Fotofota ki he Pēpeé?
MEI HE TOKOTAHA-TOHI ʻĀ HAKE! ʻI SIPEINI
KO Anita, ko ha faʻē kei siʻi ia mei Naisīlia, ʻokú ne kaukauʻi ʻa ʻene pēpeé pea fotofota fakaalaala ia. Ko e faʻeé mo e pēpeé fakatouʻosi ʻokú na fiefia lahi ai. “Ko ha tōʻonga tukufakaholo eni ki he ngaahi faʻē Naisīliá ʻi hono tokangaʻi ʻo ʻenau fanga kiʻi pēpeé,” ko e fakamatala ia ʻa Anita. “Ko ʻeku faʻeé tonu naʻá ne faʻa fotofota au mo hoku fanga kiʻi tuongaʻané. Ko e fotofotá ko ha founga lelei ʻaupito ia ki hono ʻai ke mālohi ʻa e ngaahi uoua ʻo e pēpeé mo ʻai ia ke ne ongoʻi nonga. Lolotonga hono fotofota ʻeku pēpeé, ʻoku ou hiva mo talanoa kiate ia, pea ʻokú ne fakatalanoa mai mo malimali. Ko ha hokosia fisifisimuʻa ia!”
Ko e fotofota ʻo e fanga kiʻi valevalé ʻoku failahia ia ʻi he ngaahi fonua lahi, pea ʻoku hoko ia ʻo manakoa ʻi he ngaahi fonua ʻe niʻihi ʻi he Hihifó. Fakatatau ki he Kautaha Sipeini ki he Fotofota ʻo e Kau Valevalé, ko e fotofotá ko ha founga fakafiemālie, fakaalaala mo lelei ia ʻokú ne ʻai ke malava ai ha mātuʻa ʻo fetuʻutaki fakaesino mo fakaeongo mo e pēpeé. ʻOku kau ki ai ha amoamo molū mo hokohoko ʻa e ongo vaʻe mo e alanga ʻo e pēpeé pea pehē ki hono tuʻá, fatafatá, keté, nimá mo e matá.
Ko e hā e ʻaonga ʻoku maʻu ʻe he pēpeé mei ha fotofotá? Hiliō he meʻa kotoa, ʻoku ʻi ai ha ongoʻi ʻofa mo e tokanga fakaalaala. Ko ha pēpē toki fanauʻi ʻoku ʻikai ngata pē ʻi heʻene fiemaʻu ke fafangaʻi iá ka ʻokú ne toe fiemaʻu foki ke maʻu ʻa e ʻofa fakaemātuʻá. Koeʻuhi ko e ongoʻanga ʻo e alá ʻoku hoko tōmuʻa ia ʻi he moʻuí, ko e fotofota fakaalaala ʻe he faʻeé pe ko e tamaí ʻokú ne fakafetuʻutaki ai ʻa e ʻofá ni ʻi ha founga ʻoku lava ke ʻiloʻi. Ko e fakamatala lahi—fakaesino mo fakaeongó—ʻe lava ke ʻoatu ia ki ha pēpē. Ko ia ʻoku lava ai ke tokoni ʻa e fotofotá ki hono fakafefekaʻi ʻa e haʻi ʻo e ʻofá ʻi he vahaʻa ʻo e ongo mātuʻá mo ʻena pēpeé ʻi he hili pē hono fanauʻí.
Tuku kehe ʻa hono fakahāhā ʻo e ʻofá, ko e fotofotá ʻoku lava ke akoʻi ai ha pēpē ke nonga, ʻa ia ʻe tokoni nai ia ke mohe lelei lōloa ange ai pea siʻi ʻene hohaʻá. ʻE toe tokoni nai ʻa e fotofotá ki hono ʻai ke mālohi ʻa e ngaahi uouá pea pehē ki heʻene tokoni ki he ngāue ʻa e halanga totó, fakamolū-meʻakaí mo e halanga mānavá. ʻOku taukaveʻi ʻe he kakai ʻe niʻihi ʻoku toe ʻaonga foki ia ki he sisitemi maluʻi ʻo e kiʻi valevalé. Pea koeʻuhi ʻoku ueʻi ai ʻa e ngaahi ongoʻanga ʻo e alá, sió mo e fanongo ʻa e pēpeé, ʻe toe tokoni ʻa e fotofotá ki he manatú mo e tokangá.
Kuo toe fakatotolo foki ʻa e ngaahi falemahaki ʻe niʻihi ki he mahuʻinga ʻo e fotofota ʻo e kau valevalé. Ko e fakatātaá, kuo ʻiloʻi ʻi he fakatotolo ʻe taha ko e fanga kiʻi pēpē taʻehoko ʻa ia naʻe fotofotá naʻe lava ke nau ʻatā mei he falemahakí ʻo aʻu ki he ʻaho ʻe fitu ki muʻa ange ʻi he fanga kiʻi pēpē naʻe ʻikai ke fotofotá, pea naʻe tupu lahi ange ʻa honau mamafá ʻo aʻu ki he peseti ʻe 47 ʻi hono fakahoa ki he fanga kiʻi pēpē ko ē naʻe ʻikai fotofotá.
ʻOku hā mahino ʻoku ʻikai ko e kakai lalahí pē ʻa e faʻahinga ʻoku maʻu ʻaonga mei ha fotofota leleí! Ko e moʻoni, ki he fanga kiʻi pēpeé ko e fotofotá ʻoku mahulu atu ia ʻi ha milimili pē. Ko e ʻofa ia ʻoku fakahaaʻi ʻe he ongo nima māfana mo fakaalaala, ʻo ʻalu fakataha mo e malimali.