KO HA MEʻA FAKAHĀ KIA SIONE

1 Ko ha meʻa fakahā meia Sīsū Kalaisi, ʻa ia naʻe ʻoange ʻe he ʻOtuá kiate ia,+ ke fakahā ki heʻene kau tamaioʻeikí+ ʻa e ngaahi meʻa kuo pau ke vavé ni ʻene hokó. Pea naʻe fekauʻi mai ʻe Sīsū ʻene ʻāngeló ke ne fakahā ki heʻene tamaioʻeiki ko Sioné+ fakafou ʻi ha ngaahi fakaʻilonga ʻa e ngaahi meʻa kuo pau ke hoko ʻi he kahaʻú, 2 ʻa ia naʻá ne fakamoʻoni ki he folofola naʻe fai ʻe he ʻOtuá pea ki he fakamoʻoni naʻe fai ʻe Sīsū Kalaisí, ʻio, ki he kotoa ʻo e ngaahi meʻa naʻá ne sio ki aí. 3 Fiefia ē ko e tokotaha ʻokú ne lau leʻo-lahi ʻa e ngaahi lea ʻo e kikité ni pea mo e faʻahinga ʻoku nau fanongo ki aí pea ʻoku nau tauhi ʻa e ngaahi meʻa kuo tohi aí,+ he ʻoku ofi ʻa e taimi kotofá.

4 Ko au Sione, ko e tohi atu ki he fakatahaʻanga ʻe fitu+ ʻa ia ʻoku nau ʻi he vahefonua ʻo ʻĒsiá:

Fakatauange ke mou maʻu ʻa e ʻofa maʻataʻatā mo e melino mei he “Tokotaha ʻoku ʻi ai pea naʻe ʻi ai pea ʻoku hāʻele maí,”+ pea mei he laumālie ʻe fitu+ ʻa ia ʻoku nau ʻi he ʻao ʻo hono taloní, 5 pea meia Sīsū Kalaisi, “ko e Fakamoʻoni Faitōnunga,”+ “ko e ʻuluaki fanauʻi ia mei he maté,”+ pea “ko e Pule ʻo e ngaahi tuʻi ʻo e māmaní.”+

Kiate ia ʻokú ne ʻofa ʻiate kitautolu+ pea kuó ne fakatauʻatāinaʻi kitautolu mei heʻetau ngaahi angahalá fakafou ʻi hono taʻataʻa ʻoʻoná+— 6 pea naʻá ne ngaohi kitautolu ke hoko ko ha puleʻanga,+ ko e kau taulaʻeiki+ ki hono ʻOtuá mo e Tamaí—ʻio, ke ʻaʻana ʻa e lāngilangí mo e māfimafí ʻo taʻengata. ʻĒmeni.

7 Vakai! ʻOkú ne hāʻele mai mo e ngaahi ʻaó,+ pea ʻe mamata ʻa e mata kotoa pē kiate ia, pea mo e faʻahinga naʻa nau hokaʻi iá; pea ko e ngaahi matakali kotoa pē ʻo e māmaní te nau tuki honau fatafatá ʻi he mamahi koeʻuhí ko ia.+ ʻIo, ʻĒmeni.

8 “Ko au ʻa e ʻĀlifá mo e ʻŌmeká,”*+ ko e folofola ia ʻa Sihova* ko e ʻOtuá, “ʻa e Tokotaha ʻoku ʻi ai pea naʻe ʻi ai pea ʻoku hāʻele maí, ʻa e Māfimafi-Aoniú.”+

9 Ko au Sione, ko homou tokoua pea ko ha kaungāʻinasi fakataha mo kimoutolu ʻi he mamahi+ mo e puleʻanga+ mo e kātaki+ ʻi he kau fakataha mo Sīsuú,+ naʻá ku ʻi he motu ʻoku ui ko Pātimosí koeʻuhi ko ʻeku lea fekauʻaki mo e ʻOtuá mo ʻeku fakamoʻoni fekauʻaki mo Sīsuú. 10 ʻI hono tākiekina au ʻe he laumālié naʻá ku hoko ai ʻo ʻi he ʻaho ʻo e ʻEikí, pea naʻá ku fanongo ki ha fuʻu leʻo mālohi mei hoku tuʻá ʻoku hangē ko ha leʻo ʻo ha talupité, 11 ʻoku pehē mai: “Ko e meʻa ʻokú ke sio ki aí, tohi ia ʻi ha takainga tohi pea ʻave ia ki he fakatahaʻanga ʻe fitu: Ki ʻEfesō,+ Sīmana,+ Peakamosi,+ Taiataila,+ Sātisi,+ Filatelifia,+ pea mo Leotisia.”+

12 Naʻá ku tafoki hake ke u sio pe ko hai naʻe lea mai kiate aú, pea ʻi heʻeku tafoki haké, naʻá ku sio ki ha tuʻunga-maama koula ʻe fitu,+ 13 pea ʻi he lotolotonga ʻo e ngaahi tuʻunga-māmá naʻe ʻi ai ha tokotaha hangē ha foha ʻo e tangatá,+ naʻá ne tui ha kofu naʻe aʻu hifo ki lalo ki hono ongo vaʻé pea naʻá ne tui ha noʻo koula takatakai ʻi hono fatafatá. 14 ʻIkai ko ia pē, ko e louʻulu ʻo hono ʻulú naʻe hinehina ia ʻo hangē ko e fulufuluʻisipi hinehiná, hangē ko e sinoú, pea ko hono ongo foʻi fofongá naʻe hangē ha uloʻi afi kakahá,+ 15 pea ko hono ongo vaʻé naʻe hangē ha kopa lelei+ ʻi he taimi ʻoku uloulo ai ʻi ha fōnisé, pea ko hono leʻó naʻe hangē ko e ongo mai ʻa ha ngaahi vai lahí. 16 Pea naʻe ʻi hono nima toʻomataʻú ha foʻi fetuʻu ʻe fitu,+ pea naʻe ʻalu atu mei hono ngutú ha heletā māsila, lōloa, mo fakatou mata,+ pea ko hono fofongá naʻe hangē ko e laʻaá ʻi he taimi ʻoku ngingila taha ai ʻene uló.+ 17 ʻI heʻeku sio kiate iá, naʻá ku tō atu ʻo hangē ha maté ki hono vaʻé.

Pea naʻá ne hili mai hono nima toʻomataʻú kiate au ʻo ne pehē: “ʻOua ʻe ilifia. Ko au ʻa e ʻUluakí+ mo e Fakamuimuí,+ 18 pea ko e tokotaha ʻoku moʻui,+ pea naʻá ku mate,+ kae vakai, ʻoku ou moʻui ʻo taʻengata pea taʻengata,+ pea ʻoku ou maʻu ʻa e ngaahi kī ʻo mate mo Faʻitoká.*+ 19 Ko ia tohi ʻa e ngaahi meʻa naʻá ke sio ki aí pea mo e ngaahi meʻa ʻoku lolotonga hokó, pea mo e ngaahi meʻa ʻe hoko ʻi he hili ʻa e ngaahi meʻá ni. 20 ʻI he fekauʻaki mo e fakalilolilo toputapu ʻo e foʻi fetuʻu ʻe fitu ʻa ia naʻá ke sio ki ai ʻi hoku nima toʻomataʻú pea mo e tuʻunga-maama koula ʻe fitú: Ko e foʻi fetuʻu ʻe fitú ko e kau ʻāngelo ia ʻo e fakatahaʻanga ʻe fitú, pea ko e tuʻunga-maama ʻe fitú ko e fakatahaʻanga ia ʻe fitú.+

2 “Tohi ki he ʻāngelo+ ʻo e fakatahaʻanga ʻi ʻEfesoó+ ʻo pehē: Ko e ngaahi meʻa eni ʻoku leaʻaki ʻe ia ʻokú ne pukepuke ʻa e foʻi fetuʻu ʻe fitú ʻi hono nima toʻomataʻú pea ʻokú ne ʻaʻeva ʻi he lotolotonga ʻo e tuʻunga-maama koula ʻe fitú:+ 2 ‘ʻOku ou ʻiloʻi hoʻo ngaahi ngāué, pea mo hoʻo fakaongosiá mo e kātakí, pea mo e ʻikai ke ke makātakiʻi ʻa e kau tangata koví, pea mo hoʻo sivisiviʻi ʻa e faʻahinga ʻoku nau pehē ko e kau ʻapositolo+ kinautolu, ka ʻoku ʻikaí, pea ʻokú ke ʻilo kinautolu ko e kau loi. 3 ʻOkú ke toe fakahāhā foki ʻa e kātaki, pea kuó ke kītaki koeʻuhi ko hoku hingoá+ pea kuo ʻikai te ke ongosia ai.+ 4 Ka neongo ia, ʻoku ou koviʻia ʻiate koe ʻi he meʻá ni, ʻa hoʻo mavahe mei he ʻofa naʻá ke ʻuluaki maʻú.

5 “‘Ko ia ai, manatu ki he meʻa naʻá ke tō aí, pea fakatomala+ pea fai ʻa e ngaahi ngāue naʻá ke ʻuluaki faí. Kapau ʻe ʻikai te ke fai ia, te u ʻalu atu kiate koe, pea te u toʻo hoʻo tuʻunga-māmá+ mei hono tuʻuʻangá, tuku kehe kapau te ke fakatomala.+ 6 Ka, ʻokú ke maʻu ʻa e meʻá ni ʻa ia ko ha meʻa lelei ia: ʻA hoʻo fehiʻa ko ia ʻi he ngaahi ngāue ʻa e kulupu lotu ʻa Nikolaiasí,*+ ʻa ia ʻoku ou fehiʻa foki mo au ai. 7 Tuku ki he tokotaha ʻoku ʻi ai hono telingá ke ne fanongo ki he meʻa ʻoku leaʻaki ʻe he laumālié ki he ngaahi fakatahaʻangá:+ Te u tuku ki he tokotaha ʻoku ikuná+ ke ne kai mei he ʻakau ʻo e moʻuí,+ ʻa ia ʻoku ʻi he palataisi ʻa e ʻOtuá.’

8 “Pea tohi ki he ʻāngelo ʻo e fakatahaʻanga ʻi Sīmaná ʻo pehē: Ko e ngaahi meʻa eni ʻoku leaʻaki ʻe he ‘ʻUluakí mo e Fakamuimuí,’+ ʻa ia naʻá ne mate peá ne toe moʻui maí:+ 9 ‘ʻOku ou ʻiloʻi ʻa hoʻo mamahí mo hoʻo masivá—ka ʻokú ke koloaʻia+—pea mo e laukovi ʻoku fai ʻe he faʻahinga ʻoku nau ui kinautolu ko e kau Siu ka ko hono moʻoní ʻoku ʻikai, ka ko kinautolú ko ha sinakoke ʻo Sētane.+ 10 ʻOua ʻe ilifia ʻi he ngaahi meʻa ʻoku ʻamanaki ke ke faingataʻaʻia aí.+ Vakai! Ko e Tēvoló ʻe hokohoko atu ʻene lī ʻa e niʻihi ʻo kimoutolu ki he pilīsoné koeʻuhí ke hoko ai ʻo ʻahiʻahiʻi kakato kimoutolu, pea te mou maʻu ai ha mamahi ʻi he ʻaho ʻe hongofulu. Fakamoʻoniʻi ʻokú ke faitōnunga ʻo aʻu ki he maté, pea te u ʻoatu kiate koe ʻa e kalauni ʻo e moʻuí.+ 11 Tuku ki he tokotaha ʻoku ʻi ai hono telingá ke ne fanongo+ ki he meʻa ʻoku leaʻaki ʻe he laumālié ki he ngaahi fakatahaʻangá: Ko e tokotaha ʻoku ikuná+ ʻe ʻikai ʻaupito teitei uesia ia ʻe he mate hono uá.’+

12 “Tohi ki he ʻāngelo ʻo e fakatahaʻanga ʻi Peakamosí ʻo pehē: Ko e ngaahi meʻa eni ʻoku leaʻaki ʻe ia ʻokú ne maʻu ʻa e heletā māsila, lōloa, mo fakatoumatá:+ 13 ‘ʻOku ou ʻiloʻi ʻa e feituʻu ʻokú ke nofo aí, ʻa ia ʻoku ʻi ai ʻa e taloni ʻo Sētané; pea neongo ia ʻokú ke hanganaki piki maʻu ki hoku hingoá,+ pea naʻe ʻikai te ke fakafisingaʻi ʻa hoʻo tui kiate aú+ naʻa mo e ʻi he ngaahi ʻaho ʻo ʻAnitipasá, ko ʻeku fakamoʻoni faitōnunga,+ ʻa ē naʻe tāmateʻi+ ʻi homou tafaʻakí, ʻa e feituʻu ʻoku nofo ai ʻa Sētané.

14 “‘Ka neongo ia, ʻoku ʻi ai ha ngaahi meʻa siʻi ʻoku ou koviʻia ai ʻiate koe, ʻa hoʻo maʻu ʻi hena ʻa e faʻahinga ʻoku nau pīkitai ki he akonaki ʻa Pēlamí,+ ʻa ia naʻá ne akonekina ʻa Pēlaki+ ke ne ʻai ha tūkiaʻanga ʻi he ʻao ʻo e kau ʻIsilelí, ke kai ʻa e ngaahi meʻa kuo feilaulauʻaki ki he ngaahi ʻaitolí pea ke fai ʻa e fehokotaki fakasino taʻetaau.*+ 15 ʻI he founga tatau pē, ʻokú ke toe maʻu foki ʻa e faʻahinga ʻoku nau pīkitai ki he akonaki ʻa e kulupu lotu ʻa Nikolaiasí.+ 16 Ko ia ke ke fakatomala. Kapau ʻe ʻikai, ʻe vave leva ʻeku ʻalu atu kiate koe, pea te u faitau mo kinautolu ʻaki ʻa e heletā lōloa ʻoku ʻalu atu mei hoku ngutú.+

17 “‘Tuku ki he tokotaha ʻoku ʻi ai hono telingá ke ne fanongo ki he meʻa ʻoku leaʻaki ʻe he laumālié ki he ngaahi fakatahaʻangá:+ Te u ʻoange ki he tokotaha ʻoku ikuná+ ha niʻihi ʻo e mana ne fūfūʻí,+ pea te u ʻoange kiate ia ha foʻi maka molemole hinehina, pea kuo tohi ʻi he foʻi maka ko iá ha hingoa foʻou ʻa ia ʻoku ʻikai ʻi ai ha taha ʻoku ʻilo ki ai tuku kehe pē ʻa e tokotaha ʻokú ne maʻu ʻa e hingoa ko iá.’

18 “Tohi ki he ʻāngelo ʻo e fakatahaʻanga ʻi Taiatailá+ ʻo pehē: Ko e ngaahi meʻa eni ʻoku leaʻaki ʻe he ʻAlo ʻo e ʻOtuá, ʻa e tokotaha ko hono ongo foʻi fofongá ʻoku hangē ha uloʻi afi kakahá+ pea ko hono ongo vaʻé ʻoku hangē ha kopa leleí:+ 19 ‘ʻOku ou ʻiloʻi hoʻo ngaahi ngāué, mo hoʻo ʻofá mo hoʻo tuí mo hoʻo ngāue ki he ʻOtuá pea mo hoʻo kātakí, pea ko hoʻo ngaahi ngāue ki muí ʻoku lahi ange ia ʻi hoʻo ngaahi ngāue naʻá ke ʻuluaki faí.

20 “‘Ka neongo ia, ʻoku ou koviʻia ʻiate koe ʻi he meʻá ni, ʻa hoʻo tukutukuʻi pē ʻa e fefine ko ia ko Sisipeli,+ ʻa ia ʻokú ne ui ʻa ia tonu ko ha palōfita, pea ʻokú ne akoʻi mo takihalaʻi ʻeku kau tamaioʻeikí ke fai ʻa e fehokotaki fakasino taʻetaau*+ pea ke kai ʻa e ngaahi meʻa kuo feilaulauʻaki ki he ngaahi ʻaitolí. 21 Pea naʻá ku tuku kiate ia ha taimi ke ne fakatomala ai, ka ʻoku ʻikai ke loto-lelei ia ke fakatomala mei heʻene fehokotaki fakasino taʻetāú.* 22 Vakai! ʻOku teu ke u lī ia ki ha mohenga ʻo e mamahi, pea ko e faʻahinga ʻoku nau tono mo iá te u lī kinautolu ki ha fuʻu mamahi lahi, tuku kehe kapau te nau fakatomala mei he ngaahi ngāue ʻa e fefine ko iá. 23 Pea te u tāmateʻi ʻene fānaú ʻaki ha mahaki fakatupu mate, ke ʻilo ai ʻe he kotoa ʻo e ngaahi fakatahaʻangá ko au ʻa e tokotaha ʻokú ne hakule ʻa e ngaahi fakakaukau loloto tahá* pea mo e ngaahi lotó, pea te u ʻoatu kiate kimoutolu tāutaha ʻo fakatatau ki hoʻomou ngaahi ngāué.+

24 “‘Kae kehe, ʻoku ou lea atu ki he toenga ʻo kimoutolu ʻoku ʻi Taiatailá, ʻa e faʻahinga kotoa ʻoku ʻikai muimui ʻi he akonaki ko ʻení, ʻa e faʻahinga naʻe ʻikai te nau hoko ʻo ʻiloʻi ʻa e ngaahi meʻa ʻoku taku ko e “ngaahi meʻa loloto” ʻa Sētané:+ ʻOku ʻikai te u hilifaki atu kiate kimoutolu ha toe kavenga kehe. 25 Ka ko eni, puke maʻu ʻa e meʻa ʻoku mou maʻú kae ʻoua ke u ʻalu atu.+ 26 Pea ko e tokotaha ʻoku ikuna mo tauhi ʻeku ngaahi ngāué ʻo aʻu ki he ngataʻangá, te u ʻoange kiate ia ʻa e mafai ki he ngaahi puleʻangá,+ 27 pea te ne puleʻi ʻa e kakaí ʻaki ha tokotoko ukamea+ koeʻuhi ke laiki kinautolu ke nau momomomo hangē ha ngaahi siā ʻumeá, ʻo hangē tofu pē ko e mafai naʻá ku maʻu mei heʻeku Tamaí. 28 Pea te u ʻoange kiate ia ʻa e fetuʻu pongipongí.+ 29 Tuku ki he tokotaha ʻoku ʻi ai hono telingá ke ne fanongo ki he meʻa ʻoku leaʻaki ʻe he laumālié ki he ngaahi fakatahaʻangá.’

