KO E ʻULUAKI TOHI ʻA SIONÉ

1 ʻI he fekauʻaki mo e folofola ʻo e moʻuí,+ ʻa ia naʻe ʻi ai talu mei he kamataʻangá, ʻa ia kuo mau fanongoá, ʻa ia kuo mau mātā ʻaki homau matá, ʻa ia kuo mau siofia pea kuo ala ki ai homau nimá, 2 (ʻio, naʻe fakaeʻa mai ʻa e moʻuí, pea kuo mau mātā pea ʻoku mau faifakamoʻoni ki ai+ mo fakamatala atu kiate kimoutolu ʻa e moʻui taʻengatá,+ ʻa ia naʻe ʻi he Tamaí pea naʻe fakaeʻa mai kiate kimautolú), 3 ʻa ia kuo mau fakamatala atu kiate kimoutolu ʻa e meʻa kuo mau mātā mo fanongoá,+ koeʻuhi ke mou fāʻūtaha mo kimautolu ʻo hangē ko ʻemau fāʻūtaha mo e Tamaí pea mo hono ʻAló, ʻa Sīsū Kalaisi.+ 4 Pea ʻoku mau tohi atu ʻa e ngaahi meʻá ni koeʻuhi ke kakato ʻetau fiefiá.

5 Ko e pōpoaki ʻeni naʻa mau fanongo ai meiate iá pea ʻoku mau fanongonongo atu kiate kimoutolu: Ko e ʻOtuá ko e maama,+ pea ʻoku ʻikai ha momoʻi fakapoʻuli ʻe taha ʻiate ia.* 6 Kapau ʻoku tau leaʻaki ʻo pehē, “ʻOku tau fāʻūtaha mo ia,” pea hili iá ʻoku tau ʻaʻeva kitautolu ʻi he fakapoʻulí, ʻoku tau loi ai pea ʻoku ʻikai ke tau tōʻongaʻaki ʻa e moʻoní.+ 7 Kae kehe, kapau ʻoku tau ʻaʻeva ʻi he māmá ʻo hangē ko iá tonu ʻokú ne ʻi he māmá, ʻoku tau fāʻūtaha ai, pea ko e taʻataʻa ʻo Sīsū ko hono ʻAló ʻokú ne fakamaʻa kitautolu mei he angahalá kotoa.+

8 Kapau ʻoku tau leaʻaki ʻo pehē, “ʻOku ʻikai haʻatau angahala,” ʻoku tau takihalaʻi ai kitautolu tonu+ pea ʻoku ʻikai ke ʻiate kitautolu ai ʻa e moʻoní. 9 Ko e ʻOtuá ʻoku faitōnunga mo māʻoniʻoni ko ia kapau ʻoku tau vete ʻetau ngaahi angahalá, te ne fakamolemoleʻi ʻetau ngaahi angahalá mo fakamaʻa kitautolu mei he taʻemāʻoniʻoní kotoa.+ 10 Kapau ʻoku tau leaʻaki ʻo pehē, “Kuo ʻikai te tau faiangahala,” ʻoku hangē ia ʻoku tau ui ʻa e ʻOtuá ko ha tokotaha loi, pea ʻoku ʻikai te tau tui ki heʻene folofolá.

2 Siʻeku fānau, ʻoku ou tohi atu kiate kimoutolu ʻa e ngaahi meʻá ni ke ʻoua naʻa mou fai ha angahala. Ka neongo ia, kapau ʻoku fai ʻe ha taha ha angahala, ʻoku ʻi ai hotau tokotaha tokoni* ʻi he ʻao ʻo e Tamaí, ko Sīsū Kalaisi,+ ko ha tokotaha māʻoniʻoni.+ 2 Pea ko iá ko ha feilaulau fakatupuhōifuaʻanga*+ maʻá e ngaahi angahala ʻa kitautolú,+ ʻo ʻikai maʻá e ngaahi angahala pē ʻa kitautolú ka maʻá e angahala foki ʻa e māmaní kotoa.+ 3 Pea ko e meʻa eni ʻoku tau ʻiloʻi ai kuo tau hoko ʻo ʻiloʻi iá, kapau ʻoku tau hokohoko atu hono tauhi ʻene ngaahi fekaú. 4 Ko e tokotaha ʻokú ne pehē, “Kuó u hoko ʻo ʻiloʻi ia,” ka ʻoku ʻikai te ne tauhi ʻene ngaahi fekaú ko ha tokotaha loi ia, pea ʻoku ʻikai ʻi he tokotahá ni ʻa e moʻoní. 5 Ka ʻilonga ʻa ia ʻokú ne tauhi ʻene folofolá, kuo hoko moʻoni ai ʻa e ʻofa ki he ʻOtuá ʻi he tokotahá ni ʻo fakahaohaoaʻi.+ ʻI he meʻá ni ʻoku tau ʻiloʻi ai ʻoku tau fāʻūtaha mo ia.+ 6 Ko e tokotaha ʻokú ne pehē ʻokú ne nofoʻaki fāʻūtaha mo iá ʻokú ne moʻuaʻaki ke ne ʻaʻeva ai pē ʻo hangē tofu pē ko e ʻaʻeva ʻa Sīsuú.+

