“ʻOua Naʻa Mou Lotomoʻua”
“Naʻe ʻosi kotoa ʻema paʻanga ʻi he pangikeé fakataha mo e paʻanga kotoa naʻá ma fakahū ʻi he hingoa ʻo ʻema fānaú. ʻI he ngaahi māhina lahi, naʻá ma hala ai ʻi ha paʻanga hū mai.”
● Naʻá ku fakalele ha ʻapiako ʻi ha feituʻu ʻuta ʻi ʻInitia, pea naʻe lele lelei ʻaupito. ʻI he taimi ʻe taha ʻoku fakafuofua ko e kau ako ʻe toko 500 naʻe hū ki aí. Naʻe kamata leva ke ʻomai ʻe ha ʻapiako ʻiloa ʻi he kolo lahí ha ʻū pasi ki homau feituʻú, pea naʻa nau ʻai ke faingofua ʻa e hū ki honau ʻapiakó. ʻOku lava ke mahinongofua ʻa e ʻuhinga naʻe hiki ai ʻa e tokolahi ʻo ʻeku fānau akó ki he ʻapiako ʻi he kolo lahí. Ko hono moʻoní, naʻe holo ai ʻa e tokolahi ʻo e kau ako ʻi hoku ʻapiakó fakafuofua mei he toko 500 ki he toko 60 nai. Ko e toe kovi angé, ʻi he ofi ki he taimi ko iá naʻe ʻikai fai ai ʻe ha ʻōfisa ako ki haʻama aleapau fakapaʻanga, pea naʻá ne kei moʻua mai kiate au. ʻI he fuʻu tokolahi ʻo e kau ngāue ke totongi ʻi he ʻapiakó, naʻá ku fehangahangai ai mo ha tuʻunga faingataʻaʻia fakapaʻanga.
Naʻa mau tangutu hifo fakafāmili ʻo talanoa ki he tuʻunga ko iá. Naʻa mau fakahāhā kotoa ha laumālie feilaulauʻi-kita ʻi heʻemau feinga ke muimui ʻi he ekinaki ʻa Sīsū ke tauhi maʻu ha ‘mata huʻufataha’ ʻi he meʻa fakapaʻangá—ʻi hono toe fakalea ʻe tahá, ke ʻoua ʻe fakatau ha meʻa ʻo lahi ia he meʻa ʻoku mau maʻú. (Mātiu 6:22, 25) Naʻe pau ke tuku ʻi ha taimi ʻemau ngāueʻaki ʻemau kaá koeʻuhi ko e totongi ʻo e penisiní mo hono tokangaʻí. Naʻa mau holoki ʻemau fakamole ki he meʻakaí ʻaki ʻemau faifakatau ʻi he efiafi poʻulí, ʻi he taimi naʻe holo hifo ai ʻa e totongi ʻo e meʻakai naʻe toé. Naʻe toe pau ke mau fakasiʻisiʻi ʻa e lahi ʻo e meʻakai naʻa mau kaí he houa kai taki taha.
Ko e Kau Fakamoʻoni ʻa Sihova kimautolu, pea ʻi he tuʻunga ko iá ʻoku mau ongoʻi ʻoku mahuʻinga ke fakatahataha mo e kaungātuí ʻi he ngaahi fakataha faka-Kalisitiané. (Hepelu 10:25) Ko ia neongo naʻe faingataʻa ʻa homau tuʻunga fakapaʻangá, naʻa mau fakapapauʻi ke ʻoua ʻe liʻaki ʻa e ngaahi fakatahá mo e ʻasemipilií—neongo kapau naʻe ʻuhinga iá te mau fononga mamaʻo. Ko ʻemau ngāue fakafaifekaú—ʻa ia ʻoku kau ki ai ʻa hono akoʻi ʻo e kakaí fekauʻaki mo e Tohi Tapú—ʻoku kau ki ai ʻa e ʻalu ki he ngaahi feituʻu ʻoku mamaʻo. Naʻa mau ngāueʻaki ha sikuta kae ʻikai ko ha kā ki he ngāué ni. Ko e moʻoni, ʻoku ʻikai toe laka hake he toko uá naʻe lava ke na heka sikutá.
Ka naʻe ʻikai ʻuhinga eni iá naʻe siʻi ai e taimi naʻa mau fakamoleki ʻi he ngāue fakafaifekaú. ʻI hono kehé, ko hoku malí mo ʻema ongo tamaiki fefiné naʻa nau kamata fakamoleki ʻa e taimi lahi ange ʻi he talanoa ki he niʻihi kehé fekauʻaki mo e Tohi Tapú. Naʻa nau ʻalu mo foki ʻi he taimi ʻe niʻihi ʻi he kilomita ʻe ono ki he valu ke fai ʻa e ngaahi ako Tohi Tapu ʻi ʻapi mo e faʻahinga mahuʻingaʻiá. Ko au mo hoku fohá naʻá ma toe fai ʻa e feinga ke fakamoleki ʻa e taimi lahi ange ʻi hono akoʻi ʻa e niʻihi kehé fekauʻaki mo e Tohi Tapú.
ʻOku kiʻi lelei ange he taimí ni ʻa homau tuʻunga fakapaʻangá. Neongo ia, ʻi homau ʻahiʻahí, kuo mau ako ai ʻi he tuʻunga ko ha fāmilí ke ʻoua te mau fuʻu fakamahuʻingaʻi ʻa e koloa fakamatelié. Naʻa mau toe ako foki ke ʻoua ʻe loto-moʻua tōtuʻa fekauʻaki mo e ngaahi meʻa ʻoku ʻikai lava ke mau mapuleʻí. Kuo mau ʻiloʻi ko e Sāme 55:22 ʻoku tautefito ʻene fakalototoʻá. ʻOku fakahaaʻi ai: “Li hoʻo kavenga kia Sihova, he te ne poupou koe ʻe ia: ʻE ʻikai te ne tuku ʻa e maʻoniʻoni ke ueʻia ʻo taʻengata.” Naʻe fakamoʻoniʻi peseti ʻe 100 ʻa e moʻoni ʻo e ngaahi lea ko iá lolotonga ʻa e vahaʻa taimi ʻo ʻemau faingataʻaʻia fakapaʻangá!—Tānaki mai.