3 “Tohi ki he ʻāngelo ʻo e fakatahaʻanga ʻi Sātisí ʻo pehē: Ko e ngaahi meʻa eni ʻoku leaʻaki ʻe ia ʻokú ne maʻu ʻa e laumālie ʻe fitu ʻo e ʻOtuá+ pea mo e foʻi fetuʻu ʻe fitú:+ ‘ʻOku ou ʻiloʻi hoʻo ngaahi ngāué, ko ho hingoá* pē ʻoku moʻuí, ka ko hono moʻoní ʻokú ke mate.+ 2 Ke ke faʻa leʻo,+ pea fakaivimālohiʻi ʻa e ngaahi meʻa ʻoku kei toe ʻa ia naʻe meimei maté, he kuo teʻeki ai ke u ʻiloʻi kuo fakahoko kakato hoʻo ngaahi ngāué ʻi he ʻao ʻo hoku ʻOtuá. 3 Ko ia ai, hokohoko atu ʻa e tokanga* ki he meʻa kuó ke maʻú mo e meʻa kuó ke fanongo aí, ʻo tauhi maʻu ai pē ia, pea fakatomala.+ Ko e moʻoni kapau ʻe ʻikai te ke ʻā, te u ʻalu atu hangē ha kaihaʻá,+ pea ʻe ʻikai te ke teitei ʻilo ʻa e houa te u ʻalu atu ai kiate koé.+

4 “‘Ka neongo ia, ʻokú ke maʻu ha faʻahinga tokosiʻi* ʻi Sātisi naʻe ʻikai te nau ʻuliʻi honau ngaahi kofú,+ pea te nau ʻaʻeva fakataha mo au ʻi he ngaahi kofu hinehina,+ koeʻuhí he ʻoku nau taau. 5 Ko e tokotaha ʻoku ikuná+ te ne kofuʻaki leva ha ngaahi kofu hinehina,+ pea ʻe ʻikai ʻaupito te u tāmateʻi* hono hingoá mei he tohi ʻo e moʻuí,+ ka te u ʻai ke ʻiloʻi hono hingoá ʻi he ʻao ʻo ʻeku Tamaí pea ʻi he ʻao ʻo ʻene kau ʻāngeló.+ 6 Tuku ki he tokotaha ʻoku ʻi ai hono telingá ke ne fanongo ki he meʻa ʻoku leaʻaki ʻe he laumālié ki he ngaahi fakatahaʻangá.’

7 “Tohi ki he ʻāngelo ʻo e fakatahaʻanga ʻi Filatelifiá ʻo pehē: Ko e ngaahi meʻa eni ʻoku leaʻaki ʻe ia ʻoku māʻoniʻoní,+ ʻe ia ʻoku moʻoní,+ ʻe ia ʻokú ne maʻu ʻa e kī ʻa Tēvitá,+ ʻe ia ʻokú ne fakaava ʻa e matapaá koeʻuhi ke ʻoua naʻa tāpuni ʻe ha taha pea ʻokú ne tāpuni ke ʻoua naʻa fakaava ʻe ha taha: 8 ‘ʻOku ou ʻiloʻi hoʻo ngaahi ngāué—vakai, kuó u tuku ʻi ho ʻaó ha matapā kuo fakaava,+ ʻa ia ʻe ʻikai lava ʻe ha taha ke ne tāpuni. Pea ʻoku ou ʻilo ʻoku siʻi ho mālohí ka naʻá ke tauhi ʻeku leá pea naʻe ʻikai te ke fakafisingaʻi hoku hingoá. 9 Vakai! Te u ʻai ʻa e faʻahinga mei he sinakoke ʻo Sētané ʻa ia ʻoku nau pehē ko e kau Siu kinautolu ka ʻoku ʻikai,+ ka ʻoku nau loi—vakai, te u ʻai kinautolu ke nau haʻu ʻo punou* ʻi muʻa ʻi ho vaʻé pea ʻai kinautolu ke nau ʻiloʻi kuó u ʻofaʻi koe. 10 Koeʻuhi ko hoʻo tauhi ʻa e lea fekauʻaki mo ʻeku kātakí,*+ te u tauhi foki koe ʻi he houa ʻo e ʻahiʻahí,+ ʻa ia ʻoku teu ke hoko mai ki he kotoa ʻo e māmani kuo nofoʻí, ke ʻahiʻahiʻi ʻa e faʻahinga ʻoku nofo ʻi he māmaní. 11 ʻOku vavé ni ke u ʻalu atu.+ Hanganaki puke maʻu ʻa e meʻa ʻokú ke maʻú, ke ʻoua naʻa toʻo ʻe ha taha ho kalauní.+

12 “‘Ko e tokotaha ʻoku ikuná—te u ʻai ia ko ha pou ʻi he temipale ʻo hoku ʻOtuá, pea ʻe ʻikai ʻaupito te ne toe hū ki tuʻa mei ai, pea te u tohi ʻiate ia ʻa e huafa ʻo hoku ʻOtuá+ pea mo e hingoa ʻo e kolo ʻo hoku ʻOtuá, ʻa e Selusalema Foʻou+ ʻa ia ʻoku ʻalu hifo mei hēvani mei hoku ʻOtuá, pea mo hoku hingoa foʻou ʻoʻokú.+ 13 Tuku ki he tokotaha ʻoku ʻi ai hono telingá ke ne fanongo ki he meʻa ʻoku leaʻaki ʻe he laumālié ki he ngaahi fakatahaʻangá.’

14 “Tohi ki he ʻāngelo ʻo e fakatahaʻanga ʻi Leotisiá+ ʻo pehē: Ko e ngaahi meʻa eni ʻoku leaʻaki ʻe ʻĒmeni,+ ko e fakamoʻoni+ faitōnunga mo moʻoni,+ ko e kamataʻanga ʻo e fakatupu ʻe he ʻOtuá:+ 15 ‘ʻOku ou ʻiloʻi hoʻo ngaahi ngāué, ʻa e ʻikai te ke momoko pe velá. ʻOku ou fakaʻamu ange naʻá ke momoko pe vela. 16 Ko ia koeʻuhi ko hoʻo māmāfana pea ʻikai te ke vela+ pe momokó,+ ʻoku ou teu ke puʻaki atu koe mei hoku ngutú. 17 Koeʻuhi ko hoʻo pehē, “ʻOku ou koloaʻia+ pea kuó u maʻu ʻa e koloa pea ʻoku ʻikai toe fiemaʻu ha meʻa ʻe taha kiate au,” ka ʻoku ʻikai te ke ʻilo ʻokú ke tuʻutāmaki mo fakaʻofa mo masiva mo kui mo telefua, 18 ʻoku ou faleʻi atu kiate koe ke ke fakatau meiate au ha koula kuo sivi ʻaki ʻa e afí koeʻuhí ke ke hoko ʻo koloaʻia, pea mo ha ngaahi kofu hinehina koeʻuhí ke ke kofuʻaki pea ke ʻoua naʻa eʻa atu ʻa e fakamā ʻo hoʻo telefuá,+ pea mo ha faitoʻo ki ho matá+ koeʻuhí ke ke lava ʻo sio.+

19 “‘Ko e faʻahinga kotoa ʻoku ou ʻofa aí, ʻoku ou valokiʻi mo tauteaʻi.+ Ko ia faivelenga pea fakatomala.+ 20 Vakai! ʻOku ou tuʻu ʻi he matapaá ʻo tukituki. Kapau ʻe fanongo ha taha ki hoku leʻó ʻo ne fakaava ʻa e matapaá, te u hū atu ki hono falé pea te ma kai efiafi fakataha. 21 Ko e tokotaha ʻoku ikuná+ te u tuku ke ne nofo fakataha mo au ʻi hoku taloní,+ ʻo hangē ko ʻeku ikuna+ peá u nofo fakataha mo ʻeku Tamaí ʻi hono taloní. 22 Tuku ki he tokotaha ʻoku ʻi ai hono telingá ke ne fanongo ki he meʻa ʻoku leaʻaki ʻe he laumālié ki he ngaahi fakatahaʻangá.’”

4 ʻI he hili ʻa e meʻá ni naʻá ku mamata, pea vakai, tā ko ha matapā kuo fakaava ʻi hēvani, pea ko e ʻuluaki leʻo naʻá ku fanongo ki ai naʻe lea mai kiate aú naʻe hangē ko ha leʻo ʻo ha talupité, ʻo ne pehē: “Haʻu ki ʻolungá ni, pea te u fakahā atu kiate koe ʻa e ngaahi meʻa kuo pau ke hokó.” 2 ʻI he hili ʻa e meʻá ni naʻá ku hoko leva ʻo ʻi he mālohi ʻo e laumālié, pea vakai, tā ko ha taloni naʻe tuʻu ʻi hēvani, pea naʻe ʻafio ha tokotaha ʻi he taloní.+ 3 Pea ko e Tokotaha naʻe ʻafio aí naʻe hā mai ʻo hangē ko ha maka siasipa+ pea mo ha maka sātió,* pea naʻe takatakai kotoa ki he taloní ha ʻumata ko ʻene hā maí naʻe hangē ha ʻemalatá.*+

4 Naʻe takatakai ki he taloní ha taloni ʻe 24, pea naʻá ku mamata naʻe nofo ʻi he ngaahi taloni ko ení ha kau mātuʻa ʻe toko 24+ ʻoku nau tui ʻa e ngaahi kofu hinehina, pea ʻoku ʻi honau ʻulú ha ngaahi kalauni koula. 5 Naʻe haʻu mei he taloní ha ʻuhila+ mo e ngaahi leʻo mo e ngaahi mana;+ pea naʻe ʻi ai ʻa e maama afi ʻe fitu ʻoku ulo ʻi muʻa ʻi he taloní, pea ʻoku fakafofongaʻi ʻe he ngaahi meʻá ni ʻa e laumālie ʻe fitu ʻo e ʻOtuá.+ 6 Naʻe ʻi muʻa ʻi he taloní ha meʻa ʻoku hangē ha tahi sioʻatá,+ ʻo hangē ha kilisitalá.

ʻI he lotolotonga ʻo e taloní* pea takatakai ʻi he taloní naʻe ʻi ai ha meʻamoʻui ʻe fā+ naʻa nau fonu ʻi he ngaahi foʻi mata ʻi muʻa mo mui. 7 Ko e fōtunga ʻo e ʻuluaki meʻamoʻuí naʻe hangē ha laioné,+ pea ko e fōtunga ʻo e meʻamoʻui hono uá naʻe hangē ha kiʻi pulu muí,+ pea ko e meʻamoʻui hono tolú+ naʻá ne maʻu ha fofonga hangē ha tangatá, pea ko e fōtunga ʻo e meʻamoʻui hono faá+ naʻe hangē ha ʻīkale ʻoku puná.+ 8 ʻI he fekauʻaki mo e meʻamoʻui ʻe faá, naʻe maʻu ʻe he tokotaha taki taha ʻo kinautolu ʻa e kapakau ʻe ono; naʻe fonu takatakai kotoa ʻa e ngaahi kapakaú mo e lalo kapakaú ʻi he ngaahi foʻi mata.+ Pea ʻoku nau lea hokohoko ʻi he ʻaho mo e pō, ʻo pehē: “ʻOku māʻoniʻoni, ʻoku māʻoniʻoni, ʻoku māʻoniʻoni ʻa Sihova*+ ko e ʻOtuá, ʻa e Māfimafi-Aoniú, ʻa ia naʻá ne ʻi ai pea ʻokú ne ʻi ai pea ʻokú ne hāʻele mai.”+

9 Ko fē pē ha taimi ʻoku ʻoatu ai ʻe he ngaahi meʻamoʻuí ʻa e ngeiá mo e lāngilangí mo e fakafetaʻí ki he Tokotaha ʻoku ʻafio ʻi he taloní, ʻa e Tokotaha ʻoku moʻui ʻo taʻengata pea taʻengatá,+ 10 ʻoku tūʻulutui hifo ʻa e kau mātuʻa ʻe toko 24+ ʻi he ʻao ʻo e Tokotaha ʻoku ʻafio ʻi he taloní ʻo nau lotu ki he Tokotaha ʻoku moʻui ʻo taʻengata pea taʻengatá, pea ʻoku nau lī atu honau ngaahi kalauní ki he ʻao ʻo e taloní, ʻo pehē: 11 “ʻOku taau mo koe ʻe Sihova* ko homau ʻOtua, ke ke maʻu ʻa e ngeiá+ mo e lāngilangí+ pea mo e mālohí,+ koeʻuhí naʻá ke fakatupu ʻa e ngaahi meʻa kotoa pē,+ pea koeʻuhi ko ho finangaló naʻa nau hoko ai ʻo ʻi ai pea naʻe fakatupu ai kinautolu.”

5 Pea naʻá ku sio ki he nima toʻomataʻu ʻo e Tokotaha naʻe ʻafio ʻi he taloní+ ʻoku ʻi ai ha takainga tohi kuo fai ha tohi ai ʻi he ongo tafaʻakí fakatouʻosi,* kuo silaʻi maʻu ʻaki ʻa e sila ʻe fitu. 2 Pea naʻá ku sio ki ha ʻāngelo mālohi naʻá ne fanongonongo leʻo-lahi: “Ko hai ʻoku taau ke ne fakaava ʻa e takainga tohí pea toʻo hono ngaahi silá?” 3 Ka naʻe ʻikai ha taha ʻi hēvani pe ʻi māmani pe ʻi lolofonua te ne malava ke fakaava ʻa e takainga tohí pe sio ki loto ki ai. 4 Naʻá ku tangi lahi ai koeʻuhí naʻe ʻikai ʻilo ha taha naʻe taau ke ne fakaava ʻa e takainga tohí pe sio ki loto ki ai. 5 Ka naʻe pehē mai ʻe ha taha ʻo e kau mātuʻá kiate au: “Tuku ʻa e tangí. Vakai! Ko e Laione ʻo e matakali ʻo Siutá,+ ʻa e aka+ ʻo Tēvitá,+ kuó ne ikuna,+ ko ia ʻokú ne taau ke ne fakaava ʻa e takainga tohí pea mo hono sila ʻe fitú.”

6 Pea naʻá ku sio naʻe tuʻu ʻi he lotolotonga* ʻo e taloní pea mo e meʻamoʻui ʻe faá pea ʻi he lotolotonga ʻo e kau mātuʻá+ ha lami+ ʻa ia naʻe hā mai hangē kuo tāmateʻí,+ ʻokú ne maʻu ha meʻatui ʻe fitu mo e ngaahi foʻi mata ʻe fitu, pea ʻoku fakafofongaʻi ʻe he ngaahi foʻi matá ʻa e laumālie ʻe fitu ʻo e ʻOtuá+ ʻa ia kuo fekauʻi atu ki he kotoa ʻo e māmaní. 7 Naʻá ne ʻalu atu leva ki muʻa ʻo ne toʻo ʻa e takainga tohí mei he nima toʻomataʻu ʻo e Tokotaha naʻe ʻafio ʻi he taloní.+ 8 ʻI he taimi naʻá ne toʻo ai ʻa e takainga tohí, naʻe tūʻulutui hifo ʻa e meʻamoʻui ʻe faá mo e kau mātuʻa ʻe toko 24+ ʻi he ʻao ʻo e Lamí, pea naʻe maʻu ʻe he tokotaha taki taha ha haʻape mo ha ngaahi poulu koula naʻe fonu ʻi he ʻinisēnisi. (Ko e ʻinisēnisí ʻokú ne fakafofongaʻi ʻa e ngaahi lotu ʻa e kakai tapú.)+ 9 Pea ʻoku nau hiva ha hiva foʻou,+ ʻo pehē: “ʻOkú ke taau koe ke ke toʻo ʻa e takainga tohí pea fakaava ʻa hono ngaahi silá, he naʻe tāmateʻi koe pea naʻá ke fakatau mai ʻaki ho taʻataʻá ha kakai maʻá e ʻOtuá+ mei he matakali mo e lea mo e kakai mo e puleʻanga kotoa pē,+ 10 pea naʻá ke ʻai kinautolu ke nau hoko ko ha puleʻanga+ mo ha kau taulaʻeiki ʻa hotau ʻOtuá,+ pea te nau pule ko e ngaahi tuʻi+ ki he māmaní.”

11 Pea naʻá ku sio, peá u fanongo ki ha leʻo ʻo ha kau ʻāngelo tokolahi takatakai ki he taloní pea mo e ngaahi meʻamoʻuí pea mo e kau mātuʻá, pea ko honau tokolahí ko e laui mano liungaʻaki ʻa e laui mano pea mo e laui afe liungaʻaki ʻa e laui afe,+ 12 pea naʻa nau lea leʻo-lahi: “Ko e Lami ʻa ia naʻe tāmateʻí+ ʻokú ne taau ke ne maʻu ʻa e mālohi mo e koloa mo e poto mo e ivi mo e ngeia mo e lāngilangi mo e fakahīkihiki.”+

13 Pea naʻá ku fanongo ki he meʻamoʻui kotoa pē ʻi hēvani pea ʻi māmani+ pea ʻi lolofonua pea ʻi he tahí, pea mo e ngaahi meʻa kotoa pē ʻi aí, ʻoku nau pehē: “Ke ʻa e Tokotaha ʻoku ʻafio ʻi he taloní+ pea ke ʻa e Lamí+ ʻa e fakahīkihikí mo e ngeiá+ mo e lāngilangí mo e māfimafí ʻo taʻengata pea taʻengata.”+ 14 Ko e meʻamoʻui ʻe faá naʻa nau pehē: “ʻĒmeni!” Pea naʻe tūʻulutui hifo ʻa e kau mātuʻá ʻo lotu.

