taimi nounou, ko e ʻOtua ʻo e ʻofa maʻataʻatā kotoa pē, ʻa ia naʻá ne ui kimoutolu ki hono lāngilangi taʻengatá+ ʻi he fāʻūtaha mo Kalaisí, te ne fakaʻosi ʻe ia homou akoʻí. Te ne ʻai kimoutolu ke mou tuʻu maʻu,+ te ne ʻai kimoutolu ke mou mālohi,+ te ne fokotuʻu kimoutolu ʻi ha makatuʻunga mālohi. 11 Ke ʻaʻana ʻa e māfimafí ʻo taʻengata. ʻĒmeni.

12 Fakafou ʻia Silivēnusi,*+ ʻa ia ʻoku ou lau ko ha tokoua faitōnungá, kuó u tohi atu ai kiate kimoutolu ʻi ha ngaahi foʻi lea siʻi pē koeʻuhí ke fakalototoʻaʻi kimoutolu pea ke ʻoatu ha fakamoʻoni fakamātoato ko e ʻofa maʻataʻatā moʻoni eni ʻa e ʻOtuá. Tuʻu maʻu ai. 13 Ko ia* ko ē ʻoku ʻi Pāpiloné, ko ha taha ia kuo fili ʻo hangē ko kimoutolú, ʻoku ʻoatu hono ʻofa kiate kimoutolu, pea ʻoku ʻoatu foki mo e ʻofa ʻo Maʻake,+ ko hoku fohá. 14 Mou fefaiʻaki hoʻomou feʻiloakí ʻaki ha ʻuma ʻo e ʻofa.

Fakatauange ki he kotoa ʻo kimoutolu ʻoku fāʻūtaha mo Kalaisí ke mou maʻu ʻa e melinó.