“ʻI he Taimi ʻe Niʻihi ʻOku Ou Fakakaukau ʻOku Ou Misi!”
ʻOku sio fakamamaʻu ʻa Loti ki he koló mei he matapā sioʻata ʻi hono ʻapaatimení, ʻo ne puke ʻa hono ngutú ʻoku tete. Ko ha fefine ʻAmelika Latina ia naʻá ne faingataʻaʻia ʻi he ngāue ʻa ʻAlifeleti, ko hono husepāniti anga-fakamālohí, ʻo laka hake ʻi he taʻu ʻe 20. Naʻe ueʻi ʻa ʻAlifeleti ke liliu. Neongo ia, ʻoku kei faingataʻa pē kia Loti ke ne lea fekauʻaki mo e mamahi fakaesino mo fakaeongo naʻá ne kātekiná.
“Naʻe hoko ia ʻi he uike pē ʻe ua hili ʻema malí,” ko e lea leʻo-siʻi ia ʻa Lotí. “ʻI he taimi ʻe taha, naʻá ne tukiʻi ai ʻo tō hoku foʻi nifo ʻe ua. ʻI he taimi ʻe taha naʻá ku kalo ai, pea naʻe haveʻi ʻe hono tuké ha kōpate tukuʻanga vala. Ka ko e ngaahi hingoa naʻe uiʻaki aú naʻe fakalotolavea lahi angé. Naʻá ne ui au ko e ‘veve taʻeʻaonga’ pea ngaohi au ʻo hangē naʻe ʻikai haku ʻatamaí. Naʻá ku loto ke mavahe, ka ʻe lava fēfē ke u fai ia mo e fānau ʻe toko tolú?”
ʻOku ala fakaalaala atu ʻa ʻAlifeleti ki he uma ʻo Lotí. “Ko aú ko ha tokotaha ngāue fakapalōfesinale māʻolunga,” ko ʻene leá ia. “Naʻá ku ongoʻi mā ʻi hono ʻomai kiate au ha tikite hopo mo ha tuʻutuʻuni maluʻi fakaefakamaauʻanga. Naʻá ku feinga ke liliu, ka naʻá ku toe fai vave pē ʻa e meʻa tatau.”
Naʻe anga-fēfē ʻa e liliu ʻa e ngaahi meʻá? “Ko e fefine ʻi he falekoloa he tulikí ko e taha ia ʻo e Kau Fakamoʻoni ʻa Sihová,” ko e fakamatala ia ʻa Lotí, ʻo hā mahino ʻa ʻene fiemālie ange he taimi ko ení. “Naʻá ne fokotuʻu mai ke ne tokoniʻi au ke u mahinoʻi ʻa e Tohitapú. Naʻá ku ʻiloʻi ai ʻoku mahuʻingaʻia ʻa Sihova ko e ʻOtuá ʻi he kakai fefiné. Naʻá ku kamata maʻu ʻa e ngaahi fakataha ʻa e Kau Fakamoʻoni ʻa Sihová, neongo ia ʻi he ʻuluaki taimí naʻá ne ʻai ʻa ʻAlifeleti ke ʻita lahi. Ko ha meʻa foʻou ia kiate au ke hokosia ʻa e fakamoleki ha taimi mo e ngaahi kaungāmeʻá ʻi he Fale Fakatahaʻangá. Naʻá ku ʻohovale ai ʻi he ʻiloʻi ʻe lava ke u maʻu ʻeku tui pē ʻaʻaku, fakahaaʻi tauʻatāina ia, pea aʻu ʻo akoʻi ia ki he niʻihi kehé. Naʻá ku ʻiloʻi ai ʻoku mahuʻingaʻia ʻa e ʻOtuá ʻiate au. Naʻe ʻomai ʻe he meʻá ni kiate au ʻa e loto-toʻa.
“Naʻe ʻi ai ha tuʻunga mahuʻinga ʻe ʻikai ʻaupito ngalo ʻiate au. Naʻe kei maʻu ʻe ʻAlifeleti ʻa e Misa ʻa e Katoliká ʻi he Sāpate taki taha, pea naʻá ne fakafepaki ki he meʻa naʻá ku fai mo e Kau Fakamoʻoni ʻa Sihová. Naʻá ku sio hangatonu atu kiate ia peá u lea mokomoko ange ka ʻi he tuipau: ‘ʻAlifeleti, ko e meʻa ʻokú ke fakakaukau ki aí ʻoku ʻikai ko e meʻa ia ʻoku ou fakakaukau ki aí.’ Pea naʻe ʻikai te ne taaʻi au! ʻIkai fuoloa mei ai, naʻá ku papitaiso, pea naʻe ʻikai ʻaupito te ne toe taaʻi au talu mei he taʻu ʻe nima ko iá.”