6 Pea naʻá ku mamata ʻi he taimi naʻe fakaava ai ʻe he Lamí+ ʻa e taha ʻo e ngaahi sila ʻe fitú,+ pea naʻá ku fanongo ki he taha ʻo e ngaahi meʻamoʻui ʻe faá+ ʻokú ne leaʻaki ha leʻo ʻoku hangē ha maná: “Haʻu!” 2 Pea naʻá ku mamata, pea vakai, tā ko ha hoosi hinehina,+ pea ko e tokotaha naʻe heka aí naʻá ne toʻo ha ngahau; pea naʻe ʻoange kiate ia ha kalauni,+ pea naʻá ne ʻalu atu ʻi he ikuna pea ke fakakakato ʻene ikuná.+

3 ʻI he taimi naʻá ne fakaava ai ʻa e sila hono uá, naʻá ku fanongo ki he meʻamoʻui hono uá+ ʻokú ne pehē: “Haʻu!” 4 Naʻe haʻu ha hoosi ʻe taha, ko ha hoosi lanu kulokula mālohi, pea naʻe tuku ki he tokotaha naʻe heka aí ke ne ʻave ʻa e melinó mei he māmaní koeʻuhi ke nau fetāmateʻaki, pea naʻe ʻoange kiate ia ha fuʻu heletā lahi.+

5 ʻI he taimi naʻá ne fakaava ai ʻa e sila hono tolú,+ naʻá ku fanongo ki he meʻamoʻui hono tolú+ ʻokú ne pehē: “Haʻu!” Pea naʻá ku mamata, pea vakai, tā ko ha hoosi ʻuliʻuli, pea ko e tokotaha naʻe heka aí naʻá ne toʻo ha meʻafua fua mamafa ʻi hono nimá. 6 Pea naʻá ku fanongo ki he meʻa naʻe ongo mai ʻo hangē ha leʻo ʻi he lotolotonga ʻo e meʻamoʻui ʻe faá ʻoku pehē: “Ko ha kuata uite* ki ha tēnali* ʻe taha,+ pea ko e kuata paʻale ʻe tolu ki ha tēnali ʻe taha; pea ʻoua naʻa maumauʻi ʻa e lolo ʻōlivé pea mo e uainé.”+

7 ʻI he taimi naʻá ne fakaava ai ʻa e sila hono faá, naʻá ku fanongo ki he leʻo ʻo e meʻamoʻui hono faá+ ʻokú ne pehē: “Haʻu!” 8 Pea naʻá ku mamata, pea vakai, tā ko ha hoosi tea, pea ko e hingoa ʻo e tokotaha naʻe heka aí ko Mate. Pea naʻe muimui ofi mai ʻa Faʻitoka* ʻiate ia. Pea naʻe ʻoange kiate kinaua ha mafai ki he vahe fā ʻe taha ʻo e māmaní, ke na tāmateʻi kinautolu ʻaki ha heletā lahi pea ʻaki ʻa e nounou fakameʻatokoni+ pea ʻaki ʻa e mahaki fakatupu mate pea ʻaki ʻa e fanga manu fekai ʻo e māmaní.+

9 ʻI he taimi naʻá ne fakaava ai ʻa e sila hono nimá, naʻá ku mamata ki he lalo ʻōlitá+ ki he moʻui*+ ʻa e faʻahinga naʻe tāmateʻi koeʻuhi ko e folofola ʻa e ʻOtuá pea koeʻuhi ko e fakamoʻoni naʻa nau faí.+ 10 Naʻa nau kalanga leʻo-lahi ʻo pehē: “ʻE ngata ʻafē, ʻEiki Hau māʻoniʻoni mo moʻoni,+ ʻa hoʻo kei tuku ʻo ʻikai fakamāuʻi mo ʻikai sāuni homau totó ki he faʻahinga ʻoku nofo ʻi he māmaní?”+ 11 Pea naʻe ʻoange ha kofu hinehina tōtōlofa ki he tokotaha taki taha ʻo kinautolu,+ pea naʻe tala ange ke nau kiʻi tatali ʻo fuoloa siʻi, kae ʻoua ke kakato ʻa e tokolahi ʻo honau kaungā-tamaioʻeiki mo honau fanga tokoua ʻa ia naʻe teu ke tāmateʻi ʻo hangē pē ko kinautolú.+

12 Pea naʻá ku mamata ʻi he taimi naʻá ne fakaava ai ʻa e sila hono onó, pea naʻe hoko ha fuʻu mofuike; pea naʻe ʻuliʻuli ʻa e laʻaá ʻo hangē ha tauangaʻa ngaohi mei he fulufuluʻimanú,* pea ko e māhiná kātoa naʻe kulokula ʻo hangē ha totó,+ 13 pea ko e ngaahi fetuʻu ʻo e langí naʻe ngangana ki he māmaní ʻo hangē ko e taimi ʻoku luluʻi ai ʻe ha matangi mālohi ha fuʻu fiki ʻo ngangana ʻa hono fua teʻeki motuʻá. 14 Pea naʻe mavahe hake ʻa e langí ʻo hangē ha takainga tohi kuo takatakaí,+ pea naʻe mavahe ʻa e moʻunga kotoa pē mo e motu kotoa pē mei hono tuʻuʻangá.+ 15 Pea ko e ngaahi tuʻi ʻo e māmaní, kau ʻōfisa māʻolungá, kau ʻeikitaú, kau koloaʻiá, faʻahinga ʻoku mālohí, tokotaha pōpula kotoa pē, mo e tokotaha tauʻatāina kotoa pē naʻa nau toi ʻi he ngaahi ʻaná pea ʻi he lotolotonga ʻo e ngaahi fuʻu maka ʻo e ngaahi moʻungá.+ 16 Pea nau toutou pehē ki he ngaahi moʻungá pea ki he ngaahi fuʻu maká: “Holo mai kiate kimautolu+ ʻo fufū kimautolu mei he fofonga ʻo e Tokotaha ʻoku ʻafio ʻi he taloní+ pea mei he houhau ʻa e Lamí,+ 17 koeʻuhi kuo hoko mai ʻa e ʻaho lahi ʻo ʻena houhaú,+ pea ko hai ia ʻe ala tuʻu?”+

7 ʻI he hili ʻa e meʻá ni naʻá ku mamata ki ha kau ʻāngelo ʻe toko fā ʻoku nau tuʻu ʻi he tuliki ʻe fā ʻo e māmaní, ʻo nau puketuʻu ʻa e matangi ʻe fā ʻo e māmaní, ke ʻoua ʻe lava ʻo angi mai ha matangi ki he māmaní pe ki he tahí pe ki ha ʻakau. 2 Pea naʻá ku mamata ki ha ʻāngelo ʻe taha ʻoku ʻalu hake mei he hopoʻanga laʻaá,* ʻoku ʻiate ia ha sila ʻa e ʻOtua moʻuí; pea naʻá ne kalanga leʻo-lahi ki he kau ʻāngelo ʻe toko fā ko ia naʻe tuku kiate kinautolu ke nau fai ha maumau ki he māmaní pea mo e tahí, 3 ʻo pehē: “ʻOua ʻe fai ha maumau ki he māmaní pe ko e tahí pe ko e ʻuluʻakaú, kae ʻoua ke ʻosi ʻemau silaʻi+ ʻa e kau tamaioʻeiki ʻa hotau ʻOtuá ʻi honau laʻé.”+

4 Pea naʻá ku fanongo ko e tokolahi ʻo e faʻahinga ko ia naʻe silaʻí, ko e toko 144,000,+ naʻe silaʻi mei he matakali kotoa pē ʻo e ngaahi foha ʻo ʻIsilelí:+

9 ʻI he hili ʻa e meʻá ni naʻá ku mamata, pea vakai, tā ko ha fuʻu kakai lahi, ʻa ia naʻe ʻikai lava ʻe ha tangata ke ne lau, mei he kotoa ʻo e ngaahi puleʻanga mo e ngaahi matakali mo e ngaahi kakai mo e ngaahi lea,+ ʻoku nau tuʻu ʻi he ʻao ʻo e taloní pea ʻi he ʻao ʻo e Lamí, ʻoku nau tui ʻa e ngaahi kofu hinehina tōtōlofa;+ pea naʻe ʻi ai ha ngaahi vaʻa paame ʻi honau nimá.+ 10 Pea ʻoku nau toutou kalanga leʻo-lahi, ʻo pehē: “Ko hotau fakamoʻuí ʻoku mei he ʻOtuá, ʻa ia ʻokú ne ʻafio ʻi he taloní,+ pea mei he Lamí.”+

11 Ko e kotoa ʻo e kau ʻāngeló naʻa nau tuʻu takatakai ʻi he taloní pea mo e kau mātuʻá+ pea mo e meʻamoʻui ʻe faá, pea naʻa nau fakatōmapeʻe hifo ʻi he ʻao ʻo e taloní ʻo lotu ki he ʻOtuá, 12 ʻo pehē: “ʻĒmeni! Tuku ʻa e fakahīkihikí mo e lāngilangí mo e potó mo e fakafetaʻí mo e ngeiá mo e māfimafí pea mo e mālohí ke ʻa hotau ʻOtuá ʻo taʻengata pea taʻengata.+ ʻĒmeni.”

13 ʻI he tali ki aí naʻe pehē mai ʻe ha taha ʻo e kau mātuʻá kiate au: “Ko e faʻahinga ko eni ʻoku nau tui ʻa e ngaahi kofu hinehina tōtōlofá,+ ko hai ʻa kinautolu pea naʻa nau haʻú mei fē?” 14 Ko ia naʻá ku pehē ange leva kiate ia: “ʻE hoku ʻeiki, ko koe ʻa e tokotaha ʻokú ke ʻiloʻí.” Pea naʻá ne pehē mai kiate au: “Ko e faʻahinga eni kuo nau hao mei he fuʻu mamahi lahí,+ pea kuo nau fō honau ngaahi kofu tōtōlofá ʻo fakahinehina kinautolu ʻi he taʻataʻa ʻo e Lamí.+ 15 Ko e ʻuhinga ia ʻoku nau ʻi he ʻao ai ʻo e taloni ʻo e ʻOtuá, pea ʻoku nau fai kiate ia ʻa e ngāue toputapu ʻi he ʻaho mo e pō ʻi hono temipalé; pea ko e Tokotaha ʻoku ʻafio ʻi he taloní+ te ne falō atu hono tēnití kiate kinautolu.+ 16 ʻE ʻikai te nau toe fiekaia pea ʻe ʻikai te nau toe fieinua, pea ʻe ʻikai ke taaʻi kinautolu ʻe he laʻaá pe ʻe ha meʻa fakatupu velahia,+ 17 koeʻuhí ko e Lamí,+ ʻa ia ʻokú ne ʻi he lotolotonga* ʻo e taloní, te ne tauhi fakatauhisipi kinautolu+ pea te ne tataki kinautolu ki he ngaahi matavai ʻo e vai ʻo e moʻuí.+ Pea ʻe holoholo ʻe he ʻOtuá ʻa e loʻimata kotoa pē mei honau matá.”+

8 ʻI he taimi naʻá ne+ fakaava ai ʻa e sila hono fitú,+ naʻe ʻi ai ha fakalongolongo ʻi he langí ʻo feʻunga nai mo e haafe houa. 2 Pea naʻá ku mamata ki he kau ʻāngelo ʻe toko fitu+ ʻoku nau tuʻu ʻi he ʻao ʻo e ʻOtuá, pea naʻe ʻoange ʻa e talupite ʻe fitu kiate kinautolu.

3 Naʻe aʻu mai ha ʻāngelo ʻe taha, ʻokú ne pukepuke ha ʻaiʻanga* ʻinisēnisi koula, ʻo ne tuʻu ʻi he veʻe ʻōlitá,+ pea naʻe ʻoange kiate ia ha ʻinisēnisi lahi+ ke ʻoatu ia ʻi he ʻōlita koula+ naʻe tuʻu ʻi he ʻao ʻo e taloní lolotonga ia ʻa hono fanongoa ʻa e ngaahi lotu ʻa e kotoa ʻo e kakai tapú. 4 Naʻe ʻalu hake ʻa e kohu ʻo e ʻinisēnisí mei he nima ʻo e ʻāngeló fakataha mo e ngaahi lotu+ ʻa e kakai tapú ki he ʻao ʻo e ʻOtuá. 5 Ka ʻi he taimi pē ko iá naʻe toʻo ʻe he ʻāngeló ʻa e ʻaiʻanga ʻinisēnisí, pea naʻá ne fakafonu ia ʻaki ha afi mei he ʻōlitá peá ne lī ia ki he māmaní. Pea naʻe ʻi ai ha ngaahi mana mo ha ngaahi leʻo mo ha ngaahi tapa ʻa e ʻuhilá+ pea mo ha mofuike. 6 Pea ko e kau ʻāngelo ʻe toko fitu naʻa nau toʻo ʻa e talupite ʻe fitú+ naʻa nau teuteu ke ifi ʻa e ngaahi talupité.

7 Naʻe ifi ʻe he ʻuluaki ʻāngeló ʻene talupité. Pea naʻe ʻi ai ha ʻuha-ʻaisi* mo e afi naʻe fio toto naʻe tō hifo ki he māmaní;+ pea naʻe vela ai ha vahe tolu ʻe taha ʻo e māmaní, pea vela mo ha vahe tolu ʻe taha ʻo e ʻakaú, pea vela mo e mohuku matá kotoa.+

8 Naʻe ifi ʻe he ʻāngelo hono uá ʻene talupité. Pea naʻe ʻi ai ha meʻa hangē ha fuʻu moʻunga ʻoku vela ʻi ha afí naʻe lī hifo ki he tahí.+ Pea naʻe hoko ha vahe tolu ʻe taha ʻo e tahí ko e toto;+ 9 pea naʻe mate ha vahe tolu ʻe taha ʻo e ngaahi meʻamoʻui ʻi he tahí,+ pea naʻe ʻauha ha vahe tolu ʻe taha ʻo e ngaahi vaká.

10 Naʻe ifi ʻe he ʻāngelo hono tolú ʻene talupité. Pea naʻe ʻi ai ha fuʻu foʻi fetuʻu ʻoku ulo hangē ha māmá naʻe tō hifo mei he langí, pea naʻe tō ia ʻi he vahe tolu ʻe taha ʻo e ngaahi vaitafé pea ʻi he ngaahi matavaí.+ 11 Ko e hingoa ʻo e foʻi fetuʻú ko ʻAkau-Kona. Pea ko e vahe tolu ʻe taha ʻo e ngaahi vaí naʻe liliu ʻo kona, pea naʻe mate ʻa e tokolahi ʻo e kakaí mei he ngaahi vaí, koeʻuhí naʻe kona+ ʻa e ngaahi vaí ni.

12 Naʻe ifi ʻe he ʻāngelo hono faá ʻene talupité. Pea naʻe taaʻi+ ʻa e vahe tolu ʻe taha ʻo e laʻaá mo e vahe tolu ʻe taha ʻo e māhiná mo e vahe tolu ʻe taha ʻo e ngaahi fetuʻú, koeʻuhí ke ʻai ʻa honau vahe tolu ʻe taha ke fakapoʻuli+ pea ke ʻoua ʻe maʻu ʻe he ʻahó ha maama ʻi hano vahe tolu ʻe taha, pea pehē foki ki he poʻulí.

13 Pea naʻá ku mamata, peá u fanongo, tā ko ha ʻīkale ʻoku puna ʻi he langí* ʻokú ne lea leʻo-lahi: “ʻOiauē, ʻoiauē, ʻoiauē+ ki he faʻahinga ʻoku nofo ʻi he māmaní koeʻuhí ko e meʻa ʻe hoko ʻi he taimi ʻe ifi mai ai ʻe he kau ʻāngelo ʻe toko tolu ʻoku toé ʻenau ngaahi talupité!”+

9 Naʻe ifi ʻe he ʻāngelo hono nimá ʻene talupité.+ Pea naʻá ku mamata ki ha foʻi fetuʻu naʻe tō hifo mei he langí ki he māmaní, pea ko e kī ʻo e hūʻanga* ki he luo taʻehanotakelé+ naʻe ʻoange kiate ia. 2 Naʻá ne fakaava ʻa e hūʻanga* ʻo e luo taʻehanotakelé, pea naʻe ʻalu hake ha kohu mei he hūʻangá* ʻo hangē ko e kohu ʻa ha fuʻu fōnisé, pea naʻe fakapoʻuli ʻa e laʻaá,+ pehē foki ki he ʻeá, ko e meʻa ʻi he kohu ʻo e hūʻangá.* 3 Pea naʻe haʻu mei he kohú ha fanga heʻe ki he māmaní,+ pea naʻe ʻoange kiate kinautolu ha mālohi, ko e mālohi tatau mo ia ʻoku maʻu ʻe he fanga sikopio ʻo e māmaní. 4 Naʻe tala kiate kinautolu ke ʻoua te nau maumauʻi ʻa e mohuku ʻo e māmaní pe ko ha ʻakau lanu mata pe ko ha faʻahinga fuʻu ʻakau pē, ka ko e kakai pē ko ia ʻoku ʻikai te nau maʻu ʻa e sila ʻa e ʻOtuá ʻi honau laʻé.+

5 Pea naʻe ʻoange ki he fanga heʻé ʻa e mafai ke nau fakamamahiʻi kinautolu ʻi he māhina ʻe nima kae ʻoua te nau tāmateʻi kinautolu, pea ko ʻenau mamahí naʻe hangē ko e mamahi ʻoku hoko ʻi he taimi ʻoku taaʻi ai ʻe ha sikopio+ ha tahá. 6 ʻI he ngaahi ʻaho ko iá ʻe kumi ʻa e kakaí ki he maté ka ʻe ʻikai ʻaupito te nau maʻu ia, pea te nau fakaʻamu ke nau mate, ka ʻe hola ʻa e maté ia meiate kinautolu.

7 Pea ko e fōtunga ʻo e fanga heʻé naʻe hangē ha fanga hoosi naʻe teu ki he taú;+ naʻe ʻi honau ʻulú ha meʻa naʻe hā matamata ko ha kalauni koula, pea ko honau fofongá naʻe hangē ko e fofonga ʻo e tangatá, 8 ka naʻe ʻi ai honau louʻulu hangē ko e louʻulu ʻo e kakai fefiné. Pea ko honau nifó naʻe hangē ko e nifo ʻo e fanga laioné,+ 9 pea naʻe ʻi ai honau ngaahi sifa-fatafata naʻe hangē ha ngaahi sifa-fatafata ukameá. Pea ko e ongo mai ʻa honau ngaahi kapakaú naʻe hangē ko e ongo mai ʻa ha ngaahi saliote toho-hoosi ʻoku nau fakavave atu ki he taú.+ 10 Pehē foki, ʻoku ʻi ai honau ngaahi hiku mo honau ngaahi meʻa-huhu hangē ko e fanga sikopió, pea ʻoku ʻi honau hikú ʻa honau mālohi ke fakamamahiʻi ʻa e kakaí ʻi he māhina ʻe nima.+ 11 ʻOku ʻi ai honau tuʻi, ko e ʻāngelo ʻo e luo taʻehanotakelé.+ ʻI he lea faka-Hepeluú ko hono hingoá ko ʻApatoni,* ka ʻi he lea faka-Kalisí ʻokú ne maʻu ʻa e hingoa ko e ʻApolioni.*

12 Kuo ʻosi atu ʻa e ʻoiauē ʻe taha. Vakai! ʻOku ʻi ai ʻa e ʻoiauē ʻe ua+ ʻoku hoko mai ʻi he hili ʻa e ngaahi meʻa ko ení.