7 Siʻi faʻahinga ʻofeina, ʻoku ou tohi atu kiate kimoutolu, ʻo ʻikai ko ha fekau foʻou, ka ko ha fekau motuʻa ʻa ia naʻa mou maʻu mei he kamataʻangá.+ Ko e fekau motuʻa ko ení ko e folofola ia ne mou fanongo aí. 8 ʻOku ou toe tohi atu kiate kimoutolu ha fekau foʻou, ʻa ia ʻoku moʻoni ʻi he tuʻunga ʻo Sīsuú pea ʻi homou tuʻungá, koeʻuhi ko e fakapoʻulí ʻoku fakaʻaʻau ke mole atu ia pea ko e maama moʻoní kuo ʻosi ulo ia.+

9 Ko e tokotaha ʻokú ne pehē ʻokú ne ʻi he māmá ka ʻokú ne fehiʻa+ ki hono tokouá ʻokú ne kei ʻi he fakapoʻulí pē.+ 10 Ko e tokotaha ʻokú ne ʻofa ki hono tokouá ʻokú ne nofo maʻu ʻi he māmá,+ pea ʻoku ʻikai ʻi ai ha meʻa te ne tūkia ai.* 11 Ka ko e tokotaha ʻokú ne fehiʻa ki hono tokouá ʻokú ne ʻi he fakapoʻulí pea ʻokú ne ʻaʻeva ʻi he fakapoʻulí,+ pea ʻoku ʻikai te ne ʻilo pe ko ʻene ʻalú ki fē,+ koeʻuhí kuo fakakuihi ʻe he fakapoʻulí ʻa hono matá.

12 ʻOku ou tohi atu kiate kimoutolu, siʻi fānau, he kuo fakamolemoleʻi hoʻomou ngaahi angahalá koeʻuhi ko hono huafá.+ 13 ʻOku ou tohi atu kiate kimoutolu ngaahi tamai, koeʻuhí kuo mou hoko ʻo ʻiloʻi ʻa e tokotaha ko iá ʻa ia kuó ne ʻi ai talu mei he kamataʻangá. ʻOku ou tohi atu kiate kimoutolu kau talavou, koeʻuhí kuo mou ikunaʻi ʻa e tokotaha fulikivanú.*+ ʻOku ou tohi atu kiate kimoutolu fānau, koeʻuhí kuo mou hoko ʻo ʻiloʻi ʻa e Tamaí.+ 14 ʻOku ou tohi atu kiate kimoutolu ngaahi tamai, koeʻuhí kuo mou hoko ʻo ʻiloʻi ʻa e tokotaha ko ia kuó ne ʻi ai talu mei he kamataʻangá. ʻOku ou tohi atu kiate kimoutolu kau talavou, koeʻuhí he ʻoku mou mālohi+ pea ko e folofola ʻa e ʻOtuá ʻoku nofo maʻu ʻiate kimoutolu+ pea kuo mou ikunaʻi ʻa e tokotaha fulikivanú.*+

15 ʻOua ʻe ʻofa ki he māmaní pe ko e ngaahi meʻa ʻi he māmaní.+ Kapau ʻoku ʻofa ha taha ki he māmaní, ʻoku ʻikai ʻiate ia ʻa e ʻofa ki he Tamaí;+ 16 koeʻuhi ko e meʻa kotoa pē ʻi he māmaní—ʻa e holi ʻo e kakanó+ pea mo e holi ʻo e matá+ pea mo e fiehāʻaki ʻa e meʻa ʻokú te maʻú*—ʻoku ʻikai tupu ia mei he Tamaí, ka ʻoku tupu ia mei he māmaní. 17 ʻIkai ko ia pē, ʻoku fakaʻaʻau ke mole atu ʻa e māmaní pea pehē ki he holi ʻaʻaná,+ ka ko e tokotaha ʻokú ne fai ʻa e finangalo ʻo e ʻOtuá ʻokú ne nofo maʻu ʻo taʻengata.+

