Talateu

Siʻi Kau ʻOfa kia Sihova:

“ʻE faifai pea mahino kiate kimoutolu ʻa e moʻoni, pea ʻe fakatauʻatāina ʻa kimoutolu ʻe he moʻoni,” ko e lea ia ʻa Sīsuú. (Sione 8:32) He fakalototoʻa ē ko e ngaahi lea ko iá! ʻIo, ʻoku malava ke ʻiloʻi ʻa e moʻoní, naʻa mo e ʻi he “kuonga fakamui” faingataʻa ko ʻeni ʻoku lahi fau ai ʻa e loí mo e taʻemoʻoní. (2 Timote 3:1) ʻOkú ke manatuʻi ʻa hoʻo fuofua ʻiloʻi ʻa e moʻoní ʻi hono fakamatalaʻi ʻi he Folofola ʻa e ʻOtuá? He toki meʻa fakafiefia ē ne ke hokosiá!

Kae kehe, hangē pē ko ia ko e mahuʻinga ke maʻu ha ʻilo totonu ki he moʻoní pea kau tuʻumaʻu ʻi he talanoa ki he niʻihi kehé ʻo fekauʻaki mo iá, kuo pau ke tau toe ʻai ʻetau tōʻongá ke fehoanaki mo e moʻoní. Ke fai iá, ʻoku fiemaʻu ke tau tauhi kitautolu ʻi he ʻofa ʻa e ʻOtuá. Ko e hā ʻoku kau ki aí? Ko e ngaahi lea ʻa Sīsū ʻi he pō ki muʻa heʻene pekiá ʻokú ne tali ʻa e fehuʻí ni. Naʻá ne tala ki heʻene kau ʻapositolo faitōnungá: “Kapau te mou tauhi ʻeku ngaahi tuʻutuʻuni, te mou nofo maʻu ʻi heʻeku ʻofa; ʻo hangē foki kuo u tauhi ʻe au ʻa e ngaahi tuʻutuʻuni ʻa e Tamai, pea u nofo maʻu ʻi he ʻofa aʻana.”—Sione 15:10.

Fakatokangaʻi naʻe nofo maʻu ʻa Sīsū ʻi he ʻofa ʻa e ʻOtuá ʻi heʻene tauhi ʻa e ngaahi tuʻutuʻuni ʻa ʻene Tamaí. Ko e meʻa tatau tofu pē kiate kitautolu ʻi he ʻaho ní. Ke nofo maʻu ʻi he ʻofa ʻa e ʻOtuá, ʻoku fiemaʻu ke tau ngāueʻaki ʻa e moʻoní ʻi heʻetau moʻuí he ʻaho kotoa pē. ʻI he efiafi tatau pē, naʻe pehē ʻe Sīsū: “Kapau ʻoku mou ʻilo ʻa e ngaahi meʻa ko ia, pea ko e toki kakai monuʻia kimoutolu, ʻo kapau te mou fai ia.”—Sione 13:17.

Ko ʻemau ʻamanaki loto-moʻoní ia ʻe hanga ʻe he tohí ni ʻo tokoniʻi koe ke hokohoko atu hono ngāueʻaki ʻa e moʻoní ʻi hoʻo moʻuí pea tauhi ai koe “ʻi he ʻofa ʻa e ʻOtua . . . ʻo aʻu ki he moʻui taʻengata.”—Siutasi 21.

Kulupu Pule ʻo e Kau Fakamoʻoni ʻa Sihová