13 Naʻe ifi ʻe he ʻāngelo hono onó+ ʻene talupité.+ Pea naʻá ku fanongo ki ha leʻo ʻe taha mei he ngaahi meʻatui ʻo e ʻōlita koula+ ʻa ia ʻoku ʻi he ʻao ʻo e ʻOtuá 14 ʻoku lea ki he ʻāngelo hono onó ʻa ia naʻe ʻi ai ʻa e talupité: “Vete ʻa e kau ʻāngelo ʻe toko fā ʻoku haʻi ʻi he vaitafe lahi ko ʻIufaletesí.”+ 15 Pea naʻe vete mai ʻa e kau ʻāngelo ʻe toko faá, ʻa ia kuo teuʻi ki he houa mo e ʻaho mo e māhina pea mo e taʻu ke nau tāmateʻi ʻa e vahe tolu ʻe taha ʻo e kakaí.

16 Ko e tokolahi ʻo e kau tau heka hōsí naʻe toko ua mano liungaʻaki ʻa e taha mano;* naʻá ku fanongo ki he tokolahi ʻo kinautolú. 17 Pea ko e anga ʻeni ʻeku mamata ki he fanga hoosi ʻi he vīsoné pea mo kinautolu naʻe heka aí: Naʻe ʻiate kinautolu ha ngaahi sifa-fatafata lanu kulokula mālohi mo pulū hangē ha matalaʻi haiasiní mo lanu engeenga hangē ha sūlifá, pea ko e ʻulu ʻo e fanga hōsí naʻe hangē ko e ʻulu ʻo e fanga laioné,+ pea naʻe ʻalu atu mei honau ngutú ʻa e afi mo e kohu mo e sūlifa. 18 Ko ha vahe tolu ʻe taha ʻo e kakaí naʻe tāmateʻi ʻaki ʻa e tautea ʻe tolu ko ʻení, ʻe he afi mo e kohu mo e sūlifa naʻe ʻalu atu mei honau ngutú. 19 He ko e mālohi ʻo e fanga hōsí ʻoku ʻi honau ngutú mo honau hikú, he ko honau hikú ʻoku hangē ha fanga ngatá pea ʻi ai honau foʻi ʻulu, pea ʻoku nau fai ʻaki honau hikú ha maumau.

20 Ka ko e toenga ʻo e kakaí ʻa ia naʻe ʻikai te nau mate ʻi he ngaahi tautea ko ení naʻe ʻikai te nau fakatomala ʻi he ngaahi ngāue ʻa honau nimá; naʻe ʻikai te nau tuku ʻa e lotu ki he fanga tēmenioó mo e ngaahi ʻaitoli koula mo siliva mo kopa mo maka mo ʻakaú, ʻa ia ʻoku ʻikai lava ke nau sio pe fanongo pe ʻaʻevá.+ 21 Pea naʻe ʻikai te nau fakatomala ʻi heʻenau ngaahi fakapoó mo ʻenau ngaahi ngāue fakafaʻahikehé* mo ʻenau fehokotaki fakasino taʻetāú* mo ʻenau ngaahi kaihaʻá.

10 Pea naʻá ku mamata ki ha ʻāngelo mālohi ʻe taha ʻoku ʻalu hifo mei hēvani, kuó ne kofu ʻaki ha konga ʻao, pea naʻe ʻi hono ʻulú ha ʻumata, pea ko hono fofongá naʻe hangē ko e laʻaá,+ pea ko hono vaʻé naʻe hangē ha ongo pou afí, 2 pea naʻe ʻi hono nimá ha kiʻi takainga tohi kuo folahi. Pea naʻá ne ʻai hono vaʻe toʻomataʻú ki he tahí ka ko hono vaʻe toʻohemá ʻi he fonuá, 3 pea naʻá ne kalanga leʻo-lahi ʻo hangē tofu pē ko e taimi ʻoku ngungulu ai ha laioné.+ Pea ʻi he taimi naʻá ne kalanga aí, naʻá ku fanongo ki ha leʻo ʻo e mana+ ʻe fitu.

4 Ko ia ʻi he lea leva ʻa e mana ʻe fitú, naʻá ku tuʻu ʻo teu ke u tohi, ka naʻá ku fanongo ki ha leʻo mei hēvani+ ʻoku pehē: “Silaʻi ʻa e ngaahi meʻa naʻe leaʻaki ʻe he mana ʻe fitú, pea ʻoua ʻe tohi ia.” 5 Ko e ʻāngelo naʻá ku mamata ki ai ʻoku tuʻu ʻi he tahí mo e fonuá naʻá ne hiki hake hono nima toʻomataʻú ki hēvani, 6 pea naʻá ne fai ha fakapapau ki he Tokotaha ʻokú ne moʻui ʻo taʻengata pea taʻengatá,+ ʻa ia naʻá ne fakatupu ʻa hēvani mo e ngaahi meʻa ʻoku ʻi aí pea mo e māmaní mo e ngaahi meʻa ʻoku ʻi aí pea mo e tahí mo e ngaahi meʻa ʻoku ʻi aí:+ “ʻE ʻikai ke toe fai ha toloi. 7 Ka ʻi he ngaahi ʻaho ʻoku teu ke ifi ai ʻe he ʻāngelo hono fitú+ ʻa ʻene talupité,+ ko e fakalilolilo toputapu+ naʻe talaki ʻe he ʻOtuá ko ha ongoongo lelei ki heʻene kau tamaioʻeiki ko e kau palōfitá,+ ko e moʻoni ʻe ʻosi fakahoko ia.”

8 Pea naʻá ku fanongo ki he leʻo mei hēvani+ ʻokú ne toe lea mai kiate au ʻo pehē: “ʻAlu, toʻo ʻa e takainga tohi kuo fakaava ʻa ia ʻoku ʻi he nima ʻo e ʻāngelo ʻoku tuʻu ʻi he tahí mo e fonuá.”+ 9 Naʻá ku ʻalu ki he ʻāngeló peá u tala ange kiate ia ke ne ʻomai kiate au ʻa e kiʻi takainga tohí. Naʻá ne pehē mai kiate au: “Toʻo ia peá ke kai ia,+ pea ʻe kona ia ki ho keté, ka ʻi ho ngutú ʻe melie ia ʻo hangē ko e honé.” 10 Naʻá ku toʻo ʻa e kiʻi takainga tohí mei he nima ʻo e ʻāngeló peá u kai ia,+ pea ʻi hoku ngutú naʻe melie ia ʻo hangē ko e honé,+ ka ʻi he ʻosi ʻeku kai iá, naʻe kona ia ki hoku keté. 11 Pea naʻe tala mai kiate au: “Kuo pau ke ke toe kikite ʻo fekauʻaki mo e ngaahi kakai mo e ngaahi puleʻanga mo e ngaahi lea mo e ngaahi tuʻi tokolahi.”

11 Pea naʻe ʻomai kiate au ha vaʻa kaho hangē ha tokotokó*+ pea naʻe ongo mai ha leʻo: “Tuʻu hake ʻo fua ʻa e feituʻu toputapu ʻo e temipale ʻo e ʻOtuá pea mo e ʻōlitá pea lau ʻa e faʻahinga ʻoku nau lotu aí. 2 Ka ko e meʻa ki he lotoʻā ʻa ia ʻoku ʻi tuʻa ʻi he feituʻu toputapu ʻo e temipalé, tuku pē ia ʻo ʻoua ʻe fua, koeʻuhí he kuo tuku atu ia ki he ngaahi puleʻangá, pea te nau tāmalaki ʻa e kolo tapú+ ʻi he māhina ʻe 42.+ 3 Te u ʻai ʻeku ongo fakamoʻoní ke na kikite ʻi he ʻaho ʻe 1,260 lolotonga iá ʻokú na ʻai tauangaʻa.” 4 ʻOku fakafofongaʻi kinaua ʻe he ongo fuʻu ʻōlivé+ mo e ongo tuʻunga-māmá+ pea ʻokú na tuʻu ʻi he ʻao ʻo e ʻEiki ʻo e māmaní.+

5 Kapau ʻoku loto ha taha ke ne ngaohikoviʻi kinaua, ʻe ʻalu atu ha afi mei hona ngutú ʻo keina ʻa hona ngaahi filí. Kapau ʻoku loto ha taha ke ne ngaohikoviʻi kinaua, kuo pau ke tāmateʻi ia ʻi he foungá ni. 6 ʻOkú na maʻu ʻa e mafai ke tāpuni ʻa e langí+ ke ʻoua ʻe tō hifo ha ʻuha+ he lolotonga ʻa e ngaahi ʻaho ʻoku fai ai ʻena kikité, pea ʻokú na maʻu ʻa e mafai ki he ngaahi vaí ke liliu kinautolu ke hoko ko e toto+ pea ke taaʻi ʻa e māmaní ʻaki ʻa e ngaahi meʻa fakamamahi kotoa pē ʻo na faʻiteliha pē ki he lahi ʻokú na loto ki aí.

7 ʻI he taimi ʻe ʻosi ai ʻena fakamoʻoní, ko e manu fekai ko ia ʻoku ʻalu hake mei he luo taʻehanotakelé te ne faitau mo kinaua pea te ne ikunaʻi kinaua ʻo ne tāmateʻi kinaua.+ 8 Pea ko hona ʻangaʻangá ʻe ʻi he hala lahi ʻo e kolo lahi ʻa ia ʻoku ui ʻi ha ʻuhinga fakalaumālie ko Sōtoma mo ʻIsipite, ʻa e feituʻu naʻe tautau foki ai hona ʻEikí ʻi he ʻakaú. 9 Pea ko e faʻahinga ʻo e ngaahi kakaí mo e ngaahi matakalí mo e ngaahi leá mo e ngaahi puleʻangá te nau mamata ki hona ʻangaʻangá ʻi he ʻaho ʻe tolu mo e konga,+ pea ʻe ʻikai te nau fakaʻatā ʻa hona ʻangaʻangá ke tanu ʻi ha fonualoto. 10 Pea ko e faʻahinga ʻoku nofo ʻi he māmaní te nau fiefia ʻi heʻena maté mo fai kātoanga, pea te nau feʻaveʻaki meʻaʻofa, koeʻuhí ko e ongo palōfitá ni naʻá na fakamamahiʻi ʻa e faʻahinga ʻoku nofo ʻi he māmaní.

11 ʻI he hili ʻa e ʻaho ʻe tolu mo e kongá, naʻe hū ʻa e laumālie ʻo e moʻuí mei he ʻOtuá kiate kinaua,+ pea naʻá na tuʻu hake ʻaki hona vaʻé, pea naʻe tō ha manavahē lahi ki he faʻahinga naʻe sio kiate kinauá. 12 Pea naʻá na fanongo ki ha fuʻu leʻo mei hēvani ʻokú ne pehē kiate kinaua: “Mo omi ki ʻolungá ni.” Pea naʻá na ʻalu hake ki hēvani ʻi he ʻaó, pea naʻe sio ʻa hona ngaahi filí kiate kinaua. 13 ʻI he houa ko iá naʻe ʻi ai ha fuʻu mofuike lahi, pea naʻe holo ʻa e vahe hongofulu ʻe taha ʻo e koló; pea naʻe mate ʻa e toko 7,000 ʻi he mofuiké, pea ko e toengá naʻa nau hoko ʻo ilifia pea nau ʻoatu ʻa e fakahīkihiki ki he ʻOtua ʻo langí.

14 Kuo ʻosi atu ʻa e ʻoiauē hono uá.+ Vakai! Ko e ʻoiauē hono tolú ʻoku vavé ni ke hoko mai.

15 Naʻe ifi ʻe he ʻāngelo hono fitú ʻene talupité.+ Pea naʻe ongo mai ha ngaahi fuʻu leʻo-lahi ʻi hēvani, ʻoku pehē: “Ko e puleʻanga ʻo e māmaní kuo hoko ia ko e Puleʻanga ʻo hotau ʻEikí+ pea mo ʻene Kalaisí,+ pea te ne pule ko e tuʻi ʻo taʻengata pea taʻengata.”+

16 Pea ko e kau mātuʻa ʻe toko 24+ ʻa ia naʻa nau nofo ʻi honau ngaahi taloní ʻi he ʻao ʻo e ʻOtuá naʻa nau fakatōmapeʻe hifo ʻo lotu ki he ʻOtuá, 17 ʻo pehē: “ʻOku mau fakamālō atu kiate koe, ʻe Sihova* ko e ʻOtuá, ko e Māfimafi-Aoniú, ʻa e tokotaha ʻoku ʻi ai+ pea naʻe ʻi aí, koeʻuhí kuó ke maʻu ho mafai lahí peá ke kamata pule ko e tuʻi.+ 18 Ka naʻe ʻita ʻa e ngaahi puleʻangá, pea naʻe hoko mai hoʻo houhaú, pea naʻe hoko mai ʻa e taimi kotofa ke fakamāuʻi ai ʻa e kau maté pea ke fakapaleʻi+ hoʻo kau tamaioʻeiki ko e kau palōfitá+ mo e kakai tapú pea mo e faʻahinga ʻoku manavahē ki ho huafá, ʻa e iiki mo e lalahi, pea ke fakaʻauha ʻa e faʻahinga ʻoku nau fakaʻauha ʻa e māmaní.”+

19 Pea ko e feituʻu toputapu ʻo e temipale ʻo e ʻOtuá ʻi hēvaní naʻe fakaava, pea ko e ʻaʻake ʻo ʻene fuakavá naʻá ku mamata ki ai ʻi he feituʻu toputapu ʻo hono temipalé.+ Pea naʻe tapa ʻa e ʻuhilá pea ʻi ai mo ha ngaahi leʻo mo ha ngaahi mana mo ha mofuike pea mo ha fuʻu ʻuha-ʻaisi.*

12 Pea naʻe hā ha fuʻu meʻa fakaofo ʻi hēvani: Ko ha fefine+ naʻá ne kofuʻaki* ʻa e laʻaá, pea naʻe ʻi hono lalo vaʻé ʻa e māhiná, pea naʻe ʻi hono ʻulú ha kalauni naʻe ʻi ai ʻa e foʻi fetuʻu ʻe 12, 2 pea naʻá ne feitama. Pea naʻá ne kalanga ʻi heʻene langā mo ʻene mamahi ʻi he teu ke ne fāʻelé.

3 Naʻe toe hā ha meʻa fakaofo ʻe taha ʻi hēvani. Vakai! Ko ha fuʻu talākoni lanu kulokula mālohi,+ ʻoku ʻulu fitu mo meʻatui ʻe hongofulu pea ʻoku ʻi hono ngaahi foʻi ʻulú ʻa e kalauni ʻe fitu; 4 pea ʻokú ne tohoʻaki hono hikú ʻa e vahe tolu ʻe taha ʻo e ngaahi fetuʻu+ ʻo e langí, pea naʻá ne lī hifo kinautolu ki he māmaní.+ Pea naʻe tuʻu pē ʻa e talākoní ʻi he ʻao ʻo e fefine+ naʻe teu ke fāʻelé, koeʻuhí ke ne keina ʻene tamá ʻi he taimi ʻe fāʻeleʻi aí.

