Ko e Moʻui Fakafāmili Fiefiá ʻOku Malava Ia!
KO HA fefine mei he kolo ko Maladzyechna, ʻi Pelālasi, naʻá ne tohi ki he ʻōfisi vaʻa ʻo e Kau Fakamoʻoni ʻa Sihova ʻi Lūsiá. Naʻá ne fakamatala ʻoku ʻi ai hono husepāniti mo e fānau ʻe toko ua. Naʻá ne tohi: “Ko hoku husepānití mo au ʻokú ma feʻofaʻaki. Kae kehe, naʻá ku fakatokangaʻi ko e fuoloa ange ʻema nofo fakatahá, ko e lahi ange ia ʻema palopalemaʻiá mo e fakakikihí, ʻo hā ngali taʻeʻiai ha ʻuhinga ʻe taha. ʻI ha ngaahi māhina siʻi kuo maliu atú, naʻe taʻofi mai ai au ʻe ha sola ʻi he halá ʻo ʻomai kiate au ha tuleki naʻe fakakaveinga ko e Fiefia ʻi he Moʻui Fakafāmili. ʻUluakí, naʻe tohoakiʻi ʻeku tokangá ki he fakatātā fakaʻofoʻofa ʻo ha fāmili fiefia. Ki mui ai, naʻá ku lau ʻa e fakamatalá pea ʻoange ia ki hoku husepānití ke ne lau.
“ʻI he hangē ha maná, kuo ʻikai ngata pē ʻi he fakalakalaka ʻema moʻui fakafāmilí, ka te u pehē, kuo liliu fakaʻaufuli ia. ʻOkú ma mahinoʻi he taimí ni ko e hoko ʻo fiefiá ʻoku ʻikai ke fuʻu faingataʻa ia. Ko e meʻa pē ʻoku fiemaʻú ko ha kiʻi foaki fakamātoato loto-māfana, mo ongoʻi mei he lotó. Ko e meʻa ʻoku fiemaʻú ke moʻui ʻo fakatatau ki he ngaahi fekau ʻa e ʻOtuá, ke ʻofa ki he ʻOtuá pea ʻofa ki he kakaí, ʻo kau ai ʻa e fāmilí mo e kau solá.”
Naʻá ne fakaʻosiʻaki: “Kuo hoko ʻa e moʻuí ʻo faingofua ange mo fakafiefia ange. ʻOkú ma loto ke hokohoko atu ke ako ʻa e Tohitapú pea ke akoʻi ʻa ʻema fānaú.”
ʻOku mau tui ko koe foki ʻe lava ke ke maʻu ʻaonga mei he tuleki Fiefia ʻi he Moʻui Fakafāmili. Te mau fiefia foki ke fakakau ai ʻa e tohi peesi 192 ʻoku fakakaveinga Ko e Fakapulipuli ʻo e Fāmili Fiefiá. Ki haʻo tatau fakatouʻosi ʻo e tulekí mo e tohí, kātaki ʻo fakafonu ʻa e kūponi ʻoku ʻoatu hení pea lī ia ki he tuʻasila ʻoku ʻoatu ʻi he kūponí pe ki ha tuʻasila feʻungamālie ʻa ia ʻoku fakahokohoko ʻi he peesi 5 ʻo e makasini ko ení.
□ ʻOmai muʻa kiate au ha tatau ʻo e tuleki Fiefia ʻi he Moʻui Fakafāmili pea mo e tohi Ko e Fakapulipuli ʻo e Fāmili Fiefiá.
□ Kātaki fetuʻutaki mai kiate au ʻo fekauʻaki mo ha ako Tohitapu taʻetotongi ʻi ʻapi.