18 Siʻi fānau, ko e houa fakaʻosí eni, pea ʻi he hangē tofu pē ko hoʻomou fanongo ʻoku haʻu ʻa e fili ʻo Kalaisí,+ naʻa mo e lolotongá ni kuo ʻosi ʻasi mai ha ngaahi fili tokolahi ʻo Kalaisi,+ ʻa ia mei he moʻoniʻi meʻa ko iá ʻoku tau ʻiloʻi ai ko e houa fakaʻosí eni. 19 Naʻa nau ʻalu atu meiate kitautolu, ka naʻe ʻikai te nau mei hotau faʻahingá;+ he kapau naʻa nau mei hotau faʻahingá, naʻa nau mei nofo maʻu mo kitautolu. Ka naʻa nau ʻalu atu koeʻuhí ke fakahaaʻi ai ʻoku ʻikai mei hotau faʻahingá ʻa e tokotaha kotoa pē.+ 20 Pea kuo pani kimoutolu ʻe he tokotaha māʻoniʻoní,+ pea ʻoku mou maʻu kotoa ʻa e ʻiló. 21 ʻOku ou tohi atu kiate kimoutolú, ʻo ʻikai koeʻuhí ʻoku ʻikai te mou ʻiloʻi ʻa e moʻoní,+ ka koeʻuhí ʻoku mou ʻiloʻi ia, pea koeʻuhí ʻoku ʻikai ha loi ʻe tupu mai mei he moʻoní.+

22 Ko hai ia ʻa e tokotaha ʻoku loí ka ko e tokotaha ko ē ʻokú ne fakafisingaʻi ko Sīsū ʻa e Kalaisí?+ Ko e fili ʻo Kalaisí eni,+ ʻa e tokotaha ʻokú ne fakafisingaʻi ʻa e Tamaí pea mo e ʻAló. 23 Ko e tokotaha kotoa pē ʻokú ne fakafisingaʻi ʻa e ʻAló ʻoku ʻikai foki te ne fāʻūtaha mo e Tamaí.+ Kae ʻilonga ʻa ia ʻokú ne tali ʻa e ʻAló+ ʻokú ne fāʻūtaha foki mo e Tamaí.+ 24 Ko e meʻa kiate kimoutolú, ko e meʻa kuo mou fanongo ai mei he kamataʻangá kuo pau ke nofo maʻu ia ʻiate kimoutolu.+ Kapau ʻoku nofo maʻu ʻiate kimoutolu ʻa e meʻa kuo mou fanongo ai mei he kamataʻangá, te mou fāʻūtaha foki ai mo e ʻAló pea fāʻūtaha ai mo e Tamaí. 25 ʻIkai ko ia pē, ko e meʻa eni naʻá ne talaʻofaʻaki ʻe ia tonu kiate kitautolú—ko e moʻui taʻengatá.+

26 ʻOku ou tohi atu ʻa e ngaahi meʻá ni kiate kimoutolu ʻo fekauʻaki mo e faʻahinga ʻoku nau feinga ke takihalaʻi kimoutolú. 27 Pea ko e meʻa kiate kimoutolú, ko e pani ne mou maʻu meiate iá+ ʻoku nofo maʻu ia ʻiate kimoutolu, pea ʻoku ʻikai fiemaʻu ha taha ia ke ne akoʻi kimoutolu; ka ko e pani meiate iá ʻokú ne akoʻi kimoutolu ʻo fekauʻaki mo e ngaahi meʻa kotoa pē+ pea ʻoku moʻoni ia pea ʻoku ʻikai ko ha loi. Hangē tofu pē ko hono akoʻi kimoutolu ʻe he pani ʻo kimoutolú, mou nofo maʻu ʻo fāʻūtaha mo e tokotaha ko iá.+ 28 Ko ia ʻi he taimí ni, siʻi fānau, nofo maʻu ʻo fāʻūtaha mo ia, koeʻuhí ke tau hoko ʻi he taimi ʻe fakahā mai ai iá ʻo tau maʻu ʻa e tauʻatāina ʻo e leá+ pea ʻikai ke tau tauholomui meiate ia ʻi he mā ʻi he taimi ʻo ʻene ʻi hení.* 29 Kapau ʻoku mou ʻiloʻi ʻokú ne māʻoniʻoni, ʻoku mou ʻiloʻi foki ai ko e tokotaha kotoa pē ʻokú ne tōʻongaʻaki ʻa e māʻoniʻoní kuo fanauʻi mai ia meiate ia.+