5 Pea naʻá ne fāʻeleʻi ha tama,+ ko ha tama tangata, ʻa ia te ne puleʻi ʻa e ngaahi puleʻangá kotoa ʻaki ha tokotoko ukamea.+ Pea naʻe hamusi atu* ʻene tamá ki he ʻOtuá pea ki hono taloní. 6 Pea naʻe hola ʻa e fefiné ki he toafá, ʻa ia naʻe ʻi ai hano feituʻu kuo teuteu ʻe he ʻOtuá pea te nau fafanga ai ia ʻi he ʻaho ʻe 1,260.+

7 Pea naʻe hoko ha tau ʻi hēvani: Ko Maikeli*+ mo ʻene kau ʻāngeló naʻa nau faitau mo e talākoní, pea naʻe faitau ʻa e talākoní mo ʻene kau ʻāngeló mo kinautolu 8 ka naʻe ʻikai te nau ikuna,* pea naʻe ʻikai toe ʻi ai ha feituʻu moʻonautolu ʻi hēvani. 9 Ko ia naʻe lī hifo ʻa e fuʻu talākoní,+ ʻa e ngata ʻo onoʻahó,+ ʻa e tokotaha ʻoku ui ko e Tēvoló+ mo Sētané,+ ʻa ia ʻokú ne takihalaʻi ʻa e kotoa ʻo e māmani kuo nofoʻí;+ naʻe lī hifo ia ki he māmaní,+ pea naʻe lī fakataha hifo mo ia ʻene kau ʻāngeló. 10 Naʻá ku fanongo ki ha fuʻu leʻo ʻi hēvani ʻoku pehē:

“Ko eni kuo hoko moʻoni ʻa e fakamoʻuí+ mo e mālohí mo e Puleʻanga ʻa hotau ʻOtuá+ pea mo e mafai ʻo ʻene Kalaisí, koeʻuhí ko e tokotaha ʻokú ne tukuakiʻi hotau fanga tokouá kuo lī hifo ia, ʻa e tokotaha ʻokú ne tukuakiʻi kinautolu ʻi he ʻaho mo e pō ʻi he ʻao ʻo hotau ʻOtuá!+ 11 Pea naʻa nau ikunaʻi ia+ koeʻuhi ko e taʻataʻa ʻo e Lamí+ pea koeʻuhi ko e pōpoaki ʻo e fakamoʻoni naʻa nau faí,+ pea naʻe ʻikai te nau manavasiʻi ki ha mole ʻenau moʻuí+ naʻa mo e ʻi he fehangahangai mo e maté. 12 ʻI he meʻá ni, fiefia ʻa kimoutolu ʻa e ngaahi langí pea mo kimoutolu ʻoku nofo aí! ʻOiauē ʻa e māmaní pea mo e tahí,+ koeʻuhi kuo ʻalu hifo ʻa e Tēvoló kiate kimoua, ʻokú ne ʻita lahi, ʻi heʻene ʻiloʻi ʻoku toe siʻi pē hono taimí.”+

13 ʻI he vakai leva ʻa e talākoní kuo lī hifo ia ki he māmaní,+ naʻá ne fakatangaʻi ʻa e fefine+ naʻá ne fāʻeleʻi ʻa e tama tangatá. 14 Ka naʻe ʻoange ha ongo kapakau ʻo ha fuʻu ʻīkale+ ki he fefiné, koeʻuhi ke ne lava ʻo puna ki he toafá ki hono feituʻú, ʻa e feituʻu ʻe fafanga ai ia ʻi ha kuonga, mo ha kuonga ʻe ua, mo e vaeuaʻi kuonga*+ ʻo mamaʻo mei he ngatá.+

15 Pea naʻe puʻaki atu ʻe he ngatá ha vai hangē ha vaitafé mei hono ngutú ke tuli atu ki he fefiné, ke ʻai ia ke ne melemo ʻi he vaitafé. 16 Ka naʻe tokoni ʻa e māmaní ki he fefiné, pea naʻe fakaava hake ʻe he māmaní hono ngutú ʻo ne folofua ʻa e vaitafe naʻe puʻaki atu ʻe he talākoní mei hono ngutú. 17 Ko ia naʻe ʻita lahi ʻa e talākoní ki he fefiné peá ne ʻalu atu ke faitau mo e toenga ʻo e hako ʻo e fefiné,+ ʻa ia ʻoku nau tauhi ʻa e ngaahi fekau ʻa e ʻOtuá pea ʻoku nau maʻu ʻa e ngāue ko e faifakamoʻoni fekauʻaki mo Sīsū.+

13 Pea naʻá ne* tuʻu maʻu ʻi he ʻoneʻone ʻo e tahí.

Pea naʻá ku mamata ki ha manu fekai+ ʻoku ʻalu hake mei he tahí,+ ʻoku meʻatui ʻe hongofulu mo ʻulu fitu, pea ʻoku ʻi hono ngaahi meʻatuí ʻa e kalauni ʻe hongofulu, ka ʻoku ʻi hono ngaahi foʻi ʻulú ʻa e ngaahi hingoa laukovi ki he ʻOtuá. 2 Ko e manu fekai leva naʻá ku mamata ki aí naʻe hangē ia ha lēpatí, ka ko hono ngaahi vaʻé naʻe hangē ia ko e vaʻe ʻo ha peá, pea ko hono ngutú naʻe hangē ko e ngutu ʻo ha laioné. Pea naʻe maʻu ʻe he manu fekaí ʻa hono mālohí mo hono taloní mo ha fuʻu mafai lahi+ mei he talākoní.+

3 Naʻá ku mamata ki he taha ʻo hono ngaahi foʻi ʻulú naʻe hangē kuo lavea lahí, ka naʻe hoko ʻo moʻui ʻa hono lavea fakatupu maté,+ pea ko e kotoa ʻo e māmaní naʻa nau muimui ki he manu fekaí fakataha mo e leleiʻia. 4 Pea naʻa nau lotu ki he talākoní koeʻuhí he naʻá ne ʻoange ʻa e mafaí ki he manu fekaí, pea naʻa nau lotu ki he manu fekaí ʻi he ngaahi lea ko ení: “Ko hai ia ʻoku tatau mo e manu fekaí, pea ko hai ia ʻe lava ke faitau mo ia?” 5 Naʻe ʻoange kiate ia ha ngutu ʻoku lau meʻa lalahi mo leaʻaki ʻa e ngaahi laukovi ki he ʻOtuá, pea naʻe ʻoange kiate ia ʻa e mafai ke ne ngāue ʻi he māhina ʻe 42.+ 6 Pea naʻe kamata ke lea hono ngutú ʻaki ha ngaahi laukovi+ ki he ʻOtuá ke laukovi ki hono huafá pea mo hono ʻafioʻangá, naʻa mo e faʻahinga ʻoku nofo ʻi hēvaní.+ 7 Naʻe fakangofua ia ke ne faitau mo e kakai tapú pea ke ne ikunaʻi kinautolu,+ pea naʻe ʻoange kiate ia ʻa e mafai ki he matakali mo e kakai mo e lea mo e puleʻanga kotoa pē. 8 Pea ko e faʻahinga kotoa ʻoku nofo ʻi he māmaní te nau lotu ki ai. Talu mei hono tanupou ʻo e māmaní,* kuo ʻikai ha taha ʻo honau hingoá ʻe hiki ʻi he takainga tohi ʻo e moʻuí+ ʻa ia ʻoku ʻa e Lamí, ʻa ē naʻe tāmateʻí.+

9 Kapau ʻoku ʻi ai ha taha ʻokú ne maʻu ha telinga, tuku ke ne fanongo.+ 10 Kapau ʻoku ʻi ai ha taha kuo pau ke nofo pōpula, te ne hoko atu ki he nofo pōpulá. Kapau ʻe ʻi ai ha taha te ne tāmate ʻaki ʻa e heletaá,* kuo pau ke tāmateʻi ia ʻaki ʻa e heletaá.+ Ko e ʻuhinga eni ʻoku fiemaʻu ai ke maʻu ʻe he kakai tapú+ ʻa e kātakí+ mo e tuí.+

11 Pea naʻá ku mamata ki ha toe manu fekai ʻe taha ʻoku ʻalu hake mei he māmaní, pea naʻe ʻi ai hono ongo meʻatui hangē ha lamí, ka naʻá ne kamata lea ʻo hangē ha talākoní.+ 12 ʻOkú ne ngāueʻaki ʻa e mafai kotoa ʻo e ʻuluaki manu fekaí ʻi he ʻao ʻo e ʻuluaki manu fekaí.+ Pea ʻokú ne ʻai ʻa e māmaní pea mo e faʻahinga ʻoku nofo aí ke nau lotu ki he ʻuluaki manu fekaí, ʻa ē naʻe hoko ʻo moʻui ʻa hono lavea fakatupu maté.+ 13 Pea ʻokú ne fakahoko ʻa e ngaahi mana lalahi, ʻo aʻu ki hono ʻai ke ʻalu hifo ha afi mei he langí ki he māmaní ʻi he ʻao ʻo e faʻahinga ʻo e tangatá.

14 ʻOkú ne takihalaʻi ʻa e faʻahinga ʻoku nofo ʻi he māmaní, koeʻuhi ko e ngaahi mana ko ia naʻe fakangofua ke ne fakahoko ʻi he ʻao ʻo e manu fekaí, lolotonga ia ʻene tala ki he faʻahinga ʻoku nofo ʻi he māmaní ke nau ngaohi ha ʻīmisi+ ki he manu fekai ko ia naʻe taaʻi ʻaki ʻa e heletaá pea toe moʻuí.+ 15 Pea naʻe fakangofua ia ke ne ʻoange ha mānava* ki he ʻīmisi ʻo e manu fekaí, koeʻuhi ke lava fakatouʻosi ʻa e ʻīmisi ʻo e manu fekaí ʻo lea mo faituʻutuʻuni ke tāmateʻi ʻa e faʻahinga kotoa ʻoku nau fakafisi ke lotu ki he ʻīmisi ʻo e manu fekaí.

16 ʻOkú ne kounaʻi ʻa e kakai kotoa pē—ʻa e iiki mo e lalahi, ʻa e koloaʻia mo e masiva, ʻa e tauʻatāina mo e pōpula—ke fakaʻilongaʻi ʻa e faʻahingá ni ʻi honau nima toʻomataʻú pe ʻi honau laʻé,+ 17 pea ke ʻoua naʻa ʻi ai ha taha ʻe lava ke ne fai ha fakatau mai pe ha fakatau atu, tuku kehe pē ha taha ʻokú ne maʻu ʻa e fakaʻilongá, ʻa e hingoa+ ʻo e manu fekaí pe ko e fika ʻo hono hingoá.+ 18 ʻOku fiemaʻu ki he meʻá ni ʻa e poto: Tuku ki he tokotaha ʻokú ne maʻu ʻa e vavanga fakaefakakaukaú ke ne fikaʻi ʻa e fika ʻo e manu fekaí, he ko ha fika ia ʻa ha tangata,* pea ko hono fiká ko e 666.+

14 Pea naʻá ku mamata, pea vakai, ʻoku tuʻu ʻa e Lamí+ ʻi he Moʻunga Saioné,+ pea ʻoku ʻiate ia ʻa e toko 144,000+ ʻa ia kuo tohi ʻa hono huafá pea mo e huafa ʻo ʻene Tamaí+ ʻi honau laʻé. 2 Naʻá ku fanongo ki ha leʻo ʻoku haʻu mei hēvani ʻoku hangē ko e leʻo ʻo ha ngaahi vai lahi pea hangē ko e leʻo ʻo ha fuʻu mana leʻo-lahi; pea ko e leʻo naʻá ku fanongo ki aí naʻe hangē ko e ongo mai ʻa ha kau hiva ʻoku nau hiva mo tā ʻenau ngaahi haʻapé. 3 Pea ʻoku nau hiva ʻaki ha hiva ʻoku matamata ko ha hiva foʻou+ ʻi he ʻao ʻo e taloní pea ʻi he ʻao ʻo e meʻamoʻui ʻe faá+ pea mo e kau mātuʻá,+ pea naʻe ʻikai ha taha ʻe lava ke ne ako ʻo maʻu ʻa e hiva ko iá tuku kehe pē ʻa e toko 144,000,+ ʻa ia kuo fakatau mei he māmaní. 4 Ko kinautolu eni ʻa e faʻahinga naʻe ʻikai te nau ʻuliʻi kinautolu ʻi he fekauʻaki mo e kakai fefiné; ko hono moʻoní, ko e kau nofo tāupoʻou* kinautolu.+ Ko kinautolu eni ʻa e faʻahinga ʻoku nau hanganaki muimui ʻi he Lamí ʻo tatau ai pē pe ko fē ʻokú ne ʻalu ki aí.+ Ko kinautolu eni naʻe fakatau+ mei he lotolotonga ʻo e faʻahinga ʻo e tangatá ko e ngaahi ʻuluaki fua+ ki he ʻOtuá pea ki he Lamí, 5 pea naʻe ʻikai maʻu ha kākā ʻi honau ngutú; ʻoku nau taʻemele.+

6 Pea naʻá ku mamata ki ha toe ʻāngelo ʻe taha ʻoku puna ʻi he langí,* pea naʻe ʻiate ia ʻa e ongoongo lelei taʻengata ke talaki ki he faʻahinga ʻoku nofo ʻi he māmaní, ki he puleʻanga mo e matakali mo e lea mo e kakai kotoa pē.+ 7 Naʻá ne lea leʻo-lahi ʻo pehē: “Mou manavahē ki he ʻOtuá pea ʻoange kiate ia ʻa e lāngilangí, koeʻuhi kuo hoko mai ʻa e houa ʻo ʻene fakamāú,+ ko ia lotu ki he Tokotaha naʻá ne ngaohi ʻa e langí pea mo e māmaní mo e tahí+ mo e ngaahi matavaí.”

8 Ko ha toe ʻāngelo ʻe taha, ko hono uá ia, naʻe hoko mai ai ʻo ne pehē: “Kuó ne tō! Kuo tō+ ʻa Pāpilone ko e Lahi,+ ʻa ia kuó ne ʻai ʻa e ngaahi puleʻanga kotoa pē ke nau inu ʻa e uaine ʻo e holi mālohi* ʻo ʻene fehokotaki fakasino taʻetāú!”*+

9 Ko ha toe ʻāngelo ʻe taha, ko hono tolú ia, naʻe hoko mai ʻiate kinaua, ʻo ne lea leʻo-lahi ʻo pehē: “Kapau ʻoku ʻi ai ha taha ʻoku lotu ki he manu fekaí+ mo hono ʻīmisí pea ʻokú ne maʻu ha fakaʻilonga ʻi hono laʻé pe ʻi hono nimá,+ 10 te ne inu mo ia foki mei he uaine ʻo e tuputāmaki ʻa e ʻOtuá ʻa ia kuo lilingi taʻehuʻi ki he ipu ʻo ʻEne houhaú,+ pea ʻe fakamamahiʻi ia ʻaki ʻa e afi mo e sūlifa+ ʻi he ʻao ʻo e kau ʻāngelo tapú pea ʻi he ʻao ʻo e Lamí. 11 Pea ko e kohu mei he afi ʻoku fakamamahiʻi ʻaki kinautolú* ʻoku ʻalu hake ia ʻo taʻengata pea taʻengata,+ pea ʻi he ʻaho mo e pō ʻoku ʻikai te nau maʻu ha mālōlō, ʻa e faʻahinga ko ia ʻoku nau lotu ki he manu fekaí mo hono ʻīmisí pea mo ha taha pē ʻokú ne maʻu ʻa e fakaʻilonga ʻo hono hingoá.+ 12 ʻOku fiemaʻu heni ʻa e kātakí ʻi he tafaʻaki ʻa e kakai tapú,+ ʻa e faʻahinga ʻoku nau tauhi ʻa e ngaahi fekau ʻa e ʻOtuá mo nau piki maʻu ki he tui+ ʻa Sīsuú.”

13 Pea naʻá ku fanongo ki ha leʻo mei hēvani ʻoku pehē, “Tohi: Fiefia ē ko e faʻahinga ʻoku nau mate mei he taimí ni ʻo faai atu ʻi he fāʻūtaha mo e ʻEikí.+ ʻIo, ʻoku pehē ʻe he laumālié, tuku ke nau mālōlō mei heʻenau ngaahi fakaongosiá, he ko e ngaahi meʻa naʻa nau faí heʻikai ngalo.”*

14 Pea naʻá ku mamata, pea vakai, tā ko ha konga ʻao hinehina, pea naʻe heka ʻi he konga ʻaó ha taha ʻoku hangē mai ko ha foha ʻo e tangatá,+ fakataha mo ha kalauni koula ʻi hono ʻulú pea mo ha hele tuʻusi māsila ʻi hono nimá.

15 Naʻe ʻasi mai ha toe ʻāngelo ʻe taha mei he feituʻu toputapu ʻo e temipalé, ʻo ne kalanga leʻo-lahi ki he tokotaha naʻe heka ʻi he konga ʻaó: “ʻAi atu hoʻo hele tuʻusí ʻo fai ʻa e tutuʻú, koeʻuhí he kuo hoko mai ʻa e houa ke fai ai ʻa e tutuʻú, he ko e fua ʻo e māmaní kuo motuʻa ʻaupito.”+ 16 Pea ko e tokotaha naʻe heka ʻi he konga ʻaó naʻá ne ʻai atu ʻene hele tuʻusí ki he māmaní, peá ne tutuʻu ʻa e fua ʻo e māmaní.

17 Pea ko ha toe ʻāngelo ʻe taha naʻe ʻasi mai mei he feituʻu toputapu ʻo e temipale ʻoku ʻi hēvaní, pea naʻe ʻiate ia foki ha hele tuʻusi māsila.

18 Pea naʻe ʻi ai mo ha toe ʻāngelo ʻe taha naʻe ʻasi mai mei he ʻōlitá, pea naʻá ne maʻu ʻa e mafai ki he afí. Pea naʻá ne kalanga leʻo-lahi atu ki he tokotaha naʻe ʻi ai ʻa e hele tuʻusi māsilá, ʻo pehē: “ʻAi atu hoʻo hele tuʻusi māsilá pea tānaki mai ʻa e ngaahi fuhinga kālepi ʻo e māmaní, he kuo motuʻa ʻa e kālepí.”+ 19 Naʻe ʻai atu ʻe he ʻāngeló ʻene hele tuʻusí ki he māmaní ʻo ne tānaki mai ʻa e kālepi ʻo e māmaní, pea naʻá ne laku ia ki he fuʻu tataʻoʻanga uaine ʻo e tuputāmaki ʻa e ʻOtuá.+ 20 Pea naʻe fai hono malamalaki ʻo e tataʻoʻanga uainé ʻi he tuʻa koló, pea naʻe tafe mai ha toto mei he tataʻoʻanga uainé ʻo aʻu hake hono māʻolungá ki he piti ʻo e fanga hōsí, pea mafola atu ʻi he mamaʻo ko e sitētia ʻe 1,600.*

15 Pea naʻá ku mamata ʻi hēvani ki ha toe meʻa fakaofo ʻe taha, ʻoku lahi mo makehe atu, ko e kau ʻāngelo ʻe toko fitu+ ʻoku nau ʻomi ha tautea ʻe fitu. Ko e ngaahi tautea fakaʻosí eni, koeʻuhí fakafou ʻi he ngaahi meʻá ni ko e ngataʻanga ia ʻo e houhau ʻa e ʻOtuá.+

2 Pea naʻá ku mamata ki ha meʻa naʻe hangē ha tahi sioʻata+ naʻe fiofio afí, pea ko e faʻahinga ʻoku nau ikunaʻi+ ʻa e manu fekaí mo hono ʻīmisí+ pea mo e fika ʻo hono hingoá+ naʻa nau tuʻu ʻi he veʻe tahi sioʻatá, ʻoku nau toʻo ʻa e ngaahi haʻape ʻa e ʻOtuá. 3 Naʻa nau hivaʻaki ʻa e hiva ʻa Mōsese+ ko e tamaioʻeiki ʻa e ʻOtuá pea mo e hiva ʻa e Lamí,+ ʻo nau pehē:

“ʻOku lahi mo fakaofo ʻa hoʻo ngaahi ngāué,+ ʻe Sihova* ko e ʻOtuá, ʻa e Māfimafi-Aoniú.+ ʻOku māʻoniʻoni mo moʻoni ʻa ho ngaahi ʻalungá,+ Tuʻi ʻo ʻitāniti.+ 4 Ko hai ia ʻe ʻikai moʻoni ke ne manavahē ki he ʻAfioná, ʻe Sihova,* mo fakahīkihikiʻi ho huafá, he ko koe toko taha pē ʻoku mateakí?+ He ko e ngaahi puleʻangá kotoa te nau haʻu ʻo lotu ʻi ho ʻaó,+ koeʻuhi kuo fakaeʻa ʻa hoʻo ngaahi tuʻutuʻuni māʻoniʻoní.”

