Maluʻi ʻe Hono Keté!

ʻOKU ʻikai ke ngaʻunu vave ia. ʻOku ʻikai ʻaupito fakaʻofoʻofa ia ki he kakai tokolahi. Ka, ʻoiauē, he kete ngalikehe moʻoni ia ʻokú ne maʻú! Ko e hā ʻoku tau talanoa ki aí? Ko e sokisoki talatalá, ʻa ia ʻoku toe ui ko e ika hangē ha foʻi pulá pea ko e ika pokiupaine tala-loloá. ʻI hono ʻai ke ilifiá, ko e meʻamoʻuí ni ʻokú ne “fakahoko ai ha liliu fakaʻulia,” ko e lau ia ʻa e makasini Natural History. Ko hono sinó, ʻa ia ʻoku tupu ʻo aʻu ki he senitimita nai ʻe 50 hono lōloá, ʻoku pupula ia “kae ʻoua kuo aʻu ʻa e iká ki he liunga tolu ʻo hono lahi anga-mahení pea hoko ʻo meimei fuopotopoto mo fefeka, pea ʻufiʻufi takatakai ʻe he teunga maluʻi talatalá—ʻikai ko ha tisaini lelei ia ki he kakaú ka ʻoku fakalotosiʻi papau ia ki hono kau ʻohofí.”

ʻOku pupula ʻa e iká ʻiate ia pē ʻaki hono pamu ʻa e vai ki hono loto keté, ʻa ia ʻoku pupula ia ki he meimei liunga teau ʻo e lahi anga-mahení! ʻOku fakahoko ʻe he sokisokí ʻa e ngāue fakaofo ko ení fakafou ʻi ha foʻi fakakaukau faingofua mo lelei ʻaupito—ko e ngaahi pelu.

Ko hono moʻoní, ko e kete ʻo e sokisokí ʻoku ʻi ai ʻa e ngaahi foʻi pelu ʻi loto ʻi ha ngaahi pelu, ko e fakamatala ia ʻa e Natural History. Ko e ngaahi pelu lalahi tahá ko hono laulahí ʻoku milimita ʻe 3 nai “fakataha mo e toe ngaahi pelu iiki ange ʻi loto ʻi he foʻi pelu taki taha, ʻo hokohoko pehē atu ai pē, ʻo aʻu ki he ngaahi foʻi pelu mātuʻaki valevale ʻa ia ʻe toki lava pē ke sio ki ai ʻi ha meʻa fakaʻata siemu,” ko e lau ia ʻa e kupú.

Ko e moʻoni, ko e kili ʻo e sokisokí kuo pau ke pupula atu ia fakataha mo hono keté. Ke fakahoko iá, ko e kilí, ʻa ia ʻoku faʻuʻaki ʻa e ʻotu ʻe ua, ʻokú na ngāueʻaki ʻa e meʻa tefito kehekehe ʻe ua. ʻI he meimei tatau mo e keté, ko e ʻotu ʻi lotó ʻoku pelu ia, ka ko e ʻotu ʻi tuʻá ʻoku fano. Ko e ʻufiʻufi fano ko ení ʻokú ne taʻofi ʻa e kilí mei heʻene hoko ʻo mingimingí, ʻa ia ʻokú ne fakavaivaiʻi ai ʻa e malava ke ngaʻunu vavé ʻi he taimi ʻoku holo hifo ai ʻa e sokisokí ki hono lahi totonú.

Ka ke tuli ʻa e ngaahi meʻa te nau kai iá, ʻoku fai ʻe he sokisokí ia ʻa e meʻa lahi ange ʻi he pupula peé. ʻI heʻene mafao ʻa hono sinó, ko hono teunga maluʻi talatalá ʻoku ngaue vave ia ʻo tuʻu hangatonu. Ko ia kapau ʻokú ke sio ki ha sokisoki lolotonga hoʻo uku ʻi he fukahi tahí, ʻoua ʻe ala ki ai! Pea tokanga foki fekauʻaki mo hono ngutú; ʻe lava ke ne uʻu ʻo aʻu ki he huí!

ʻI he taimi naʻe fakafehuʻi ai ʻe he ʻOtuá ʻa Siope fekauʻaki mo ʻEne ngaahi meʻamoʻuí, naʻe tali ʻe Siope: “ʻOku ou ʻilo ʻoku ke mafai ʻa e meʻa kotoa pe, pea ʻoku ʻikai haʻo fakakaukau ʻe ala taʻofia.” (Siope 42:2) ʻIo, naʻa mo e kiʻi sokisoki talatala tapotopotó, ʻa ia ʻe faingataʻa ke ne ikuna ʻi ha lova pe ko ha feʻauhi sivi talavoú, ʻokú ne ʻomai ʻo tatau ai pē ʻa e fakamoʻoni hulu fau ki he mālohi mo e poto fakaefakatupu ʻo e ʻOtuá.​—Loma 1:​20.

[Fakatātā ʻi he peesi 30]

ʻOlungá: Photo by John E. Randall; laló: © Jeff Rotman