Ko e Fāʻeleʻi ʻo Sīsuú ʻo Aʻu ki Heʻene Maté

Naʻe fekauʻi ʻa e ʻāngelo ko Kepaleli ki ha finemui lelei ko hono hingoá ko Mele. Naʻá ne tala ange ki ai te ne maʻu ha tama ʻa ia ʻe pule ko ha tuʻi ʻo taʻengata. Ko e tamá, ko Sīsū, naʻe fāʻeleʻi ia ʻi ha fale ki he fanga manu, ʻa ia naʻe ʻaʻahi ki ai ʻa e kau tauhi-sipí. Ki mui mai, naʻe tataki ʻe ha foʻi fetuʻu ha kau tangata mei he Hahaké ki he kiʻi tamá ni. Te tau ako ʻo ʻilo ʻa e tokotaha naʻá ne ʻai kinautolu ke nau sio ki he fetuʻu ko iá, pea mo e founga naʻe fakahaofi ai ʻa Sīsū mei he ngaahi feinga ke tāmateʻi iá.

Ko hono hokó, ʻoku tau ʻilo ʻa Sīsū, ʻi heʻene taʻu 12, naʻá ne talanoa mo e kau faiako ʻi he temipalé. ʻI he taʻu ʻe taha valu ki mui mai ai naʻe papitaiso ai ʻa Sīsū, peá ne kamata ʻa e ngāue fakamalanga mo e fakafaiako ʻo kau ki he Puleʻangá ʻa ia naʻe fekau mai ai ia ʻe he ʻOtuá ki māmani ke ne fai. Naʻe fili ʻe Sīsū ha kau tangata ʻe toko 12 ʻo ʻai kinautolu ko ʻene kau ʻapositolo, ke tokoni kiate ia ʻi he ngāue ko ʻení.

Naʻe fai foki ʻe Sīsū ha ngaahi mana lahi. Naʻá ne fafangaʻaki ʻa e kakai ʻe laui afe ha fanga kiʻi ika mo ha ngaahi foʻi mā. Naʻá ne fakamoʻui ʻa e mahaki pea aʻu ʻo ne fokotuʻu ʻa e kau mate. Ko hono fakaʻosí, te tau ako ʻo kau ki he ngaahi meʻa lahi naʻe hoko kia Sīsū he lolotonga ʻa e ʻaho fakaʻosi ʻo ʻene moʻuí, pea mo e anga ʻo hono tāmateʻí. ʻOku fakafuofua ko e ngāue fakamalanga ʻa Sīsuú naʻe feʻunga mo e taʻu ʻe tolu mo e konga, ko ia ʻoku lave ʻa e KONGA 6 ki ha vahaʻa taimi ʻoku lahi siʻi hake ʻi he taʻu ʻe 34.