3 Fakakaukau atu ki he faʻahinga ʻofa kuo foaki mai ʻe he Tamaí kiate kitautolú,+ ko ʻetau hoko ʻo ui ko e fānau ʻa e ʻOtuá!+ Pea ko hotau tuʻungá ia. Ko e ʻuhinga ia ʻoku ʻikai ʻiloʻi ai kitautolu ʻe he māmaní,+ koeʻuhí kuo ʻikai ke ʻiloʻi ʻe he māmaní ia ʻa e ʻOtuá.+ 2 Siʻi faʻahinga ʻofeina, ko eni kuo tau hoko ko e fānau ʻa e ʻOtuá,+ ka kuo teʻeki ai pē ke fakaeʻa mai pe te tau hoko ko e hā.+ ʻOku tau ʻiloʻi ko e taimi ʻe fakaeʻa mai ai ʻa e ʻOtuá te tau hoko ai ʻo hangē ko iá, koeʻuhí te tau sio moʻoni kiate ia. 3 Pea ko e tokotaha kotoa pē ʻokú ne maʻu ʻa e ʻamanaki ko ʻeni kiate iá ʻokú ne fakamaʻa ʻa ia tonu,+ ʻo hangē tofu pē ko e maʻa ʻa e tokotaha ko iá.

4 Ko e tokotaha kotoa pē ʻokú ne tōʻongaʻaki ʻa e angahalá ʻokú ne toe tōʻongaʻaki foki ʻa e maumau-laó, pea ko e angahalá ko e maumau-lao ia. 5 ʻOku mou ʻiloʻi foki, naʻe fakaeʻa mai ʻa Sīsuú ke ne ʻave ʻa ʻetau ngaahi angahalá,+ pea ʻoku ʻikai ha angahala ʻiate ia. 6 Ko e tokotaha kotoa pē ʻoku nofo maʻu ʻo fāʻūtaha mo iá ʻoku ʻikai te ne tōʻongaʻaki ʻa e angahalá;+ ʻoku ʻikai ha taha ʻokú ne tōʻongaʻaki ʻa e angahalá kuó ne mātā ia pe hoko ʻo ʻiloʻi ia. 7 Siʻi fānau, tuku ke ʻoua naʻa takihalaʻi kimoutolu ʻe ha taha; ko e tokotaha ʻokú ne tōʻongaʻaki ʻa e māʻoniʻoní ʻokú ne māʻoniʻoni, ʻo hangē tofu pē ko Sīsuú ʻoku māʻoniʻoni. 8 Ko e tokotaha ʻokú ne tōʻongaʻaki ʻa e angahalá ʻokú ne tupu mei he Tēvoló, koeʻuhí kuo faiangahala ʻa e Tēvoló talu pē mei he kamataʻangá.+ He ko e ʻuhinga eni naʻe fakaeʻa mai ai ʻa e ʻAlo ʻo e ʻOtuá, ke ne veteki* ʻa e ngaahi ngāue ʻa e Tēvoló.+

9 Ko e tokotaha kotoa pē kuo fanauʻi mei he ʻOtuá ʻoku ʻikai te ne tōʻongaʻaki ʻa e angahalá,+ he ko e laumālie ʻo e ʻOtuá* ʻoku ʻi he tokotaha peheé, pea ʻe ʻikai lava ke ne tōʻongaʻaki ʻa e angahalá, he kuo fanauʻi mai ia mei he ʻOtuá.+ 10 Ko e fānau ʻa e ʻOtuá pea mo e fānau ʻa e Tēvoló ʻoku hā mahino ia ʻi he moʻoniʻi meʻa ko ʻení: ʻIlonga ha taha ʻoku ʻikai te ne tōʻongaʻaki ʻa e māʻoniʻoní ʻoku ʻikai ko ʻene tupu mai ʻaʻana mei he ʻOtuá, kaeʻumaʻā ʻa e tokotaha ʻoku ʻikai te ne ʻofa ki hono tokouá.+ 11 He ko e pōpoaki eni kuo mou fanongo ai mei he kamataʻangá, ʻa e pehē ko ia ʻoku totonu ke tau feʻofaʻakí;+ 12 ʻo ʻikai hangē ko Keiní, ʻa ia naʻe tupu mei he tokotaha fulikivanú* peá ne tāmateʻi hono tokouá.+ Pea ko e hā ʻa e ʻuhinga naʻá ne tāmateʻi ai iá? Koeʻuhí ko ʻene ngaahi ngāue ʻaʻaná naʻe fulikivanu,+ ka ko e ngaahi ngāue ʻa hono tokouá naʻe māʻoniʻoni.+

