Naʻe Fakahaofi ʻEna Nofo Malí

ʻI ʻAfilika Tonga naʻe fakatokangaʻi ai ʻe ha pule ngāue ʻa e taha ʻo ʻene kau ngāué ko Bella, ʻoku ʻi ai ʻene ngaahi palopalema fakaenofomali. Ko ia naʻe kole ai ʻa e pule ngāué kia Thandi, ko e taha ʻo e Kau Fakamoʻoni ʻa Sihová, ke ne talanoa mo Bella. Naʻe ʻilo ai ʻe Thandi ne fili ʻa Bella ke veteʻi hono husepānití.

Naʻe ʻoange ʻe Thandi kia Bella ha tatau ʻe ua ʻo e tohi Ko e Fakapulipuli ʻo e Fāmili Fiefiá peá ne fakalototoʻaʻi ia ke ne ʻoange ha tohi ʻe taha ki hono husepānití. Naʻe fai ia ʻe Bella. ʻI he uike ʻe taha mei ai naʻe ʻiloʻi ai ʻe Thandi naʻe lau ʻe he husepāniti ʻo Bella ʻa e tohí pea naʻe fakalakalaka ai ʻena moʻui fakafāmilí. ʻI he māhina ʻe tolu mei ai naʻe tala ange ʻe Bella kia Thandi kuo fakahaofi ʻe he ʻOtuá ʻena nofo malí fakafou ʻi heʻena lotu ki ai pea mo e tohi Fāmili Fiefiá. Kae kehe, naʻe ʻikai ko e ngataʻanga pē ia ʻo e meʻa naʻe hokosiá.

ʻI he fanongo ʻa e pule ngāue ʻo Bella ki he meʻa naʻe hokó, naʻá ne fokotuʻu atu ke maʻu ʻe he kau ngāué kotoa ʻa e tohí. Ne ʻosi angé, naʻe laka hake ʻi he teaú ʻa e ngaahi tatau ʻo e tohi peesi 192 ko e Fāmili Fiefiá naʻe ʻoange ki he kau ngāue ʻo e kautahá. ʻI he lotolotonga ʻo e ngaahi vahe mohu fakahinohino ʻo e tohí ʻoku ʻi ai ʻa e “Kapau ʻOku Meimei Movete ʻa e Nofo Malí,” “Maluʻi Ho Fāmilí mei he Ngaahi Tākiekina Fakatupu Maumaú,” mo e “Tauhi Maʻu ʻa e Melinó ʻi Ho Fāmilí.”

Te ke kole nai ha tatau ʻo e Fakapulipuli ʻo e Fāmili Fiefiá ʻaki hono fakafonu ʻa e kūponi ʻoku ʻoatu hení pea meiliʻi ia ki he tuʻasila ʻoku hā ʻi he kūponí pe ki ha tuʻasila feʻungamālie ʻi he peesi 5 ʻo e makasini ko ʻení.

□ ʻI he ʻikai kounaʻí, ʻoku ou kole atu ha tatau ʻo e tohi Ko e Fakapulipuli ʻo e Fāmili Fiefiá.

□ Kātaki ʻo fetuʻutaki mai kiate au ʻo fekauʻaki mo ha ako Tohi Tapu taʻetotongi ʻi ʻapi.