“Hake ʻUta ʻa e Foʻi Palanité”—ʻOku ʻI Ai ha Tali ki Ai?

Ko e tokolahi fakakātoa ʻo e foʻi kolopé naʻe aʻu ki he toko tolu pilioná ʻi he 1960. ʻI he aʻu mai ki he taʻu 2000, naʻe liunga ua ai ʻa e tokolahi ko iá. “Ko e fuʻu tokolahi fau ʻa e faʻahinga ʻo e tangatá ʻoku tupulaki ʻaki ʻa e foʻi fanau foʻou ʻe nima ʻi he sekoni kotoa pē,” ko e lau ia ʻa e nusipepa ko e Vancouver Sun. Ko e māmaní he taimí ni ʻoku ʻi ai ʻa e ngaahi kolo lalahi ʻe 23 ʻa ia ko hono tokolahí ʻoku laka hake ʻaki ʻa e kau nofo ʻe toko hongofulu miliona, pea ʻi he aʻu ki he 2025 ʻoku fakafuofua ʻe aʻu ʻa e tokolahi ʻo e māmaní ki he toko hongofulu pilioná!

ʻOku fakahaaʻi ʻe he kau saienisí ʻa e hohaʻa fekauʻaki mo e palopalema ʻe fakatupunga ʻe he tupu ko iá ʻi he ngaahi fevilotakaiʻaki ʻi natula kuo ʻosi pelepelengesi ʻo e foʻi māmaní. ʻOku fiemaʻu ʻe he tangataʻifonua foʻou taki taha ʻo e foʻi māmaní ʻa e meʻakai, vai mo e nofoʻanga pea ʻi he tupu ʻa e tokolahi ʻo e kakaí, ʻoku fakautuutu ai ʻa hono fakaʻaongaʻí pea mo e vevé. Ko e palopalemá ʻa hono puleʻi ko ia ʻo e tupu taʻemapuleʻi ʻo e ngaahi kolo lalahí. Fakatatau ki he Sun, ko e ngaahi kolo lalahi ko ení ʻoku nau ‘ngāueʻaki ʻa e ngaahi maʻuʻanga tokoni mei he ngaahi feituʻu ʻuta lalahí pea ngaohiʻaki ia ʻa e ngaahi veve kona lahi fakaʻulia.’

ʻOku ʻi ai ha tali ki he meʻa kuo ui ko e “hake ʻuta ʻa e foʻi palanité?” ʻOku fakafiefiá, he ʻoku talaʻofa ʻe he Tohitapú ʻe kau mai ʻa e ʻOtuá ʻi he ngaahi meʻa ʻa e tangatá. Ako ki he founga te ne fakahoko ai ení pea mo hono ikuʻangá. ʻOku malava ke ke fai pehē ʻaki hono maʻu ʻa e tohi ʻIlo ʻA Ia ʻOku Taki Atu ki he Moʻui Taʻengatá. ʻOku mau fakaafeʻi atu koe ke ke kole ki ha tatau ʻaki hono fakafonu ʻa e kūponi ʻoku ʻoatu hení pea lī ia ki he tuʻasila ʻoku fakahāʻí pe ki ha tuʻasila feʻungamālie ʻa ia ʻoku fakahokohoko ʻi he peesi 5 ʻo e makasini ko ení.

□ ʻOmai kiate au ha tatau ʻo e tohi ʻIlo ʻA Ia ʻOku Taki Atu ki he Moʻui Taʻengatá.

□ Kātaki, fetuʻutaki mai kiate au fekauʻaki mo ha ako Tohitapu taʻetotongi ʻi ʻapi.