13 ʻOua te mou ʻohovale, fanga tokoua, ʻi he fehiʻa ʻa e māmaní ʻiate kimoutolú.+ 14 ʻOku tau ʻiloʻi kuo tau hiki mei he maté ki he moʻuí,+ koeʻuhí ʻoku tau ʻofa ʻi he fanga tokouá.+ Ko e tokotaha ʻoku ʻikai ke ʻofá ʻokú ne kei nofo maʻu pē ʻi he maté.+ 15 Ko e tokotaha kotoa pē ʻokú ne fehiʻa ʻi hono tokouá ko ha tokotaha fakapō*+ ia, pea ʻoku mou ʻiloʻi ʻoku ʻikai ha tokotaha fakapō te ne maʻu ʻa e moʻui taʻengatá.+ 16 Ko e meʻa eni kuo tau hoko ai ʻo ʻiloʻi ʻa e ʻofá, koeʻuhí naʻe tuku atu ʻe he tokotaha ko iá ʻene moʻuí maʻa kitautolu,+ pea ʻoku tau moʻuaʻaki ai ke tuku atu ʻetau moʻuí maʻa hotau fanga tokouá.+ 17 Ka ʻilonga ʻa ia ʻokú ne maʻu ʻa e ngaahi koloa fakamatelie ʻo e māmani ko ʻení peá ne sio atu ki hono tokouá ʻokú ne fusimoʻomo ka ʻokú ne fakafisi ke fakahāhā kiate ia ʻa e manavaʻofá, ʻoku nofo fēfē ai ʻiate ia ʻa e ʻofa ki he ʻOtuá?+ 18 Siʻi fānau, ʻoku totonu ke tau ʻofa ʻo ʻikai ʻi he lea pē, pe ʻaki ʻa e ʻeleló+ pē, ka ʻi he ngāue+ mo e moʻoni.+

19 ʻI he meʻá ni te tau ʻiloʻi ai ʻoku tau tupu mei he moʻoní, pea te tau tuipau* ai ʻoku ʻofa ʻa e ʻOtuá ʻiate kitautolu 20 neongo kapau ʻoku fakahalaiaʻi ʻe hotau lotó kitautolu ʻi ha ngaahi meʻa, tuku ke tau manatuʻi ʻoku lahi ange ʻa e ʻOtuá ʻi hotau lotó pea ʻokú ne ʻafioʻi ʻa e ngaahi meʻa kotoa pē.+ 21 Siʻi faʻahinga ʻofeina, kapau ʻoku ʻikai fakahalaiaʻi kitautolu ʻe hotau lotó, ʻe lava ke tau lea tauʻatāina ai ki he ʻOtuá;+ 22 pea ʻilonga ha meʻa ʻoku tau kole ʻoku tau maʻu ia meiate ia,+ koeʻuhí ʻoku tau tauhi ʻene ngaahi fekaú pea ʻoku tau fai ʻa e meʻa ʻoku fakahōifua ʻi heʻene vakaí. 23 Ko e moʻoni, ko eni ia ʻa ʻene fekaú: Ke tau tui ki he huafa ʻo hono ʻAlo ko Sīsū Kalaisí+ pea ke tau feʻofaʻaki,+ ʻo hangē tofu pē ko e fekau naʻá ne tuku mai kiate kitautolú. 24 ʻIkai ngata aí, ko e tokotaha ʻokú ne tauhi ʻene ngaahi fekaú ʻokú ne nofoʻaki fāʻūtaha mo ia, pea ʻokú ne fāʻūtaha mo ha tokotaha pehē.+ Pea ko e meʻa ʻi he laumālie naʻá ne foaki mai kiate kitautolú, ʻoku tau ʻiloʻi ai ʻokú ne nofoʻaki fāʻūtaha mo kitautolu.+

4 Siʻi faʻahinga ʻofeina, ʻoua te mou tui ki he fakamatala fakamānavaʻi kotoa pē,*+ kae sivi ʻa e ngaahi fakamatala fakamānavaʻí* ke ʻilo pe ko ʻenau tupu mai mei he ʻOtuá,+ he kuo ʻalu atu ha kau palōfita loi tokolahi ki he māmaní.+

2 Ko e founga ʻeni ʻoku mou ʻilo ai ʻa e fakamatala fakamānavaʻi ʻoku mei he ʻOtuá: Ko e fakamatala fakamānavaʻi kotoa pē ʻokú ne fakahaaʻi totonu naʻe haʻu ʻa Sīsū Kalaisi ʻi he kakanó, ʻoku tupu ia mei he ʻOtuá.+ 3 Ka ko e fakamatala fakamānavaʻi kotoa pē ʻoku ʻikai te ne fakahaaʻi totonu ʻa Sīsuú, ʻoku ʻikai tupu ia mei he ʻOtuá.+ ʻIkai ngata aí, ko e fakamatala fakamānavaʻi ʻeni ia ʻa e fili ʻo Kalaisí, ʻa e fakamatala fakamānavaʻi kuo mou fanongo ai ʻe hoko maí,+ pea ko eni kuo ʻosi ʻi he māmaní ia.+

