“ʻOku Ou Fiemaʻu ha Lea Fakafiemālie Meiate Koe”
● Naʻe maʻu ʻe he ʻōfisi vaʻa ʻo e Kau Fakamoʻoni ʻa Sihova ʻi Mekisikoú ʻa e tohi ko ení mei ha fefine ʻoku ngāue ʻi ha ʻapiako ʻoku tokangaʻi makehe ai ʻa e faingataʻaʻia fakaesinó mo e puke fakaʻatamaí. Naʻá ne tohi: “ʻI he ʻaho 9 ʻo Meé, naʻe hiki atu ai ʻa ʻeku faʻē ʻofeiná. ʻOku ʻikai lava ke u fakamatalaʻi ʻa ʻeku ongoʻí ʻi heʻene mole atú. ʻI ha ngaahi māhina siʻi ki muʻa ke ne maté, naʻá ku fai ai ha fekumi ʻi heʻeku ngāue ki he kaveinga ko e thanatology, ko e ako ki he maté mo e founga ke fekuki fakaʻatamai ai mo iá. Naʻá ku fakakaukau ʻe tokoniʻi foki ai mo au, ka naʻe ʻikai.”
Pea ʻi he taha ʻo e ngaahi mōmeniti ʻo e loto-mamahí, naʻá ne lotu ai ki he ʻOtuá, ʻo pehē, “ʻOku ou fiemaʻu ha lea fakafiemālie meiate koe.” “ʻI he pō ko iá,” naʻá ne pehē, “naʻá ku lau ʻa e polosiua ʻI he Mate ha Taha ʻOkú Ke ʻOfa Ai. Naʻá ku ongoʻi naʻe tohi mai ia kiate au. ʻOku fakahaaʻi ai ʻoku sai pē ke tangi. ʻI he konga ‘ʻE Anga-Fēfē ʻEku Fekuki mo Hoku Loto-Mamahí?’ ʻoku pehē ai: ‘ʻOua ʻe fakafuofuahalaʻi ʻa e mahuʻinga ʻo e lotú. . . . ʻOku ʻi ai hono ola ʻo e tokoni ʻoku tokonaki mai ʻe he ʻOtuá. . . . ʻOku moʻoni, ʻoku ʻikai ke toʻo atu ʻe he tokoni ʻa e ʻOtuá ʻa e mamahí, ka ʻokú ne ʻai ia ke faingofua ange ʻa hono fuesiá. ʻOku ʻikai ʻuhinga ia ʻo pehē ʻe ʻikai te ke toe tangi pe ʻe ngalo ʻiate koe ʻa e tokotaha naʻá ke ʻofa aí. Ka ʻoku malava ke ke toe foki ki he tuʻunga lelei.’ ʻOku tokoni ʻa e ngaahi lea ko iá.”
Kapau kuo mole ha taha naʻá ke ʻofa ai ʻi he maté peá ke ongoʻi ʻa e fiemaʻu ʻo ha lea fakafiemālie, mahalo pē te ke maʻu, pe ko ha tokotaha ʻokú ke ʻiloʻi, ʻa e fiemālie mei hono lau ʻa e polosiua peesi ʻe 32 ʻI he Mate ha Taha ʻOkú Ke ʻOfa Ai.
ʻE lava ke ke kole ha tatau ʻaki hono fakafonu ʻa e kūponi ʻoku ʻoatu hení pea meiliʻi ia ki he tuʻasila ʻoku fakahaaʻi ʻi he kūponí pe ki ha tuʻasila feʻungamālie ʻi he peesi 5 ʻo e makasini ko ení.
❑ ʻI he ʻikai kounaʻí, ʻoku ou kole atu ha tatau ʻo e polosiua ʻoku fakahaaʻi hení.
❑ Kātaki ʻo fetuʻutaki mai kiate au ʻo fekauʻaki mo ha ako Tohi Tapu taʻetotongi ʻi ʻapi.