‘Ko ha Toloa ko Sihova Pē ʻe Lava Ke Ne Fakaavá’
◼ ʻI he 2007, naʻe mole ai mei he taʻu ono ko Erika mo e taʻu fā ko Mattia ʻa ʻena tamaí ʻi he maté. Kae kehe, ko e mamahi ʻa e ongo tamaikí naʻe fakafiemālieʻi ia ʻe he ʻamanaki ʻo e toetuʻú.—Ngāue 24:15.
ʻOku saiʻia ʻa Erika ke vahevahe ki he niʻihi kehé ʻa ʻene ʻamanaki makatuʻunga ʻi he Tohi Tapú, tautefito ʻi hono ʻapiakó ʻi Sisilī. Ko e fakatātaá, ʻi he pehē ʻe hono kaumeʻa ko Beatrice kuo ʻi hēvani he taimi ko iá ʻa e tamai ʻa Erika, naʻe tali ange ʻe Erika ʻi he anga-lelei ʻoku fakahaaʻi ʻe he Tohi Tapú ia ʻa e meʻa kehe. “Ko ia ʻokú ne ʻi fē leva?” ko e ʻeke ange ia ʻe Beatrice.
“ʻI he fonualotó,” ko e tali ia ʻa Erika. ʻI he taimi ko iá, naʻe loto ʻa Beatrice ke ʻiloʻi pe ko e hā ʻa e fonualoto.
“ʻOku hangē ia ha toloa ʻoku fakaava mo tāpuní,” ko e fakamatala ia ʻa Erika. “Ka ko e taimi pē ʻoku tāpuni ai ʻa e toloá, heʻikai lava ke ke fakaava ia. Ko Sihova pē ʻe lava ke ne fakaava iá ʻi he taimi ʻe hoko mai ai ʻa e māmani foʻoú.”
Naʻe toki fakamatalaʻi leva ʻe Erika ki hono kaumeʻá ko Sihova ʻa e huafa ʻo e ʻOtuá, te ne ʻomai ha palataisi ki he māmaní, pea heʻikai ke toe ʻi ai ha puke, pea ko e kau maté te nau toe moʻui. Naʻe kole ange leva ʻe Erika kia Beatrice ke ne ʻeke ki heʻene faʻeé pe ʻe sai pē ke ne ʻoange haʻane meʻaʻofa ʻa ia ko ha tohi ʻoku fakamatala ai ki he ngaahi meʻa ko ení.
ʻI heʻene fakapapauʻi kuo fakaʻatā ʻe he faʻē ʻa Beatrice, naʻe ʻoange ʻe Erika ki hono kaumeʻá ha tatau ʻo e tohi Ako mei he Faiako Lahí. ʻOku hokohoko atu ʻa e talanoa ʻa Erika ki he niʻihi kehé fekauʻaki mo e ngaahi meʻa ʻokú ne ako mei he Tohi Tapú pea kuo aʻu ʻo ne ʻoange ʻa e tohi ʻa ia naʻe lave ki ai ʻi ʻolungá ki heʻene faiakó.
Ko e moʻoni, ko Erika mo hono kiʻi tuongaʻané ʻoku kei ai ʻa e ngaahi mōmeniti ʻokú na loto-mamahi ai koeʻuhi ko e mole ʻa ʻena tamaí. Ka ko e ʻamanaki ʻo e toetuʻú ʻokú ne ʻai ke na ongoʻi lelei ange. Ko e ongo tamaikí ni, ʻi he hangē ko e tokolahi kehe takatakai ʻi he māmaní, ʻoku nau ʻoatu ʻa e fakamālō kia Sihova, ko e ʻOtua ʻo e fakafiemālie moʻoní.—Mātiu 21:16; 2 Kolinito 1:3, 4.
ʻE lava ke ke kole ha tatau ʻo e tohi fakatātā fakaʻofoʻofa peesi 256 ko ení, ʻa ia ʻoku lahi tatau hono pēsí mo e makasini ko ení. Fakafonu pē ʻa e kūponi ʻoku ʻoatu hení pea meiliʻi ia ki he tuʻasila ʻoku ʻoatú pe ki ha tuʻasila feʻungamālie ʻoku fakahokohoko ʻi he peesi 5 ʻo e makasini ko ení.
[Fakatātā ʻi he peesi 32]
❑ ʻI he ʻikai kounaʻí, ʻoku ou kole atu ha tatau ʻo e tohi ʻoku hā hení.
Fakahaaʻi ʻa e leá.
❑ Kātaki ʻo fetuʻutaki mai kiate au ʻo fekauʻaki mo ha ako Tohi Tapu taʻetotongi ʻi ʻapi.
[Fakatātā ʻi he peesi 32]
Hingoa
Tuʻasila
Kolo Fonua Fika ․
Jehovah’s Witnesses, PO Box 75142, Manurewa, Manukau 2243, New Zealand
[Fakatātā ʻi he peesi 32]
www.watchtower.org
[Fakatātā ʻi he peesi 32]
AKO MEI HE
FAIAKO LAHÍ