4 ʻOku mou tupu kimoutolu mei he ʻOtuá, siʻi fānau, pea kuo mou ikunaʻi kinautolu,*+ koeʻuhi ko e tokotaha ʻoku fāʻūtaha mo kimoutolú+ ʻoku lahi ange ia ʻi he tokotaha ko ē ʻoku fāʻūtaha mo e māmaní.+ 5 ʻOku nau tupu kinautolu mei he māmaní;+ ko e ʻuhinga ia ʻoku nau leaʻaki ai ʻa e meʻa ʻa ia ʻoku tupu mei he māmaní pea ʻoku fanongo ʻa e māmaní kiate kinautolu.+ 6 ʻOku tau tupu kitautolu mei he ʻOtuá. ʻIlonga ʻa ia ʻokú ne hoko ʻo ʻiloʻi ʻa e ʻOtuá ʻokú ne fanongo kiate kitautolu;+ ʻilonga ʻa ia ʻoku ʻikai tupu mei he ʻOtuá ʻoku ʻikai te ne fanongo kiate kitautolu.+ ʻI he meʻá ni ʻoku tau fakafaikehekeheʻi ai ʻa e fakamatala fakamānavaʻi ʻoku ʻo e moʻoní mei he fakamatala fakamānavaʻi ʻoku ʻo e loí.+

7 Siʻi faʻahinga ʻofeina, tuku ke hokohoko atu ʻetau feʻofaʻakí,+ koeʻuhí ko e ʻofá ʻoku mei he ʻOtuá, pea ko e tokotaha kotoa pē ʻoku ʻofá kuo fanauʻi ia mei he ʻOtuá pea ʻokú ne ʻiloʻi ʻa e ʻOtuá.+ 8 ʻIlonga ʻa ia ʻoku ʻikai ke ʻofá kuo ʻikai te ne hoko ʻo ʻiloʻi ʻa e ʻOtuá, koeʻuhí ko e ʻOtuá ko e ʻofa.+ 9 Ko e meʻa ʻeni naʻe fakahaaʻi ai ʻa e ʻofa ʻa e ʻOtuá ʻi he fekauʻaki mo hotau tuʻungá, naʻe fekauʻi mai ʻe he ʻOtuá hono ʻAlo tofu-pē-taha-ne-fakatupú+ ki he māmaní koeʻuhi ke tau maʻu ai ʻa e moʻuí fakafou ʻiate ia.+ 10 Ko e anga ʻeni ʻo e ʻofá, ʻoku ʻikai ko e pehē ne tau ʻofa ki he ʻOtuá, ka naʻá ne ʻofa ʻiate kitautolu peá ne fekauʻi mai hono ʻAló ko ha feilaulau fakatupuhōifuaʻanga*+ maʻa ʻetau ngaahi angahalá.+

11 Siʻi faʻahinga ʻofeina, kapau ko e anga ʻeni ʻo e ʻofa ʻa e ʻOtuá kiate kitautolú, tā ʻoku tau moʻuaʻaki foki ke tau feʻofaʻaki.+ 12 Kuo ʻikai ha taha kuó ne mamata ki he ʻOtuá ʻi ha taimi.+ Kapau ʻe hokohoko atu ʻetau feʻofaʻakí, ʻoku nofo maʻu ʻa e ʻOtuá ʻiate kitautolu pea ko ʻene ʻofá kuo fakahaaʻi kakato ia ʻiate kitautolu.+ 13 ʻI he meʻá ni ʻoku tau ʻilo ai ʻoku tau nofoʻaki fāʻūtaha mo ia pea ʻokú ne fāʻūtaha mo kitautolu, koeʻuhí kuó ne foaki mai hono laumālié kiate kitautolu. 14 ʻIkai ko ia pē, ko kimautolu tonu kuo mau mamata pea ʻoku mau fakamoʻoni kuo fekauʻi mai ʻe he Tamaí hono ʻAló ko ha fakamoʻui ʻo e māmaní.+ 15 ʻIlonga ʻa ia ʻokú ne fakahaaʻi totonu ko Sīsuú ko e ʻAlo ia ʻo e ʻOtuá,+ ʻoku nofoʻaki fāʻūtaha ʻa e ʻOtuá mo ha tokotaha pehē pea ʻoku fāʻūtaha ʻa e tokotaha ko iá mo e ʻOtuá.+ 16 Pea kuo tau hoko ʻo ʻilo mo tui ki he ʻofa ʻoku maʻu ʻe he ʻOtuá kiate kitautolú.+