5 ʻI he hili ʻa e meʻá ni naʻá ku mamata, pea tā ko e feituʻu toputapu ʻo e tēniti ʻo e fakamoʻoní+ naʻe fakaava ʻi hēvani,+ 6 pea ko e kau ʻāngelo ʻe toko fitu ʻa ia ʻoku nau ʻomi ʻa e tautea ʻe fitú+ naʻa nau ʻasi mai mei he feituʻu toputapú, kuo nau kofuʻaki ʻa e līneni maʻa mo ngingila fakataha mo e ngaahi noʻo koula kuo takatakai ʻi honau fatafatá. 7 Ko e taha ʻi he ngaahi meʻamoʻui ʻe faá naʻá ne ʻoange ki he kau ʻāngelo ʻe toko fitú ʻa e poulu koula ʻe fitu naʻe fonu ʻi he houhau ʻa e ʻOtuá,+ ʻa ia ʻokú ne moʻui ʻo taʻengata pea taʻengatá. 8 Pea naʻe fonu kohu ʻa e feituʻu toputapú koeʻuhi ko e lāngilangi ʻo e ʻOtuá+ pea koeʻuhi ko hono mālohí, pea naʻe ʻikai ha taha ʻe lava ke hū ki he feituʻu toputapú kae ʻoua ke kakato ʻa e tautea ʻe fitu+ ʻa e kau ʻāngelo ʻe toko fitú.

16 Pea naʻá ku fanongo ki ha fuʻu leʻo naʻe ongo mai mei he feituʻu toputapú+ ʻo ne pehē ki he kau ʻāngelo ʻe toko fitú: “Mou ʻalu atu ʻo huaʻi ʻa e poulu ʻe fitu ʻo e houhau ʻa e ʻOtuá ki he māmaní.”+

2 Naʻe ʻalu atu ʻa e ʻuluakí ʻo ne huaʻi ʻene poulú ki he māmaní.+ Pea naʻe taaʻi ʻe ha pala fakamamahi mo fakalilifu+ ʻa e kakai naʻa nau maʻu ʻa e fakaʻilonga ʻo e manu fekaí+ pea kuo nau lotu ki hono ʻīmisí.+

3 Naʻe huaʻi ʻe he ʻāngelo hono uá ʻene poulú ki he tahí.+ Pea naʻe hoko ia ko e toto+ ʻo hangē ha toto ʻo ha tangata maté, pea naʻe mate ʻa e meʻamoʻui kotoa pē, ʻio, ʻa e ngaahi meʻa ʻi he tahí.+

4 Naʻe huaʻi ʻe he ʻāngelo hono tolú ʻene poulú ki he ngaahi vaitafé mo e ngaahi matavaí.+ Pea naʻa nau hoko ko e toto.+ 5 Naʻá ku fanongo ki he ʻāngelo ʻo e ngaahi vaí ʻokú ne pehē: “ʻE hoʻo ʻAfio, ʻa e Tokotaha ʻoku ʻi ai pea naʻe ʻi aí,+ ʻa e Tokotaha mateakí,+ ʻokú ke māʻoniʻoni, he kuó ke fai ʻa e ngaahi fakamaau ko ʻení,+ 6 koeʻuhí naʻa nau lilingi ʻa e toto ʻo e kakai tapú mo e kau palōfitá,+ pea kuó ke ʻoange kiate kinautolu ʻa e toto ke nau inu;+ ʻoku nau tuha mo ia.”+ 7 Pea naʻá ku fanongo ki ha leʻo mei he ʻōlitá ʻokú ne pehē: “ʻIo, ʻe Sihova* ko e ʻOtuá, ʻa e Māfimafi-Aoniú,+ ʻoku moʻoni mo māʻoniʻoni ʻa hoʻo ngaahi fakamāú.”*+

8 Naʻe huaʻi ʻe he ʻāngelo hono faá ʻene poulú ki he laʻaá,+ pea naʻe tuku ki he laʻaá ke ne tutu ʻa e kakaí ʻaki ʻa e afi. 9 Pea naʻe velahia ʻa e kakaí ʻi heʻene fuʻu velá, ka naʻa nau laukovi ki he huafa ʻo e ʻOtuá, ʻa ia ʻokú ne maʻu ʻa e mafai ki he ngaahi tautea ko ení, pea naʻe ʻikai te nau fakatomala ʻo ʻoatu ʻa e lāngilangí kiate ia.

10 Naʻe huaʻi ʻe he ʻāngelo hono nimá ʻene poulú ki he taloni ʻo e manu fekaí. Pea naʻe hoko ʻo fakapoʻuli ʻa hono puleʻangá,+ pea naʻe kamata ke nau uʻu honau nifó koeʻuhi ko e mamahi naʻa nau ongoʻí, 11 ka naʻa nau laukovi ki he ʻOtua ʻo hēvaní koeʻuhi ko e ngaahi mamahi naʻa nau ongoʻí mo honau ngaahi palá, pea naʻe ʻikai te nau fakatomala mei heʻenau ngaahi ngāué.

12 Naʻe huaʻi ʻe he ʻāngelo hono onó ʻene poulú ki he vaitafe lahi ko ʻIufaletesí,+ pea naʻe mātuʻu ʻa hono vaí+ ke teuteu ai ʻa e halá ki he ngaahi tuʻi*+ mei he hopoʻanga laʻaá.*

13 Pea naʻá ku mamata ki ha ngaahi lea fakamānavaʻi taʻemaʻa* ʻe tolu naʻe hā mai hangē ha fanga potó ʻoku haʻu mei he ngutu ʻo e talākoní+ pea mei he ngutu ʻo e manu fekaí pea mei he ngutu ʻo e palōfita loí. 14 Ko hono moʻoní, ko e ngaahi lea ia kuo fakamānavaʻi ʻe he fanga tēmenioó pea ʻoku fakahoko ʻe he ngaahi lea ko iá ʻa e ngaahi mana,+ pea ʻoku ʻalu atu ʻa e ngaahi lea ko iá ki he ngaahi tuʻi ʻo e māmani kotoa kuo nofoʻí, ke fakatahatahaʻi kinautolu ki he tau+ ʻo e ʻaho lahi ʻo e ʻOtua Māfimafi-Aoniú.+

15 “Vakai! ʻOku ou ʻalu atu ʻo hangē ha kaihaʻá.+ Fiefia ē ka ko e tokotaha ʻoku nofoʻaki ʻāʻā+ peá ne kei maʻu pē hono ngaahi kofu tuʻá, koeʻuhi ke ʻoua naʻá ne laka telefua pea mamata ʻa e kakaí ki hono fakamāʻangá.”+

16 Pea naʻe fakatahatahaʻi kinautolu ʻe he ngaahi lea kuo fakamānavaʻi ʻe he fanga tēmenioó ki he feituʻu ʻoku ui ʻi he lea faka-Hepeluú ko ʻĀmaketone.*+

17 Naʻe huaʻi ʻe he ʻāngelo hono fitú ʻene poulú ki he ʻeá. ʻI he meʻá ni naʻe ongo mai ai ha fuʻu leʻo mei he feituʻu toputapú+ mei he taloní, ʻo pehē: “Kuo lava!” 18 Pea naʻe ʻi ai ʻa e ngaahi tapa ʻa e ʻuhilá mo e ngaahi leʻo mo e ngaahi mana, pea naʻe ʻi ai ha fuʻu mofuike lahi ʻo ʻikai hano tatau mo ha mofuike kuo hoko talu mei he ʻi ai ʻa e tangatá ʻi he māmaní,+ pea naʻe fuʻu fakalilifu mo lahi ʻaupito ʻa e mofuiké. 19 Ko e fuʻu kolo lahí+ naʻe mafaʻa ʻo konga tolu, pea naʻe ʻauha ʻa e ngaahi kolo lalahi ʻo e ngaahi puleʻangá; pea naʻe manatua ʻi he ʻao ʻo e ʻOtuá ʻa e fefine ko eni ko Pāpilone ko e Lahí,+ ke ʻoange kiate ia ʻa e ipu uaine ʻo e kakaha ʻo ʻene houhaú.+ 20 Kaeʻumaʻā, naʻe hola ʻa e motu kotoa pē, pea naʻe ʻikai ʻiloʻiloa ʻa e ngaahi moʻungá.+ 21 Naʻe ʻi ai ha fuʻu ʻuha-ʻaisi,* ko e konga ʻaisi taki taha naʻe talēniti* nai ʻe taha hono mamafá, naʻe tō mei hēvani ki he kakaí,+ pea naʻe laukovi ʻa e kakaí ki he ʻOtuá koeʻuhi ko e tautea ko ia ko e ʻuha-ʻaisí,+ he ko e tauteá naʻe fuʻu lahi anga-kehe.

17 Ko e taha ʻo e kau ʻāngelo ʻe toko fitu naʻe ʻiate kinautolu ʻa e poulu ʻe fitú+ naʻe haʻu ʻo ne pehē mai kiate au: “Haʻu, te u fakahā atu kiate koe ʻa e fakamaau ʻoku fai ki he fuʻu fefine feʻauaki ʻa ia ʻokú ne tangutu ʻi he ngaahi vai lahí,+ 2 ʻa ia kuo fehokotaki fakasino taʻetaau*+ mo ia ʻa e ngaahi tuʻi ʻo e māmaní, pea ko e kau nofo ʻi he māmaní naʻa nau konā ʻi he uaine ʻo ʻene fehokotaki fakasino taʻetāú.”*+

3 Pea naʻá ne ʻave au ʻi he mālohi ʻo e laumālié ki ha toafa. Pea naʻá ku sio ki ha fefine ʻoku heka mai ʻi ha manu fekai lanu kula ʻahoʻaho ʻa ia naʻe fonu ai ʻa e ngaahi hingoa laukovi ki he ʻOtuá pea naʻe ʻulu fitu mo meʻatui ʻe hongofulu. 4 Ko e fefiné naʻe kofu lanu vāleti+ mo kula ʻahoʻaho, pea naʻá ne teu ʻaki ʻa e koula mo e ngaahi maka mahuʻinga mo e ngaahi mataʻitofe,+ pea naʻe ʻi hono nimá ha ipu koula naʻe fonu ʻi he ngaahi meʻa fakalielia mo e ngaahi meʻa taʻemaʻa ʻo ʻene fehokotaki fakasino taʻetāú.* 5 Naʻe tohi ʻi hono laʻé ha hingoa, ko ha misiteli: “Ko Pāpilone ko e Lahi, ko e faʻē ʻa e kakai fefine feʻauakí+ pea mo e ngaahi meʻa fakalielia ʻo e māmaní.”+ 6 Pea naʻá ku vakai, tā naʻe konā ʻa e fefiné ʻi he toto ʻo e kakai tapú pea ʻi he toto ʻo e kau fakamoʻoni ʻa Sīsuú.+

Pea ʻi heʻeku sio kiate iá naʻá ku mātuʻaki ofoofo. 7 Ko ia naʻe pehē mai ʻe he ʻāngeló kiate au: “Ko e hā naʻá ke ofoofo aí? Te u tala atu kiate koe ʻa e misiteli ʻo e fefiné+ pea mo e manu fekai ʻulu fitu mo meʻatui ʻe hongofulu+ ʻa ia ʻokú ne heka aí: 8 Ko e manu fekai naʻá ke sio ki aí naʻe ʻi ai, ka ʻoku ʻikai ʻi ai, ka neongo iá ʻoku teu ke ne ʻalu hake mei he luo taʻehanotakelé,+ pea te ne ʻalu atu ki he fakaʻauha. Pea ko e kau nofo ʻi he māmaní—ʻa kinautolu ko honau hingoá kuo teʻeki ke tohi ʻi he takainga tohi ʻo e moʻuí+ talu mei he tanupou ʻo e māmaní*—te nau ofoofo ʻi he taimi te nau sio ai ki he manu fekaí, he ko ē naʻe ʻi ai, ka ʻoku ʻikai ʻi ai, ka neongo iá ʻe ʻi heni ia.

9 ʻOku fiemaʻu ki heni ha ʻatamai ʻokú ne maʻu ʻa e potó: Ko e foʻi ʻulu ʻe fitú+ ʻoku nau fakafofongaʻi ʻa e moʻunga ʻe fitu, ʻa ia ʻoku tangutu ʻi ʻolunga ai ʻa e fefiné. 10 Pea ʻoku ʻi ai ʻa e tuʻi ʻe fitu: Kuo tō ha toko nima, ko e taha ʻoku ʻi aí ni, pea kuo teʻeki ke aʻu mai ʻa e toko taha; ka ʻi he taimi ʻe aʻu mai aí, kuo pau ke ne nofo ʻo kiʻi fuoloa siʻi. 11 Pea ko e manu fekai naʻe ʻi ai ka ʻoku ʻikai ʻi ai ní,+ ko ha toe tuʻi foki ia hono valu, ka ko ʻene tupu hake mei he tuʻi ʻe fitú, pea ʻokú ne ʻalu atu ki he fakaʻauha.

12 “Ko e meʻatui ʻe hongofulu naʻá ke sio ki aí ʻokú ne fakafofongaʻi ʻa e tuʻi ʻe hongofulu ʻa ia kuo teʻeki ke nau maʻu ha puleʻanga, ka ʻoku nau maʻu ʻa e mafai ko e ngaahi tuʻi ʻi he houa ʻe taha fakataha mo e manu fekaí. 13 ʻOku maʻu ʻe he ngaahi meʻatuí ni ʻa e fakakaukau pē taha, ko ia ʻoku nau ʻave ai honau mālohí mo e mafaí ki he manu fekaí. 14 Ko e ngaahi meʻatuí ni te nau faitau mo e Lamí,+ ka koeʻuhí ko e Lamí ko e ʻEiki ia ʻo e ngaahi ʻeiki mo e Tuʻi ʻo e ngaahi tuʻi,+ te ne ikunaʻi kinautolu.+ Pehē foki, ko e faʻahinga ʻoku ʻiate ia ʻa ia kuo ui pea kuo fili ʻe he ʻOtuá mo nau faitōnunga kiate iá te nau ikuna.”+

15 Naʻá ne pehē mai kiate au: “Ko e ngaahi vai naʻá ke sio ki aí, ʻa ia ʻoku tangutu ai ʻa e fefine feʻauakí, ʻokú ne fakafofongaʻi ʻa e ngaahi kakai mo e ngaahi matakali mo e ngaahi puleʻanga mo e ngaahi lea.+ 16 Pea ko e meʻatui ʻe hongofulu+ naʻá ke sio ki aí pea mo e manu fekaí+ te nau fehiʻa ki he fefine feʻauakí+ pea te nau ʻai ia ke hoko ko e koto halaʻatā mo telefua, pea te nau keina hono kakanó pea tutu fakaʻaufuli ia ʻaki ʻa e afi.+ 17 He kuo ʻai ʻe he ʻOtuá ki honau lotó ke nau fakahoko ʻa ʻene fakakaukaú,+ ʻio, ke fakahoko ʻenau fakakaukau pē tahá ʻaki hono ʻoange honau puleʻangá ki he manu fekaí,+ kae ʻoua kuo fakahoko ʻa e ngaahi foʻi folofola ʻa e ʻOtuá. 18 Pea ko e fefine+ naʻá ke sio ki aí ʻokú ne fakafofongaʻi ʻa e fuʻu kolo lahi ʻa ia ʻokú ne maʻu ha puleʻanga ʻoku pule ki he ngaahi tuʻi ʻo e māmaní.”

18 ʻI he hili ʻa e meʻá ni, naʻá ku mamata ki ha toe ʻāngelo ʻe taha ʻoku ʻalu hifo mei hēvani fakataha mo e mafai lahi, pea naʻe maamangia ʻa e māmaní ʻi hono lāngilangí. 2 Pea naʻá ne kalanga ʻaki ha fuʻu leʻo mālohi, ʻo ne pehē: “Kuó ne tō! Kuo tō ʻa Pāpilone ko e Lahi,+ pea kuó ne hoko ko ha nofoʻanga ʻo e fanga tēmeniō pea mo e laumālie ʻuli* kotoa pē pea ko ha nofoʻanga ʻo e manupuna taʻemaʻa mo fehiʻanekinaʻi kotoa pē!+ 3 He koeʻuhí ko e uaine ʻo e holi mālohi* ʻo ʻene fehokotaki fakasino taʻetāú,* kuo maʻukovia ai ʻa e kotoa ʻo e ngaahi puleʻangá,+ pea ko e ngaahi tuʻi ʻo e māmaní naʻa nau fehokotaki fakasino taʻetaau mo ia,+ pea ko e kau mēsianiti* ʻo e māmaní naʻa nau hoko ʻo koloaʻia ko e meʻa ʻi he ngaahi meʻa mahuʻinga lahi kuo tānaki ʻe he fefiné ni. Pea ʻoku ʻikai te ne mā ʻi hono tānaki ʻo e ngaahi meʻá ni.”