Ka naʻe pau ke hoko mai ha ngaahi liliu lahi ange. ʻOku fakamatala ʻa ʻAlifeleti: “Hili e taʻu ʻe tolu nai mei he papitaiso ʻa Lotí, ko ha kaungāngāue ʻa ia ko e taha ʻo e Kau Fakamoʻoni ʻa Sihová naʻá ne fakaafeʻi au ki hono falé, pea naʻá ne fakamatalaʻi mai ha ngaahi meʻa fakamānako kiate au mei he Tohitapú. ʻI he ʻikai tala ki hoku uaifí, naʻá ku kamata ke ako Tohitapu mo ia. Naʻe vave leva ʻa ʻeku ʻalu fakataha mo Loti ki he ngaahi fakatahá. Ko e ngaahi malanga lahi naʻá ku fanongo aí naʻe fekauʻaki ia mo e moʻui fakafāmilí, pea naʻe faʻa ʻai au ʻe he ngaahi malangá ni ke u ongoʻi mā.”
Naʻe maongo kia ʻAlifeleti ʻa e sio ki he kau mēmipa ʻo e fakatahaʻangá, ʻo kau ai ʻa e kakai tangatá, ʻoku nau tafi ʻa e falikí hili ʻa e ngaahi fakatahá. ʻI heʻene ʻaʻahi ki honau ngaahi ʻapí, naʻá ne sio ai ki he ngaahi husepānití ʻoku nau tokoni ki honau ngaahi uaifí ʻi hono fufulu e ipú. Ko e fanga kiʻi meʻa iiki ko ení naʻe fakahāhā ai kia ʻAlifeleti ʻa e anga hono fakahaaʻi ʻo e ʻofa moʻoní.
ʻI ha taimi nounou mei ai, naʻe papitaiso ʻa ʻAlifeleti, pea ʻi he taimi ní ko ia mo hono uaifí ʻokú na ngāue ko e ongo faifekau taimi-kakato. “ʻOkú ne faʻa tokoni kiate au ʻi hono fakamaʻa ʻa e tēpilé he hili ʻa e ngaahi houa kaí mo ngaahi ʻa e ʻū mohengá,” ko e lau ia ʻa Lotí. “ʻOkú ne fakaongoongoleleiʻi au ʻi heʻeku feimeʻatokoní, pea ʻokú ne fakaʻatā au ke u fai ha ngaahi fili—hangē ko e faʻahinga fasi te u saiʻia ke fanongo ki aí pe ko e ngaahi meʻa ke ma fakatau mai ki he falé. Ko e ngaahi meʻa eni ne ʻikai ʻaupito teitei fai ia ʻe ʻAlifeleti ki muʻa! Ki muí ni mai, ko e ʻuluaki taimí ia, naʻá ne fakatau mai ai maʻaku ha haʻinga matalaʻiʻakau. ʻI he taimi ʻe niʻihi ʻoku ou fakakaukau ʻoku ou misi!”
[Fakatātā ʻi he peesi 10]
“Naʻá ku ʻiloʻi ʻoku mahuʻingaʻia ʻa e ʻOtuá ʻiate au. Naʻe ʻomai ʻe he meʻá ni kiate au ʻa e loto-toʻa”
[Fakatātā ʻi he peesi 10]
Naʻe maongo kia ʻAlifeleti ʻa e sio ki he kau mēmipa ʻo e fakatahaʻangá, ʻo kau ai ʻa e kakai tangatá, ʻoku nau tafi ʻa e falikí hili ʻa e ngaahi fakatahá
[Fakatātā ʻi he peesi 10]
Naʻá ne sio ki he ngaahi husepānití ʻoku nau tokoni ki honau ngaahi uaifí ʻi hono fufulu ʻa e ipú
[Fakatātā ʻi he peesi 10]
“Ki muí ni mai, ko e ʻuluaki taimí ia, naʻá ne fakatau mai ai maʻaku ha haʻinga matalaʻiʻakau”