Ko e ʻOtuá ko e ʻofa,+ pea ko e tokotaha ʻoku nofo maʻu ʻi he ʻofá ʻokú ne nofoʻaki fāʻūtaha mo e ʻOtuá pea ʻoku nofoʻaki fāʻūtaha ʻa e ʻOtuá mo ia.+ 17 ʻI he foungá ni, kuo fakahaaʻi kakato ai ʻa e ʻofá ʻiate kitautolu, koeʻuhí ke tau maʻu ʻa e tauʻatāina ʻo e leá*+ ʻi he ʻaho ʻo e fakamāú, koeʻuhí ʻi he hangē tofu pē ko e tuʻunga ʻo e tokotaha ko iá,* ʻoku pehē pē foki mo kitautolu ʻi he māmani ko ení. 18 ʻOku ʻikai ha manavahē ʻi he ʻofá,+ ka ʻoku kapusi ʻe he ʻofa haohaoá ʻa e manavaheé, koeʻuhí he ʻoku taʻotaʻofi kitautolu ʻe he manavaheé. Ko e moʻoni, ko e tokotaha ʻoku manavaheé ʻoku ʻikai haohaoa ʻene ʻofá.+ 19 ʻOku tau ʻofá, koeʻuhi naʻe tomuʻa ʻofa mai ʻa e ʻOtuá kiate kitautolu.+

20 Kapau ʻoku pehē ʻe ha taha, “ʻOku ou ʻofa ki he ʻOtuá,” ka ʻokú ne fehiʻa ki hono tokouá, ko ha tokotaha loi ia.+ He ko e tokotaha ʻoku ʻikai te ne ʻofa ki hono tokouá,+ ʻa ia kuó ne mamata ki aí, heʻikai lava ke ne ʻofa ki he ʻOtuá, ʻa ia kuo ʻikai ke ne mamata ki aí.+ 21 Pea ko e tuʻutuʻuni ʻeni kuo tau maʻu meiate iá, ʻilonga ʻa ia ʻoku ʻofa ki he ʻOtuá kuo pau ke ne ʻofa foki ki hono tokouá.+

5 Ko e tokotaha kotoa pē ʻoku tui ko Sīsū ʻa e Kalaisí ko e fānau ia ʻa e ʻOtuá,+ pea ko e tokotaha kotoa pē ʻoku ʻofa ki he Tamaí ʻokú ne ʻofa foki ki Heʻene fānaú. 2 Ko e meʻa eni ʻoku tau ʻilo ai ʻoku tau ʻofa ki he fānau ʻa e ʻOtuá,+ ʻa ʻetau ʻofa ki he ʻOtuá pea fakahoko ʻa ʻene ngaahi fekaú. 3 He ko e meʻa ʻeni ʻoku ʻuhinga ki ai ʻa e ʻofa ki he ʻOtuá, ko ʻetau tauhi ʻene ngaahi fekaú;+ pea ko ʻene ngaahi fekaú ʻoku ʻikai ke fakamafasia,+ 4 koeʻuhi ko e tokotaha kotoa pē* kuo fanauʻi mei he ʻOtuá ʻokú ne ikunaʻi ʻa e māmaní.+ Pea ko e meʻa eni kuó ne ʻai kitautolu ke tau ikunaʻi ʻa e māmaní, ko ʻetau tuí.+

5 Ko hai ia ʻoku lava ke ne ikunaʻi ʻa e māmaní?+ ʻIkai ko e tokotaha ʻokú ne tui ko Sīsū ʻa e ʻAlo ʻo e ʻOtuá?+ 6 Ko e tokotaha eni naʻe haʻu ʻo fou mai ʻi he vaí mo e taʻataʻá, ʻa Sīsū Kalaisi, ʻo ʻikai ʻi he vaí pē,+ ka ʻi he vai mo e taʻataʻa.+ Pea ʻoku fakamoʻoni ki ai ʻa e laumālié,+ he ʻoku moʻoni ʻa e fakamoʻoni ʻa e laumālié. 7 He ʻoku tolu ʻa e ngaahi fakamoʻoní:* 8 Ko e laumālié+ pea mo e vaí+ pea mo e taʻataʻá;+ pea ko e tolú ni ʻoku nau feongoongoi.