4 Pea naʻá ku fanongo ki ha toe leʻo ʻe taha mei hēvani ʻoku pehē: “Hiki meiate ia, ʻe hoku kakai,+ ʻo kapau ʻoku ʻikai te mou loto ke kau fakataha mo ia ʻi heʻene ngaahi angahalá, pea kapau ʻoku ʻikai te mou loto ke maʻu ha konga ʻo hono ngaahi tauteá.+ 5 He ko ʻene ngaahi angahalá kuo fokotuʻuna ʻo aʻu hake ki he langí,+ pea ʻe fakamāuʻi ʻe he ʻOtuá ʻa ʻene ngaahi tōʻonga taʻefaitotonú.*+ 6 Totongi fakafoki kiate ia ʻo fakatatau ki heʻene tōʻongafai ki he niʻihi kehé,+ ʻio, totongi fakafoki kiate ia ʻo liunga ua koeʻuhi ko e ngaahi meʻa kuó ne faí;+ ʻi he ipu+ kuó ne huʻí, huʻi maʻana ʻo liunga ua.+ 7 Fakatatau ki he lahi ʻo ʻene fakahīkihikiʻi iá pea mo ʻene moʻui tānaki koloa taʻemā ʻoku faí, ʻoange kiate ia ʻo fakatatau ki he lahi ko iá ʻa e fakamamahi mo e mamahi. He ʻokú ne toutou pehē ʻi hono lotó: ‘ʻOku ou nofo ko ha kuini, pea ʻoku ʻikai ko ha uitou au, pea ʻe ʻikai ʻaupito te u sio ʻi he mamahí.’+ 8 Ko e ʻuhinga ia ʻe hoko mai ai ʻa hono ngaahi tauteá ʻi he ʻaho pē tahá, ʻa e maté mo e mamahí mo e hongé, pea ʻe tutu fakaʻaufuli ia ʻaki ʻa e afi,+ koeʻuhi ko Sihova* ko e ʻOtuá, ʻa ia naʻá ne fakamāuʻi iá, ʻoku mālohi.+

9 “Pea ko e ngaahi tuʻi ʻo e māmaní ʻa ia naʻa nau fehokotaki fakasino taʻetaau* mo ia pea moʻui fakataha mo ia ʻi he moʻui tānaki koloa taʻemaá te nau tangi mo tuki honau fatafatá ʻi he mamahi koeʻuhi ko ia ʻi heʻenau sio ki he kohu ʻo ʻene velá. 10 Te nau tuʻu mei he mamaʻó koeʻuhí ko ʻenau manavahē ʻi hono fakamamahiʻi iá ʻo nau pehē: ‘Fakaʻofa ē, fakaʻofa ē, ʻa koe fuʻu kolo lahí na,+ ʻa koe Pāpilone ko e kolo mālohí, koeʻuhí kuo hoko mai ho fakamāú ʻi he houa pē taha!’

11 “Pehē foki, ko e kau mēsianiti ʻo e māmaní ʻoku nau tangi mo mamahi koeʻuhi ko ia, he ʻoku ʻikai ha taha ke ne kei fakatau ʻenau uta koloá kotoa, 12 ko ha uta koloa ʻoku fonu ʻi he koula, siliva, ngaahi maka mahuʻinga, ngaahi mataʻitofe, līneni lelei, tupenu vāleti, silika, mo e tupenu kula ʻahoʻaho; mo e meʻa kotoa pē naʻe ngaohi mei he ʻakau namu-kakala; pea mo e faʻahinga meʻa kotoa pē naʻe ngaohi mei he lei, pea mei he ʻakau mahuʻinga, kopa, ukamea, pea mo e māpele; 13 pehē foki ki he sinamoni, sipaisi ʻInitia, ʻinisēnisi, lolo namu-kakala, ʻinisēnisi hinehina, uaine, lolo ʻōlive, mahoaʻa lelei, uite, fanga pulu, fanga sipi, fanga hoosi, ngaahi saliote, kau tamaioʻeiki mo e kakai. 14 ʻIo, ko e fua lelei naʻá ke holi ki aí kuo mavahe ia meiate koe, pea ko e kotoa ʻo e ngaahi meʻa vovó mo e ngaahi meʻa funganí kuo mōlia atu ia meiate koe, ʻo ʻikai ʻaupito ke toe ʻiloa.

15 “Ko e kau mēsianiti naʻa nau fakatau atu ʻa e ngaahi meʻá ni, ʻa ia naʻa nau hoko ʻo koloaʻia meiate iá, te nau tuʻu mei he mamaʻó koeʻuhi ko ʻenau manavahē ʻi hono fakamamahiʻí pea te nau tangi mo mamahi, 16 ʻo nau pehē: ‘Fakaʻofa ē, fakaʻofa ē, ʻa e fuʻu kolo lahí, ʻa ia naʻá ne kofuʻaki ʻa e līneni lelei, tupenu vāleti mo e tupenu kula ʻahoʻahó, pea naʻá ne teungaʻia ʻi he meʻa-teuteu koula mo e ngaahi maka mahuʻinga mo e ngaahi mataʻitofe,+ 17 koeʻuhí ʻi he houa pē taha kuo hoko ai ʻa e ngaahi fuʻu koloa lelei ko iá ko e koto halaʻatā!’

“Pea ko e ʻeikivaka kotoa pē mo e tokotaha folau tahi kotoa pē mo e kau kauvaka mo e faʻahinga kotoa pē ʻoku maʻu moʻui mei he ngāue ʻi tahí naʻa nau tuʻu mei he mamaʻó 18 ʻo kalanga atu ʻi heʻenau sio ki he kohu ʻo ʻene velá ʻo pehē: ‘Ko e hā ha toe kolo ʻe tatau mo e fuʻu kolo lahí ni?’ 19 Naʻa nau laku ʻa e efuefu ki honau ʻulú pea nau kalanga, ʻo nau tangi mo mamahi, ʻo pehē: ‘Fakaʻofa ē, fakaʻofa ē, ʻa e fuʻu kolo lahí, ʻa ia naʻe hoko ʻo tuʻumālie ai ʻa e faʻahinga kotoa naʻe ʻi ai honau ngaahi vaka ʻi tahí mei heʻene koloaʻiá, koeʻuhí ʻi he houa pē taha kuó ne hoko ai ko e koto halaʻatā!’+

20 “Fiefia ʻiate ia, ʻa e langí,+ mo kimoutolu foki ʻa e kakai tapú+ mo e kau ʻapositoló mo e kau palōfitá, koeʻuhi kuo fanongonongo ʻe he ʻOtuá ʻene fakamaau ʻoku fai kiate iá koeʻuhi ko kimoutolu!”+

21 Pea naʻe hiki hake ʻe ha ʻāngelo mālohi ha fuʻu maka hangē ha fuʻu maka momosí ʻo ne lī ia ki he tahí, ʻo ne pehē: “ʻE makimo pehē pē ʻa hono lī hifo ʻo Pāpilone ko e fuʻu kolo lahí, pea ʻe ʻikai ʻaupito ke toe ʻiloa ia.+ 22 Pea ʻe ʻikai ʻaupito ke toe ongona ʻiate koe, ʻe Pāpilone, ʻa e leʻo ʻo ha kau hiva ʻa ia ʻoku nau hiva mo tā ʻenau haʻapé, ha kau tā meʻalea, ha kau ifi fuluta, pea mo ha kau ifi talupite. Pea ʻe ʻikai ʻaupito toe ʻiloa ʻiate koe ha tangata nima-poto ʻokú ne fakahoko ha faʻahinga pōtoʻi ngāue pē, pea ʻe ʻikai ʻaupito toe ongona ʻiate koe ha leʻo ʻo ha maka momosi. 23 ʻE ʻikai ʻaupito toe ulo ha maama ʻiate koe, pea ʻe ʻikai ʻaupito ke toe ongona ʻiate koe ha leʻo ʻo ha tangata mali mo ha taʻahine mali; he ko hoʻo kau mēsianití naʻa nau hoko ko e kau tangata māʻolunga ʻo e māmaní, pea ʻi hoʻo ngaahi ngāue fakafaʻahikehé*+ naʻe takihalaʻi ai ʻa e ngaahi puleʻangá kotoa. 24 ʻIo, naʻe ʻilo ʻiate ia ʻa e toto ʻo e kau palōfitá pea mo e kakai tapú+ pea mo e faʻahinga kotoa kuo tāmateʻi ʻi he māmaní.”+

19 ʻI he hili ʻa e meʻá ni naʻá ku fanongo ki ha meʻa naʻe hangē ha fuʻu leʻo ʻo ha fuʻu tokolahí ʻi hēvani. Naʻa nau pehē: “Mou fakahīkihikiʻi ʻa Iā!*+ Ko e fakamoʻuí mo e lāngilangí mo e mālohí ʻoku ʻa hotau ʻOtuá ia, 2 koeʻuhí ko ʻene ngaahi fakamāú ʻoku moʻoni mo māʻoniʻoni.+ He kuó ne fakahoko ʻa hono fakamāuʻi ʻo e fuʻu fefine feʻauaki ʻa ia naʻá ne fakameleʻi ʻa e māmaní ʻaki ʻene fehokotaki fakasino taʻetāú,* pea kuó ne ʻeke ʻa e toto ʻo ʻene kau tamaioʻeikí ki he nima ʻo e fefine ko iá.”*+ 3 Pea ʻi he taimi pē ko iá ko hono tuʻo uá ia naʻa nau pehē: “Mou fakahīkihikiʻi ʻa Iā!*+ Pea ʻoku ʻalu hake ʻa e kohu mei hono tutu ʻo iá* ʻo taʻengata pea taʻengata.”+

4 Pea ko e kau mātuʻa ʻe toko 24+ mo e meʻamoʻui ʻe faá+ naʻa nau tūʻulutui hifo ʻo lotu ki he ʻOtuá, ʻa ia naʻe ʻafio ʻi he taloní, ʻo pehē: “ʻĒmeni! Mou fakahīkihikiʻi ʻa Iā!”*+

5 ʻIkai ko ia pē, naʻe ongo mai ha leʻo mei he taloní ʻo pehē: “Fakahīkihikiʻi ʻa hotau ʻOtuá, ʻa kimoutolu kotoa ʻene kau tamaioʻeikí,+ ʻa kimoutolu ʻoku manavahē kiate iá, ʻa e iiki mo e lalahi.”+

6 Pea naʻá ku fanongo ki ha meʻa naʻe ongo mai ʻo hangē ha leʻo ʻo ha fuʻu tokolahí pea naʻe hangē ha ongo mai ʻa ha ngaahi vai lahí pea naʻe hangē ko e ongo mai ʻa ha ngaahi mana mālohí. Naʻa nau pehē: “Mou fakahīkihikiʻi ʻa Iā,*+ koeʻuhí ko Sihova* ʻa hotau ʻOtuá, ʻa e Māfimafi-Aoniú,+ kuo kamata ʻa ʻene pule ko e tuʻí!+ 7 Tuku ke tau fiefia mo hākailangitau pea tau ʻoatu kiate ia ʻa e lāngilangí, koeʻuhí kuo hoko ʻa e taʻane ʻa e Lamí pea ko hono uaifí kuó ne ʻosi mateuteu atu. 8 ʻIo, kuo tuku ki hono uaifí ke ne kofuʻaki ʻa e līneni lelei, ngingila, mo maʻa—he ʻoku fakafofongaʻi ʻe he līneni leleí ʻa e ngaahi ngāue māʻoniʻoni ʻa e kakai tapú.”+

9 Pea ʻokú ne tala mai kiate au, “Tohi: Fiefia ē ka ko e faʻahinga kuo fakaafeʻi ki he kai efiafi ʻo e taʻane ʻa e Lamí.”+ ʻIkai ko ia pē, ʻokú ne toe tala mai kiate au: “Ko e ngaahi foʻi folofola moʻoni eni ʻa e ʻOtuá.” 10 ʻI he meʻa ko iá naʻá ku tūʻulutui hifo ʻi muʻa ʻi hono vaʻé ke lotu kiate ia. Ka ʻokú ne tala mai kiate au: “Tokanga! ʻOua te ke fai pehē!+ Ko aú ko ha kaungā-tamaioʻeiki pē mo koe pea mo ho fanga tokouá ʻa ia ʻoku nau maʻu ʻa e ngāue ko e faifakamoʻoni fekauʻaki mo Sīsuú.+ Lotu ki he ʻOtuá!+ He ko e faifakamoʻoni fekauʻaki mo Sīsuú ko e taumuʻa ia ʻo e ngaahi kikité.”+

11 Naʻá ku sio naʻe fakaava ʻa e langí pea vakai, tā ko ha hoosi hinehina.+ Pea ko e tokotaha naʻe heka mai aí ʻoku ui ia ko Faitōnunga+ mo Moʻoni,+ pea ʻokú ne faifakamaau mo faitau ʻi he māʻoniʻoni.+ 12 Ko hono ongo foʻi fofongá ko e uloʻi afi kakaha,+ pea ʻoku ʻi hono ʻulú ha ngaahi kalauni lahi. Kuo tohi ʻiate ia ha hingoa ʻa ia ʻoku ʻikai ʻilo ki ai ha taha ka ko ia pē, 13 pea ʻokú ne kofuʻaki ha kofu tuʻa kuo pani* toto, pea ʻoku ui ia ʻaki ʻa e hingoa, Ko e Folofola+ ʻa e ʻOtuá. 14 ʻIkai ko ia pē, ko e kau tau ʻi hēvaní naʻa nau muimui ʻiate ia ʻi ha fanga hoosi hinehina, pea naʻa nau kofuʻaki ʻa e līneni hinehina, maʻa mo lelei. 15 Pea ʻoku ʻalu atu mei hono ngutú ha heletā māsila lōloa+ ke ne taaʻi ʻaki ʻa e ngaahi puleʻangá, pea te ne puleʻi kinautolu ʻaki ha tokotoko ukamea.+ ʻIkai ngata aí, ʻokú ne malamalaki ʻa e tataʻoʻanga uaine ʻo e houhau kakaha ʻa e ʻOtua Māfimafi-Aoniú.+ 16 ʻI hono kofu tuʻá, ʻio, ʻi hono alangá, ʻoku tohi ai ha hingoa, Tuʻi ʻo e ngaahi tuʻi mo e ʻEiki ʻo e ngaahi ʻeiki.+

17 Naʻá ku toe sio foki ki ha ʻāngelo ʻoku tuʻu ʻi he laʻaá, pea naʻá ne kalanga leʻo-lahi ʻo pehē ki he kotoa ʻo e fanga manupuna ʻoku puna ʻi he langí:* “Mou omi ki heni, mou fakatahataha mai ki he fuʻu kai efiafi ʻa e ʻOtuá,+ 18 koeʻuhi ke mou kai ʻa e kakano ʻo e ngaahi tuʻi mo e kakano ʻo e kau ʻeikitau mo e kakano ʻo e kau tangata mālohi+ mo e kakano ʻo e fanga hoosi mo e faʻahinga ʻoku heka aí,+ pea mo e kakano ʻo e tokotaha kotoa, ʻa e kau tangata tauʻatāina pea pehē foki ki he kau pōpula pea mo e iiki mo e lalahi.”

19 Pea naʻá ku sio ki he manu fekaí mo e ngaahi tuʻi ʻo e māmaní mo ʻenau kau taú naʻa nau fakatahataha ke faitau mo e tokotaha ʻoku heka ʻi he hōsí pea mo ʻene kau taú.+ 20 Pea naʻe puke mai ʻa e manu fekaí fakataha mo e palōfita loi+ naʻá ne fai ʻi hono ʻaó ʻa e ngaahi mana ʻa ia naʻá ne takihalaʻi ʻaki ʻa e faʻahinga naʻa nau maʻu ʻa e fakaʻilonga ʻo e manu fekaí+ pea mo e faʻahinga ʻoku nau lotu ki hono ʻīmisí.+ Lolotonga ʻena kei moʻuí, naʻe lī fakatouʻosi kinaua ki he ano afi ʻoku ulo sūlifa.+ 21 Ka ko e toengá naʻe tāmateʻi ʻaki ʻa e heletā lōloa ʻa ia naʻe haʻu mei he ngutu ʻo e tokotaha naʻe heka ʻi he hōsí.+ Pea ko e fanga manupuná kotoa naʻa nau mākona ʻi honau kakanó.+

20 Pea naʻá ku sio ki ha ʻāngelo ʻoku ʻalu hifo mei hēvani mo e kī ʻo e luo taʻehanotakelé+ pea mo ha fuʻu sēini ʻi hono nimá. 2 Naʻá ne puke ʻa e talākoní,+ ʻa e ngata ʻo onoʻahó,+ ʻa ia ko e Tēvoló+ mo Sētané,+ peá ne haʻi ia ʻi he taʻu ʻe 1,000. 3 Pea naʻá ne lī ia ki he luo taʻehanotakelé+ ʻo ne tāpuniʻi ia pea silaʻi mei ʻolunga, koeʻuhi ke ʻoua te ne toe takihalaʻi ʻa e ngaahi puleʻangá kae ʻoua ke ngata ʻa e taʻu ʻe 1,000. ʻI he hili ʻa e meʻá ni kuo pau ke tuku ange ia ʻi ha kiʻi vahaʻa taimi.+

4 Pea naʻá ku sio ki ha ngaahi taloni, pea ko e faʻahinga naʻe nofo aí naʻe ʻoange kiate kinautolu ʻa e mafai ke faifakamaau. ʻIo, naʻá ku sio ki he faʻahinga naʻe tāmateʻi* koeʻuhi ko e fakamoʻoni naʻa nau fai fekauʻaki mo Sīsuú mo ʻenau lea ʻo fekauʻaki mo e ʻOtuá, pea ko e faʻahinga naʻe ʻikai te nau lotu ki he manu fekaí pe ko hono ʻīmisí pea naʻe ʻikai te nau maʻu ʻa e fakaʻilongá ʻi honau laʻé pea ʻi honau nimá.+ Pea naʻa nau moʻui mai ʻo pule ko e ngaahi tuʻi fakataha mo e Kalaisí+ ʻi he taʻu ʻe 1,000. 5 (Ko e toenga ʻo e kau maté+ naʻe ʻikai te nau moʻui mai kae ʻoua ke ngata ʻa e taʻu ʻe 1,000.) Ko eni ia ʻa e ʻuluaki toetuʻú.+ 6 He fiefia mo māʻoniʻoni ē ka ko ha taha pē ʻoku kau ʻi he ʻuluaki toetuʻú;+ ko e faʻahingá ni ʻoku ʻikai ha mafai+ ki ai ʻa e mate hono uá,+ ka te nau hoko ko e kau taulaʻeiki+ ʻa e ʻOtuá pea mo e Kalaisí, pea te nau pule ko e ngaahi tuʻi fakataha mo ia ʻi he taʻu ʻe 1,000.+

7 Pea ʻi he ngata pē ko ia ʻa e taʻu ʻe 1,000, ʻe tuku ange mai ʻa Sētane mei hono pilīsoné, 8 pea te ne ʻalu atu ke takihalaʻi ʻa e ngaahi puleʻanga ko ia ʻi he tuliki ʻe fā ʻo e māmaní, ʻa Koki mo Mēkoki, ke fakatahatahaʻi kinautolu ki he tau. Ko e tokolahi ʻo e faʻahingá ni ʻoku hangē ko e ʻoneʻone ʻo e tahí. 9 Pea naʻa nau laka atu ki he māmaní kotoa ʻo nau ʻātakaiʻi ʻa e ʻapitanga ʻo e kakai tapú pea mo e kolo ʻofeiná. Ka naʻe ʻalu hifo ha afi mei hēvani ʻo ne keina kinautolu.+ 10 Pea ko e Tēvoló ʻa ia naʻá ne takihalaʻi kinautolú naʻe lī ia ki he ano ʻo e afi mo e sūlifá, ʻa e feituʻu naʻe ʻosi ʻi ai fakatouʻosi ʻa e manu fekaí+ mo e palōfita loí;+ pea ʻe fakamamahiʻi* kinautolu ʻi he ʻaho mo e pō ʻo taʻengata pea taʻengata.

