Ngāue Fakapotopotoʻaki ʻa e Foʻiʻakau Fakafaitoʻó
MEI HE TOKOTAHA-TOHI ʻĀ HAKE! ʻI ʻAFILIKA TONGA
ʻI HONO hiki ʻe hoʻo toketaá ʻa e fakahinohino ki he foʻiʻakau fakafaitoʻó, ʻokú ne fai taʻetoeveiveiua ia ʻi he ngaahi taumuʻa lelei, ʻo makatuʻunga ʻa ʻene fakahinohinó ʻi heʻene fakafuofua ki he mahakí, ʻilo fakafaitoʻó mo ʻene taukeí. Ka neongo ia, ʻoku ʻikai totonu ke ʻamanekina ʻe he tokotaha mahakí ʻa ʻene toketaá ʻoku fakafatongia kakato ia ki heʻene moʻuileleí. ʻOku kei ʻi he tokotaha mahakí pē ʻa e fatongia ki he meʻa ʻokú ne ngāueʻaki ki hono sinó.
ʻI hono ngāueʻaki ʻa e ngaahi faitoʻo kuo fakahinohino maí, vakai ki he ngaahi tataki ʻaonga ko ení mei ha toketā fakafaitoʻo:
● Ko e ngaahi foʻiʻakau kotoa pē ʻoku ʻi ai hono ngaahi uesia kehe. ʻOku ʻi ai ʻa hoʻo totonu ke ʻilo ki he faitoʻo ʻoku fakahinohinoʻi atú pea mo hono ngaahi uesia kehé. Kapau ʻoku ʻikai ke ʻoatu ʻe hoʻo toketaá ʻa e fakamatala ko ení, ʻoua ʻe toumoua ke ʻeke. ʻI he tuʻunga lahi tahá, ko hono ngaahi ʻaongá te ne lakasi ʻe ia ʻa hono ngaahi uesia kehé. Ka ʻoku fiemaʻu ke ke ʻiloʻi ia kae lava ai ke ke fai ha fili fakapotopoto.
● ʻOku uesia ʻe he foʻiʻakaú ʻa e tokotaha taki taha ʻi he tuʻunga kehekehe. Heʻikai lava ʻe hoʻo toketaá ke tomuʻa fakahaaʻi tonu atu ʻa e founga ʻe uesia ai koe ʻe ha foʻiʻakau ʻoku ʻoatu. Kapau ʻokú ke hoko ʻo hohaʻa ʻi he ngaahi uesia kehe taʻeʻamanekiná, fetuʻutaki ki hoʻo toketaá.
● Feinga ke ʻiloʻi ʻa e fuoloa ʻe fiemaʻu ke ke ngāueʻaki ai ʻa e faitoʻó. Toe fakapapauʻi pe ʻoku ala fakatupu maʻunimā ia.
● Fakaʻehiʻehi mei haʻo fili ʻiate koe pē ke taʻofi ʻa hono ngāueʻaki ha faitoʻo, koeʻuhi nai ko haʻo ongoʻi sai. Ko hano taʻofi vave ʻa e faitoʻó te ne ʻai ai ke toe kovi ange ʻa ho tuʻungá. ʻI hono kehé, tomuʻa fetuʻutaki ki hoʻo toketaá.
● Ngāueʻaki maʻu pē ʻa e faitoʻo kuo fakahinohinoʻí ʻi he malumalu ʻo e fakahinohino ʻa e toketaá.