Meʻa Kuo Leaʻaki ʻe he Niʻihi Kehé

Falanisē “Ko e Kau Fakamoʻoni ʻa Sihová ko e kau tangataʻifonua kinautolu ʻoku nau tokaʻi ʻa e ngaahi lao ʻa e Lepupiliká. . . . ʻOku ʻikai te nau hoko ʻo fakatuʻutāmaki ki he maau ʻa e kakaí. ʻOku nau ngāue, totongi tukuhau, kau ʻi he fakalakalaka fakaʻekonōmika ʻa hotau fonuá pea nau fai ʻa e foaki ki he kau faingataʻaʻiá. Ko e tuifio ʻa e kakai ko eni mei he ngaahi matakali kehekehe mo e ngaahi tupuʻanga kehekehe, ʻi heʻenau fakataha fakatahataha ʻi he melinó, ko ha meʻa fakafiefia ia ke sio ki ai. . . . Kapau ko e tokotaha kotoa pē ko e Kau Fakamoʻoni ʻa Sihova, ko kimautolu kau polisí ʻe ʻikai haʻamau ngāue.”—Ko e Fakafofonga ia ʻo ha ʻiunioni ʻo e kau polisi Falaniseé.

ʻIukalaine “Ko e Kau Fakamoʻoni ʻa Sihová ʻoku nau fakahūhū ki heʻenau fānaú ʻa e ngaahi tefitoʻi moʻoni fakaeʻulungaanga māʻolunga. ʻOku nau akoʻi ʻenau fānaú ke fakaʻehiʻehi mei he tōʻonga, ngaahi ngāue pea naʻa mo e ngaahi fakakaukau ʻa ia, [lolotonga] ʻoku lau ia ʻe he māmani ʻo e ʻaho ní ko ha meʻa mahení, ʻe lava ke fakatuʻutāmaki ia ki he fānaú tonu mo e niʻihi kehé. Ko ia ai, ʻoku nau sinaki tapou ki heʻenau fānaú fekauʻaki mo e ngaahi fakatuʻutāmaki ʻo hono ngāueʻaki ʻa e faitoʻo konga tapú, ifi tapaká mo hono ngāuehalaʻaki ʻa e ʻolokaholó. ʻOku nau ʻiloʻi ʻa e mahuʻinga ʻo e faitotonú mo e ngāue mālohí. . . . ʻOku akoʻi ʻe he Kau Fakamoʻoni ʻa Sihová ki heʻenau fānaú ʻa e ngaahi ʻulungaanga taau, ke tokaʻi ʻa e kau maʻu mafaí, faʻahinga kehe tāutaha mo ʻenau koloá pea nau hoko ko e kau tangataʻifonua tauhi lao.”—The History of Religion in Ukraine, ʻetitaʻi ʻe Palōfesa Petro Yarotskyi.

ʻĪtali “Ko e toko tolu mano ʻi he Sitētiume ʻOlimipikí naʻa nau sīlongo . . . ʻIkai ha fakaveve, ʻikai ha longoaʻa, ʻikai ha kaikaila. Ko e meʻa ia naʻe hā ʻi he Sitētiume ʻOlimipikí ʻaneafi . . . ʻIkai ha tuhutuhu ngalingali taʻetaau, ʻikai ha ifi tapaka, ʻikai ha ngeʻesi kapa [pia]. Ko e ngaahi Tohi Tapu pē ʻoku fakaava, kakai ʻoku hiki nouti, mo e fānau ʻoku tangutu fakalongolongo.”—Ko e līpooti ia ʻa e L’Unità fekauʻaki mo ha fakataha-lahi ʻa e Kau Fakamoʻoni ʻa Sihová ʻi Loma.

Pilitānia “Ko e ʻAlekitīkoni ʻo Cheltenham naʻá ne pehē [ko e Siasi ʻIngilaní] naʻa nau fiemaʻu ha ngaahi kulupu ʻo e kakai ʻosi fakatapui ke nau ʻalu takai holo hangē ko e Kau Fakamoʻoni ʻa Sihová.”—The Gazette, Taiosisi ʻo Gloucester.