11 Pea naʻá ku sio ki ha fuʻu taloni lahi hinehina pea mo e Tokotaha ʻoku ʻafio aí.+ Naʻe hola mei hono ʻaó ʻa e māmaní pea mo e langí,+ pea naʻe ʻikai maʻu ha feituʻu moʻonaua. 12 Pea naʻá ku sio ki he kau maté, ʻa e lalahi mo e iiki, ʻoku nau tuʻu ʻi he ʻao ʻo e taloní, pea naʻe fakaava ʻa e ngaahi takainga tohi. Ka naʻe toe ʻi ai ha takainga tohi ʻe taha naʻe fakaava; ko e takainga tohi ia ʻo e moʻuí.+ Naʻe fakamāuʻi ʻa e kau maté mei he ngaahi meʻa ko ia naʻe hiki ʻi he ngaahi takainga tohí ʻo fakatatau ki heʻenau ngaahi ngāué.+ 13 Pea naʻe tuku mai ʻe he tahí ʻa e kau mate naʻe ʻi aí, pea ko mate mo Faʻitoka* naʻá na tuku mai ʻa e kau mate naʻe ʻiate kinauá, pea naʻe fakamāuʻi fakatāutaha kinautolu ʻo fakatatau ki heʻenau ngaahi ngāué.+ 14 Pea ko mate mo Faʻitoka* naʻe lī kinaua ki he ano afí.+ ʻOku fakafofongaʻi ʻe he ano afí+ ʻa e mate hono uá.+ 15 ʻIkai ngata aí, ʻilonga ha taha naʻe ʻikai tohi hono hingoá ʻi he tohi ʻo e moʻuí+ naʻe lī ia ki he ano afí.+

21 Pea naʻá ku sio ki ha langi foʻou mo ha māmani foʻou;+ he naʻe mole atu ʻa e ʻuluaki langí mo e ʻuluaki māmaní,+ pea ʻoku ʻikai toe ʻi ai ʻa e tahí.+ 2 Naʻá ku sio foki ki he kolo tapú, ʻa Selusalema Foʻou, ʻoku ʻalu hifo mei hēvani mei he ʻOtuá+ pea kuo teuteuʻi ia ʻo hangē ha taʻahine mali kuo teuʻi ki hono husepānití.+ 3 ʻI he meʻa ko iá naʻá ku fanongo ki ha fuʻu leʻo mei he taloní ʻoku pehē: “Vakai! Ko e tēniti ʻo e ʻOtuá ʻoku ʻi he faʻahinga ʻo e tangatá, pea te ne nofo mo kinautolu, pea te nau hoko ko ʻene kakai. Pea ko e ʻOtuá tonu te ne ʻiate kinautolu.+ 4 Pea te ne holoholo ʻa e loʻimata kotoa pē mei honau matá,+ pea ʻe ʻikai ke toe ʻi ai ha mate,+ pe ha mamahi pe ha tangi pe ha langa.+ Kuo mole atu ʻa e ngaahi meʻa muʻá.”

5 Pea ko e Tokotaha naʻe ʻafio ʻi he taloní+ naʻá ne folofola mai: “Vakai! ʻOku ou ngaohi ke foʻou ʻa e ngaahi meʻa kotoa pē.”+ Pehē foki, ʻokú ne folofola mai: “Tohi, he ko e ngaahi foʻi folofola ko ení ʻoku pau* mo moʻoni.” 6 Pea naʻá ne folofola mai kiate au: “Kuo hoko ia! Ko au ʻa e ʻĀlifá mo e ʻŌmeká,* ʻa e kamataʻangá mo e ngataʻangá.+ ʻIlonga ha taha ʻoku fieinua te u foaki taʻetotongi kiate ia ha vai mei he matavai ʻo e vai ʻo e moʻuí.+ 7 ʻIlonga ha taha ʻe ikuná te ne maʻu ʻa e ngaahi meʻá ni, pea te u hoko ko hono ʻOtua pea te ne hoko ko hoku foha. 8 Ka ko e meʻa ki he kau loto-foʻí pea mo e faʻahinga ʻoku ʻikai tuí+ pea mo e faʻahinga ʻoku fakalielia ʻenau anga-ʻulí mo e kau fakapō+ mo e kau fehokotaki fakasino taʻetāú*+ mo e faʻahinga ʻoku nau fai ʻa e ngaahi ngāue fakafaʻahikehé* mo e kau tauhi ʻaitolí pea mo e kau loí+ kotoa, ko honau ʻinasí ʻe ʻi he ano ʻoku ulo afi mo sūlifá.+ ʻOku fakafofongaʻi ʻe he meʻá ni ʻa e mate hono uá.”+

9 Ko e taha ʻo e kau ʻāngelo ʻe toko fitu naʻe ʻiate kinautolu ʻa e poulu ʻe fitú ʻa ia naʻe fonu ʻi he tautea fakamuimui ʻe fitú+ naʻá ne haʻu ʻo ne pehē mai kiate au: “Haʻu, pea te u fakahā atu kiate koe ʻa e taʻahine malí, ʻa e uaifi ʻo e Lamí.”+ 10 Ko ia naʻá ne ʻave au ʻi he mālohi ʻo e laumālié ki ha fuʻu moʻunga lahi mo māʻolunga, pea naʻá ne fakahā mai kiate au ʻa e kolo tapu ko Selusalemá ʻoku ʻalu hifo mei hēvani mei he ʻOtuá+ 11 pea ʻoku ʻi ai ʻa e lāngilangi ʻo e ʻOtuá.+ Ko ʻene huhulú naʻe hangē ha maka mahuʻinga ʻaupitó, hangē ha maka siasipa ʻoku ngingila ʻāsinisini ʻo hangē ko e kilisitalá.+ 12 Naʻe ʻi ai hano fuʻu ʻā lahi mo māʻolunga pea mo hono matapā ʻe 12 fakataha mo e kau ʻāngelo ʻe toko 12 ʻi he ngaahi matapaá, pea naʻe tohi tongi ʻi he ngaahi matapaá ʻa e hingoa ʻo e matakali ʻe 12 ʻo e ngaahi foha ʻo ʻIsilelí. 13 Naʻe ʻi he hahaké ʻa e matapā ʻe tolu, pea matapā ʻe tolu ʻi he tokelaú, pea matapā ʻe tolu ʻi he tongá, pea matapā ʻe tolu ʻi he hihifó.+ 14 Ko e ʻā ʻo e koló naʻe ʻi ai foki hono maka fakavaʻe ʻe 12, pea naʻe tuʻu ʻi he ngaahi maká ni ʻa e hingoa ʻe 12 ʻo e kau ʻapositolo ʻe toko 12+ ʻa e Lamí.

15 Pea ko e tokotaha naʻe lea mai kiate aú naʻá ne toʻo ha vaʻa kaho koula ko ha meʻafua koeʻuhi ke fua ʻaki ʻa e koló mo hono ngaahi matapaá pea mo hono ʻaá.+ 16 Pea ko e anga ʻo e tuʻu ʻa e koló ʻoku tapafā tatau, pea ko hono lōloá ʻoku lahi tatau pē mo hono fālahí. Pea naʻá ne fua ʻa e koló ʻaki ʻa e vaʻa kahó, ko e sitētia ʻe 12,000;* ko hono lōloá mo hono fālahí mo hono māʻolungá ʻoku tatau pē. 17 Naʻá ne toe fua ʻa e ʻaá, ko e kiupite ʻe 144,* ʻo fakatatau ki he fua ʻa ha tangata, pea ʻi he taimi tatau ko ha fua ia ʻa ha ʻāngelo. 18 Ko e ʻaá leva naʻe ngaohi ʻaki ʻa e siasipa,+ pea ko e koló naʻe ngaohiʻaki ʻa e koula haohaoa ʻo hangē ha sioʻata maʻa ʻāsinisiní. 19 Ko e ngaahi fakavaʻe ʻo e ʻā ʻo e koló naʻe teuteu ʻaki ia ʻa e faʻahinga maka mahuʻinga kotoa pē: Ko e ʻuluaki fakavaʻé ko e siasipa, ko hono uá ko e sāfaia, ko hono tolú ko e kalisitone, ko hono faá ko e ʻemalata, 20 ko hono nimá ko e satoniki, ko hono onó ko e sātio, ko hono fitú ko e kalisolaite, ko hono valú ko e pēlili, ko hono hivá ko e tōpasi, ko hono hongofulú ko e kelaisapaso, ko hono hongofulu-mā-tahá ko e haiasini, ko hono hongofulu-mā-uá ko e ʻametisi. 21 Pehē foki, ko e matapā ʻe 12 ko e foʻi mataʻitofe ia ʻe 12; ko e matapā taki taha naʻe ngaohiʻaki ʻa e foʻi mataʻitofe ʻe taha. Pea ko e hala lahi ʻo e koló ko e koula haohaoa, hangē ha sioʻata lanu maʻa tasiló.

22 Naʻe ʻikai te u sio ki ha temipale ʻi ai, he ko Sihova* ko e ʻOtuá ko e Māfimafi-Aoniú,+ pea mo e Lamí ʻa hono temipalé. 23 Pea naʻe ʻikai fiemaʻu ia ki he koló ʻa e laʻaá pe ko e māhiná ke ulo hifo ki ai, he naʻe maamangia ia ʻi he lāngilangi ʻo e ʻOtuá,+ pea ko e Lamí ʻa hono māmá.+ 24 Pea ʻe huluhulu ʻe hono māmá ʻa e hala ke ʻaʻeva ai ʻa e ngaahi puleʻangá,+ pea ko e ngaahi tuʻi ʻo e māmaní te nau fakalāngilangiʻi ʻa e koló. 25 Ko hono ngaahi matapaá ʻe ʻikai teitei tāpuni ia ʻi he ʻahó, he ʻe ʻikai ʻi ai ha poʻuli ia ai.+ 26 Pea te nau ʻomi ki ai ʻa e lāngilangi mo e ngeia ʻo e ngaahi puleʻangá.+ 27 Ka ʻilonga ha meʻa kuo ʻuliʻi pea ʻilonga ha taha ʻokú ne fai ʻa e meʻa ʻoku fakalielia mo kākaá ʻe ʻikai ʻaupito ke hū ia ki ai;+ ngata pē ʻiate kinautolu kuo tohi ʻi he takainga tohi ʻo e moʻuí, ʻa ia ʻoku ʻa e Lamí te nau hū ki aí.+

22 Pea naʻe fakahā mai ʻe he ʻāngeló kiate au ha vaitafe ʻo e vai ʻo e moʻuí,+ ʻoku maʻa ʻāsinisini ʻo hangē ko e kilisitalá, ʻoku tafe mai mei he taloni ʻo e ʻOtuá pea mo e Lamí+ 2 ʻi loto-mālie ʻi he hala lahi ʻo e koló. ʻI he ongo tafaʻaki ʻo e vaitafé naʻe tuʻu ai ha ʻuluʻakau ʻo e moʻuí ʻoku nau laku fua mai ʻo tuʻo 12, ʻo nau laku fua mai ʻi he māhina taki taha. Pea ko e lau ʻo e ʻuluʻakaú naʻe fakataumuʻa ia ki hono faitoʻo ʻo e ngaahi puleʻangá.+

3 Pea ʻe ʻikai ke toe ʻi ai ha mala. Ka ko e taloni ʻo e ʻOtuá pea mo e Lamí+ ʻe ʻi he koló, pea ko e kau tamaioʻeiki ʻa e ʻOtuá te nau fai kiate ia ʻa e ngāue toputapu; 4 pea te nau sio ki hono fofongá,+ pea ko hono huafá ʻe tohi ʻi honau laʻé.+ 5 Pehē foki, ʻe ʻikai ke toe ʻi ai ha poʻuli,+ pea ʻe ʻikai toe fiemaʻu kiate kinautolu ha maama pe ko e maama mei he laʻaá, he ko Sihova* ko e ʻOtuá te ne hulu kiate kinautolu ha maama,+ pea te nau pule ko e ngaahi tuʻi ʻo taʻengata pea taʻengata.+

6 Naʻá ne pehē mai kiate au: “Ko e ngaahi foʻi folofola ko ení ʻoku pau* mo moʻoni;+ ʻio, ko Sihova,* ʻa e ʻOtua naʻá ne fakamānavaʻi ʻa e kau palōfitá,+ naʻá ne fekauʻi mai ʻene ʻāngeló ke fakahā ki heʻene kau tamaioʻeikí ʻa e ngaahi meʻa kuo pau ke vavé ni ʻene hokó. 7 Vakai! ʻOku vavé ni ke u ʻalu atu.+ Fiefia ē ko ha taha ʻokú ne tauhi ʻa e ngaahi foʻi folofola ʻo e kikite ʻo e takainga tohi ko ení.”+

8 Kae kehe, ko au Sione ʻa e tokotaha naʻe fanongo mo mamata ki he ngaahi meʻa ko ení. ʻI heʻeku fanongo mo mamata ki aí, naʻá ku tūʻulutui hifo ʻi he veʻe vaʻe ʻo e ʻāngeló ke lotu kiate ia ʻa ia naʻá ne fakahā mai kiate au ʻa e ngaahi meʻa ko ení. 9 Ka ʻokú ne tala mai kiate au: “Tokanga! ʻOua te ke fai pehē! Ko aú ko ha kaungā-tamaioʻeiki pē mo koe pea mo ho fanga tokouá ko e kau palōfitá pea mo e faʻahinga ʻoku nau tauhi ʻa e ngaahi foʻi folofola ʻo e takainga tohi ko ení. Lotu ki he ʻOtuá.”+

10 ʻOkú ne toe tala mai kiate au: “ʻOua te ke silaʻi ʻa e ngaahi foʻi folofola ʻo e kikite ʻo e takainga tohi ko ení, he ʻoku ofi ʻa e taimi kotofá. 11 Tuku ki he tokotaha ʻoku taʻeangatonú ke ne hokohoko atu ʻi he taʻeangatonú, pea tuku ki he tokotaha ʻoku anga-ʻulí ke ne hokohoko atu ʻi heʻene anga-ʻulí; kae tuku ki he tokotaha ʻoku anga-tonú ke ne hokohoko atu ʻi he anga-tonú, pea tuku ki he tokotaha ʻoku māʻoniʻoní ke ne hokohoko atu ʻi he māʻoniʻoní.

12 “‘Vakai! ʻOku vavé ni ke u ʻalu atu, pea ko e totongi ʻoku ou foakí ʻoku ʻiate au, ke totongi ki he tokotaha taki taha ʻo fakatatau ki heʻene ngāué.+ 13 Ko au ʻa e ʻĀlifá mo e ʻŌmeká,*+ ʻa e ʻuluakí mo e fakamuimuí, ʻa e kamataʻangá mo e ngataʻangá. 14 Fiefia ē ko e faʻahinga ʻoku nau fō honau ngaahi kofu tōtōlofá,+ koeʻuhi ke nau maʻu ʻa e totonu ke nau kai mei he ʻuluʻakau ʻo e moʻuí+ pea ke nau lava ke hū ki he koló ʻo fou atu ʻi hono ngaahi matapaá.+ 15 ʻI tuʻá ʻoku ʻi ai ʻa e fanga kulií* mo e faʻahinga ʻoku nau fai ʻa e ngāue fakafaʻahikehé* pea mo e kau fehokotaki fakasino taʻetāú* mo e kau fakapoó mo e kau tauhi ʻaitolí pea mo e tokotaha kotoa pē ʻoku ʻofa ki he loí mo tōʻongaʻaki iá.’+

16 “‘Ko au, Sīsū, naʻá ku fekau atu ʻeku ʻāngeló ke fakamoʻoni kiate kimoutolu ʻo fekauʻaki mo e ngaahi meʻa ko ení ki he ngaahi fakatahaʻangá. Ko au ʻa e aka pea mo e hako ʻo Tēvitá+ pea ko e fetuʻu pongipongi ʻoku ngingila.’”+

17 Pea ko e laumālié mo e taʻahine malí+ ʻokú na toutou pehē, “Haʻu!” Pea tuku ki ha taha pē ʻoku fanongó ke ne pehē, “Haʻu!” Pea tuku ki ha taha pē ʻoku fieinuá ke ne haʻu;+ tuku ki ha taha pē ʻokú ne loto ki aí ke ne toʻo taʻetotongi ʻa e vai ʻo e moʻuí.+

18 “ʻOku ou fakamoʻoni ki he tokotaha kotoa pē ʻoku fanongo ki he ngaahi foʻi folofola ʻo e kikite ʻo e takainga tohi ko ení: Kapau ʻe fai ʻe ha taha ha tānaki fakalahi ki he ngaahi meʻá ni,+ ʻe tānaki fakalahi atu ʻe he ʻOtuá kiate ia ʻa e ngaahi tautea kuo hiki ʻi he takainga tohi ko ení;+ 19 pea kapau ʻe toʻo ʻe ha taha ha meʻa mei he ngaahi foʻi folofola ʻo e takainga tohi ʻo e kikite ko ení, ʻe toʻo ʻe he ʻOtuá hono ʻinasí mei he ʻuluʻakau ʻo e moʻuí+ pea mei he kolo tapú,+ ʻa e ngaahi meʻa kuo fai ʻa e tohi fekauʻaki mo ia ʻi he takainga tohi ko ení.

20 “Ko e tokotaha ʻoku fakamoʻoni ki he ngaahi meʻá ni ʻokú ne pehē, ‘ʻIo, ʻoku vavé ni ke u ʻalu atu.’”+

“ʻĒmeni! Hāʻele mai, ʻEiki Sīsū.”

21 Fakatauange ke hoko ʻa e ʻofa maʻataʻatā ʻa e ʻEiki ko Sīsuú ʻo ʻi he kakai tapú.