9 Kapau ʻoku tau tali ʻa e fakamoʻoni ʻa e tangatá, ʻoku māʻolunga ange ʻa e fakamoʻoni ia ʻa e ʻOtuá. Koeʻuhí ko e fakamoʻoni eni ʻoku ʻomai ʻe he ʻOtuá, ʻa e fakamoʻoni ko ia kuó ne fai fekauʻaki mo hono ʻAló. 10 Ko e tokotaha ʻoku tui ki he ʻAlo ʻo e ʻOtuá kuó ne tali ʻi hono lotó ʻa e fakamoʻoni kuo ʻoange ʻe he ʻOtuá kiate iá. Ko e tokotaha ʻoku ʻikai ke tui ki he ʻOtuá kuó ne ʻai ai ʻa e ʻOtuá ko ha tokotaha loi,+ koeʻuhí kuo ʻikai te ne tui ki he fakamoʻoni kuo ʻomai ʻe he ʻOtuá ʻo fekauʻaki mo hono ʻAló. 11 Pea ko e fakamoʻoní eni, naʻe foaki mai ʻe he ʻOtuá ʻa e moʻui taʻengatá+ kiate kitautolu, pea ʻoku tau maʻu ʻa e moʻui ko ení ʻo fakafou ʻi hono ʻAló.+ 12 Ko e tokotaha ʻokú ne tali ʻa e ʻAló ʻokú ne maʻu ʻa e moʻui ko ení; ko e tokotaha ʻoku ʻikai te ne tali ʻa e ʻAlo ʻo e ʻOtuá ʻoku ʻikai te ne maʻu ʻa e moʻui ko ení.+

13 ʻOku ou tohi atu kiate kimoutolu ʻa e ngaahi meʻá ni koeʻuhi ke mou ʻilo ʻoku mou maʻu ʻa e moʻui taʻengatá,+ ʻa kimoutolu ʻoku mou tui ki he huafa ʻo e ʻAlo ʻo e ʻOtuá.+ 14 Pea ʻoku tau falala* kiate ia he ʻilonga ha meʻa ʻoku tau kole ʻo fakatatau ki hono finangaló,+ ʻokú ne fanongo mai kiate kitautolu.+ 15 Pea kapau ʻoku tau ʻiloʻi ʻokú ne fanongo mai kiate kitautolu ʻi he fekauʻaki mo ha meʻa pē ʻoku tau kole, ʻoku tau ʻiloʻi te tau maʻu ʻa e ngaahi meʻa ʻoku tau kolé koeʻuhí naʻa tau kole ia kiate ia.+

16 Kapau ʻe fakatokangaʻi ʻe ha taha hono tokouá ʻokú ne fai ha angahala ʻoku ʻikai tuha mo e maté, te ne kole, pea ʻe foaki ange ʻe he ʻOtuá ki he tokotaha naʻá ne fai ʻa e angahalá ʻa e moʻuí,+ ʻio, kiate kinautolu ʻoku ʻikai te nau fai ʻa e angahala ʻa ia ʻoku tuha mo e maté. ʻOku ʻi ai ha angahala ʻoku tuha mo e maté.+ ʻOku ʻikai te u tala kiate ia ke ne fai ha lotu ke tokoniʻi ʻa e tokotaha ʻokú ne fai ʻa e angahala ko iá. 17 Ko e taʻemāʻoniʻoni kotoa pē ko e angahala ia,+ ka neongo ia ʻoku ʻi ai ha angahala ʻoku ʻikai tuha mo e maté.

18 ʻOku tau ʻiloʻi ko e tokotaha kotoa pē kuo fanauʻi mei he ʻOtuá ʻoku ʻikai te ne tōʻongaʻaki ʻa e angahalá, ka ʻoku tokangaʻi ia ʻe he tokotaha ʻoku fanauʻi mei he ʻOtuá,* pea ʻe ʻikai lava ke pukenimā ia ʻe he tokotaha fulikivanú.*+ 19 ʻOku tau ʻilo ʻoku tau tupu mei he ʻOtuá, ka ko e māmaní kotoa ʻoku tokoto ia ʻi he mafai ʻo e tokotaha fulikivanú.*+ 20 Ka ʻoku tau ʻilo kuo haʻu ʻa e ʻAlo ʻo e ʻOtuá,+ pea kuó ne ʻomai kiate kitautolu ha vavanga fakaefakakaukau* koeʻuhi ke tau maʻu ai ʻa e ʻilo ki he ʻOtua moʻoní. Pea ko e meʻa ʻi hono ʻAlo ko Sīsū Kalaisí, ʻoku tau fāʻūtaha ai mo ia.+ Ko eni ia ʻa e ʻOtua moʻoní mo e moʻui taʻengatá.+ 21 Siʻi fānau, mou fakamamaʻo mei he ngaahi ʻaitolí.+