Ko e Hā ʻOku Mau Maʻu Ai ʻa e Ngaahi ʻAsemipilī Lalahí?

Ko e hā ʻoku fofonga fiefia pehē ai ʻa e kakai ko ení? ʻOku nau maʻu ʻa e taha ʻo ʻemau ngaahi ʻasemipilií. Hangē ko e kau sevāniti ʻa e ʻOtuá ʻi he kuohilí, ʻa ia naʻe fakahinohinoʻi ke nau fakatahataha tuʻo tolu ʻi he taʻú, ʻoku mau fakatuʻotuʻa atu ke fakatahataha fakataha ʻi he ngaahi kulupu lalahi ange. (Teutalōnome 16:16) ʻI he taʻu kotoa pē, ʻoku ʻi ai ʻemau ngaahi meʻa lalahi ʻe tolu ʻoku fai ai: Ko ha ʻasemipilī fakasēketi ʻaho ʻe taha tuʻo ua, pea mo ha fakataha-lahi fakavahe ʻaho ʻe tolu. ʻOku mau maʻu ʻaonga fēfē mei he ngaahi fakatahataha ko ení?

ʻOku nau ʻai ke mālohi ʻa ʻemau fetokouaʻaki faka-Kalisitiané. Hangē pē ko e fiefia ʻa e kau ʻIsilelí ʻi hono fakahīkihikiʻi ʻa Sihova “ʻi he ngaahi fuʻu fakatahá” pe ʻasemipilií, ʻoku mau fiefia foki ʻi he lotu fakataha kiate ia ʻi he ngaahi meʻa makehe ʻoku faí. (Saame 26:12, fakamatala ʻi laló; 111:1) Ko e ngaahi fakatahataha ko ení ʻoku ʻomai ai ha faingamālie ke feʻiloaki mo feohi ai mo e Kau Fakamoʻoni mei he ngaahi fakatahaʻanga kehé pe naʻa mo e ngaahi fonua kehé. ʻI he hoʻataá, ʻoku mau fiefia ai ʻi he maʻu meʻatokoni fakataha ʻi he feituʻu ʻasemipilií, ʻo tānaki atu ia ki he ʻātakai anga-fakakaumeʻa ʻo e ngaahi taimi fakalaumālie ko ení. (Ngāue 2:42) ʻOku mau hokosia tonu ai ʻa e ʻofa ʻokú ne fakafāʻūtahaʻi ʻemau “haʻohaʻonga fakakātoa ʻo e fanga tokouá” ʻi he māmaní.​—1 Pita 2:17.

ʻOku nau tokoniʻi kimautolu ke mau laka ki muʻa fakalaumālie. Naʻe toe maʻu ʻaonga foki ʻa e kau ʻIsilelí ʻi he “mahino kiate kinautolu ʻa e ngaahi lea” ʻo e Folofolá ʻa ia naʻe fakamatalaʻi ange kiate kinautolú. (Nehemaia 8:8, 12) ʻOku mau houngaʻia foki ʻi he fakahinohino Fakatohitapu ʻoku mau maʻu ʻi heʻemau ngaahi ʻasemipilií. Ko e polokalama taki taha ʻoku makatuʻunga ia ʻi ha kaveinga Fakatohitapu. Fakafou ʻi he ngaahi malanga mālie, ngaahi malanga fakakongokonga, mo hono fakatātaaʻi ʻo e ngaahi meʻa naʻe hoko tonú, ʻoku mau ako ai ʻa e founga ke fai ʻa e finangalo ʻo e ʻOtuá ʻi heʻemau moʻuí. ʻOku fakalototoʻaʻi kimautolu ʻi he taimi ʻoku mau fanongo ai ki he ngaahi hokosia ʻa e faʻahinga ʻoku nau fekuki lavameʻa mo e ngaahi pole ʻo e moʻuí ʻi he tuʻunga ko e kau Kalisitiane ʻi he taimi faingataʻa ko ení. ʻI he ngaahi fakataha-lahi fakavahé, ko e ngaahi tulama fakatātāʻí ʻokú ne ʻai ke hā moʻoni ange ʻa e ngaahi fakamatala ʻa e Tohi Tapú pea akoʻi mai ai kiate kimautolu ʻa e ngaahi lēsoni ʻaonga. ʻI he ʻasemipilī kotoa pē, ʻoku papitaiso ai ʻa e faʻahinga ko ia ʻoku nau loto ke fakahāhā ʻenau fakatapui ki he ʻOtuá.

• Ko e hā ʻoku hoko ai ʻa e ngaahi ʻasemipilií ko e ngaahi taimi fakafiefiá?

• Te ke maʻu ʻaonga fēfē nai mei hono maʻu ha ʻasemipilī?