Netaleni Ko e ngaahi kaungāʻapi ofi ki he Fale Fakatahaʻanga ʻi he kolo ko Leeuwarden naʻa nau ʻoatu ki he Kau Fakamoʻoni ʻi aí ha tohi ʻa ia naʻe hā ai: “ʻOku mau loto ke vikia kimoutolu ʻi hoʻomou tākiekina lelei lahi ʻi he fōtunga ko ia ʻo e Noorderweg [Hala Noorder]. Ko homou kau mēmipá ʻoku nau teunga lelei maʻu pē, pea ʻoku nau ʻulungaanga lelei ʻaupito. Ko e fānaú ʻoku nau anga-lelei ʻaupito, ko e kakai lalahí ʻoku ʻikai ʻaupito te nau tau taʻefakalao holo ʻenau ngaahi meʻalelé, ʻoku ʻikai te nau laku veve ʻi he halá, pea ko e konga ʻapi takatakai ʻi he Fale Fakatahaʻangá ʻoku maʻa mo maau maʻu pē. ʻOku mau ʻamanaki te mou hokohoko atu ko homau ngaahi kaungāʻapi ʻi ha taimi lōloa, he ʻoku mau fiefia ʻaupito ke maʻu kimoutolu.”

Mekisikou Ko Elio Masferrer, ko ha palōfesa mo ha tokotaha fekumi ʻi he ʻApiako Fakafonua ʻo e ʻAtolopolosiá mo e Hisitōliá, naʻá ne pehē ko e Kau Fakamoʻoní naʻa nau tokoniʻi ʻa e kakai kuo nau “faingataʻaʻia ʻi he ngaahi fakatamaki lahi fakafāmili, hangē ko e tohotohó, fakamālohi ʻi he fāmilí, maʻu ʻe he ʻolokaholó, mo e maʻunimā ʻe he faitoʻo kona tapú.” Naʻá ne pehē, ko e ngaahi akonaki ʻa e Kau Fakamoʻoni ʻa Sihová, “ʻokú ne ʻoange ʻa e ngeia ki he kakai ko ia ne nau ongoʻi naʻe ʻikai ke nau fuʻu mahuʻingá” pea ʻai ai ke ala malava ʻo nau “moʻui ʻo ʻikai ha ngaahi palopalema mafatukituki ʻaki hono fai ʻa e ngaahi meʻa ʻoku fakahōifua ki he ʻOtuá.”—Ko e fakamatala ia ʻa e nusipepa Excélsior.

Pelēsila Naʻe līpooti ʻe ha nusipepa: “Ko e kautaha ʻa e Kau Fakamoʻoni ʻa Sihová ʻoku mātuʻaki makehe moʻoni. Ko e ngaahi feituʻu ʻoku nau fakatahataha aí ʻoku maʻa maʻu pē. Ko e meʻa kotoa pē ʻoku mātuʻaki fokotuʻutuʻu maau . . . ʻI he taimi ʻoku ʻosi ai ʻenau ngaahi meʻá, ʻoku maʻa ange ʻa e feituʻú ia ʻi he taimi ki muʻa ke nau ngāueʻaki iá. Lolotonga ʻa e ngaahi malangá, ʻoku nau mātuʻaki sīlongo. ʻIkai ke nau feteketekeʻi pe fepakipaki. ʻOku lotolotoi ai ʻa e ngaahi ʻulungaanga leleí. . . . ʻOku ʻikai ko ha toe loi, ko ha lotu maau moʻoni. ʻOku nau ʻilo ʻa e ʻuhinga ʻo e lotu ki he ʻOtuá.”—Comércio da Franca.

ʻOku tuipau ʻa e Kau Fakamoʻoni ʻa Sihová ʻoku ʻafioʻi lelei ange ʻe he Tokotaha-Fakatupú ʻi ha toe taha ʻa e ngaahi tefitoʻi moʻoni ʻoku totonu ke moʻuiʻaki ʻe heʻene fakatupu fakaetangatá. (Aisea 48:17, 18) Ko ia ai, ko e Kau Fakamoʻoní ʻoku nau ʻoatu kiate ia ʻa e lāngilangi ʻi he taimi ʻoku fai ai ʻe he niʻihi kehé ʻa e ngaahi fakamatala lelei ko e ola ia honau ngaahi ʻulungaanga leleí. Naʻe pehē ʻe Sīsū: “Ke ulo atu hoʻomou māma ke hā ki he kakai, ke nau mamata ki hoʻomou ngāhi ngaue lelei, pea fakamāloʻia ʻa hoʻomou Tamai ʻoku ʻi Hevani.”—Mātiu 5:16.

[Fakamatala ʻi he peesi 4]

“ʻOku akoʻi ʻe he Kau Fakamoʻoni ʻa Sihová ki heʻenau fānaú ʻa e ngaahi ʻulungaanga taau . . . pea nau hoko ko e kau tangataʻifonua tauhi lao”

[Fakamatala ʻi he peesi 5]

“. . . Ko e kakai mei he ngaahi matakali kehekehe mo e ngaahi tupuʻanga kehekehe, ʻi heʻenau fakataha fakatahataha ʻi he melino . . .”