Ngaahi Siasí​—Ko ʻEnau Huʻú ki Fē?

KO E HĀ ʻoku hoko ki he ngaahi siasi “Kalisitiané”? ʻI he feituʻu ʻokú ke nofo aí, ʻoku nau hōloa ai pe lakalakaimonū? ʻOkú ke fanongo nai ʻi he taimi ki he taimi ki he haʻu mei he ngaahi feituʻu hangē ko ʻAfilika, ʻAmelika mo ʻIulope Hahake ʻa e ngaahi taukaveʻi ʻo e toe fakaakeake, mo e ngaahi līpooti ʻo e ngaahi fakatahaʻanga ʻoku tupu fakautuutu. Neongo ia ko e ngaahi fakamatala ʻi he ongoongó mei he ngaahi tapa kehe ʻo e māmaní, tautefito ki ʻIulope Hihifo, ʻoku fakamatala ai ki he ngaahi fale lotu kuo tāpuni, ngaahi fakatahaʻanga kuo tokosiʻi ange mo e mafolalahia ʻa e taʻemahuʻingaʻia ʻi he lotú.

Koeʻuhi ko e hōloa ʻa e kau maʻu lotú, kuo liliu ai ʻe he ngaahi siasi ʻe niʻihi ʻenau foungá. ʻOku fanongonongo ʻe he ngaahi siasi ʻe niʻihi ko kinautolú ʻoku “ʻikai te nau faifakamaau,” ʻo nau fakahuʻunga ai ʻoku tali ʻe he ʻOtuá ia ha faʻahinga ʻulungāanga pē. ʻOku fakautuutu hono tuʻuaki ʻe he ngaahi siasí ʻa e fakafiefiá, meʻa fakalotomāfaná, mo e ngaahi meʻa manakoa fakaemāmaní kae ʻikai ko e fakahinohino mei he Folofola ʻa e ʻOtuá. Lolotonga ʻoku sio ʻa e kau maʻu lotu ʻe niʻihi ki he ngaahi liliú ko e ngaahi feʻunuʻaki ia ʻoku fiemaʻu ki he ngaahi tuʻunga moʻoni ʻo e māmani ʻi onopōní, ʻoku fifili ʻa e kakai loto-moʻoni tokolahi pe kuo hē nai ʻa e ngaahi siasí mei he fekau naʻe ʻomai ʻe Sīsuú. Tau sio angé ki he ngaahi ākenga kuo muimui ki ai ʻa e ngaahi siasí ʻi he ngaahi hongofuluʻi taʻu ki mui ní.